كملت صلاة كال تقبل الله كتله اي لا هواي اتقبلها بالبوس مالتك بلله موووو حرام.. كال شمسوي قابل كفرت حبيبي وبسته
ضحكت ههههه خبل ما منك فايده.. لفيت السجاده وضميتها ورحت كعدت يمه كتله أيٌـ.YESـہٌَ شكو ماكو ليش اتٲخرت
ايااب.. ماكو شي شغل.. دا احجي وسمعت بطنها اطلع صوت ..كتلها شنو جوعانه
سنا.. هههه أيٌـ.YESـہٌَ
ايهاب.. وليش جوعانه حبيبي متاكلين.. كلت هيج وشفتها اخذت نفس بخنكه وتغيرت ملامحها.. كتلها اكو شي
سنا.. ايهاب والله مو قصدي ادوخك لو اشكيلك بس امك مجاي ترحمني فهمني ذنبي شنو وتعاقبني عليه..
تغلط وتحجي وتسب.. واسد اذني وما ارد عليها ولا اراددها واسكت
بس مو تمنعني من الكعده وياهم علاكل تكولي اكش من وجهج النكس.. ليش هلكد تكرهني فهمني شنو السويته بعدني عروس مشافت مني شي
ايهاب.. جريت نفس مديت ايدي لجيبي طلعت باكيت الجكاير جريت وحده وشغلتها.. وباوعتلها.. كتلها شنو الموضوع احجي
سنا.. ايهاب والله ممسويه شي اليوم اول يوم انضف بيه نضفت البيت كله وعادي ممحتاجه احد يساعدني
سويت الغده.. اشكال الوان الحجي سمعته واني واكفه اطبخ وسكتت.. كملت الغدا.. خذت الجدوره ومنعتني اكل وياهم.. ومخلصين كولشي طبخته
مهتميت.. كملت تنضيف وجعت ردت اكل لكيتها قافله الثلاجه بقفل.. ايهاب اني مو بنت فكر واكدر ادز عله بيت اهلي واخلي امي ادزلي اكل
بس ما اريد الكلمه تمسك.. عله ابوه اهله مينطون لمرته اكل..
ايهاب.. باعي سنا تعرفين احبج وميت بيج وامي رافضه هلزواج وغصب عليها اخذتج.. فتوقعي مراح تتقبلج..
اللي اريده منج حبيبي شكد مابيج تتحمليها لخاطري ما بيدي شي اسويه امي ما اكدر احاسبها و والله ما اخليج تحتاجين اي شي
هاي الثلاجه موجوده بغرفتج اترسها الج شنو تتمنين وتشتهين وعوفيها مره جبيره لتردين عليها وتحمليها الخاطري اذا صدوك اتحبيني لان والله ما بيدي شي اسويه
سنا.. تٲمر حبيبي انته لتضوج نفسك.. كولشي لعيونك يهون
ايهاب.. فديت عيونج اني.. يله كومي خل اخذج اعشيج واشبع كرشج بٲرقى مطعم
سنا.. هههه ميحتاج حبيبي دزلنا لفات فلافل منا كلش كافي
ايهاب.. دكومي لج اني هم جوعان المن اشتغل واتعب غير النه.. لتخافين عندي خير من الله
سنا.. ماشي حبيبي دقايق واكون جاهزه
ايهاب.. عله راحتج حياتي.. دخلت للحمام سبحت من تعب الشغل وطلعت بدلت مديت ايدي للكنتور دا اخذ فلوس
مباقي من الفلوس العندي غير 100 الف.. صرفتهن علعرس كلها.. اتذكرت ضام 4 ملايين يم امي.. كلت خل اروح اسحب منهن
نزلت صحت يوووم كالت غدير بالديوانيه امي دتصلي.. دخلت لكيتها فاتحه فاتحه فيلم عبد الحليم وصباح.. كلت لا تره هوايه دصلين ههههه ها يمه شو اليوم عبد الحليم
الام.. شنسوي نباوع ونشوف الدنيا شلون عاشو مثل حظي. ابوي واني طفله شمرني براس ابوك اكبر مني ب15 سنه لا خلانه نعشك ولا نشوف الحب خلينه نشوفه بٲفلام عبد الحليم شصار..
ايهاب.. هههههههاي ها يمه تردين تعشكين ما حاليلج ابوي😂😂 وينك يابه الحجيه ما عاجبها تريد تغيرك بواحد يشبه عبد الحليم
الام.. دنطم وكول شرايد
ايهاب.. يمه اريد الفلوس الضامهن عندج محتاجهن خلصن اللي عندي كلها علعرس
الام.. اي حقك تجيب وتشمر عله حلك هلجايفه
ايهاب.. هسه جايفه نضيفه شعليج اني قابل واريد اخذها نتعشه بره انطيني الفلوس يمه
الام.. ماكو فلوس لتصير مبذر ..متخاف عليك ما تعرف تلمك همها بس نفسها .. عوفهن لا تصرفهن
ايهاب.. يمه شنو تلمني.. اشتغل واتعب المن غير ارتاح بيهن واتونس اروح اطمهن منو كال عايشين باجر ..
بالعراق العضيم يا ساعه اطك عليك عبوه ويروح الاول والتالي تفيدني فلوس خليني اتمتع بيهن هسه احسنلي
الام.. ماكو روح ما انطيكياهن
ايهاب.. يمه شنو متنطينياهن عمي متنازل بمليون الج اخذيه وانطيني ال3 البقيه اريدهن لخاطر الله
الام.. كتلك ما انطيك.. غبي تاخذهن وتروح تصرفهن عله هلوصخه ام حلك الجايف وانته وراه مثل الطلي تكت فلوس
ايهاب.. ماشي يوم بسطه خليهن يمج اني اعرف شلون اخذهن..
صحت سناااااااااا كملتي.. نزلت كالت اي حبيبي كملت كتلها يله اطلعي.. مشيت رحت لبيت اخويه ستار
رحب بينا وكال عشاكم يمي كتله لا والله دايمه.. رايحين نتعشه بره سوه.. كال ها براحتكم.. اخذت ستار عله صفحه
وكتله ستار اريد 4 ملايين صديقي خطيه حيل محتاجهن واني ضام الفلوس يم امي وامي بالزياره واني كتله تعالي الساعه 10 انطيكياهن
جوه ايدك هيج مبلغ تنطينياه ومن تجي الوالده اخذ ال4 ملايين من عدها.. كال اي سهله هسه انزلهن الك..
راح جابهن واجه كتله مشكور وطلعنا.. اخذت منها 500 الف والباقي انطيته لسنا كتلها خليهن بجنطتج وديري بالج عليهن لحد منرجع ضميهن بالغرفه بمكان امن ..كالت بعيني
صعدنا السياره ومشيت للمنصور نتعشه هناك.. دخلنا مطعم كولش حلو وراقي دناكل وخابر ستار.. كال ليش تجذب وتكول الوالده بالزياره هاي امي بالبيت
كتله ستار فلوسي عد امي ومتقبل تنطينياهن علمود لا اطلع اني ومرتي نتعشى وهيه قافله الثلاجه عليها ومتخليها تاكل
ومانعتها تكابلهم علصينيه وتشاركهم الاكل.. ستار فدوه تحجي ويه امي وتتصرف لا والله اتخبل واطلع عن طوري تره تعبت..
مرتي لسه عروس مشافت منها شي خل شوي تتقبلها تشتري راحتي اعرف الام ادور راحة ابنها الا امي لازم نمشي حسب مزاجها
واذا خالفنه تسود عيشتنا.. كال هاهيه معليك اني اسحبهن من امي واحجي وياها اخذو راحتكم و لتفكر بهيج سوالف بعدك عريس اتمتعو
كتلها مشكور خويه مع السلامه.. سديته اعرف اخوي ايهاب السانه ما ينكدر ياخذ الحق من عين السبع
فعفتها عليه.. كملنا عشا ورحت اخذتها نفتر بالسياره .. كتلها ها اشونه الاكل انشالله شبع كرشج
سنا.. اي لا يخبببل لو هيج شبعة الكرش لو مينراد 😋 ههههع
ايهاب.. ههههه بالعافيه حياتي.. اسمعي اسمعي اليوم حسام ونصرت نزلو اغنيه الا اشرد جديده ذكرتج بيها بالدوام وحملتها علمودج
سنا.. شنو هيه.. شغلها.. وبديت اسمع ..اول حب بعمررررررك انيييي.. اول واحددد يبوسك اني.. اول دمعه نزلت منك اتذكر جانت بٲحظاني
باوعتله وضحكت ههههه تخبل.. بقينه نسمع وندردش ونضحك رجعنا للبيت متونسين.. كبل بدلنا ونمنا باحلى حب ورومانسيه
لليل نايمه عله اي ايهاب ومنطيته ضهري.. اسمع صوت ما اعرف شنو غريب دوخه وحجي ما افتهمه مغمضه عيوني..
فتحت عيني شوي الغرفه ضلمه واشوف واحد اسود طويل واكف ومبين بنص الضلام فزيت عله حيلي..
اباوع ماكو.. كمز ايهاب كال اسم الله حبيبي شبيج.. كتله ايهاب رجال اسود شفته هناك واكف..
كال بربج سنا شدتحجين الغرفه ضلمه يا رجال دتتحلمين نامي.. كتله ايهاب والله شفته وكعدت عله صوت غريب
كال لج بابا والله تتحلمين تعالي تعالي جرني لحضنه يقره عله راسي قران واني الخوف ماكل كلبي والله متٲكده شفت واحد مو حلم ليش مجاي تصدكني
ما رد بقى يتلو ايات عله راسي.. رجعت ضميت راسي بصدره واني ارجف من الخوف.. لشوي هديت ..ورجعت نمت..
كعدت الصبح عله صوت المنبه مال ايهاب للدوام.. كعد هوه كمت وياه.. كال ارجعي سته ونص شعندج كاعده
كتله لا خليني اكوم بس صراحه بعده النعاس كاتلني.. فتحت التلفزيون خليته علقران.. ورجعت للسرير
هوه يبدل كدامي واني اباوعله مطفيه واتذكر الشفته بليل.. اخر شي غفيت ما حسيت الا عله ايهاب وهوه يبوسني من راسي وطلع
فتحت عيني اخاف ابقى بالغرفه.. كمت اخذت ملابس ورحت للحمام بعدها نزلت نضفت البيت باوعت الثلاجه
رحمه اليوم ممقفوله.. فتحتها سويت ريوك حضرت الصينيه خليت كلاصات الجاي.. كعدو همه كلهم.. كتلها ماما الريوك جاهز وين تردين اخليه نتريك
باوعتلي صفح وصاحت.. غديررررر شيلي صينية الاكل ووديها بالغرفه مالتي نتريك ما اريد هيج شكول تكابلني علريوك
اجت غدير اخذت الصينيه من كدامي بكل صلافه بدون لا عيب ولا مستحه ولا كٲنو اني اللي سويت الزقنبوت..
عفتها.. طلعت بيضه سلكتها وخليتها بصمونه واكلت علواكف.. ورحت لغرفتي.. فتحت تلفزيون وكعدت اباوع لشوي نزلت سويت الغدا
سمعته اذن صعدت اصلي ..كملت نزلت لكيتهم ماخذين الجدوره وصابين ومكملين.. استغفرك رَبّـ❤ـيٌ صبرني..
خابرت ايهاب.. كتله حبيبي اذا تجي جيبلي وياك شي ..كال شنو بعدها نفس الوضع كتله اي
خطيه لشوي اجه محمل علاليك فواكه وانواع الاكل والمعلبات مله الثلاجه العينها كال لتمدين ايدج علثلاجه الجوه
شتردين هذا جبته والفلوس يمج شتحتاجين دزي ولتسوين وياهن متسوه علمود الاكل تصير مشكله.. كتله تٲمر حياتي هاهيه..
اخذت بكلام ايهاب مجرد انضف واطبخلهم وابد ما اكل وياهم ..كل اكلي بغرفتي.. ومن يجي ايهاب.. انزل اسوي عشا النا اني وياه
متحجي كدامه اذا اخذت شي من عدهم مثل بهارات او معجون بس الصبح تشيب راسي من الحجي.. كمت اتحمل واحاول ما اسمع لعيون ايهاب
فد يوم كاعده بغرفتي دا اباوع تلفزيون واسمع صوت جوه السرير.. باوعت والكه بزونه سوده كمزت بسرعه
فتحت الباب طلع كدامي ايهاب.. كال شبيج كتله بزونه سوده جوه السرير.. دنك كال ماكو خاف طلعت.. كتله منين تطلع الشبابيك مقفوله
والباب هسه فتحته بيدي.. ما اعرف شوف منين تطلع.. اوووف ربي شلون راح انام اخاف من البزازين اخاف بعدها بالفرفه
انوب سوده وعيونها حمر تجدح.. كال سويلي غدا.. كتله ماشي.. طبعا اشتريت مايكرو بغرفتي بدون ما احد يعرف علمود انحمي وناكل بدون ميعرفون
اذا تعرف هوه يجيبلي لحم ودجاج واشكال الاكل تكلب الدنيا عليه بالصياح.. فما اخليها تعرف وحته الثلاجه قافلتها دوم ومخليه المفتاح.. جوه الزوليه
خاف تدخل غرفتي وتباوع بيها وتحجي.. شسوي شلون نتحمل ما اعرف يله ما تضل غيمه سوده الله موجود ومايضيع تعب وصبر احد
كملت شغل فد مره ودخلت للحمام دا اسبح واباوع للبزونه السوده واكفه بالزاويه مال الحمام وتنفخ بوجهي
متت من الخوف انوب شصيح حته ايهاب مو هنا.. بقيت اصرخ عليها اهشها ماكو متروح..
درت وجهي دا اجيب ملابسي اريد ابدل رجعت باوعتلها ماكو مختفيه ما لكيتها.. استغفر الله هاي منين دخلت ومنين طلعت..
اباوع الحمام مابيه فتحه.. والباب المنيوم مابيه حته مجال من جوه وتدخل مسدود قفل.. يا الله راح اتخبل شنو هلبزونه انوب اني شلون اخاف من البزازين ياربي شلون
بدلت وصعدت لغرفتي.. دا امشط علمرايا وما ا احس الا شعري وكف ليفوك بطوله فتحت عيوني عله حيلهن جاي اتلمس بيه
وما احس الا راسي انركع بالمرايا وما حسيت عله شي ووكعت... يتبع
🌺🌺🌺🌺
اووووف الله لينطي كل واحد حقود وما يتمنه الخير الغيره😣.. متابعه ممتعه اتمناها الكم لا تنسو التصويت
#زينب_ماجـد