من تحت سقف الشقى أخذتني

30 والاخير

  تشرق شمس صباح اليوم الثاني تحمل لأبطالنا الـــأمـــــل من جديد بكل شيء !

قام وبدل ملابسه وتوضى وصلى صلاته ناظر لها وهي نايمه قرب لها وسحب البطانيه يغطيها ..فتحت عيونها وابتسمت له: صباح الخير..
رعد بحب:ياصباح النوور يا اجمل زوجه..
ارتبكت سديم من كلماته الي اول مره يقوله لها ..قامت واتجهت للمغسله غسلت وجها وبدلت ملابسها وصلت ..
رعد بهدوء: يلا ننزل نفطر ينتظرونا تحت؟
سديم قربت له وحطت ايده على وجه تتأمله وقالت :رعد..
رعد بشوق وحب قال..:لبيه؟
سديم تتفحص ملامح وجه من التعب ..: انا اشوف انك تحسنت ممكن تقولي وش فيك قبل؟
سكت شوي ورفع راسعه بثقه وقال: حبيبتي مافيني شي "ومسك ايدها جلسها وجلس ع الكنبه وقال":من وفاه امل الله يرحمها تعقدت من كل شي ولما يصير موقف يعصبني افقد هدوئي وعصبيتي عليك هذيك كله كانت من جراء موقف وفاه امل الله يرحمها..
سديم ..قالت بهدوء:الله يرحمهاا ..طيب والاوراق الي شفتها بدرجك وش مرضه هذا بالظبط؟
رعد :ماني مريض ولا شي والدكتوره الي يجي عندي هذا دكتور العائله ..كان ينصحني دايم ماعصب عشان ماتعب مثل ماتعبت من وفاه امل..هذا كل شي بس
ابتسمت له سديم وقالت:رعد كنت خايفه عليك ..من زمان نفسي اعرف سبب عصبيتك بس كنت اخاف منك...
ابتسم لها بحب:ما أنكر عصبيتي لكن بحاول اخفف منها عليك..
ضربته على بطنه بشويش وقالت:لازم تشيل هالعصبيه منك خلاص .."ووقفت " رعد ممكن طلب؟
رعد:انتي تامرين مو تطلبين؟
سديم :مممم نفسي اعرف سبب تغيرك علي عسا دووم بس
رعد:انتي ماتستاهلين الأ كل خير ياسديم وانا غلطت معك كثيررر قبل وهالحين بسوي لك الي تبين عشان بس تكونين مستانسه ..
سديم :اجل ابي اطلبك شي وماتردني؟
رعد:لا ماردك قولي..
مسكت ايده ومشت فيه لبرا
رعد:وين ماخذتني؟؟
سديم:مكان تعرفه مو غريب عليك .. يلا تعال..
مسكت ايده وهم يطلعون برا الفيلا ..واتجهت للحديقه الخلفيه المهجوره من الفيلا ووقفت عند مدخل الحديقه وسط اندهاش رعد وقالت:طلبي انك ترجع الحياه لهالمكان ..
رعد كشر وصار يتنفس بسرعه:بس ياسديم انا سكرت هالمكان من زمان ومحد يدخله ..
سديم:رعد انت لازم تخلي هالمكان يشع بالحياه ..صحيح زوجتك أمل توفت فيه بس رجع الذكريات الجميله فيه ..ازرعه الورد من جديد والكراسي الي من خشب رجعهاا من جديد والنخل والشجر الميت كله بنرجعه من جديد وبيصير المكان جميل صدقني..
رعد بهدوء:بس هالمكان قديم وشفتي لما طحنا بالحفره وش قرصك وقته ..
سديم:جيب عمال ينظفون المكان ويرتبونه والحفره الي طحنا فيه كنت بتسويها ايش؟
رعد بهدوء:مسبح...
سديم بحماس:ابني المسبح الي كنت بتسويه وجيب مهندس زراعي يشوف الشجر الميت ويزرعه من جديد واحد يصمم لنا جلسه غير الي مكسوره ...
ابتسم لها رعد:تدرين كنت رافض فكره اني ارجع افتح هالمكان من جديد بس دام هذي رغبتك انا قلت انتي تامرين مو تطلبين والي تبينه بيصير ..
ابتسمت له سديم وقالت ماحست بنفسها:الله يخليك لي ..
رعد:ويخليك يا اغلى انسانه ...
سحب ايدها وقال بمزح :والحين تعالي نفطر لاني جعت من جد ..
ضحكت سديم وقالت :ومتى بتبدا شغل بالحديقه؟
رعد ابتسم لها وهو يشد على ايدها:اليوم العصر بجيب العمال ينظفون المكان اول شي ثم نبني المسبح وثم المهندس الزراعي..
سديم:ليش موالحين تبدا؟
رعد تذكر ريان وانه بيخبر الكل بقراره:الحين عندي شغله بخلصها ..
سديم:وشي الشغله؟
رعد ناظر لها بحب:بتعرفين داخل لأن الكل لازم يعرف بعد..

&&&&&&&&&&&&&&&&&&&&&&&&&&&&&&&&&&&&&&&
فــي بيت ابو رايد

كانت ام رايد وعبير جالسين يتقهون بالصاله...
عبير تقريبا تحسنت حالتها وقدرت تتقبل أن منصور خلاص راح حتى مرام استغربت روحة اخوها فجئه لكندا .....:خالتي متى بيجون نجود رايد.؟
ام رايد بحب: بكرا طيارتهم ...الأ نتي ليه مارحتي مع البنات تشترين فستان لعرس ابتهال وليد؟
عبير:مالي نفس ياخالتي بعدين اشتري..
ام رايد اصرت عليها لا مافي الحين قومي معي السوق بنروح مع أخوك خالد نتمشى ونشتري لك فستان ونتعشى برا يلا يا بنتي..
قامت عبير بأبتسامه باهته عشان ماتزعل ام رايد:ان شاءالله خالتي يلا بلبس واجيك...
ابتسمت لها ام رايد :وانا بلبس وبقول لخالد يجهز يلا..

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&

في مصر

طلعت نجود مع ربى واكيد رايد معهم..
نجود:الله السوووق يجنن باخذ الهدايا من هنا للبنات يارايد خلاص؟
رايد:ايه خوذي للكل لاتنسين احد...
دخلت نجود المحل وظلت ربى مع رايد
من قال لها انه بيرجع السعوديه بكرا وهي بس تفكر
رايد ملاحظ عليها انها سرحانه:ربى شفيك؟
ربى تلف له وابتسمت بحيره .. :مافيني شي بس راسي.. مصدعه شوي..
رايد:علي ياربى؟ ممم المهم عطيني رقم ابوك..
ربى بحيره:ليش؟؟
رايد:بسلم عليه شفيها يعني؟
ربى ابتسمت بتوتر:لا يارايد قل لي وشتبي فيه ..
رايد بحب مايبين لربى شي:ابي اتزوجك !!
ربى انصدمت وهي مفكره ان رايد ابدن مافكر بمشاعرها:بسس شلون بهالسرع؟
غمر لها وقال: شكلك ماتبيني يعني؟
ربى بسرعه قالت:لابالعكس من قال بس تفاجئت رايد انا ماتوقعت انك تفكر فيني كلش..
رايد:ربى انتي ولا دقيقه تروحين من بالي ... وانا فكرت امس وقررت اسبوع كثيرر أني ماشوفك ..انا بفاتح ابوي وامي بالموضع ونكلم اهلك نتفق معهم ...
ربى استحت ونزلت راسها: اجل برجع للسعوديه حتى انا بحجز معكم .
ابتسم لها بحب وقال: تدرين لما جيت مصر ماكنت مفكر ابد اني ارتبط لا بحب ولا زواج ..بس من شفتك تغيررت ..
ربى نزلت دموعها :رايد.... انا أحبك ..يمكن صعب اعترف بهالشي قبلك بس مقدر اخفي مشاعري اكثرر يمكن انت اول ماشفتني استنقدت تصرفاتي ولبسي بس غصب عني انا لما شفتك يارايد عرفت معنى طعم الحياه واهتميت بنفسي كثيرر ...رايد انت علمتني اشيااء ماكنت اعرفهااا ..
سكت شوي وقال بحب وهي يلمس خدها بشويش وقرب منها طبعا ...:ربى ..
سكتت وناظرت له وعيونها تلمع تعلن نزول دموعها ..قالت له بهدوء:لبيه
رايد بشوق:أحـــبـك..
نزلت دمعتهاا دموع الشوق والحب ..قبل كانت تايهه وخايفه من مشاعر رايد لها بس الحين تطمنت وارتاح قلبها ...
قرب لها ومسح دمعتها وقال:انا عرفت مشاعري تجاهك لما شفت خالك وضربته بالمطعم رجعت للبيت وانا محتار من تصرفي..ولقيت الجواب هو الغيره ..... والغيره من الحب ...

قطع كلامهم وصول نجود وهي تقول:ربى تعالي شوفي عندهم اشياء تجنن تعااالي يلاا ..
ناظرت لهم نجود بحيره "غريبه ربى ورايد باين عليهم الحب معقوله اخوي يحبها؟ وهي تحبها؟؟ المشكله صعب اسئله وصعب اسئلها ...
ردت عليها ربى مستحيه:يلا جايه ..
رايد استحى من نجود الي طبت عليهم وهو يمسح دموع ربى وقال:انا بروح اشتري ماء من هنا"اشر على سوبر ماركت صغيره" بجيب لكم معي..

ابتسمت له نجود الي حست انه تفشل قدامها..
ودخلت هي وربى المحل
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&&&&&

عند مرام وفايز
دخلت البيت وهي مندهشه من جماله وفخااامته صحيح بيتها فخم وكبير بس بيت فايز كان اكبر بشوي
استقبلتها ام فايز وقالت:ياهلااا والله نورتواا بيتكم..
مرام كشرت على ام فايز الي كانت بتزوجه عليها:هلا بك خالتي منور بأهله ...
فايزباس راس امه وجلسوا بالصاله تقهوا وجت الخدامه..
ام فايز:مرام روحي معها تدلك على غرفتكم..
مرام بهدوء:ان شاءالله ..
فايز قام :عن اذنكم انا بروح الشغل ..
ام فايز :الله معك ياولدي..

&&&&&&&&&&&&&&&&&&&&&&&&


في بيت وائل و بالمجلس
وائل:ياهلاا والله نورت يادكتور راشد

راشد:ياهلا فيك ياوائل اخبارك..
وائل:والله بخير ياخوي انت شلونك طمنا عنك ..
راشد:بخير الحمد ابشرك..
وائل صب له قهوه:الحين بتقولي وش سبب هالزياره المفاجئه
استحى راشد ونزل راسه شوي ثم قال بهدوء :والله يا وائل انت صديق قديم اعزك حيل واقدرك وانا اتشرف اني اطلب ايد اختك للزواج..

سكت رايد شوي وقال:والله اتشرف فيك يا راشد بس لازم اسئل البنت عن رايهاا بالاول

راشد:اكيد خذوا راحتكم ...
سكت وائل وهو يفكر اخيرا اخته جاها نصيبها بس لازم يسئلها اول وياخذ موافقتها ..


&&&&&&
استاذن راشد وراح ودخل وائل الصاله وشاف امه واخته جالسين ..
وائل :السلام عليكم..
شهد وامه:وعليكم السلام..
جلس جنب اخته :شخبارك شهد؟
شهد ابتسمت لاخوها:بخير ياخوي ..
سكت ثم قال:شهد تقدم لك عريس ..
ام وائل من سمعت الخبر نزلت فنجان القهوه وقالت:ومن يكون أن شاءالله؟

وائل: صديقي دكتور راشد..
ام وائل بقوه:ارفضه وقل ماعندنا بنات للزواج..
شهد الي خايفه من امها الي تبيها تاخذ رعد وقال لاخوها بخجل . :وائل انت شلون تشوفه؟
وائل :رجال ووالنعم فيه .. انتي شرايك موافقه؟
شهد بتوتر من امها الي تخزهاا:اجل انا موافقه..
ام وائل نعم؟؟؟ من قال انك بتاخذيه وائل اقولك ارفضه مانبيه ..
وائل :يمه الي بيتزوج شهد وهي موافقه وهذا قرارها ..وانا ببلغ الرجال بالموافقه ..
وطلع وتركهم..
ام وائل:انا اوريك يابنت انا قلت لك بتاخذين رعد مو هذا!!
شهد:يمه هذي حياتي وانا اخذ الي ابي ومابي رعد الي تبيني اخذه غصب هو متزوج ومستانس مع زوجتة مابي اكون سبب اخرب بين زوجين ...وهذا قراري ...
&&&&&&&&&&&&&




في يوم زواج وليد وابتهال

الكل يستعد لهاليوم الجميل عبير وشوق ونجود واسيل وغلا عندهم الكوافيرات
اما ابتهال عندها كوافيره الخاصه للعروس وام رايد معها طبعا

ابتهال: ابي مكياج نااااااعم مررره بليززز لاتحطين لي اوفر؟
الكوافيره:اكيييد انا اصلا مابحب الثقيل بسوي لك ميك أب ناعم يبرز ملامح وجهك الجميل بسم الله عليك ..
ابتهال:اوكي أجل اشتغلي وانا مطمنه ..


&&&&&&&&&&
في فيلا رعد
الكوافيره كانت تجهز ابرار وسديم وساره

رعد واقف وورا الباب: سديم تعالي..
قامت له وطلعت تشوف وش يبي:هلا رعد؟
قرب لها ومسك ايدها وسحبها للصاله الي فوق وقال هو يضمهااا ويبوس خدها الناعم ..: وش تسوين؟
سديم استحت من رومنسيته الزايده ...:عندنا الكوافيره نتجهز للعرس وانت جهزت؟
رعد وكان يخبي وراه علبه حمرا :ايه انا جاهز بس انتي لازمك شي وتصيرين اجمل وحده بالعرس ..
سديم بثقه:كلي حلا مو لازمني شي ..
رعد ابتسم لها بحب :هههههههه يحق لك الثقه "وطلع العلبه الي وراه "وفتحها .. شرايك؟؟
سديم ناظرت للطقم الالماس الي جابه رعد قمه بالفخامه والجمال انبهرت بشكله وصارت تتلمسه بأيدها بأعجاب ..:وااووو رعد مررره حلو "تجمعت الدموع بعيونها":بس هذا كثيرر يارعد
رعد بعشق : مافي شي يغلى عليك ياسديم ويلااه وش هالدموع الي بدت تنزل مفروض تستانسين مو تبكين؟
سديم مسحت دموعهاا وضمته بقوه وهي تبكي: رعد ..الله لايغير عليك يارب
ضمها هو بعد باس جبينها وقال: أمين ....
بعدت عنه وهي تتلمس الطقم باعجاب:ذوقك يارعد عجيب ..
ابتسم لها وقال :أكيد لعيونك تستاهلين .."ولمس بطنها " وان شاءالله ولدنا مو متعبك؟
سديم :شوي مو كثير ههههههه"واستأذنت منه" رعد الحين بروح لا أتاخر ع الكوافيره تستناني..
رعد..باس جبينها وقال: اوكي وخذي الطقم لازم تلبسينه اليله بشوفه عليك...
سديم بحب:أن شاءالله ..
دخلت عن البنات وهو نزل تحت

وقف يناظر للشخص الي فتحت له الخدامة الباب شخص من زمااان ماشافه ..اشتاق له ..فرقتهم المشاكل وهم يحملون نفس الدم ..اخووه الوحيد بهالدنيا صقــــر... :ابتسم له رعد وتقدم منه وقال:ياهلا فيك نورت السعودية

صقر توتر .. وقال ببرود مصطنع ..:تسلم ..
رعد مد ايده يصافحه:ماتبي تسلم على اخوك ماشتقت لنا بعد هالغربه؟
مد ايده صقر يصافح رعد لكن الشوق لأخوه والبعد طول هالفتره المشاكل مفروض ماتفرق بين اخوان هذا اخوي من لحمي ودمي مهما صار مالنا الأ بعض : مد ايده لرعد لكن سحبه صقر وضمه ...ضـم اخوه الي من زمااان ما ضمه من كانو صغار أخر مره ضموا بعض بحب الأخوه ..
رعد نزلت دموعه المحبوسه من زمان : ليه كذا ياصقر ليييه تبعد عنا ّّ!!
صقر يبكي بنفس شعور رعد: أأأأأأخ يا أخووووي ليه نسمح لهالشي يصير أناا اســــف انت اخووي ماقصرت معي حاولت انك ترجع علاقتنا ببعض بس انا كنت عنيد أناااا اسسسف يا رعد سامحني والله أحــــبــك انت اخوي عضيدي مالي غيرك بعد وفاه امي وابوي ..
شد عليه رعد وهو يضمه:مســـامحك ياخوووي مسامحك... "فكو بعض بعد دقايق بعد ماسمعووا زغاريط ساره الي نازله من الدرج:الف الف مبـرووك"ومسحت دموعه " اخيرا شفتكم مع بعض ماني مصدقه ياارب الله لايفرقكم
رعد ووصقر يمسحون دموعهم:أمين
نزلت ابرار فرحت لما شافت اخوانها وقربت لهم وضمتهم وساره بعد ضمتهم ....ساره:واخيررا يارب التم شملنا صقر ماني مصدقه اخيرااا رجعت لنا ...
فكتهم ابرار وقالت:صقر لازم تعيش معنا خلاص ..
صقر بحب: ودي ياختي بس مقدر
رعد :ليش ماتقدر ياصقر خلنا نعيش سوا؟
صقر بخجل: مقدر لاني بتزوج وبرجع مصر مع زوجتي..
ابرار وساره بدو يزغرطوون:الف مبروك ومين سعيده الحظ ؟؟
صقر نزل راسه بحيا :نجود..
ساره:نجوووود نجوود بنت عم سديم؟
صقر:ايه وبنملك بعد يومين ونسوي حفله صغيره ونرجع مصر..
ابرار:وليه حفله صغيره نبي عرس نبي نفرح فيك ؟؟
صقر:ماعليه هي البنت طلبت كذا بعد نبيها عائليه احسن ..
رعد يرجع يضم اخوه:الف مبرووك والله يوفقكم..
ابتسمت ساره وقالت:صقرر دريت انو رعد بيصير اب؟ سديم حامل؟
صقر أندهش من هالخبر واكيد فررح كثير :الف مبروووك يارعد اخيراا بنشوف عيالك..
رعد ابتسم بحب :أي والله أخيرا
أستأذنت ساره وابرار طلعوا فوق عند سديم وقالو لها الي صار واستانست من الخبر ان رعد وصقر تصالحوا ..

رعد: صقر اوعدني ان مانسمح لأي مشكله ترجع تفرق بيننا..
صقر:أن شاءالله ياخوي رعد ولاتحب اقولك ياوزير؟
رعد:هههههههه وزير وزير بس الكل يعرف اني مو وزير؟
صقر:بس الكل يقولك كذا بكل مكان ..
رعد:أنا رجل أعــمال وبس..
صقر بحب:بس من مكانتك العاليه بالمجتمع الكل مسك عليك هالقب ويقولون لك الوزير؟؟
رعد: انا رعــــد ال........وبسس.....
ابتسم له صقر وقال:والنعم فيك ياخوي...

رعد سكت شوي ثم جلس و قال: صقر دريت باللي صار لريان؟
صقر كشر من طاريه وقال: الله لايرده استغفرالله وش نبي بسيرته .
رعد بزعل وقال لصقر من ذاك اليوم لما جمع سديم وابرار وساره وخالته وقال لهم عن قراره بالي راح يصير لريان وكان قراره أنه ريان يسكن معهم بغرفه بأخر البيت ومعه خادمه تجيب له الاكل والشرب لانه صار يمشي على عكاز وماله احد غيرهم ..
صقر رحمه وحز بخاطره :ريااان يمشي على عكاز؟
رعد بأسف: ايه للأسف الحادث الي تعرض له قوي كان بين الحياه والموت..
صقر:بس ابرار تقبلت هالشي وناصر وش رده فعله؟
رعد بزعل: ناصر هو عند ابوه الحين وابرار رفضت بس انا سويت هالشي عشان خالتي متضايقه على ريان ..
صقر:والله مدري وش اقولك ..بس صدق زعلت عليه ..
رعد:كلنا انصدمنا من وضعه وانقهرنا عليه ..
صقر وقف:الله يعين ويصبر قلب خالتي عليه ...وين خالتي بروح اشوفها؟
رعد:بغرفتها ..
استأذن صقر وراح لخالته سلم عليها ثم طلع وراح لبيته يتجهز للعرس ..

&&&&&&&&&&&&&&&&&&&&&&&&&&&&
في بيت ابو رايد

كانت جالسه بغرفتها تنتظر دورها للكوافيره وتفكر بالي قست عليه والي سافر عشان يتركها صدمته لما رفضت الزواج منها حبته ماتنكر هالشي حبت انتباهه وخوفه عليها تذكرت لما كان يسهر عند الشباك تحت بالبيت ويراقبها بكل مكان تروح له... نزلت دمعه تايهه لكن مسحتها بسرعه لما لاحظت دخول ام رايد عليها ..
دخلت أم رايد الي لاحظت حزن عبير .جلست جنبها ومسحت على راسها بحب وقالت: شفيها بنتي الحلوه جالسه لحالها وزعلانه من زعلك قولي لي بس؟

عبير بهدوء:محد زعلني خالتي ..
ام رايد الي تحاول تطلع عبير من حالتها النفسيه ومو عارفه سببها :حبيبتي عبير لمتى هالحزن خلاص كذا بتدمرين نفسك يابنتي لازم تشغلين نفسك بأي شي التفكير بيتعبك ارجعي لدراستك كذا بترتاحين وتنشغلين عن التفكير الي يضايقك ..
عبير بتفكير:بحاول عشانك خالتي ..
ام رايد ابتسمت لها :يلا حبيبتي قومي جا دورك عند الكوافيره وتنتظرك وبعدك غلا أختك يلا ..
ابتسمت عبير لها وقالت بنفسها ..خالتي ام رايد حيل تعبت معي وهي تحاول تسعدني الله لايحرمني منك ياخالتي :يلا قايمه خالتي بس ابيك تختارين لي التسريحه ابيها على ذوقك .
ام رايد تأشر على عيونها:من عيووووني كم عبير عندي بسس تعالي بختار لك تسريحه غيرر وبتطلعين تهبليين "ومسكت ايدها وطلعت فيها للكوافيره ..
&&&&&&&&&&&&&&&&&&&&&&&&&&&&&&&&&

في اليل والكل مستعد للزواج وكانت كل وحده لها طلتها وجاذبيتها الخاصه
سديم كانت لابسه فستان أسود توب من عند الصدر ماسك ع الجسم والكرستالات البيضاء داخله من الخصر لحد قصه الصدر معطيته شكل فخم وانيق ولبست الطقم الي اهداها رعد وومسويه شعرها تكسير على جنب وعلى نعومه الفستان الا انها هي الي مزينته ومكياجها اكتفت بشدو ع الجفن بالون البرونزي كانت جدا جميله وملفته بحضورها ورزتها الواثقه ..

عبير لبست فستان لونه تيفاني ماسك من عند الصدر ونافش من تحت بحريه شكله جميل وسوت شعرها كيرلي ورجعته لورا بشكل حلو

نجود لبست فستان ماسك ع الجسم قصيم لنص الساق لونه ذهبي مزين بالترتر الامع وتحت الصدر فيونكه سودا مزينته بشكل حلو وخلت شعرها سايح بنعومته ونازل على جبهتها أكسسوار ناعم يزين شكل شعرها كانت ناعمه وجذابه

كان الكل متواجد بقاعه الزواج
سديم مرام عبير نجود شوق اسيل واقفين ع الأستقبال يرحبن بالضيوف
جتهم بتول :بنات خلاص تعالو نروح لأبتهال ..
سديم:يلا جاين.."وناظرت لأسيل غلا وينها؟
اسيل تتلفت يمين يسار:اظنها عند اخت بتول عند خالتي أم أدم ..
سديم بحب: روحي ناديها عشان نتصور مع ابتهال ..
اسيل:يلا رايحه .. انتم اسبقوني لأبتهال ..

راحت اسيل تنادي غلا:غلا تعالي المصوره وصلت عشان نتصور مع ابتهال.
غلا تسولف من رند بنت أم ادم: يلا انا رايحه اشوفك بعد شوي
رند ابتسمت:طيب
ناظرت اسيل لأم أدم بأحراج: شخبارك خالتي ؟
أم ادم تناظر لاسيل بتفحص :بخير يابنتي انتي اخبارك؟
اسيل:الحمدالله بخير خالتي ..يلا عن أذنك ..
ام ادم وهي تناظر لأسيل وهي رايحه :مشاءالله عليها جمال واخلاق هذا الي كنت ادوره لولدي وكانت قدامي كثير بس ماكنت منتبهه لها...

&&&&&&&&&&&&&&&&&&

بقسم الرجال كان الكل يسلم على العريس وليد ويبارك له
وكان جالس جنبه ابوه ثم أبو أدم ثم رعد وصقر وادم ووائل ألي عزمه رعد
بدت فرقه العرضه الرجاليه والكل مستانس ويقومون يرقصون
قام رايد الي كان جدا فرحان بعرس أخوه وتناسا أنه كان يبي ابتهال من لما شاف ربى وقريبا بيفاتح ابوه بموضوع ربى ..قال وهو يناظر لصقر الي صاروا اعز اصدقاء بكل شي مع بعض بالدراسه والطلعات والجمعات بكل شي عرف صقر من مده قصيره لكن بالفعل صار كل واحد يعز الثاني بقوه ..:صقر تعال شارك بالعرضه
صقر ابتسم له بحب وقام معه واخذ من السيوف وقامو يرقصون بشكل جميل والكل يناظر لهم ..
وسحب رايد أدم عشان يشاركهم ...ثم وقف صقر قدام رعد وقال:قوم شاركنا ..
رعد :لا خلها شوي
صقر متحمس والكل مبسوط:لا هالحين قوم يلا
ابتسم له رعد وناظر لعمه أبو ادم وابو رايد ثم ناظر لصقر بحب وقال:دامك مصر يلا نشاركم ليش لا..
وصار الكل يرقص والحضور يناظرون لهم بأعجاب لأتقانهم الرقصه مع العرضه
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&&&&&


عند قسم النساء...

استعد الكل لدخول العروس انطفت الاضواء وابتدت موسيقى الزفه الي اختارتها شوق واسيل لأن ابتهال كانت تبي اغنيه بس البنات قالو موسيقى هاديه افضل
الكل ينظار لها بأعجاب كان فستانها بقمه الفخامه الي يدل على حسن ذوقها توب من عند الصدر والظهر فاتح على شكل 7 يغطيه شيفونه مرصه بالكرستالات الصغيره الامعه وسحبه الفستان الطويله معطيها شكل مثل الاميرات وكل شوي سديم ونجود يعدلون الفستان لها مع مشيتها المتناسقه ..

ام رايد قربت لها بحب :الله يوفقكم يابنتي بسم الله عليك تاخذين العقل ...
ابتسمت لها ابتهال وهي تعدل طرحتها الملكيه الطويله وشعرها الملف لف ونازل على كتفها ويزين راسها تاج كرستال ناعم مره اختارته ليناسب نعومه الفستان والمكياج ..الكل انبهر بشكلها وكانت بنظرهم اجمل عروس ..
تقدمت ابتهال لكرسيها وجلست بعد مساعده أم رايد واسيل وشوق ونجود طبعا
وقفت جنبها اختها غلا بفستانها النافش الي يناسب سنها الصغيروقالت:ابتهال شكلك مره يجنن ..
ابتسمت لها ابتهال بحنان وقالت:عقبال ماشوفك عروس ياعيون أختك ..
سكتت غلا الي ابتسمت بخجل..
سديم الي كانت مدنقه ترتب فستان ابتهال وقفت بتعب وتنهدت بألم:أأأه
ناضرت لها نجود بخوف:سديم ارتاحي نسيتي انك حامل
سديم تحاول تخفي تعبها:مانسيت بس هذا عرس اختي لازم اوقف معها .
ابتهال بخوف على سديم:سديم حبيبتي تكفين ارتاحي خلاص خالتي والبنات معي روحي ارتاحي اجلسي ..
ابتسمت لها سديم بعد الحاحهم وجلست ترتاح عند ابرار وساره وجلست بنفس طاولتهم ..
ساره:سديم مشاء ابتهال طالعه تجنن الله يوفقها يارب. ويحميها .
سديم تنهدت وتمنت عقبال كل خواتها تشوفهم عرايس وترتاح لاراحوا بيت ازواجهم.
بدوا بالرقص واهدائات الاغاني للعروس وشوي للعريس

وعلت صوتها المطربه وسط الحضور تنبه لدخول العريس عشان يتغطون ...
دخل وليد ومعه ابو رايد ...وقف وسلم على ابتهال الي أنبهر من جمالهاا وباس راسها وقال :مبرووك .
ابتهال بصوت ياله واضح:الله يبارك فيك ..
جلسوا شوي على اغاني واهدائات والكل بارك لهم...
واستأذن الحضور وقال لأمه أنه بيطلعون وساعدتهم ام رايد ونجود وشوق ساعدوا ابتهال بفستانها الي يسحب وراهاا لحد ماركبت السياره وكان يسوق فيهم رايد ..
ابتسم رايد لما شاف ابتهال وقال:مبروك يا ابتهال ..
ابتهال بصوت هادي :الله يبارك فيك...
ومشوا ووصلهم الفندق ... ورجع ..



في بيت ابو رايد بعد مارجعوا من القصر
جلست نجود بالصاله وبالها مو معها تفكر بحياتها وتخيلت نفسها بمكان ابتهال وانها بتتروج صقر..دمعت عيونها وهي تتذكر اول ماوصلت لما ابوها فتح معها موضوع الزواج من صقر والكل يبي صقر ومرحب فيه وهي محد فكر بقرارهاا..قطع عليها افكارها التايهه دخول عبير..ابتسمت لهم بألم وقالت:عبورره الله حيه تعالي اجلسي .
عبير جلست جنبها وقالت: وش تفكرين فيه من جيتي من مصر وانتي سرحانه
نجود بألم:تلوميني اسرح وابوي بيزوجني صقر وبعده ارجع معه مصر؟
عبير:طيب ليش زعلانه صقر الكل يمدحه ؟
نجود بألم..بلاك مادريتي عن بلاويه يا عبير مقدر اقولك بلاويه لانه خلاص بيصير زوجي وملكتنا قربت
نجود:لا بس انا عندي طموح واحلام لسى ماحققتها والزواج أكيد بيمنعني احققها
عبير:لابالعكس صقر على ماسمعت انه مثقف ويحب العلم والدراسه واكيد بيشجعك|"وحطت يدها على كتف عبير تواسيها" وانتي بأسلوبك الحلو وكلامك السنع تقدرين تخلينه يحبك بطيبتك واخلاقك .
نجود سكتت ثم قالت لعبير:وانتي ؟
عبير بحيره:وانا شنو؟
نجود :تحسبيني ماعرف شصار لك ؟ انتي اختي ياعبير مو بس بنت عمي قولي لي ليش صار لك كذا؟
سكتت عبير ونزلت دمعه كانت حابستها من زمان ثم قالت:خلاص يانجود انا قصتي انتهت من زمان
نجود مو فاهمه على عبير:أي قصه قولي ليه فضفضي ياعبير من جيت وانا اشوفك كلش مو مرتاحه فيك شي؟
عبير بنظرات تايهه قدامها:اخو مرام السبب .."وكملت"هو حبني بس ماعرف كيف يعبر عن حبه كان دايم يلاحقني يراسلني جاب رقمي مدري منين وكل ماطلع مكان يكون وراي كان مثل ظلي ومن انخطبت لجراح الله يرحمه انجن وكان يراسلني يبيني ارفض وعاندته مع اني احس في شي بقلبي له بس اكااابر عليه ..ولمى توفى جراح رجع خطبني وانا رفضته واهنته كثير ..من عرف برفضي انجرح حيل وتضايق مني بقوه وترك الديره وكل شي وسافر ..
نجود باهتمام :وين سافرر؟؟
عبير:ياليت ادري لكن مقال لي شي ..ومن راح انا انهرت ماقدرت اتحمل عرفت اني أحبه موت مثل مايحبني ويمكن أكثر..
نجود بألم على بنت عمها واختها :حبيبتي عبيرر عانيتي كثيرر..طيب لو يرجع يخطبك توافقين؟
عبير ناظرت لها بحب وألم:مستحيل يرجع لأني اهنته كثير وصبر علي رجع يخطب واهنته وكسرت قلبه وماراعيت مشاعره عذبته والحين انا اتعذب بعده "وبكت "
خافت عليها نجود وضمتها وقالت:حبيبتي لاتبكين والله لو تشوفك امي تتضايق عليك حيل..تكفين عبورر خلاص ارضي بالنصيب هذا نصيبك انتي ومنصور .."ومسكتها توقفها"قومي نطلع غرفتنا نرتاح قومي ياعبير..
قامت معها عبير وهي تبكي وفتحت جروحها ورجعت تفكر بمنصور ..وتقول بنفسها"تكفى ارجع يامنصور الحين عرفت حبك وقدرك تكفى ارجع بسس"
جلستها ع السرير وغطتها وراحت لسريها وهي تفكر بعبير والي صار لها مرره صعب ..وعرفت ان عبير تعيش قصه حب اثرت فيها لكن عبير دمرت هالحب بعنادها لواحد كان شاريها ويبيها....

في الصباح

قام وناظر للأنسانه الي حبهاا واهانها لكن قدرت تسامحه لأن قلبها طيب وكبير وفعلا حبته مثل ماحبها بالنهايه ..كشر لما شافها تأن بألم عقدت حواجبها وهي نايمه "مسكت بطنها تتألم"سديم سديم قوووومي شفيك تعبانه؟
سديم فتحت عيونها بشويش من ضوء الشمس الي تسلل الغرفه:هممممم تقلصات خفيفه من تعب امس بالعرس ..
رعد خذاها ضمها بخوف وقال:حبيبتي تعبتي نفسك اكيد..
سديم بحب وهي تشد بضمته:خايف علي؟
رعد بشوق وهم يغمض عيونه :اذا ماخفت عليك على مين اخاف؟
استحت من كلامه الغزل الي مايتركه كل شوي
فكت نفسها منه بشويش وقالت :قوووم خل ننزل نفطر معهم
كشر بزعل وقال: لاحقين تعالي اجلسي معي شوي؟
سديم بعناد:لالا تعال ننزل تحت بعد ماتبدل ملابسك.
فتحت الدرج وخذت منه تنوره ماسكه سودا وبلوزه بالون الليموني طايحه اكمامها ع الكتف بشكل جذاب وحطت كحل وقلوس ومسكرت رموشها وتعطرت ولفت له وهو يناظر لها ...سديم تضحك على شكله الي متنح بجمالها: شفييك رعد للحين ماتحركت؟؟
رعد بكسل:انتي كل شي تلبسينه حلو عليك ؟
سديم بثقه:اكيد ..
قرب لها وسحبها له ضمها وقال:الله لايحرمني منك يا نظر عيوني..
سديم غمضت عيونها بحب ..وببالها تشكر ربها الي تغير رعد فررق حييل عن قبل..:ولامنك ياروحي.
سديم:انا بنزل تحت استناك لاتطول.
رعد حك راسه بملل لانها بس تفك نفسها منه:طيب شويات واجي

&&&&&&&&&&&&&&&&
نزلت تحت ولقت الكل جالسه ع طاوله الفطور
ابرار وساره والخاله..وجلست جنب الخاله وقدامها ابرار وساره وبالمقدمه اكيد رعد
ابرار تقول للخدامه :حطيتي له فطوره؟
الخادمه:يس مدام حطيت فطور استاذ ريان ..
ساره بشفقه على حال اختها :ابرار حيل تخافين عليه؟
ابرار تشتت نظرها ع الفطور وتاخذ قطععه توست:ماخاف عليه بس ارحمه ..
سكتت ساره وهي تفطر بهدوء
نزل ناصر وباس ايد الخاله صيته وامه وجلس جنبهم يفطر..

وبعده نزل رعد :صباح الخير
الكل :صباح النور

جلس واخذ قطعه خبز وبدا ياكل وصبت له سديم الشاي ابتسم لها وردت له الابتسامه
الكل فطر ثم قام رعد وقال :ابرار تعالي المكتب ابيك شوي..
ناظرت ابرار لساره وسديم بذهول مو عارفه وش يبي رعد ..وقالت:ان شاءاالله ..
دخلت المكتب وسكرت الباب وقال لها:اجلسي ..
جلست ابرار وقال رعد وهو متردد من الي بيقوله ومتردد من رده فعل ابرار :ابرار انتي اختي الكبيره وتاج راسي ومعزتك عندي غير ...والي سواه فيك ريان صعب عليك اكيد ..بس انا ابي تفكرين عشان عيالك بنتك الصغيره وناصر ..
ابرار مو فاهمه طلب رعد:مافهمتك ياخوي؟
رعد ..غض شفايفه بتوتر ثم قال:ارجعي لريان..
وقفت ابرار بذهول:رعد انت متأكد من الي تقوله الحين؟ ارجع لريان الخاين مستحيييييل .
رعد بحب :ابرار ياخيتي الرجال الي صار له مو قليل انا ابي تفكرين بالموضوع عشان ناصر وعشان بنت الصغيره ..
ابرار:رعد انا وافقت ريان يعيش هنا معنا بس مارجع له مستحيل..
رعد بهدوء:ابرار االأنسان مو معصوم عن الغلط وريان غلط معك كثيرر انا عارف بس سامحيه ..والله سبحانه يسامح خلقه ليش حنا البشر مانسامح..!!
ابرار ساكته وتفكر:مدري ياخوي محتاااره ..
رعد جلس جنبها ومسك ايدها:ياختي مابي اضغط عليك بس هذا ابو عيالك ..وريان الحين ضعيف مسكور ومحتاجك جنبه محتاااج زوجته تراعي له بهالوقت الصعب الي هو فيه وبالنهايه قرارك ايش مكان انا ماراح اضغط عليك براحتك بس فكرري وانا معك بكل قرار تاخذينه .
ابتسمت له ابرار وسكتت تفكر..
&&&&&&&&&&&&&&&&&&&&&&&&&&&

نزل عند امه وابوه تحت بس ماسكر من ربى مشتااااق لها حيل وكل يوم يشتاق اكثر واكثر ...باس راس امه وابوه وقال:شلونكم يا اغلى ام واب بالدنيا ..
امه بحنان:بخير ياولدي "وصبت له فنجان قهوه":تقهوى ..
خذ منها الفنجان وقال:يسلم لي هاليدين ..وناظر ابوه ..شخبارك يبه ..
ابو رايد :بخير ياولدي انت قلنا شلون دراستك هناك ان شاءالله ماشيه؟
رايد:كلها تمام يا يبه الحمد الله صحيح صعبه شوي بس انا قدها ان شاءالله
ابو رايد :الله يوفقك ياولدي..
رايد بتوتر: امين... سكت شوي ثم قال :يبه
ابو رايد سكت ينتظره يتكلم؟
رايد خايفه من رده فعل ابوه:يبه ابي اتزوج...
ابو رايد ابتسم له:الف مبروك ياولدي من بكرا اقول لامك تخطب لك.
ام رايد :بدور لك احلى عروووس تستاهلك ..
رايد ابتسم لهم وقال:بس العروس موجوده..انا اعرفها بمصر هي سعوديه وبنفس جامعتي بنت خلوقه ومحتشمه وذوق صدقيني يا يمه بتحبينها بس تشوفينها ..انا ماشفت زيهاا يا يبه صدقني خلوقه وماتحتك بأحد وهي بعد تحبني وتبيني "وقال بتوتر" يبه حبنا لبعض حب صادق وبأحترام وبحدود وانا من تأكدت من مشاعري تجاه هالبنت على طول قلت افاتحكم انا ابيها ابي اتزوجهاا ...."سكت وناظر لوجه امه وابوه يستنى رده فعلهم يستنى هواش او كف من ابوه لكنه تفاجىء بأبتسامه من ابوه:لهدرجه عايش بحب وهيام هالبنت.؟
رايد متوتر :يبه والله حبنا لبعض صادق
ابو رايد:من بنته هي؟
رايد:بنت ال..........
ابو رايد:وكيف نتواصل مع ابوه عشان نخطبها لك؟
رايد بيطير من الوناسه:معي رقم ابوها وعنوانهم وكل شي ..يبه مانبي مصدق انك موافق"وباس ايده ابوه وامه وراسهم :الله يخليكم لي يا اغلى ام واب.
ابتسم له ابوه:لهدرجه تحبهاا ومستانس ..
ام رايد:الله يتمم عليك ياولدي بس اشوف هالبنت لازم ..
رايد:اكييد يمه خلاص اليوم شوفيها عشان بكرا نجي حنا وابوي..
ام رايد:هههههههه متحمس تبي اليوم؟
رايد:أي يمه اليوووم تكفين ..
ام رايد سكتت تناظر لزوجها:شرايك يابو رايد؟
ابو رايد يضحك على ولده المستعجل:خلاص اليوم روحي شوفيها ..
ام رايد: على خير ان شاءالله
استانس رايد وقال لأمه خلاص العصر اخذك لهم ..
تركهم وطلع غرفته يكلم ربى يقولها بالي صار

&&&&&&&&&&&&&&&&&&&&&&
في بيت رعد الكل متجمع مسوين عشا لأبتهال ووليد عشان بيسافرون بعد العشاء لدبي على طول..
المضيفات يدرن على الحريم بالقهوه والحلا والشاي ..والفرحه تعم اجزاء البيت
أم ادم تناظر لأسيل بتفحص ونادت بنتها بتول:بتول تتوقعين تقبل تتزوج قبل اختها؟
بتول مستانسه :ايه يمه عادي هذي ابتهال تزوجت قبل عبير..
اما دم تفكر وهي تقول :انا بروح اجلس جنب ام رايد افاتحها بالموضوع.
بتول بتوتر:يمه شفيك مستعجله مو الحين.
قامت ام ادم وقالت:الا الحين
سكتت بتول وراحت للبنات..
شوق:انا ابي ارقص يلا شغلو الدي جي..
ساره تحاول تزينه:صبرر بسس مدري وين السلك الثاني حقه ..
سديم :يمكن بالملحق ياساره ؟
ساره بتفكير:اييييه صح بالملحق ياربي مالي خلق اجيبه بعيد ..
مرام الي كانت بالفعل معزومه قبلت دعوى سديم لها واستانست عشان تشوف عبير: خلاص روحوا جيبووه ولا فكونا من الدي جي ههههههه
شوق:الا نبيييه وين الملحق انا بروح اجيبه ..
ساره توصف لها الملحق:اطعلي من الباب الرئيسي روحي يساار لاتلفين لا يمين ولا يسار وتلقينه قدامه
شوق :طيب يلا بروح.
نجود:بروح معك لاتضيعين علينا اصبري..
وراحت نجود وشوق للملحق يجيبون وصله الدي جي..

عند الرجال

رعد يسولف مع صقر والي ارتاح من اخووه وحس هالحين بعد هالعمر أن له اخو وسند بهالحياه...:متى الملكه؟
صقر مبوسط :بعد يومين ..
رعد:حيل مستعجل ..اصبر خل نسوي لكم عرس ونفرح فيك؟
صقر:ماقدر يارعد بودي اجلس واسوي عرس بس الدراسه بتخلص الاجازه ولا معي الا اسبوع نسافر انا والمدام ..
رعد استانس لصقر انه اخيرا بيستقر:ياعيني ع المدااام ياخووي الله يوفقك والي تشوفه اهم شي سعادتك عندي..
ابتسم له صقر وقف يرد على مكالمه مهمه .:الوو نعم ..
صقر:شلون الدراسه الاحد الجاي؟ لحظه اليوم شنوو؟
يعني بس باقي قدامي 6 ايام ؟؟
تأفف صقر :بس مو قلتوا الدراسه باقي لها اسبوعين؟
لحووووول طيب طيب بشوف شكرا انك قلت لي..
سكر جواله وحطه بجيبه وماحس بنفسه انه اتجه لحديقه البيت وعند المحلق شاف بنت طالعه منه هي عرفها ابتسم لها تقدم لها لما شافها معصبه وتنفض تنورتها القصيره الي لنصف الساق وشعرها السايح على كتوفها جميله جذبته اسحرته وقف يتاملها وماحس بنفسه الا وهو قدامها:نجود ..
من نطق اسمها لفت له بسرعه واندهشت لما شافته واقف يتالمها ..كشرت وسكتت ماردت عليه..
لمح كشرتها له وقال:شفيك كأنك مو طايقه وجودي..
نجود: لا بسس تفاجئت لما شفتك.
صقر بحب:بكرا ملكتنا مستعده؟
نجود:بس رايد قالي بعد يومين؟؟؟؟
صقر بأسف:بنظطر نعجل كل شي لأن الدراسه تبدا الاحد
نجود شهقت:هالسررعه؟؟ مو باقي اسبوع ثاني؟
صقر:تو كلمني المشرف وقالي قدموها ولازم نروح بعد يومين من نملك
نجود بعيونها الدموع بتبكي بأي لحظه
صقر لاحظ هالشي وقال:شفيك ماتبين ترجعين مصر؟
نجود بسرعه:لااا مابي ارجع..
قرب لها مسح دمعتها تكهربت نجود من فعلته وبعدت عنه وقالت:لو سمحت عن اذنك
صقر ضحك عليها :بكرا اصير زوجك ليه هالرسميه.
نجود بنفسها تقول مغرور سكتت وقفت عنه ومسك ايدها :لسى ماشبعت منك ؟
نجود عصبت من جرأته الحين تجي شوق وتشوفني معه ياوويلي..:صقر خلاص اختي بالمحلق الحين تجي وماله داعي..
ابتسم لها وسحبها وقربت لصدره وقال:تدرين من لما اغمى عليك ع الدرج ذاك اليوم وانا تلخبطت من شفتك؟؟
نجود بنفسها..لو تدري ان كل الي صار تمثيليه مثلت عليك ان اغمى علي.. ابتسمت له وماعرفت ليه مادفته مابعدته لمه لزقها له على صدره ولاعرفت وش تقول او تتكلم ..قرب لخدها وطبع بوسه طويله وقال:اشوفك بكرا..تركها راح ونجود تسمرت مكانها على جرائه وكلماته المعسوله ..وحطيت ايدها على خدها تتحسس مكان بوسته وهي متوتره وناظرت للمحلق الا شافت شوق حالتها حاله :لقيت السلك بس دقت علي صديقتي ويالله سكرت ..يلا مشينا..
نجود حمدت ربها ان شوق مشافت شي وهي سرحانه وتفكر بصقر وكلماته ..اجل ليش تزوج بالسر وطلق لما سمعته ذاك اليوم افف انا ليه افكر بالماضي خليني بالحاظر وبس ...ابتسمت من تذكرت بوسته وكلماته لها
&&&&&&&&

عند مرام وعبير..
مرام بحب:اشتقت لك عبيرر
عبير بحزن :وانا بعد
مرام تضمها:طمنيني عنك.
عبير:بخير انتي شلونك مع فايز..
تنهدت مرام بشوق:ااااه يافايز لو اقولك ماتصدقين ياعبير.
عبير مو فاهمه:كيف ماصدق شفيكم؟؟
مرام بدت تقولها كل شي:فايز غني وش اقولك واغنى من ابوي بعد وكل هذا كان يختبرني عشان ...
عبير تشوقت :عشان ايش كملي ؟
مرام بأسى:عشان غروري ياعبير ودلعي الي ابوي تعب منه ..
عبير:هو صح موقفه قوي بس معاه حق ..شوفي كيف تغيرتي يامرام فايز عدل فيك اشياء كثيرر..
مرام:ايه انا لاحظت هالشي بعد ..
عبير ابتسمت لها :خلاص انسي الي صار وحافظي على زوجك وبيتك وابدي صفحه جديده..
ردت لها الابتسامه وقالت:هو كذا بسوي ..."ترددت وقالت" تدرين منصور بيعيش بكندا؟
عبير ناظرت لها بسرعه وبشوق :ليش ؟؟
مرام:مدري امي قالت لي يقول بيدرس هناك وبيستقر .
عبير فقدت الامل من رجعته: الله يوفقه
مرام تنهدت على وضع عبير ومنصور المحزن :أميـــن

في هالعزيمه الكل مبسوط لكن في باله شي

ساره تفكر بنظرات ام وائل لها ..
وابرار تفكر بعرض رعد لرجعتها لريان
وام رايد تفكر بالي قالت لها ام ادم ..وهي الحين بلشانه وتفكر بخطبه رايد بعد ماشافات ربى الي اعجبتها ..

ونجود تفكر بصقر وكلامه المعسول لها.

&&&&&&&&&&&&&&&&&
في المجلس بعد ماتعشوا الرجال وعند المغاسل الذهبيه الفخمه قابل رعد وائل
وائل: كثر الله خيرك
رعد:عوافي ..
وائل بتردد :رعد ممكن تجي معي شوي ابيك بموضوع خاص..

رعد: ابشر
مشى معه للحديقه الخارجية
وائل:رعد انا ابي قربكم وبصراحه كلي امل انكم توافقون انا ابي اتزوج اختك ساره على سنه الله ورسوله
رعد تفاجىء من طلب وائل المفاجئ وبهالوقت:انت رجال والنعم فيك يا وائل بس لازم اسئل البنت ..
وائل بخجل من رعد :أكيد خوذوا راحتكم
سكت رعد وتنهد وهو يفكر بفعل ساره لأنها رافضه الزواج ..
&&&&&&&&&&&&&&&&&&&&&

وبعد مرور الأيام
ملكة صقر ونجود تمت
وملكة رايد وربى
ورجعوا لمصر..

أم رايد بزعل:كيف يهون عليك يابو رايد نجود تتزوج بدون عرس؟
ابو رايد:زي مارايد تزوج بدون عرس ..
هم يدرسون برا وهذي رغبتهم ادعي الله يوفقهم ..

ام رايد:ألله يوفقهم

في مصر..
جهز صقر غرفته هو ونجود ونفس الشي رايد جهز غرفته هو وربى

فتح لها الباب وقال:تفضلي يا أجمل زوجه ..
دخلت ربى وهي تضحك على رسميته
رايد سكر الباب وشالها بخفه وهو يبوسها على خدها:ماني مصدق قبل اسبوعين كنت اتمنى اتزوجك والحين صرتي حلالي.
طوقت رقبته بايدينها وقالت بدلع:وانا ماني مصدقه ياروحي ..
ذاب على دلعها وباسها على خدها:الله يخليك لي بس "وهو يبوسها على وجهها بكل مكان ..
استحت ربى وقالت:رايد خلاص نزلني
رايد:ماني منزلك اليوم بس بقابلك بشبع منك مع اني ماراح أشبع العمر كله منك ..
ربى حست انها بحلم حست بالاستقرار الحب وطعم الحياه مع رايد وبسس ضمته وكانها خايفه تقوم من هالحلم ورايد شد على ضمتها أكثر كل منهم تايهه بالثاني..

اما نجود وصقر دخلت الغرفه وهي متفاجئه من المنظر الي تشوفه الشموع منتشره بالغرفه من مدخل الباب لحد السرير والورد الجوري منثور ع السرير بشكل رومنسي ..
غمض عيونها وقال :لسى ماشفتي شي غمضي عيونك وتعالي معي "ومسك ايدها"
كل هذا وسط انذهال نجود ..
جلسها ع السرير وفتح علبه فيها طقم ذهب مرصع بالالماس النادر وقال:فتحي عيونك..
فتحت عيونها وهي متفاجئه:وااوو يجنن
صقر:يلا خليني البسك عشان اشوفه عليه ..
تقدم منها ومسك اصبعها ولبسها الخاتم ثم الاسواره وثم الحلق وبعدين قرب للطوق الناعم لكن باين عليه الفخامه من نعومته قرب لها بعد شعرها وباسه رقبتها وقال:ساعديني فيه..
ضحكت وعرفت انه يقصد شعرها:رفعت شعرها ولبسها العقد وباس رقبتها بوسها طويله ثم حضنها من ورا وقال: نجود أبيك تنسين كل شي صار قبل او أي شي سمعتيه عني خلينا من هاللحظه نعيش بسعاده ونفكر بحياتنا الجايه وبس.
تنهدت نجود وكأنه عارف انها عرفت شي من زواجه الي قبل لكن قالت بنفسها انسي وعيشي حياتك واضح ان صقر من هديته انه صدق بيعيش حياه جديده واستقرار ومعها وبس...

وبعد مرورر الايااام على ابطالنا

* مرام عايشه احلى حياه مع فايز وهي الأن حامل بطفلها الاول وفايز طاير من الوناسه والسعاده معها ..وتعلمنا وعرفنا منهم ان الغرور مو كل شي وفايز علم مرام هالشي وتعلمت منه كثيرر وهي معجبه فيه وبشخصيته واخلاقه وكل شي فيه ...

*اسيل انخطبت لأدم الي كان يحبها من طرف احد وزواجهم بعد ماتخلص دراستها الجاميعه ...

*عبير بغرورها وعنادها ضيعت اجمل حب ممكن يصير لها بحياتها مع منصور الي كسرت قلبه واهانت حبه لهااا وراضيه بحياتها الأن ولكن ذكرى منصور كل يوم تجي ببالها وهذا نصيبها بالنهايه ...مو شرط كل حب يتوج بالزواج في الروايات وهذي قصه عبير ومنصور!!

• ابتهال ووليد عايشين بسعاده واحترام ..والكل مقدر الأخـــر

*ساره رفضت وائل لأنها رافضه فكره الزواج الان وهذا الشي حير وائل وقهره لأنــه مو عارف السبب!!

*ام وائل كانت بتخرب حياه رعد وسديم وتقرب رعد لبنتها لكن شهد تزوجت ورفضت انها تكون سبب تعاسه زوجين وتفرق بينهم ..

*ابرار رجعت زوجه ريان تراعي له وتهتم فيه رغم انه خانها وعذبها وقهرهااا الأ ان قلبها ماطاوعها يصير ابو عيالها بهالحال ومحد يهتم به .. ريان مقهوورر ووده دايم يتقرب من ابرار بس كانت ترفضه وهذا الشي كان يعذبه أكــثـر ..

*
اما عند ابطالناا رعــد وسديـــم

كانو جالسين بالحديقه الخلفيه الي كانت مهجوره والأن شكلها يفتح النفس مزينه بالوان الورد الاحمر والابيض والاصفر والوردي والنخل الي اثمر والنافوره صوتها كان عذب متناسق مع صوت تغريد العصافير ..كانت جالسه وهو منسدح على رجلها يسولف معها:شرايك عجبتك المفاجئه؟؟
سديم بحب:واحلى مفاجئه ..كيف كنا محرومين من هالمكان الي يفتح النفس ببيتنا؟
رعد:الي صار هنا ياسديم موقليل الله يرحمها..
سديم تمسح على بطنها الي بدا يكبر بألم:الله يرحمهاا يارب
عدل جلسته ومسك ايدها وباس اصابعها اصبع اصبع وقال :سديم انا اســـف
سديم مو فاهمه:؟؟؟
رعد :اسف على كل يوم جرحتك فيه ..اســــف اني خيبت ظنك بالمول قدام الناس ..اســـــف لأني رميتك بالشارع وكنت عديم احساس بذاك اليووم الــي .....
حطت يدها على فمه تسكته:خلاص يارعد لاتذكر هذاك اليوم الي اول مالتقينا فيه لاتذكره خلاص..
تنهد بألم وقال:كنت عديم احساس
سديم:الي فات فات يارعد ..
رجع مسك ايدها وباسها :تقبلين اسفي بكل شي سويته لك ياوردتي؟
ابتسمت بحب: اقبل اسفك يابعد كل الدنيا انت ..
رعد ضمها بشويش خايف عليها من الحمل:أحــبك
ضمته بقوه وقالت:وانا ........أحبك
تنهد بغصه داخله من قالت له احبك ونزلت دمعه ألم وقهر من عينه على الماضي الي سواه فيها ...
سديم بحب:رعد خلاص انسى كل الي صار ...حنا الحين مع بعض وهذا المهم
رعد:انتي علمتيني ياسديم اشياء كثير طيبه قلبك ذوبت قلبي القاسي رقتك اخلاقك صحت الاحساس فيني ...أحـبك الله لايحرمني منك...
سديم وهي تمسح على شعره الاسود الكثيف:ولايحرمني منك يارب...

• اوصل معكم لنهايه روايتي فيها من الخيال كثيررر وكله من نسج افكاري الخياليه لكن موجود فيها من الواقع مثل غرور مرام ..وعناد عبيرر وكسرها لقلب منصور ... وفيها من الواقع بحقد أم وائل والي كانت بتفرق بين زوجين لكن ماتم هالشي ...

شكرا على المتابعه واعتذر عن التاخير والظروف الي حدتني اوقف

لكن الحمد الله قدرت اكمل النهايه لان الروايه طول هالسنين كانت ببالي ومانسيتكم ابد

أعتذر اذا ماوفيت النهايه حقها
ودور ساره عبير شوق نفس المصير ماتزوجوا ماحبيت اختم النهايات كلها بالزواج !!

لا اداري اذا برجع لكم بروايه ثانيه أو لا لكن احتمال يكون في روايه ثانيه... وشكرا

من تحت سقف الشقى اخذتني الكاتبة نرجسية

أنتهت