Kung mabibili lamang ang iyong pag-ibig
Ako ay gagastos kahit sampung ulit
Upang makamtan ang matagal na nais
Na iyong mahalin kahit na sasaglit.
Kung marerentahan lamang ang yong puso
Sana ay long term lease kahit doble-tubo
Ako ay magdodown kahit 2 years advance
Makapiling ka lang at maging kasuyo
Kung napupulot lang ang yong pagmamahal
Pupulutin lahat kahit pa mapagal
Upang malaman mo ang tunay kong dasal
Na ika'y makuha kahit anong tagal.
Kung ang buhay lamang ay 'sang pelikula
Ika'y gagawin ko na bidang artista
Ako ang direktor at siyang may pasya
Ako'y mamahalin hanggang sa pagtanda.
Ngunit hindi naman "FOR SALE" ang pag-ibig
At hindi rin naman renta lang ang hilig
Nais ko'y manggaling mula sa 'yong bibig
Na ako'y ibig ding makaisang-dibdib.
Tunay ngang ang buhay tila isang laro
May magtatagumpay at may mabibigo
Mayroong sasaya at may masasaktan
Ngunit lahat tayo'y may matututunan.