#الحب والمستحيل 16
#قصة عشق@
هيثم نقطه ضعفي حاولت ابتعد عنه ولا احتك بي طول الايام الراحت
انشغلت بالبحث والاحداث الاخيرة وهو هم جان مشغول عني بس عيوننا من تتلاكه تحجي كلام وعتب وحسرات ...
ما ادري ليش احس اكو عتاب وحزن وألم وحسرة متبادل بيننا
بس اكو شيء يمنعني يمكن لأن المفروض هو الرجال ولازم هو يبدي ويصارحني ..
انتظرت اربع سنين نتقدم خطوة لكدام عشرة لورة بعلاقتنا
وظلينه بحدود زماله وصداقه الدراسه وبس
..كعدنا بالكافتريا اني وهيثم ..
اشترينه عصير ولفات ومحاضرة عدنا بعد نص ساعة تقريبا ..
كلت أبدي اني احجي لأن ادري بي لباجر ماينطق
شنو هيثم شردت تتكول
كال اححح"
«جانت بس هاي النحنحه فالح بيها »
_ابتسمت وحجيت بصوت ناصي هيثم شبيك مو على بعضك أحسك !
_هاا لا ماكو شي
شبعدلج وتخلصين
ردت كم مصدر منج وهذا الولد شسمه !!
الضابط ..
_ امير شبي !
وبداخلي ما اعرف يمكن تمنيت اركص
من الفرحه واخيراََ حسيت بنار الغيرة تاكل بهيثم من يوم اللي اجه امير للجامعة وهيثم متغير حتى بعد ماراسلني
ومن اتصل مارديت عليه وتجاهلته زادت غيرته أكثر
المهم شفته ضايج وسويت نفسي أمدح بأمير
شكد حباب هالولد وخلوق
شخصيته ماكو منها ومن رحنا للوزارة بس يعرفون بينا من طرفه يركضون ويساعدونه لخاطرة اصلاً لو ما هو لحد هسة مكملنه التقارير والبحوث
ضاج وضرب الميز حيل نززني !!
اخذ موبايله ومفاتيحه وكام بسرعة وشكله منفعل وعصبي
حسيت بخجل من الموجودين وعمال الكافتريا ظلو يباوعون عليه
اخذت جنطتي ورحت وراه دورته ملكيته ياربي شبي هذا !!
رجعت لصديقاتي شفت جلال وخرت صار ببوجهي ظل يذب حجي ويهمس اعشقج خرب العشق
انتي شنو ماعدج احساس سويت نفسي ماسمعت
شكد حقير واحس بخوف من كلامه ونفسي تلعب من اشوفه
محجيت شي للبنات دخلنا للمحاضرة هيثم كاعد بالاخير
طلبت من البنات يكعدون وحدهم وتعمدت اروح يم هيثم وصلت مرحلة قريبه لازم اوصله أكثر
واعرف شنو فيلمه هذا
شافني توتر ووجهة ظل ينطي الوان ..
وجلال الحقير يباوعلي مااعرف حقد وغضب حسباله من ممتلكاته
گعدت يم هيثم وسويت نفسي ممهتمه
خليت ايدي قريبه من ايد هيثم وبداخلي اتمنى يلزم ايدي ..
اااخ منك هيثم تحرك الله يوفقك
كتبلي بورقة كافي عشق دمرتيني رحميني ..
قريتها باوعت بعيونه تلمع انصدمت !!
شنو !!
بصراحه توترت وعركت وما ادري يمكن صخنت مثل كل مرة يقترب مني
حسيته ادنه شوية يمي وايدة لمست ايدي ورجله صارت على رجلي
نفس الإحساس من صعدنا سوة بسيارة الخط اخر مرة
وقبلها من مطرت ..
لا .. هالمرة يمكن اكثر ..
اسمعه يتنفس بسرعة ..
واني هم ..
معقولة يحبني ويبادلني المشاعر ..!
ليش تأخر كل هالوقت !
أربع سنين مو هينه ..
المحاضرة خلصت وكلشي ماافتهمت من الاستاذ ...
طلعوا الطلاب كلهم وصديقاتي ظلن يباوعن عليه اشرتلهن طلعن بس جلال اجه قريب باتجاهي اني ما تحركت من مكاني
وما اشوف احد بعد ظليت على كعدتي عجبني الوضع دنگ هيثم وحجة باذني على كيف ..
خلينا نطلع منا نروح لغير مكان حتى لحد ينتبه ماريد احد يشوفنه سوة
اشرتله مامصدكه ايي وكمت ..
نزلت من الكرسي
هم صار ببوجهي جلال
اريد اوخر عنه اجه هيثم من الجهة الثانية ردمه حيل طاح لورة بحيث وكع كم كرسي وتعثّر ضحكت علية وهزيت بيدي وطلعت من القاعة
..
مشيت واحس هيثم وراي ..
بطئت وطلعت موبايلي اتصلت بنادية
فدوة لاتنتظرني واذا تخلصوني من جلال تسوّون عليه فضل كالت ليش وين انتي !
بعدين ناديه عفية مااكدر احجي هسة والتفتت بعدة هيثم ماراح ..
سديت الموبايل خليته بالجنطه ..
بوقتها النفس كوة اجرة ومتوترة وهيثم وراي بعده رجع يبتسم ويقترب فدوة اروحله ملاك ويمشي نسيت حتى اسمي بذاك الوقت
ظلينه نمشي اجه بصفي صرنا سوة والطلاب جانو ديطلعون من الجامعة
رحنا مكان حديقة ورة القسم تذكرت شنو هذا !
نفس المكان اللي وكعت بي بالمرحلة الأولى !!
شلت راسي لهيثم كلي هاا تذكرتي !
أي هيثم شنو هاي انته ملاكي الحارس وضحكت
كلي والضابط ..!
اقتربت منه اريد احضنك هيثم
هو هم اقترب مااعرف احساس مينوصف صار يمكن جان متبادل بوقتها ..
تمنيت كلشي يصير بيننا ..
بس الوقت والمكان مو مناسب لزمت متنه وخله ايدة على ضهري واقترب حضنّي بس مو كلش كلما اقترب منه احسة يبتعد ..
اكو خوف جان لا احد يشوفنه يمكن ..
بس انفاسنه تتصاعد
هيثم طويل كلش بحيث ارفع رجليه من دنيّت يمه واشيل راسي
ياربي اتمنى يبوسني لو يحضني حيّيل
بس وخرّ عني ..!!
رجع وكعد اكو صبه دنكت مستحيه لأن فشلني مااعرف ليش عافني وما سوة شي !
خله غراضة موبايله وكتبه بالكاع واشرلي اكعد بصفة
كتله لا حروح الخط اكيد منتظر
_عشقي أنتي بس دقايق
_عشقي !
اي عشقي ليش مستغربه
كعدت بصفه هيثم انته شنو !
سلحفاة يمكن !
اربع سنين وهسة جاي تكلي عشقي !
شفته اتحسر بحركه وألم ...
عشقي صعب تفهميني
بس اكيد يجي يوم وتعرفين وتعذريني ..
ايي وشعرف باللة !!
دگ موبايلي غصون
كمت نكثت تنورتي اني رايحه هيثم صديقاتي ينتظروني بالسيارة واذا عدك كلام جديّ أنتظرك تتصل
ضاج وظل مدنك بالكاع عفته ورجعت بالسيارة لكيتهن مخبوصات شنو شصار احجي خبصني
حجيت الهن غصون كالت كم مرة اكلج عوفي هيثم عشوقة راح يدمرج
غصون ليش دائما هيج تحجين !
ليش يدمرني !
نادية كالت جلال اجه يدور عليج وكتله صعدت بسيارة الخط وراح
بستهة فدوة خلصتيني هم وانزاح
وظلينه طول الطريق نسولف من رجعت اتصلت بريم وحجيتلها كلشي
نسيت اكلكم ريم حامل مره ثانيه واجلت السنه وكوثر زواجها بعطله الكورس الاول نروح كلنا مدعويين للزواج بالقاعه
ريم رايها من راي صديقاتي
وطلبت مني اتصل بهيثم واتخذ قرار حتى لااخسر أمير
لان أمير فرصة ومستحيل الكه واحد مثله
أمير ماتصل بعد اخر مرة طلعنه ماادري زعل مني يمكن
وكان شغله بس ويه بابا أسمعه يتصل بي
ورة كم يوم بابا حجة وياي بموضوع امير كلي بابا اني ماجبرج انتي اتخذي القرار بس لاتستعجلين
كتله بابا طلع متزوج وعندة علاقات هواية قبلي
بنتي كل الشباب عدهم علاقات عابرة وبحكم شغل امير يسافر وينتقل من محافظة لمحافظة ..
بابا تتدافع عنه !
لا بنتي شدافع عنه !
اخذي قرارج والظاهر من طلعتوا ماتفقتوا انتي وياه ..
طلع بابا راح للمحل
طلعت الموبايل شفت هيثم كاعد بالماسنجر اتصلت رد وصوته تعبان ماادري مخنوك ..
كال عشقي احبج
ماادري من الفرحة بجيت كتله افتح كاميرا حباب
خاف اسببلج احراج !
كتله بعصبيه سلحفاة افندي تفتح كاميرا لو اسدة الإتصال !
فتح الكاميرا وعدل نفسة جان متمدد
على كيفج شنو هالعصبيه قزومه
ضحكت ومن شفته ردت روحي
بس عيونه حمر وتعبان والكتب مطشرة وغرفته هوسه
كتله تخاف اشوف الفوضى مالتك شبيك !
لا بس تعبان وعندي شغل بليل كون انام شوية حتى اظل صاحي للفجر
هاا ..
يعني اسد الاتصال !
هيثم يباوعلي وماادري مقهور اكو شيء بداخله مداعرفه بس يتحسر ويتنهد وكل شويه يسوي احححح"
احجيلي شراح تسوي بعطلة الكورس
تجي لزواج كوثر
لا عشق ويني وين الاعراس مشغول وداعتج عندي شغل هواي اكمله بالعطله
حباب تعال ..
بزواج ريم وعلي ماجيت
مااكدرت ..
جر ّحسرة وكال ..
اشوفج مبدله ولابسة بدله والعيون عليج اموت غير
إسم الله ليش هيج تحجي هيثم !
لزمت كلبي وكتله بعد لاتجيب طاري الموت فدوة
تحبيني قزومه !!
كتله لا مااحبك احب السلحفاه اللي أربع سنين وياي بنفس القسم والمرحله ومكضيهة بس احححح"
ضحك وضحكت وياه ممصدكه ..
سمعت الباب وصوت كتله بعدين اخابرك اجة بابا ..
جنت لابسة دشداشة قصيرة وربع ردن
طلعت شفت بابا وياه أمير !!
رجعت لوره
بس شنو امير فتح عيونه وحلكه عليه
شكد استحيت
رجعت للغرفه بدلت وطلعت
كتلهم اسوي جاي !
بابا كال بنتي تعالي كعدي يمنا وسمعي
الموضوع يخصج ..
عرفت اكو شيء ..
كعدت وبده امير يحجي ..
...
يتبع ..
#قصة عشق@
استطلاع الكاتبه..
توقعاتكم ..
منو اكثر شخص يستحق عشق ؟
(هيثم ، جلال ،امير )