الحلقة 13
فؤاد بيفتح الباب الخارجى
ومعاه ايمان ونادر
ايمان"اتفضلوا عندى فوق"
ايمان سابقاهم...فؤاد هيقف عند شقة مامته
فؤاد"لا احنا هنتعشا هنا... زمان ماما نامت تعالى اعمليلنا العشا يا ايمان"
ايمان"حاضر"
فؤاد بيفتح شقة مامته
"اتفضل يانادر"
يدخلوا ويسيبوا الباب مفتوح
تدخل ايمان ع المطبخ...تتصل من موبايلها
"الو...انزلى لى يامايا انتى ونسرين بسرعة...يالا متتأخروش"
******************
نسرين نزلت شايلة ابنها ومعاها مايا
دخلوا
نسرين"نادر!!اهلا وسهلا...طنط عاملة ايه"
نادر بيقوم يسلم"اهلا يا نسرين ازيك...الحمدلله انا مشيت وكانت لسه خارجة من العمليات...بس الدكتور طمنى"
نادر واقف...خلص كلامه مع نسرين
مايا واقفة فهمت من الكلام يبقى مين
فؤاد"تعالى اقعدى يامايا...مايا بنتى"
مايا"اهلا وسهلا"
نادر وهو بيسلم عليها
"تشرفنا"
********************
فارس داخل البيت... مستغرب العربية اللى واقفة قدام الباب
فتح الباب الخارجى ودخل
وهو طالع ع السلم...شاف الباب مفتوح
وشاف مايا وفؤاد ونسرين قاعدين مع شخص غريب
اللى لفت انتباهه هو متابعة مايا باهتمام للشخص اللى بيتكلم
وواضح ان كلامه بيتوجه ليها
استغرب...وقف لحظات...اتضايق من وقوفه كده
كمل طلوع للبيت وهو بيفكر
"مين اللى قاعد مع مايا وخالى ده"
*********************
مايا وهى قاعدة بتسمع نادر
"الموضوع اللى كنت عايزك فيه يا استاذ فؤاد...هو انى بفكر افتح فرع للشركة هنا..انا بشتغل مع مراتى ف شركة السياحة بتاعتها ف تركيا...وكنت بفكر افتح فرع ليا هنا...بس بصراحة لقيت التكلفة عالية عليا لوحدى وبما انك كنت بتفكر تعمل بزنس هنا فانا بعرض عليك الشراكة"
فؤاد بتردد"مفيش مانع...ايه رأيك يامايا"
مايا بتفكر"مش عارفة يابابا...رأيك اهم"
فؤاد"انتى هتبقى معايا ولازم رأيك"
نادر بيبص ف الساعة
"الوقت اتأخر... انا متشكر ع العشا وحضرتك فكر براحتك يا استاذ فؤاد ورد عليا... استأذن"
*********************
فارس داخل البيت وهو سرحان
"مين ده اللى قاعد معاهم تحت"
قعد على اقرب كنبة من غير ما يفتح النور
ماسك ميدالية المفاتيح باديه الاتنين وبيشد فيها بعصبية
سمع صوت عربية بتدور...قام بسرعة يبص من الشباك
شاف العربية اللى واقفة قدام البيت وهى بتتحرك
وايد اللى بيسوقها بيشاور لحد جوه البيت
قفل الشباك بعصبية ووراح ع الباب...وخرج
*******************
فؤاد راجع بعد ما وصل نادر
دخل قعد معاهم
"ايه رأيك يامايا ف اللكلام اللى قاله نادر"
مايا"لازم نفكر كويس الاول يابابا ومنتسرعش... ونطمن برضه على شغله هناك ...ماشى كويس وصادق ولا كداب...سورى يا نسرين بس مبقاش عندى ثقة ف حد"
نسرين"الحق ميزعلش وانا اعرفه عادى بس معرفش طريقة شغله...فكروا بعيد عن قرابته لممدوح"
دخل فارس فجأة... بيحاول يهدى عصبيته
ايمان"فارس...تعالى مالك؟؟"
مايا شافته ...قامت تدخل اوضتها
وقبل ما تدخل
"مايا...مين ده اللى كان هنا"
التفتت له مايا...وهى بتبص لباباها
فؤاد"فى ايه يافارس"
فارس بيحاول يتحكم ف عصبيته وبيوطى صوته
"مفيش ياخالى...بسأل بس مين ده اللى كان هنا"
مايا"وبتسألنى انا ليه؟"
ارتبك فارس...بص للموجودين كلهم
فارس"بسألك يامايا....مين ده"
نسرين"ده ابن خالة ممدوح"
فارس مستغرب
"وابن خالة ممدوح ايه علاقته بمايا"
مايا"مايا مايا...مالك ومال مايا"
فارس"علشان شفت اهتمامك بيه...وكلامه اللى بيتوجه لك... وتوصيلك ليه وهو ماشى"
مايا"توصيلى ليه!!... حتى لو كنت انت مالك ومالى...فوق يافارس انت طلقتنى خلاص ومبقاش لك حكم عليا"
زعق لها فارس وهو بيقرب منها...وف حركة لا ارادية حطت ايدها على وشها وكأنه هيضربها
حركتها اللا ارادية وقفته مكانه من غير ما يقرب منها
ووقفت الكلام على لسانه
فؤاد بيشخط فيه"فااااااارس ...انا عايش وموجود مع بنتى.... محدش خالص بقى له حكم عليها من هنا ورايح"
مايا وكل ذكرياتها السيئة مع فارس ف الليلة المشئومة بقت قدام عينيها... عيطت
"ابعد عن حياتى خالص يا فارس... كفاية اللى حصل لى منك ومن غيرك... انا كل ما احس انى اتقدمت خطوة وبقيت كويسة تيجى انت ترجعنى 100 خطوة لورا... سيبنى ف حالى بقى"
تقعد وهى بتعيط... ايمان تقعد جنبها وتحضنها
"بس يامايا...محصلش حاجة لده كله.. مش كويسة العصبية دى علشانك"
فارس بيحاول يدافع عن نفسه
"انا عملتلك ايه يامايا... انتى بتحملينى ذنب اللى حصل ليا لوحدى ليه... وانتوا كلكم حاسين بيها ومحدش حاسس بيا ليه... انت نفسك ياخالى لحظة ما اتصدمت اتصرفت ازاى...بتلومونى لوحدى ليه"
محدش بيرد عليه... مايا بتعيط... فارس صوته مخنوق
كمل كلامه
"خلاص ... خلاص كده... استريحى اوى يا مايا... اعملى اللى يريحك... دوسى عليا اوى علشان غلطة غلطتها مش عايزة تسامحينى عليها...رغم ان غلطتك انا سامحتك عليها وجيت اراضيكى"
مايا وهى بتعيط"وهى دى المشكلة اللى بيننا...انك بتحملنى غلطة معملتهاش"
فارس"غلطتك انك خبيتى عليا وفاجئتينى... وانا فعلا غلطان انى سامحتك عليها"
خرج فارس من البيت...
طلع السلم وهو متضايق... وصل للسلم اللى بين شقتهم وشقة ايمان...قعد على السلم...ومسح دموعه اللى نزلت من كتر حبه وغيرته على مايا...اللى بتقابلهم بكل قسوة
******************
خلال الشهرين التاليين
فاتت الايام على مايا... وهى بتشغل نفسها بالتفكير ف المشروع الجديد... كانت اغلب المقابلات بين فؤاد ونادر بره وكلام عام عن المشروع لقصر فترة الاجازة اللى جاى فيها...ومكنتش بتحضرها مايا لتعبها ف شهور الحمل الاولى
نسرين ترجع بيتها مع حماتها وخالة ممدوح بعد ما يتم علاجها
حياة علاقتها مازالت متوترة ببيت مامتها
ومش عارفة تراضى مامتها ولا توفيق وبتحاول تكون ع الحياد
توفيق مخاصم فارس من بعد ما رفض انه يخطب...ومستنكر ضعف شخصيته - من وجهه نظره – قصاد مايا
فارس ومن بعد اخر مرة اتكلم فيها مع مايا... وهو حس انه بيقلل من كرامته بحبه ليها... ندم على محاولته ارضائها وقرر انه هيتجنبها تماما...شعوره بالندم مع خصام باباه ليه...حسسه انه مبقاش مرتاح لوجوده قريب منهم
**********************
فؤاد داخل من بره بيتكلم ف التليفون
مايا قاعدة مع جدتها
"هقولك يا نادر واشوف هينفع ولا لأ... لازم نسأل الدكتور الاول... اه مايا اهى معاك"
وشاور لمايا
"نادر عايز يكلمك"
اخدت مايا التليفون من فؤاد
"الو... الحمدلله... اه كويس وبابا بدأ يدور على مكان مناسب... نيجى؟؟..اه عندى ايميل بس من زمان مفتحتوش ونسيت الباسوورد... اه ممكن اعمل واحد جديد... طيب ابعته ف مسدج على تليفون بابا... ان شاءالله ...مع السلامة"
قفلت مع نادر..وبصت لباباها وهى بتديله التليفون
"بيقولى هتيجوا؟"
"اه مصمم اننا نروح له تركيا فانا قلت له لازم نسأل الدكتور الاول"
"هو عايزنا ليه"
"بيقول نشوف الشركة هناك ونظام الشغل"
ورن الموبايل بنغمة رسالة
"اكيد بيبعت ايميله... بيقولى عايز ايميلى علشان يكون اسهل ف الشغل"
"طيب... وايه رايك ف السفر"
"لو الدكتور قال اسافر نسافر...لو قال لا سافر انت يابابا ولما تيجى تبقى تقولى عملت ايه "
"طيب ...ابقى قولى لعمتك تروح معاكى للدكتور علشان تسأليه ع السفر"
"انا كده كده معادى معاه بكرة ورايحين له"
"انتى وصلتى للكام"
"ف اول الخامس"
"والدكتور بيقولك ايه على التعب اللى انتى فيه ده"
"بيقول عادى"
**********************
فارس خارج من اوضته قعد مع باباه ومامته
توفيق اول ما شافه...قام
"بابا لو سمحت عايز اتكلم معاك"
توفيق"نعم"
فارس"ياريت متزعلش منى... مكنتش اقدر اروح اخطب واحدة وانا مش عايزها...حرام اظلمها معايا"
توفيق"واللى انت عايزها مينفعش ترجع لها"
حياة"استغفر الله العظيم يارب...احنا ايه اللى جرالنا بس"
فارس"اطمن يا بابا...انا خلاص عارف ان مبقاش ينفع ارجع لها"
توفيق"وهتفضل كده"
فارس"انا مسافر بكرة"
حياة بفزع"مسافر فين... كفاية سفر بقى انا تعبت من بعدك عنى"
فارس"متقلقيش ياماما..ده فرع الشركة هنا جوه مصر مش بره"
توفيق"فين"
"ف السويس"
توفيق"ليه"
"هبقى مرتاح اكتر"
توفيق"كله منها... هى السبب ف كل المصايب اللى بتحصل لنا"
فارس وهو قايم يدخل اوضته
"انا مسافر بكرة بالليل ان شاءالله...بعد اذنكم"
********************
ايمان ومايا ف التاكسى
ايمان"نزلنى هنا لو سمحت"
ايمان بتميل على مايا
"هجيب حاجة من السوبر ماركت واحصلك"
نزلت ايمان وكملت مايا ف التاكسى
وقف التاكسى ورا عربية واقفة قدام البيت
نزلت مايا من التاكسى وهى بتبص على العربية الغريبة اللى واقفة قدام البيت بالظبط ...وشنطة العربية مفتوحة وفيها شنظة سفر كبيرة
قربت من الباب...شافته مفتوح
دخلت... وطلعت السلالم الاولى ...وقبل ما توصل لشقة الجدة
شافت فارس نازل بشنطة سفر صغيرة
فارس اتفاجئ بمايا قدامه وهو نازل
لفت نظره شكل بطنها اللى اول مرة يشوفها بعد ما بان عليها اثر الحمل
لحظات نفس التفكير بيدور ف خيال الاتنين
يتجاهلوا بعض ولا يسلموا على بعض
اول مرة يتقابلوا بعد ما كل واحد فيهم قطع اى صدفة ممكن تجمعهم
وقطع فارس افكاره
"ازيك يامايا"
"الحمدلله"
وكملت وهى بتبص للشنطة
"انت مسافر"
فارس بوجع قلب
"مش مرتاح ف بيتى ولا وسط عيلتى ولا مع اللى بحبهم...يبقى اقعد ليه"
"السعودية برضه"
"لا... السويس... تبع الشركة...طمنينى على صحتك"
"الحمدلله"
"خلى بالك من نفسك ومن ابننا"
فتحت مايا شنطتها وطلعت صورة صغيرة للسونار
ناولتها لفارس وهى بتحاول تبتسم
"شوف صورتها"
مسك فارس الصورة...بص لشكل الجنين وهو بيبتسم
"بنت؟"
"اه"
باس الصورة اللى مفيهاش غير جنين ابيض واسود
ناولها الصورة تانى
"خلى بالك منها... ومتزعليش منى ف اى حاجة فاتت او اى كلمة زعلتك فيها"
شافت لمعة دموع متحجرة ف عينيه... حست ان دموعها ممكن تنزل... اتكلمت بسرعة
"خلاص يا فارس... انت ابن عمتى وان كنا فشلنا ف جوازنا مش عايزين نفشل كأم واب ...خلى الصورة معاك لو عايز"
حط الصورة ف جيبه
"شكرا...بس احنا مفشلناش كزوجين...احنا ملحقناش"
وقاطعته مايا
"يالا انا طالعة...توصل بالسلامة ان شاءالله"
طلعت مايا وفتحت باب الشقة بالمفتاح....ونزل فارس ركب العربية اللى كانت مستنياه
*******************
مايا اول ما دخلت وقفلت الباب وراها...باباها سألها
"ايه يامايا...عملتى ايه...نادر كلمنى وسألنى هينفع تسافرى ولا لأ؟؟"
الحلقة 14
مايا اول ما دخلت وقفلت الباب وراها...باباها سألها
"ايه يامايا...عملتى ايه...نادر كلمنى وسألنى هينفع تسافرى ولا لأ؟؟"
"لا قالى بلاش سفر ولا حركة كتير"
"طب وبعدين"
"سافر يابابا وهنبقى مع بعض ع التليفون"
"طيب هقوم اتصل بنادر واقوله انى هروح خلال الاسبوع الجاى"
"وانا من هنا هبقى اشوف اعلانات الشقق والمكاتب واشوف لو فيه حاجة مكانها وسعرها مناسب هبقى اقولك...هتطول؟"
"لا هشوف بس الشغل ازاى هناك واشوف عايزنى ليه واجى"
"ماشى"
قام فؤاد دخل الاوضة يتكلم... مايا بتقعد
خبط الباب...قامت تفتح
"تعالى ياعمتى"
"قفلتى الباب ليه"
مايا بتقعد
"انا عارفة... اقعدى"
"لا انا طالعة احط الحاجة ف التلاجة...هو مفيش حد هنا"
"بابا جوه بيكلم نادر ونينة مشفتهاش اكيد نايمة"
"طيب ...تصبحى على خير"
راحت ايمان ناحية الباب
سألتها مايا
"شفتى فارس"
التفتت لها ايمان وردت بتلقائية
"لأ..بتسألى ليه؟"
"فارس سافر"
رجعت لها ايمان وقعدت قدامها
"ايه..سافر فين؟"
"فرع الشركة ف السويس"
"اخص عليه مسلمش عليا...بس انتى عرفتى منين"
"وانا جاية قابلته ع السلم...يعنى كده كده مكنش هيقول لولا انى قابلته بالصدفة"
"وبعدين"
مايا بتتصنع عدم التأثر
"مفيش... اتكلمنا عادى ووريته صورة السونار وقلت له انها بنت"
"هااا"
مايا بتبص لها
"بصى ياعمتى انا هقولك اللى حسيته بس متعلقيش على اللى هقولهولك...بمعنى اصح متمسكيش عليه يعنى"
"قولى"
"قلبى وجعنى وحسيت ان فارس صعب عليا"
"وليه طيب العِند بقى"
مايا واحساس بالندم انها اتكلمت
"شفتى بقى...انا غلطانة انى قلتلك اللى حسيته... انا مش بعاند والله"
"اومال ايه"
مايا سكتت مترددة...بتحاول توصف اللى جواها
"انا ... انا خايفة من فارس...بقيت بخاف منه ياعمتى ...علشان كده بقولك زى ما قلتله ان كنا فشلنا كزوجين مش عايزة نفشل نبقى ام واب كويسين"
"فارس بيحبك"
"عارفة...بس الحب ده مشفعليش عنده ولا قدر يرحمنى "
وكملت كلامها وذكريات الليلة المشئومة قصادها
"فارس وجعنى اوى... وجعنى بقسوة... يمكن ألم جسمى خف انما ألم قلبى وكرامتى مخفش ..موجوعة اوى ياعمتى...اوووووى"
********************
فارس ف العربية على طريق السفر
سرحان ف الطريق الممتد قدامه
غمض عينيه.... وتخيل
تانى يوم الفرح... الاهل عندهم بيهنوهم وفارس ومايا كل اللى بينهم نظرات حب وسعادة
فارس مع مايا بيحضروا الفطار مع بعض
فارس نايم وجنبه مايا بيبص لها بحب وهو صاحى
فارس مع مايا عند الدكتور واول خبر للحمل بيسمعوه مع بعض
فتح فارس عينيه من خياله على صوت فرقعة عالية
"ايه يا اسطى...حصل حاجة"
السواق وهو بيهدى
"الحمدلله...الكاوتش فرقع بس ربنا ستر...حالا هغيره"
*********************
مايا بتتكلم ف التليفون
"حمدالله ع السلامة يابابا... انا كويسة الحمدلله... لا ملقيتش حاجة مناسبة... انت فين دلوقتى... يعنى نادر وصلك الاوتيل ومشى... ماشى ابقى عرفنى عملت ايه...مع السلامة"
قفلت مايا مع فؤاد... مسكت بطنها وهى بتمدد على السرير وبتحط اللاب جنبها وبتفتحه
دخلت على مواقع العقارات بتتفرج
اتفتح قدامها رسالة من نادر
"صباح الخير يامايا"
"صباح النور"
"ايه عاملة ايه"
"الحمدلله... لسه بابا مكلمنى وقال انك استقبلته ف المطار ووصلته"
"اه فعلا لسه سايبة من شوية... كنت اتمنى انك تيجى معاه"
"معلش ظروف"
"انا ممكن اسألك سؤال احرجت انى اسأله"
وقفت مايا لحظات مش عارفة ترد بعد ما حست بالسؤال
"لو مش عايزانى اسألك بلاش"
"عايز تسألنى على ايه"
"الاول قوليلى...متضايقة اننا بنتكلم"
"لأ..اتضايق ليه"
"يعنى علشان كل كلامنا قبل كده كان قليل اوى وفين وفين لما اعرف اكلمك"
"كل الحكاية انى مبقدرش اقعد ع النت كتير"
"صحتك عاملة ايه"
"الحمدلله"
"سؤالى... انتى ايه حكايتك"
"حكايتى؟"
"اه... كل اللى اعرفه انك مطلقة من اول شهر جواز...صحيح؟"
"صحيح"
"مش غريبة"
"النصيب بقى"
"انا اسف واضح انك اتضايقتى"
"مش موضوع اتضايقت...بس فيه حاجات ممكن تحصل تكون غريبة بس اهى بتحصل "
"معاكى حق... وياترى ابو البيبى عارف انك حامل"
"اه طبعا...ابو البيبى يبقى ابن عمتى"
"والله؟؟ مكنتش اعرف"
وقصدت مايا تغير الموضوع
"انا بدور حاليا على مكان مناسب للشركة"
"تمام ربنا يوفقك ...انتى هتولدى امتى"
"لسه 4 شهور"
"عايزين نكون بدأنا شغل"
"ربنا ييسر الامور ان شاءالله"
"هتقعدى تانى امتى...ابقى خليكى اون لاين لما تكونى موجودة"
"لما اكون قاعدة"
دخلت ايمان على مايا الاوضة
"بعد اذنك يا نادر...هقفل دلوقتى"
"اوك... سلام"
قفلت مايا مع نادر... وقفلت اللاب كله
"ايه بتعملى ايه"
"مفيش"
"مالك"
"حاسة الايام بتعيد نفسها"
"ازاى"
"فاكرة بعد ما خلصت الدراسة وكله انشغل بابا سافر ونسرين اتجوزت وانا بقيت لوحدى... حاسة بنفس الاحساس تانى"
ايمان بقلق
"قصدك ايه"
حست مايا بقلقها فاتكلمت بنبرة متفائلة الى حد ما
"مفيش... انا دلوقتى احسن كتير... على الاقل مشغولة ببنوتى..مش هننزل نجيب لها الهدوم"
"اى وقت يا حبيبتى نزل نجيب لها الهدوم"
***********************
مايا وايمان مع الجدة ف البيت
بتتفرج على الهدوم اللى اشتروها
مايا بتوريها كل حاجة بفرحة
فارس قاعد ف اوضة بسيطة
ممدد على السرير وبيبص على صورة السونار بابتسامة
مايا ف اوضتها... على السرير
سرير الاطفال الجديد جنب سريرها
بتفتح اللاب...بتلاقى رسايل كتير من نادر
بتدخل اون لاين وترد عليه... ويكون مستنيها
وتبدأ محادثة بينهم
فارس بيقلب ف صور مايا اللى على موبايله
صور كتير ليها لوحدها وليهم مع بعض بعد الخطوبة
وصور قليلة ليهم ف الفرح
فارس يخرج من الصور... ويقلب ف الاسماء
يقف عند اسم مايا بتردد... صباعه ما بين زر الاتصال او زر الخروج... حيرة وحنين
يحسم حيرته رنة الموبايل ف ايديه...ويرد
"الو.. ازيك يا ماما...لا صاحى..الحمدلله كويس...باكل متقلقيش... اه والله كويس... لا لسه مش دلوقتى...هبقى انزل اسبوع كل شهرين... مش بعيد ولا حاجة يفوتوا بسرعة... ماما... بتسألى على مايا؟؟ ابقى اسألى عليها وطمنينى... خليكى قريبة منهم ... مع السلامة"
**********************
خلال الشهرين التاليين
بعد فؤاد ما رجع...عرضت عليه مايا الاماكن اللى شافتهم مناسبين
وكانت طول الفترة اللى فاتت بتتكلم يوميا مع نادر وبتبعت له كل حاجة تختارها ويتناقشوا فيها
اختاروا شقة كبيرة ف عمارة ف وسط البلد
بدأوا توضيبها... وكان نادر معاهم على التليفون دايما
سواء فؤاد...او مايا
***********************
مايا قاعدة مع ايمان وحياة والجدة
حياة"ابقى خلى بالك يامايا ومتتتعبيش نفسك"
مايا"انا تقلت تقل ياعمتى... بقيت لوعايزة اروح الشركة افضل يومين اقول هروح كمان شوية هروح كمان شوية وفين وفين لما اقدر انزل..ربنا يهون خلينى اخلص بقى"
ايمان"هانت اهو"
توفيق طالع ع السلم...بص جوه الشقة بتكشيرة
"سلامو عليكو"
وطلع من غير ما يستنى رد
قامت حياة بعد ما شافته
"اما اطلع احضر له الغدا... فارس بعد ما قال جاى بكرة قال جاى بعد 3 ايام...الولا وحشنى"
الجدة"ده معندوش دم...الولا يسافر من غير ما يقولى"
حياة"والله ياماما ما قالنا الا ليلتها...يالا ربنا يجيبه بالسلامة"
تقوم حياة تطلع ورا توفيق
مايا"هو احنا مش اتغدينا من شوية... انا جعانة كده ليه"
الجدة"ياختى كلى بالف هنا"
ايمان وهى بتضحك قامت دخلت المطبخ
رن الموبايل وهو جنب مايا...
"رقم غريب!!"
ردت"الو"
ركزت تتحقق من الصوت
"مين...نادر؟... ازيك عامل ايه...الحمدلله كويسة... لا بابا ف الشركة مش موجود... بتقول ايه؟؟ جيت امتى؟؟ مقلتليش يعنى... لا اكيد مفاجئة حلوة...حمدالله على سلامتك... روح لبابا هتلاقيه هناك...قاعد لحد بالليل... هقولك العنوان... مش لازم يعنى... طيب ساعة كده بالكتير ...مع السلامة"
ايمان بترجع من المطبخ وتحط صينية اكل قدام مايا
"ايه هو نادر جه ولا ايه"
"اه...وبيقولى عايز يروح الشركة وهييجى ياخدنى"
الجدة"وانتى قادرة تروحى"
مايا"ولا قادرة ولا حاجة وقلت له اوصفلك العنوان مرضيش... هاكل واقوم ألبس"
*******************
نادر قاعد ف العربية مستنى مايا
مايا بتخرج م البيت...بتركب معاه
بيسلم عليها وهو بيضحك بعد ما تركب
"ازيك يامايا"
"حمدالله ع السلامة...بتضحك على ايه"
"شكلك متغير خالص هههههه"
ابتسمت وهى بتبص لبطنها
"يتغير...خدنا ايه من الجمال يعنى"
"لا معلش حاسبى ... زى القمر برضه"
سكتت مايا ومردتش عليه
"بابا عارف انك جيت ولا لا"
"لا مكلمتوش ...كلمتك انتى بس"
مايا اتكلمت بجدية
"هى مراتك مبتجيش معاك ليه"
"ابدا...هى وراها شغلها هناك مينفعش تسيبه"
"انت كنت قلتلى انها عارفة انك هتفتح فرع هنا"
"اه عارفة... ومعندهاش مشكلة.. مراتى عقلانية اوى ...اوى يعنى لدرجة الغاء المشاعر"
"متهيألى ممكن نعمل الافتتاح قريب...انت قاعد قد ايه"
"قاعد معاكم شوية"
"كويس نبقى نعمل الافتتاح ونبدأ شغل ان شاءالله...احنا قربنا الشركة هتلاقيها على الناصية الجاية"
"المكان حلو اوى"
"اه والمكان كبير من جوه...هتعجبك اكيد"
********************
مايا قاعدة ف اوضتها..دخلت لها ايمان
"حبيبتى صاحية"
"اه ياعمتى...نزلتى امتى مش طلعتى تنامى"
"بصى بقى... بعد ماخلاص طلعت ع السرير وهنام...حسيت انى عايزة اتكلم معاكى ولو استنيت للصبح ماما بتبقى قاعدة معانا وساعات حياة بتنزل مش هعرف اتكلم معاكى"
"ايه ياعمتى...فيه سر ولا ايه"
"انا ملاحظة كده كلام كتير بينك وبين نادر...تليفونات ونت واول ماجه انتى اول واحدة كلمك...ده حتى مراحش لامه"
"عادى ...شغل"
"عليا يا مايا... قوليلى ايه الحكاية"
"بصى...هو النهاردة لما جه اخدنى"
"هااا...ايه؟"
الحلقة 15
مايا قاعدة ف اوضتها..دخلت لها ايمان
"حبيبتى صاحية"
"اه ياعمتى...نزلتى امتى مش طلعتى تنامى"
"بصى بقى... بعد ماخلاص طلعت ع السرير وهنام...حسيت انى عايزة اتكلم معاكى ولو استنيت للصبح ماما بتبقى قاعدة معانا وساعات حياة بتنزل مش هعرف اتكلم معاكى"
"ايه ياعمتى...فيه سر ولا ايه"
"انا ملاحظة كده كلام كتير بينك وبين نادر...تليفونات ونت واول ماجه انتى اول واحدة كلمك...ده حتى مراحش لامه"
"عادى ...شغل"
"عليا يا مايا... قوليلى ايه الحكاية"
"بصى...هو النهاردة لما جه اخدنى"
"هااا...ايه؟"
"كلامه وتلميحاته كانت زيادة عن كل مرة"
"زيادة؟"
"اه...دايما لما بيكلمنى ع النت او التليفون يقعد يحكى لى عن حياته وعن عيشته وانه مش مرتاح وكده"
"وانتى ؟"
"انا بحكى عادى... ماهو اكتر واحد بيسأل عليا بعدك ياعمتى"
"وبعدين"
"بس النهاردة لما قعد يلمح بقيت اغير الموضوع واجيب سيرة حاجة تانية"
"بصى يا مايا... انتى لسه صغيرة يعنى كده كده لازم هتتجوزى...بس انا بقول فارس اولى علشان بنتكم"
"ياعمتى لا فارس ولا نادر ولا اى راجل خلاص كفاية"
"كفاية ايه هتقعدى كده"
"اه... هربى بنتى واشتغل مع بابا وعندى طموح كبير اوى انى انجح ف شغلى الجديد"
"والجواز والاسرة"
"الاسرة ربنا يخليكوا ليا...انما الجواز... بصى ياعمتى... مبقتش متقبلة اى راجل ف حياتى"
"بس هتحتاجى وجود راجل ف حياتك"
"لما ابقى احتاج ابقى افكر...انا دلوقتى كل اللى بفكر فيه بنتى اللى مستنياها وشغلى اللى مستنينى"
"ربنا يقدم اللى فيه الخير"
**********************
تانى يوم... مايا قامت م النوم على صوت التليفون
"الو... صباح النور... لا صحيت خلاص... لا مش قادرة اجى الشركة النهاردة...انت روحت بدرى كده...وبابا معاك؟... لا عايزة ارتاح النهاردة... ربنا يسهل بكرة ...مع السلامة"
قامت مايا بتثاقل...خرجت م الاوضة
شافت ايمان وجدتها ف المطبخ
مايا"صباح الخير"
الجدة"مساء النور ياختى"
ايمان"صباح النور يامايا... هحضرلك الفطار لحد ما تخلصى الحمام"
مايا قاعدة بتفطر... نزلت حياة وقعدت جنبها ومدخلتش المطبخ
"ازيك يا مايا"
"الحمدلله ياعمتى"
"الا قوليلى...انتى امبارح نزلتى مع مين"
"مع مين ازاى؟"
"حد جالك بعربية؟"
مايا بتسيب الاكل اللى ف ايدها
"اه ياعمتى...نادر شريكنا ف الشركة كان جاى م السفر وعلى فكرة بابا عارف لانى كنت رايحة له"
حياة بقلة حيلة
"بلاش يا مايا تخلى حد يتكلم عليكى وعلينا...توفيق شافكم امبارح وكان منظركم وحش...متنسيش انك متطلقة"
مايا وهى بتقوم بعد ما اتضايقت من كلام عمتها
"مش ناسية"
******************
مايا ف اوضتها...بتدخل عليها ايمان
"قومى يامايا...ابوكى ونادر هنا"
"نادر؟"
"اه...قومى لحد ما نحضر الغدا"
خرجت ايمان من الاوضة...قامت مايا غيرت هدومها وخرجت
سلمت على نادر وقعدت معاهم هو وباباها
فؤاد"احنا اتفقنا اننا نعمل الافتتاح يوم الجمعة بعد الجاى...ايه رايك"
مايا"كويس"
فؤاد"هنسافر انا ونادر شرم والغردقة بعد بكرة كام يوم ونرجع...لو كنتى تقدرى تيجى معانا كنتى جيتى"
مايا"لا لما اولد ابقى براحتى"
نادر"طيب ع الاقل تعالى الشركة بكرة فيه حاجات عايزك تعرفيها"
مايا"حاضر"
صوت ايمان
"يالا...الغدا جاهز"
*********************
فارس راجع بعد الاجازة وكله اشتياق لمايا اكتر من اى حد تانى
اول ما نزل من العربية اللى جاى بيها\
نزل الشنط ... فتح الباب الخارجى
طلع السلم بسرعة لحد بيت الجدة...ودخل
ايمان قاعدة مع الجدة
ايمان"فارس...حمدالله ع السلامة"
راح سلم عليها وبعدين على جدته
فارس"الله يسلمكم"
الجدة"كده ياولا ولا تسلم عليا قبل ماتسافر"
فارس"معلش يانينة كنت مستعجل وكنا بالليل"
فارس بيدور بعنيه على مايا...وسأل عليها
"هى مايا نايمة ولا ايه؟"
ايمان"مايا ف الشركة... اصل هيفتتحوها قريب"
فارس بخيبة امل
"وصحتها عاملة ايه؟"
ايمان"اهى شوية تعبانة وشوية كويسة...ربنا يهون بالشهرين الفاضلين"
فارس"ربنا يهون...اما اطلع زمان ماما مستنيانى"
ايمان"اه ياعينى مستنياك بقالها كام يوم...اطلع لها بسرعة"
**********************
فارس داخل البيت...اول ما سمعت حياة صوت الباب
قامت تهرول ناحيته
"ياحبيبى يا ابنى...وحشتنى يا ضنايا"
تحضنه حياة بكل حب وحنان
"وحشتينى ياماما...عاملة ايه"
وييجى توفيق بلهفة على صوت حياة
"حمدالله ع السلامة يا فارس"
يسلم عليه فارس ويحضنه
"وحشتنى يا بابا...ازى صحتك"
حياة"انا عاملالك كل الاكل اللى بتحبه... ثوانى الاكل يكون جاهز...شهرين كتير اوى يافارس... بلاش كل الغيبة دى"
يبتسم لها فارس من غير ما يرد...وتكون هى راحت ع المطبخ
***********************
مايا وفؤاد راجعين بالليل ونادر بيوصلهم
مايا نزلت م العربية... وفؤاد من جنب نادر
نادر"7 الصبح هعدى عليك...تمام"
فؤاد"تمام...هكون جاهز... مع السلامة"
تمسك مايا ف ايد فؤاد وهما داخلين البيت
اول ما تدخل تفوجئ بفارس قاعد مع ايمان
فارس يقوم اول ما يشوفهم...يسلم على فؤاد وعينيه على مايا
مايا واقفة مكانها...بعد ما سلم فارس على فؤاد...سلم عليها
"ازيك يامايا...وازى صحتك"
"الحمدلله...انت عامل ايه؟"
"كويس"
ايمان"مالك وشك مصفر ليه كده يا مايا"
مايا وهى بتقعد بتقل
"مفيش حاسة بهبوط بس"
فارس بلهفة
"من ايه؟؟ وليه ساكتة طيب مرحتيش للدكتور ليه"
مايا بتضحك
"انا لو روحت للدكتور كل ما احس بحاجة مش همشى من عنده"
فارس وهو بيقعد
"انتى تعبانة للدرجة دى"
ايمان"هو الضنا بييجى بالساهل يا ابنى"
فؤاد وهو قاعد...بص ف الساعة
"طب هقوم انام شوية...معلش يافارس عايز اقعد معاك بس مسافر الصبح"
فارس"لا براحتك ياخالى...انا قايم"
ايمان"تلاقى حياة نايمة ...استنى لما تتعشى مع مايا وفؤاد"
فؤاد"لا متعمليش حسابى انا تعبان ونفسى انام...تصبحوا على خير"
دخل فؤاد اوضته... ودخلت ايمان المطبخ
فارس ومايا قاعدين مع بعض... مايا قاعدة ساندة ضهرها وراسها على الكنبة وحاطة ايدها على بطنها
فارس بيبص لها بحب
"وحشتينى يا مايا"
مايا معرفتش ترد... ترد باحساسها ولا بعقلها
"وانت كمان يافارس"
فارس بفرحة
"بجد؟؟ وحشتك"
"انت ليه مش مصدق انك غالى اوى عندى"
"غالى؟؟ بس انا بحبك"
لحظات تردد ...ودمعت مايا
"وانا حبيتك يافارس... وكنت كل ما ليا ف الدنيا وقلت ربنا عوضنى عن كل احساس افتقدته ...علشان كده صدمتى فيك كانت على قد حبى ليك واكتر"
"احنا فيها... نرجع يامايا"
"مينفعش"
"ليه"
"مبقتش آآمن على نفسى معاك"
"انا؟؟"
"للاسف ايوه... انت نسيت انت عملت فيا ايه"
"مش عايزة تنسى ابدا"
"عايزة انسى...بس مش قادرة..والله ماقادرة"
"انتى عارفانى كويس... انا عمرى كنت وحش معاكى"
مايا بتمسح دموعها
"لآ... وده اللى صدمنى اكتر...حسيت ان كتب الكتاب حولك واحد تانى الكام ساعة اللى كنت فيهم على ذمتك كنت واحد تانى معرفوش... واضح ان مالناش نصيب مع بعض يافارس ...خلينا كده محافظين على عشرة زمان علشان مستقبل بنتنا...مش اكتر من كده"
"مفيش فايدة؟"
"غصب عنى... مش قادرة انسى الضرب ولا تشكيكك فيا ولا فضيحتك ليا"
"مش عايزة تسامحينى ليه...انا قدرت اللى حصلك ومبتكلمش فيه"
"متفكرنيش الله يخليك...مش عايزة افتكر"
ايمان بتحط العشا
"يالا ياولاد"
بصت عليهم شافت مايا بتعيط...قربت منهم
"فى ايه؟"
فارس وهو بيقوم"مفيش ياخالتى...مفيش فايدة"
********************
فارس داخل البيت...النور مطفى...دخل على اوضته
قعد على طرف السرير...متضايق
دخل له توفيق...فتح النور وجاب كرسى وقعد قصاده
"مالك يافارس"
"مفيش يابابا"
"قابلت بنت خالك؟"
"اه؟"
"وكان معاها شريكهم برضه؟؟"
بص له فارس باستغراب
"شريكهم؟"
"اومال ايه اللى مضايقك كده؟"
"فهمنى بس يابابا ايه حكاية شريكهم دى"
"قريب ممدوح اللى مشاركهم ف الشركة اللى بيفتحوها...على طول قاعد عندهم تحت يا اما مايا خارجة داخلة معاه وفكرت اتكلم بس مسكت نفسى بالعافية وقلت مليش دعوة اهى ف حكم ابوها"
"داخلة خارجة معاه؟؟ ليه؟"
"معرفش... بس طريقتهم ملفتة اوى ... انا مش عايزك تفضل حابس نفسك ف اللى فات...مين عارف يمكن مستنيها تولد ويتجوزوا"
"لا مش معقول"
"مش معقول ليه؟ وهى هتفضل يعنى طول حياتها عزبة؟...لازم تفكر انت كمان ف حياتك وانسى اللى حصل"
**************************
تانى يوم...طول اليوم وفارس قاعد ف البيت مش بيخرج وبيفكر ف كلام باباه وبيقارنه بردود مايا عليه
مايا طول اليوم تعبانة ومش قادرة تقوم م السرير
وكل شوية نادر يكلمها ويطمن عليها
*************************
نادر وهو قاعد مع فؤاد بيتعشوا ف الاوتيل اللى نازلين فيه
"استاذ فؤاد كنت عايز اكلمك ف موضوع شخصى"
"خير"
"انت جيت تركيا وشفت حياتى ومراتى هناك... ايه رايك او استنتاجك عن حياتى"
فؤاد بارتباك
"دى حياتك وانا معرفش حاجة عنها"
"انا ومراتى مختلفين تماما لاختلاف الطباع والتفكير والبيئة وكل حاجة...ومن زمان ماما كانت بتقولى نفسها اجى واستقر واتجوز هنا... مش هطول عليك انا محسيتش بانى فعلا عايز اتجوز واستقر هنا غير لما شفت مايا...انا عارف انه طلب سابق لاوانه بس انا حبيت اعرفك انى عايز اتجوزها على سنة الله ورسوله"
فؤاد بارتباك اكتر
"هى رأيها ايه"
"انا مصارحتهاش...انا كنت بلمح بس ولما لقيت فرصة واحنا بندردش مع بعض قلت اخد رأيك"
"والله يانادر القرار قرارها هى لو قالت آه يبقى خير لو قالت لأ هى حرة انا مقدرش افرض عليها رأى"
"لما نرجع ان شاءالله هصارحها برغبتى دى واشوف رأيها"
********************
مايا وهى على السرير...حست بمغص خفيف
حاولت تنام...حست المغص بيزيد
فتحت نور الاباجورة اللى جنبها...واتعدلت تقعد وهى بتمسك بطنها
بتحاول تستحمل المغص اللى بيزيد
نادت على جدتها...صوتها طلع ضعيف ميتسمعش
مسكت الموبايل اللى جنبها واتصلت بايمان...وبصوت مرتعش
"الو...عمتى انا تعبانة اوى انزليلى بسرعة"
دقايق ولقت ايمان بتدخل عليها الاوضة وهى بتعيط من الالم
"مالك يامايا"
"بطنى هتموتنى وحاسة بهبوط...وعايزة ادخل الحمام ومش قادرة من الدوخة"
"طب اتسندى عليا"
وسندتها ايمان وهى بتقوم..واول ما وقفت
مايا برعب"ايه المياه دى كلها"
ايمان بفزع"يا مصيبتى... دى باينها ولادة"
مايا بتصوت من الالم ...ايمان اخدت موبايل مايا واتصلت بفارس
"الو... الحقنى يافارس...مايا بتولد"
وقبل ما تكمل كلامها...مايا داخت وقعدت ع السرير واغمى عليها ف حضن ايمان
ايمان بتصوت وبتحاول تفوقها
"بسرعة يافارس...دى اغمى عليها...اتصل بالاسعاف"
**************************
فى المستشفى...فارس وايمان وحياة وتوفيق والجدة قدام اوضة العمليات... خرجت ممرضة تجرى من الاوضة... ورجعت تانى
دقايق وخرجت ممرضة تانية
فارس"فى ايه؟؟"
الممرضة"الام جالها نزيف شديد والجنين مش مكتمل"
ايمان"يعنى ايه... المهم الكبيرة"
الممرضة "الاتنين حالتهم خطر ...ادعولهم"
cZ{9