براكين الشوق

٦٠

.
#براكين_الشوق٦٠
#القواعد_الخمس

القاعده الخامسه
: الليل في عين كل خائن هو وجه شيطان اعور
و القمر هو عينه الصفراء الوحيده
عندما يشتد الندم و يصبح التنفس ما بين
(حسرة و زفير) فإن أنكر الأصوات لصوت (الضمير)
گالتلي شون الليل يدخل بل ماي
هيج السواد بحقده يركد جواي
بطن الچفوف ثگيله مكفاها نباس
لا يدنك الشخص احتراما للماي
ألما يحبك من تحب ليش يغار؟!
وليش بحياته يريدك تضل تذكار!!!
الچان يحضنك مو يحبك محتاج البردان رايد يدفه يحضنها النار
گلبك الأصفر بل خريف محلفة
خ يخون بس ما ريد عذره ايألفه
ضميته ضمة تاجر بنية تعود، يغلة و صدمني برحيته المختلفه...
و صبرت صبر اليحرم بروحه سنين و تاليها بيده يضل حلاله يتلفه
مو صوچه أصغر يممه و أكبر بل ناس -
صوچ گلبي يشوف روحه ب ولفه..
يمكن بعين الأعمى تنشاف چبير و زغير تشوفك العين الصلفه.....

ــــــــــــــــــــــــــــــــــــــــ

علي..

جان احمد يسوق و البنية بحضني كعدنا ورى

امي جلبت الا تروح ادري اذا تبقى تظل تاكل بروحها واخاف عليها

قبل لا نوصل للطواريء شوي انتبهت..

سندتها..

و نخيت احمد يتوقف

: احمد توقف انتبهت.
الفت احمد وهو بس يباوع وساكت
و عد انتبهت و ظلت بس تبجي و تصيح شوهتني منال..

علي: مابيج بس العافية ولج خوفتينا عليج مابيه شي وجهج يروح هذا ورى فترة

تلفتت امي ودمعتها بعينها
: ها يمة..
نزلت من السيارة وكلتلي

: علي روح بالصدر خلني يم ابنيتي

احمد نزل لمحل عصير طبيعي ولفات.. وبعيونه نظرة اعرفها اذا ممرتاح او شاك بشي..
استغربت شلون يباوع لوعد..

بس اني كل همي ينتي اي ربيتها اني. و صعب اشوفها هيج مضروبة..
اما احمد..
اشترى لفة وعصير وبطل مي
امي كعدت يم وعد وحضنتها وهي تتفحصها وتنحب

: كسر ايدي شلون هيج سويت بس والله سالفتج خلتني انفعل.

علي: يمة الصار صار انت لا تنقهري ان شاء الله بعد وعد تلتفت لدراستها.. وهاي تجربة ودرس الها.. بعد تصير خوش بنية

امي: يمة اني خايفة انمار مناوي خير هذا ما يتركها لمن يكسر ركبتنا بيها انت ما تعرفه مثلي عشت وياهم و اعرف خباثته

: يمة شوري علي شتردين حاضر ازوجها اله واكف السالفة بس فكرت زواجهم ترى فاشل وممستعد اذب اختي بنار جهنم فكري يمة بالنتائج باجر شنو

مثلج اول ما عرفت بالسالفة حتمت ازوجها اله بس تالي كعدت افكر زوجتها اله اي و بعدين شنو؟

: ابني هذا عمه وحاطة و مدام هيج طبعه من البداية لعد من يزوجها شيسوي ما اريد اكرر الصارلي ببنتي اريد ابعد انمار ازوج بنتي لأبن الحلال اسبق انمار قبل ليدكني ناقصة هو قاصدني الي.

: مو هي، هيته

: يمة مثل امه يغدر ويعرف شلون... لذا اقطع عليه الطرق..

وعد: ماما والله توبة اني راح ادرس ما علي ابد بيه.. لا تزوجوني لسة طفلة اني مشبعت من حضنج

انتبهت وعد زينه و ميحتاج طوارئ و تعال انطي تبرير سبب الحالة واحتمال يردون الا تقرير شرطة وتعال يا غيث رتبلنا الموضوع...

علي: وعد انت زينه لو نكمل للمستشفى

اعترضت

: زينه دخت من اجت الضربة بخشمي شاغت روحي ومكمت اسيطر على اتزاني بس بالسيارة الهوا من الشباك بارد حلو فشوي احسن

فتح احمد باب السيارة جهة وعد
وهم نفس النظرة وجهها لوعد الي تهربت من عيونة دنكت

بس بقى ساكت مواجهها وجني لكفت شيقصد من نظراته وعد تمثل علينا حتى تتخلص من ضرب امي والعقاب.
رغم فعلا تأذت ونزف خشمها بس مو مال تكلب عيونها عود حتموت..

غلست اني هم و معرف شجاني مو عصبي اوزع ابتسامات

اما احمد ببساطة تكلم.
احمد: عمة حصب مي ونظفي وجهها و ايديها بهذا المي البارد حتى تاكل ذن شوي تستعيد اتزانها اذا فاقدته فعلا.

وعد: شتقصد؟

احمد: سلامتج دكعدي عدل مبيج شي خل يغسلولج واكلي ذن...

غسلتلها امي اخذت كلينس من دشبول سيارة احمد و انطيت امي الي نشفت وجهها اخذ، احمد الكلينس و ذبة بحاوية كبال المحل..

انطيت كلينس لأحمد

: هاي للفة حتى تلزمها بيها كون مو بيها شطة وعد متحب الفلفل

امي: اي مثل عمها ميحب الاكل الحاد لا بهاراته هواي ولا مفلفل..

من اطبخ برياني يمشي ويوصي خففي النكهة اتحسس من الاكل الحار والحاد بالبهارات..

ابتسمت امي الظاهر عمي بعدة متربع بعقلها..

احمد: ناخذها للطواريء يعلكولها مغذي ترتاح اكثر وينطوها ابرة شطولها مال حصونه حتى تتنشط شتكولين وعد.. الابرة بكد جف ايدي

بخوف كالتلة: لااا ما احب الابر، النوب بكد كف ايدك علي اني تحسنت والله ميحتاج مستشفى
اروح للبيت انام اصير بعد احسن من هسة.

احمد: ممﻤمم لا ما يصير الا ينطوج ابرة خاف ترجعين تنثرعي وعيونج تتحول بيض

امي: يا يمة يا وعيدة بزر كعدتي هاي العزيزة احمد اخذنا مستشفى خاف صدك تالي تتخربط.

وعد: لا يمة فدوة سكتي ما اريد ابر وانت احمد لا تلح رجعوني البيت ما اريد مستشفى. لأن ما يحتاج زينة و الحمد لله..

علي: زين يا احمد. فرنا. بشوارع النجف واخذنا للأمام خل نزور ونرجع.

: وعد هيج تدخل الامام يا علي؟

: نشتريلها محرم و اكو عبي ينطون تكدر تاخذلها عباية تزور بيها..

و بقينا شوي..

دخلتهم مطعم و عزمتهم وراها رجعنا للبيت وامي كضتها تحضن بوعد وتبجي..
وعد ساكته ادري مدللة ولكت عذر تتمزعل على امي وتدلع عليها حتى تنسيها سالفتها وما تظل امي تعيد تصقل..
حولت وعد الموضوع ان امي المذنبة ووعد هي المهانة والزعلانه

ابتسم واني اباوع من الجامة شفت احمد يباوعلي ويبتسم هم
رديت الابتسامة
واحنا نسمع عتاب وعد لامي

: يمة انت تعلميني تفهميني مو تشوهيني والله بعد لساني ما يحاجيج

منال: يا بعد كلبي يمة والله كد ما خفت لا الحقير مسوي شي بيج غير انت بنتي حبيبتي
تعاي بنيتي يمة لو ميتة مني لا هنا اموت..

همست لأحمد على كيف

: استلم هاي وعد يرادلها واحد ما يرضخ لدموعها والا يضيع. ويضيعها وياه

سكت احمد و بس يبتسم وهو من المراية يباوع عليهن

علي: هيييي سوق سوق لا تبصبص.. لا افكس عيونك بعدين ركز بالسياقة لا ننگلب

: ها اي اي...

منال: ماما وعودة بعد ما تشلعين كلبي و تخليني اضربج
احمد يمة اوكف هنا..

وكف احمد
نزلت امي يم محل اشترت منه ورجعت

: شوفي شجبت لبنيتي..

تلفتت بفضول و اشوف امي تفتح علبة

وعد.: واو هسة صاحبتج واني بعد اسمع كلامج ماما الله ضافير واصباغ..

: عفية بنيتي بعد ماكو سطوح و اني شتردين اجيبلج..

احمد: و الله عمي بساع لعبت عليج هاي الوعد يا عمة والله اشك وكعتها تمثيل حتى تكلب عليج الموضوع
شو بسرعة وعت ومبيها شي جن مصاير شي

مكدر مدافع لوعد اني كولش متعلق بيها. رغم عرفتها تكذب..
بس منطيت بيها يم احمد..

علي: احمد ترى كلبت عيونها شنو تمثل
وكف احمد السيارة وسنح ع كشن و ظل يكلب بعيونه بيض ويسوي نفسة مختنك..

لزمتني ضحكة وامي مفهية
: علي شبيه ابو شهاب.

ضحكت ع كنية.. و ضربت جتف احمد

: كافي، ولك..
شوي وخر و رجع يسوق

احمد: لا بس ردت اراويكم هم اكدر اخدعكم ترى مو فد نمونه هاي الحركة احنا مكشفناها لان مضروبة بخشمها فكلنا تخربطت.. بس تالي عرفتها تكذب مو غشيم اني..

منال: احمد لا تسيء ظن..

وعد: معليك بية.. انت واحد تغار مني و تتهمني ظلم..

احمد: اغار منج يا وعد؟ بطلي كذب وتمثيل عيب بابا عيب..
بعدين يا عمتي منول..
لا يابوي على شنو اسيء ظن براحتكم بس الظاهر هاي دلوعة وانتم فرحانين و تشجعون فلا تزعلون عليها بعد من تكرر الغلط يعني عمة لازم انت التزعلين مو تتوسلين بيها وتهديها علبة اصباغ و اضافر

منال: اي غير بنتي طلعت من موت وحبيت افرحها هذا صبغ اسلامي وقت الصلاة ينشال

علي : و الله يمة تردين الصدك الصبغ و الضافير حرام على منو تخدعون رب العالمين يعني تخليهن بس بالبيت؟
لو من تطلع الزينة خارج البيت صراحة حرام.

منال: اهووو لطلعون العلب الي اشتريتهن من عيونا هن دستة اضافر لصق و اصباغ ظافير اني شجايبتلها.

رجعنا للبيت تفاجأت ببراء طاكة العباية و كاعدة بباب البيت وهي تباوع لنسوان يتعاركن هذن ام مريم وام حسن دوم عرايك
وازعاجات..

امي باوعتلي من عصبت

امي: اني اعلمها اشش لا تحجي انت فشلة من غيث

علي: فشلة من غيث ها؟ و الله لو اكلة غير، يكسر رجليها بطلقة شعدها هاي كاعدة بالبيبان..

نزل علي من السيارة وهو يرزلها

: انت ما تستحين فوتي جوة

هي كمزت و دخلت هي تخاف مني وتهابني..

احمد: علي مو هيج على كيفك.. البنية مبينة من اهل الله

منال: كافي على لا ترعص اني احاجيها..

: يمة لو رجلها صدفة رجع من دوامه و شافها بنية صفرة حمرة لازمة الشارع يسكت! لو يكسرها ذيج الساعة والله اكولة عاشت ايدك

اني مو اول مرة وانبهها طلعت من ماعونها الا احاجي غيث

: اسكت يمعود هسة عمتي تخلي حد شو تعال اذا ما وراك شي كبل للاستوديو

منال..

راحوا الولد دخلت وعد و كتلها

:وعد يعز ااذيج فجري عدل منا وهيج ولجبريني اضربج بعد يلة روحي نامي وارتاحي

بشاير لازمة براء، ترزل

: ما توبين ما تجوزين ولج على ما سبحت شطلعج منال جنتج هاي مو راحة ورجلها عصبي ما يقبل بس يسمع كل عركة تروح تتفرج..

براء: مو من جنت خدامة سندس جانت من تصير هوسة تدزني اوكف بالشارع اشوف شكو وارجع اسولفلها تعودت.

منال: احنا مو سندس بابنا مسدود
منا وعد ومنا انت ربحنا.. وحدة لازمة سطوح والثانية بيبان شوفن ثنينجن اليشفعلجن يمي صغار و تحتاجن تربية مو ناضجات

يعني براء يمكن انت بكد وعد لو اصغر بس مو معناتها اقبل بتصرفاتج
شو كعدن ايدي خدرانة من كتلت وعد شورت بية بت حسين

وعد: شعبالج تضربيني الله ما يطك بعودة

بشاير: شوفي بتج الادب سز شتحجي

: خل تخربط لكيت الي ازوجها ياه و امنها يمه و هسة تشوفيها تزوج تسنع.. المثلها ميسنعها شي غير رجال يضبها.

بشاير: يا تخبلتي عرسيش وابنج لسة تربته خضرة

: منو كال عرس بس عقد.. عود كم شهر ازوجها.. قابل راح اسوي حفل ببيتي..
بس خل اامن بنتي لا
؟ بعدين من انمار يدكني ناقصة ببنتي ميفيدني حجي الناس ع ابو زوجوا بتهم واخوها مدايرة سنته

انمار ما يسكت اذا منطيته بنتي بنفس طيبة ورضاي يسوي شي يجبرنا ننطيها وبروس منزلة

استر البت واخلص

: ما اعرف شكلج انت ادرى بابن رجلج.. يجوز انت صح تفكيرج بس بنتج طفلة ونويعمة بنيتها خاف متتحمل زواج

: يمعودة هاي براء اضعف من وعد شوفيها وي ابني الثور غيث ما بيها شي..

اني تفكيري مثل اهل قبل استر بنتي ببيت ورجال وعائلة تحفظها و التعليم هواي تزوجن وكملن مو هاي سولاف النكارة..

سكتت بشاير ممقتنعة بس اني اعرف شريد و انمار لازم يقطع امل بوعد وهذا ميكف مدامها ببيتي وممزوجة..

رجعت باوعت لبراء

: وانت كعدي نسولف وياج.. سمعي هاي السالفة ما اذكرها بالضبط بس جانت امي سعدية تسولفها لمرت اخوي بيها رباط..
و اني جنت طفلة بس فاطنة مو مثلكم غشم..

فبيوم مرت اخوي جانت تنام بملابس، شغل البيت يم رجلها
و اخوي مبين متضايق وساكت ولفترة نفرها
اضافة جان ابوي واخوي يسوّكون و الغدة تخليه نجونه (قليل ) و الباقي يروح ببطنها جانت تلوكط الاكل من الجدورة
وسالفتها عيبه بالعرب المرة تاكل المونة وتخلي عيال بيتها نجونه.

فجان وذر اللحم كولش، قليل
يتخلى بالسفرة لا يشبع لا يكفي.

بيوم كعدت مرت ابوي و هي تمشطلي وتسولف لمرت اخوي
سالفة برباط حتى تعلمها
فصاحتلها
((خايبة تعاي احجيلج هاي السالفة

اكو مرة زوجت ولدها ثلاثتهم
وكلمن من البداية خلتلة بيت يعزل كفا لمشاكل مستقبلية.

فمرت فترة اشهر.

كالت امر على ولدي ويومية اكضي يوم وي واحد و هم اطمن عليهم و هم اتسامر وياهم هم وعويلهم

راحت للجبير وبقت يوم وباتت عندة..
شافت المشاكل و بالليل العيطة كبت و المرة تنطرد من الغرفة
والرجال شابع المرة ضرب ليل نهار كابة مشاكلهم..

عرفت شنو المشكلة
من اشتكة الابن مهموم ويطلب من امة تزوجه غيرها

: لا يمة مرتك سهلة اني اسنعها الك ليش تزوج و جيب وجع راس الك.

عاد الام سكتت عن المرة و ثاني يوم كالعادة شغل كنس مسح تنظيف كلة تمام هو اجة الليل ورى العشة و جاي تدخل المرة لغرفتها بشعفتها وملابسها ريحة الطبخ والحموضة تعط

كلتلها فلانة تعاي كبل متنامي اول ما ترحين للتواليت (و فهموها)
تتشطفي زين حتى متبقى بيج ريحة مو طيبة..
وراها تسبحين تتعطرين كون اريدج عروس و تلبسين احسن لبسة نوم..
و عاتبيني اذا ع اتفه شي تحجج وعاركج او ضربج
سوت المرة كولشي و نامت وي رجلها ثاني يوم ابنها اجة باس ايد امه و هو يضحك يشاقى..

كبل لتروح من يمهم وصت جنتها تلتزم بهذا كل يوم ورجلها بعد لا يضرب لا يغلط لا يهدد بالزواج عليها.

مشت العجوز لبنها الوسطاني..
رحبوا بيها وراح ابنها اسوك اللحم الفاكهة وكلشي كلاشي
ويلة يا فلانة طبخي..

انطبخ الاكل بس الي تقدم كولش قليل اللحم بشكل ملحوظ لا يشبع الموجودين ولا يكفيهم..
ظل ابنها فشلان وهو يدردم..
على مرتة يعني اسوك اشتغل اتعب وتاليتي حتى لحمة ماكو اسند روحي بيها تقبلين يمة هيج

هم كلتلة اني اسنعها الك
ثاني يوم وكفت يمها على الطباخ..
و هي تطبخ كل ما تمد الجنة ايدها تلقط او تاكل من الجدرية العمة تلسعها
فهمتها علمتها على ادب ام البيت و لازم مصير نفسها دنية وتعوف اهل بيتها جواعة..

انطبخ الاكل وانصب وشبع الكل والابن شكر امه و هو يكللها اليوم يا الله شبعت
قبل لتطلع منهم وصتها تلتزم و تذكر اللسعة كلما لوكطت من الجدر المونه..

راحت للزغير.
هنا شافت كلشي تمام نظافة اكل كولشي ماكو نقص فرحت
الام و بس ترخصت الجنة تريد تسبح راحت للحمام و كلشي تمام
هوسة بالشارع و ناس تغلط ناس تصيح عركة عركة

محست العجوز الا جنتها طلعت ربك ما خلقني عريانه بس حتى لا تفوتها العركة..
وركضت للشارع تشوف العركة حتى نست هي عريانة

هنا كلتلة يا فلان مرت اخوك الجبير كذا وكذا وتسنعت الوسط همات سهل تسنيعها بس الا مرتك تعذرني التطلع ع مود عركة وتترك سترها وبيتها شتترجى منها يمة هاي تطلكها..
واتي ازوجك الاستر منها.

وهنا مربط الفرس يا بنيتي براء..
هاي الج السالفة ولوعد مستقبلا من تزوج
العيال تريد المرة الي معدلة مسنعه بكولشي و كون ام بيت و مستورة و معليها بالرايح والجاي
تحفظ رجلها بغيبته
سمعتي وعيدة ام السطوح وانت ام الشوارع براء بعد جوزن كافي يمة...

دنكت براء: يعني راح تخليه يطلكني بس ما طلعت عريانة لابسة عباية

بشاير: يبوووو منال هاي تفهم الرباط مكلوبي شورطج

منال: لا هي تفهم و حبابة وخوش بنية
ومستورة بس بطلي يمة كل ما صار شي ركضتي فضولج هذا يعم عليج و غيث مو ادمي ما يرحمج ابني و اعرفة..

: صار عمة بعد اصعد اباوع للعرايك من الشباك مشتملنا و ما اطلع

هزيت ايدي: اكولج بطلي فضول شنو يمة انت نايم بعقلج شوز على كولة فلان لوحدة اعرفها

ضحكت بشة وغلست
باوعتلها وابتسمت طكيتها ضحكة اني وياها
و البنات تعاين النا بفضول..

: اضحكي بشة اليدري يدري هههه

براء: منو فلان و فلانة منو غير نعرف

بشة: مو كلشي لازم تعرفية يلة ولج جيبي دفاترج و رانا درس

عفت بشة تعلم ببراء
واني افكر بحل.. و الله يا انمار اذا مخليت بنتي حسرة بكلبك مو منال اني...

وعد..

مرت ايام و ظلت بكلبي الطيور بعد مكدر اصعد
زين لو يودوني يم احمد اشوف طيورة اداريهن اله

بس امي ما قبلت تكول ثكلي..
مريد يكولون مستخفة البنية تاج راسها الثكل..

: هسة علي لا يرحم لا يخلي رحمة الله تنزل اريد اربي طيور والله من علي ما نكدر لأن نكرة ديج وكام يخاف من طيور كلها.
منال: ولج راسي وجعتيه انت ما توبين شجاج يمة كافي..

: يمة ضجت والله دبريني شسوي اني اتكأب بساع انتحر اذا هيج بقيت ماكو طيور

زين امشي نسير على بيت عمي فضل.. بحجة اني جاية وياج اروح لطيور احمد
هو م. يكول ذن طيوري مجان يربي طيور جابهن من سنين على موظي بس جنت ما اروح الهم ملتهية اربي كيور انمار جان يستغلني يمة انظف اقفاصة

منال: غير انت مطي.. وعد كافي دلال يمكن ضغطي اروح انام.

بس تاكدت نامت سحبت نقالها هي تقبل العب بية وراويتها منزلة العاب فتأمن من اخذه
.
واني اكلب بنقالها شفت اسم احمد

ابتسمت وبتردد خابرت واني اطلع
همزين خالتي بالشغل بالاستوديو براء فوك يم رجلها بيت فارغ..

تربعت بغرفتي وقفلت الباب

شوي اجه صوته

: هلا عمتي امريني...

ابتسمت عباله امي ظليت ساكته

: هلوو عمتي بيج شي
شوي سكت و تغير صوته

: وعد شرايدة؟

بأرتباك كتله: ضايجه عفية قنع علي يجيبني يمكم اشوف الطيور اني مزاعلة وي انمار جا ما ازعجتك و رحت لانمار، العب وي طيورة.

ظل يرزلني بجيت
: ادري المن تبجين بس لأن كتلج متوبين من انمار. و الله عمتي حقها لو تريد تزوجج
هسة متصلة بية واسطة زين راح احاجي علي

ظليت اشهك: اي عفية والله ضوجة..
شوي صار صوته لطيف
: ممم تمام بس دربالج ترحين لطيور انمار اني الطيور العندي هن الج جايبهن ومبقيهن يمي لأن علي ميقبل تطب بيته طيور
شنو رأيج تزوجيني بس على مود تجين يم طيورج..
يعني بس على مود هاي الشغلة

صفنت واستحيت اكلة خوش فكرة صراحة هيج عرض ما يتحصل منو يكول احصلي واحد يقبل يربي طيور لخاطري واني بلا الطيور صعب اعيش من صغر احبهن..

همس بصوت كولس ناصي
: ممم هسة شلون ندز الاهل نخطب لا ترى متحصلين واحد مطيرجي مثلي هههه الفضل الج والله زمن بنية تخليني اتخبل ابني غرفة بيها مجموعة اقفاص لارقى انواع الطيور.

حرامات كل ذن يرحن لغيرج اذا تزوجت..

رديت بساع: ها شنو يرحن لغيري من كعدت يمكم كم يوم شفت طيورك احسن من طيور انمار

مدري ليش ضحك بس كال

: انت صدك قشمر تزوجين العندة طيور يعني ميهمج الولد الي تزوجيه شنو بس كون طيور يربي انت طفلة..
بس احبج

وسعت عيوني اول مرة يحجيها ادري رايدني و يقاتل ويتعارك بس متوقعت راح يصارحني
.

شوي ظل يتحم حم و ترخص مني وسده.

ظليت افكر بأعترافه
بس اني ما اعرف اميز مشاعري
اني كل همي الطيور..
و يصير الي بيت واصير مثل ماما كلشي بكيفي
هاي نظرتي للزواج جانت سطحية

كلت اخابر سولاف دائما احنا نواصلها ودز فيديوات لحسين
و نظل نحشش على ابن علي..
خابرتها...

: هلو حبيبتي سولاف شخبار حسين

بس مبينه سولاف هي تريد تعرف شي.. فكبل ظلت تمهد..

: الحمد لله اكلج هي الارملة تولد تطلع عدتها مو!
: اي يمكن. بس ليش.

: ما بقى شي على سنة رياد اعتقد بقن عشر اشهر مو لو غلطانة ؟. و اكيد ايات ميبقوها ارملة وهي بعمر كولش صغير..يعني لازم الي يتزوجها يتكفل ابن رياد بعد تقريبا الها ست اشهر وتولد فات اكثر من شهرين ع موت رياد و هي حامل بشهر بوقت وفاة رجلها. يعني هسة عليها ثلاث اشهر يعني بعد

ست اشهر تجيب تكمل عدتها.
اني اكول لو جبريل يتكفل مرت اخوه خاصة جبريل جبير و ممزوج وما عندة التزامات مثل علاوي..

لعبت عليها: و الله هو علي تكفله
وهو تبرع يزوجها بس هي مريضة هسة بس تطيب ان شاء، الله نسوي العرس،
و معزومة انت يعني من تولد ورى النفاس يعقدون و الزواج بعد دوران سنة رياد

: هااا انت متأكدة خاطبها علي بس هو ما طلكني شرعا.. شلون يخطب..

: عاتي حمبي تصير..
مممم يمكن من يزوجها يطلكج
: يااا وحسين يعيش، بدون ابوه

: يا عيني ابنج كبر و بدون ابوه شنو الجديد

: الجديد من يجينا علي يشوف ابنه علقه بيه وهسة يعوفة ما اقبل

سدته بوجهي..
باوعت للنقال وضحكت
يلة اصير فاعل خير..

علي..

كملت شغل بالاستوديو مريت لبيت ست وجدان
بالباب مقبلت افوت.
اخذت منها المستندات ملكيتها للفندق وكم بيت حتى تستعيدهم او تاخذ من الي مستولين عليه تعويض مبايعة..

: تفضل استاذ علي وما اعرف شلون اتشكر منك

: بالخدمة بس باجر لازم تحين للمحكمة تقدمي بلاغ.
: اي ان شاء، الله.

رجعت لبيتي هدوء وقت مغرب امي نايمة كعدتها تصلي ووعد ماكو رحت لغرفتها لكيتها
لازمة لعاباتها وسولف وياهن

: احمد وصاني اجيبج تنظفين اقفاص طيورة وهم تتلهين ليش مخابرة الولد بعد لتعيديها تردين شي خابريلي لتستخدمي دروب تعال توسطلي

بعدين مو جنج كبرتي ع لعابات
ضحكت: البنية ما تكبر على لعاباتها والله ضوجة كعدت اخيطلهن بدلات وهم ماما شجعتني تكول حتى تتعلمي خياط تعلمي خيطي للعابات بالبداية
: طيب باجر الصبح اذبج يم عمتي ام احمد واجي العصر عليج

شوي اندك الباب رحت افتحة
دخلت عاصفة حمراء،..
استغربت سولاف وخفت لا حسين بيه شي
جان نايم على جتفها

: شكو شصاير الولد بيه شي.؟

انطتني ياه

: الزم الولد مابية اشيلة يمة شثكلة طاحت متوني.

التفتت للسايق

: عمو نعيس حباب الجنط.

ظليت مستغرب باوعتلي و كالت
: شوي طريق نفوت

وخرت ولسة ممستوعب شيصير

دخل السايق الجنط.. بطلعة البيت
: سلمني على بابا كولة سولاف قررت اخيرا ترجع

صح هو من سألني قبل سنتين يمكن و مجنت اجاوبة انطيه ردي كولة رجعت هاي اذا رجع من السفر باجر اذا ماكو اني اتصل بيه.

دخلت و سدت الباب و باوعتلي

: لا تفرح راجعة لأن حسين يبجي عليك قابل على مودك

خليت ايدي على لحيتي: هو خل استوعب الموضوع اول يا الله افهم افرح لو احزن

: رجعت.. شتسوعب.. شنسوي الولد ما يسكت واخاف من البجي تصير فتحة بقلبه

علي: امم لا يا بوي مأساة..
: شنو قصدك؟

كالتها وفاتت لغرفتي و هي تسحل الجنط
و الله مو صاحية
باوعت لأبني كعد و كالعادة مصفن علي مستغربني لأن اني اجيه مرة بالشهر اذا مو كل شهرين ثلاثة. هو كلما يشوفني يستغربني

النوب تكول مشتاقلي و يبجي علي..

: بابا اني منو..
باوعلي و برطم و همس ماما..
وهو ياشر عود يريد امه

بوسته: امك الخبلة جوة

رحت للغرفة لكيتها متمددة..

: نورتي بيتج حبيبتي
: طبعا نورته.. اوف الطريق تعب وي طفل مثل ابنك كضاها ببجي عليك لمن نام

: اي صح حقج
: قابل اكذب عليك مثلا..

: لا طبعا..
طلعتلي ملابس و بديت ابدل كدامها واني مجاهلها ومجاهل عيونها تتفحصني

: علي اجيت هم اساعدكم بالسنوية تدري الفاتحة ما وكفتلكم بيها..

لبست كلبيتي و تمددت بصفها و ابنا بنصنا رجع نام

: كلج اصول..

مردت مشاكل واعاتب جنت محتاجها بأسوء، ازماتي وكسراتي وهي ماكو.. مشيت الامور حتى مركب الحياة يرسو بالميناء الصح.

: و الله كلت اجي قبل السنوية مدام مبقى شي..

تلفتت الها مبتسم برزانه

: ممم اي بعد عشر اشهر هم يا الله تقرب الموعد يعني فد عشر شهور قبل السنوية نرتب الها

: تستهزأ
: لااا يا بوي

دك نقالي، ست وجدان تتصل باوعت لسولاف بحذر واني ارد

: هلو ست اي هسة اشوف اذا طابو الفندق وي الملف الاخذته منج
كمت فتحت الجرار وطلعت الملف اكلب بيه واحاجي ست وجدان تلفتت لسولاف بفضول كعدت متربعه على الجرباية
وعيونها نطن لبرة تريد تخنكني

: و الله ست موجود اي الاصلي يمي راح باجر استنسخة تمام عزيزتي تدللين اني بالخدمة..

سديته و كمزت سولاف يمي سوت الجرباية شبرين ولزمت زندي
: هاي منو النوب منا ايات مزاودتني بيك منا وجدان كزنوفا انت خو ما كزنوفا
: دون جوان عزيزتي

: نعم؟؟

: شوف علي اني رجعت مامو حجة ما عندك مرة و انت رجال اعزب لا حبيبي اتي كدامك املي عيونك فلا تدور برى اوك ايات تزوجوها بس مو الك لغيرك. جبريل مثلا نوح ميخصني انت يا عيوني خط احمر اذا تتعداه اقتلك واعتبره تهديد.

ضحكت...

: يمعودة المرة مريضة تركيها لا تشدين وياها

: تبرير ما قبل الخيانة مو

هزيت ايدي وتركتها حياتيش تلعب بيك مراهقة

رحت لامي تقرأ قران بست راسها وهي صدقت
: يمة ردت سولاف
سولفتلها وامي ضحكت..

: يمة تحبك وجابتها الغيرة عليك هاي هي تصالحوا وابدوا من جديد
ايات اهلها جنهم مقبلوا تزوج حماها حقهم يخافون على بتهم خو ميجبروها وهي متريد اذا حاضنة حزام المشمع و بس مصفنه اذا حجت غير اسم رياد ميطخ لسانها

دمعت عيني
و غصة على اخوي و الوصلتله ايات
تركت امي و اني لسة ممصلي مغرب رحت توضيت و دخلت الغرفة اشرت لسولاف
: صلاة
: اي راح اتوضى حتى بوقت الصلاة الزك بيك واصلي وراك
يعني ما تفلت مني و تلعب بذيلك

بضحكة كتلها: يمعودة ذكري الله
و الترديه يجرالج.

رضا...

بعد نهاية الرحلة.. لقرى الهندية
.
اجتني دعوة من ابو الفضل حضور مؤتمر العالمي لمؤسسة الصحة العالمية بخصوص التلوث وامراض الاوبئة الاستوائية.

جنت بغرفتي بالفندق من اندك الباب تعبان من الرحلة..
عقمت الحمام

و الله يا فضل عاشت ايدك على هاي الرحلة ورطة اذا رحت وياك رحلات..

شوي اندك باب لبست ملابسي وطلعت فتحت الباب لفضل
الي مبين سابح هم و مزين لحيته ومتانق

كالعادة الوجه مبتسم يمكن هاي الصفة مشتركة بينا.
: ها خوية هاي دعوة للمؤتمر.. ان شاء الله اسبوع يجي..
اذا تحب تشاركنا حضورك
اذا تحضر المؤتمر لازم يا خوية اليوم نروح مومباي

: اي ليش لا بس خلال هذا الاسبوع اغسل معدتي ماكو مطعم خليجي او عراقي هنا

: المؤتمر بمومباي اخذك هناك لمنطقة كلها مسلمين وحشوف النظافة ..

هزيت ايدي: مثل القرى الي رحنالها رحالة يمعود لا تلعب روحي و الله ضعفت كولش كضيتها فواكه

: لا والله هناك مختلف و راح تكول صدك الاسلام دين النظافة عكس باقي ديانات الهند

باوعتله بشك
: متأكد خاف هم مثل المناظر الي مرت علي بقرياتك الي ورطتني بيهن ورحت

ضحك: قوي كلبك يمعود مو بس عيونك تقويها
يلة جهز روحك لازم نترك الفندق نتوجه لمومباي

جهزت جنطتي الظهر و الصور الي اخذتهن بالقرى و الي بمدينة يم تاج محل بمدينه غرة جنوب
نيودلهي

فكرة خبيثة افتح الحضر

فتحت حسابي القديم فتحت الحضر
و عندي صور بنقالي هم اريد اطبعهن عن رحلاتي

نزلت رحلتي لتونس
و غيرها من البلدان كل رحلة اختاريت صورة واخرها صور الهند
واختاريت وين الصورة الي تثير شك وحدة شكوكية مثل منال

برزت الصورة الي بالبعثة العلمية خاصة اكو بروفات نساء متعددات الجنسية اني واكف يم صاكة بروف هندية

و غير الصور الي وي جميلات الهند ووي افال ورجال
بس نشرت الي وي نساء هي صور سياحية تذكارية بس اعرف منال تظل تاكل بروحها وتغار

خباثة مني نزلت صور رحلاتي لهاي بلدان
و كتبت بالبوست
الدنية خلصانة خلصانة شكو بيها نتونس
#رضا_النجفي_حول_العالم..

طفيت نقالي و خليته بحزام بخصري.. بيه حقيبة صفح صغيرة للنقال انتشرت بذاك الوقت

طلعت بالانتظار انتظر ابو الفضل
الي اجة وهو و جنطة رحالة على ظهره خضرة مرقطة ببيج

لابس باج بركبته بيه تعريفه و اسمة وشهاداته و المؤسسة العالمية التابع الها..

شوي تجمع الكادر كلة مال البعثة وكلهم معلكين باجات بركابيهم..

وجوهم تضحك الي يتناقش على الرحلة
الي بيده مخطط و يأشر.. على اهم نقاط البعثة

اراقب بصمت الاجواء
و ماخذني الفضول اكيد شافت المنشور

انطلقنا من نيودلهي الى مومباي..

بس استقرينا بفندق طبعا جميع مصاريفي على فضل لأن هو صاحب الدعوة
اما البعثة مصاريفهم كلهم ع المؤسسة الي ينتمولها

رفضت فضل يدفع عني بس مقبل كال اني الي دعيتك كمرافق ردت اسجلك بقائمة اطباء بلا حدود ضمن فريقنا العلمي بس انت ما مارس الطب وما اورط روحي خاف مدبرها هههه

خزرته وقتها: انجب يمعود تحسسني فاشل دا ادرس البورد و اداوم بمستشفى عالمي معروف
حاليا متفرغ انتظر نتائج اختبارات تطلع بشهر الثالث سنة ٢٠١٦ وراها اباشر دراسة تخصصي
لذا كلت اتونس افر العالم

: هههههه و اولادك الهم الله
: شكو ادخل ميردون تدخلاتي وطلعت اني سبب معاناة العراق العظيم

: هواي متغير رضا وين رضا المؤدب الما يرفع عينه هذا اخوي
مخربك كولش

ضحكت: يمعود شعليه هو..
يلة ترى جوعان و الله ملابسي عراض صارت مجاعة الهند الي بالسبعينات انصابيت بيها من ورى رحلتك

: مومباي تختلف.. وانت نفسيتك مدري شلون مو شويتلك بيدي سمك
تكول متكدر تاكل بس لأن طفل بالقرية فات وتقيأ بالطريق
ترى انت لازم تقوي قلبك

باوعتله: يمعود الشوي مالك مو حلو هي كوة
و اكلهم مو حلال

: ترى اني التكفلت الطبخ حتى اكل ههههه واوكلك وانت ظليت صايم بس ع فواكه و الله كد ما اكلت موز كلت راح ينكلب قرد

: رجاءا لا تحشش.. منا الوادم تكول بروف ابو الفضل واحد طعطوعي...

انطلقنا لوجهتنا.

بس وصلنا للفندق.. كبل للجرباية تمددت
فتحت النقال و المكالمات يمكن خمسين مكالمة من منال

المنشور متجرئة معلقة

لا وكاتبتلي
تلوكلك ام شلوك..

رسائلها رزايل

منال...

كل يوم اوكد حسابه اليوم فاتح حظر علي
فرحت ظليت ادور ببروفايلة شكو ماكو
وتخبلت صور وي نسوان رغم بينه وبينهن مسافة نص متر
بس غرت..
يعني متونس واتي كاتلني القهر..

الخاين
اتصلت ماكو
دزيت رسائل يبين ماكو نت يمة
بس وصلن..

ظليت الوب اروح و ارجع هذا خاف يزوج و يطلك والله العلوية من كالت مرافك ابنهم و هذا التربى بالخارج سمعته سابقته

عود تطمنت من وصلتلي حاليا هو وي ابو الفضل هذا رزن..

باوعت لنقالي و خابرت العلوية طلعتلي بتها

: وين ماما

: جاي تصلي شوي وتتصل بيج خالة
: علوية بلكت مو تنسين تبلغين امج تتصل. زين صحتها شلونها

: على الله شوي صحتها تعبانة

ورى مسديته انتظر بفارغ صبر،
الاتصال..

شوي دك النقال
و الله احسها مثل امي، و الجأ الها. ومن عرفت مريضة ضجت كولش

: علوية شلونج ما صرتي زينة

جان صوتها تعبان وهي تحاجيني
حتى استحيت اسأل

بس هي بذكاء و فطنه كلتلي

: بنتي زوجج يم ابو الفضل و كولشي تمام من يتصل بينا ابو فضل واحاجيه دا اوصيه ينتبهلة وهم ابوك لسانه
يكول يمي و بعثة علمية وها زوجج ديدرس بورد تخصص

و لا تقلقين من شي

: خالة مو ما اعرفة من تزيغ عينه
: يا بنتي استجني وبطلي شكوكج هاي، قابل هو نبي لو معصوم اغلب الزلم هيج،

من حجيها عرفت ما بطل رضا سالفة التبصبص..
معقولة هيج صاير بسرعة عيونه تخوني
. ورى عدة سوالف سديته

رحت للبنات براء جاي تصعد
صحتلها: تبقين جوة زوجج، مموجود بلكت تحبلين تلتهين بطفلج من الطلطة هاي والتكمز
وانت وعد مبقى شي على المدارس
نروح نشتريلج صداري و جبب.

وعد: مو جنج معصبة وتردين تطلعين حركتج بينا.. اني وبراء

ظليت اخزر بيها
: لسانج طويل بس هانت اعرف منو يضبج

: منو؟
: يا عزا شلون تراددني..

ولج ما بيج فعصة مو كتلتج سنحتي فأحترمي نفسج شلون ترادد بت الكلب..

خليت دخلت غرفتي، و اني تعبانةة
جابتلي بشة صينية الاكل

: بشة ما اشتهي

: شبيج خيةة
: بشة مقهورة اتي بنص المصايب
و القهر والزعل بينا بس هو دومه ما مهتم
مونس روحه لو يحبني يضوج على فراكي

بشة: خية منو كلج مضايج عليج اكيد يحبج وضايج للمرحلة الوصلتولها وهي عدم ثقتج بيه

صعبة عليه مرته تتهمة قاتل وترديه بسهولة يرجع
تكولين عافني بنص المشاكل
يا حبيبتي مو انت دائما تكوليلة لتدخل بية وبأولادي

احتار الرجال وياج ما جاي ادافعله بس الحق يقال

لزمتها من زندها واخذت النقال روايتها شمنزل

: حقي اضوج لو مو من حقي

ابتسمت: يغثج و النبي لو منج اني اروح تدلع يمه اكولة متسأل واني مريضة

هنا صيحت: هيهات من الذلة كون صدك احد يكولة لج ما نسيت شلون ذلني وكلي خليلج كرامة لو يلمح اني مرة شهوانية ووقت حاجتي اتصل

شوي دك نقالي جان هو فتحت خط

: انت يمتى تجوز لو انت متونس
موووو ترى متصلت حتى ابين اهتمام اني على موقفي بس ردت اكولك عيب على شيباتك مصور روحك وانت بنص البنات واكف
هسة عموميتك عشيرتك ولدك بناتك شيكولون ابونه تسوفل كولش

: لا حبي يكولون شباب يتجدد ومنور و حياك الله ابو مسار شنو مقريتي التعليقات شعجب

: عشتووو علقتلك انبهك. بس انت متونس ترى ذول ميصارحوك.
من وراك يحجةن عليك وانت فرحان

ضحك: كولش فرحان تدرين بحضني منو هسة

بقهر صحت: تزوجت علي اخوك منو لعد منو هاي الي خذتك مني

انطاني اسم ممثلة خندية مشهورة

هذا يحجي صدك لو يصنف سديته بوجهة وحضنت بشاير ابجي

انتبهت لبشاير، مدنكة ومدمعة

: شفتيه خية زلم ما تتأمن. هذا هو راح للغريبة
بشاير بتضايق: يمكن يغثج
: وانت ليش تبجين

: منال لان انت تبجين مقهورة على قهرتج

خلت وطلعت بساع ووجها ينكي الوان.

وكفت كدام الامراية حقه لو كال
شباب يتجدد
اتلمس اول خطوط للكبر بوجهي والمرض احسة انطاني عمر فوك عمري
البشرة زادت صفار ومسحة ازرقاق ع شفايف

: لو ياخذ بشة على الاقل اامن بيتي وابني وهو يمها..
يمكن اغار بس على الاقل اموت مطمنه.

كولش طاقتي نزلت و سلبية صارت

كولش مكمت اتحمل.
و تفكيري صار، سودوي..

اباوع للبسي الاسود

و اني اكول نص عمري واتي حزنانه
و الزمن من قهر لقهر

ظلينا يومية نتخابر يغث بيه
لمن تعاركت. وياه اخر شي عركة جبيرة
ردت احضرة بس كلت لا خليه اتابعة بصمت

تحولت يومية ينزل منشور يغث
و انقطعت المكالمات و الرسائل و صرنا واحد يدور الثاني بس بصمت المشاعر..
طعنته بتهمة جديدة وهو خاين وعيون زايغة وكرهته و اذا ما بطل اخلعه
يومها دزلي تهديد
رفعي قضية خلع اخذ، منج اياس و اني اكدر بمليون وسيلة اسحب الحضانه منج

يومها نمت دمعتي بعيني
و حاضنه ابني اياس

ردت اكولة على انمار بس خاف ببالة اريد منه يتدخل
لذا قررت احلها بنفسي

خاصة حتى ولدة يشتكون ابوهم مكام يدخل و تركهم و ملتهي يفر الدول يتونس.

جاي اخيط اكضي وقت و حسين يلعب كدام عيني طبعا سولاف من رجعت حسيت رجع الفرح لعيون ابني و صار كل همة يسعدها

شوي اجت سولاف..

: ماما مو الطبيب مانعج من المكينة واي اجهاد.

حسيت تنمل بصابيع رجلي ومثل اليصلن علي

: خليني يمة ما بية شي هم الاطباء يتبستقون هواي.

ضحكت وشالت ابنها

: امس عقدنا محكمة

ابتسمت: بالخير يمة..
: ماما ايات هم ترجع هنا ورى العدة

: بنتي هذا البيت مفتوح الها هي وبزرها يمتى ما تريد

: هااا و شلون كعدتها يمنا وهي ارملة ومنا الولد تتقيد

: تطمني يمة عليج بس الج و البنية بيا حال و اذا رجعت ترجع ام ابن رياد وخيتكم..
و الزمن كفيل بالنسيان اذا مستقبلا تطلب زواج عود نحلها
: شنوووو لا تحليها لا تدخلي علي اوك

: يابة علي خليه الج قابل بس هو

صوت براء: جنج بسمرتيني بسالفتج العجوز و اولادها الثلاثة
حتى تمهدي زوجي غيث مووو؟
رجلي معليه الجبير علي وهو يتحمل

بشاير: منال انت وجناينج كون احطجن بغرفة ووين اليوجع يمعودة سكتيهن ذن

سولاف: اووي انت تضوجين منا لأن عانس

هنا بشة كامت وصارت حمرة ودمعت عينها
رزلت سولاف

: الله يطيح صبغج سولاف ام الجفصات ما تتوبين.. خية بشة مو قصدها هاي عوبة

بشاير: عادي ما تهمني صفاقة البعض لأن ماكو عمر يحدد للزواج
القسمة اذا مقسومة تجي تجي تجي وين قابل تطير

خلت وراحت بشة
سولاف: بت خالج غثيثة

: اشش دربالج تحجين عالبنية ترى زعلت شوفي ولج اكول لعلي اذا عاديتيها سمعتي؟

: وهي شعدها تشتغل وي علي خل تدور شغل بتخصصها لو لطشة..
لزمت سولاف تدفع لغرفتها

: اشش صوتج ما اسمعه

اما براء من شافت عصبت ركضت ع درج شاردة لمشتملها

: اعلمجن بس تحارشن ببشتنا اموتجن والله جناين ما تنطن وجه شدن وي البنية

رحت لبشاير لكيتها تلاعب اياس الي تعلق بيها و ما تبين مجروحة

: حسبيها علي حبيبة

: ما صار شي شعليج انت..

استمرت الحياة و سولاف تغار على علي حتى من بشاير

و دوم تعارك البنية...

الاشهر تمر و الغياب نفسة نفسة لا الميت ردلي و هذا مستحيل

و لا الغايب رجع.. و جنه معاند
او مثل مكالوا ملتهي بالدراسة

سنة ٢٠١٦.. تقريبا بشهر الرابع
نهاية الربيع..

ست اشهر على وفاه ابني ورحيل رضا وهجرانه الي

و ايات دخلت بحملها بشهر السابع..
و زادت امراضها و يومية منتكسة حامل بتوأم.

و الحمل صعب وضع صحي زفت و العمر لسة صغيرة

يتبع ٥٨٨٦

(مقتطفات روس اقلام بارت يجي.) 👇🏻
.
.

وعد

ظليت كل كم يوم يذبني علي يم بيت عمي فضل

اداري طيور احمد..

الي زادت عركاته وي امه و تبسمرها الي بس انكي اذن طرشة

لمن رضخت
بيوم لزمتني

: ابني رايدج ولو علي ما اقبل بيج بس عندي اهم شي ابني وحيدي ينسعد
ثقي وعد اذا اي تصرف ياذي ابني بدر منج اصيرلج عدو

: اطمني اني ما اقبل بيه منو كلج راضية

هنا تدخل احمد

: تركينا شوي احاجيها

طلعت امه و بقينا..
جان لازم بيدة ببغاء طيرة صوبي استقر على جتفي

: مو متفقين وكوتلج احتاج احد يداري الطيور اني ما افرغ و مكدر يومية ادز عليج اهلج ميقبلون فالاحسن نزوج
انت هدفج الطيور واني هدفي انت اقصد اهتمامج بطيوري

: صفقة فاشلة..

: جربيني و اللهبس نزوج الا بشهر تموتين علي اقصد ع طيوري

: ليش احسك تنصب علي و غايتك مدري شنو

: يمعودة كبري عاد وكبري عقلج هههه

: زين وافقت بس شرط تجيللي هدية اريد بومة

: امداج يا قشمر هههه يلة تدللين..

: شوف تكلي قشمر انت تضحك علي

: ام بطن اشاقيج لا ابد ما انصب كل الطيور الج اذا تردين اثبت حقوقج بيهن بعقد الزواج

: لا استحي وعلي يرزلني

: امي هسة راح تروح لأمج و نتفق اني ما احب الحفل بفلوسة اطلعج شهر عسل

: ما اريد بفلوس الحفل اريد طيور

: تدللين اسويلج معمل طيور اشبعج بوس و.. احم طيور طيور..
: شنو بوس عيب
: اقصد طيور اسمهن بوسة..

: الله عفية اريد بوسة فدوة يمتى تشتريها

ضحك و هو يباوعلي خجلت

: وين صافن اكول خةف مامو طير بهذا الاسم وتشوفني غشيمة
ترى مو ما افهم بس انت تكول اكو طير اسمة بوس كلت يجوز صدك

: اي اكو مو اكو عطر اسمة بوس عادي اكو طير هم هيج اسمه هذا طائر غريب عجيب و من تاخذيه بشفايفج تحسين احاسيس جميلة

: شفايفي شعليهن اكولك انت ما ناصب علي..

: ابد

تقربت منه: بلة باوعلي زين

ركزت بعيونه..

: ممﻤم طلع صح مكذب

رجعت لبيتنا و العصر اجو يطلبوني

امي فرحت تحب احمد و كالت كبعوا واخذو حتى ما سألتني

عبالك اني ميته ع زواج متدري ميته ع طيورة و عندة فلوس يجيبلي الطير الي اريده

اني الطيور ادماني مو بيدي

حتى احسهن كولشي بحياتي

انمار، كلب الدنيا من سمع و اجة يهدد امي

: شوفي عمة البنية الي

: لا بلة دروح صايع

: و الله اقتل احمد اذا تدنالها

: مسار لم اخوك لا اخلي ولدي تكسره تكسر

: لو تستحين مزوجينها وسنة رياد مدايرة

: بكيفي اهم شي احمي بنتي منك ولك عرفتك مخطط لشي جبير وفشلتك
خاف موصلي مكالماتك لامك
تزوج بنتي وتسفرها للزنكلوني امك وهناك تستفردوا بيها

ولك مو منال الي تنطيك مرة يا خايس

: هاي زهراء، توصلج مو شفت مسار مرتك علكتها وتكذب

مسار: انمار مالك قسمة الف من تتمناك

عباس: عمة ليش تكسرين كلبة وهو رايدها سالوا البنت اكيد تحبه

هنا طلعت

: انمار امش اطلع برة ما اريدك وازوج احمد غصبا عليك
ابتسمت امي لأنمار بتحدي وانتصار
طلع انمار معصب واخوانه وراه

حظنتني امي و باستني

: ذيبة عاشت ايدجيولي خايس ميفيدج هذا يعذبج اخذي الزين
احمد

ابتسمت. و اني معحبة باحمد و بحجة الطيور اريد اصير اله

جانت ليلة زواجي حافلة بالاحداث

ثاني يوم الصبحية كعدنا على صريخ....

.