شـــــلة بنــــاات الشـــــرقيــــة

47

  " بعد مرور يومين رجعت إلهام للدوام بالجامعه كالعاده و التقت بالشله .."
ليان : بنااات في عندي لكم خبر جناااااان ..
شهد : ايش يلا قولي ..
ليان : لااا خل هديل تقول ..
شهد : اخلصو علينا وحده تقول ..
هديل : انكبتني ليان .. خلاص بقول .. قرروا اهلنا يعني انا و ليان انهم يقدمون زواجنا ..
شهد : لااا احلفي .. والله ونااسه .. متى بيصير ؟
ليان : رح يصير باجازة منتصف الفصل الثاني .. يعني الاجازه الجايه .. يعني بنص شهر 5 ..
شهد : زين زين والله بس ليه قدمتوه ..
هديل : يعني هم شافوا الهام تزوجت و عادي ما اثر فقالوا ليه ما نفرح بعيالنا ..
شهد : اهاا ..
ليان : و الكروت بكره ان شاء الله بجيبها لكم .. هاا اش رايك يا الهام ..؟
هديل : إلهام بالها مو معنا ..
ليان : إلهاااااااام ..
إلهام : نعم ..
ليان : اش فيك شايله هموم الدنيا كلها على راسك ..
إلهام : خليني بحالي و بهمي ..
هديل : الهام ما سمعتينا قدمنا يوم زواجنا ..
إلهام : ان شاء الله الف مبروك مقدما ..
ليان : البنت ابد ما همها .. لو اعرف انك تحبين سعود كان قلت سرحانه فيه ..
إلهام : يوووووه يا ليان تتعمدين تضايقيني يعني ..
ليان : اسفه مره اسفه ما قصدت ..
إلهام : قولي لي ابراهيم متى زواجه ..
شهد : شوفو البنت متزوجه و تسأل عن حبيبها ..
إلهام ( تنهدت ) : يا الله .. ما ني راده عليكم هذا و انتو خوياتي و تعرفون كل شي ..
ليان : معليه يا الهام .. بس جد مفروض تنسينه ..
إلهام : ليوووون تكفين لا تتعبين قلبي .. جاوبيني و بس ..
ليان : طيب طيب هدي .. زواجه بعد تقريبا 3 اسابيع ..
إلهام : ايش ؟! بهالسرعه .. طيب هو ما قال لي ذاك اليوم انه بيجي يخطبني بالاجازه و بنتزوج على طول ما قال لي كذا .. اش معنى هذي البنت ما سوا معها نفس ما سوى معي ..
هديل : يمكن يبي ينساك بسرعه ..
إلهام : ههه ينساني .. ما هو نساني من قبل لا اتزوج .. ليان اذا شفتيه قولي له هالكلمتين .. قولي له إلهام تقول لك انها ندمانه لانها حبت واحد مثلك و قولي له لو صارت فرصه ثانيه اننا نصير لبعض رح اوقف بوجه هذي الفرصه .. يعني يحلم فيني مره ثانيه ما عاد ابيه ..
ليان : ما اقول الا لاحول و لا قوة الا بالله ..
------------------------------------------------------------------------
" بعد مرور 3 أسابيع و بليلة زواج إبراهيم إلهام حضرت الحفل مع ليان بالرغم من ان ليان اصرت عليها ما تروح لكن الهام راكبه راسها الا تبي تروح و سوت اللي براسها و راحت .. و بنفس ليلة زواج ابراهيم كانت ليلة خطبة ورود لوليد .."
إلهام : اللحين هذي الهنوف اللي فضلها علي ..؟
ليان : لهو و اللي يسلمك ما نبي مشاكل ..
إلهام : اللحين انا صرت راعية مشاكل ..؟
ليان : لا انا ما قلت كذا .. بس لا تنسين انتي قلتي لي تبين تحضرين عشان تستانسين و بس مو عشان تعلقين ..
إلهام : و انا قلت شي غلط اللحين .. من جد البنت هذي ما تقارن فيني ..
ليان : استغفر الله .. اتركي الغرور اللحين و قول لي اشلون سعود خلاك تجين الزواج و اليوم خطبة اخته ..؟
إلهام ( بضحك هستيري ) : هههه حبيبتي انا اذا بغيت اسوي شي اسويه ابن امه يقدر يمنعني ..
ليان ( مستغربه اول مره الهام تقول مثل هالكلام ) : بجد انتي فيك شي .. انا اقصد اكيد شهد و منال بيكونون موجودات من رح يستقبلهم ؟
إلهام : صراحه سؤال غبي .. يعني مين ؟ اكيد ام العروسه عمتي .. و بعدين شهد كلمتها و قلت لها اني ما رح اكون موجوده ..
ليان : طيب طيب اخاف شوي و تعطيني كف .. خليني ساكته احسن ..
إلهام : اناااااا آآآآآسفه .. لكن اكيد ما رح اكون طبيعيه و لا رح اكون بالمود يعني حبيبي اللي اموت فيه او كنت اموت فيه اليوم زواجه و تبيني اضحك و اسولف عادي ..
ليان : عشان كذا ما كان ودي انك تجين زواجه اليوم ..
إلهام : جيت و اللي صار صار خلاص خلينا نشوف العروسه ( و تضحك بإستهزاء ) و نملي عيونا منها ..
" كانوا ليان و الهام يتناجرون و شافتهم ام ابراهيم و استغربت وجود إلهام فنادت ليان تفهم منها اش السالفه .."
ليان : هلااا عمتي ..
ام ابراهيم : اش جايب خويتك إلهام ؟
ليان : عمتي اش هالسؤال ؟
ام ابراهيم : أنا اعرف كل شي و اعرف ان هذي حبيبة ولدي سابقاً .. و هي متزوجه اللحين .. ابي افهم اش جايبها لزواج إبراهيم ..؟
ليان : مين قالك ؟ و من وين جبتي هالكلام اصلاً ؟
ام ابراهيم : ليووون لا تلفين و تدورين علي قولي لي هذي اش جايبها ؟ يعني جايه تخرب زواج ولدي .. ترى ما اسمح لأي كان يخرب زواج ابرهيم .. واللحين ابيك تطردينها .. و لا بأطردها انا ..
ليان : اش هالكلام يا عمتي .. هذا لا هو من اصلنا و لا من عوايدنا .. و الهام ما رح تسوي لك شي انا اوعدك ..
ام ابراهيم : يكون من الاحسن انها ما تسوي شي ..
" بجد بجد تضايقت ليان من كلام عمتها لكن اللي كانت تبي تفهمه اشلون عمتها درت بعلاقة ابراهيم بإلهام .. لما رجعت ليان لإلهام ما كاانت رايقه و السبب كلام عمتها الغريب .."
إلهام : اش فيك ؟ و اش فيها عمتك ؟ حسيت كأنها تهاوشك ..
ليان : لااا ما في شي .. بس مشاكل تخصها ..
إلهام : اهاا .. طيب ..
------------------------------------------------------------------------
" بنفس الليله لما رجع راكان و اهله ع البيت .. راكان تذكر شي مهم شي اعطته إلهام هو ما كان ناسيه بس خباه و طلب من وليد يخبيه عشان ما يتعلق بإلهام لكن اللحين خلاص صار و تعلق فيها فطلب من وليد يرجعه له .. هذا الشي هو السلسال اللي بحرف الـ .. هذا السلسال اللي اهدته إلهام لراكان بالمطار ايام لندن اذا تذكرون .."
وليد : اشلون طرى على بالك اللحين ..؟
راكان : هو دايماً على بالي بس كل يوم اقول بكره باخذه ..
وليد : شكل اليوم يوم شفت اسعود انقهرت .. يمكن عشان كذا ..
راكان : تكفى وليد جيبه ..
وليد : اوك بعطيك اياه بس لا تتأمل ..
راكان : انت جيبه و ان شاء الله ربك بيفرجها ..
وليد : ان شاء الله ..
" إلهام بزواج إبراهيم ما قدرت تسوي شي حتى ما شافت ابراهيم و كان مستحيل اساساً تشوفه .. المهم بذيك الليله ما كان لها خلق تروح بيت زوجها اللي هو بيت عمها فرجعت على بيت ابوها طبعاً رجعت مع خالد و خالد كلم سعود بعد ما نامت إلهام لانها كانت تعبانه و قال له ان إلهام بتبات عندهم .. و سعود ما عاد له كلام اش بيده يسوي .."
------------------------------------------------------------------------
" في صباح اليوم الثاني .. لما قعدت إلهام من النوم كانت مرتاحه لانها نامت زين بفراشها القديم اشتاقت لغرفتها .. و بالصدفه كذا شافت الدبوب هذا الدبدوب اللي اعطاها او اهداها اياه راكان ابتسمت له و كان ودها لو ترجع ذيك الايام .. لما انزلت تحت لقت اسعود بإنتظارها .."
إلهام : سعووود ؟! اش اللي جابك هنا من صباح الله خير ..
سعود : جيت آخذك ..
إلهام : ايش ؟! و ليش ان شاء الله يعني ما يصير اقعد عند اهلي كم من يوم ..
سعود : كم من يوم ؟! ليه ؟ أنا مزعلك و لا متهاوشين عشان تقعدين عند اهلك كم من يوم .. بعدين للحين ما تفاهمنا على الحركه اللي سويتيها امس .. تتركين اختي بيوم خطبتها عشان زواج وحده ما تسوى ..
إلهام ( بخاطرها : والله هي من ناحية ما تسوى ما تسوى بس مارحت عشانها ) : بكيفي و انا حره المكان اللي ابي اروحه اروحه و انت مالك كلمه علي ..
سعود : انا الظاهر لازم اغير طريقة تعاملي معك .. صار لنا اربعة اشهر متزوجين و لا يوم حسيت فيه اننا فعلاً متزوجين ..
إلهام : ههههه ( ضحكة سخريه ) : ليكون صدقت اننا متزوجين ؟ هههههه يا حليلك احلامك اكبر منك ..
" خالد سمع هواشهم يوم كان نازل .. استغرب ما درى ان العلاقه بينهم متوتره هالقد .. فكر انه خلاص الهام بدت تتعايش مع سعود .."
خالد : اش هالاصوات ؟ ليه تتناجرون اللحين ؟
سعود : تعال .. تعال شوف اختك و اسمع كلامها اللي يسم البدن ..
خالد : إلهام اش صاير ؟
إلهام : ما صاير شي بس سعود كالعاده يحب يكبر المواضيع ..
" سعود منقهر و محتر بشكل كبير .. يعني اللحين قامت و طلعت نفسها بريئه و ان سعود شرير .."
سعود : انا اللحين اكبر المواضيع .. خالد انا من يوم تزوجتها و هي تقول لي كلام و لا حتى ابليس يقوله ..
خالد : لهالدرجه ؟
سعود : و اكثر من ما تتصور ..
إلهام : لا تهتم له .. هو جاب الشي لنفسه خليه ..
سعود : أي لا يهتم و انا اعيش بعذاب طول حياتي .. تدري انها امس طالعه للزواج بدون اذني و المشكله ان امس كانت خطبة اختي كان من المفروض انها تكون موجوده يعني من الاصول ..
خالد : انا فكرت ان عندك خبر ..
سعود : الهام ما تحسب لي اية حساب ..
خالد : مو معقول كل هذا يطلع منك يا الهام ..
إلهام : شوف خالد نصيحه مني لا تتدخل .. صحيح احبك و اعزك بس انصحك بمشاكلي لا تتدخل .. و نصيحه لك انت يا سعود الزفت مافي داعي اطلع مشاكلنا برى و إلا ترى والله لا اكبر المشكله و اوصلها للطلاق و اذا تبي محاكم بعد ..
سعود : هاا شفت .. سمعت بإذنك ؟
خالد : اوووه اش هالكلام يا الهام .. لكن خلاص ما تبيني اتدخل كيفك انتي مع زوجك انا ما لي علاقه .. يلا انا اللحين رايح للشركه و انتو حلو مشاكلكم ..
" لما راح خالد ع الشركه كلم رائد عن اللي صار طبعاً رائد ملتزم بالاتفاق يتمنى الاربع الاشهر الجايه تمر بسرعه عشان تتطلق الهام و تفتك من سعود كان قلبه على الهام .. اما الهام رجعت مع سعود للبيت و النفس شينه لكنها مع ذلك اعتذرت من ورود لانها ما كانت موجوده بالخطبه .."
ورود : لا انا مسامحتك .. بس استغربت يعني اللي جايين يخطبوني هم اهل صديقتك شهد و انتي مو موجوده ..
إلهام : معليه انا كلمت شهد و قلت لها ما اقدر اجي و تفهمت ..
ورود : اهاا انا قلت ما سألت عنك ..
إلهام : ع العموم الف الف مبروك .. شفتي مو انا قلت لك ذاك اليوم ان وليد يحس بشي اتجاهك و ان نظراته كله عليك ..
ورود ( بخجل ) : ايييه و صارت قصص بالشركه ..
إلهام : الله يعني قصص رومانسيه ..
ورود : تقدرين تقولين ..
إلهام : اجل احكي لي يمكن اروق شوي كنت مخططه اجي البيت و انام او بالاصح ادخل الغرفه عشان ما اشوف اخوك .. لكن بما انه عندك سوالف يلا علميني اسمعك ..
ورود : طيب بعلمك بس بشرط .. تحكي لي اش صار بينك و بين اسعود هالمره ..
إلهام : اوك ما طلبتي .. مع اني اكره ما اكره لما احكي عنه ..
" طبعاً ظلوا سوالف و سوالف اخذ و عطا .. "