في المدرسة ...
إلهام : يلا يا شلة بنات الشرقية اليوم أول يوم بالإختبارات ورونا اش بتسوون خصوصاً إن هذي آخر سنة ..
هديل : يوووو يا إلهام أنا مره متوترة و خايفة ..
ليان : اش اللي يخوف يا ماما تراه عادي مجرد اختبار ..
هديل : لا هالمرة غير هذي اخر سنة ..
شهد : حبيبتي هدهد ترانا تونا باختبار الفصل الأول لا تنسين..
هديل : ولو لازم منه التوتر ..
إلهام : أنا عن نفسي مرتاحة و عادي عندي بس ودي نخلص بسرعة ..
ليان : يلا امشوا افتحوا القاعات خلونا نروح و نتوكل على الله ..
شهد : يلا .. بالتوفيق يا بناااات ..
-------------------------------------------------------------------
" بعد فترة الأختبار الأولى طلعوا البنات .."
هديل : واو كان سهل الأختبار خوفي راح عالفاضي ياني مستانسة افتكينا من الرياضيات ..
ليان : ايه شفتي قلنا لك ما يخوف باقي لنا بس الحديث أكيد رح يكون سهل ..
شهد : إلا وين إلهام ؟ للحين ما طلعت من الإختبار ؟
" إلهام راحت عالحمام تتعدل كالعادة طلعت اول وحده من القاعه و على طول عالحمام و بطريقها صادفت نور معجبتها واللي طلبت صداقتها بفتره من الفترات و الهام رفضتها تذكرتوها .. كانت نور ما شية مع خوياتها و إلهام قاعده قدام المرايا خوياتها يوم شافوا إلهام قالوا لنور تروح تكلمها بسرعة فرصة إلهام لحالها ترددت نور اول شي بس بعدين راحت جنبها و كلمتها ..... أخيراً ما بغت .. "
نور : مرحبا إلهام ..
" إلهام لأن علاقاتها كثيرة بالمدرسة ما كانت مهتمة كثير من هذي بس سايرتها و ردت عليها "
إلهام : أهلين و تعرفين اسمي بعد بس أنا ما أعرفك ..
نور : معاك نور ..
إلهام : هلا و الله تشرفنا .. بغيتي شي ؟
نور : الشرف لي .. لا ما بغيت شي محدد .. يعني اذا فاضيه خليني اسولف معك اشوي ..
" أول شي الهام قالت بخاطرها من هذي اللي مطيحه الميانه من اولها .. لاااا و تبي تسولف معي و كأنها تعرفني من زمان .. بعدين قالت خلني اصرفها احسن .. بعدين حستها لزقه فقررت تعطيها شوي من وقتها و تعرف سالفتها .."
إلهام : والله ما ادري اش اقولك يعني خوياتي يستنوني اللحين اكيد بس يلا اذا تحبين نمشي الين نحصلهم و احنا نمشي نسولف اوكي ..
" إلهام ما تحب هالطريقة بالتعارف تذكرت ان هذي معجبتها اللي قالت ليان عنها و اللي إلهام ما عطتها وجه بس هي جت و قطت عمرها عليها فما حبت إلهام انها تكسر بخاطرها خصوصا قدام خوياتها و طبعاً نور ما صدقت نفسها انها أخيراً كلمت إلهام .. "
و هم يتمشون دارت بينهم سوالف ...
إلهام : انتي مو نفسها البنت اللي كلمتني عنها ليان ؟
نور : أي أنا و ادري انك قلتي ما تبين تشوفيني بس والله انا حبيت أكون وحده من صديقاتك لا أكثر و لا أقل ..
إلهام : اهاا .. طيب ليه ما جيتيني انتي بنفسك ليه سويتي ليان واسطه بينا ؟
نور : خفت اني اجيك ما ادري ليه بس ما كنت اقدر يمكن خفت انك تفشليني ..
إلهام : طيب ليه جيتيني اللحين و ما خفتي افشلك لهالدرجة واثقة ؟
" عاد هذا سؤال تحطيم ما قدرت نور تجاوب عليه "
نور : لا مو كذا بس خوياتي اصروا و قالوا لي هذي آخر سنة لها و يمكن بعد كذا ما تشوفينها و قالوا لي روحي لها حتى لو فشلتك المهم حاولتي ..
إلهام : اهااا عجبتيني و الله .. هذول خوياتي بروح لهم اذا حابه تعالي انتي بعد ..
نور : لا انا بعد بروح البنات يستنوني .. بس عادي وقت ما ابيك اجيك ما رح تفشليني صح ؟
إلهام : يا حبيبتي ( ذابت البنت مع الكلمة من غير شي هي ذايبه ويالله تطلع منها الكلمة ) متى ما تبيني تعالي و لا تخافين ما رح افشلك من هاللحظة حنا صديقات حتى لو انتي ما جيتيني انا بجيك اوكي ..
نور: طبعاً اوكي ..
" طبعاً الشله شافوا إلهام من بعيد و بدا الحش .."
هديل : بناااااااات شوفوا إلهام مع مين ..
ليان : مع مين يعني ؟
هديل : لفي و شوفي ..
شهد : واااااو يا حليلهم متى صار كل ذا و قبلت إلهام صداقتها لااا و مشت معها بعد ..
ليان : هذي اللي ما تطيق المعجبات و العلاقات الجديده يجي منها اكثر ..
هديل : بنات طالعوا وجه نور صار احمر ههههههههههه ..
شهد: هههههههههههه أي والله..
ليان : ههههههههههه اموت و اعرف اش قاعده إلهام تقولها لين صار وجهها احمر كذا..
هديل : خلاص اسكتوا إلهام جايه ..
إلهام : اش فيكم ماسكين الضحكة ؟
ليان : ههههههههههههه من جد ما عرفتك والله هذي اللي ما تحب شي اسمه اعجاب ..
إلهام : يووو يا بنات لا تفهمون غلط هي جتني وكلمتني و قالت تبينا نصير اصحاب و بصراحة كان اسلوبها راقي و ارتحت لها و قلت لها اوكي ..
شهد: علينا الكلام ..؟
إلهام : لا والله هذا اللي صار ..
هديل : مسكينة البنت اش سويتي فيها اللين وجهها صار احمر كذا.. ؟
إلهام : والله ما سويت شي بس تكلمنا و انتو وش هاللقافة اللحين بنت وتعرفت عليها انتو وش دخلكم .. ليكون تغارون ؟
ليان : لا حبيبتي ما نغار على وشو بنغار ترى حتى احنا عندنا معجبات بس ما نعطيهم وجه ..
إلهام : أي معليه اقول يلا امشوا نذاكر بس ..
--------------------------------------------------------------------
" بعد مرور اسبوعين انتهت الأختبارات و الكل كان ناجح و جت الإجازة القصيرة اللي كانوا مستنينها على احر من الجمر .."
" إلهام كلمت ابوها عشان يروحون الشاليه و يسوون حفلة صغيرة بمناسبة النجاح هذي الحفلة رح تكون عادية تختلف عن حفلة الشهادة الكبيرة .. وافق ابوها وطلبت منه إلهام انه يعزم صديقه ابو ليان و برضو ابو شهد وابو هديل واتفقوا على كل شي الكل رح يجي ويعزم اهله .."
بس قبل لا نكمل سالفة الحفلة خلونا ندخل على عائلة ليان و نعرفكم عليها ..
ليان هي البنت الثانية و اللي أكبر منها اخوها نواف عمره 23 سنة يدرس بالحساء بجامعة الملك فيصل و ليان بعده و بعدها اخوها نايف عمره 16 سنة بالثانوية و اخر شي اختها الصغيرة رنده تدرس بالمتوسطة و عمرها 13 سنة ..
ليان قريبة حيل من امها حتى انهم كأنهم أصدقاء مو ام وبنتها أمها معلمة بمتوسطة اختها درستها من قبل و ليان ما تخبي شي عن امها و أبوها هو و أبو إلهام شركاء بشركة كل أعمالهم تقريبا مع بعض ..
ليان عندها عمة وحيدة بس و هي عمتها سعاد أم إبراهيم " إبراهيم صديق خالد أخو إلهام " أما خالاتها و خوالها فهم عايشين بالرياض عمتها مطلقة و عايشة مع امها يعني جدة ليان و عندها ولد اكبر من ابراهيم اللي هو عبدالرحمن " على اسم اخوها ابو ليان " متزوج و عنده عيال و هو يصرف على امه و عايشين بنفس البيت ..
ليان : يمه أنا ابي اعزم عمتي سعاد عالحفلة إلهام قالت لي تعالوا و اعزموا اهلكم ..
أم ليان : اوكي حبيبتي سوي اللي يريحك ..
ليان : تسلمين يمه يا بعدي انتي ..
نايف : أي لو انا اللي نجحت ما سويتوا لي حفلة ابد ..
أم ليان : حبيبي انت انجح من الثانوية و شوف اشلون انا بسوي لك حفلة تكسر الدنيا ..
رنده : و أنا يمه باقي لي سنة واتخرج من المتوسطة بتسوين لي حفلة ..؟
أم ليان : أي يا يمه اكيد ولا يهمك اسويلك ليش لأ ..
" ليان كلمت عمتها و قالت لها تجي هي و عيالها و ما رح تقبل أي عذر وافقت عمتها طبعاً .."
---
" ليان كلمت عمتها و قالت لها تجي هي و عيالها و ما رح تقبل أي عذر وافقت عمتها طبعاً .."
--------------------------------------------------------------------
" نروح لبيت هديل و نعرفكم عليها .. عندها اخ اكبر منها اللي هو بدر عمره 23 سنة ويدرس بالرياض ( بعد ما درا ان حبيبته انخطبت راح وسافر على الرياض وكمل دراسته هناك ما عاد ناسبه جو الشرقية .. و للمعلوميه سالفة حبيبته سديم هذي فيها إن رح تعرفونها مع تسلسل احداث الروايه ان شاء الله ..) هديل هي ثاني وحده من بين اخوانها وخواتها و بعدها اختها وداد تدرس بثالث متوسط يعني عمرها 15 سنة و بعدها اخوها عبدالله عمره 13 سنة و يدرس بالمتوسطة بعد و اللي بعده اخوه سعد عمره 10 سنين بالابتدائي و أخيراً اختهم الصغيره هدى عمرها 7 سنين باول ابتدائي ..
هديل علاقتها مو قويه ولا ضعيفة مع امها يعني عاديه مافيها أي شي يستحق الذكر .. عندها خال وحيد و عايشين بالجبيل مع جدها وجدتها هذا خالها اللي بنته سديم ويحبها بدر .. و ما عندها إلا عمها ابو شهد بس .."
هديل : يمه قرروا نروح الشاليه تو دقت علي إلهام وقالت لي و قالت لي بعد نعزم اللي نبيهم ..
أم هديل : زين بس احنا ما عندنا احد نعزمه الا عمك وأكيد شهد بلغتها إلهام.. أما خالك ما اتوقع يجي ..
هديل : ايه صح .. خالي مستحيل يجي ما يترك الشغل ابد ..
أم هديل : اذا تبين عادي اعزم صاحباتي ؟
هديل : يمه عادي اعزمي اللي تبينهم الشاليه كبير و يسع الكل ..
أم هديل : طيب ..
--------------------------------------------------------------------
" إلهام دقت على كل البنات و اتفقوا يروحون السوق مع بعض عشان يشترون فساتين الحفلة اللي رح تصير بعد 3 أيام .. كانت إلهام قاعدة بغرفتها تجهز تبي تروح للسوق دخل عليها خالد .."
وقال : مشاء الله على وين ؟
إلهام : يهمك تعرف ؟
خالد : طبعاً أكيد يهمني ..
إلهام : بروح السوق مع خوياتي ..
خالد : مين خوياتك ؟
إلهام : ليه السؤال ممكن أعرف ؟
خالد : جاوبيني وبس ..
إلهام : ايه تطمن شهد رح تكون معنا ..
خالد ( يصرف مع ان كل شي واضح ) : من جاب طاري شهد ..؟
إلهام : تراني افهمها عالطاير يا اخوي ..
خالد : اجل فهمتي غلط .. طيب .. اش رايك .. لو اني أوصلكم ..؟
إلهام : لا مشكور بمر عليهم مع السواق .. هذا اتفاقنا ..
خالد : تكفين خليني انا اوصلكم ما رح أضايقكم بس بمشي وراكم عشان ماحد يتحرش فيكم ..
إلهام : صدقتك ياخوي لا مشكور احنا بنروح لحالنا و ماحد رح يتحرش لاننا محترمات ..
خالد : ما في شك .. بس الله يخليك خليني اوصلكم هالمره ..
إلهام : يا ربي انا عارفه تبي تجي عشانها بس عناد ما رح أخليك ..
خالد : زين هين رح تحتاجين لي .. و رح اشكيك حق اخوي رائد ..
إلهام : إلا رائد لا تدخله بالموضوع .. مو ناقص ثقل دمك ..
خالد : أجل يلا انا استناك بالسيارة تحت ..
" وراح وسكر الباب "
إلهام : ياالله وش هالبلوه خل نروح وامري لله .. اللحين اش رح اقول للبنات .. اوووف اوف منك يا خالد ..
" بالسيارة ركبت إلهام جنبه و مروا اول شي على بيت ليان لأنه قريب و هي كلمتهم من قبل وقالت لهم ان اخوها بيوصلهم فما كان عندهم مانع و ما كانوا يقدرون يعترضون اصلاً .."
" ركبت ليان السيارة و كانت مبسوطة .."
ليان : لهو اش عنده اخوك موصلنا اليوم ؟ " ليان تمون على خالد تعتبره زي اخوها تربوا مع بعض اساساً "
إلهام : ( مسويه عمرها ما تدري ) و الله ما ادري أسأليه هذا هو عندك ؟
خالد : ما في داعي تسألني لأني سمعت السؤال .. ليون أنا بوصلكم عشان اصير محرم معكم ..
ليان : هههههههههههههههههههه بفطس من الضحك اذا مشت على لهو ما تمشي علي ترى ..
خالد : مين لهو ؟
ليان : لا تضيع السالفة لهو إلهام ادلعها يعني يلا قولي ليه ..؟
خالد : و الله ما في سبب معين بس كذا ..
إلهام : ليون راقبيه زين و انتي تعرفين ليه وصلنا ..
خالد : أقول انتي وياها قاعدين تتفقون علي لا وقدامي بعد .. يلا وصلنا بيت شهد يا ويلكم تنطقون بحرف البنت تستحي ..
ليان : لهو قولي لي إني سامعه غلط أخوك أش عرفه ببيت شهد و أنتي ما تجينه الا مع السواق ..
إلهام : قلت لك راقبيه و بتعرفين و لا تسأليني ..
ليان : ههههه إييييه فهمت ..
خالد : انتم هيه لا تقعدون اطلعون علي إشاعات البنت جت اسكتوا ..
" ركبت شهد السيارة و طول الوقت كانت ساكتة "
ليان : شهودة ( خالد بقلبه يا زين اسم دلعها هههه عسل على قلبي ) قررتي أش تبين تشترين ؟
شهد ( ذايبه حيا و بصوت واطي ) : بعدين ليون بعدين مو أللحين ..
ليان ماتت ضحك : ههههههههههههههههههههههههههه ..
" طول الطريق و هي تضحك .. خالد كان معدل المرايا الأمامية على ورى كان يحاول يشوف شهد بس ما قدر لأنها قاعدة عالباب من جهة اليمين بس لمن و صلوا لبيت هديل أركبت هديل من اليمين فصارت شهد بالنص صار يقدر يشوفها طبعاً أكيد عارف إنها هي و اللي أكد له أكثر عيونها .. كان طول الطريق يطالعها .."
" وصلوا السوق راحوا على الظهران مول .. نزلوا و نزل خالد .. إلهام قالت للبنات : روحوا ادخلوا يا بنات استنوني عند البوابة أنا لاحقتكم.."
بعدين قالت لخالد : خالد وين إن شاء الله ؟
خالد : ابجي معكم ..
إلهام : لا أنت استخفيت خالد تراني ماني برايقه أحنا نخلي السواق يجيبنا عشان ينطق بالسيارة و أنت أللحين انطق زيه ..
خالد : لهو يلا عاد ..
إلهام : أول شي لا تناديني لهو بس بنات الشلة ينادوني ثاني شي إذا انا رضيت البنات ما رح يرضون والله أنا قلت لهم انك بتوصلنا مو تتمشى معنا ..
خالد : طيب اسمعي أنا بجي وراكم بس بدون ما احد ينتبه بدخل بتمشى و رح أكون بعيد عنكم صدقيني ..
إلهام : اللهم صبرك يا روح " ومشت "
إلهام (عند البوابة ): هااا بنات تأخرت عليكم ..؟
هديل : مو كثير يلا خلونا نشتري بسرعة أنا مره متحمسه ..
ليان : يا حليلك والله .. إلا قولي لي اش قررتي تشترين ؟ يعني أي لون ؟
هديل : شوفي أنا ابي فستان فوشي أحس بيطلع علي حلو ..
ليان : ايه يليق عليك أما أنا بشتري فستان اسود لوني المفضل ..
إلهام : و شوا اسود بعزى حنا يا ماما اخذي لك فستان احمر ولا ابيض ..
ليان : لااا ههههههه قالوا لك عيد الحب و لا بتزوج عشان البس احمر او ابيض ..
هديل : لهو طلبتك اخذي لون تركواز رح يطلع روعة عليك لأن عيونك اصلاً زرقا ..
إلهام : خلاص و لا يهمك اخذ ليش لأ ..
ليان : شوشو وينك مانتي بمعنا ابد ؟
شهد ( شاردة تفكر ليه خالد هو اللي جابهم و ليه كان يطالعه بالمرايا هي شافته كان احساسه بذيك اللحظة مره غريب و كانت متوتره و قلبها يدق بسرعة حتى نست ليش جت السوق ) : هااا .. إلا انا معكم اش كنتو تقولون ؟
إلهام : و قالت انها معنا و تسأل اش كنا نقول ؟
هديل : شوشو ابي رايك بهالفستان فوشي نفس اللون اللي احبه و قصير من قدام و له ذيل من ورى حتى قصة الصدر حلوة يااااي يجنن هالفستان اش رايك ؟
شهد ( البنت ابد مو معهم ) : هااا وينه الفستان ؟ هذا ؟ اللي بايدك ؟ أي حلو اخذيه ..
ليان : لااا البنت ابد مو حولنا يا حظ اللي انتي سرحانه فيه ..
شهد ( اللي انا سرحانه فيه هذا هو قدامي اشوفه و يشوفني ) : ماني سرحانه بأحد اقول خلونا نقعد بالكافييه اشوي ..
إلهام : خلاص يلا نقعد اشوي و بعدين نكمل اصلاً ما في الا هديل شرت ارتاحت باقي لها الكندره و تخلص ..
هديل : أي انتو اللي ذوقكم صعب ما عجبكم شي ..
ليان : احنا نبي شي ماركة شي يكون اول مره نشوفه ..
" وراحوا و قعدوا بالكافييه و خالد كان وراهم و قعد مقابل شهد عرفها خلاص و حفظ شكلها كثر ما طالعها ..البنات ما انتبهوا انه موجود عدا إلهام و كانت متضايقه من حركاته .."
شهد افتحت بلوتوثها باسم ( اتعبتني الدنيا ) و خالد بعد كان فاتح بلوتوثه باسم ( حبيتها يا ناس ) كان أسماء بلوتوثات واجد شهد ما كانت تدري هو بأي اسم و هو ما كان يدري هي بأي اسم بس لكنهم كانوا حاسين لا عارفين انه ممكن يلتقون بالبلوتوث لان اثنينهم كانوا ماسكين الجوال .. شهد جا على بالها ترسل لأسم ( حبيتها يا ناس ) ما تدري ليه بس احساسها اختار الاسم..
اللحين هذي المحادثة اللي صارت بينهم بلوتوث وما حد يعرف الثاني ..
شهد ( اتعبتني الدنيا ) : السلام ..
خالد ( حبيتها يا ناس ) : و عليكم السلام ..
شهد ( شدها الاسم اسم البلوتوث عشان كذا اختارته و على طول سألت عن السبب ) : مين اللي حبيتها ..؟
خالد : وحده اسمها شوشو اتمنى تكونين هي ..
شهد " من قوة الصدمة ما عرفت وش تقول " : يعني عادي البنت اللي حبيتها تكلم شباب بلوتوث ..
خالد : انا ادري انها ما تكلم وانها محترمه و حتى لو فتحت بلوتوثها اللحين فأكيد فتحته عشاني ..
شهد : ليش واثق اش دراك انها تحبك ..؟
خالد : نظراتها ..
شهد : اشلون شفت نظراتها ؟
خالد : قصة طويلة بس انتي ليش مهتمه وتسألين ؟
شهد : لا ولا شي اسولف و بس ..
خالد : انتي أي وحده من البنات ..
شهد : ليه تسأل .. ؟
خالد : بس ابي اشوفك ..
شهد : لا اسمح لي ما اقدر اقولك ..
خالد : اوكي براحتك .. بس ليش متعبتك الدنيا ؟ يلا اللحين انتي قولي لي ..
شهد : عشان اني احس اني حبيت واحد بس ماني متأكده من شعوري و تعبت و أنا افكر بالموضوع ..
خالد : طيب هو يحبك ؟
شهد : اعتقد أي او انها نزوة او انه معجب لا اكثر .. ما ادري ..
خالد : كلميه و تأكدي ..
شهد : لا ما اقدر اكلمه ماني بنت اللي خبرك و لاني بافرض نفسي على اياً كان ..
قاطعتها إلهام : شهد اش تسوين ؟
شهد : لا ولا شي قاعدة اشوف المقاطع اللي عندي بالجوال ..
" وصكت شهد بلوتوثها بسرعة .."
"خالد قال في نفسه : ليش احس ان هذي البنت قصتها مألوفة ليكون شهد .. "
ليان : يلا قوموا خل نشتري و نرجع البيت بسرعة لاني تعبت ..
هديل : أي يلا اخلصوا انا عن نفسي خلصت ..
" شروا البنات و خلصوا بهالوقت كانوا أهاليهم مخططين يسوون لهم حفل كبير اتفقوا مع بعض و نظموا كل شي "
........................ يتبع