Taong 1887 nang dumating si Claudius sa Maynila upang pakasalan ang anak na dalaga ng isang mayamang kastila na si Don Henrico Hermanuevo. Kasalukuyang mataas ang tensiyon sa Pilipinas nang mga panahong iyon dahil na rin sa mga pag-aaklas ng mga Katipunerong Filipino laban sa pamahalaang Kastila.
Sa pagdating ni Claudius sa Pilipinas ay pinaghihigantihan na pala siya ni Demetria, ang noo'y lider ng mga anak ng buwan dito sa Pilipinas. Binalak niyang patayin si Claudius pero hindi siya nagtagumpay.
Iyon din ang unang pagkakataong nagkita sina Claudius at Odessa. Nabiktima ni Claudius si Odessa sa pamamagitan ng pagsipsip sa dugo nito na halos ikamatay na ni Odessa kung hindi lamang niya nagamit ang kanyang kapangyarihan.
Nakita lahat ni Demetria ang ginawa ni Claudius kay Odessa. Alam ni Demetria na may kakaiba sa babae kaya sinundan niya si Claudius sa loob ng bahay ng babaeng may dugong diwata.
Tumambad kay Demetria ang mga bangkay ng mga kinikilalang magulang ni Odessa sa loob ng maliit na bahay. Tinungo ni Demetria ang likurang bahay at doon nakita ni Demetria ang halos wala ng buhay na si Odessa.
Natukso din si Demetria na simsimin ang dugo ng babaeng may lahi ng isang malakas na diwata. Maaring nagawang saktan pa ni Odessa si Claudius kaya iniwan niyang buhay ang babaeng biktima.
Nang makita ni Demetria na may pagtibok pa ng puso si Odessa ay tinigilan niya ang pagsipsip ng dugo nito na ng mga sandaling iyon ay mahinang-mahina na.
Hindi kayang pumatay ng tao ni Demetria kaya hindi niya pinatay si Odessa bagkus ay inilagay niya ang kamandag niya sa dugo ni Odessa para mahawaan niya ng pagiging Sangre. Gagamitin niya si Odessa para sa paghihiganti niya kay Claudius, para kalabanin at patayin ang mga anak ng buwan na may masamang intensiyon sa mga tao.
Para maisagawa niya iyon ay kailangang alisin ni Demetria ang alaala ni Odessa para makontrol niya ang isip nito at magtatagumpay sa kanyang plano laban sa mga anak ng buwan.
Matagumpay na naiturok ni Demetria ang kamandag nito kay Odessa. Kailangan niyang isama si Odessa kung saan siya nakatira para maturuan niya ito sa pakikipaglaban at gawing ganap na assassin. Pero naudlot iyon ng biglang dumating si Mariang Sinukuan at nakita niya si Odessa na wala pa ring malay. Walang nagawa si Demetria kundi iwan na lamang si Odessa kung saan niya ito nakita.
Ayaw ni Demetria ng gulo kaya kinalimutan na lamang niya ang balak na paggamit kay Odessa sa paghihiganti kay Claudius. Napilitan siyang iwanan si Odessa kasama ang diwatang si Mariang Sinukuan at bumalik na sa pamumuno sa mga grupo ng mga Sangre. Mga grupo ng bampira na nakakapagpalit-anyo.
Kinukop naman ni Mariang Sinukuan si Odessa at tinuring na isang tunay kapatid. Para hindi mauhaw sa dugo ng tao si Odessa ay dinala siya sa kagubatan ni Mariang Sinukuan upang inumin ang katas ng nektar ng bulaklak ng Myrho. Sa pamamagitan nito ay pinipigilan ang bampira na mauhaw sa dugo ng tao sa loob ng isang buwan at binibigyan pa nito ng kakayahang makapaglakad sa ilalim ng init ng araw.
Nang mga sandaling iyon ay naroroon rin si Demetria kaya nasaksihan niya ang lahat tungkol sa Myrho. Ginamit niya ang pulang likido pati na rin sa kanyang mga kasamahan para maiwasan na rin ang pumatay ng mga tao.
Naging assassin si Odessa tulad ng ipinasok ni Demetria sa kanyang isipan. Halos gabi-gabi ay nag-aabang siya sa mga lungsod para maghanap at pumatay ng mga anak ng buwan. At para maisagawa niya iyon ay namuhay siyang kasama ang mga tao at sinamantala na rin niya ang makapag-aral at makisalamuha sa mga mortal.
Halos isang daan taon din iyon at nakilala niya si Calisha nang mag-aral siya sa Angeles City sa Pampanga at nakasama sa boarding house. Naging matalik na magkaibigan sina Odessa at Calisha at tulad sa magkapatid ang turingan nila.
Nagtrabaho naman si Randy Evaristo sa isang mataba at mayamang Intsik na si Mr. Lee. Kasama niya si Bert bilang mga personal na body guard sa mayamang Intsik.
Nang gabing iyon ay inatake ng magkapatid na Mangkukutod si Mr. Lee sa loob ng VIP room sa isang bar sa may Ermita. Na kung saan napatay din nila si Bert, isa sa mga personal na body guard ng matandang Intsik. Sinuwerteng nakatakas si Randy sa magkapatid na mangkukutod. Pero nakunsensiya si Randy dahil sa pag-iwan kay Bert kaya muling bumalik ito sa loob ng bar. Patay na si Bert ng madatnan siya ni Randy.
Gustong maghiganti ni Randy para sa kanyang matalik na kaibigan at sinubukang habulin ang dalawang aswang. Doon ay nadatnan niya ang isang babaeng nakasuot na itim na hapit na pantalon at long sleeve na damit at kitang-kita niyang nakikipagsagupa ito sa magkapatid na aswang na pumatay sa kanyang among si Mr. Lee at kasamahan sa trabaho na si Bert. Siya si Maria Odessa dela Rosa, kalahating Diwata, kalahating tao at nahawaan ng dugong Sangre.
Inatake si Randy ng mangkukutod na si Trisha. Samantalang si Odessa ay si Chelsea naman ang kanyang kinalaban. Sa tulong ng Eskrihala ay madaling napatay ni Odessa si Trisha.
Sugatan naman si Randy ng tinulungan siya ni Odessa. Gamit ang Eskrihala ay nasunog ang katawan ni Trisha, pero nakuha pa nitong makalipad at makatakas kay Odessa dahil sa pagtutok ng baril sa kanya ni Randy. Nawalan ng malay si Randy dahil na rin sa mga sugat na natamo kay Trisha.
Nakatakas si Trisha at nakarating sa mansion ng kanilang pinuno na si Claudius. Doon ay namatay si Trisha sa kandungan ng kanyang ina.
Nagising si Randy sa munting dampa ni tandang Ursula, ang huling babaylan sa kagubatan ng Alaya. Ang kagubatang binabantayan ni Laurea o si Mariang Sinukuan. Dito ay nakilala niya ang diwata at nagkalapit ang loob ng dalawa.
Sa pagbilog ng pulang buwan ay nakaramdam ng kakaibang lakas ang mga anak ng buwan at napapadalas na ang pag-atake nila sa mga tao.
Sa mansion ni Caudius ay tinipon niyang lahat ang mga elders o mga nakatatandang lider ng mga iba't-ibang angkan mula sa mga anak ng buwan. Pinag-usapan ang plano nilang sakupin ang Pilipinas kasabay ang paglusob din ng mga anak ng buwan sa iba't-ibang panig ng mundo.
Lahat ay sumang-ayon sa kanyang nais maliban kay Demetria. Sa pagkakataong iyon ay nagkaroon ng dahilan si Claudius na pagbintangan si Demetria na taksil sa samahan at ipinapiit siya sa basement ng mansion.
Samantala sa lungsod ng Angeles ay hinihintay ni Calisha ang kanyang kaibigang si Maro para tulungan ito sa kanyang ginagawang thesis. Si Maro at Odessa ay iisa.
Hindi nakarating si Odessa sa kanilang usapan kaya nagdesisyon na lamang na umuwi na lamang ito. Sa kanyang paglalakad ay napansin niyang may isang lalake ang sumusunod sa kanya at minabuting bilisan ng kanyang paglalakad.
Tama nga ang kanyang hinala, sinusundan nga siya ng misteryosong lalaki. Sa tulong ng mga tao sa pamilihan ay nailigaw niya ang lalaki at hindi na siya nasundan nito. Papauwi na sana siya ng matanggap ni Calisha ang text ng kanyang madrasta para ibili ng gamot ang kanyang ama. Pumasok muna siya sa isang mall para bumili ng gamot.
Nang makabili na ay lalabas na sana siya sa mall para umuwi, nang biglang bumuhos ang malakas na ulan at minabuti na munang bumili ng aklat sa isang bookstore at basahin ito habang hinihintay na tumila ang ulan. Ngunit sa kanyang pagbabasa ay di na niya namalayan na magsasara na pala ang mall at nagmadali itong lumabas para makauwi.
Hindi pa rin tinantanan ng kamalasan si Calisha sa kanyang pag-uwi dahil may balak na masama sa kanya ang isang tricycle driver. Natakasan niya ang ang driver pero naghihintay pala kay Calisha si Cornelius, isa sa mga angkan ng matatandang lahi ng mga bampira.
Doon ay nakatagpo niya si Maro ang kanyang kaibigan at iniligtas siya nito sa bampira. Pero nalagay sa kapahamakan ang buhay ni Odessa sa matandang bampira, na iniligtas naman sila ni Laurea.
Nilisan nila ang lugar para tumakas at makabalik na sa bahay ni Laurea sa kabundukan ng Alaya.
Pero dinagit ng matandang bampira si Odessa at dinala sa bunganga ng nangangalit na bulkang Pinatubo.
Pinakiusapan ni Sagaway ang Malakat na si Alimog para iligtas si Odessa na kanya namang naisagawa.
Sa kabundukan ng Alaya nagkatagpo-tagpo sina Odessa, Laurea, Randy at Calisha. Nalagay sa alanganin ang buhay ni Randy ng bumukas ang malalim na sugat nito sa tiyan at halos maubusan ng dugo. Sa tulong ng dugo ni Odessa ay gumaling ang sugat nito.
Hindi nila inaasahan ang paglusob ng napakaraming mga lamang-lupa sa tahanan ni Laurea. Halos hindi maubos-ubos sa dami ang mga ito nang pigilan sila nina Laurea, Odessa at Sagaway.
Ginamit ni Laurea ang kanyang buong lakas at kapangyarihan ng mapansin niyang hindi na nila mapipigilan pa sa pagdami ang mga lumulusob na mga lamang-lupa. Isang napakalaking pagsabog ang kumitil sa buhay ng mga lumulusob na lamang-lupa.
Naging masama kay Laurea ang labis na paggamit sa kanyang kapangyarihan kaya nasa panganib ang buhay nito. Tanging ang nektar ng bulaklak ng Myrho ang makakapagpapagaling kay Laurea na kailangang hanapin pa sa kabundukang sakop ni Apo Mayari.
Samantala tuluyan ng lumusob ang mga anak ng buwan sa iba't-ibang bansa sa buong mundo. Marami ang namatay at karamihan sa mga lungsod at mga bansa ay bumagsak sa kamay ng mga nilalang ng kadiliman.
Nagsimulang naglakbay sina Randy at Odessa para hanapin at kumuha ng pulang nektar ng Myrho para sa ikagagaling ni Laurea. Hindi nila inaasahang makita roon si Demetria habang inaatake siya ng tatlong mandirigmang Sarangay.
Hindi nagdalawang -isip na tumulong si Odessa. Ngunit malalakas ang mga Sarangay kaya nanganib ang buhay ng dalawang babae.
Dahil sa kagustuhang mailigtas ang kasintahan ay hinawakan ni Randy ang Eskrihala. At dahil sa pangyayaring iyon ay nadiskubre nila na nasa katauhan ni Randy ang kaluluwa ni Banaual, ang bunsong anak ni Bathala sa isang mortal na babae.
Naging palaisipan kay Randy ang tungkol kay Banaual, ang tunay na nagmamay-ari sa Eskrihala.
Si Demetria ang naging susi sa mga alaala ni Odessa tungkol sa kanyang nakaraan. Ngunit walang lakas ng loob si Odessa na harapin ang kanyang nakaraan.
Patuloy sa pagsalakay ang mga anak ng buwan sa mundo ng mga tao. Marami ang naulila at nawalan ng mga mahal sa buhay. Mabilis na bumaba ang bilang ng mga tao sa mundo.
Nang marating nina Odessa, Demetria at Randy ang bulkang Pinatubo ay kaagad nilang nakita ang kanilang hinahanap. Ang halamang Myrho ay nakatanim mismo sa ulo ng dambuhalang ibon na tinatawag na Minokawa.
Dumaan sa butas ng karayom ang pakikipaglaban sa Minokawa. Pero lalong nakilala ni Randy ang katauhan ni Banaual sa kanya. Sa pagsanib ng kapangyarihan nina Odessa at Randy madali nilang natalo ang Minokawa.
Sa pagdating nina Claudius at Impong Sendang ay muntikan na silang nagapi ng dalawa. Sa pagsasakripisyo ni Calisha ay nailigtas ang buhay nina Odessa, Randy, Demetria, Sagaway at Alimog.
Masakit para kay Odessa ang pagkamatay ng kaibigan niyang si Calisha. Dahil sa galit at sa inaakalang bihag ni Claudius si Laurea ay nagdesisyon siya na lusubin si Claudius para sagipin si Laurea.
Sa kanilang paglusob ay nakita nila ang kalunos-lunos na kinahinatnan ng mga lungsod at pamayanan sa paglusob ng mga anak ng buwan sa mundo ng mga tao.
Pagdating nila sa paanan ng mansion ni Claudius ay sinalubong sila ng mga anak ng buwan. Hindi na tinatablan ng sikat ng araw ang mga ito dahil na rin sa epekto ng pulang likido na galing sa nektar ng Myrho.
Naging mahirap kina Odessa ang pakikipaglaban sa mga anak ng buwan lalo na't malaya nang gumalaw ang mga ito sa sikat ng araw.
Nagkasagupa ang mag-amang Claudius at Demetria. Pilit na ipinapakilala ni Claudius ang sarili niya kay Demetria bilang kanyang ama, ngunit hindi ito tinanggap ni Demetria.
Dumating si Morgana para ipakiusap na huwag patayin ni Claudius ang anak niyang si Demetria pero napagbalingan siya ng galit ng lalaking Sangre kaya napahamak si Morgana sa kamay ng dating kaibigan.
Sa loob ng mansion ay muling binuhay ni Impong Sendang ang pinagmulan ng lahat ng kaguluan sa pagitan ng mga aswang at tao, si Anilaokan.
Naagaw ni Claudius ang kalahati ng Eskrihala. Pero taliwas sa kanyang inaasahan ay biglang nagliyab ang buong katawan nito at nahulog sa mayayabong na puno sa paligid ng mansiyon na kung saan naglaho siya na parang bula.
Hinanap ni Odessa si Claudius sa mansion at sinubukan rin hanapin si Laurea sa loob nito, pero hindi nila nahanap ang kanilang mga pakay. Bagkus ay nakasagupa nila ang mga Sarangay.
Sa kanilang paghahanap ay labis silang nasorpresa ng makita nilang buhay si Anilaokan kasama si Impong Sendang. Sa tabi nila ay ang walang malay at nakalutang na si Laurea na akmang itatakas siya sa ng dalawang alagad ng dilim sa pamamagitan ng ginawang lagusan ng matandang Bruha.
Napatay ni Odessa si Impong Sendang, ngunit nakapasok na si Anilaokan at ang kanyang ate Laurea sa loob ng lagusan. Pilit na hinabol ni Odessa ang lagusan bago pa ito magsara at mahuli ang lahat.
Pero nang makapasok na si Odessa sa lagusan ay napunta siya sa isang maliit na isla sa gitna ng karagatan at wala siyang kaalam-alam kung saang lugar ito...