Isang babaeng nakaitim ang naglalakad sa kahabaan ng Pasig Cemetery. Tila ba siya ay may kung anong hinahanap ditong puntod. Isang puntod na tila ba sa kanya ay napakahalaga. Habang naglalakad sa naturang sementeryo ay napapatingin pa siya sa ibang mga nitso't puntod. Nabatid niyang ang karamihan sa mga puntod na ito ay nasa naturang sementeryo na n
oon pa mang panahon ng mga Kastila at Hapon. Sa pakiwari niya ay tila ba ang mga nakahimlay sa mga puntod na ito ay ang mga unang mamamayan ng Pasig. Napatingin din siya sa ilang mga mausoleum sa naturang sementeryo at labis siyang naaliw sa disenyo ng mga ito. Tila ba maihahalintulad ang mga mausoleum na ito sa mga gusali sa Ancient Rome o di kaya ay sa pamosong Taj Mahal na maituturing na pinakamagandang mausoleum sa buong mundo. Sa isip niya ay kay sarap pagmasdan ng mga mausoleum na ito na para bang isang architectural wonder, pero para sa mga kamag-anak ng mga nakahimlay sa mausoleum na ito ay tila isang masakit na alaala ang hatid sa kanila ng gusaling ito na tila sumisimbolo sa kinahahantungan ng mga natatapos ng buhay sa mundong ibabaw.
Sandaling natigilan sa paglalakad ang babae at tila ba naguguluhang napalinga-linga sa paligid.
"Saan dito? Naliligaw na yata ako ha!", ang tila natatarantang nasabi ng babae.
Sa gitna ng tila kalituhang ito ng babae ay labis siyang nagulat nang may bigla na lamang dumapong paru-paro sa kanyang balikat. Mula sa pagdapo ng paru-paro sa balikat ng babae ay bigla itong lumipad sa pakaliwang direksiyon. Hindi man maintindihan ng babae, pero sinundan niya ang direksiyong tinatahak ng lumilipad-lipad na paru-paro. Tila ba may kung anong kaliwanagan siyang matatagpuan sa direksiyong tinatahak ng lumilipad-lipad na paru-paro. Ilang sandali pa ng pagsunod ng babae sa lumilipad na paru-paro ay nakarating siya sa isang magarang puntod na nasa lugar sa sementeryo kung saan ay puro mga de-kenedi ang mga nitsong naririto. Sa pagdating ng babae sa puntod na ito ay natigilan siya at bigla ay tumulo ang mga luha mula sa kanyang mga mata. At bigla ay may kung ano siyang nagunita. Isang tila kahapong may kakaibang lungkot at pighating dala sa kanyang damdamin...