بسْمِ اللَّـهِ الرَّحْمَـٰنِ الرَّحِيمِ
إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا 🤎
# مملـوك_قَلبــي
بقلمـي : الكاتـبة فاطمة الروح
لا تنسـون التصويـت + التعليـق بيـن المشاهـد + متابعـة الحسـاب فضـلاً وليـس امـراً + كتابة تاريخ بداية قراءة القصة
•❅──────✧❅✦❅✧──────❅•
الكاتبــة : - فاطمــة الـروح
•❅──────✧❅✦❅✧──────❅•
هدى ضليت على نفس روتيني بين المدرسه والبيت وباوع كوشي وارناف
بس كلام ماما براسي وحيل خايفه منه ... رهوفه اشوفها مرات لو ياخذها ابوها لو اشوفها ويه عمها السياره ... يوم جنت كاعده اقرأ وماما تصلي من كملت صلاة اندارت عليّ
نجاة : اليوم حجيت ويه جوارينا على المدرسه والدراسه بهل حجي كالت بيت أبو يوسف عدهم بنيه ادرس بنات الإعدادية
هدى : أي يمه روحيلها بلكي وتقبل ادرسني
نجاة : هسه أكمل العشه واروحلهم بس خل يجي ابوج واكله
هدى : خوش ماما ...... شويه صار عندي أمل أخلص من المدرسه واروح كليه ولا زواج بيت عم ولا بيت خال
كملنه العشه واجه بابا وحجت وياه ماما ما عارض بس كلها اخذي هدى وياج يجوز ما تعجها طريقتها ... كمت لبست شالي وعباتي وجواريبي طلعت لكيت ماما هم تلف بحجابها ... رحنا كتلها وينها كالت قبل نهاية الفرع ... وصلنا الباب دكت ماما الجرس ضلينا واكفين جان تطفه للكهرباء
نجاة : ما شاء الله رجلنه خضره
هدى : ابتسمت .... سمعت صوت واحد جاي بتجاه الباب ويه ما انفتح الباب اجتي الكهرباء
سيف : اللهم صلي على محمد وآل محمد
هدى : اني مبتسمه بعدني على كلام ماما ونوب صدمة شوفته وهوه يباوع عليّ وصلى على محمد
نجاة : السلام عليكم
سيف : وعليكم السلام هلا خاله
هدى : بسرعه دنگ رأسه وسلم على ماما
نجاة : هلا بيك
سيف : تفضلوا
نجاة : زاد فضلك يمه رايدين حنين
سيف : صار خاله هسه اصيحها تفضلوا بالاستقبال
هدى : بعد عينه ما رفعها ابد أحب الرجال المحترم هاي تنحسب إله
إلي يشوفه هسه ما يشوفه قبل أيام يعيط عليّ بالشارع دقيقة ودخلت علينه بنيه يطلع عمرها 25 / 26 سنه
حنين : أهلاً وسهلاً نورتونا
نجاة : نورج هذا حبيبتي
حنين : شلونها البنوته الحلوه
هدى : الحمدلله
نجاة : شلونج الوالده شلونها
حنين : بخير الحمدلله بس بعد تعرفين الي يكبر يتعب
نجاة : احنه بزرها تعبانين
حنين : أي والله شنسوي الحمدلله
نجاة : يمه حنين ما اريد أخذ من وقتج بس سمعت من الجوارين ادرسين طالبات
حنين : أي خاله صح
نجاة : بنتي صف خامس علمي
حنين : يا ماده تريدون
نجاة : إنكليزي هيه بقية المواد كلش زينه بس الإنكليزي شويه صعب عليها
حنين : أن شاء الله خير
نجاة : خوش يمه احنه نترخص بعد
حنين : شسالفه خاله بعد وكت وكلشي ما قدمتلكم
نجاة : سالم البيت وراعيه شنو جاي نجربكم
حنين : شكد عيب لا خاله فدوه عاد لو بس مي انتظري
نجاة : لا والله يمه هم مناك الولد عفتهم
هدى : شويه سولفن بالباب هاي لازم واني مشتوله واكفه انتظرهن يكملن هل سالفه الي ما تخلص ... لمهم اتفقنا على الفلوس وطلعت مناسبه والوقت كل يوم وره صلاة المغرب ... طلعنه من بيتهم وابنهم جان واكف بالباب منتجي ويخابر.... دنكت راسي ومشيت..... وصلنه بيتنا وبين ترتيب البيت والهوسه مال المطبخ كملت ويه ماما الشغل وراها باوعت العشق كوشي وارناف أحب علاقتهم وراها دخلت سبحت وبسرعه على غرفتي
كعدت كملت كم شغله بعدها بسرعه للفراش جان بداية شتاء الجو بي بروده حسيت استبردت من سبحت نمت واني ارجف ............ كعدت ويه صلاة الصبح صايره مي وجسمي متكسر ما اكدر اكوم ردت بس اكوم اغسل بلكي اصحه ابد ما كدرت
همزين ثاني يوم الجمعة لو دوام جان غبت
ضليت يومين نفس حالي شكد أكره من اتمرض أصير نحسه وأتمنى بس ابجي ... يوم الأحد بلكوه رحت ولو مو امتحان فلا اروح
راجعه بالطريق جان اشوف رهف لوحدها من شافتني اجتي تركض عليه اني حيل تعبانه ابتسمتلها لزمت ايدي
رهف : هلو هدى
هدى : هلو رهوفه
رهف : ليش تبجين
هدى : لا ما باجيه
رهف : عيونج حمر
هدى : مريضه
رهف : هااا يله خل امج تشربج دوه
هدى : ميخالف
رهف : لا تضربين ابره توجع وتبجين
هدى : هههه ميخالف بس أشرب دوه ...... جاي نمشي ونسولف جان سياره من سيارات الخطوط فأتت من عدنه بس كلش قريبه وسريعه بسرعه بعدت رهف من الشارع
رهف : كلش خفت يمه
هدى : لا حبيبتي ماكو شي لا تخافين يروحلج فدوه ....... مشينه خطوتين جان تنسحب أيد رهف مني
سيف : انتي صاحيه لو بيج شي البنيه رادت تنسحگ وين بالج
هدى : لا تعيط مو صوجي روح على أبو السياره
سيف : اي صدك أبو السياره گلج أمشي بنص الشارع
هدى : مالي خلگ اداهر وياه هديت أيد رهف ومشيت بس درت وجهي كلت ... شگد شايف نفسه أبو خشم اليابس ...
.
.
.
وصلت بيتنا لكيت ماما تنظف خطيه انقهر عليها بس والله حيل تعبانه هم بس غيرت ملابسي بسرعه للنوم........ ما كعدت غير دنيا العصر
نزلت بابا جاي وخواني كاعدين ياكلون
نجاة : هااا يمه كعدتي
مسلم : لا تمشي بالحلم
نجاة : خطيه مريضه
عقيل : اشو احنه من نتمرض حته محد يگلبنا
نجاة : أي خطيه نشمركم بالشارع
مسلم : والله آخر مره سويتيلي كمادات يمكن بالأول متوسط
عقيل : وهسه بگد الثور
هدى : باوعت عليهم يرادلهم خلگ واني تعبانه ... عفتهم ورحت خليتلي أكل وكعدت اكلت شويه وشربت علاجي
نجاة : البنيه خابرت عليه تسأل عليج
هدى : منو
نجاة : حنين
هدى : هسه أصلي واروح
نجاة : خوش
هدى : رحت ساعه محاضره استفاديت منها وسالتها على كم شغله بالماده شكد تفهم
..
.
ضليت أسبوعين أروح لحنين و عم رهف بعد ما شفته أبد من آخر مره بالشارع ... عرفت على بنات هم يدرسون يم حنين بس محاضرتهم قبلي لأن سادس ... يوم گاعده بالاستقبال انتظر حنين سمعت صوته بالطرمه
صوته حلو عكس اسلوبه ، جان تنفتح الباب ودخلت رهف هوه واكف مقابيل الباب صارت عيني بعينه جان يبتسملي إني نزلت عيني
ما أريد شي يدخل گلبي إني ما جاهزه هسه غير بس للدراسه حتى لا أبوي ولا عمامي يفتحون موضوع الارتباط ... ويه دخلت حنين انقطعت سلسلة افكاري ورجعت للواقع قريت إني وحنين بس اليوم عكس كل يوم حسيت حنين تعبانه
هدى : حنين إذا اليوم تعبانه نعوفها نكمل بأجر
حنين : لا ما تعبانه من الدراسه
هدى : لا والله ميخالف يجوز مالج خلگ
حنين : مو بس مالي خلگ روحي جاي تطلع
هدى : سلامة روحج حبيبتي كولي يا الله
حنين : ونعم بالله بس بنادم عنده طاقة تحمل
هدى :رب العالمين يكول بكتابه ﴿ لاَ يُكَلّفُ الله نَفْساً إلاَ وُسْعَهَا ﴾
رب العالمين مينطي عبده أكثر مـن طاقـتة صح نشوف كـل شيء فوق طاقتنا بس يعني نكدر مـو منكدر يعني رب العالمين يعرف هذا الشيء هـوا ع كد طاقتنا ويمكـن طاقتنا تستوعب أكثـر بعد فـ خليها هل آيـة دائماً ابالج بوقت الشدة كـل مايصعب عليج آمـر كولي ﷲ مينطي أكبر من طاقتي إللي ميكلفني بشيء إلا وهـوا يعرف أني أكدر أسوي بس الآمـر يتطلب جهـد ، تعب ، صبر ، إرادة ، ثقـة باللّٰه وبالنفس ، أنتي مريتي بشيء متعب وﷲ مينسى هل التعب والحزن والكسران وأنتي بعين إللي خلقج وهـوا لطيف بـ عبادة ورحيم ويحب عبادة ويحب من تتجهين اله وتطلبين مـنه حاشاه رب العالمين أن يرد عبده إلا وأن كان يعرف هل شي مينفعه ومـؤذي إله خلي آملج بـ ﷲ أقوى مـن كل شيء
حنين : شكد حلو كلامج
هدى : ويصير حلو من نطبق هل شي لا تضوجين ميخالف كل شده والها وقت تنحل
حنين : برغم عمرج صغير بس عاقله وأحس عقلج أكبر من عمرج
هدى : شكراً
حنين : اتمنه لو عندي اخت صغيره مثلج
هدى : اعتبريني اختج وإني هم اتمنه عندي
أخت جبيره
حنين : يا حبيبتي اتشرف بيج يله اخذي رقمي من امج وراسليني
هدى : ميخالف
حنين : يله نرجع للدراسه
.
.
.
.
.
.
صرت كلما اروح لحنين لو اشوفه بالباب لو هوه يفتحلي الباب ، ابد ما تعده حدوده وياي بس حاسه بي لو يبتسملي لو من يفتح الباب عيني تصير بعينه أحس بيهن عيونه بيها لمعه
بس اني ابد شعره وحده ما هتزت بيه ...ضل هل وضع شهر حته من نرجع اني ورهف يريد بس يفتح موضوع وياي اني بسرعه أسلم على رهف وانسحب ما أريد اعلگ روحي ولا انطي أمل ابد وخاصه كلشي ما اعرف عنه يجوز يلعب على بنات العالم يجوز عنده غيري 10 ويجوز مرتبط بس يحب يتسله ويجوز متزوج اني غير عم رهف كلشي ما اعرف حته اسمه ما اعرفه ... فد يوم جاي اقرأ اني وحنين اجتي رهف تلعب يمنه شويه وراحت .... وهم رجعت كعدت يمي ضلت تلعب بكتبي جان تأخذ كتاب الإنكليزي واني جاي اقرأ ويه حنين ما انتبهتلها
عاد حنين سالتني على فد موضوع .... اباوع ماكو الكتاب
هدى : الكتاب ماكو بس لا نسيته بالبيت
حنين : لا يمعوده هنا جان
هدى : ماكو جااا وين راح .... بس لا رهف اخذته
حنين : يله خليج تكملين هل مسأله ورجع
هدى : تمام .. .......... شويه ورجعت بيدها الكتاب
حنين : هنا لكيته مخليته على دراجة سيف
هدى : عرفت اسمه سيف لأن كم مره اجه على دراجه وأخذ رهف
كملت محاضرتي ورجعت بين ما اكلت وكملت واجباتي صارت بــ 12 بليل جاي انام سويت الجدول مال باجر وسويت المنبه بالسته حته اكعد اراجع نمت واني بالي يم الإنكليزي ........
كعدت من وقت صليت ولبست ملابس المدرسه وكعدت اراجع واني اقرأ انتبهت بين الأسطر اكو رقم موبايل مكتوب وبالسطر الثاني مكتوب رقم أبو خشم اليابس
مرتين فتحت عيني وسديتها حته استوعبها
شلون فتح كتابي وكتب رقمه؟
وشلون سمعني من كلت أبو خشم اليابس
بسرعه كتبته بموبايلي وكتب على الرقم حنين 2 ... ته اعرفه ولا أحد يشك بي ... وبس أرجع من المدرسه اخابره وارزله شعباله بنات الناس لعبه لو هيج رخيصات .... فور دمي من الصبح تمنيت لو يصير أخذ الموبايل وياي جان خابرته واني بالطريق ... رحت المدرسه واني متحلفه إذا شفته بالشارع راح احجي وياه وإذا ما شفته بس أرجع اخابره ضلت الشغله براسي
حليت من المدرسه بس ما شفته اجه ابوها لرهف أخذها ... رجعت للبيت غيرت ملابسي وتغديت انوب صعدت لغرفتي رحت لموبايلي مطلعه الرقم وجاي أحضر كلام حته احجي وياه مره مرتين حجيته ويه نفسي
انوب صفنت كلت هوه من كتب الرقم جانت غايته اخابره ... والله إله اخليها عله بگلبك وما اخابرك ضل هيج ... تركت الموضوع ونسيته من اساسه كلت هذا فارغ واني المصايب تركض وراي خليني حايره بنفسي
كمت من اريد اروحلهم اخابر حنين أكلها راح اجي افتحيلي الباب وهيج كمت قليل اشوفه ومن بعيد ... فد مره جنت طالعه من بيتهم وهيه هاي المره إلي منها حسيته دخل گلبي
طلعت من الباب وهوه خله أيده يقطع طريقي
وحجه بسرعه وخوف
سيف : ادخلي اكو عركه بالفرع بعدين روحي خاف يرمون
هدى : بدون أي كلمه رجعت دخلت يمهم شافتني حنين اجتي عليه
حنين : هاااا هدى ليش رجعتي خوفتيني
هدى : اكو عركه بالشارع
حنين : يله ادخلي خل تفض وروحي
هدى : لا هسه راح اخابر على أخوي
حنين : براحتج
هدى : خابرت على عقيل يدك وما يجاوب رجعت خابرت على ماما جاوبتني
نجاة : هااا يمه
هدى : ماما دزيلي عقيل ياخذني خاف مسلم بعده مريض
نجاة : احنه بالمستشفى تخربط وره ما طلعتي فد نص ساعه ونرجع
هدى : شلون أريد أرجع للبيت واكو عركه بالشارع
نجاة : خل تفض وروحي تلكين المفتاح يم سنادين الورد
هدى : خوش ماما ........ شويه وصار رمي
حنين : ربي برداً وسلاماً
هدى : امين ........ يمه متت خوف ...... شويه وسمعت صار هدوء كمت جاي اطلع
حنين : انتظري لحد ما يرجعون اهلج
هدى : لا أرجع أحسن
حنين : لعد اوكفي أصيح سيف يوصلج
هدى : لا والله مالها داعي
حنين : هاي شبيج اوكفي
هدى : لا والله ميحتاج هذا بيتنا بسرعه امشي واوصل ..... يله مع السلامه
طلعت امشي ... شويه وحسيت واحد وراي ارتبكت حيل على خفت
سيف : لا تخافين هذا اني
هدى : راح الخوف بس ضليت مرتبكه يمشي وراي بمسافه من وصلت الباب بدون ما التفت ولا شفته فتحت الباب ودخلت لبيتنا وبسرعه أخذت المفتاح فتحت باب الاستقبال ودخلت ورجعت قفلته واني خايفه والهث مدري شبيه ضليت اباوع من وره البرده ماكو شي
كعدت ورتاحيت شويه كلت ليش من حسيت بيه هوه يمي امنت كاعده على القنفه ومبتسمه لحد ما رجعوا أهلي اني مثل المخبله مبتسمه
.
.
.
.
بيوم من الأيام جان الجو بارد البروده بالعظم حته الشمس طالعه بس ضوء ماكو حراره راجعه اني من الادوام ما شفت رهف ممداومه
كملت طريقي لبيتنا دخلت شارعنا واشوف هوسه مال زلم يم بيتهم ، كلت يجوز نفس العركه مال جوارينهم كملت طريقي صادف يوم خميس للمغرب رحتلهم علمود الدرس هم اكو شباب بالباب بس مو هواي من شافوني جايه بتجاه البيت بعدو عن طريقي دخلت واحد من الولد صاح بنيه اسمها زهور
هدى : السلام عليكم
زهور : وعليكم السلام
هدى : جايه على حنين
زهور : هااا انتي وحده من البنات الي تدرس عدها
هدى : أي
زهور : أهلاً وسهلاً.... والله حنين بالمستشفى
.
.
.
.
#مملـوك_قَلبـي
بقلمـي : الكاتـبة فاطمة الروح
لا تنسـون التصويت والتعليق . . .