﷽
"جـرائـم لا تغتفـر"
بقلمي الكاتبة فيروز
لا تنسون التصويت + التعليق بين الفقرات
وتابعوا حسابي الواتباد حلوينـي ♥️..
تنبيـــه❗
كل الحقوق محفوظه لا احلل النسخ والاقتباس.
═══════ ✧ ═══════
" البدايـة 2025/2/2 "
المرأة صامتة
والظلم حاضر
العادات قاسية
والقلب مثقل
الصوت خافت
والأمل مكسور
كان عالمهم ضيقًا لكنه آمنًا
أحلامهم بسيطة وقلوبهم نقية.
ثـم جـاءت ليلة !
ليلة صعبة وفاجعة صامتة
ظلّها ثقيل وأثرها دم
اهتزّت القلوب والأيام تبدلت
ومن بعد تلك الليلة
لم يبقَ شيء كما كان
تغيّرت الوجوه
وانكسرت الأرواح
وسلكوا دروبًا لم يختاروها
أصبحت متاجرتهم بلا حياء
أموالهم ملطخة وأياديهم قذرة
لم يولدوا وحوشًا
لكن الفاجعة ربّتهم
والظلم علّمهم
يشبهون ما يكرهون
﹡﹡﹡﹡﹡
⊰ مشاهـــد ⊱
مشهد ‹ 1 › 🕊
فتحت الباب شفتو ساند راسو على الحايط مغمض عيونو ويبكي بتعب، مسحت دموعي وقعدت على ركبي قدامو، دحكلي وتقرب خله راسو بحضني يبكي مثل الطفل وانا ما قدرت الزم دموعي واطلقت عنانهن
لزم أديه يقبلهن ويردد
-اسف والله اسف ما ادري شلون سويت هيچ بس والله انجبرت والله انجبرت ما ردت أذيچ وروح الراحت غدر ما ردت اسوي هيچ بس همه چذبو عليه والله چذبو عليه.
كتمت شهقتي وهمستلو بصوت مبحوح..
-ليل.
-ندبات روحه الما اظنها اطيب.
-اخذت علاجك؟
-لا اريدچ تلعبين بشعري اريد انامم عيوني يوجعني بس انام شويه.
مسحت دموعي بكتفي ومديت أيدي العب بشعرو وهوه مستمر ابكائو ويهمسلي
-سامحيني والله ما مرتاح اندارلچ فدوه سامحيني.
-يكفي ليل سكر الموضوع لاا تذكرني بهديك الليلة لاا تذكرنيي.
بكيت بصوت عالي واني اتذكر مقطتفات من هديك الليلة اللعينه السلبو من عدنا حياتنا، نزلت عيني عليَّ بعدو على وضعو ويبكي بحضني، حطيت أيدي على راسو وهمستلو..
-قوم نروح الغرفتك لا تبقى هنا يلا قوم.
جاوبني بشهقه طلعت من نص روحو
-ندمــان وحگ كـل شريـان بأيدي گطعته.
ــــــــــــــــــــــــــــــــــــــ
مشهد ‹ 2 › 🕊
-ابوس ايدك، الله عليك احچي وياهم اقنعهم اني غيره ماا اريييد، احبه والله احبه احچي وياهم واقنعهم بزواجنه فدوه اروحلك.
-ولچ شحچي وياهم؟ انتِ مقتنعه بكلامچ؟ انسيه باباا انسيه مثل ما دخلتيه الگلبچ طلعيه، تدرين هذا التحبينه ابن منو لو ماا تدرييين؟! ولچ قبل سنين بحـر دم صار بين العائلتين سنين واحنه نحاول نسد الثار وهسه بهذا زواجكم تصير مجزرة.
لطمت على وجهي وصحت بصوت مكتوم
-واحنه شنو ذنبنه بثارهم؟ كفرنه من حبينه بعض خوب ما كفرنه!
-اي كفرتو بالنسبه الهم حبكم حرام وجريمة تتحاسبون عليها.
ــــــــــــــــــــــــــــــــــــــ
مشهـد ‹ 3 › 🕊
تنفسه صار سريع وكل شويه يغمض عيونه وبعد دقيقه يرجع يفتحهن كأنو يفقد ويرجع الوعيه، گمت بسرعه ادور على وصله اضفط بيها على جرحه لان العندي نملت دم جرحه عميق، دخلت للغرفه باوعت بأرجئها لگيت دوشگ وعليه جرجف اخذته بسرعه وطلعت للصاله شفته مثل وضعه
اباوع للباب ما مطبوگ عدل رحت بسرعه اطبگه اخاف يدخلون علينه، حاولت مره ومرتين اطبگه بس ما ينطبگ الكيلون خربان، نزلت دموعي بعجز ما عندي حل غير اخذه للغرفه واطبگ الباب بس المشكلة هوه ثگيل وين اگدرله؟ رحت گعدت گدامه ضغطت على جرحه اوقف النزيف وهمستله بخفوت..
-تگدر تدخل الهاي الغرفه؟
اشرتله عليها وهوه باوعلها، نفه براسه وجاوبني بصوت متألم
-ما اگدر اتحرك.
-اني اسندك بس ساعدني وگوم.
نفه براسه اكثر من مره وهوه متوجع، دار وجهه على الجهه الثاني وصاح بوجع
-ااااااخخ ياا يممممة.
نزلت دموعي عاجزه اساعده واخفف من الوجع اليحس بيه، بقيت گاعده يمه امسح على راسه ودموعي تنزل على حاله الحد ما فزيت على صوت حركة يم الباب واني كتمت النفس....
ـــــــــــــــــــــــــــــ
مشهد ‹ 4 › 🕊
"والناس الردتهم نسو من سنين
أسمك والمحطة وخلو دموعك نهر
لا بد يردون باچر سوي نفسك ما شفتهم
بالك يحسون انتَ تذكرتهم اثگل شويه يگلبي
مره خليهم محطة وانتَ سافر
انتَ والدخان صبرك والمطر
ادري بيك تريد تبچي
ابچي وحدك انه ساكت"
الشعر تكرر الف مره وصوت الموبايل عالي نرفزني، قمت من مكاني وصعدت فوق شفت باب غرفتو مسكر وفي فتحه صغيره، صار الصوت واضح اكثر والشعر نعاد من جديد
تقدمت كم خطوه الى أن صرت قدام الباب كنت متردده افتحو خايفه منو كثير ما اريد اشوف وجهو واحتك فيه، بلعت ريقي واخذت نفس عميق وزفرتو أهدء نفسي..
-تمام بس احكي معاه ينصي الصوت واطلع بسرعة.
تشجعت ومديت أيدي ادفع الباب حتى ادخل وريتني ما فتحتو وشفت (...) راسو معلق بالحبل بالسقف ورجليه مرفوعات عن الارض وعيونو مفتوحات شويــه لكن وجهو صاير ازرق.....
ـــــــــــــــــــــــــــــ
مشهد ‹ 5 › 🕊
اول ما فتحت الباب صار گدامي ممر صغير على اليمين اكو جزامة احذيه وعلى اليسار ميز تواليت صغير عليه فرشة شعر وسيروم بس كلهن قديمات والمكان كله تراب مبين البيت متروك من سنوات
كملت طريقي وصار گدامي صاله حجمها وسط جهة بيها قنفات وجهة بيها ميز طعام وبنص الصاله مفروش سجاده دائريه بس من التراب العليها ما مبين شكلها
رغم استغرابي كملت طريقي وصار على يميني باب فتحته وشفت غرفة نوم والسرير مفروش بس الفراش هوسه زاد استغرابي اكثر واكثر لان البيت شكله مهجور مو مال منتقلين البيت جديد لان الاثاث والفراش والملابس كلهن موجودات بهذا البيت!!
طلعت من الغرفه وسديت الباب درت وجهي اريد اطلع بس صار گدامي درج من خشب رحت صعدت وما انكر خوفي بس فضولي چان اكبر من خوفي وخلاني اكمل استكشافي الهذا البيت الغريب !
كملت طريقي وصعدت فوگ چان ناصي اكثر من الجوه شفت بابين واحد بصف الثاني فتحت واحد منهن واني اباوع بأرجاء الغرفه عباره عن سرير اولاد وكتب مبعثره على طول الغرفه
سديت الباب ودخلت للغرفه الثانيه چانت غرفه بناتيه من السرير البيها والالعاب الموجوده بيها العاب بنات مال باربي، بقيت اگلب بالغراض الموجوده كلهن قديمات
تنهدت بحيره وطلعت اريد انزل بس جذبني باب صاير بالزاويه، رحت فتحته عبالي هم غرفه بس شهگت بخوف من المنظر الشفته ! چان حمام والمغسله يابس عليها دم!!!
سديت الباب بخوف ونزلت الدرج اريد اطلع من البيت، نزيت بخوف على صوت رنة تلفوني، طلعته من جيب الكوت شفته يتصل عليه يا ربي شسوي
صرت اكل بأظافري شلون اجاوبه اذا عرف اني هنا راح يعصب لان حذرني ما ادخل وانتظره يرجع، رفضت الاتصال وكتبتله رساله..
-"انا بالبيت تعال اخذني"
دزيتها وسديت التلفون حتى ما شفت شنو دز اعرف عصب وما قبل بتصرفي بس شسوي الله خلقني فضوليه مو بيدي، رجع اتص مره ومرتين بس ما جاوبته خفت يصيح بوجهي واني اموت ولا واحد يصيح بوجهي انهضم حيل
گمت من مكاني عدلت ملابسي حتى اطلع اتانيه بره بس شفت بعد مكان ما دخلتله توني انتبهتله، صرت اباوعله واباوع للباب اروح اشوفه لو اطلع؟ يلا هوه اني بالحالتين مترزله خليني اروي فضولي بالكامل
رحت اله بس الباب چان من خشب وسحب مو دفع، فتحت الباب چان ظلمه ما لايحه ضوه الشمس، شفت نقاط يم الباب دستهن وشغلت الاضويه اباوع للمكان چان مثل الهول
نزلت عيني للگاع وفتحتهن على كبرهن من شفت السجاده الفروشه كلها دم يابس وحتى القنفات متلطخات بالدم
اباوع للحياطين بيهن شخابيط وكتابه بخط مال اطفال، التفتت وراي ورجعت تقدمت اباوع للكتابه اكثرهن شخابيط واكو كلمات بس ما فهمتهن بسبب الخط المعوق بس جذبتني كتابه بخطه هوه والله خطه..
"يعود المجرم دائماً الى مسرح الجريمه
ليجد نفسه هوه الضحيه"
احس اطرافي بردت من الكلام القريته
شيقصد؟ جريمة شنو؟ هذا الدم مال منو؟
درت وجهي على السجاده وحسيت برجفة أديه وتسارع دگات گلبي، احس عقلي وگف عجز شلون يفسر الشفته بهذا البيت !!!
واني صافنه على الدم شهگت بكل قوتي خايفه من حسيت أيد تجرني من متني...
﹡﹡﹡﹡﹡﹡﹡﹡﹡
⊰ مقتطفـات قصيــرة ⊱
مقتطف ‹ 1 › 🕊
قرب شفايفه الأذني وهمسلي
-شنو چان شعورچ من شفتيني لازم أيدها؟
ضغطت على ملابسي فاتحه عيوني امنع دموع تنزل، درت وجهي عنه ما اريد اباوعله بس هوه لزمني من حنچي ودار وجهي عليه مخلي عيونه بعيوني..
-مو احاچيچ!
دفعت أيده وجاوبته بكره
-ما أستغربت لان أيدك نگسه متعوده تلزم وتهد.
ــــــــــــــــــــــــــــــــــــــ
مقتطف ‹ 2 › 🕊
-ما تخطيتيه؟
-ههه تخطيته؟!! تدرين وصيته انحفرت بروحي قبل عقلي.
-وهي؟
-بوسيلي أيد امي وگليلها ابنچ يحبچ هواي وحتى لو متت تعالي الگبري لوليلي "دللول الولـد يبني دللول"
ــــــــــــــــــــــــــــــــــــــ
مقتطف ‹ 3 › 🕊
-حرام عليچ ارضعيه جوعان.
-گلتلك مااا اريــده وخره عني.
-ترا ابنچ شنو ما تردينه.
-مو ابني ابن حرام.
ــــــــــــــــــــــــــــــــــــــ
مقتطف ‹ 4 › 🕊
-شنو انه بالنسبه الك؟
قربني عليه اكثر وخله عيونه التاخذ گلبي بعيوني وجاوبني بنبره هادئه وحنونه
-انتِ السبع دقايق التبقى من عمري.
ــــــــــــــــــــــــــــــــــــــ
مقتطف ‹ 5 › 🕊
عيونه تركزت على الغتره الحاطتها على اكتافي، ابتسمت وگلتله
-لو ما صاحب هاي الغتره هسه اني ما واگفه گدامك.
ــــــــــــــــــــــــــــــــــــــ
مقتطف ‹ 6 › 🕊
لزمت أيده بأيدي الترجف وگلتله بشهگه
-روحـ... روحي اخذها مني والله روحي.
خليت راسي على صدره ابچي بكل حيلي وهوه لمني الحضنه وباسني براسي
-وغلاة دموعچ النزلت لاخذلچ روحه بس شويه صبر.
..
المرأة مُهملة
والكرامة مُنتهكة
ماضٍ مسموم
وعقول مشوّهة
الدم يُسكب
والجسد يُنهب
العادات سلاسل
والحُب جريمة
مدن مهجورة
وأرواح مسروقة
الأيادي مُقيدة
والطرق مفروضة
أين العدالة وأجرامهم مستباح !
الغلاف من أبداعــي 🙈
كل احداث الروايه اختصرتها بالمقدمه والوصف والغلاااف، بنات كل تفصيله بالغلاف ترمز الحدث مهم راح نعرفه بمرور الايام لذلك كل ما صفنتوا بيه كل ما اكتشفتوا حدث مهم 🤫🔥
احب اشوف تحليلاتكم على الغلاف
وتوقعاتكم للأحداث؟ 🌚♥️
وهسه اكتبولي رأيكم بالمقدمه والمشاهد والغلاف
وكلشي وكلاشي شاركوني بالتعليقات 🥹🤎
..
الصراحه الاحداث كلش هوااايي
وحرت يا مشهد ومقتطف اكتب
اختاريت هذني والمشاهد القويه
خليهن وي التنزيل افضل.
القصه أحداثها ضخمه وما مطروقه واشوف
استحقاقها هواي ومو لان اني كاتبتها بس
صدگوني ماكو شخص راح يقراها ويندم
فـ اتمنى كل مصممه تقراها تصمم الها 🫶
هاي المشاهد نقطه ببحر من الراح يجيلنا بالبارتات القادمه
فـ استعدوا للكثير والكثير من المصايب والبلاوي ☠️🔥
لطفاً علقو بيا تاريخ قريتو الروايه
لان التاريخ مهم يساعدني على ثبوت
حقوق الروايه.
حسابات غير الواتباد ما عندي من ابلش بالتنزيل
اسوي حسابات ونتناقش بالبارت لان الاحداث
جداً مشوقه وتستحق الانتظار.
تابعو حسابي الواتباد حتى يوصللكم
اشعار من انشر بارت Fairouzeh
• فيروز 🦋..