﴿بسم الله الرحمن الرحيم﴾
"اللهيب"
بقلمي:سجى بني الاسد
"لا تنسون التصويت والتفاعل بين الفقرات لطفاً✨🤍"
ـــــــــــــــــــــــــــــ∆ـــــــــــــــــــــــــــــ
بعد التعب چانت النهايه حلوه
ضحكت گلوبٍ كانت بيها بلوه
يا رب دوم الفرح ما يغيّب
وكل حلم يتعب... يلگه إلگوه
النهايه || 2025/6/12
""""""""""""""
'بـهار'
طلعنا من الدكتورة فرحانين نحنا الاثنين لدرجة رافد يريد يحضني كدام الناس بس مستحي
والحمدلله عنده المستحه كدام الوادم،رجعنا للبيت اول ما رجعنا اخذني لحضنه يفرني فر واني اضحك وهو يضحك فرحان ويكول
-رافد:راح اصير اب
-:اي
-:احبج بهار اني احبج وهايم بيج واموت عليج
-:اني هم
نزلني من حضنه وحضن وجهي بين ايدينه وباسني على خدي ورجعني لحضنه،مرت الاشهر نفس الروتين نفس الحاله ويوم عن يوم يكبر حبي لرافد واحبه اكثر
خواته يجون عدنه مرات وخواته كلش لطيفات
وكلش فرحوا لما عرفوا اني حامل
وكلت لموج ونار وهمه هم فرحوا كلش
بعد ما صرت بشهر السادس من حملي وعرفت اني حامل ببنت جهزنا غرفة الها وملابس الها
ونحنا الاثنين فرحانين الها ورافد كل ما يرجع يكون راجع بايدة العاب جديدة الها ويروح يخليهم بغرفتها
واني اتوقف يم باب غرفتها ومكتفه ايدي الصدري وهو يرتب الاغراض الها واني اردفت
-بهار:صار عدها كومة كافي مبالغة رافد
-:معليج انتِ هاي بنتي وحر بيها
-: ادري بس تبالغ غرفتها صارت عبارة عن العاب
-:اذا ما ادللها ادلل منو لعد؟
-:حتى هيَ راح تمل من هالالعاب
-:لا ما تمل بالعكس تكلي بابا جيبلي بعد واني اجيبلها محل كامل
-:شو جنك اهواي متحمس
-: طبعاً
-:بس رافد نحنا غرفتنا جوه وهيَ غرفتها فوك شلون ترهم؟
-:اي فكرت بهاي عادي نشيل للطابق الثاني للغرفة الي بصف هالغرفة
-:شوكت؟
-:باجر
-:تمام
ضل يرتب اغراضها والالعاب واني واقفة بالباب وهو كمل وطلع راح يسبح
واني رحت كملت الطبخ ولما طلع اكلنا وشبعنا
وهو ساعدني بالترتيب
مرت ثلاث اشهر زيادة صرت بشهري التاسع وطول هالثلاث اشهر جنت متوترة كلش وخايفة
ورافد جاب خواته عندي خلال هالشهر علمود يبقون يمي ويساعدوني بكل شي
وخواته كلش ساعدوني وما خلوني اتعب بشي ابد وجانوا كلش لطيفات وياي
واجه الليوم الي ولدت بيها وجان هذا الليوم اصعب يوم بحياتي وبعد ما رجعت من المستشفى للبيت ويه خواته وبنتنا بحضنه هو
رحت سبحت اني وخواته سبحوا بنتنا الي سميناها مرام خلصت سباحه ورافد جابلنا اكل من المطعم
اكلت وبعدها اخذت بنتي لحضني وصعدت للطابق الثاني واناظرها تجنن وبستها وشميتها
دخلت لغرفتها رضعتها ونومتها بس هيَ كل دقيقة تبجي واني كوه اسكتها ويجي رافد هم وياي يحاول يسكتها ونحنا الاثنين واقفين بصف سريرها
وهيَ سكتت شوية ونامت واني ناظرت رافد وهمست بصوت ناصي كلش لا تفز وترجع تبجي
-بهار:اريد امك تشوفها رافد ليش ترفض هالشي
-:عليمن تشوفها؟
-:حفيدتها ومن حقها حتى خواتك يكولون امك تريد تشوفها ودزولها صور فقط عنها
-:اي خل تشوفها بالصور
-:تعال نطلع شوية
طلعنا من غرفة مرام ودخلنا لغرفتنا واني تلمست ايده واردفت
-بهار:سامحها رافد يمكن هيَ بذاك الوقت ما جان بايدها حيله
-:مسامحها اني بس ما اريدها بحياتي اني ناسي عندي ام
-:خطية رافد تبين هيَ ندمانه خلي باجر تجي عدنه
-:لا بهار لا
-: رافد لخاطري
-:ما احب ارفضلج شي بس هالشي مرفوض
-:لعد اذا تريد ناخذ مرام عدها شوية
-:بنتي ما تدخل لبيت ذاك الـ*** زوج امي
-:ليش؟
-:بهار سدي الموضوع
عاف ايدي وجلس على طرف السرير رحت جلست بصفه رجعت تلمست ايده واردفت
-بهار:اني هم شفت اشياء اهواية من اهلي وخصوصاً من اخواني بس هسه لو شفتهم اسامحهم وانسى كل شي لان الاهل شي ما يتعوض
-:اخوانج مو مال مسامحه بهار لا تصيرين هالكد طيبة قلب
-:اني مشتاقة لامي بعد ما صرت اني هم ام عرفت معنى الامومه اكثر واشتاقيت الهم كلش
اشتاقيت حتى لابوي وترحمتله نحنا نختلف عنهم اعرف هالشي بس همه هم يمكن شافوا من اهلهم شي ما ينسى
-:ما يهمني شافوا من اهلهم شي لا يجون يجربوها بينا نحنا شفنا منهم اشياء بس اكيد ما نجربها باطفالنا وندمرهم اذا بيوم اني هم توفيت مثل ابوي وانتِ رحتي تزوجتي شخص ثاني تصيرين لبنتي مثل امي؟
-:اسم الله عليك وعلينا كلنا
-:هذا الشي مو بيدنا اني شفت الويل وحسبت الدقائق لبين ما طلعت من جحيم امي وجحيم عمي وعائلته هذني محفورات بالعقل بهار ما ينسي
-:بس نحنا مختلفين عنهم مو اذا همه جانوا سيئين نصير مثلهم
-:اني اعامل الكل بالمثل بهار مسامحهم دنيا واخرة بس ما انسى هالعقل رافض ينسى
-:بس هيَ امك رافد اني لو جانت امي عندي هسه جنت احضنها وابوسها واخذها بالاحضان وانسى كل شي سوته بالنهاية تبقى ام والجنه تحت اقدام الامهات
-:كلت سدي الموضوع حبيبتي
-:لا
-:بهار نامي مو تعبانه انتِ يلا نامي
-:لا مو تعبانه رافد حاجيني شبيك ترا امك امك
-:خوش باجر تجي واني اطلع لبين ما هيَ تروح
-:شسالفة رافد لا تسوي هيج اني اريد اصالحكم
-:لا تحاولين بهار هالشي صعب اني اذا شفتها بالغلط اتذكر كل شي ما اريد اشوفها
-:عليك الله حبيبي لخاطري اني
-:بهار عليج الله سدي الموضوع عاد
-:ما اسده
-:اكلج
-:كول
-:شنو رائيج باجر نروح للجنوب وناخذ بنتنا لضريح الامام علي (عليه السلام)
-:لا مرام صغيرة تتمرض بالطريق والجو بارد، ولا تغير الموضوع رافد حبيبي انتَ يلا هسه ننزل جوه ونكول لاخواتك يتصلون على امك تجي باجر عدنه ها شنو رائيك؟
-:مو جنج اهواي سولفتي بهالموضوع اني دخت وانتِ لا
-: رافد!!!!
-:غاليتي انتِ انسي هالموضوع
-:تمام شكد عنيد انتَ
-:انه رافد....
-:اي ندري بيك رافد اسكت
-:كسار الخشوم
-:العنيدددد
-:لا تزعلين مني بهار تراها موضوع تافه
-:ما زعلانه
هز راسه وتمدد وغمض عيونه واني كمت وطلعت نزلت جوه شفت اخته رقية كاعدة والثانية نايمه
رحت عند رقية وجلست بصفها ابتسمتلي واني اردفت
-بهار:رقية كولي لامج باجر تجيلنا نعزمها يمنا
ناظرتني بصدمة وعيونها فاتحتها على وسعها واردفت
-رقية:مستحيل اخوي رافد قبل؟؟؟
-:اي قبل شوية كال خليها تجي
-:لا لا ما اصدك رافد ما يقبل يشوفها حتى بالغلط
-:لا لا هو يريدها ويريد يصحالها
-: والله ياريت بس هالشي مستحيل
-:لا عيني بعد مو مستحيل اني حجيت وياه يلا اتصلي لامج خليها تجي باجر
-:ولج بهار اذا تسوين هالشي بدون علم رافد والله يزعل عليج
-:لا ما اسوي بدون علمه هو قبل وحتى جان يريد هو يجي يحاجيكم علمود هالشي بس تعب ونام
-:يعني صدك بعد كل هالسنوات قبل ؟
-:اي
-:هسه امي راح تفرح اهواية
-:اتصلي الها
-:لحظة
اتصلت لامها وكالتها وجانت فاتحه السبيكر واني هم سلمت على امه وسمعت امه بجت من هالخبر ما مصدكه وكالت اكيد اجي وسديت الخط ورقية حضنتني واردفت
-رقية: شكراً كلش هالشي صار بفضلج بهار نحنا شكد حجيناه وياه علمود هالسالفة ما جان يقبل وأخيراً بعد هالسنوات قبل
-: عفواً ما سويت شي،الساعة بشكد تجي؟
-:كلتليها تجي بالتسعه بس ما اظن تجي من هالوقت لان اخوي من امي عنده شغل بهالوقت
-:كم اخ عندج من امج؟
-:ثلاثة واخت وحده عدنه
-:رافد ابد ما يتواصل وياهم
-:لا
-:همه زينين وياكم؟
-:اي والله هذولة اخواني الثلاثة كلش زينين وكلش يحبونه وهمه يريدون يشوفون رافد شي مره بس ابد ما يشوفونه لان رافد ما جان يشوفنا ببيتنا
-:لعد وين يشوفكم؟
-:براس الفرع ما جان يدخل لفرعنا حتى لما جان يوصل لفرعنا جان يتصل النه علمود نطلع اله ويشوفنا وجان يحجي قليل ويانه وينطينا مصروف ويروح امي جانت تشوفة من بعيد بس هو ما جان يلاحظها
-:امج شنو سوتله بالضبط؟
-:امي سوتله اهواي اشياء بس الله يشهد لما كبرت هيَ ولما رافد كبر تندمت كلش وتتمنى تصالحة
-:زوج امج شلونه وياكم؟
-:زوج امي زين ويانه بس اكيد يصير تفرقة بين اطفالة هو وبينا نحنا بس يعني زين ويانه نحنا ما نركز بهالشي اهواي اهم شي اخواني الثلاثة واختنا الصغيرة يحبونه ونحبهم وهاي هيَ
-:ليش اختاريتوا تعيشون ويه امكم ؟
-:لان لو عفناها نحنا هم جانت تنهار امي وتموت من القهر والله جنه نريد نعيش ويه رافد بس فكرنه بامي هم
هزيت راسي وسكتنا واني فكرت بالشي الي سويته بدون علمه وبدون ما افكر حتى
بس لازم اصالحهم لانه امه،كمت رحت لغرفة مرام
دخلت بهدوء وشفتها نايمه الحمدلله
بس ضليت يمها خاف تكوم فجاة وتبجي
وبدون ما احس بنفسي غفيت يمها وبعدني ما لحكت اغفى كامل فزيت على صوت بجيها
كمت عليها شلتها من السرير وخليتها لحضني اهز بيها بحضني وهيَ بعدها تبجي رضعتها وجانت جوعانه فعلاً لما شبعت سكتت خليتها تضل بحضني
اناظرها مبتسمه والعب بوجها الصغير
مرت اليوم كامل ثاني يوم رافد جان يتجهز يروح للمركز والساعه جانت بالثمانيه
واني متوقفة بزواية الغرفة وهو يتجهز واني اناظرة واطقطق باصابعي واردف بدون ما يناظرني
-رافد:شمسوية من مصيبة ومتوترة تطقطقين اصابعج؟
-:ها!
-:ها!
-:رافد لا تروح اليوم
-:ليش؟
-:هيج لا تروح
-:يومين مرايح واللواء متحلف عليه اكيد هسه
-:اي اليوم هم لا تروح
-:كولي بهار شكو؟
-:رافد اذا كلتلك ما تعصب؟
-:يعني مسوية سالفة جبيرة كولي حبيبتي كولي ما اعصب
رحت تقدمت اله واني ابتسمله بتوتر وهو لما شافني ضيق عيونه يريد يعرف من ملامحي شمسوية
حضنته من ايدة واردفت
-بهار: رافد انتِ أصلاً تحبني وما تعصب مني
-:لا حبيبتي اني اعصب من أي سالفة
-:حتى عليه؟
-:اي لان واضح مسوية سالفة جبيرة
-:بخاطر مرام لا تعصب
-:لحظة وينها مرام خل اروح اشوفها قبل ما اروح
-:نايمه رافد لا تكعدها
-:ديلا كولي شكو ؟
-:لخاطر مرام ما تعصب وتسمع كلامي
-:مو جنج لحيتي بهار!!
-:بس اسمع كلامي وهاي هيَ لخاطر مرام
-:خوش كولي والعباس ما اعصب لخاطر مرام
-:شوف حبيبي اني البارحة سويت شي بدون علمك
-:بهار تعالي من الاخير وطلعي الزبدة
-:عزمت امك
ناظرني مصدوم وجحظت عيونه وخزرني حتى دفعني بخفة عنه وتوقف مقابيلي معصب وبدون ما يلحك يكول شي اني اردفت
-بهار: شوف هسه شوية وتوصل امك عليك الله رافد عليك الله لا تسوي شي ولا تروح وحتى خواتك فرحانين بهالشي لا تخرب فرحتهم وفرحة امك اني حجيت ويه امك وجانت شكد فرحانه رافد لا تخرب فرحتها لخاطرنه اني ومرام امك بجت من الفرحه
-:عندي شغل وخري بهار
وخرني من كدامه وشال تلفونه وراد يطلع ركضتلة تلمسته من ايدة وهو سحب ايدة مني
رجعت تلمست ايدة وهو توقف بدون ما يلتفتلي واني اردفت
-بهار:ازعل والله ازعل اذا رحت
-:ازعلي
رجع سحب ايدة مني وفتح باب الغرفة وراد يروح تلمستة مره ثانيه قبل لا يطلع واني بسرعة سديت الباب وتوقفت مقابيل الباب وساندة نفسي عليها
خزرني بدون ما يكول شي
-بهار:يهون عليك ازعل؟
-:بهار وخري
-:لخاطري وخاطر مرام،لحظة انتظرني لا تروح انتظرني
-:بهار!!!!
-:انتظرني رافد
طلعت من الغرفة ورحت لغرفة مرام شلتها من السرير وبسرعة رحت رجعت لغرفتنا
ومرام صحت وكامت تبجي شفته بعده ينتظرني ولما شاف مرام تغيرت كل نظراته ورخت عيونه وحتى اكتافه مديت اله مرام وهو شالها وباسها من ايديها ووجهها وراسها واني اردفت
-بهار:اذا اني اهون عليك على الاقل مرام لا تهون عليك
رفع عيونه الي بعده يخزرني ورجع عيونه لمرام ابتسملها وباسها وكال الها
-رافد:مرامي حبيبة بابا هاي امج تدخل باشياء ميخصها
-:يخصني رافد يخصني
-:اسكتي بهار صوتج ما اسمعه
-: رافد....
-:كلت اسكتي
-:لخاطر مرام لا تروح شوفها باوعلها ولخاطرها لا تروح
تنهد وناظر مرام باسها ورجع ناظرني ما راضي واردف
-رافد:علمود مرام بس،مو علمودج
-:عادي عادي اهم شي تقبل
تمشى للسرير ومرام بايدة عافها بالسرير ونزل بيها دك بوسة ويدغدغها بخفة وهيَ تضحك بخفة
وحتى ما انطاني اهمية واني عفتة ونزلت جوه دخلت للمطبخ وحرت شنو اطبخ ما دام عمتي راح تجي
صحت رقية عندي وسئلتها وكالت اطبخي أي شي
-بهار:اني حايره
-رقية:روحي انتِ ارتاحي واهتمي ببنتج اني اطبخ وهسه تجي كوثر تساعدني
-:لا لا اني اسوي
-:لا ولج بهار عادي روحي ارتاحي بعدج تعبانه اكيد
هسه تجي كوثر هم تساعدني ونحضر كل شي
هزيت راسي وبعد ساعة بالضبط وصلت ام رافد وكلنا سلمنا عليها بس رافد فوك ما نزل ومرام عنده
صعدتله وام رافد جالسة بالصالة ويه بناتها
دخلت للغرفة وهو حتى ما ناظرني وملتهي بـ مرام
-بهار:رافد
-:خير!
-:تعال ننزل امك وصلت
تنهد بحسره طويلة وناظر مرام وشالها بحضنه
وهو بعدة بملابسة زيه العسكري
ضل واقف بمكانه ومرام بايدة حسيته متجمد
رحتله تلمست ايدة وحسيته فز
-بهار:يلا حبيبي امك تنتظرك
بلع ريقة وتفاحة ادم تصعد وتنزل شجعته وكوه صار يمشي اخذت مرام لحضني ونزلنه جوه
توقفنا مقابيل الصالة وهو مسوي نفسة مشغول بسلاحة الي مخليها على ظهرة
مديت اله ايدي كوه تلمس ايدي ودخلنا للصالة
امه اول ما شافته ضحكت وخواته هم ضحكوا فرحانين وهو جامد
عفت ايده وهو ناظرني وتنهد رحت مقابيل امه انطيت مرام بايدها وهيَ اخذتها وباستها وحضنتها وحتى دموعها نزل واردفت
-ام رافد: وليدي صار عنده طفلة
ابتعدت من مقابيل ام رافد وناظرت رافد الي يناظرنه كلنا ببرود وام رافد صارت تبجي ومدت ايدها لرافد واردفت
-ام رافد:يمه وليدي تعال
تمشى رافد و وجهة جامد وبارد ما مهتم
تلمس ايد امه كوه وباس أيدها وتقرب منها وباس راسها وامه حضنته تبجي وكوثر اخذت مرام من امها وهيَ ورقية يناظرون بعض فرحانين
رافد ابتعد عن امه ناظرني بنظرات جامدة وحسيته يخزرني اجه اخذ مرام من كوثر وطلع من الصالة رحت وراه
وشفته توقف عند الباب يبوس مرام توقفت مقابيلة انطاني مرام اخذتها لحضني وهو نزل لبس بسطالة ورجع ناظرني واردف
-رافد:طالع رايح للمركز وما ارجع الا بليل
-:بس رافد امك تريد تشوفك اكثر
-:شافتني وهاي هيَ يلا مع السلامه ديربالج على مرام
-:رافد ابقى للغداء على الاقل
-:عندي شغل مهم ما اكدر ابقى
-:بس ابقى ساعه هم وبعدها روح
ما جاوبني ورفع ايده الي لابس بيها الساعة وشاف الساعة وناظرني وطلع بدون ما يكول شي وبسرعة ركب السيارة علمود ما الحك اكول شي
واني سديت الباب وبست مرام واخذتها يم ام رافد وهيَ اخذتها بايدها تبوسها وابتسمتلي بلطف ونادتني تحضني حضنتها وابتعدت عنها وهيَ اردفت
-ام رافد: شكراً الج بهار لان خليتيني اشوف ابني ويشوفني واكدر احضنه
-: عفواً ما سويت الا واجبي
-:ليش راح؟
-:عنده شغل كلش كلش مهم ما جان يريد يروح وانتِ اهنانه جان يريد يبقى وياج
-:عادي اهم شي شغلة
-كوثر:جيبي مرام عندي ماما
اخذت مرام ورقية نزلت من فوك جايبة كريكوت مرام وخلوا مرام بيها
ورحنه بدينا نطبخ ومرت الوقت وصار وقت الغده
رتبنا كل شي وجلسنا ناكل ومرام نامت بالكريكوت
وشبعنا وكمت سويت شاي واخذته الهم وكوثر غسلت المواعين وضلينا جالسين للعصر نسولف وبعدها ودعوني ورجعوا ويه امهم للبيت
واني اخذت مرام وصعدتها فوك خليتها بسريرها و اول ما خليتها كامت تبجي وضليت واقفة براسها واهز بيها بالسرير مالتها لحد ما نامت واني غفيت بصفها وما حسيت بشي الا لما انفتح الباب وشفت رافد دخل
واني رجعت غمضت عيوني واسمع خطواته بجانب سرير مرام وفتحت عيوني شفته اخذها لحضنه وطلع وكمت طلعت وراه
و وقفته على صوتي واردفت
-بهار: رافد
التفتلي قبل ما يدخل الغرفة ومرام بحضنه
ناظرني منتظرني اتكلم
-بهار: رافد ليش رحت الصبح والله حسيت امك زعلت!
-:والعباس جان عندي شغل
-:وبعدين ليش كعدت مرام هيَ كوه تنام اني الاسهر وياها مو انتَ
-:روحي نامي انتِ اني ابقى وياها معليج ببنتي
هزيت راسي ودخلت للغرفة وهو هم دخل عاف مرام عندي وراح يبدل وبدل اجه اخذ مرام عنده واني نمت،كمت ثاني يوم ما شفته بالبيت عرفته طالع
واني رحت لمرام شفتها هم نايمه وطلعت من غرفتها بدون ما اسد باب الغرفة لا تفز وتكوم تبجي
نزلت جوه سبحت وطلعت ورحت اكلت فطور
وسمعت صوت بجي مرام وصعدت عندها اخذتها
ونزلتها جوه دخلتها سبحتها وطلعتها لبستها وخليتها بالكريكوت بالصالة واني ارتب البيت وانظف
كملت شغلي ومرت الوقت وصار وقت العشاء ودزيت رسالة لرافد يجيب اكل جاهز لاني تعبانه وما بيه حيل اطبخ وضليت اهتم بـ مرام وحجيت ويه نار و موج شوية وبعدها وصل رافد و اول ما دخل عاف الاكل وراح لـ مرام شالها يبوس بيها
واني رتبت الاكل واكلنا وشبعنا وهو ضل ويه مرام بالصالة ومشغلين التلفزيون
واني هم رحت جلست بجانبهم وحطيت راسي على كتفه وهو باس راسي وهمس
-رافد:احبج بهار اموت عليج انتِ تغيريني للافضل اني بفضلج البارحة حسيت عندي ام واحسن ام بالدنيا صح شفتها قليل بس بفضلج اريد اشوفها اكثر بعد
-: والله ؟
-:اي
-:خلي باجر تجي يمنا هيَ و خواتك
-:تمام
ثاني يوم فعلاً اجو امه وخواته وجانت يوم كلش حلو ورافد ضل جالس ويه امه وخواته ويسولف وياهم
وهمه فرحانين بهالشي كلش
وبالعصر طلعنا للحديقة وجبنا عصرونية وجلسنا كلنا ومرام بجانبنا على الكريكوت
وبعد العشاء راحو وجان يوم كلش حلو ما ينسي عشت بيها اجواء عائلية تجنن وحسيت عندي عائلة مليانه دفؤ وحنان واهتمام ومن لطافة ام رافد وياي حسيتها امي وكلش حبيتها وحبتني
والاهم من هذا رافد وامه وخواته جانوا فرحانين كلش بهالشي واني فرحت كلش لما شفتهم هيج لان ماكو شي احلى من الاهل وحنانهم بهالدنيا
فقدت اهلي اني بس صار عندي اهل احسن من اهلي الحقيقين بالف مره وما انكر اشتاق لامي لان جنت احبها رغم كل شي
نومت مرام وطلعت من غرفتها
رحت للغرفة شفته يتكلم بالتلفون وكمل الاتصال التفت عليه وعيونه تبين شكد فرحان
تقدم الي حضني ودفن وجهة برقبتي طبع قبلة خفيفة على رقبتي واخذ نفس عميق
وناظرني وحضن وجهي بين ايدينه
وهمس
-رافد:احبج اكثر من أي شي بالدنيا كله انتِ غاليتي وكل شي بالنسبة الي انتِ ومرام احبكم وما اكدر اعيش بدونكم بفد يوم ابد
-:ونحنا نحبك وما نكدر بدونك
-:هذا الگلب بيها بس انتِ ومرام ومحد ياخذ مكانكم بهار انتِ اليوم خليتيني احس بشعور العائلة الفاقدها
بعد سنوات كدرت اكعد ويه امي وخواتي واهم شي مرتي وبنتي جانوا وياي وكلنا بمكان واحد
-:نحنا عائلة كلش حلوه والحمدلله تصالحت ويه امك
-:بفضلج انتِ وبفضل خاطر مرام احبكم يا احلى شي صار بحياتي انتو،انتِ ومرامي هدية من رب العالمين الي
-:واني هم احبك
-:مو بكدي ابد،اني احبج واموت عليج وهايم بيج وبعيونج البريئة.
حضنت وهو باس راسي،،انتهى حكايتنا حكايتي بسيطة بس جان الها بطل حلو ويجنن والي هو رافد بطلي القوي والشهم بالنسبة الي والي عوضني عن اهواي اشياء
وصرنه عائلة كلش حلوه ومرام جانت رمز لحبنا
وعشت احلى ايامي وسنواتي ويه رافد وبنتي
وانتهى حكايتنا باحلى نهاية.
∆∆∆
'مـوج'
عفت ايات يم سامية لان كل دقيقه تريدها يمها وتجي يمنا بس علمودها وحوراء ما تعوفهم وحدهم لان تكول ما عندي ثقة بيهم واخاف اعوف ايات يمهم
باليل رجعوا لبيوتهم واني اخذت ايات واريد اصعدها فوك توقفت على صوت مهذار التفتت عليه توه رجع للبيت واجه بسرعة بدون ما يسلم عليه او يسئل عليه اخذ ايات بايدة باسها وصعدها هو فوك واني صعدت وراهم
شفته اخذها لغرفتنا نحنا ودخلت وراهم خله ايات للسرير ونزع جاكيته وجلس بطرف السرير واخذ ايات عنده يبوس بيها ويشمها ويلعبها واني دخلت سبحت وطلعت شفته نايم وايات بصفة هم نايمه
رحت شلت ايات واخذتها لغرفتها خليتها على السرير حست على نفسها شوية وصارت تبجي
وانطيت الها ممية الاطفال الي عمتي اشترتها الها
وهيَ سكتت
واني طفيت الاضوية وطلعت رحت اني هم نمت
كمت ثاني يوم على صوت ايات تناغي بجانبي
فتحت عيوني شفت مهذار يلاعبها
واني اردفت
-موج:ما رحت للشغل؟
-مهذار:اعوف بنتي واروح!؟ لا ابد
-موج:هاي ليش متوصخ ملابسها؟
-مهذار:من الحليب
-موج:مهذار ليش تشربها الحليب هيج توصخها كلش
-مهذار: شعليج منها خليها تشبع الدكتور كال هالحليب زين عليها خلوها تشرب منها
-موج:جيبها اسبحها
كمت شلتها وهيَ بعدها تناغي وصوتها يجنن بستها واخذتها سبحتها وطلعتها لبستها ورطبت جسمها وايدها وهيَ بس تسوي حركات بايدها
اخذت ايدها ابوس بيهم واجه مهذار اخذها مني بسرعة ونزل جوه
نزلت وراه ولا يعوفني وحدي ويه بنتي
لحكته للصالة ودخلت شفت الكل جالس الا ابوه
لان ابوه يطلع للشغل بهيج وقت
وهو جلس على القنفه واني رحت اخذت ايات منه بسرعة واردفت
-موج:ولا تخليني ويه بنتي شوية
-حوراء:اي والله حتى اني اكعد الاعبها يجي يرزلني وياخذها مني
-ام مهذار:خوب اني اكعدها اكمطها وما الحك ابوسها يجي ياخذها
-عبير:واني لما اشربها الحليب يجي يأخذها وما يخليني اوكلها حتى وهو يشربها بعشوائية اني اشربها الحليب بالمميه بهدوء لانها بعدها صغيرة كلش ترا
-مهذار:بنتي وحر بيهااا جيبيها ولج
-موج:ولا انطيها خلينا نفرح بيها شوية
-مهذار:تحبني اني اكثر شي جيبيها ولج جيبي ايات
-موج:ولا انطيها،هاج عمه لبسيها الكماط
-ام مهذار:جيبيها عمه جيبيها
انطيتها هم امه وهيَ لبستها الكماط واني رجعت اخذتها يمي ومهذار مخزرني اجه يريد ياخذها ما انطيته واخر شي مل وراح بدل وطلع للشغل
وانطيتها يم حوراء وحوراء تفرح بيها كلش
وام مهذار من هسه جايبتلها كلادة ذهب صغير الها وتراجي واني البسها بس الكلادة والتراجي لا
لانها بعدها صغيرة،كمنا اني وعبير و سوينه فطور لان لحد هسه ما ماكلين فطور
سوينه وجلسنا كلنا وقبل لا نبدأ ناكل اجوو عمات مهذار وسلموا علينا وجلسوا يفطرون ويانه
واخذوا ايات من حوراء وحوراء انقهرت منهم
شبعنا وكمنا شلنا كل شي
ورحنه جلسنا بالصالة وايات ضلت يم خيرية
ولا تعوفها وحوراء تتعارك وياها علمود تنطيها يمها بس ما تنطيها وحوراء كالت
-حوراء:كون مهذار يجي وياخذها منج عمه شنو ما عندج احفاد انتِ !!!
-خيرية:عندي بس كبروا احفادي وصاروا يرحون للمدرسة مالهم طعم بعد
-عبير:شنو عمه هيَ اكله ومالها طعم!!؟
-خيرية:ادبسزز محد انطاكم وجه غير اخوي ابوكم دللكم اهواي
-عبير:دجيبيها عمه والله صرت اشوفج حتى بحلمي وايات بحضنج
-حوراء:ايات تلمح خيرية اكثر مما تلمح امها حتى
-موج:جيبيها عمه والله اني امها وما اشوفها اهواي لان دومها عند ابوها وعندج
-خيرية:دتعاي اخذيها خبلتوني
اخذتها من خيرية وخليتها تضل عندي وعبير جابت الكريكوت مالتها وخليتها بالكريكوت وفتحت الكماط منها وهيَ تحرك ايدها وتناغي
وحوراء تلاعبها وتبوس بيها ،ضلوا عمات مهذار عدنه لحد المغرب وراحو
وجان وقت رجوع مهذار وابوه للبيت ونحنا كملنا الطبخ ورتبنا كل شي بالميز طعام ومخليين ايات يم ام مهذار،وصلوا مهذار وابوه ومهذار ما شاف كدامه أي احد غير ايات راح شالها بسرعة ويبوس بيها وراح تبقى عنده ومحد يكدر ياخذها منه
جلسنا ناكل وكلنا نسولف ويه بعض ونضحك على سوالف حوراء ومهذار ملتهي بـ ايات
شبعنا وكملنا وكمنا شلنا كل شي والمساعدة جابت النه شاي وكلنا جلسنا بالصالة وابو مهذار اخذ ايات من مهذار وكوه اخذها
وابوه كل ما يشوفها يطلع من محفظته فلوس وينطيها وهيَ ما تكدر تلزمه فـ ينطي فلوسها يمي
مرت الوقت واجه وقت النوم وصعدنه فوك
واني كوه اخذت ايات من مهذار علمود انومها وهو هم اجه لغرفتها علمود ينومها
خليتها بالسرير وغطيتها ومهذار واقف بجانبي واني اهز بسريرها ومهذار يريد يلاعبها خزرته ونترت
-موج:خليها تنام مهذار كافي عاد عوفها
-مهذار:احس نفسي من زمان ما شايفج موج والله مشتاگلج
-: طبعاً ما تشوفني طول يومك ملتهي ويه ايات بس تريد ايات تحبك اكثر مني
-: طبعاً اني ابوها وهاي اميرتي ادللها واعيشها احلى عيشة واخليها تتأمر على الكل
-:تمام اسكت خليها تنام
-:ليش تجبريها تنام خليها تضل خطيه بلكي تريد تضل وياي
-:لا شفتها نعست قبل شوية عوفها يلا
-:خوش
عافنا وطلع واني نومتها وطفيت الاضوية وطلعت من غرفتها ورحت لغرفتنا شفته توه طالع من الحمام وسابح وينشف شعرة وعاف المنشفة وتقدم الي
وابتسم واردف
-مهذار:مشتاگلج موج
-:خوش وشسوي
-:تعاي
اخذني لحضنه واني تأفأفت بضوجة لاني تعبانه
باسني على خدي واردف
-مهذار:شبيج ضايجة؟
-:تعبانه
-:من شنو؟
-:منك
-:شمسوي اني نوب!!!
-:مهذار عليك الله لا تكعد ايات اذا كعدت الصبح ولا تجيبيها يمي اذا كعدت لان لما اسمع صوتها اكوم وما اكدر انام بعد وكل يومي يكون تعب
-:ولج ليش تضوجين من بنتي؟
-:ما ضايجة منها بس ضايجة منك لا تخليها هيَ تنام براحتها ولا اني
-:خوش بعد ما اكعدج
-:بعد احسن وهسه خليني انام
هز راسه واني رحت تمددت وغمضت عيوني وهو هم اجه سحبني لحضنه ونمت
وثاني يوم نفس الروتين واكيد ما تكمل الروتين بدون عمات مهذار ويبقون عدنه لمدة ساعات
وبعد ما يرحون حوراء تكول
-حوراء:اعتقد هذولة ناسيين عدهم بيت
-ام مهذار: ما يصير نحجي وره الضيف لان هالشي حرام كلشش ترا
-حوراء:ضيفيش ماما هذولة يشوفون بيتنا اكثرر من عدنه حتى
-ام مهذار:اسكتي عاد
-عبير:ماما والله حقها اني هم تعبت
-حوراء:على كولة تعبت وتعبت ما دام الجوو صاير يجنن ماما خلي نروح لمزرعة باربيل والله نتونس
-ام مهذار:لا ما عدنه خلك هسه
-حوراء:شوف اني ويامن احجي بس يجي بابا احجي وياه احسن شي نتونس كلنا
مرت الوقت ورجعوا مهذار وابوه وحوراء فعلاً حجت ويه ابوها وابوها راساً وافق وكال باجر نروح
وحوراء ما صدكت وراحت تجهز جنط ومهذار نتر
-مهذار:بويه ليش تنطيها وجه هالكد عدنه شغل بكد الدنيا
-ابو مهذار:شعليك من بناتي خلي اونسهم شوية
-مهذار:وينها ايات؟
-موج:نايمه لا تكعدها
تجاهلني وصعد لغرفة ايات ونزل بعد دقائق وايات بايدة ويبوس بيها واني هم صعدت فوك وجهزت جنط النه ورحت علمود اجهز مال ايات هم وشفت عبير مجهزه لايات كل شي تحتاجه
وحوراء مجهزه بجنطه ثانيه الها الحليب وكم لعبه الها
جهزنا كل شي وثاني يوم فعلاً صرنه بالطريق من وقت السايق ماخذ ابو وام مهذار وعبير وياهم ونحنا ويه مهذار اني و حوراء وايات وحوراء تهتم لايات
وصلنا للمزرعة بعد ساعات متواصلة من الطريق
اول شي ارتاحينا وبليل طلعنا لمطعم
وجانت يوم كلش حلو و ونسة ورجعنا للمزرعة وثاني يوم بدت فعالياتنا
رحنه للمول وبعدها رحنه لحديقة حيوانات
وتونسنا كلش لمدة ساعات ورجعنا للمزرعة ومهذار نوم ايات لان اني جنت تعبانه كلش
وبعدها اجه ينام وسحبني لحضنه وهمس
-مهذار:اكول نجيب اخت او اخ لايات
-:مهذار اسكت بعدني بعز شبابي وشيبت بسبب ايات
-:ولج ليش تحجين عليها هاي عبارة عن هدوء
-:اي كلش هادئة لدرجة صوت بجيها يوصل لسابع جار
-:فديتها هيَ وصوتها وعشيرتي كله تروحلها فدوه فديت ايدها واصابعها حتى هاي بنتي محد اله كلام عليها
-:خليني انام نعسانه
-:ما اخليج
تقرب مني وطبع قبلة خفيفة على شفايفي وسحبني لحضنه اكثر دفن وجهة برقبتي طبع قبلة خفيفة
وخله شعري وره اذني واني غفيت ونمت
مرت اسبوع كامل ونحنا بالمزرعة وجان هالاسبوع احلى اسبوع بحياتي لان كلش تونست وحبيت الاجواء،رجعنا لبغداد ومرت يومين
نومت ايات ورجعت للغرفة اني هم انام وشفت مهذار يطلع شي من بين الملفات واني تجاهلت واريد انام بس التفتت على صوته وهو رافع الي جواز سفر
استغربت ليش يشوفها الي
واجه جلس بجانبي ومدلي الجواز السفر فتحتها وشفت هالجواز لايات استغربت كلش بس بنفس الوقت فرحت حولت انظاري اله بابتسامة واستغراب
-موج:جواز سفر لايات؟
-مهذار:وعدتج اذا صار عدنه طفل نسافر نحنا الثلاثة لشي دولة بعيدة
-:بس ايات صغيرة بعد كلش
-:عادي اهم شي نسافر
-:خلينا نرتاح كم يوم او حتى شهر وبعدها نروح
-:براحتكم حبيبتي
عفت الجواز وهو تقرب مني وباسني على خدي وهمس
-مهذار: أمريني موج وانه احقق كل شي تريديها وتتمنيها
-:ما اريد شي اريد بس رب العالمين يحفظنا لبعض ويحفظ ايات النه وهاي هيَ
-: الله يحفظنا لبعض كلنا موجه
خلاني لحضنه وباس راسي واثنينا ساكتين،مرت الايام وفعلاً قررنا نسافر وسافرنه فعلاً
وصلنه للدولة الي سافرنه الها رحنه للفندق ارتاحينا شوية وثاني يوم رحنه لمكان طبيعي كلها خضار وبيها حيوانات اليفه وصغيرة
جانت مكان تجنن طبيعي واجوائها يجنن ومخليين ايات بعربة الاطفال ومهذار الي يمشيها واني مشغولة بالمنظر اليجنن والاجواء الحلوه
-مهذار:يلا نرجع تعبت اني
-:لا اريد اضل اكثر وخلينا باجر نروح يم البحر
-:امشي موج تعبان كلش
-:خوش بس باجر تاخذنه للبحر
-:تمام تمام
غيرنه طريقنا لاتجاه السيارة ورحنه ركبنا و ايات ضلت بحضني وبالاول رحنه للمطعم اكلنا ورجعنه نمنا بالفندق وثاني يوم رحنه يم البحر
اكو ناس اهواية يمها واكو بنات ما لابسين ملابس حتى ويسبحون بالبحر والتفتت شفت مهذار لابس نظارات شمسية ويتأفأف واردف
-مهذار: استغفر الله شهل حاله يلا نرجع نروح لغير مكان عود
-:تمام
رحنه وركبنا السيارة وتوقفنا يم جسر كلش حلو
وشفت الناس تربط بيها اقفال مكتوبة بيها اساميهم
ومهذار هم جاب قفل وكتب بيها اسمه واسمي واسم ايات وكتب التاريخ بيها وربطها بالجسر والتفتلي واردف
-مهذار:اذا بيوم صار عدنه طفل ثاني نرجع لهنانه وناخذ القفل ونكتب بيها اسم طفلنا الثاني
-:بس ليش يسوون هيج اقفال ومدري شنو برائي سوالف تافه
-:هيَ سوالف تافه بس تونس
سكتت وهو اخذ ايات بايدة باسها وتمشى بيها
ومدلي ايدة وتلمست ايده ومشينا،بعد كم يوم رجعنا للعراق ورحنه للبيت وحوراء قبل لا تسلم علينا اخذت ايات ودخلت جوه ومهذار يكللها جيبي ايات وهيَ تركض ويه ايات
دخلنا وشفنا عمات مهذار هم يمنا سلموا علينا
واني دخلت سبحت وطلعت،وجان الجوو حلو وطلعنا اكلنا الغذاء بالحديقة وخيرية وساميه هم جانوا ويانه وجانت يوم حلوه كلش
نحنا انتهى حكايتنا،حكايتنا جانت عاديه كلش
بس مليانه سعاده وحب وحنان
مهذار اب وزوج كلش زين صار الاب المثالي لبنتي والزوج الصالح الي
عائلة مهذار عائلة كلش حلوه وكلش لطيفين وزينين ويانه وخصوصاً خواته شالوا عني مسوؤلية كبيرة ويعتنون بـ ايات اكثر مني
وابوه وامه اعتبرهم اهلي كلش لطيفين وياي همه هم
وحتى عماته لطيفات ويانه
اني تقبلت مهذار بس ما حسيت بحب اتجاه رغم هو كلش زين ويانه كلنا وهو يحبني بس اني تقبلته وشفته كـ زوج واب بنتي وشريك حياتي طول عمري
اما كـ حب! احس لا ما حبيته واشوفة شريكي فقط واب بنتي ومن خلال مشاعري عرفت الگلب يحب مره وحده فقط
فؤاد نسيته وركزت بحياتي و بزوجي وبنتي وعائلتي
وعشت حياتي كله بسلامة فؤاد هم تزوج وشاف حياته وبعد ما يهمني أي شي غير عائلتنا وصحتنا
واهم شي خواتي هم بخير
وامي واخواني ما اعرف عنهم شي ولا اريد اعرف
وابوي اكول بس الله يرحمه
عائلة مهذار ومهذار عوضوني عن عائلتي أساساً
وايات عوضتني عن الدنيا كله وصارت اغلى شي عليه وهسه هيَ بحضني ابوسها و واقفة بجانب شباك الغرفة واناظر الكراج من الشباك
التفتت على فتح الباب شفته مهذار ابتسملي ودخل نزع جاكيته واجه اخذ ايات مني وباسها
وسحبني اني هم لحضنه وباس راسي وهمس
-مهذار: احبج انتِ وايات
ابتسمت اله وضلينا ساكتين،وانتهى حكايتنا
باحلى نهاية بالنسبه الي.
∆∆∆
'غيـم'
خلصنا سادس اني ونيران وسما خلصناها وخلصنا الكابوس الي دمرنا ودمر نفسيتنا
والحمدلله خلصناها ونحنا محققين الي نريدة وكل وحدة دخلت للتخصص الي تريدها
اني الحمدلله انقبلت بجامعة الصيدله ونيران انقبلت بجامعة طب الاسنان
وسما انقبلت بجامعة دكتورة تخدير
كل وحدة صارت بقسم بس نشوف بعضنا كل يوم
بعد ما انتهى السادس عمو ماهر انطاني مهر واشتريت بيها بس ذهب
وسوالي احلى عرس وجنت طالعة مثل الاميرات فعلاً
والاهم من هذا شفت خواتي بهار وموج وجانوا كلش فرحانات الي
عمو ماهر جابلنا هدية لكل وحدة على نجاحنا
وجاب لكل وحده كلادة ذهب
وحتى عمو لهيب جابلنا هدية وهم جان جايب النه كلادة ذهب وباركلنا على نجاحنا
وهسه عمو ماهر ياخذننا كل وحده لجامعتها
ونحنا البنات نسولف
-نيران:اني ما اتحمل اروحح للكلية بعد اكو دكتور كلش ينرفزني
-ماهر:ليش شبيه وياج؟
-نيران:اتأخر على المحاضرة يرزلني
-ماهر:وانتِ ليش تتأخرين؟
-نيران:اضل بالمحاضرة حتى لما ناخذ استراحه انتظرة يجي وما يجي ولما اني اطلع وارجع اشوفة ويرزلني والبارحة فشلني كدام الطلاب كله
-ماهر:اني هسه احجي وياه
-نيران:ياريت والله عمو كلش فشلني خلاني ابجي البارحة والصراحة الصراحة طردني من المحاضرة
-ماهر:وليش طردج؟
-نيران:لان لما رزلني كلتله دكتور ترا ما طولت اهواي وانتَ تتاخر لبين ما تدخل للمحاضرة وكلي انوب تجاوبني ترديلي وكلي يلا برا بعد ما اشوفج بمحاضراتي الا قبلي اشوفج كاعدة وتنتظريني
-ماهر:هسه انزله تايهتله انتِ ويطردج مو بكيفة
هزت راسها نيران بقهر وتوقف السيارة مقابيل جامعة
سما ودعتنا ونزلت وبعدها وصلنا نيران وماهر نزل وياها تفاهم ويه الدكتور وحتى ويه نيران علمود ما تتأخر المحاضره بعد واني هم وصلني للجامعة
ونزلت
التقيت ويه صديقاتي الجديدات ومع الاسف اني وسما ونيران كل وحده من عدنه بقسم
وصار عدنه صديقات جديدات،انتهى الدوام ورجعنا للبيت وسما ونيران رجعناهم لبيت عمو لهيب
رحت بدلت ملابسي واجيت اكلت وعمو ماهر طلع وراح واني رحت نمت وبعدها كمت درست
واندك الباب رحت فتحته وشفت ماهر ونيران وسما
وجان بايد ماهر كيكة شكلها كيوت وعليها ورود وبيها شمعة يشتعل
واردف عمو ماهر
-ماهر:كل عام وانتِ بخير توليب
-غيم:ياااي حتى اني جنت ناسيه عيد ميلادي
-ماهر:ما جنت ادري سما ونيران كالولي اليوم عيد ميلادها
ابتعدت عن الباب ودخلوا ونيران وسما سلموا عليه واني سديت الباب ورحت للصالة وراهم
توقفت مقابيل ماهر والكيكه بايدة وسما كالتلي تمني امنيه وطفي الشمعه
واني تمنيت وطفيت الشمعه وهمه صفكوا وماهر عاف الكيك وراح يغسل
اجه وقصيت الكيكه واني جنت كلش فرحانه لان نفسيتي تعدلت كلش من هموم الدراسة
وتقدم ناحيتي ماهر وطلع من جيبه علبه صغيرة ومدها الي اخذتها وشفتها سماعات تلفون الي صارلي شهر كاتله نفسي عليها واريدها
رفعت عيوني اله وضحكت واردفت
-: شكررررراً احبكك اني كلش
-ماهر:اني هم احبج توليب وتدللين انتِ
فتحت السماعات جانت نفس الي اريدها بالضبط
ونيران وسما ملتهين ياكلون
ردت احضن ماهر من الفرح بس استحيت كدامهم
فرحانه لهل سماعات لان شفت المشهورة الاحبها عندها مثلها
جلسنا كلنا ويه بعض ونسولف ومتونسين
ونيران وسما جايبين ملابس الهم علمود يبقون يمي واني كلش فرحت بهالشي وصعدنه فوك رأساً
وفرشت الهم بالغرفة واجوو تمددوا وجلست سولفت وياهم شوية
-نيران:هاليوم جان يوم حلو تونست كلش اليوم وفارس وعمر جانوا يمنا متت ضحك على سوالفهم واكثر شي فرحت عليه لما الدكتور الغثيث ما كدر يرزلني لان دخلت المحاضره متأخره بس خزرني
-سما:ولج نيرااان لا تجيبين طاري فارس وعمر كلش مقهورة منهم
-نيران:شبيهم والله يضحكون بس انتِ نفسية
-سما:ولجج كسروا المكياج مالتي
-نيران:اي عادي تشترين غيرة
-غيم:اني هم كلش تونست حتى اني ما جنت حاسه عيد ميلادي
-نيران:سما اتصلت لعمو ماهر وكلتلة عيد ميلادج واجه اخذنه نحنا الاثنين بسرعة واجينا
-غيم: والله تغيرت نفسيتي كلش فرحت
-سما:فرقتنا الاقسام مع الاسف
-نيران:لعد ما طلعتوا طب اسنان؟
-سما:ولعد انتِ ليش ما صرتي دكتورة تخدير
-غيم:وانتو ليش ما درستوا صيدله
-نيران:اوووف كل وحده سوت الي تحبها وعاجبها
-سما: بس صاير عندي صديقات كلش لطيفات
-غيم:اني هم افتر ويه شلة بس يتجاهلوني كلش احس نفسي غريبة بينهم كلش
-نيران:اني عندي بس صديقه وحده وكلش لطيفة ومن الدكتور يرزلني هيَ تلكالي عذر
-سما:غيمه معليج منهم لا تهتمين خيولن وامشي وحدج لا تهتمين لاحد
-غيم:ما احب امشي وحدي كلها بسببكم عفتوني وحدي ورحتوا كل وحدة قسم
-نيران:بنيتييي تعاي لحضني تعاي
تقربت منها حضنتني وباست راسي واردفت
-نيران: معليج منهم دوريلج على صديقة ثانيه
-غيم:ما اريد راح اضل لازكه بيهم الى ان ينطوني وجه وينتبهون الي
-سما:اذا خلصت محاضرتي من وقت اجي عندج
-غيم:لا ولج اكو مسافة بعيدة بين الجامعه مالتي ومالتج
-سما:لا اجي يمج عادي
-نيران:لا ولج عمو ماهر ما يقبل يضل باله
-سما:اني اكول اله معليكم
هزيت راسي وسولفنا شوية وبعدها نزلت جوه ودخلت للغرفة شفته توه مبدل ملابسة
رحت بسرعة ركضت اله وحضنته من ايده وهو ضحك بصوت ناصي وسحبني لحضنه وباس راسي
-غيم: شكراً كلش كلش
-ماهر:تدللين توليب وامريني أي شي تريديها
-:ما اريد شي بعد انتِ جبتلي كل شي اريده
-:تدللين توليب هدفي تفرحين حياتج كله
باس راسي واخذ ايدي يبوسها باس ايدي وهمس
-ماهر:ايدج كلش صغيرة توليب
-:اي مال اطفال
ضحك وباس خدي وهمس
-ماهر:واحلى طفلة انتِ بنيتي ومرتي وكل شي بالنسبة الي
-:احبك اني عمو
-:بس لا تكليلي عمو
-:تمام ما اكول
-:اني هم احبج توليب واموت عليج
بسته على خده وابتسمت فرحانه وهو مبتسملي هم
ورحنه تمددنه وخلاني بحضنه ونمنا،مرت الايام بنفس الروتين وسما ونيران دوم يجون يبقون عندي شوية ويرجعون ومرات ينامون عندي بالغرفة الفوك
حكايتنا اني وعمو ماهر جانت كلش عاديه
بس هو عوضني عن اهواي اشياء بحياتي وما قصر وياي بشي ابد
اني وياه ما صار عدنه اطفال لان ما نريد حالياً
وعمو ماهر شخص كلش متفهم وصبور ويحبني كلش
وما يرفضلي طلب ومعيشني مثل الاميرات
واهم شي دوم يجمعني ويه سما ونيران ويطلعنا كلنا سوه وما ينزعج ابد ويحب يطلعنا أصلاً ويحب يشوفنا متونسين اهم شي
وما مقصر ويانه ثلاثتنا حتى ويه نيران رغم نيران بعدها تستحي منه وهو يكول الها حالج حال اختي سما اعتبرج اختي ومستحيل اقصر ويه خواتي
وهسه اني وعمو ماهر واقفين بالمطبخ
اني ارتب المطبخ وهو يساعدني بغسل المواعين
وكملنا الشغل ورحت سبحت وكملت وطلعت للحديقة شفته يسقي بالورود مالتي
واني رحت بجانبه وهو كمل سقي الورود وناظرني أشر عليهم واردف
-ماهر:هذني كلهم مزيفات انتِ الوردة الاصلية توليب
ابتسمت وتقربت منه وحضنته وهو باس راسي وحرك ابهامه على وجهي بهدوء ورفع وجهي اله
وباسني على خدي وهمس
-ماهر:احبج توليبه غيمه واموت عليج
-:اني هم احبك عمو ماهر
-:هههه رجعنا لعمو!
-:احبك ماهر
-:وماهر يموت عليج توليب
ضحكت وضليت بحضنه واناظر الورود وهو يمسد على شعري وانتهى الحكايه وبطلي كان احسن بطل بالنسبة الي لانه عوضني عن اهواي اشياء و اولهم حنان الاب الي فقدته حسيته بيه.
∆∆∆
'نـار'
مرت الاشهر وخلال هاي الاشهر ولدت بسلامة الحمدلله و ولدت ولد وسميناه حيدر
وحالياً حيدر عمره شهر ونص وخلال هالشهر ونص ما تعبت اهواي لان لهيب جان يهتم بحيدر أكثر
والغرفة الثالثة الموجودة بالبيت حضرناها لحيدر
وحيدر طفل مزعج كلش كلش وهواي يبجي
وهسه حالياً لهيب بالشغل واني بغرفة حيدر اريدة يسكت بس هو ضل بس يبجي
تفقدته هم نظيف وهم شبعان وهم ما منزعج من شي معين وضل يبجي واني دموعي تنزل وياه
وابجي وياه لانه يبجي وما يسكت وصوته سببلي
ازعاج كلش قوي وما اتحمل بعد واردفت بغصة ودموعي تنزل
-نار:ليش ما صرت مثل ابوك ليش ما صرت هادئ مثله ليش!!!؟
صرت ابجي اكثر وهو هم يبجي وشلته من السرير ابوس بيه علمود يسكت واردفت وغصة ببلعومي و دموعي تسيل
-نار: هاي ليش انتَ مختلف عن ابوك حتى ابوسك وما تسكت اني اذا ابوس ابوك يتغير كل احواله ويكلي نار بس أمريني
زاد صوت بجي وصوته يخرش
وحتى سما ونيران مو بالبيت رايحين لعند غيم
واني محتاره بابني
عفته بالكريكوت ورحت شلت تلفوني واتصلت على لهيب وردلي من اول مكالمه وبعده توه يريد يسلم عليه واني قاطعته واردفت
-نار:لهيب تعال ارجع للبيت حيدر موتني من البجي وهو هم يبجي وصوته كلش مزعج واني كلش حايره عود ليش ابنك مو هادئ مثلك هاا ليش!!!
-لهيب:ليش تبجين ناره؟
-نار:لان ابنك يبجي وخبلني بصوته
-لهيب: دقائق واجي
سديت الخط بوجهة وحيدر بعده يبجي مسحت دموعي ونزلت دموعي مره ثانيه
اخذته من الكريكوت وكلتله
-نار:اصبر حيدوري هسه يجيك بابا يسكتك كافي عاد لا تبجي اني تعبت اسكت حبيبي يلا اسكت وصير حباب مثل ابوك
التفتت على صوت دك الباب استغربت مستحيل لهيب يوصل بهالسرعة عفت حيدر ومسحت دموعي ورحت فتحت وجانوا فارس وعمر ولما شافوني استغربوا واردف عمر
-عمر:الملكه تبجيييي؟
-نار:اي والله ابجي حيدر خبلني بس يبجي
-فارس:وينه ولي العهد هسه نحنا نأدبه
-نار:اي ادبو عفية
دخلوا للبيت وراحو لغرفة حيدر وشالوا حيدر من الكريكوت وعمر صار يحركه وهو بحضنه
ومع ذالك حيدر ما سكت وضل يبجي واني ابجي وياه وفارس التفتلي واردف
-فارس:لا تبجين سمو الملكه تبجينا وياج
-نار:شلون ما ابجي حيدر شلع گلبي
-عمر:ملكتنا تحتاجين مربية خاصة لـ ولي العهد
-نار:اي والله بس تعرفون لهيب يرفضلي كل طلباتي
-فارس:لانه فكر سمو الملكه انتِ متزوجه من واحد فكر
-نار:اي والله
التفتت على دك الباب ورحت فتحته شفته لهيب وهو دخل بسرعة لغرفة حيدر ولما شاف فارس وعمر أستغفر واتنرفز منهم واخذ حيدر منهم واول ما اخذه حيدر سكت
اني وعمر وفارس كلنا ناظرنه بعض بقهر ليش صارلة ساعه ما يسكت ويانه وسكت ويه لهيب بثواني
-لهيب:انتو شجابكم؟
-فارس:كلت نجي نشوف ولي العهد وسمو الملكه نار
-عمر:والشخص العادي الفكر الي متزوجته سمو الملكه
-لهيب:لككككك!!!
-نار:حقهم لهيب حقهم انتَ لا تجيبلي تاج ولا تجيبلي مربية تربي حيدر
-لهيب: أستغفر الله فارس وعمر اطلعوا يلا حتى سما ما موجودة علمود تضحكون براسها
-فارس:ما جايين يمك جايين لعند سمو الملكه
-نار:اي جايين عندي معليكم من لهيب
ضحكوا وطلعوا للمزرعة وهمه يتكلمون بالتلفون ويه حبيباتهم
واني مسحت دموعي ولهيب يبوس بحيدر ومخلي بحضنه واني توقفت مقابيلة واردفت
-نار:ليش ابنك مو هادئ مثلك
-لهيب: طبيعي هالشي لانه طفل نار طفل شتترجين منه؟
-نار:لهيب ليش تصيح عليه؟
-لهيب:وين مصيح عليج؟
-نار:حبيبي حيدوري ليش تسكت ويه بابا وما تسكت وياي ها؟
عدلت شعري وبلعت ريقي ورجعت اردفت
-نار:يلا جاوبني حيدوري
-لهيب:منتظرة منه يجاوبج؟
-:اي ليش ما يجاوبني؟
-: طبيعي لانه طفل عمره شهر ونص وينه وين الحجي؟
-نار:اي صح نسيت
-لهيب:روحي نامي اذا تعبانه اني اضل ويه حيدر
-نار:لا ما اروح مو تعبانه
-لهيب:براحتج
جلس على الارض هو وحيدر بس حط حيدر على الكريكوت وهو طلع تلفونه وصار يتكلم ويه محمود بالاتصال،مرت اليوم وثاني يوم اجوو البنات
والعصر اجوو فارس وعمر ولهيب جان طالع وحيدر نايم الحمدلله
ونحنا جالسين ويه بعض بالصالة
ونيران تضحك على سوالفهم وتكول
-نيران:مسويين اختي ملكه؟
-فارس: أصلاً هيَ ملكه
-نيران: والله مضحكين انتو وانتِ نار فعلاً مصدكه انتِ ملكه
-فارس:وليش ما تصدك هاي ملكتنا والسيدة الاولى لامريكا
-نيران:هههههههه اخخ بطني راح اموت من الضحك وحيدر ولي العهد مو؟
-فارس:لا حيدر شخص عادي لانه ابن شخص عادي ونار ملكتنا المتواضعه راضية بيهم
-نار:اي والله اني ملكه وهمه اشخاص عاديين
-نيران:تسمعين سوالفهم سما !! هههههه
-سما:ههههه نار ملكة بريطانيا واسبانيا ورئيسة وزراة العراق والسيدة الاولى بامريكا ههههه سخيفين ونوب شيخة الامارات
-نار:ولكمم تعيبون عليه؟؟؟؟
-عمر:معليج منهم ملكتنا يغارون منج اكيد
-نار:على طاري امريكا شلونهم حبيباتكم الامريكات؟
-عمر:ولج لا تسئلينا عنهم
-نار:ليش
-عمر:فد سخيفات وعدهم سوالف سخيفة سبيت حبيبتي الامريكيه مره وكالتلي لا اسمح لك ان تسبني وسارفع قضية عليك ولج كوه قنعتها اتشاقة وهمه ما يعرفون شي عن الشقة واني توسلت بيها علمود تنسى السالفة عمي وينها هاي وحبيباتي العراقيات وينهم عمي حبيباتي العراقيات من كد ما يسبوني اذا ارفع قضية عليهم ينسجنون مؤبد
-سما:شكد الك خلك لهيج سوالف تافه عمر
-فارس:هذا ما يعرف يتعامل اشو اني حبيبتي الامريكيه تكلي تعال اتزوجني نحنا ما علينا بسوالف المهر وهيج تكول نحنا عدنه نجيب اطفال بدون زواج حتى وعادي
-نيران:ايععع استغفر الله عاد هذولة كفار ترا
-فارس:ادري اكيد وثاني شي اني ما اخذهم بجدية بس اسايرهم
-نيران:تضحك على بنات الناس يعني؟
-فارس:طول عمري اضحك على بنات الناس مو شي جديد
-سما:ايععع وتفتخررر ولي يلا انتَ مو اخوي
-فارس:انجبي يلا ولج
-سما:الا اكول لـ لهيب عليك
-فارس:كولي لياهو الجان عدنه ملكه واسطة النه بكل شي
-نار:اي صح
-نيران:نار ترا تشجعيهم يضحكون على بنات الناس
-فارس:وانتِ شعليج عمة ولد خالة بنيه؟
-نيران:عدكم اخت ترا الدنيا يدور بيها
-فارس:لا سما حافظة دروبنا ولهذا ما راح تنطي وجه لاحد
-سما: ايععع نار احجيلهم شي عود انتِ كبيرتنا اهنانه
-عمر:اصحح الغلط هيَ ملكتنا
-نار:لا لا فعلاً شباب هالشي كلش عيب عوفوا هالسوالف لخاطر ملكتكم
-فارس:اعوف الامريكيات بس العراقيات فلا اعوفهم
-عمر:اني هم
-نار:اذا لهيب حجه وياكم اني معليه
-فارس:عادي ملكتنا لا يهمج هسه لهيب يحجي يحجي ونحنا نخلي بوضع الصامت ونكمل دربنا
-نيران:صدك ما تستحون
-فارس:هاي انتِ شعليج فعلاً ؟ ترا والعباس حتى ما نطلب منهم صور ولا عدنه سوألف طايح حظها بس هيج نحجي تسلية
-نار:شعليكم منهم بنات التهوا بنفسكم
-عمر:عفية بملكتنااا
-فارس:بس ملكتنا تعرف تحجي
نيران غمتنا وكامت ويه سما وراحو للغرفة ورجعوا مره ثانيه وبايد سما مسطره رفعتها على عمر
ونترت بيه
-سما:اضربك بهالمسطره اذا ما عفت هالسوالف
-نار:ولج عليمن تضربي خطية
-سما:انتِ الثانيه اششش لازم يجي لهيب يربيج انتِ هم ويكبر عقلج
-نار:عززززه سماااا هيج تحجين ويااي !! تقللين ادب ويااي!!؟ لا ما توقعتها منج
-سما: نار فترة من الفترات جنت اشوفج وحده عاقلة يعني عقلها كبير وتنصح ومدري شنو طلعتي غير شي
-نار:قصدج اني طفلة وعقلي صغير؟!!
-فارس:ملكتنا عقلها تسواكم كلكم
-عمر:ولكم اني جوه التهديد اذا احجي شي تجيني مسطره معدله
-فارس:اسكت خوية اسكت
-سما:اذا ما اكول لالهيب عليكم بسيطة
-عمر:اييييييي شووو دوخرييي زعطوطه جايه علينا بالمسطرة وتهددنا بـ لهيب وتحجي على ملكتنا ونحنا ساكتيننن لا عينييي لااااا ولجج سمااااا انه اخوججج اخووج الي تحمل كل مصايبج وانتِ صغيرة جنت اكل ضربة من ابوي بسببج
-سما:انجببب يلا وخررررر ايدككك من المسطره
-فارس:اريد اكوم عليج بس اتذكر انتِ اختي واكعد
-نيران:خوو لا تتذكر كوم مد ايدك عليها
-فارس:انتِ الثانيه اششش لعد ما تصيرين مثل اختج؟ بس صحيح ملكتنا تختلف بكل شي
-نيران:عاد شلون ملكه عدكم وحده ما عدها عقل
-نار:عززززه ونوب انتِ هم نيران هسه سما كلتلها اخت زوجي وحبت هسه تطلع سمها عليه بس انتِ شبيج؟
-سما:قصدج اني مسمومه؟
-نار:يعني قللتي ادب وياي وكلت هسه تطلع حركات اخت الزوج
-سما:ولج اضحك عليج اني بس علمود تبطلين تدافعين على فارس وعمر
-نار:هاا اهااا ارتاحيتوا كعد حيدر راح يخبلني اني بدالكم خل اكومله
-فارس:لا سمو الملكه جيبي ولي العهد يمنا
-نار:لحظة تمام
رحت جبت حيدر يمهم وحيدر بس يبجي وما سكت يمهم شالته سما وسكت ناظرنه بعض اني وفارس وعمر باستغراب وعمر نتر
-عمر:عود ليش يسكت يمج ويم لهيب وما يسكت يمنا؟
-سما:لان الطفل يحب الشخص الهادئ مو الصوته واصلة لسابع جار
-نار:قصدج عليه
-سما:لا على فارس وعمر وترا نار اني ما عندي شي وياج والله بس اتشاقة لا تشوفيني مسمومه
-نار:لا هاي هيَ انطبع عليج اسلوب المسمومه ما اكدر اشوفج غيرها بعد وراح احسج تقصديني بكل كلمه
-سما: هاي شبيج ولج لا تزاعليني اعتذر منج
-نار:اي خوش مقبول اعتذارج
-نيران: هسه عمر وفارس يكولون ملكه وقبلت الاعتذار
-فارس:اي والله شلون اخذتيها من لساننا
-عمر:علمود تعرفون ملكتنا شكد متواضعه
-نيران:نار ترا هذولة يقشمرون عليج
-نار:انجبي معليج بيهم
-نيران:اخت جيس حب انتِ؟؟؟
-نار:اني ملكه وتاج على راسج
-نيران:ملكه كلت اوكِ بس تاج على راسي لا هايي ستووووب هاي واقفة!!!
-فارس:واقفة لو كاعدة ههههه
-عمر:كاعدة لو متمدده هههههههه
-نيران:هيهيهي سخيفين
-سما:اي والله
-نار:اخر مره اشوفكم تحجون عليهم ما اسمح ترا
-نيران:شو دروحييي ام عقل صغير
تجاهلتها وسما جلست وحيدر بايدها،مرت كم يوم بنفس الروتين رحت لغرفة حيدر اليوم صوته خنسه ما اسمعه حتى وتقربت من سريره وشفته فاتح عيونه وساكت لا يبجي ولا شي بس يرمش بهدوء
واني اردفت
-نار:حبيبي شنو عديت من هدوء ابوك؟
شلته وفتحته من الكماط وخليته بالكريكوت وجلست بجانبه الاعبه
-نار:ما متعودة على هدوئك اني اكيد مسوي شي لان انتَ طالع عليه ما تصير هادئ الا لما تسوي مصيبة كول شمسوي !
صار يحرك ايده واني مستغربة من هدوئة لان مستحيل يكون هادئ لما يكعد دوم يبجي الا ويه لهيب وسما يضل ساكت
واني ما حبيت هدوئه لاني مو متعودة عليه واردفت
-نار:حبيبي حيدوري اذا ابوك يخوني ابجي
بجه والله فعلاً صار يبجي واني فتحت عيوني على وسعها هاي اكيد رسالة من رب العالمين
عفت حيدر وكمت من جبت تلفوني واتصلت على لهيب مره مرتين ثلاث مرات ما رد الا لما رجع هو اتصلي وجاوبته بسرعة وبدون لا هلا ولا مرحبا نترت
-نار:وين انتَ ليش ما ترد اكيد تخوني مو ويامن تخوني كول كول ويامن تخوني؟
-لهيب: أستغفر الله العلي العظيم شكو نار هم گابه هرموناتج؟
-نار:حيدر جان هادئ اليوم وكلتله اذا ابوك يخوني ابجي وهو بجه والله بجه
-لهيب:لحظة نار
سد الاتصال بوجهي واني انقهرت اكيد انشغل بالي يخوني وياها ودقيقة تقريباً اجه رسالة منه فتحت الرسالة شفته فيديو فتحت الفيديو وشفت مصورلي ملفات ومكتبه بالمحكمه ومحمود وياه و واحد لابس روب محاماة هم وياه بالمكتب والملفات مطشرة ومصورلي كل شي وحتى ايده مصورها والقلم جاف بايدة والختم هم
وكتبلي رسالة وكاتب بيها
-لهيب:اني بيا حال وانتِ بيا حال نار ! اكيد حيدر يبجي من ازعاجج اله
-:قصدك اني مزعجه ؟
-: لا اني،يلا مع السلامه عندي روحه للمركز هم
عفت التلفون بدون ما اردله ورحت لحيدر وهو رجع سكت واني اردفت
-نار:ابوك يكلي مزعجه انتو المزعجين انتَ وابوك اكبر مزعجين بالدنيا كله
بعد ما مرت كم شهر واستقرينا كلنا وحيدر كبر كم شهر ونحنا قررنا نسوي العزيمه الي جنه نريد نسويها بدال العرس وعزمنا بيها رافد وبهار وماهر وغيم وفارس وعمر وعزمت موج هم بس موج جانت مسافرة
واليوم هو العزيمه واني تجهزت وجنت لابسة فستان ابيض بسيط ومخلية حجاب على راسي
وسما تساعدني بالطبخ و اول الناس وصلوا فارس وعمر وطلعت اني فتحت الباب الهم وهمه دخلوا وسلموا عليه وعمر جان ايدينه وره ظهره وفارس اردف
-فارس:ملكتنا عدنه مفاجاة الج
-نار:شنو هو؟
طلع عمر ايدينه من وره ظهره وجان بايدة تاج لونها فضي وعليها حجرات وهيج اشياء واني ابتسمت بفرح واردف عمر
-عمر:مفاجاة بسيطه اكيد ما تليق بملكه مثلج المفروض تكون الماس او ذهب بس هاي عاديه
-نار: شكررررراً كلشش تجننن
اخذته من ايده وخليته على راسي وفارس اردف
-فارس:معقولة ملكتنا تبقى بدون تاج ؟
-نار: شكراً كلش سويتوا الي لهيب ما سواها كلش حبيتها تجنن
-فارس:تستحقين احسن من هاي يا ملكتنا
-عمر:تستحقين تاج من الماس وذهب يا ملكتنا والسيدة الاولى بامريكا ورئيسة وزراة العراق
-نار:انتو كلش لطيفين
طلعو سما من المطبخ ولما شافتني وشافت التاج ضحكت واردفت لعمر وفارس
-سما: والله عدكم سوالف
-عمر:لعد نخلي ملكتنا بدون تاج؟
-فارس:وين اكو ملكه بدون تاج ونحنا ملكتنا احسن ملكه
-نار:اي والله
ابتسمولي وطلعوا للمزرعة وبعدها بنص ساعه وصلوا ماهر وغيم ولهيب اخذ حيدر بايدة وطلعوا للمزرعة كلهم واني وسما بعدنه نطبخ وخلينا غيم ونيران يرتبون بناحية معينه ويفرشون بيها كل شي لان راح ناكل بالمزرعة
مرت دقائق و وصلوا بهار ورافد وبهار اجت دخلت جوه يمي وحضنتني وسلمت عليه
وكلتلها تجيب مرام يمي وراحت جابته واجت اخذتها لحضني ابوس بيها وناظرت بهار واردفت
-نار:خطبتها لابني من هسه
-بهار:لا ما انطيها
-نار:لا حيدر نهى عليها هاي هيَ
-بهار:انجبي وجيبيها
-نار:هاي بنتج تبين هادئه
-بهار:وينها وين الهدوء مخبلتني جيبيها ابوها يريدها
-نار: هاج
اخذت مرام وراحت اخذته لابوها ورجعت ونحنا كملنا كل شي ورحنه رتبنا كل شي بالمزرعة وفارس وعمر مسويين ماهر ولهيب ورافد ميز تنمر ونحنا كلنا جلسنا ناكل وفارس وعمر مسوينهم ميز لحد هسه
ورافد نتر بيهم
-رافد:لو ادري هذولة موجودين فلا اجيييي
-عمر:نحنا النه دعوة خاصة من ملكتنا
-رافد:منو ملكتكم؟
-فارس:سمو الملكه نار
ناظروني كلهم ولما شافوا التاج على راسي ولهيب يهز راسه مأيس مني ومن فارس وعمر
ورافد ضحك باستهزاء واردف
-رافد:هاي ملكه؟
-عمر:اي طبعاً هاي تاج على راسنا
-فارس:ولكمم هاي ملكة بريطانيا واسبانيا ورئيسة وزراة العراق والسيدة الاولى بامريكا وملكة كل الدول الباقية وشيخة الامارات
-عمر:اي والله
-نار:شكد لطيفين انتو اذا اني مو ملكه منو ملكه غيري هااا!!!
-رافد:ضاحكين عليج هذولة
-عمر:منو يتجرأ يضحك على ملكتنا
-فارس:وانتو الزعاطيط ليش ما تخدمون ملكتنا ليش هيَ تخدم نفسها بنفسها وتتعب وين اكو ملكه تتعب وماكو عدها خدام
-نيران:قصدك ويانه اني وغيم؟
-فارس:اي وياكم اليوم بس سما ساعدتها انتو شنو منتظرين؟
-ماهر:لكككك ادبسزززز مسوييهم خدم؟
-عمر:اي طبعاً لعد ملكتنا وحد ما عدها خدم؟
-نار:اي والله اني وحد
-لهيب:شوكت تنتهي هالمسرحية فارس وعمر ؟
-عمر:مالي كلمه عليك لخاطر ملكتنا المتواضعة الي رضت عليك
-فارس: احسن ملكه متواضعة
-لهيب:بالعباس كلمه زايدة اطردكم
سكتوا فارس وعمر وكوه لازمين ضحكتهم وصاروا بس يتهامسون بيناتهم،مرت الوقت والكل رجع لبيته
واني خليت سما ونيران يغسلون المواعين لان ما بيه
حيل وهسه اني ولهيب بغرفة حيدر ولهيب حاضني واني اردفت
-نار:لهيب وخر انتَ شايفني وحده عاديه مو ملكه
-لهيب: استغفر الله لج بابا عمر وفارس يضحكون عليج
-نار:لا ما يضحكون وهمه احسن منك شوف جابولي تاج
-:تمام يابه انتِ ملكه وحتى اني اعترف انتِ ملكه واحسن ملكه يلا
-:لازم تحمدون ربكم عليه انتَ وحيدر رضيت بيكم
-: الحمدلله الك يا ربي لان خليت نار ترضى بيه وبابننا
-:هههه شوف خليتك تعترف
-:هههههه منو يكدرلج انتِ
-:بس الله
-:اكيد
-:لهيب هسه قصدك اني وحده ام لسان ومحد يكدرلي
-:لا حبيبتي قصدي انتِ ملكتنا محد يكدرلج غير الله
-:ها اي صح
-:هههه ملكتنا نار الحلوه
-:يلا نوم ابنك اني ما بيه حيل
-:تأمرين أمر ملكتنا
عفته ينوم حيدر واني طلعت بدلت ملابسي وسما ونيران توهم خلصوا غسيل المواعين وراحو ينامون
ولهيب نوم حيدر كوه واجه بدل ملابسة ونمنا نحنا هم
انتهى حكايتنا نحنا هم ونهايتنا سعيدة
لهيب ما نسى شمس ولا اعتقد بيوم ينساها بس اعرفه يحبني والغرفة الي بالبيتونه ضلت لحد هذا يومنا واني ما كلت شي ولا حجيت
لان كبرت عقلي اكثر ولازم اتفهمه هالشي مو بايدة ابد
اني لهيب احبه وهو هم يحبني وكلش زين وياي وما مقصر بشي ابد واهم شي صار اب كلش زين لـ حيدر
وجانوا هو وحيدر اهم شي بحياتي
ولهيب يحبنا كلش والاهم من هذا اب صالح لـ حيدر وزوج صالح الي
مرت ثلاث سنوات بالضبط وحيدر كبر وصار يكدر يتكلم حتى بس اكيد ما يتكلم بطلاقية
خلال هالثلاث سنوات نيران هم تزوجت من دكتورها بالجامعة وجان زوجها خوش واحد وخوش رجال
وسما ماهر مجهز الها غرفة ببيته هو ومره تبقى يمنا ومره يم ماهر وماهر ولهيب يتعاركون عليها
وفارس خطب بس بعده ما متزوج وعمر بعده عزابي وصار يروح للكليه بس معانات ثلاث سنوات بالسادس وصار بكلية التمريض كوه
واني جان عندي املاك من خوالي الي اخذتها غصباً عليهم وكل هالاملاك نفيتها بمعنى كل الاوراق مال الاملاك الي تدل على ان الاملاك باسمي حرقت هذولة الاوراق كله وماكو شي يدل عندي املاك ولهيب الي شجعني على هالشي لان ما يريد يكون عندي املاك من ناس مجرمه
خلال هالثلاث سنوات ركزت بنفسي وعائلتي فقط
وشغلي رجعتله بس ما صرت اوافق على أي قضية
صرت اوافق على قضية سهله وتنحل بسرعة
والباقي ارفضهم ولهيب كوه جان يقبل استلم قضية أصلاً
نحنا كلنا عشنا حياتنا بسعادة واكيد ما نسيت امي وابوي وكل فترة ازور قبرهم اني ونيران
وكل فترة نوزع ثواب على روحهم
وما نسيت ياسر الي دمر حياتي وخلاني يتيمه طول عمري وما سامحته ابد
يمكن نحنا باكملنا قصتنا قصة عادية كلش
بس الي نحنا حسينا بيهم ما جانت عادية طفولتنا ما جانت عادية ابد وهسه يلا كدرنا نعيش حياتنا بسعادة
واحب اكول الكم كونوا اقوياء وكونوا صبورين كلش
ولا تتهورون ابد وقبل لا تقررون بشي كبير فكروا الف مره واهتموا بنفسكم وباهدافكم وعائلتكم وحققوا احلامكم واعرفوا تختارون كل شي صح
ولا تنسون رب العالمين دوم وياكم
واقفين بالمزرعة اني ولهيب واني شردت منه
لانه ضربته على كتفه بقوة وهو خطيه ما يتحمل شقة ابد ويركض وراي واني اضحك
وضليت اركض الى ان كدر يتلمسني وسحبني لحضنه وظهري على صدرة ضحك وكال
-لهيب:ايدج ثگيلة ناره ؟
-:خطية انتَ ما تتحمل شقة
-:هههه،احبچ يالمتهورة
-:واني اكرهك الهادئ.
الختام:انتهى الوجع، وتوقفت كل الصرخات.
وجاء الفرج كأنه يُربّت على قلوبهم.
****
النـــهايـة
اجمل ما كتبت ايدي فعلاً
شعوري متخربط واني اكتب النهاية
من ناحية حزينه لان راح اشتاق لايامهم
ومن ناحية فرحانه لانها انتهت بنهاية سعيدة
وابطالنا كانوا ابطال رائعيين بالنسبه الي
وتعلمنا من نار القوة
ومن بهار الصبر
ومن موج انو ننسى الماضي ونركز على حياتنا الجديدة
وانتو شنو رائيكم بالنهاية؟
اني ما انكر اختصرت منها اهواية
بس حرفياً تعبت كلش
وبطلاتنا يحبونكم كلش ويسلمون عليكم
ومع السلامة يا احلى ناس
تعالو لقناتي التلي نسولف شوية عنها ونتذكر
بعض سوالفهم ويمكن تجي نار هم تسولف وياكم👇🏻