مساء الخير للجميع ...مثل ما اتفقنا هذا اخر بارت قبل رمضان ..ورح نكمل باقي البارتات بعد رمضان بإذن الله ....
اتمنى ما احد يحكي البارت قصير ....ربي يعلم الضغط الي فيه وما معي وقت ومع ذلك ضغطت على نفسي حتى ازيد البارت عن البارت المعتاد ...
شفت ذيك المرة تعليق إنه البارت لا يستحق الانتظار ...كالعاده متعوده على الاجحاف في بعض التعليقات ...
اعجبني ذيك المره مقطع شفته لشخص بيحكي عن انمي انا حالياً بتابعه وبينزل حلقه كل اسبوع ...فهذا الشخص بيحكي عن الانمي انه جميل بس مشكلته الحلقه قصيره بالنسبه لمرة بالاسبوع والحلقات مو دائما يكون فيها احداث..فحلقات الانمي بينفع معها تحضرها متتابعه حتى تحس بجمالها ..علشان هيك رح يوقف حضوره حتى يكتمل تنزيل الانمي ويحضره مره وحده ويستمتع فيه!!
مع إنه هالشخص نفس المشكله الي بتصير مع بعض المتابعين إلا أنه حكاها بطريقه جميله بدون ما يقلل من شأن الانمي ...
ما حكى إنه الحلقه ما تستحق الانتظار ...كم من الوقت اخذت معي كتابه البارت وبكل بروده نهايه البارت تعلقي البارت ما يستحق الانتظار !!!
ما احد طلب منكم الانتظار ..اعملي سكيب وما احد يضيع وقته على شيء ما يستحق الانتظار ....
بالنهاية رمضان كريم وكل عام وانتم بخير ❤️
وضعت الحقائب وبعض الاغراض وهي تصدر صوت مزعج ...
سراج متمدد على السرير .. نطق وهو يناظرها والعبوس مرتسم على ملامحها: لما تكملي ترتيب قفلي الضوء ..وحاولي ما تصدري أي صوت لأني ابغى انام!!
نطقت وهج بعبوس بدون ما تناظره : إن شاء الله..
اكره ما عليها ترتيب الملابس ..لو يطلع بيدها تضع الملابس كلها فوق بعضها ..وحسب وقتها ترتبهم ...
نعسانه وكأنه يعاقب فيها ..صدق شرير ...لكن هي تعرف تداويه ...
بدأت ترتب وتتحرك هنا وهنا وتظهر اصوات مزعجه تضرب الباب تعمل ضجيج من تحريك الاكياس وعلى ملامحها ابتسامه شريره ..خليه ينزعج مثل ما دوم يزعجها ...نقزت لما نطق بغضب:وبعدين معك؟!
اقولك ابغى انام !!!
هزت وهج كتوفها ببراءة وبيدهاقطعة ملابس: وش فيك ! مين منعك تنام!!
نطق سراج بتحذير: وهج اقولك ابغى انام ..اشتغلي على الصامت افضل لك
نطقت لما وصلت لمبتغاها: خلاص اكمل ترتيبهم باكر حتى ما ازعجك!
وش قلت؟!
قاطعها بإصرار وهو متأكد متعمده تزعجه: ورب الكعبه الا ترتبينهم الحين!
وعلى الصامت!!
كشت عليه بقهر لما اعطاها ظهره ورجع يحاول ينام ...
مسكت نعال لها وهي تناظره بتفحص لو ضربته على رأسه ..اكيد رح ينفلع رأسه !!
ألقته من يدها بقهر وهي تتمنى تضربه فيه ..سرعان ما جحظت عيونها لما اصطدم بظهره بالغلط ....
رجعت خطوة للخلف وهي تنطق باعتذار لما نهض ومسك النعال بيده : والله بالغلط زلق من يدي!!
سراج يقلب نعالها بيده وهو يحاول يكتم غيضه ...نطق بفحيح متوعد: وهج اختصري...ما ابغى اسمع همس ..ما تعرفين تشتغلين وانت منكتمه!!
رمى نعالها بقرف على الأرض ودفن راسه تحت الغطاء وهو ماسك نفسه ما يقوم ويكسر راسها .. متأكد انها متعمده ...رح يشوف نهايتها معها!!
رجعت وهج تكمل شغل وهي تحاول تكتم ضحكتها على منظره لما اصطدم فيه النعال ..ليته جاء على راسه ... يمكن يكسر غروره ....
قفلت باب الكبت بقوة واصدر صوت عالي ...عبست ملامحها بتورط وهي تناظر جهته اكيد رح يقوم ويطردها من الغرفه ...وتتحقق غايتها يكون هو الي طردها ..وما يكون عليها إثم!!
زفرت بضجر لما ما اعطى اي رد فعل وما هو باين منه شيء ...ناظرت الاغراض بعجز ...متى تكمل. ....ملل وزهق ..يعني حضرته ينام وهي تجلس ترتب الاغراض ..كل قهره وعصبيته من بعد طلب جلسة التصوير ..ما تدري وش مشكلته بالضبط !!
قررت تجلب مكياجها وترتبهم هنا ...بعد وقت قصير رتبتهم وهي تناظرهم بأسف .. بحاجه لتجديد كل مكياجها ... بدأت ترش من عطوراتها وعطورات سراج تشوف مين اقوى واحلى ...
تجرب كل علبه ومنسجمه بالتجربه ...سرعان ما نقزت لما نهض من الفراش مثل الوحش وهو ينطق بغضب: بعدين معك ..كتمتيني !!
وبدأ يكح من رائحة العطور ..حمل الغطاء والوسادة وطلع وهو ينطق بقهر: عيشه تقصر العمر!!
كشت عليه وكأنها هي طلبت منه تنتقل هنا !!
مالت عليك يا متجعرف !!
رجعت تكمل رش تبغى تجرب لما تضع من عطرها على عطره وش تطلع الريحه ...
رجفت من صراخه وسقطت من يدها العلبه وهو ينطق : قلت خلااااااص !!
جالسه تعملين تجارب كيميائية ؟!
كملي ترتيب الاغراض واندفسي أفضل لك !!
ولا تجبريني اتعامل بطريقه ما تعجبك!!
تنفست براحه بعد خروجه ..نزلت للأرض وهي تمسك علبة عطرها انكسرت ....
عطرها المفضل انكسر ...رح تخليه يشتري لها بدالها لأنه بسببه انكسرت!!
طلعت من الغرفه حتى تنظف مكان علبه العطر ...ناظرت نايم على الكنبه بالصالة ..توجهت للمطبخ بخطوات حذره ما ابغى تعلق معه .. بدأت تبحث عن ادوات التنظيف ...
اصدرت اصوات بغير قصد وهي تبحث هنا وهنا ...واخيرا حصلتهم ...
اول ما طلعت كتمت أنفاسها لما شافته واقف بوجهها ...ملامحه يتطاير منها الشر. ..اول مرة تشوفه كذا ...من الرعب لسانها انربط وما قدرت تنطق حرف واحد ...نطق بفحيح حاد: انا وش قلت ؟!
تركت لك الغرفه ومع ذلك مصممه على ازعاجي!!
هذا اخر تنبيه لك ...احذر الحليم اذا غضب!!
أعطاها نظرة متوعده ورجع للكنبه بالصالة ونام عليها !!
قلبها ينبض بقوة ..ما كانت تدري إنه هالمراهق عنده وجه مخيف كذا ...
رجعت للغرفه بشويش وقفلت الباب خلفها بحذر حتى ما يصدر صوت !!
تنفست براحه لحظات رعب ...سرعان ما ابتسمت وهي تتذكر عصبيته ..خليه ينفجر ويطق من القهر ...دوم يقهرها بكلامه ...
نظفت مكان العطر ..وتركت اغراض التنظيف بالغرفه ما تبغى تطلع وتشتبك معه !!
ناظرت اغراضها عند الكبت بعجز وتعب...من الصبح طالعه وتعبانه وما لها حيل لأي شيء ...جلست على الارض ترتبهم وهي تثاوب من النعاس!
**
**
**
صحيت على صلاة الفجر ...صلت ورجعت للسرير ما عندها نيه تصحيه ...اكيد رح يصحى لوحده ...
اكتشفت فيه صفه لما ينام او يبغى ينام ما احد يقترب منه لأنه يتحول لوحش ..كل هذا علشان النوم !!
تمغطت وهي تحس بالراحه ....هذا السرير مريح حيل ..يا ليت يجلس بالصالة طول الوقت ويترك لها هذا السرير!!
غمضت عيونها باسترخاء..تحس النوم طار من عيونها ..قضت الوقت وهي متمدده وتناظر الفراغ ...وعقلها سارح بحياتها ....
كانت تتمنى اي شيء يلغي الزواج ..بس الحين تم ولزوم ترضى فيه ...
قررت تقوم وتعمل لها قهوة تعدل مزاجها ...ما تدري وش فيها مدمنه قهوة ...اول ما طلعت من الغرفه .. ناظرته نايم على الكنبه ومستغرق بالنوم...عقدت حواجبها لما انطرق باب الجناح بخفه...
وصوت خالتها عند الباب ...فتحت الباب بدون تردد وهي تنطق بابتسامة جميله: هلا خالتي!!
ام سراج ابتسمت باحراج:قلت اطرق الباب مرة وحده اذا كانوا صاحيين رح يسمعوا واذا ما ردوا يعني نايمين ...
وهج بابتسامة تركت الباب مفتوح كامل وهي تنطق : صاحيه دوبني كنت رح اعمل قهوة!!
ام سراج رفعت حاجب وهي تلمح سراج نايم بالصالة ..نطقت بهدوء: عيل تعالي اشربي قهوة معي وبعدها الفطور!!
هزت راسها بملامح مريحه وخرجت معها بعد ما قفلت الباب بهدوء ...
ام سراج بتساؤل:ما تبغين تبدلين ؟!
وهج ناظرت نفسها ...ليش تبدل بيجاما واسعه ما فيها شيء ..نطقت بتسليك: بعد الفطور ابدل ..ما ابغى اتأخر عليك !!
هزت راسها ام سراج بتسليك ..والف علامه استفهام فوق راسها ؟!
جلست مع خالتها بالمطبخ تحتسي القهوة ..وام سراج تتكلم عن حياتها بالخارج وحياتها هنا وتقارن بينهم ...
ما تتصور نفسها وهج تسافر خارج بلدها..تحس انها تنتمي لذي البلد وما في اي مكان يعوض البلد الأم ....
وقفت تساعد خالتها لما بدأت تجهز الفطور ...حست نفسها تشنجت لما سألتها بطريقه غير مباشره عن علاقتها مع سراج ...ما تدري تحس في مغزى من سؤالها ...نطقت بتكتم: الحمد لله ...
وحتى تغير الموضوع: عمي غريب للحين نايم ...دوم من الصبح يكون صاحي ؟!
ام سراج بهدوء وهي تحسها تقفل الموضوع: عمك تأخر البارحه وهو يراجع بعض الاوراق لوجه الصبح ..صلى الفجر ونام ...وما حبيت اصحيه خليه يرتاح!
هزت راسها بتفهم ورجعت تجهز الفطور ...تحس علاقتهم مع بعض متينه وقويه بالرغم إنه ما في الا ولد واحد يربط بينهم ...يمكن المشكله بالانجاب من ابو سراج علشان كذا ما تزوج عليها ...وام سراج مثل اي حرمه فيهم طبع الوفاء للزوج ..بعكس الرجل لو ما انجبت له مباشره يتركها ويتزوج بحجه الولد ...زمت شفتها بضيق ..ابوها أعطاها صورة سيئة عن كل الرجال ...وما في رجال وفي ويستحق التضحية ...
يعني لو كانت ام سراج الي عندها المشكله اكيد صار متزوج عليها !!
يا كرهها للرجال وانانيتهم ...يوجعها قلبها على حال المرأة بالمجتمع ...وكيف كثير ما انصفها المجتمع في بعض المواقف ....
لو المرأة تطلب الطلاق حتى تنجب يا فضيحتها بعكس الرجل الي من حقه يتزوج عليها ويكون عنده عيال !!
معايير مقلوبة ...
او بالأحرى خلينا نقول الي ما نرضاه لنفسنا نرضاه لغيرنا ...
يعني لو المرأة زوجة ولدها ما تنجب مباشره يكون الحل جاهز عندها يتزوج غيرها ...
ولو ولدها ما ينجب يكون بنظرها زوجته مجبورة تتحمله وتكمل حياتها معه!!
بنفس الوقت لو كانت ابنتها الي ما تنجب ترفض رفض قاطع وتقوم الدنيا اذا فكر زوج ابنتها يتزوج على ابنتها ....
ولو كان زوج ابنتها ما ينجب تشجعها على الطلاق وتشوف حياتها لأنه من حقها تعيش امومتها!!!
وهاي مشكلتنا لما تكون معاييرنا متقلبه حسب المزاج والمصلحه الشخصيه ما في معايير ثابته ننطلق منها !!
وبالنهاية الي يحق لي ما يحق لغيري!!
حتى تولد عندنا مجتمع غالبيه الانانية فيه مرتفعه وما يراعي مصلحة افراد العائلة ..مثل ما صار معهم بالضبط ...كل واحد من اهلها اتخذ القرار الي يهم مصلحته بدون ما يراعي مصلحتهم كبنات بدون سند !!
قطعت أفكارها وناظرت ام سراج تكلمها ...ما تدري عن وش تتكلم ..واضح إنها غرقت بافكارها ....
هزت رأسها بالموافقه بدون ما تدري وش السؤال ...عقدت حواجبها لما نطقت ام سراج بانزعاج : والسبب؟!
وهج حست نفسها توهقت ما تدري وش الموضوع ...ما تدري وش تقول لها ...
حست بالراحه لدخول سراج الي قطع عليهم وهو يرد السلام بملامح عابسه ناعسه!!
ام سراج ردت السلام وهي تناظره بحاجب مرفوع: هلا هلا بالعريس!!
صبت له وهج من القهوة ووضعتها امامه بهدوء ..وبعدها تحركت تكمل تجهيز الفطور!!
ام سراج توزع نظرها بينهم ...هذا الحال ابدا ما هو عاجبها ..نطقت كمقدمة لكلامها: وش فيك نعسان!
نطق وهو يرتشف من القهوة: ما ارتحت بالنوم
قاطعته بانفعال كيف ينام بالصالة ويترك زوجته .. متأكده ما هي عاجبيته يا خوفها جرح البنت بالكلام ..وبنبره منفعله نطقت: اكيد ما رح ترتاح بالنوم دام الكنبه هي فراشك؟!
وضع القهوة وناظر امه بصدمه كيف عرفت بنومه على الكنبه ...التفت على وهج بنظره ناريه ما يحق لها تطلع اسرار الجناح للخارج ...
وقبل ما ينطق نطقت ام سراج بانفعال:ليه تكلفنا كل هالتكاليف وزواج وحالتنا وحاله .. وبالنهاية تنام بالصالة ؟!
ليه يعني متزوجين على ورق؟!
وهج بهتت ملامحها ما تدري خالتها عندها علم بشيء وإلا تضرب كلام من عندها...ناظرت سراج الي ملامحه انقلبت وما تشوف فيها الا الغضب...معقول يظن إنها كلمت أمه بشيء...ضاق صدرها من هالموقف المخزي الي حطوها فيه !!
عقدت حواجبها باستنكار لما نطق سراج بعد ما نهض: قبل ما تكلمك عن اي شيء يخص حياتنا ..ليش ما كلمتك عن الطلاق الي برأسها ... حضرتها تبغى تتطلق ؟!
هذي امي قدامك خبريها عن سبب الطلاق!!
ختم كلامه وناظر أبوه الي دخل بعد ما سمع كلامهم ..نطق بملامح ما تتفسر : وش هالكلام الي سمعته؟!
وهج تحس نفسها بحجم النمله من هالموقف المحرج الي وضعوها فيه ....
بلعت ريقها لما تابع كلامه سراج بقهر وهو يناظرها بقوة: قبل ما تطلعين خصوصية بيتك ...كان كلمتي امي عن الطلاق الي نشبت لي فيه!!
ما ادري أي بزر زوجتوني ..حتى اسرار بيتها ما تقدر تحفظهم !!
ابو سراج تقدم وهو ينطق بخيبه: وهج وش سالفة الطلاق!!..وش خرابيط الزواج على ورق؟! حنا نلعب ؟!
وهج شادة على قبضة يدها بقوة من هالموقف المخزي ..... ما تدري وش تقول ...يتكلم قدام اهله وكأنه ما هو الي تركها ليلة الزواج وطول الوقت يتمسخر على شكلها ....
لكن تعرف كيف ترد له الصاع صاعين ...زمت شفتها ترتب الكلام والكل نظراتهم عليها حتى تبرر موقفها ....نطقت والغصه تخنقها: ما ينجبر قلب على قلب يا عمي... أنا من الخطوبه طلبت الانفصال بس هو اصر يتمم الزواج ... أنا آسفه ما قدرت أتقبله بحياتي ...التنافر الي بيننا كبير !!
سراج يناظرها بعدم تصديق ...قدام اهله تتكلم بوقاحه انها ما تبغاه ...وبانفعال نطق: تنافر!!
اكيد رح يكون تنافر بيننا دام إني نزلت من مستواي وقبلت فيك زوجة لي
قاطعه أبوه بغضب: سراج وش هالكلام ؟!
سراج بقهر : ما تسمع كلامها ؟!
ام سراج اقتربت وهي تمسك يد وهج الي واضح عليها رح تنفجر بأي لحظة: الحين تتصل بالشيخ يا ابو سراج ...اكيد احد صكهم عين وإلا عمل لهم شيء!!!
وهج سحبت يدها بشويش وهي تنطق: لا عين ولا شيء ...بس الظاهر ولدكم كان ينتظر القمر بس طلع محاق ...يمداكم تخطبوا له قمر تناسب مقامه العالي!!
سراج رفع حاجب من جوابها...رضي فيها بس هي الي ما تبغاه ...دام هي عايفيته ما رح يهتم لها ..ستين داهيه خلفها ...نطق بقرف وهو يناظرها بازدراء: الحمد لله عرفت قيمة نفسك وإني استحق الافضل والاجمل
سكت لما صرخ ابوه بوجهه وهو ينطق بقوة: خلااااص ..انت ما عدت تحشم أحد !!
سراج فتح عيونه بصدمه ...كيف ابوه يصرخ عليه بهذا الشكل علشان ذي ....ناظر وهج الي تمسح دموعها بخفه ...شيطانه قلبت الموضوع عليه وكأنها البريئة المسكينه ...ناظر ابوه الي يكلمه بنبره قويه: مهما كانت الحرمه سيئة رجلها يعدلها ..... اكيد ما طلبت الطلاق من فراغ ...اكيد ضايقتها بالكلام حتى وصلت إنها تطلب الطلاق وهي عروس ....وربي إن سمعت إنك زعلتها بحرف واحد لساني ما يناطق لسانك ...ذي زوجتك تعاملها بحق ربنا ..وتحترمها وتحترم وجودها ..ويا ويلك إن قللت من قيمتها !!
قلت لك من قبل إن زعلتها رح تلقاني أنا بوجهك !!
أنا بوجهك!!
ختم كلامه وسحب كرسي جلس عليه وهو يزفر بعد ما بذل جهد بالكلام ...أي معامله سيئة تلقت حتى تطلب الطلاق وهي عروس ...تنهد بضيق وناظر وهج باعتذار : إن غلط عليك سراج أنا اعتذر عنه ...خلينا ننسى الماضي ونفتح صفحة جديده بينكم ...اتفقنا!!
سراج يناظر الموقف ويحس نفسه رح ينفجر من القهر ..حسسوه وكأنه صبح ومساء يضربها ويعاملها بسوء ...ناظرها بتوعد وكره على موقفها ...
ناظر أمه الي نطقت بضيق من المشكله الي بينهم ..مثل ما توقعت وضعهم ما هو تمام : سراج يا قلبي ..ذي زوجتك ولزوم تعاملها بالطيب
قاطعتها وهج وشيء يكتم على صدرها ..الموقف كله ضايقها ....ما كانت تبغى توصل الامور لهذا الحد ...ما تبغى يصير حواجز بين سراج وأهله بسببها ... هذا الموقف ذكرها لما ضربها أبوها علشان ابن زوجته ..شعور ابدا ما تقبلته لما يضربك ابوك او يصرخ عليك علشان الغريب ...ما حبت هذا الموقف لسراج .. بالنهاية هو ولدهم ..والي ما ترضاه لنفسها ما ترضاه لغيرها ...نطقت باختناق والعبره تخنقها: عمي سراج ما غلط علي وما اساء معاملتي ...وما في بيننا اي مشاكل مثل ما انتم متخيلين ...البارحة كنت ارتب الغرفه وانزعج من حركتي الكثيرة ونام بالصالة من الازعاج ..وبعد ما كملت ما حبيت اقطع نومه ...ذي اول مرة ينام بالصالة ...خالتي فهمت الموضوع غلط ...والطلاق أنا الي طلبت منه الطلاق ...سر
قاطعها ابو سراج بعدم اقتناع لكلامها: ليش ترقعين عنه وانا بعيوني الحين شفت كيف يعاملك .. ورافع خشومه للسماء على قلة سنع !!
لكن من الحين تحملين اغراضك وتنتقلين هنا بغرفه لوحدك لوقت يعرف وش يعني زوجه
عبست ملامحها وهج ما لها حيل ترجع تنقل اغراضها ترتبهم من جديد ... وكأنه هذا الي يشغل بالها !!
ام سراج باعتراض : ابو سراج بدل ما تكحلها تعميها !!
وش تسحب زوجته من عنده؟!
سراج تحرك وهو ينسحب من المكان ...يظن أبوه رح يموت اذا ابعدها عنه ..نطق بسخريه وهو طالع: لو ترجعها لاهلها يكون افضل الي ما تحفظ بيتها ما تلزمني!!
حست وهج وكأنه احد صفعها على وجهها بعد كلامه قدام اهله .....بلعت العبرة وهي تناظر ابو سراج الي نطق بغضب بعد خروجه: شفت ولدك ؟!
ام سراج بقلق: اقولك شوف لنا احد يحصنهم ..عيون الحريم ما ترحم .. للحين يتكلمون عن جمالهم ليلة الزواج!!
كتمت وهج ضيقها وهي تحاول تسيطر على مشاعرها الحزينه ...
نطقت بهدوء ظاهري وهي تهم بالخروج: عمي لا تشغل بالك ..ترى وضعنا فوق الريح ..بس فهمتم الموضوع غلط ... لا تحمل همنا !!
حاولت تبتسم عجزت ...رسمت ملامح رح تنفجر من القهر والضيق ...استأذنت وطلعت وكلمته " لو ترجعها لأهلها يكون أحسن"
ما تدري وين تروح ...تحركت للجناح عقلها ما هو صغير حتى تحمل اغراضها وتترك المكان وهي للحين ما كملت الأسبوع ...
نفسها ييجي اليوم الي تخليه يندم على كل كلمه ونظره استنقص منها ....
قفلت الباب خلفها وتوجهت لغرفته تاخذ ملابس لها تبدل ...ناظرته متمدد على السرير ....يناظر السقف ..وما كلف نفسه يلتفت لها يقال زعلان. ...ما نطقت حرف واحد ...اخذت ملابس لها وتوجهت لغرفتها تبدل فيها ...
عقدت حواجبها وهي تحرك مقبض الباب وما يفتح ...زفرت بضيق واضح قفل الغرفه ..ما تدري ليه يتعامل كذا ...
رجعت جلست على الكنبه ..ما لها خلق تكلمه وتتشاجر معه ...
ما تبغى تبدل ...تمددت وهي تحس بشيء يخنق فيها ....غطت عيونها بساعدها وسمحت لدموعها تنزل بهدوء ...
تحس بالضياع بداخلها ..هي ما أفشت سر بيتها ...تحس بشيء ثقيل على قلبها ..كيف تعيش مع انسان يكره وجودها معه هالكثر ... مقهورة من ابوها الي تركها وما له أثر ..وحتى أمها الي قاطعتها ...نفسيتها بالحضيض ...والي يقهرها كيف تتعامل مع هالمراهق المتعجرف ... حياتها كلها مع بيت كله بنات ...ما تعرف كيف تتعامل مع الرجال وكيف يفكرون بهذا العمر ....
أبعدت يدها عن عيونها لما حست بشيء لمسها ....سرعان ما اعتدلت وجلست وهي تمسح دموعها لما شافت سراج جالس ركبه ونص عندها ...ما يهون عليه يزعل أهله منه ..طلع حتى يكلم ابوه ..شافها متمدده على الكنبه ومغطيه عيونها ..واضح انها تبكي ...ما يدري ليه نقطة ضعفه البكاء ...ما يحب يشوف أحد يبكي قدامه ...لعن الشيطان بداخله ...وقرر يتفاهم معها ...لزوم يعطون بعض فرصه للتفاهم بينهم ...نطق بهدوء: ليه تبكين؟!
هزت راسها وهي تمسح دموعها الي رجعت تنزل من جديد : ما أبكي!
سراج ابتسم بدون نفس: وحبات اللؤلؤ ذي من وين ؟!
ما كنت اعرف إنهم يستخرجون اللؤلؤ من عيون زوجتي الحلوة ؟!
كتمت ضيقها جالس يطقطق عليها كالعاده!!!
تابع كلامه وهو يشوف سكوتها: زعلتِ من كلامي ؟! ... اممم وهج لا تلوميني يمكن تضايقت إنك نشرت
قاطعته بتبرير: انا ما تكلمت بشيء ..خالتي فهمت غلط لما شافتك
قاطعها بهدوء: انسي السالفه..قومي غسلي وجهك وبدلي ملابسك وخلينا ننزل نفطر مع اهلي ...ما ابغى احد يتضايق بسببنا ..ومشاكلنا نحلها بيننا!!
يلا تحركي !
هزت راسها بعبوس .. وتحركت تبدل حتى تنزل معه !!!... بعدها ببداية الزواج ما تبغى تفشل يا كثر الشامتين فيها وخاصه شلة الجن!!
بعد وقت طلعت وهي لابسه فستان طويل ...يظهر خصرها المنحوت بشكل لافت ..رقبتها الطويلة حكايه ثانيه ...معقول في قرابه بينها وبين ام رقبه ....ما كان يدري إنها الرقبه الطويله جميله كذا ..يتذكر لما خبرته خالته عن بنت بالحفلة رقبتها طويله ...وقتها ضحك عليها وعقله ما استوعب شكل الرقبة الطويلة ...لوقت ما شاف وهج والبنت الي بجوال ريان ...
وقف واقترب منها ..نطق وهو يتفحص ملامحها : خذي شهيق وزفير!!
مطت شفتها ما لها خلق لسخريته ...نطق وهو يناظر ملامحها: ترى ما اتريق عليك ..حتى ترتاحين!!
نطقت بهدوء: مرتاحه!!
هز رأسه بهدوء وأشر لها تمشي قدامه !!!
**
**
**
ام سراج مر الوقت عليها تحاول بزوجها الي للحين متضايق من السالفه والعبوس مرتسم على ملامحه ....نطقت بضيق: نشوف شيخ يرقيهم
قاطعها ابو سراج بقهر: البلاء بولدك ...اغتر بجماله وتلاقينه رسم إنه رح يتزوج ملاك!!
ام سراج بلوم: المفروض كان في شوفة شرعية بينهم
قاطعها بنرفزه وكأنها ما تعرف الحال: وكأنه ولدك قبل يروح يشوفها ..اذا الملكه رفض يحضرها واعطاني الف عذر ...وقتها قال انا قابل باختيارك وما تهمني ذي الأمور ...بس الحين اشوف تغير الوضع بعد الزواج ..يا خوفي ولدك شايف له شوفه ويظلم بنت الناس معه ...وربي إن تأكدت إنه يلعب بذيله ما رح أسكت له!!
ام سراج زفرت بضيق: وش هالكلام ؟!
ما عندك ثقه بولدك!!
نطق بزعل: من بعد موقفه أبدا ما عدت اثق فيه ..واحسه ناوي على شيء ...بكل وقاحه يقول رجعها لأهلها .. وكأنها لعبة!!
الحين تلقين البنت مقطعه حالها من البكاء بعد ما رفضها وما يبغاها بحياته!!
ما رح اسمح له يجرحها ابدا!!
ختم كلامه وهو يزفر بضيق ...هزت راسها ام سراج بأسف وهي تحس بالندم لو ما تكلمت كان ما صار الي صار ...بس بنفس الوقت لزوم تتعدل حياتهم!!
رفعت راسها بحاجب مرفوع وهي تسمع ضحكة سراج ..ناظرت زوجها وكأنها تقول له تسمع؟!
زم شفته بقهر اكيد يكلم واحد من ربعه ومبسوط معه ومع المسكينه قالب بوزه ...
قطع افكاره لما دخلوا وسراج يضحك ووهج تبتسم ...
يبغى يفرك عيونه ..يحس إنه بحلم ..ذول دوبهم كان رح توصل بينهم للطلاق ..ولو اشتد النقاش شوي كان وقع الطلاق ...
هو حارق اعصابه وحالته حالة وبالنهاية هذا حالهم !!
زم شفته بتعجب لما اقترب سراج وقبل راسه وهو ينطق باعتذار: السموحه يبه ضيقنا خلقك بمشاكلنا!!
ضحك سراج لما نطق أبوه بقهر: تتمسخرون علينا!!
وهج اقتربت بتردد وهي تنطق: قلت لك يا عمي لا تشغل بالك فينا!!...رجعنا نفطر معكم!!
ام سراج توسعت ابتسامتها وهي تردد الحمد : حياكم يمه تفضلوا!!
سراج بدأ يرتب اطباق الفطور مع وهج على الطاوله ...بعد ما رتبوا نطق سراج وهو يناظر وهج بابتسامة: تعالي يا قمري هنا !!
خزته وهج جالسه يتريق عليها كالعادة.....يا سرعان تقلبه ....ابتسمت لما شافت نظرات اهله عليها ..سحبت كرسي وجلست بجانب سراج والهدوء يخيم عليها!!
ناظرت سراج لما مد لها بلقمه حتى تأكلها من يده ...رفعت حاحب وكأنه عايش الدور بزياده ..وصدق نفسه ...
اخذتها من يده وهي تشوف نظرات اهله متسلطه عليهم..وش هالموقف البايخ ...اعطته نظره يختصر وما يعمل ذي الحركات ما تحبها!!
اكلت اللقمة بيدها وهي تحاول ما تناظر أحد .... رفعت نظرها لما ضحك سراج بخفه وهو ينطق: وش فيك يبه؟!
ابو سراج زم شفته بتعجب:، اناظر هالفيلم حتى يخلص؟!
دوبكم اكلتوا بعض والحين اشوف قمري وزوجتي وحالتك حالة!!
نطق بابتسامة وهو يمسك يد وهج ويرفعها: خفت من تهديدك وتأخذ هالقمر عني ... وأنا بدونها ما اعرف أعيش !!
رفعت حاجب وهج وهي تخزه ابو الكذب ...مطت شفتها بسخريه وناظرت ابو سراج الي نطق وهو يخزهم بقوة: الله يوفقكم!!
**
**
**
من بعد الغداء وكل شخص منشغل بعالمه ...بعد ما فتحت الغرفه بحجه تأخذ اغراضها ...
جالسه على السرير واللاب قدامها واوراق وكتب وحوسه من حولها ...
لما ترجع للدوام مباشره رح تسحب فلوسها وتسدد ديونها ...عبست ملامحها لما وقع نظرها على فستان الزفاف تحس بالكتمه ...خسرته على الفاضي ..للحين مرمي مكانه .. لزوم تعمل له صرفه ...تأخذه للخياطه تعدله وبعدها تبيعه ...
لحظة لحظة فكره ما هي بطاله لو تفتح معرض لفساتين الزواج والخطوبة ... بدأت ترسم الديكور كيف رح يكون ..وتتخيل الفساتين الي رح يكونوا بمعرضها ...بس وش رح يكون اسمه ؟!
رح تسميه معرض وهج ؟! لا لا مو حلو ..من زين اسمها حتى تسمي المعرض فيه ...
امممم معرض افراح ؟!
غبيه غبيه ..تبغى اسم يجذب الزبائن ...رح تترك مهمة اسم المعرض آخر شيء ...
الحين بحاجه لفلوس حتى تقدر تقوم بهذا المشروع ...كم تحتاج حتى تقدر تقوم فيه؟!
مشروع ممتاز رح يدر عليها فلوس كثير ..وتسدد كل ديونها ...
وتصير سيدة اعمال بالمجتمع ....معروفه ومشهورة وكيف اثبتت نفسها وهي مطلقه !!
لحظة هي للحين ما تطلقت ....واضح الاخ ما عنده نية للطلاق .. وكأنه متزوجها "جيزه نصرانيه" ...صحيح إنه يطقطق على شكلها ..بس بنفس الوقت يقولها راضي وما ييغى الفراق ... ايه اكيد قلبه حاسس إنها رح تصير سيدة اعمال وطمعان بفلوسها!!
عقدت حواجبها من الغباء الي فيها ..هو وش يعرفه إنها تخطط تصير سيدة اعمال ...
وكأنه ناقصه فلوس ...ما هو ناقص عليه شيء !!
مو مهم اذا كانت متزوجة او مطلقه المهم تحقق أهدافها ...
ما رح تسمح لسراج يكون شيء اساسي بحياتها مجرد مكمل من مكملات الحياة ... إن وجد او لا ما يؤثر على حياتها !!
قطعت أفكارها ورفعت نظرها لما حست بكائن حي موجود ...رفعت حاجب وهي تشوفه مستند على الباب ويناظرها بتقييم...زمت شفتها بضجر اكيد الحين يبغى يرمي كم كلمه عليها ..قبل ما تنطق تكلم بهدوء: لي وقت واقف ما حسيت فيني واضح عليك الاندماج ؟
عقدت حواجبها باستغراب ما حست عليه ...زادت عقدة حاجبها لما نطق وهو يوزع نظره بالغرفه: ليه كل ذي الحوسه ؟!
كيف تقدرين تجلسين بمكان كله حوسه كذا؟!
وهذا الفستان مسكين من يوم الزواج واقع كذا ...تكسبين اجر ساعديه بدل ما يبرد وهو على الأرض جالس...بس انتبهي يمكن تكون رجل الفستان او ظهره مكسور ... لأنه من يوم الزواج وهو نفس الحركه عامل كذا!!
حرك جسمه بسخريه وهو يقلد الفستان الملقى على الارض بإهمال!!
كتمت غيضها من سخريته: دام طلب مساعدتك ساعده حضرتك واكسب أجر!!
هز رأسه بروقان :، ما طلبت شيء يا زوجتي العزيزه ...نكسب أجر فيه ...اقترب من الفستان ورفعه وهو ينطق باستغراب: ليه مقطع كذا!!
وهج توهقت لو تدري كان ما قالت له هالكلام ما توقعت يرتبه ...
نطقت بضيق خلق: لا تتدخل بشيء ما يخصك ..واترك الفستان لو سمحت ؟!
نطق باستنكار: عجيبه غريبه احد يقطع فستان الزفاف كذا ؟! وليه قطعتيه؟!
ما عرفت تفكينه قمت قطعتيه ...ما شاء الله عليك ..ذكاء رهيب ؟!
نصيحه مني عقلك هذا حاولي ما تستخدميه ... لأنه واضح يشتغل بالمقلوب !!
ترك الفستان وهو يناظرها لما نطقت: قلت لك اترك الفستان ....انت وش تبغى ؟؟
اقترب من الباب وهو ينطق بروقان: ما في اي نشربه؟!
معتكف هنا يا أخي !!
قوم اعمل شيء نشربه ونجلس بالشرفه الجو خيالي!!
وهج ناظرته بغيض بعد كلامه وبكل وقاحه يطلب منها تجلس: رح اعمل لك... بس مو فاضيه اجلس عندي شغل كثير!!
رفع حاجب بتساؤل: ليه انت كذا ميته على الفلوس ...
ردت ببرود: احب الفلوس وين المشكله ؟!
سراج اشر لها : تعالي اجلسي معي ..والا وربي الحين اتصل بأبوي واقول له كنتك الي طول الوقت تدافع عنها ..رافضه تجلس معي !!
ترى الحين انت بشهر العسل ..تتركين كل شيء وتهتمين بس بزوجك !!
يلا تحركي اشوف !!
زمت شفتها بضجر: ادري بك ما تطيقني وش تبغى فيني ؟!
نطق بابتسامة واسعه: قلت لك ما استغني عنك تعودت على وجودك بحياتي ..لو ما شفتك للحظات اجلس اتلفت يمين ويسار ...واحس بالضياع بدونك ...
لا تنسي ذي فترة الخطوبه ولزوم تكون غير شكل!!
خزته بقوة وبداخلها تقول" بلاء بشكلك" تحس كل تصرفاته وكلامه ما هو لله ...عنده شيء مخفيه عنها!!
يمكن يبغى يوقعها بغرامه وبعدها يسحب عليه وبكذا يكون انتقم منها .. مسكين غيره كان اشطر ...يظن إنها سهلة من ابتسامة بلهاء منه تقع بحبال عشقه...للحين ما عرف وهج مين ؟!
اذا ما خلته مجنون فيها ما يكون اسمها وهج...يصير خير ...
ابتسمت وهي تناظر له مستند على الباب ويبتسم لها وكأنه متيم فيها ...
لولا إنها تعرف طبيعية العلاقه بينهم كان صدقته هالكذاب!!!
اول ما طلعت من باب الغرفه مسك يدها وهو ينطق برجاء: حطي اصبعك بالفنجان علشان يزيد حلا!!
عقدت حواجبها وهي قابضه يدها ما تلكمه على وجهه..هالكذاب جالس يطقطق عليها ...
سحبت يدها بهدوء وتحركت بدون أي كلمه !!
رح تعمل له قهوة اسهل شيء ما لها خلق تعمل اي شيء ثاني...عقدت حواجبها لما حست بحركه خلفها ...رفعت حاجب بضجر وهي تشوف سراج ...اعطته نظره بمعنى"خير"
ابتسم ابتسامه عريضه وهو ينطق: ما عرفت اجلس بالصالة بدونك .. اشتقت لك !!
زمت شفتها تكتم غيضها ...يفكرها جدبه حتى تصدق كلامه وهو دوبه الصبح سمعها كلام قدام اهله ..والحين فجأة نزل عليه الحب والغرام !!
تابعت شغلها وين ما تحركت وهو معها ....كتمت غيضها وناظرته لما نطق بروقان: ما ادري كيف كنت عايش من قبل بدونك؟!
كم سنه مخطوبين لبعض وأنا ما ادري إني ملكت على كنز ثمين!!
بداخلي ندم كيف ما حضرت ملكتي ووثقت اجمل يوم بحياتي يوم كنت من نصيبي!!
هزت راسها بضجر ...ورجعت تكمل شغلها ....
عقدت حواجبها لما نطق : شعرك باين حلو ليه تقصينه؟!
جهزت وهج القهوة وهي تنطق: ما اطيق الشعر الطويل!!
تحرك خلفها خارج المطبخ وهو ينطق: على الاقل يوصل نصف رقبتك.... اتفقنا!!
زمت شفتها وهي تجلس ..وبتسليك : إن شاء الله رفعت حاجب لما جلس جنبها ...ما علقت واكتفت بالسكوت وعقلها يفكر بمشروعها الجديد..معقول ينجح او يخسر ...لو اخذت سيوله من سراج وبعد ما تعتمد على نفسها تسدد له ....بس ما يمكن يقبل ؟!
رح تضرب هالكلمة يمكن يقبل ...لزوم تلقى مشروع يدر عليها بالفلوس ...
ابتسمت لما نطق وهو يرتشف من القهوة: الأخ وين سرحان؟!
رفع حاجب باستغراب لما ابتسمت وما عبست ملامحها على الكلمة الي قالها !!
نطقت متجاهلة الكلمه الي قالها .. لأنه موضوعها اهم وما تبغى تتمشكل معه : سراج ابغى افتح معك موضوع!!
وضع القهوة قدامه وهو يناظرها بجديه واهتمام: تفضل!!
مسكت نفسها ما تمسح فيه الارض زودها ..لذي الدرجه تشبه العيال ...يصير خير يا ابو الشباب بس بالاول خليها توقف على رجولها وبعدها يصير خير... وبهدوء نطقت: افكر اعمل لي مشروع اكون نفسي واعتمد عليها!!
زم شفته بملل ..عندها موضوع وحالتها حاله وبالنهاية هذا هو موضوعها ...
لذي الدرجه ما تشوفه بعيونها ...الف بنت تتمنى يناظرها ..وهي حضرتها كأنها جالسه مع اخوها والا ابوها ..مالت عليك يا عديمة الاحساس والمشاعر ..لكن هو خلفها والزمن طويل ...السالفه صارت تحدي ..ولازم يوقعها بشباكه ..بس حبه حبه ما رح يندفع مرة وحده ..رح يطبخها على نار هادئة ...نطق بهدوء: مشروع؟!
لا تقولين تصوير وذي الخرابيط ...انتبهي ترى وربي اقلب الجناح فوق رأسك اذا اكتشفت إنك تشتغلين من خلفي
قاطعته بضجر ما تدري وش مشكلته بالتصوير : مو التصوير ...ارتاح!!
أنا أفكر افتح معرض فساتين زفاف وسهرة
قاطعها بتهكم: علشان الي ما يعجبك تقطعينه تقطيع!!
ما ادري انتم يا حريم ليش تحبون التعب والشقاء
نطقت باعتراض:لا تقول حريم وكأني حرمه ومعها درزن عيال!!
نطق باستدراك: زلت لسان يا حمد !!
زمت شفتها بقهر من كلامه ...ضحك على ملامحها وهو ينطق : لا تزعلين بش شعرك نفس شعر واحد من ربعي !!
وهج نطقت بجديه : لا تكلمني بذي الطريقه ..انا اتكلم بجديه تكلم معي مثل العالم والناس او
سكتت قبل ما يزل لسانها كانت تبغى تقول له " او تقفل حلقك " لو كملت كلامها بالحلمبوز ما رح يمول مشروعها ...
ابتسمت بتورط لما نطق وهو رافع حاجب: كملي ليه سكتي!!
وهج بترقيع: او لا تكلمني لأنه ما يصير تكلمني كذا !!
هز رأسه وهو متاكد جزء من النص مفقود ...نطق بتسليك: إن شاء الله احاول مع انه شعرك ما يساعد!!
غمضت عيونها للحظات تمسك نفسها بعدها نطقت: وش قلت على المشروع!!
نطق بجديه: اي مشروع يحتاج لتفرغ ..وانت حالياً مو متفرغه ..متزوجه وعندك دراسه وباكر عيال وواجبات بما انك متزوجه .. حالياً ما ينفع ..بعد التخرج ندرس المشروع من كل الجوانب واذا كان المشروع ممتاز ما عندي مشكله ..بالعكس اشجعك عليك وادعمك نفسياً ومادياً ...كم وهج عندي!!
ارتخت ملامحها بعد كلامه ...عرض عليها إنه رح يدعمها ماديا بدون ما تطلب...ما تنكر كلامه مضبوط حالياً صعب ...بس المشروع رح تضعه بخانة خطط المستقبل...اي فرصه مناسبه رح تباشر فيه...
بما إنه المشروع التغى حاليا ..تقوم تكتب لها شيء تحصل فلوس افضل لها ...
اول ما وقفت سحبها واجبرها تجلس وهو ينطق: وين رايحه!!
**
**
**
مر أسبوعين خلالهم تغير سراج كثير ...اغلب الوقت مبتسم ويعاملها وكأنها ملاك نازل من السماء .. وحتى المشكله الي صارت بينهم تجاوزها بكل بساطه ..ما تدري كل هذا حتى ما يزعل أهله ..والا له اهداف ثانيه ...
بالرغم إنه تم زواجهم وما عاد على الورق إلا انها للحين ما هي مرتاحه ...تحس خلفه شيء ...
اخواتها يقولون إن طال شهر وبعدها ترجعين مثل الاثاث بالبيت بعد ما تنتهي اللهفه ...
ابتسمت لذكرى اخواتها الاربعه زاروها وقضت معهم وقت جميل ....
اتفقت معهم على موعد يزوروا أمها ويلتقون هناك ...نسقت مع سراج وباكر رح تروح لأمها !!
ما رفض وما تردد مباشره قال لها على هالخشم ...التفتت على سوار لما نطقت بانتقاد: واضح طول الليل سهرانه ..شوفي الهالات حول عيونك!!
ابتسم سراج لو شافتها سوار من قبل وش رح تكون رد فعلها ...الحين خفت كثير الهالات عن أول...
حركت رأسها وهج بأسف من ابتسامته الي تعرف مغزاها ...
قبل ما ترد وقفت على حيلها لما دخلت ام سراج تهلي وترحب بالضيوف ...ما عندها علم بقدوم احد ....
سوار تقدمت وسلمت على ام ريان وبعدها على وتين بابتسامة عريضة: وينك يا بنت مختفيه اشتقت لك!!
وتين كشفت وجهها بابتسامة واسعه: وأنا اشتقت لك !!
وهج تحس هالبنت شكلها مر عليها بس وين عقلها ما هو مجمع ...تركز نظرها على سراج الي يناظر سوار ووتين بابتسامة واسعه ...
اشاحت بنظرها لما تقدمت الحرمه منها وكشفت وجهها. ..
مدت يدها وسلمت ومجرد ما نطقت الحرمه بنبره مستنكره: وهج!!
حست وهج الذاكرة رجعت لها ...هذي زوجة ابوها ؟! وش الي جابها هنا ؟!
وش القرابه الي تجمعهم ...سحبت يدها وهج بملامح جامده بدون ما تنطق حرف واحد ...
حتى الصدمه الجمت ام ريان وما نطقت شيء مجرد سلام باليد ...
اقتربت من سراج وباركت له وللحين عقلها ما هو مستوعب!!
وهج تحس المكان ضاق عليها بوجودهم .... تبغى تنسحب بس ما تعرف كيف !!
زمت شفتها بضيق لما اقتربت وتين تبغى تسلم عليها بحراره ...
اكتفت وهج بالسلام باليد ....ومع ذلك وتين نطقت بابتسامة واسعه: كيفك يا قلبي !!
والله اشتقت لك !!
مط شفته سراج بسخريه على كلام وتين: اي احد تشوفه تشتاق له حتى وهج الي ما تعرفها تشتاق لها!!
بس لحظة ليش وهج ملامحها قلبت والعبوس مرتسم على ملامحها ...
معقول لأنها تفاجأت بوجودهم وما امداها تعدل نفسها ...استبعد هالشيء ما يحسها مهووسه بذي الامور ...اليوم رفضت تتزين مع علمها بوجود سوار ....
زم شفته لما جلست مقابل له وعيونها على ام ريان الي تكلم أمه باندماج عن أحوالهم!!
في حلقه ناقصه ...حتى سلامها كان بدون معنى ..قطع افكاره لما نطقت وتين تكلمه بابتسامة: كيف حالك؟!
مبارك الزواج!
وقع نظره على وهج تناظر امه وما التفتت لوتين ولا لسؤالها ...
وهج وجودهم اشعل النار بقلبها ..للحين ما تعرف نوع العلاقه بينهم ...
بس لو كانت قرابه كان شافتهم بالزواج...او على الاقل باركوا لهم بالاسبوع الاول ...
معقول تكون صديقه خالتها ...بس معقول لذي الدرجه تكون وتين مطيحه الميانه بينهم وتكشف وتبارك له!!!
ناظرت سوار لما تحركت تجلب الضيافه ... ما كلفت نفسها تحضر لهم الضيافه لأنها ما تضمن نفسها تضع لهم سم.....
يا كرهها لزوجة ابوها ...زمت شفتها لما نطقت وتين: كيفك وهج ؟! ليش ما عدت تزورينا ... والله اشتقت لك؟!
وهج ناظرت سراج الي اشر لها بعيونه تفك هالعبوس الي ما يشوف له مبرر ...زاد عبوسها وهي تنطق: ما عندي وقت اضيعه!!
وتين حست بالفشيلة بعد ردها ...وناظرت أمها الي نطقت : ما عزمتينا على زواجك يا وهج ؟!
بس الحين عرفت إنك كنة في عائلتنا!!
عقدت وهج حواجبها باستنكار ...بعائلتهم ...يعني تقرب لهم ؟!
ناظرت سوار الي دخلت بالضيافه وهي تنطق باستغراب: بينكم معرفه ؟!
ما كنت اعرف ؟!
كتمت ضيقها وبخاطرها تنفجر بوجه زوجه ابوها الي بسببها تدمرت حياتهم كلها ...ما تدري اذا بينها وبين ابوها تواصل ...
ام ريان نطقت بحاجب مرفوع وهي تناظر وهج بتقييم: تكون ابنة زوجي !!
ام سراج تفاجأت ما كانت تعرف بذي المعلومه: صدق ؟!
ما عندي علم !!
هز رأسه سراج بتفهم الحين عرف سبب عبوسها ...واضح العلاقه بينهم مو كثير
ما عمرها جابت طاري زواج أبوها. ...بس واضح من عيونها حاقده عليهم بقوة ...
بخلاف زوجة عمه ووتين الي تعاملها عادي وبلطافه ...
سوار بحماس نطقت: واو الحين ذي زوجة ابوك!!
وتين بنفس الحماس: تخيلي كنت اقضي معها وقت طويل قبل ما تنتقل من عندنا !!
سراج عقد حواجبه باستنكار ... الحين وهج كانت عايشه معهم بنفس البيت ...كيف وريان ؟!
يحس النار بدأت تشتعل بداخله ....ما طرأ له هالشيء ابدا...وما توقع لو واحد بالمئة تكون زوجة عمه متزوجه ابو زينب ....
وش هالتسيب الي يعيشه ابوها ..كيف يقبل ابنته تسكن مع ابن زوجته ...
ما لقى الا ريان الساقط ....زم شفته لما نطقت وتين: تعالي انت وسوار لزيارتنا !!
نقضي وقت طويل مع بعض!!
سوار ابتسمت بحماس: رح اكلم أمي واذا رضيت رح اسحب ذي معي ونقضي يوم طويل عندكم!!
سراج بتوعد لو تموتين ما عتبت رجلك بيت الساقط ريان ..بس خليه يشوف جدته ويخبرها عن مغامرات سوار الخفيفه!!
ام سراج بتساؤل: وكيف البيت الجديد ؟! ...ما كان عندي وقت ازورك وابارك لكم فيه ؟! بس إن شاء الله باقرب وقت انا ووهج عندكم !!
ام ريان ابتسمت : حياكم الله ...والله الحمد لله البيت كبير وواسع وجميل !!
وهج تسمع كلامها وتحاول قدر المستطاع تسيطر على نفسها ...باعوا بيتهم القديم وباعت الارض وحضرتها اشترت بيت جديد وهم للشارع متشردين ...ايام طويله وهي مشرده علشان حضرتها تلم عيالها في بيت لوحدهم ...اخخخخخ من أبوها ...رؤية زوجه ابوها أحيت مشاعر القهر من أبوها . ... ما تقدر توصف انانيتهم ...
وقفت وهي تحس لو جلست دقيقه رح تمسح الارض بزوجة ابوها التس!
للحين ما نسيت مواقفها ...وكيف ابوها انقلب عليها وتغير بسببها !!
تجاهلت نظرات سراج الي اشر لها بعيونه تجلس ... تحركت متوجهة لجناحها وبداخلها غصة وضيق من المشاعر الي اشتعلت من جديد بشوفة زوجة ابوها ....وقفت وتوارت وهي تناظر سوار ووتين طلعوا للخارج ... بغت تتوجه للجناح ..بس وقفت لما جذب سمعها كلام زوجة أبوها ..واضح سراج كان يبغى يغادر بس الزمت عليه يجلس ...
عقدت حواجبها باستنكار لما اقتربت تسمع كلامها .....تحس عندها سالفه وما رح يمر الموضوع مرور الكرام: والله ما كنت ادري إنها زوجة سراج!!
ام سراج باستغراب: كيف ما تعرفين ...يعني زوجك ما خبرك؟
ام ريان برفض: ما خبرني وما ادري عن زواجها الا الحين ...انا للحين مستغرب من زواجها
ام سراج بتساؤل نطقت: كيف يعني؟!
ام ريان تبث سمومها : اخواتها كلهم تزوجوا بسن صغير ..الا ذي البنت ما احد تقدم لها حسب الكلام الي سمعته من ابوها..حتى لو جاء عريس لها يكنسلوا خطوبتها ويخطبون اخواتها ...
ومن كثر ما ضغط علي ابو زينب حتى اخطبها لريان يبغى يرتاح من همها ...
خطبتها له بس ريان وكأنه اصابه جني وما قبل فيها ..قلت له البنت واضح انها هاديه وطيوبه ..بس رفض
ام سراج ما عجبها كل الكلام ..كيف يطلب من ام ريان تخطبها وهي مخطوبه ...ما دخلت السالفه رأسها ... نطقت بهدوء: وليه رفضها ؟!
ام ريان هزت كتوفها: ما ادري عنه ...يعصب اذا فتحت الموضوع معه ...
ما قلت لي كيف خطبتوها لسراج وين شفتوها؟!
وقف سراج وهو ينطق بهدوء ظاهري ومن الداخل نيران مشتعله من كلامها: انا خطبتها بنفسي .. شفتها وعجبتني اخلاقها وتعاملها الراقي فطلبت من اهلي يخطوبنها لي ...مثل وهج ما تتفوت لأنها جوهره!!
زمت شفتها ام ريان وما عجبها كلامه ...نطقت بتسليك: الله يهنيكم!!
بعد كلام سراج توجهت ودخلت الجناح ...مباشره توجهت لغرفة النوم ..القت الشال باهمال وهي تحس بالاختناق ...ما تدري وش مصلحتها من هالكلام ... وليه تخبر فيه أهل سراج ...
لا والزفت يرفضها ....لزوم نزلت ومسحت فيها الارض على كذبتها ..
مطت شفتها بقلب ميت لا يضر السحاب نبح الكلاب ...وش مصلحتها من الكذبه ..
لحظة ويمكن ما هي كذابه .. لأنه ابوها خبرها بخطوبة ريان ...
معقول هو الي طلب منها تخطبها لريان ؟!
وش مصلحته من كل هذا وهي متملكه ....تحس بركان بداخلها يغلي ورح ينفجر بأي لحظه ....
رفعت نظرها للسقف لما بدأت دموعها تنزل من القهر الي يحرق قلبها ....نفسها تطردها بس ما يطلع لها ما هو بيتها علشان تطردهم ...
زفرت باختناق وعقلها ما هو قادر يتجاوز المشهد لما طردها أبوها علشان ذي الحية وعيالها .....وما اكتفت جايه هنا تبث سمومها !!
وقفت وتوجهت للحمام بسرعه لما حست بحركة عند باب الجناح ... اكيد سراج صاحب الواجب !!
قررت تجدد الوضوء وتصلي ركعتين حتى تريح نفسها من التفكير بالعباد ... ما لها مزاج تتقابل معه وتتناقش ...اكيد رح يحقق معها ليش تركتهم وطلعت ويسميها قلة ادب!!
بعد وقت طلعت من الحمام ومثل ما توقعت جالس على السرير ينتظرها ... وواضح رح يبدأ بأي لحظة بالتحقيق !!
ما علقت وهي للحين تجفف وجهها ويدينها .... التفتت عليه لما نطق بتساؤل وملامحه ما تبشر بخير: ابغى أسألك سؤال وجاوبي عليه بكل صراحه ..ريان ولد عمي خطبك من قبل ؟!
تناولت شالها وهي ترد ببرود ...ما رح تظهر له إنها سمعت كلامهم : قصدك ابن زوجة أبوي
قاطعها بقلة صبر : ايه ..ليش في غيره؟!
ردت وهي تلبس الشال بكل برود: ايه خطبني .. بس وش جاب طاري هالسؤال!!
انقهر من برودها وكأنه يتكلم عن بنت ثانيه وهي ما لها علاقه ..رح يحترق وهي ابرد من اعصابها ما شاف ...الحين ما لقت الا ريان القذر تعيش معه بنفس البيت ..وحضرتها خاطبها ..ما يدري ابوها الزفت كيف يفكر ....رح ينفجر من برودهم .. نطق بنبره غاضبه: يا برودك !!
كيف يخطبك الزفت وانت على ذمتي ؟!
ابوك كيف يبغى يزوجك لريان وانت على ذمتي ..تستعبطين؟!
ما عندكم دم ولا احساس ولا دين ؟!!!
وهج رفعت حاجب من غضبه : طيب وش المطلوب مني ؟!
سالتني سؤال وهبيت فيني؟!
خطبني وما صار نصيب!
نطق بانفجار بوجهها: لأنه رفضك ... يمكن ما عندكم مشكله تكوني مخطوبه لشخصين ... لساني يعجز عن وصف وساخه أبوك !!
وهج رفعت حاجب بتحذير: احفظ كلامك عن الغلط ما أسمح لك بكلمة وحده على أبوي...الي نقل لك الكلام كذاااااب ...
زوجة أبوي الي نشبت لأبوي بالخطوبة وأنا رفضت الموضوع ...وابوي سايرها لانه ما يبغى احد يعرف بخطوبتي السريه من الامبراطور !!
ختمت كلامها بسخريه وتحركت كم خطوه سرعان ما سحبها بقوة وهو ينطق والشرار يطلع من عيونه: وكأنه الامبراطور ما هو عاجبك؟!
يمكن تبغين الطلاق لعل ريان الساقط يتزوجك ...صدق الناس ما تركض الا خلف الحثالة!!
سحبت يدها منه بقوة وهي ترفعها بتهديد: احترم نفسك لآخر لحظة ...
ما بقى الا ولد عمك ****** اناظره ...عيلة تجيب المرض ...
اعترض طريقها وهو ماسك اعصابه بقوة: وين رايحه ؟!
اذا تعدت رجلك تحت الا اكسرها ...وزوجة عمي ذي ممنوع تقابلينها ...
مطت شفتها بقرف: وكأني ميته حتى اشوف رقعه وجهها ..ابعد عن طريقي ترى مو طايقه حالي!!
دفها من جبتها بإصبعه بخفه: اعصابك يا بطة !!
تجاوزته وهي ناويه تنزل وتمسح بزوجة ابوها الارض حتى تراويها كيف تنشر هالكلام ....
تحركت للخارج متجاهلة نداء سراج عليها ....نزلت بخطوات سريعه وبداخلها نار مشتعله ...من زمان قلبها يغلي منها ...رح تموت اذا ما طلعت حرتها بذي هالأفعى .... التفتت لما شافت سراج خلفها مباشره ..ما امداه يلحقها ... سحبها من يدها وتوجه فيها للخارج بدون ما يعطيها اي فرصه تتكلم بحرف ..تحت نظرات امه وام ريان الي استغربوا هالموقف!!
اول ما طلعوا حاولت تفلت نفسها منه وهي تنطق بقوة: اتركني؟!
نطق وهو محكم قبضته عليها:وش رح تعملين!!
وهج وعيونها تشع من الغضب: ما تتدخل بيني وبينها هالافعى !!
ما اسمح لها تشوه سمعتي وتتكلم علي بذي الطريقه ...انا الي رح اوقفها عند حدها !!!
سحبها معه للحديقه الخلفيه ...سحبت يدها منه وهي تنطق بقهر: اتركني!!
نطق بحاجب مرفوع: لا يطق لك عرق وانت منفعله كذا ؟
وبعدين الحرمه في بيتنا ما يطلع لك تتشجارين معها او تقلين ادبك ترى ينقلب عليك الحق !!
زمت شفتها بقوة ...غبيه لزوم بنفس الوقت نزلت ومسحت فيها الأرض ...
تحركت تمشي وهي متضايقه من ابوها من وين جاب لهم هالافعى ..تحس بالقهر لما تتذكر كلامها " ريان رفضها "
الي حيرها ليش ابوها ما رفض الموضوع مباشره ليش حاول فيها ما تدري وش هدفه وقتها ... مجبوره تتكتم على سالفه لما ابوها حاول يقنعها توافق ...شيء مخزي !!
حست بسراج يمشي بجانبها ...وهو ينطق: اذا كان في خطوبة زوجة عمي ما كذبت وانت بنفسك قلت صحيح!!
وهج ناظرته بقوة: بس ما هو ولدها الي رفضني !!
نطق بتساؤل: انت كيف تقبلين تعيشين معه بنفس البيت ...ما أقدر افهم ابوك كيف يفكر ؟!
لا تقولين الميانه طايحه بينكم!!
وهج بملل نطقت: هذا انت مطيح الميانه مع وتين والموظفات
قاطعها باستنكار : انا مطيح الميانه مع وتين!!
خافي ربك ...تراها بزر مجرد سلام وانتهى وما تكلمت معها ....
من وين تنسجين هالكذب ؟!
والموظفات الكلام داخل دائرة الشغل!!
الانسان لزوم يكون عنده ضمير ...بس ضمير ..كل هذا حتى تبررين اختلاطك مع ريان
قاطعته بحاجب مرفوع: تراه ولد عمك ليش احسك متحامل عليه ؟!
كل هذا غيره لأنه كنا نعيش في
قاطعها وهذا الموضوع لوحده يقهره...وبمكابره نطق: اغار ؟! وليش اغار؟!
بس انا انسان ما اطيق اشوف العوج واسكت ... المفروض وين ما تكون امك تكوني معها ... أصلا كيف قبلت تعيشين معهم بنفس البيت وكيف تأخذين راحتك؟؟
وهج ابتسمت بقلب ميت : سراج خلاص ليش تنبش بالماضي!!
سراج عقد حواجبه: انت ليش احسك صندوق مقفل. . .ما تبغين احد يتقرب منك ويتعرف عليك .. أنا طول المده وانا ابادر واتكلم معك بكل اريحيه ...بعكسك الي متكتمه على كل شيء ...
ترى حنا زوجين ونشارك همومنا ومشاكلنا وفرحنا وسعادتنا ...وما ينقص من مقدارك لو كلمتيني عن اي شيء يضايقك!!
وهج بنظرها اكبر غلط ترتكبه البنت لما تطلع زوجها على كل اسرارها ومشاكلها وحياتها قبل ما تنتقل عنه ..لزوم يبقى بعض الخصوصيه للبنت ....
لأنه لكل بساطه ما تضمن الاستمرار معه ..ذي حياة وما تقدرين تضمن الحياة القادمه ...زوجك الي يمد يد العون لك باكر هو الي يعايرك بماضيك وماضي أهلك ...هو نفسه الي يلوي ذراعك بعد ما يعرف نقاط ضعفك وقوتك ...
دوم لزوم تعتزين بأهلك وتفتخرين فيهم حتى لو كانوا مو ذاك الزود ... حسسيه إنه لك أهل وسند ومو مقطوعه من شجره ....
ويتفضل عليك بوجوده ... لا انت تتفضلين عليه إنك عايشه معه ...
نطقت بهدوء : ما في شيء يضايقني انت تتوهم. . بس زوجة عمك ذي ما احبها .. ورح احاسبها على كلامها هذا
قاطعها بتنبيه: اذا تعرضت لها ما يعجبك تصرفي ... أنا رح اتفاهم معها وما رح تكرر هالكلام ... سواء كان صحيح او غلط !!
اهم شيء انت هدي اعصابك وخليك ريلاكس!!
رفعت حاجب : تتريق علي!
قاطعها بضجر:، ما عدنا نفهم لك ...ما اتريق عليك ...اسمعيني اجلسي هنا ..انا رايح اتكلم معها وأنا راجع رح أجلب شيء نشربه !!
ونتكلم بعدين!!
هزت راسها بالموافقه وجلست على الارض تنتظر رجوعه ...
**
**
**
سوار جالسه مع وتين الي تتكلم باسهاب بدون أي تردد ..نطقت بتساؤل: يعني كانت تعيش بغرفه لوحدها؟!
وتين هزت راسها: ايه ...مرة قضيت معها الوقت بس ما تعطيني وجه ...احسها حاقدة على امي علشان كذا !!
سوار هزت راسها: يعني أبوها للحين مسافر ....طيب وامك وش رح تعمل بعد الولادة!!
وتين بخفوت: سمعتها تتكلم مع ريان رح ترفع طلاق وتنفصل عنه...تخيلي سمعتهم يتكلمون مع بعض إنه سرق ذهب أمي وهرب للخارج!!
سوار فتحت عيونها: من جدك؟!
وما بلغوا عنه ؟!
هزت راسها بالنفي: لا ...ريان رح يرجع حق أمي بس يحتاج لوقت ...
سوار هزت راسها بتعجب: يعني ما في تواصل بينكم وبين عائلة وهج!!
وتين وهي تقطف ورده: أبدا ما في أي تواصل حتى أنا ما اعرف الا وهج لأنها عاشت معنا بنفس البيت .. وبعدها تشاجرت مع ابوها وطلعت من البيت ومن وقتها ما شفتها !!
سوار بلقافه: وليش تشاجرت معه؟!
وتين تناظر الورده الحمراء باندهاش من جمالها : علشان ريان تشاجر مع وهج والمهم صارت مشكله وابو زينب وقف مع ريان ضد وهج!!
عاد تمنيتها تكون زوجه لريان ...مع إنها ما تحبنا إلا إني أحبها ... تعجبني شخصيتها كثير!!
حتى شعرها القصير حاولت اقص مثله بس امي رفضت !!
سوار هزت راسها وواضح هالبزر تقلد اي شيء تشوفه ...رفعت حاجب لما نطقت وتين بحسره: ما كنت اعرف إنها زوجة سراج وإلا كان بالغصب حضرت زواجها حتى اشوف هالقمر كيف رح يكون وجهها!!
معك صورة لها ؟!
سوار ابتسمت على حماس وتين ...فتحت جوالها ولحظات مدت لها الجوال : ذي بعض صورها !!
وتين تناظر وعيونها طلعت من الاعجاب: تجنننننننن ....تبارك الرحمن ....يا اختي رقبتها ذي لوحدها تسحر ...
يا حظ سراج فيها ؟!
سوار ناظرت الشغاله متوجهة لهم بالضيافه ..وقفت وتحركت حتى تجلب منها الضيافه ..وبحركه سريعه طلعت جوالها وصورت الصورة عن جوال سوار ..ما يمداها ترسلها لنفسها وتحذف اي اثر ..اكتفت تلتقط صورة ...بحركه سريعه نزلت جوالها ...
ورجعت تتأمل وهج ....ما عمرها شافت عروس بجمالها !!
نطقت وهي ترجع الجوال لسوار : تبارك الرحمن جميلة حيل ..بس احسها الحين متغيره كثير ؟ معقول مو مرتاحه في بيت أختك؟!
خزتها سوار بقوة: اقول انكتمي افضل لك ..والله اختي احن وأجمل من قلبها ما في
وتين بتخمين: يمكن ولد اختك شرير
سوار ابتسمت: ايه شرير اقول انكتمي افضل لك ...يمكن تغير عليها المنام هنا وما هي متعوده!!
سكتت وهي تشوف سراج ووهج متوجهين للجهة الخلفيه ... مسكت نفسها ما تلحقهم وتنشب لهم بس المشكله ذي البزر ما ينفع تأخذها معها ...
زمت شفتها بضجر والتفتت على وتين الي نطقت بتساؤل: عادي لو قطفت باقه ورد من هنا؟!
سوار برفض: ممنوع ام سراج ما تحب احد يقترب من الورود تحب دوم تشوفهم كذا مفتحين بالحديقة!!
عم الصمت على لبعض الوقت ...رفعت حاجب بتدقيق وهي تشوف سراج رجع للداخل ..ما تدري ليه تحس في شيء ...
كيف تقدر تتخلص من وتين وتروح تشوف وش صاير بينهم ؟!!
**
**
**
**
رقيه بعبوس نطقت: وانت لسانك الطويل هذا رح اقصه !!
نور بتبرير: وربي بالغلط وكأنك ما تعرفين شلة الانس لما يسمعون أي خبر!!
رقيه زفرت بضجر: وربي اذا عرفت وهج إنهم باكر رح يكونوا عند امي الا تكنسل الطلعه!!
نور بهدوء: وهج ما رح تعرف اذا قفلت حلقك ...اذا شافتهم هناك ما رح يطلع بيدها تعمل شيء رح ترضى بأرض الواقع
رقيه زفرت بضيق: بصراحه ما ابغى وهج تلتقي فيهم ... لأنهم بكل حقارة يحاولون يستفزوها ...وتعرفين وهج مو كل مرة تسلم الجرة ...
وما ابغى يتشاجروا مع بعض قدام أمي!!
نور بحاجب مرفوع: والحل يعني ؟!
رقيه زمت شفتها بتفكير: والله ما ادري ...اقسم بالله الا تأكلنا وهج بقشورنا !!
نور نطقت بانفعال: لقيتها الحين نقول لشلة الانس انها الطلعه تكنسلت ...لاني متاكده رح يروحون لعانة وجكر بوهج !!
رقيه بقلة حيله: رح نحاول نعمل كذا ...والله خاطري وهج تجلس مع امي بدون منغصات ...حرقت قلبي لما زرناها ....
نور بتذكر: ما لاحظت إنها لابسه ملابسها قبل ما تتزوج ؟!
رقيه عقدت حواجبها: وكأنك ما تعرفين وهج ما يهمها ذي الامور ...وخاصه حنا اخواتها عادي !!
نور هزت راسها على مضض: يمكن !!
الحين رح اقفل واكلم زينب واشوف وش رح يطلع معنا!!
*"
**
**
**
اتصل على أمه حتى تطلع له ...جالس بالسيارة ويناظر بيت عمه بحسد ....
متى يصير عنده بيت اكبر من بيتهم ...يا كرهه لسراج ...نفسه ينتقم منه بس ما يدري كيف ومتى ...دوم خططه تفشل ...اذا ما حرق قلبه ما يكون ريان .. ناظر سراج وامه واقفين وواضح إنهم يتكلمون ...
واخته وتين متوجهة له ...وش هالموضوع الي بينه وبين أمه ...
التفت على وتين لما فتحت الباب وجلست من خلف وهي تنطق وكأنها مسحوره: الله بيتهم يجنن .. الحديقه لوحدها حكايه ثانيه!
يا بختك يا وهج عايش بذي الجنة!!
حس نفسه سمع غلط ... رفع حاجب وقبل ما يسأل ..نطقت بانفعال وحماس: تخيل مين هي زوجة سراج؟!!
وربي ما توقعت يتزوج وهج!!
نطق وكأنه سمع غلط: وهج ؟!
نطقت بابتسامة عريضة: ايه وهج ابنة ابو زينب!!
حس هالخبر نزل عليه مثل الصاعقه ..وش جاب وهج لبيت عمه ؟!
ناظر امه الي توجهت له وسراج للحين واقف مكانه يناظرهم ...حتى ما كلف نفسه ينزل ويسلم عليه ...يصير خير يا سراج ...اذا ما خليتك تندم!!
اول ما ركبت امه نطق يتأكد يمكن اخته مخربطه : هو مين متزوج؟!
وتين بلقافه: قلت لك وهج
قاطعها بغضب: انكتمي ...انا اكلم امي!!
التفت على امه وهو يكرر نفس السؤال!!
ام ريان ناظرت ابنتها بقوة كل شيء تنقله ...نطقت بجمود: وهج ما غيرها !!
حرك السيارة والنار مشتعله بقلبه ..اكره اثنين على قلبه متزوجين ...نطق بتساؤل: من وين المعرفه ؟!
ام ريان مطت شفتها: شافها مرة وعجبته وخطبها ؟!
هز رأسه بقهر ..شافها وعجبته ...اذا ما حول حياتهم لجحيم ما يكون اسمه ريان!!
تسارق النظر لوتين الي تكلم امها بحماس: شفت صور زواجهم ...تجنن بحياتي ما شفت عروس بجمالها !!
ام ريان بحزم: اسكتي يا وتين!!
زمت شفتها بتعجب من حالهم وليه اخوها معصب كذا !!
ام ريان تناظر ولدها الي واضح عليه العصبيه والقهر ..معقول كان يبغاها ويكابر علشان كذا تضايق!!!
ما عادت تفهم لولدها !!
تنهدت وبداخلها قهر من سراج وكيف يكلمها وهو يحذرها إن جابت سيرة وهج على لسانها بخير او شر ما لها علاقه فيها ...
تحس الشرار يطلع من عيونه ...صدق وكأنه مسحور فيها ...متزوجها عن حب واضح هالشيء ..متغيره وهج حيل فرق كبير عن قبل الزواج ...كانت مثل الملاك ..الحين التغير واضح فيها ...
يصير خير اذا ما انتقمت منها ومن ابوها ...حتى تعلمهم إنها ام ريان الي يدوس لها على طرف ما يسلم!!!
**
**
**
وهج تحس بالملل راح وما رجع ..مر وقت على جلوسها .. وقفت وتحركت راجعه للداخل....كل هذا حتى يحجزها وما تكلم زوجة عمه الموقره ..سرعان ما عبست لما رجع لها بملامح ما تتفسر وما معه لا ضيافه ولا شيء!!!