مـال الـحـرام
بـارت-13-
" والكلُ يُكتَمُ و الهوى لا يُكتَمُ
إنَ العيونَ إذا هَوت تَتَكَلمُ "
...........................
سما"
نزلنا علسريع وصلنا البيت حلا ركضت للغرفة اخذت ملابسهة وراحت للحمام اجتي لافة شعرهة وسارحة مدري بشنو تفكر اني اخاف منهة من اشوفهة صافنة هيج عدهة سالفة
-- بشنو تفكرين
حلا: انطيني الاوتي اكوي فستاني
-- حلا منروح للعرس
حلا: هه صبريلي منا لباجر
اخذت الاوتي كوت الفستان الي راح تلبسة بالعرس وعلگتة جابت الربطة كوتهة وعلگتهة
جرت فستاني كوتة وحضرتة
سما: لج عيني ماريد اروح
حلا: رجلج على رجلي تعوفيني وحدي
سما: لا
حلا: تشاركيني بدون ماتعرفين شنو ببالي
سما: اي
حلا: خوش
-- الو تمارة اي طبعا اني اخذج للصالون كم تمارة عندي انتِ بس اتصلي علية واني اطلعلج والاشياء المهمة لاتنسيهة تمام الله وياج
سما: على شنو ناوية
حلا: منو كلج اني ضعيفة
سما: ماجذب إلياس من يكول عليج ام المصايب
حلا: حروح اشوف نبأ شو هاي صارت حامل ماشفناهة بعد
سما: صبري اجي وياج
.....
نبأ"
من يوم العرفت نفسي حامل واني بس تعبانة اروح للشغل اتخربط وارجع وإلياس يحير شنو يسوي من يشوفني حيل تعبانة يروح يغسل الملابس هوَ كلشي ميخليني اسوي
گاعدة اشتغل هوَ يجيبلي الشغل للبيت وياخذة ويا من يروح
اندكت الباب اجني سما وحلا
حلا: يمعودة وينج اختفيني
نبأ: شسوي مااعرف ليش هيج صرت
سما: عندج العافية عمري
نبأ: الله يعافيج گلبي
حلا: ياس وين لعد
نبأ: راح يشتريلي گوجة
حلا: وين اكو گوجة هسة
نبأ: ماادري راح يدور
سما: هههههه راح يهد على ابو الطرشي
نبأ: اي هههههه هوَ لان بس ابو الطرشي عندة بهذا الوقت
حلا: اي صح
نبأ: هذا شنو بأيدج
حلا: توزيعات الحنة مال تمارة دزتهة الج
نبأ: يا عمري شكراً ،، اكللكم اريد ليمون اكو
سما: اي اكو بالثلاجة اجيبلج
نبأ: اني اروح اجيب
حلا: لا اكعدي اني اجيبلج واجي تريدين ملح هم
نبأ: اي عفية
راحت حلا جابت ليمون وملح گعدت اكل هنة راحن ينامن تعبانات .. اجة إلياس شافني اكل ليمون
إلياس: هسة شنو حرت وياج ليمون گوجة
نبأ: جبتهة
إلياس: والله واحد عندة بس معزل دلوني على بيتة خليتة يفتح وينطيني هاج اكلي
نبأ: هههههه خطية الرجال خاف تعبان
إلياس: يا تعبان بس هوَ عندة گوجة وين اروح
نبأ: اروح اغسلهة واجي لا تاكل الليمون
إلياس: دروحي اريد انام يا اكل ليمون
عفتة ورحت غسلت الگوجة وجبت بعد ليمون ورجعت للغرفة
هوَ صفن علية لان جبت بعد ماعون ليمون احط ملح على اللمون والگوجة اكل من هذا ومن هذا
إلياس: الله يساعدك وليدي حمض الطفل
نبأ: ايي شسوي يعني هوَ يريد
إلياس: دشوفي ميريد غير اكلة بيهة خير
نبأ: لا بس هذني بعدة مامغير رأية
إلياس: ها انام لو انتظر يتغير رأية
نبأ: لا نام تعال ماتاكل وياية
إلياس: بالعافية گلبي
نبأ: الله يعافيك
خلصت اكل غسلت المواعين ورجعت غسلت ونمت...
.........
حلا"
صار الصبح رحت اني وتمارة للصالون رجعنا الظهر دخلت للبيت تغديت وشربت علاجي
بدلت وگعدت اتمكيج اني وسما لبست الربطة يلا حطيت الحُمرة خليت حُمرة حَمرة اني بيضة تطلع علية تجنن
كشخت على اخر حبة طلعنا اني وسما وقت مااجتي الزفة
اجة يمان مخنزر
يمان: اصعدو وية تيم ، انتِ اجلطيني بعد اجلطيني
صعدنا بسيارة تيم جانت بس مرتة موجودة ام يمان صعدت وية تمارة بالسيارة وصلنا القاعة ونزلت امشي بكل ثقة ام يمان ماتدري بية اجيت عبالهة راح اكعد انوح والطم من كلامهة
حلا: هلو خالة عمري اشتاقيتلج
ام يمان: خلخالة تخلخل عضامج شعندج جاية
حلا: والله اني جاية لعرس تمارة وفؤاد صديق إلياس العفو من رخصتج اروح اعدل بدلة توتة
سما: ليش هيج تحجين وياهة
حلا: اسكتي ماتذكرين دعت علية بالموت بس لان ابنهة انطاني گلاص مي ولان ابنهة يحبني هيَ الي خلتني اتصرف هيج وياهة هيَ متحبني اصلا اذا تصرفت هيج او غير تصرف
لو هسة ابوس ايدهة هم تكرهني وبعدين اني مجاية عليهة جاية لعرس صديقتي وصديق إلياس لا فايتة بيتهة ولا شي
سما: من تحجين وياهة احسج وحدة ثانية
حلا: كل واحد اقابلة بحياتي هوَ يختار طريقة كلامي وتعاملي ويا بتصرفاتة الي يتصرفهة وياية ....
...........
تمارة"
قبل لا تطلع الزفة ابوية واخواني كلهم وراية صارو من دخل فؤاد لزم ايدي ابوية وخلاهة بأيد فؤاد
ابو تمارة: هاي وحيدتي دير بالك عليهة لاتبجيهة ولا تزعلهة هاية امانة يمك
فؤاد: بعيوني اخليهة عمي
يمان: هاي وحيدتنا وعزيزة روحي دير بالك عليهة ، انتَ صديقي اعرفك كفو
فؤاد: اضمهة بروحي ومااخلي شي يأذيهة ، كفو منك اخوية الغالي
تيم واكف ليغاد عيونة حمر مقاوم ميريد تنزل دموعة اني بجيت هوَ تقدم حضني وباسني من راسي
تيم: دير بالك عليهة
فؤاد: بعيوني اخليهة
صعدت بالسيارة واني ابجي بلگوة سكتت حتى لايخرب المكياج وصلنا القاعة ونزلنا
دخلنا للقاعة اجتي البنية الي دربتنة على الدخولية حلا عدلت بدلتي البدلة جانت كُلش جبيرة ،، وگفنا گدام الباب الي راح ندخل منة ..
لزمت ايد فؤاد ابتسمت وهوَ ابتسم اشتغلت الاغنية انفتحت الباب وبنات فراس الصغار لابسات بدلات بيض وكل وحدة شايلة سلة بيهة ورد
دخلنا والبنات كدامنة يطشن ورد بالگاع حسيت نفسي اميرة
رفعت بدلتي وصعدت الدرج وكعدت علكوشة اني ويا،، من وصلنا الدرج البنات كل وحدة راحت بجهة والمصورة تصور
كل شوية واحد يجي يباركلنا گام فؤاد يرگص هوَ وجماعتة علگوهة علگ واني تحمست اريد ارگص وياهم بس ميصير
باوعت شفت حلا گاعدة قريب من الطاولة البيهة امي ، وامي گالبة وجهة احسهة تريد تكتلهة
ورة ساعات طفت الاضوية اشتغل واحد بأتجاهي تقدم فؤاد ومد ايدة ..
فؤاد: تسمحيلي ارگص وية احلى وحدة بعيوني
ابتسمت وخليت ايدي بأيدة نزلنا صرنا بالوسط اشتغلت اغنية هادئة
مديت ايدي على چتفة والثانية بأيدة اما هوَ نزل ايدة على خصري قربني عليه
تمارة: مو علساس مانرگص سلو
فؤاد: حبيبتي تطلب وماانفذ ماريد يضل شي بنفسج
تمارة: احبك
فؤاد: واني هم احبج
الاضوية بس علينا الباقي ظلام والمصورة تصور كل التفاصيل ،، صفنت بعيون فؤاد اول مرة اكون بهلقرب منة
فؤاد: نزلي عيونج استري علينة
تمارة: ليش
فؤاد: تخليني هسة اخذج وامشي اعوف العرس والعالم
تمارة: هههه يا
خلصت الاغنية واشتغلت الاضوية رجعت لمكاني اشتغلت اغنية مال ردح ورجعو الولد يرگصون ويغنون وية الاغنية
شبعو رگص وكلمن رجع لمكانة
وزعو الاكل للمعازيم صارت الدنيا ليل واني تعبت وجعت. شوية واجة فؤاد تقدم بأتجاهي لزم ايدي حتى نروح وجماعتة بباب القاعة يهوسون
ودعت اهلي وامي گامت تبجي بجيت وحضنتهة ..
صعدنا بالسيارة مال فراس لان هوَ الي يزفنا وام فؤاد صعدت ويانة الباقي كلمن صعد بسيارتة امي مااعرف ويا منو صعدت
مشت السيارة مالتنة وجماعتة واقاربة ورانة طلعو سدو الشارع بسياراتهم مشينا هواي وصلنا البيت ونزلنا
ابو الطبل والموسيقى يدك وهمة يرگصون دخلت اني للبيت وگعدت علتخم جابتلي تسنيم مي شفت ابنهة يبچي زعلان اجة علية ضرب البدلة
حسن (ابن فراس): اخذتي عمو فوواد ماعبج
تمارة: يا حبيبي وين ماخذتة هوَ اخذني يمكم
ومستمر يبجي اجتي تسنيم تضحك
تسنيم: هذا كُلش متعلق بفؤاد عبالة راح يروح ويعوفة فاهم الموضوع غلط وزعلان لان خواتة شايلات سلات ورد بالقاعة وهوَ ماشال
تمارة: يا حبيبي تعال اكعد يمي
شالتة تسنيم وگعدتة يمي چتف ايدة وگعد زعلان شكلة كيوت ردت اعضة من خدودة بس خطية
-- اني اجيت يمكم حبيبي عمو فؤاد يبقى هنا ميروح
حسن: والله
-- والله
حسن: اني اعبج لعد
-- يروحي واني احبك
طلع من جيبة جكليت انطاني وحدة ونزل تسنيم ضحكت صاحوهة وراحت شوية ورجعت
تسنيم: يلا عمري اخذج لغرفتج
تمارة: اوكي
شالت بدلتي وفتت احس بالغربة حتى حلا وسما راحن مااجني لهنا وامي مااجتي رجعت ابجي
تسنيم: لاتبجين حبيبتي اني يمج
فلت الحجاب مالتي وعدلت شعري
تسنيم: اذا تحتاجين شي كوليلي لاتستحين تمام وملابسج مال البيت بهاي الخانة ومال الطلعة هنا
تمارة: تمام
غطت وجهي وسمعت الهلاهل يعني زفو فؤاد هيَ طلعت وفات فؤاد قفل الباب
فؤاد: نورتي بيتي يبعد گلبي
رفع الغطى من وجهي ابتسم وباس گصتي .....
........
سما"
من دانطلع من القاعة حجت ام يمان على حلا
ام يمان: بكل عين صلفة جاية انيي اقبل بهيج وحدة تصير چنتي
غمتهة وراحت حلا رادت تهد ولزمتهة گوة صعدت بالسيارة
حلا: لج عوفيني اروح اتعارك
سما: اكعدي يمعودة عرس هوَ لو عركة
حلا: ماتسمعيهة شتحجيي
سما: عوفيهة يمعودة اكعدي عيب منا العالم
صعد إلياس شغل السيارة ومشينا وصلت تمارة للبيت واحنا طلعنا گبل لبيتنا
دخلنا للبيت بدلت صليت ونمت حسيت بنص الليل على صوت بچي رفعت راسي ركزت شفت حلا تبجي
سما: شبيج حبيبتي ليش تبجين
حلا: هيج
سما: احجي
حلا: مااتوقع توافق امة وتجي تخطبني على هاي تصرفاتهة وكلامهة وياية
سما: كلشي بيد رب العالمين لاتبجين
حلا: شبيهة حاقدة علية اني شمسويتلهة
سما: مااعرف الله اعلم عليش هيج تتخبل من الغريبات عبالك مو بشر
حلا: اني احب يمان واريدة وعد بس الموت يفرقنا
سما: الله يجمعكم بالحلال يلا نامي لاتضلين تبجين، شربتي علاجج
حلا: لا ماريد
سما: !! گومي اشربي تريدين تتخربطين ويحيرون بيج
حلا: اهو انطينيا السم وينة
سما: انجبي لتكولين سم، هاج اشربي
شربت وشمرت العلاج ونامت رجعت نمت گعدت الفجر لگيتهة كاعدة قبلي صليت ونمت گعدت الصبح رحنا للشغل...
.....
تمارة"
گعدت الصبح يوم جديد حياة غير اني والشخص الاحبة يجمعنا مكان واحد
سبحت توضيت وصليت لبست گلبية مشطت شعري خليت مكياج خفيف وگعدت فؤاد
تمارة: فؤاد گوم الساعة بلتسعة هسة خالة تكوم تحجي علينا خاف يجون خطار
فؤاد: نامي محد يحجي
تمارة: اهو فؤاد يمعود گوم حتى صلاة الفجر راحت علينا ماتريد تصلي
فؤاد: الله شهلصباح الحلو اصبح على هلصوت والوجه الحلو ، اصلي طبعا شريد بعد والله استجاب دعائي وصرتي مرتي
تمارة: الحمد لله
فؤاد: الحمد لله والشكر
انتظرتة يخلص لفيت شالي هوَ بدل مشط شعرة ورش عطر
تمارة: ليش هلگد حلو
فؤاد: صوج عيونج ،، يلا امشي
تمارة: استحي
فؤاد: بس نسلم ونرجع
تمارة: لو يلغون هاي الفقرة احسن احس فشلة تخيل يعني تطلع تسلم وتهلهل خالة يبووو
فؤاد: هههههه يلا هاهية شنسوي
ضحكت وطلعنا بس شافتنة هلهلت هيَ وتسنيم ردت ارجع للغرفة من الخجل
سلمنا عليهة وانطتني فلوس
ام فؤاد: يمة بالخير عليكم والله يسعدكم و يرزقكم بالذرية الصالحة
فؤاد: الله يسلمج
اجوي الجهال يركضون علية
-- اييي العلوسة
تمارة: يروحيي
تسنيم: هاية من فراس
تمارة: شكراً
رجعنا للغرفة ذبيت الشال عدلت شعري وكعدت عبست
فؤاد: شبي الحلو زعلان
تمارة: اريد اهلي
فؤاد: بلسبعة يلا تشوفيهم
بچيت وحضني .. فؤاد: يمعودة لاتبجين لو ما عيب هسة اوديج تشوفيهم بس ميصير
اندكت الباب مسحت دموعي اخذ الصينية مال الريوگ من تسنيم وسد الباب
فؤاد: تسنيم تكول خطار بالطريق ،، اكلي علسريع حتى اروح اكعد بالاستقبال
تمارة: تمام
اكلت وكملت هوَ غسل وشال الصينية وراح اني غسلت و عدلت مكياجي لفيت الشال وطلعت لان اجوي الخطار
سلمت عليهم وشردت يم تسنيم بالمطبخ
تسنيم: اكعدي يمهم هاي ليش ملابسة ذهبج
تمارة: نسيتة
تسنيم: روحي البسي وتعاي
رجعت لغرفتي لبست الذهب قفلت الغرفة وطلعت كعدت يم النسوان
عمة فؤاد: انتِ مكملة دراسة
تمارة: اي اني محللة
عمة فؤاد: ما شاء الله
كل شوية وحدة تسألني شي حسيت نفسي بتحقيق واني راسي يفتر مشبعانة نوم اجتي تسنيم قدمتلهم كيك وعصير
ورة شوية گمت من يمهن رحت يم تسنيم
تسنيم: تذكرين من اول مرة اجيتي هنا
تمارة: ايي احلى يوم جان
تسنيم: اي ، اكعدي اكلي كيك
تمارة: لا ماريد بس نعسانة
تسنيم: ورو الغدة يلا تكدرين تنامين ويادوب بس شوية وتكعدين لان العصر هم يجون
تمارة: ليش مااجوي بالعرس
تسنيم: لا اقاربهم هواي
تمارة: اها ما شاء الله
حسن: انتِ شسمج
تمارة: تمارة صيحلي توتة اسهل الك
حسن: توتة
تمارة: ايي عفية
حسن: اني حسن سيحيلي حساني
تمارة: الله اسمك حلو حساني
حسن: هذني اسمهن سمل (سمر) وقمل (قمر)
تمارة: يعمري حلوات اسمائكم
بوستهم ورجعت كعدت يم النسوان مجموعة تجي ومجموعة تروح صار الغدة تغدينا ورحت لغرفتي ما صدكت بدلت ونمت بدون ماانتظر فؤاد يجي لان عيوني صارت حمر من النعاس
حسيت الباب يدگ وشي ثكيل على بطني فتحت عيوني فؤاد حاضني ونايم بعدت ايدة وگمت
تمارة: منو
تسنيم: اني حبي عمتي دزتني اكعدتكم لان صار العصر وراح يجون خطار
تمارة: تمام عيني
رحت اريد ارجع انام بس ما ضل وقت توضيت وصليت بعدين بدلت وگعدت فؤاد
تمارة: يلا كوم راح يجون بعد خطار
فؤاد: اشتعلوا
تمارة: گوم عاد لا تشعلهم
فؤاد: گايم ما يخلون واحد ينام
شمر الغطا وگام اني كعدت اخلي مكياج دااحس بتعذيب نفسي كلساع امسح واحط الله يرحم ايام الكفشة
لبست الشال وطلعت وصلو الخطار سلمت عليهم وگعدت....
.......
نبأ"
صرت زينة ورجعت للشغل شفت رنين مبتسمة بس شافتني اختفت ابتسامتهة تجاهلتهة ودخلت مكتبي
مرت ساعتين واجة إلياس
إلياس: ها حبي محتاجة شي
نبأ: جوعانة
إلياس: ماتحجين ليش ماخابرتيني
نبأ: شغل هواي
إلياس: تمام شنو تريدين اجيبلج
نبأ: مفلطح
إلياس: شنو!
نبأ: هههههه اشاقة اريد دجاج مشوي
إلياس: صار تدللين وبعد
نبأ: وياك طرشي
إلياس: امشي نروح للمطعم واطلبي التريدي
نبأ: ايي احسن
اخذت جنطتي وطلعنا لمطعم قريب اكلنا ورجعنا
رنين: يكولون حامل مبروك
نبأ: الله يبارك بيج
رنين: فرحانة
نبأ: اي طبعا لعد احزن
رنين: ايع الاطفال مقرفين
نبأ: تروحين من وجهي لا اذب ضيم گلبي بيج
رنين: وشحجيت وياج اصلا ماتستاهلين إلياس انوب ام لأطفالة
نبأ: إلياس تخليهة تروح من يمي لا اسحلهة بنص الشركة
إلياس: رننيييينن تروحين منا لا اطلع كل سوالفج يم المدير بعدني لحد هسة ساكت زيدي حجاية بعد تلگين نفسج بدون شغل وتعرفين المدير شنو يقربلي لهذا استري على نفسج وتچفي الشر ويم نبأ لا تتقربين فاااهمة
رنين: اي اي
وجهة صار اصفر راحت تمشي سريع شمسوية وهيج تخاف من إلياس!
نبأ: شمسوية؟
إلياس: هيج انسي يلا روحي لمكتبج
نبأ: المدير شيقربلك
إلياس: صديقي من زمان
نبأ: اها، احجي شمسوية رنين
إلياس: عوفيهة خل تولي روحي لمكتبج كملي شغلج
نبأ: اي لا تحجي رايحة
مرت ساعات خلص الشغل وطلعنا للبيت...
...........
سما"
اليوم غسان يجي علية لبست حجابي وكعدت انتظر
حلا: هاي شنو
سما: شنو
حلا: شكو لابسة حجاب
سما: مو غسان راح يجي
حلا: لعد عقد الشيخ المن لجدي ذبي الحجاب ترة حلال
سما: استحي
حلا: البسي شي مرتب وفلي شعرج
سما: ماافل شعري شيكول علية
حلا: سوي ظفيرة فضيهة
مشطت شعري وسويت ظفيرة ورحت حضرت الچاي جنت مسوية كيكة خليت كيك بالماعون دكيت الباب وفتت
سما: السلام عليكم
غسان: وعليكم السلام، شلونج
سما: الحمد لله وانتَ
غسان: من شفتج صرت بخير
خليت الصينية وگعدت ميتة خجل ، هوَ ساكت واني ساكتة
غسان: من نزوج تبقين تشتغلين؟
سما: اي ليش عندك مشكلة؟
غسان: لا عادي ماعندي مشكلة
سما: اختك شسمهة
علساس ماادري شسم اختة وهيَ اجتي وية امة من خطبتني
غسان: هههه اسمهة وسن، تحبين تختارين اثاث بيتج من هسة لو شوكت
سما: يا بيت
غسان: بيتنا
سما: ماادري لا مو هسة بعد
غسان: تمام
سما: خل نطول فترة الخطوبة اريد اتعرف عليك
غسان: اليعجبج
نوب نسكت نوب نسولف بعدين انطاني فلوس
سما: لا تسلم ماريد
غسان: اخذيهن بعد اني صرت مسؤول عنج هذا مصرفج
سما: تمام شكراً
وراهة راح ورجعت لغرفتي احسة حباب ...
.......
تمارة"
كل يوم يجون خطار الى ان صار يوم السبعة بعض من اقاربهم يجون واهلي يجون
اقاربهم البنات الصبح اجوي لان العصر نسوي حفلة صغيرة اكو هيج غرفة زايدة كل البنات كاعدات بيهة هاي الي تنوم اطفالهة وهاي الي تسوي بشعرهة وهاي التكوي ملابسهة اني عفت غرفتي وكعدت يمهن سوالفهن حلوة
تسنيم: توتة رجلج يصيحج
تمارة: يا رجل هاا تمام هههههه
تسنيم: نسيتي رجلج ههههههه
تمارة: اي والله التهيت وية البنات عبالي اني المعزومة نسيت اني العروسة
تسنيم: هههههه يلا عادي تصير
مشيت شفتة واگف يم الغرفة اني قافلتهة
فؤاد: شو قافلة الغرفة
تمارة: احسن اني متعودة اقفل غرفتي من تصير تجمعات
فؤاد: ها تمام احسن زين تسوين
فتحت الغرفة فات بدل وطلع سمعت اهلي اجوي احس اريد اركض عليهم طلعت حضنت امي جانت جاية وياهة رفل سلمت عليهن ورحت لفؤاد
تمارة: اكو احد اريد اسلم على اخواني وابوية
فؤاد: لا ماكو احد تعاي
دخلنا اني وفؤاد سلمت عليهم كلهم ورجعت يم امي احس صار سنة مشايفتهم مو اسبوع
تمارة: غيداء مارجعت
ام يمان: لا هم صايرة مدري شلونهة ماتقبل ترجع
تمارة: ترة حقهة يمة شنو صايرة مدري شلونهة
ام يمان: هسة قابل ماتحبل بعد وبعدين وذا تزوج عليهة شنو هيَ اول وحدة زوجهة يتزوج عليهة
ام فؤاد: لا والله حقهة تزعل وتاخذ على خاطرهة لان متزوج بدون ماتدري المرة گلبهة مو حجارة حتى عادي زوجهة يخونهة
ام يمان: السوا مو حرام الشرع حلل اربعة يعني اذا ماترجع يزوج وحدة وثنين وثلاثة
ام فؤاد سكتت وغيرت الموضوع متريد تصير مشكلة امي ماتتفاهم
عفتهم وگمت اجيب كيك وعصير خطية تسنيم تعبت كلشي عليهة ومتخليني اسوي شي
صحت لفؤاد اخذ للزلم وبعدين قدمت للنسوان اجوي اقاربهم
هواية اجوي صارت هوسة احير عليمن اسلم وام فؤاد تعرفني عليهم وحدة وحدة صارت الصلاة صليت ورجعت ردت اصب غدة وياهم ماقبلت البنات ساعدنهة فرشنا سفرة ثانية بالغرفة الزايدة گعدنا احنا البنات النسوان بالصالة وحدهن
همسة (بنت عم فؤاد): اكلج شو انتِ حيل حلوة شلون تعرفتي على فؤاد
تمارة: ههههه صديق اخوية
همسة: والله هنيالة ما شاء الله عليج
تمارة: تسلمين عمري
همسة: باعي اني اسويلج مكياجج ورة الغدة تمام
تمارة: تمام
كملنا غدة بدلت وصحت لهمسة تسويلي مكياجي اجتي تركض شايلة مكياجهة
تمارة: عندي مكياج
همسة: ماتريدين احطلج من هذا
تمارة: لا مااحب احط من مكياج احد وهم وجهي يتحسس
همسة: ماشي ارجع العلبة واجي
تمارة: اوكي
رجعت العلبة دگت الباب ودخلت قفلتهة واجتي يمي
همسة: شوفي اني احب الهدوء هم زين گعدنا هنا مااعرف امكيج احد وسط هوسة
تمارة: اها اني عادي بهوسة بهدوء اخلي مكياج ،، خليلي خفيف مااحب الثگيل
همسة: تمام
مكيجتني هيَ وساكتة لا تسأل ولا تسولف
تمارة: انتِ طبيعتج اجتماعية لو منعزلة
همسة: نص اجتماعية ونص منعزلة
حسيتهة حبابة كلامهة حلو ومؤدب متجاوز الحدود خلصت المكياج وراحت اجتي تسنيم سوتلي شعري
تمارة: بناتج اني اسويلهن شعرهن
تسنيم: لا عادي اني اسويلهن
تمارة: انتِ تعبتي هواية عادي ماعندي شي هسة اجي وراج واسويلهن شعرهن
تسنيم: تمام حبي
باوعت على نفسي بالمراية كلشي تمام خليت عطر وطلعت قفلت الباب
دگيت باب غرفة تسنيم فتحتهة
سمر ، قمر : هلو
تمارة: هلا عمري
انطتني القراصات والاكسسوارات مالتهن اخذت الكاوية وبرمت شعرهن وحدة ورة اللخ وخليت الطوگ وهنة لابسات فساتين طالعات حلوات
قمر: لبسيني حذائي
سمر: واني هم
تسنيم: لا ماما البسو انتو تعلمو تلبسو وحدكم
-- تمام
لبسن احذيتهة وطلعن يركضن هنة واخوهن واني رجعت لغرفتي لبست الكعب تكرمون وطلعت
اجني البنات يسحلن بالدي جي واني صافنة عليهن مااحس غير احد حضني انداريت طلعت حلا
تمارة: حلااا
حلا: روحهاا يعمريي شلونج
تمارة: بخير الحمد لله
سما: هلوو شلونج
تمارة: هلا يگلبي الحمد لله انتو شلونكم
-- بخير الحمد لله
فرحت بجيتهم ضلينا نسولف وراهة شغلو اغاني وكل البنات يرگصن گومني ارگص اندمجت وياهن
-- سمعونة هلهولة الف مبروك گولولة
-- عرسة العيد چا شيريد اذا مثل الگمر مرتة، اذا مثل الگمر مرتة
-- كلللللللوووووششششش
ام فؤاد گاعدة قريب علينة وتهلهل صارت الحفلة تجنن بلعرس مارگصنة هيج وتسنيم ويانة ترگص
گعدت وشفت امي تحجي وية حلا مشيت عليهن اشوف شتحجي وياهة
ام يمان: انتِ وين مااروح اشوفج شوكت اخلص منج
حلا: خالة شبيج وياية شمسويتلج
ام يمان: اكرهج ماطول ابني يحبج ويريدج ميقبل يزوج بنت اختي اني اكرهج
حلا: والة يمان يزوج بنت اختج المصخمة
ام يمان: احترمي نفسج لج لااسحلج بنص النسوان هسة واخزيج، والله بنت اختي تسواج وتسوة راسج
تمارة: يمةة ليشش هيج تحجين وياهة
ام يمان: انتِ انجبي ولا تدخلين
حلا: شوفي خالة اني لااكرهج ولا شي بس يجي يوم افوت لبيتج چنة وابنج مااعوفة لو اموت مو انتِ الي تفرقينة بس الموت يفرقنة بإذن الله
ام يمان: باعي هاي الي تدافعيلهة شگد صلفة طلعتي على حقيقتج
حلا: شكراً،،، تمارة اعذريني امج هانت كرامتي هواية مع السلامة
تمارة: يمة حرام عليج والله حرام عليج
دفعتني وراحت وحلا جرت سما وطلعت بدون ولا كلمة قهرتني رجعت لغرفتي گعدت ابجي
خلصت الحفلة وكلمن راح لبيتة اجة فؤاد شاف عيوني حمر
فؤاد: شبيج منو وياج منو ضوجج
تمارة: محد
فؤاد: احجيي
تمارة: امي تعاركت وية صديقتي وصديقتي طلعت زعلانة
فؤاد: ياهية اخت إلياس؟
تمارة: اي
فؤاد: شبيهة وياهة
تمارة: مااكدر احجي
فؤاد: براحتج بس لاتبجين مو مردتي گلبي
بلگوة سكتت وراهة صار وقت العشاء تعشيت ونمت ثاني يوم گعدت نفس الروتين بليل فؤاد بدل بسرعة يريد يطلع..
تمارة: حبيبي وين رايح
فؤاد: اطلع اني والولد صار هواي مطالعين
تمارة: اخوية
فؤاد: اي يمان وإلياس ، خوما تضوجين اذا طولت برة
تمارة: لا عادي روح تونس
باسني من راسي وراح گلبي مامرتاح لهلروحة بس سكتت
صارت الدنيا ليل وهوَ ماكو اتصل ميرد گلبي نغزني ، فؤاد اذا اتصل عليه يرد علية بنفس الدقيقة ميطول هلگد
صارت الساعة بلوحدة وهوَ ماكو طلعت بالصالة يم عمتي هيَ هم تلوب ضل بالهة
ام فؤاد: ولج يمة گلبي مامرتاح وليدي مايطول هلگد برة ويرد علية من اتصل ليش مايرد
تمارة: ان شاء الله خير ان شاء الله ماكو شي
اتصل فؤاد علية فتحت الخط صوت غريب
-- الو
تمارة: الو انتَ منو !!
-- اختي انتِ تعرفين صاحب هذا الموبايل
تمارة: اييي زوجييي
-- زوجج صار ويا حادث.........
يتبع......
الـكـاتـبـة طـيـبـة ❤️🕊️....
قناة التلي;