الـرقطاء وكراتها الثلاث

اللـدغة السادسة والأربعين🐍

الرقطاء وكراتها الثلاث 🐍

اللـدغة السادسة والأربعين 🐍

بقلم كهرمانه
______

ديالا:-ماعندك دليل كميل دتحجي بدون دليل هَـم چذبه جديده حتى تطلع اهلك ماكـو مثلهم كدامي واهلك ماخذين أملاك من جدي مذاخر وعمارة

كميل:-مخلفات الحرب هـيَ الدليل جثة خالچ دليل ، معن وحالته النفسيه رغم چان طفل طبيعي هَـم دليل

البيت الگعدتوا بيه باليرموك وانتوا چنتوا باليوسفيه ، واذا عالمذاخر والعمارة ترى خالچ ياسين چان انسان فاسق كُـلش يلعب اقمار وخسر اجه أخذ من عمي كنان ذاك المبلغ حتى يسد دينه

ومن عمي احتاج راد فلوسه خالچ سجل الأملاك بأسمه باع العمارة وسد احتياجاته وبقى المذاخر

مافكرتوا لمرة وحدة رياض منين جاب كل هــاي الفلوس يَـعنـي لو يضل يلم بيهم مليون مليون على كل سنه هَـم چان لهسه ممكمل المبلغ بيت مبني ومأثث بأحدث الأثاث ومجهز من كل الأجهزه الحديثة

ماگلتوا جدنا الشفيه منين جابهن مو بَــس البيت ومبلغ أكثر من خمسين مليون فوگ البيت وخالچ الثاني گعد يخطط ينتقم من عدنا

أبوي وعمامي غلطوا وكفروا عن غلطهم وحتى لو چان جدچ رياض رايد مره هَـم ينطونه في سبيل يرضى بدون مايتلوث بالدم

واذا تردين دليل العقار أنـي باچر اجيبلج الدليل تحويل البيت والتنازل لرياض بعد وعمامچ موجودين بالفصل حمد ومجيد العار وجدچ ضاحي شاهدين على كلشي تردين اجيبهم گدامچ يشهدون

بسبب هــاي الحادثه الصارت ابوي وعمامي جابوا حراس يتناوبون على حراسة البيت وكل بيت راجع للعائلة مخلين عليه حارس من غير الكامرات التارسه الشارع

أصحي أنتِ وخواتچ عايشين بوهم مخدوعين انتوا نفس ماچنتي تگولين طين زايد استخدموكم مثل الأدوات شوفي حالتكم هسه ماكـو أسوء منها حتى مستقبلكم مجهول

ديالا:-أسكت كافي

كميل:-هــا من حچيت الصح صــار لازم أسكت مو وين رانح لسانچ وين صوتج اليزمخ بينا شو خنستي شِــنو اللي استفاديتوا وحصلتوا غير شلعان الگلب هياتها أختچ توأمچ توفت واختچ الثانيه بالمستشفى

ولاتگولن بـَحـر غلطان لاا خالي ماغلطان أكثر من مرة خذلته وعافته وشردت لاا وطلعت مسويه بلاوي من ورى ضهره

برجليها عافته وراحت لأمچ وشلون جازتها أمچ اجت تبيعها وتخلي شرفها ينداس والله شِــنو تنتقم منه شـلون ضمها من العالم بيوم حنتها تندم وصحح غلطه ونسى الماضي وهيَ استمرت بأذيتها

ديالا:-كاااافي اسكت لتكمل بحر يستاهل لتسوي ملاك هو هم خله الناس تحجي بسمعتها ومعاذ يستاهل لأن خله مسك بمستشفى المجانين

كميل:-ارجعي للسبب الرئيسي منوو ماكو دخان من غير نار كلنا نعرف مسك شسوت حتى تحصل على معاذ وبحر من اتزوج هرم چان حتى يرجع الكلام اللي مس أبوه بسبب أبوكم أنتوا عايشين بقاع مال قذارة من ناحية الأم ومن ناحية الأب

عليمن استغرب إذا أمكم خيزران وابوكم نذير اليوسفيه تشهد على سوالفه الطايح حضها بس غير احنا ساكتين عبالنا انتن بنات مسالمات طلعتن راضعات ويه ابليس

أنهاريت بعد اللي سمعته أستفزني بأسلوبه دفعته ملخت روحي تملخ حسيت روحي ضايعه ماكـو شـيي يلمني متشتته روحي متقطعه وكل قطعة مشموره بمكان وين اللي يلم شتاتي وين اللي يرشدني للصح وين اللي ينتشلني من هذا الضياع

حسيت وجهي خدر من گد ماضربت بيه لزم أديه كميل وهو يهدي بيه ويمنعني من ضرب وجهي حضنّي ومسح على شعري جمدت بمكاني مامتعوده أنحضن من شخص غير خواتي غمضت عيوني وأني أحس محتاجه الأمان الموجود بحضنه

صوت شهگاتي هــوَ الشي الوحيد المسموع بالغرفة حررت روحي من حضنه مبتعده گعدت عالكرسي والكلام كله ضاع من عندي بعد السمعته كل كلمة گالها كميل صحيحه أهل امي طماعين ويحبون الفلوس حچيت بصوت مبحوح من الصراخ

-طلعني منا

كميل:-ماكـو طلعة
ديالا:-وديني للمستشفى يم خواتي بعد ما اريد ابقى هنا

كميل:-هرم راح تطلع احتمال بالليل راح اطلع هسه واذا بالليل ماطلعوها اجي اخذچ الها اول وتالي بالليل تطلعين منا اذا مو للمستشفى لبيت عمي كنان

ديالا:-طلع من الغرفة وقفل الباب وراه گعدت بالگاع أنـي وهمومي حتى البچي مليت منه روحي تلوب على خواتي وياسين
.
.
مسك:-شافوا حالة هرم سمحوا ألها تطلع بالليل وضعها مستقر بَــس لازم عدم حركة لأن مسويلها ربط بالجديد بالمستشفى وياها بَــس أني وبحر البقية كلهم محتارين بـ كنان اجت سلمى ورنده شافوها ومعاذ يروح ويرجع لأن ابوه حالته كُـلش تعبانه ، أجه بـَحـر بعد ما كمل تقارير المستشفى حتى نطلع

-يـله أمشوا

مسك:-وين توديها ان شاء الله
بـَحـر:-ببيتي
هرم:-ماريـد اجي لبيتك

بـَحـر:-أسكتن ماريـد أسمع ولا كلمة

مسك:-مو بكيفك أنتَ متحبها لاتسوي روحك تحبها علمود الطفل جاي تهتم بيها واضح وضوح الشمس اخذها يمي ببيت وجد واحنا نهتم بيها عود من يجي ولي العهد ننطيك ياه وتطلگها ممحتاجين الك الحمدلله

بـَحـر:-مسك لاتضلين تمسلتين بالحچي مالي خلگ اتعارك هسه والناس مرضى وتسمع صياح وهوسه أمشن يـله وغصبًا عليچن تنفذن اللي أگوله

مسك:-لااا وتحچي بزودك
بـَحـر:-أكيد أحچي بزودي منين أخاف مثلًا من عندچ لو من اختچ

مسك"ضحكت بإستهزاء":-ميحتاج أذكرك شسوينا
بـَحـر:-شوفي حال اختچ وميحتاج أگلج شسويت وشنو مستعد أسوي

هرم:-تـفـتـخر بعملتك الشينه
بـَحـر:-أسلوبچن هذا جاي اعاملچن بنفس الأسلوب
هرم:-رصيت على أسناني بسبب ألم الخياط مال الرصاصة
-صدگ يابحر مابيناتنا بَــس المحاكم وراح تشوف

بـَحـر:-الله كريم
مسك:-ابقى يم هرم ما أعوفها يمك وحدها
بـَحـر"ببرود":-ميخالف

مسك:-طلع گدامنا واني وهرم وراه نمشي على كيف لأن هرم متگدر تمشي بسرعة شفت الوضع مايساعد وگفتها يم باب المصعد وجبتلها كرسي متحرك وياها عامل يدفعها أسرع طلعنا من المستشفى وصلنا العامل للسيارة شفت بـَحـر واگف ينتظرنا شالها وصعدها للسيارة لأن عالية گعدها بصفه واني صعدت وراهم حسيت نفسي مخنوگه ماحب واحد يفرض شخصيته علينا

طول الطريق أني عيني عليهم أراقبهم بصمت ، هرم متباوع عليه ولا هــوَ واحد متجاهل الثاني هالشي بردلي قلبي ماريدهم يرجعون لبعض هرم متحبه ولا هــوَ يحبها لو يحبها ماچان ضربها طلقة اليحب مايحاول يقتل حبيبه بالعكس المفروض يضحي علمود اليحبه

وصلنا لبيته نزلت أنـي واخذت الجنطة مال الغراض نزل بـَحـر وشال هرم نزلها واني لزمت أيدها أمشيها لداخل البيت أجت أم موسى تركض حضنت هرم وهيَ تبچي

-يمه سوده عليه هــاي شصايـر بيچ يمه عمت عيني ، هستوه نور البيت

-سلمنا عليها أني وهرم وأستقبلتنا محضرة الغرفة مال الخطار النا ومدفيتها شويه ودخلوا ديالا  ورفيف ، ديالا وجهها شاحب وعيونها منتهيات حضنتها وأني مشتاقه ألها وهيَ تشكي وتبچي بسبب بُعدنا عليها

ورفيف هَـم حالها مو أحسن من حالنا دخل كميل وراهن وهو شايل ياسين انطاني ياسين وعينه على ديالا وديالا ممعبرته

تنفست بأرتياح حسيت روحي رجعتلي أكتمل عددنا ورجعنا ألتمينا وخسارتنا الوحيدة هيَ وجـد
.
.
بعد مرور شهرين

هرم:-أسابيع مروا واني أنام بالأستقبال خواتي ورى أسبوعين من العملية راحن لبيت وجد لأن مايرتاحن لبحر وبين فترة وفترة يجن يتطمنن عليه

تعافيت بهاي الشهرين واخر مرة رحت للدكتورة گالتلي عيشي حياتچ طبيعي وضعچ كُله مستقر تگدرين تصعدين الدرج وتطلعين وعالأغلب حامل بولد

صعدت للغرفة مالتي نفس ماتركتها أخر شـيي الكنتور مفتوح والغرفة فوضى واصح ماداخللها وهاجرها رتبناها أني وأم موسى لأن ام موسى مانعها تدخل للغرفة مالتي وهيَ محترمه هذا الشي

بعد كل اللي سواه ميحاچيني ولا أني أحاچيه صح غلطت بحقه بَــس مو كُثر ما هــوَ غلط الأذيه الأجت من عنده ما أنساها طول عُـمري صرت أحسبه حاله حال خيزران

الحمل بدأت أعراضه تضهر عليه بطني كبرت وصلت نهاية شهر الخامس وحركات الطفل خفيفة كُـلش يادوب أحس بيها

بدلت ملابسي ، گعدت عالچربايه وسندت ضهري عالمخدة
انفتح باب الغرفة دخل وسد الباب وگف گدام ميز المرايا ودنگ راسه خفت حسيته راح يخنگني أو يسويلي شي يأذيني گمت من مكاني بحذر وردت أطلع من الغرفه صاحلي

-هرم

هرم:-هــا شتريد
بـَحـر:-وين رايحه؟
هرم:-أطلع من الغرفة اخذ راحتك ، مشى بسرعة وصل ناحيتي مشت الرعشة بكل جسمي قربه يمي يخوفني نزلوا دموعي وهو من شاف دموعي اتحول ١٨٠ درجة لزم ايدي سحبتها بقوه بس چان لازمها أقوى من عندي

بـَحـر:-لــيش تبچين ماسويتلچ شـيي حتى تبچين
هرم:-نفس ردة فعلي من اشوف خيزران
بـَحـر:-وصلت بيچ تقارنيني بخيزران

هرم:-اي متفرق عنها شـيي
بـَحـر:-نسيتي أذيتچ ألي يَـعنـي هسه أنتِ كلشي مامسويه واني عاقبتچ بدون ذنب مثل ماچانت تسوي خيزران مو ؟

هرم:-عندك هوايه حلول غير اللي سَـويته تگدر تضربني ، تفارقني ، تصيح ، تكسر ، بَــس مو لهالدرجة تخاطر بحياتي واني حامل وانزف

بـَحـر:-شمدريييني بيييچ حاامل انتِ ضامه عليَّ الموضوع

هرم:-كُـل الكلام مايوصف شعوري عجزت من الكلام كُـل الحروف ماتتجمع وتحوك معاناتي ، گعدت عالأريكه محتاره وأحس گلبي حجاره صــار ، أجاني مغص ببطني غمضت عيوني بألم وفتحت مباشرةً بلا ما أخلي ينتبه عليَّ باوعتله واضح عليه التعب حچه بعدم أهتمام ت

بـَحـر:-لازم نخصمها اليوم
هرم:-اي بله شتريد ؟

بـَحـر:-كبري عقلچ هرم راح أخليچ فترة اختبار عدلي تصرفاتچ لخاطر الطفل اللي بيناتنا  أني حاولت اعوضچ واعتذرلچ عن الغلط الغلطته بحقچ وانتِ وهمتيني بقبولچ ألي وبشنو جازيتيني بأختصار كلنا غلطانين

هرم:-ما أنساها ألك بـَحـر ما أنسى وما أسامح أني ما أحس بالأمان يمك راح أبقى عايشة بقلق

بـَحـر:-لعد أني شلوووون رااااح أنسى الرسائل مالتچ أنتِ ومروان متروووح من بااااالي لوو من عيشتيني بكذبة وشردتي لووو من ضميتي عليه حملچ هــاي مجازاتي لأن أحتويتچ

هــاي تاليها أحتضن اللي أحبهم يحتضنوني بغدرر  چنت متصورچ عوض ألي لاا أنتِ ولا أمـي ولا أخواني العايشين بالغربة ولا أبوي محد جازاني محد تعب روحه علمودي أني شخص عابر بحياتكم تتخذونه وسيلة تستفادون منها

هرم:-قاطعته وأني أنفي كلامه

-أني مو مثل أهلك
بـَحـر:-وأني مو مثل أهلچ

هرم:-رفعت رأسي وركزت بعيونه ، عيونه حُـمر ودموعه تنزل التفت مسح وجهه بقساوه وطلع من الغرفة

مر أسبوع على هالحدث الصار هــوَ ينام جوه واني أنام بغرفتي ماحچيت وياه كلمة وحده

چنت كاعده بالمطبخ يم أم موسى تطبخ وأني اباوع عليها اتعلم منها أخذت علاجي وكل شويه اكل شغله واشرب مي لحد ما صار عندي وجع بمعدتي بسبب العلاج ما أتحمله وكثرة الأكل

أندگ الباب وراحت فتحته أم موسى دخل مروان بيده أوراق سلم عليَّ وراح لبحر گعدوا بالأستقبال وسدوا الباب أحسهم جاي يرتبون فـدد قضية لواحد ماعرف لــيش هيچ حسيت

أخذت صينيه وخليت بيها مي وگهوه سوتها أم موسى وچكليت ويه الگهوه حسيت كُـلش اختنگت من الأكل ووجع المعدة وصيت ام موسى تاخذ الضيافة واني رحت للحمام استفرغ ، عيوني راح يطلعن من مكانهن غسلت وجهي وطلعت من الحمام وأني أهفي على وجهي

طلعوا بـَحـر ومروان من الأستقبال بـَحـر يحچي بالتليفون ومروان مركز وياه سمعت أسم معاذ معناها ديحچي وياه تجاهلتهم ودخلت للصالة تمددت اجت أم موسى گعدت يمي تستفسر عن حالتي
.
.
بـَحـر:-مروان متأكد منه لو لاا
مروان:-متأكد كُـلش متأكد كاعد بشقة وعنوانها بالتفصيل عندي

-انفتح باب السيارة ودخل معاذ

معاذ:-السلام عليكم

الجميع:-وعليكم السلام
معاذ:-شِــنو شـصار خبصتوني خبص
بـَحـر:-نصفي حسابنا ويه مجيد العار تجي لو لاا

معاذ:-طلع من السجن؟؟؟؟؟؟؟؟؟؟
مروان:-اي مطلعينه بكفالة
معاذ:-شلووووون منين أله واسطه هذااااا

بـحر:-مروان مراقب وضعه والبارحه عرف وين ساكن
معاذ:-يـله امشوا شمنتضرين

مروان:-دقيقة خلي يجي كميل
معاذ:-مروان ذوله منو الجايبهم بالسيارة الگدامنا
مروان:-ربعي ذوله شبيك يبقون ويانه كلشي يصير

بـَحـر:-ربعك اذا صــار علينا شـيي أول الناس تشرد
مروان:-لاا خالي ما أسمحلك ذوله اسباع
كميل:-يـله يـله امشوا

مروان:-أصعد بذيچ السيارة كميل

-راح كميل صعد ويه الولد أصدقائي بالعمل واتوجهنا للموقع الحددنا أني أسوق وخالي بصفي ومعاذ ورانا گاعد

-خالو

بـَحـر :-هــا
مروان:-بَــس خلي نخلص سالفة مجيد عندي ألك خبر تبقى راضي عليَّ ليوم الدين

بـَحـر:-شمسوي ، خبر شِــنو
مروان:-خبر يسعدك ويريح بالك
معاذ:- بـَحـر ماعنده شـيي يسعده
بـَحـر:-عَـفيه عليك معاذ ماچذبت ، وين اكو شغلة تسعدني

مروان:-خليها لوقتها ياخالي بَــس اتأكد من شـيي واحد بعدها تجيك البشارة

معاذ:-صــار عندي فضول أعرف شِــنو مروان غششني
مروان:-ماكـو بعديـن كلكم تعرفون

بـَحـر:-خير ان شاء الله ، وصلنا للعمارة مروان طبگ السيارة ونزلنا

- تعالوا وياي معاذ ومروان وكرار ، كميل والبقية أبقوا هنا خاف يشرد لو يسوي شـيي واذا احتاجيتكم انطيكم اشارة اتصال

بـَحـر:-صعدنا للشقة وگفنا عالدرج وخليت صديق مروان هــوَ اللي يدگ الباب لأن مجيد يعرفنا دگ الجرس ورى دقايق يـله فتح الباب يستفسر من كرار تقدمت أنـي ودفعت الباب ودخلت والولد وياي

-السلام عليكم اشتاقيتلك مجيد

مجيد"بـ تلعثم":-هـ هلا بـَحـر شعنددك

معاذ:-مو ديگول اشتاقيتلك وأني اجيت وياه هَـم مشتاقلك وأيدي تحكني

بـَحـر:-مشيت وگعدت عالتخم رفعت رأسي أباوع لوجهه القذر طلعت المسدس من حزامي وأشرتله بيه

-هيچ تستقبل ضيوفك مجيد ياما وياما استقبلناك

مجيد:-جيتكم هــاي وراها شـيي وليش جايب معاذ وياك تعرف بيناتنا مشاكل

معاذ:-جايين نبارك الك بمناسبة خروجك من السجن تعرف أحنا أصحاب واجب

مجيد:-راح تقتلوني مثل ماقتلتوا ياسين ويونس مو
بـَحـر:-لاا بَــس نستفسر على كم شغلة بعديـن نشوف شغلنا

معاذ:-شبيييك ترجف اگعد ياعيني أكعد لك مروان جيب مي لمجيد عم زوجتي نشف ريگه

مروان:-حاضر

-راح جاب له مي وأنطاه يشرب

معاذ:-وهسه بعد ماشربت مي احچيلنا لــيش هيچ أنتَ خبيث ويه بــَنات أخوك وليش أصلًا بلغت عليه وتسببت بمقتله هــوَ عنده بــَنات

ومسك لــيش أذيتها وانتَ تعرف مقصدي ليش بقيت تحچي براسي وتوهمني بشغلات ماموجودة عنها في سبيل اكرهها واعذبها واعيشها جحيم شِــنو سر هذا الحقد

مجيد:-معليكم شعليكم انتوا يـله اتفضلوا اطلعوا بره

بـَحـر:-أحنا النحچي هنا وانتَ عليك بَــس تجاوب ولاتأمر لأن احنا اللي نأمرك أنتَ مجرد قذارة نتعامل وياها ، وفر علينا درب النجف عكر بالليل يضوج عالأقل نخلص مراسيم دفنك العصر

مجيد:-يـله اقتلوني مراح احچي شيييي يـله

معاذ:-هجمت عليه وخنگته وهو يصرخ ويدفع بيه صاح بـَحـر

-معااااذ عوفه خلي أشوفه شـلووون ميحچي

مجيد:-بسبب نذير كله بسببه أني چنت احب خالتك يابحر ونذير من راح اتزوج أمك بالسر وانفضح سرهم بين العربان وسيرتها على كل لسان وأبوي رفض اتزوجها لأن سمعة بيت جدك ويه الزباله صارت شالوا من اليوسفيه وابتعدت واخذت كلشي وياها زاد الحقد على نذير وعلى بناته وماندمان على كلشي سَـويته ماندماااااااان

معاذ:-لك حيواان هذا مو مبرر لسوااالفك أنتَ فـدد واحد ماعندك ذرة أنسانية

-تقدم بـَحـر وگف گدام مجيد لزمه من فكه وضغط عليه بقوه

-تطلع من بغداد ومن اليوسفيه مجيد مو بَــس أنتَ لاا أنت وعائلتك كلها ماريـد أشوفك فـدد يوم واذا شفتك أموتك خلاص افتهمت لو لاا وهاي گدام مروان وصوتي جاي يتسجل أي شـيي يصير عليَّ لو على واحد من اهلي والقريبين عليَّ أنتَ المسؤول شوفلك محافظة تلفيك واهلك وياك انطيتك فرصة تعيش بَــس هالفرصة ماكـو غيرها وراح ابقى مراقب العمارة وبيت اليوسفية واهلك هَـم

مجيد:-درووووح تهددني لاا أنتَ ولاعشرة مثلك يخوفوني
بـَحـر:-مجييييد ضب لساااانك وأعرف ويامن جاي تحچي

-دفع بـَحـر ولزم المسدس مالته راد يغافل بـَحـر وياخذ مسدسه بَــس بـَحـر محكم قبضته عالمسدس متوقع هالحركة ضحك بَحر بصوت عالي بعد مافشلت محاولة مجيد

معاذ:-لتحاول تتحايل علينا ترى معزلين هــاي السوالف على ايدنا

بـَحـر:-أگعد أگعد الضاهر أنتَ ينرادلك تهذيب

مجيد:-كلكم كـ***** و**** يــاا ****

بـَحـر:-مجييييدددد كااافيييي
مجيد:-لو بيكم خيررر مو مره تركضكم على تك رجل

بـَحـر:-ياطااايح الحظ
مروان:-لاا لاا خالو لتتهور

-سحب أقسام ووجه المسدس على مجيد ومجيد يضحك ويفشر بكلام بذيئ يمس شرف بــَنات نذير

معاذ:-ياااا كلب ، دفرته برجلي على بطنه وسمعت صوت بـَحـر يامرني أبتعد من عنده ابتعدت وضربه طلقتين بكل رجل طلقه صرخات مجيد احتلت مسامعنا أندار بـَحـر ببرود فتح تليفونه واتصل بشخص طلع من الشقه واحنا وراه تاركين مجيد يصرخ وحده والناس كلها طلعت والتمت العالم يردون يعرفون شــكوو وشنو هذا الصوت صعدنا بالسيارة وبحر يحچي بالتليفون

-ألو حمد ، أي أني بـَحـر تعال اخذ قذارتكم بالشقة مالته اذا تعرفها ، هــا يَـعنـي تعرفها يـله تعال وماريده يبقى ببغداد هذا درس بسيط أله مره ثانيه أفرغ شاجور براسه، كلكم تطلعوووون من بغداااد ، مجيد إذا رجع يمشي على رجليه ودخل بغداد خلي يعتبر روحه جثه تَـمام تردون تبلغون الشرطه بلغوا عندي دليل يوديكم يــاا آل ضاحي كلكم ورى الشمس واني اطلع منها يـله أودعناكم

مروان:-أشرت للسيارة الموجودين بيها أصدقائي يمشون ورايه حتى نرجع للبيت

-خالو لــيش ضربته

بـَحـر:-يستاهل حتى يعرف احنا خط أحمر
معاذ:-لو ماضاربه أنتَ چان أنـي ضربته هالـ ****
.
.
هرم:-بعد ماراح بـَحـر ضلينا نسولف أني وأم موسى بعدها تغدينا سوى وگالت راح تروح تشوف بنتها المتزوجه وتبات يمها ، راحت أم موسى أخذت علاجي وسمعت صوت الجرس شفت من الكاميرات مسك هـيَ وديالا

فتحت ألهن الباب وسلمت عليهن ودخلنا گعدنا بالصالة جبت كرزات وحلويات ونمنميات وببسي وگعدنا ناكل ونسولف بمواضيع عامه ونضحك على ياسين كل شويه مقلد علينا بالكلام

-هسه أجيبلك صديق يــاسينو

ديالا:-هرم گلتي لبحر ع جنس البيبي
هرم:-لاا نسيت وأصلًا ماريده يعرف
مسك:-عوفي أبنه يمه واتطلگي منه

ديالا:-مسك عَـفيه انچبي مع إحتراماتي الچ شِــنو تردين الطفل يعيش بحسرة ويعاني ويحس بالنقص يشوف الأطفال غيره شـلون مرتاحين وعدهم أهل ويشوف نفسه أمه ماكـو يمه وأبوه ميبقى يمه گاعد اربعه وعشرين ساعة بالبيت

هرم:-ما أعوفه اترك بـَحـر واخذ الطفل وياي
ديالا:-كلامي الگلته قبل شويه أعكسي هَـم يريد أب يحتاجكم ثنينكم

مسك:-واذا هــوَ ميريدها شِــنو تبقى وياه ما أخليها
هرم:-من أجيب اشوف الوضع هسه هــوَ كُـلش كارهني

ديالا:-بــَنات تدرون كميل صدمني صدمة هسه صــار الوقت المناسب حتى أحچي

مسك:-شصايـر سوالچ شـيي والله أروحح اموته
ديالا:-لاا بَــس خوالي ثارهم ماخوذ جدو ضحك علينا تدرن

مسك:نعممم؟؟؟؟
هرم:-چذذذب يچذب عليچ وانتِ مصدگة

ديالا:-لاا والله بــَنات وبالدليل حچالي جدو ماخذ منهم بيت اليرموك فصل البيت الأنتقلنا له وحتى گايلين شتردون أحنا حاضرين مو بَــس هيچ خالو ياسين مغتصب معن أبن عابد وعابد شايفه وحابسه بالبيت مالتهم وقاتله وجدي چان يعرف وخيروه يــا ينفضح أبنه اذا اشتكى عليهم يــاا يسكت عن سالفة قتله وجدو طلب يسكتون

تخيلوا كلشي محلول من زمان وبعلم جدي واتفاقيات بيناتهم لاا ومتصلحة الأمور وعزايم بيناتهم طبات وطلعات أحنا دمرنا روحنا علمود شنوو يـله گولوا خسرنا وجد علمود ثار وهمي وهمنا بيه جدو متشوفون خيزران ماهتمت لسالفة الثار وراحت أول ماتوفى أبوها

هــا وقبل لاا أنسى الأملاك الجدو يريدهن المذاخر والعمارة خالو ياسين چان يلعب أقمار وخسر واخذ دين من كنان وكنان من احتاج طالبه بيهن والمبلغ كُـلش چبير وجدو من عرف سجلهن بأسم كنان وهو اتصرف بيهن وكميل گال العقود موجوده والشهود كل الموجودين بالفصل وقت ما انطوه بيت بأسمه ومؤثث وفوگهن مبلغ مالي

-انصدموا البنات وضلن وحدة تباوع للثانيه بتعجب

مسك:-هه طين زايد
هرم:-يَـعنـي أحنا مشينا ورى باطل جدو دمرنا دماااار ليش هيچ يسوي لــيش

ديالا:-هْوايَــه أذنبنا بحق ناس أبرياء وهسه شـلون راح نعوض الخسارات وجد وابنها خسارة چبيره سمعتنا الصارت بالگاع مبقالنا أحترام ولا تقدير

-مسك گاعده وصافنه مانطقت شـيي غير طين زايد هرم بچت وهيَ تتحسب على جدي حضنت ياسين بقوة ودفنت رأسي برگبته أحس روحي حاضنه وجد

هرم:-جدي مشكوله ذمته من هذا اليوم لحد يوم القيامة ما مسامحته حتى وهو ميت

مسك:-لازم نصحح غلطنا ونعترف بيه
ديالا:-شـلون
مسك:-نحچيلهم كلشي ونشوف إذا يسامحون لو لاا
هرم:-شـلون مسك بيا وجه فهميني

مسك:-ماعرف لازم أشوفلي طريقة
 
ديالا:-كافي هرم لتبچين مو زين عليچ
هرم:-تعبــت ديالا صرنا مضحكه تبهذلنا وبهذلنا غيرنا بدون ذنب ، يعني همه وجدي كلشي متفقين عليه ومن زمااااان وفاضينها

مسك:-لملمت خيبتي عدمت فكرة تقبل الخذلات واستبدلتها بفكرة ثانيه الشجاع مو بَــس اللي يفوز بمعركة والناس تهابه لاا الشجاع اللي يعترف بغلطة ويطلب السماح

-يـله ديالا أمشي مو تردين ناخذ ياسين للألعاب

ديالا:-اي يـله أمشي
هرم:-وين مصارلكم هْوايَــه من أجيتوا

مسك:-لاا ورانا مشوار ، هرم أنسي كلشي وصلحي الأمور بينچ وبين بـَحـر إذا وافق وعاملچ بلطف خيرًا على خير واذا بقى على أسلوبه المستفز والعصبي أتركي

هرم:-تَـمام ، راحت مسك وأني بقيت غرگانه بتفكيري أسترجعت بذاكرتي كلشي صــار وسويناه من بداية مراهقتي لحد هاللحضة
.
.
أديان:-بقى موقف المستشفى يتردد ببالي وخصوصًا البنت اللي إسمها هرم ماعرف لــيش بقيت متعلقة بيها يمكن لأن أسم والدها نفس أسم والدي حسيت بالأنتماء بَــس ألفرق أني والدي متوفي ، طردت هالأفكار وباوعت للساعة وقت أنتهاء الدوام بدلت ملابسي أخذت غراضي وطلعت أتمشى وصلت للباب مال المستشفى طلعت وسمعت صوت واحد يصيحلي بأسم أديان التفتت شفته يركض ناحيتي

-أوكفي يمعوده شاده محركات مو رجلين

أديان:-العفو شتريد من عندي؟
مروان:-أديان نذير ضاحي؟

أديان:-منين تعرف أسمي الثلاثي؟؟
مروان:-أني اعرف عائلتچ كلهاااا خواتج وأخوچ موجودين
أديان:-عَـفيه دتحچي صدگ ؟؟
مروان:-اي والله عادي نگعد بمكان قريب منا

أديان"بلهفة":-أي أي عااادي
-مشى هــوَ وأني مشيت وراه دخلنا للحديقة الموجودة بالمستشفى گعد هــوَ عالعشب وأشرلي اگعد يمه

گعدت وأني عيوني متجمعة بيهن الدموع طلعلي ورقه بيها أستنساخات مال جناسي أخذت الورقة من عنده أقرأ بالأسماء ودموعي تنزل يَـعنـي البنيه اللي چانت بالمستشفى أختي والرجال المتعوب أخويه تلاشت دموعي وانصدمت بشي باوعتله بأستفسار

-شِــنو ذوله متزوجين ؟؟؟؟
-واضح عليه كتم ضحكته وگال

مروان:-أي غريبه موو بـَحـر أبن خوله وماجد وهرم بنت خيزران ونذير زواجهم صحيح بهالحالة لأن الام والأب مختلفين

أديان:-وأنتَ شِــنو تقربلهم
مروان:-بـَحـر يصير خالي

أديان:-خالك ، لــيش عندي أخت غير رنده ومسك والتوأم
مروان:-اخت بـَحـر بَــس لاا أختچ ولا أخت مسك وهرم أبوها ماجد وأمها متوفيه قبل خولة  أمي چانت مكروهه لأن كاشفه سوالف خوله گدام أبوها اللي هو يصير زوج أمج چان مهووس بخوله، عائلتنا غريبه

أديان:-جاي احسن نفسي بمسلسل هندي تصدگ مافهمت شـيي وضحلي أكثر أني ماتوصلني الفكرة بسرعه هسه أني توقف نظام عقلي.

مروان:-بهاي أني وياچ شـلون أفهمچ ألوصها عليچ بالزايد
أديان:-هسه أني اخت مسك والتوأم وبحر اخونا
مروان:-لاا لچ بـَحـر مو أخوهن

أديان:-لعد أخو منو
مروان:-أخوچ
أديان:-أگلك جيبلي واحد اكبر منك يفهمك ويفهمني
-ضحك بفشلة وگال

مروان:-دقيقه راح أروحح أجيب ورقة وقلم من سيارتي أبقي هنا

أديان:-يـله
-راح ثواني جاب دفتر صغير وقلم گعد وفتح الدفتر وسواله مثل الجدول وكتب

ماجد وزوجته المتوفيه =بنته سلمى
ماجد وخوله =أبنائه بـَحـر وأخوانه ورنده
خوله ونذير= فقط أديان
خيزران ونذير= بناتهم مسك والتوأم

مروان:- هــا هسه ان شاء الله فهمتي
أديان :-لحظه أصفن عليهم وأدخلهم بعقلي

مروان:-اخذي راحتچ
أديان:-وصلت وصلت يَـعنـي هسه أنـي خالتك واااو

مروان:-ارجعي للجدول مبين كُـلش وصلت
أديان:-لحضة خل اخذ صورة اليوم ادرسهم
مروان:-يابوووويييه شتدرسين لعد لو انطيچ شجرة العائلة شتسوين

أديان:-هــاي بَــس اهلي هيچ خبصه لو كلكم
مروان:-لاا لعد اسمعي الضحكة
أديان:-اصدمني
مروان:-مسك متزوجة معاذ تَـمام
أديان:-اي ؟
مروان:-ووجد الله يرحمها متزوجة أبو معاذ

أديان:-ياااا ياااا وخلفت اخون لمعاذ
مروان "بضحكه":-ايييي
أديان:-يَـعنـي حماها هـيَ تصير خالته
مروان:-هههههه بربچ مو عجيبه

أديان:-تخلون الواحد يصفن مو بَــس يتعجب

مروان:-اريد رقمچ حتى تنتضرين من عندي مكالمة أخذچ لعائلتچ ولخواتچ تتعرفين عليهن خلال هاليومين بَــس تصفى ألأمور شويه صايره اشتباكات واذا شفت الأوضاع هادئه يجوز باچر أجيب بـَحـر واجيچ

أديان:-عَـفيه بَــس گُلي بـَحـر لــيش هيچ متعوب وصحيح هــوَ اللي ضارب مرته طلقة وهيَ حامل

مروان:-للأسف أي

أديان:-لــيش
-بقى يحچيلي عن بـَحـر وهرم وعلاقتهم الغريبة وكلشي صــار وياهم وويه خواتي والشغلات الفضيعه المسوياتهن مر الوقت ماحسيت بيه

-شوف الساعة

مروان:-مر الوقت بلا ما احس يـله تردين اوصلچ لبيتچ؟؟
أديان:-لاا قريب بهذا المجمع كم خطوه أوصل ميحتاج سيارة

مروان:-لاا والله ميصير لو يدري بيه خالي ألا يشنقني امشي اوصلچ لخاطر بـَحـر

أديان:-لاا مو خاف تصير زحمه
مروان:-مو زحمه رحمه يـله

أديان:-راح هــوَ يتمشى گدامي للسيارة صعد واني فتحت الباب وصعدت بصفه وصفتله المجمع الگاعده بيه وأخذني اله دقايق وصلنا

-وصلت شكرًا أبو منو ؟

مروان:-مامتزوج صيحيلي مروان فقط
اديان:-شكرًا مروان
مروان:-العفو واجبي هذا
.
.
يتبع
مابقى شـيي ونختم الرواية
حسابي الأنستا تنوروني +ارد عالكل 🪿✨
يوزر :-kahramani1