#الايسر سلاسل الاحرار
#بقلمي كاريانا 🍀
#البارت 16
خلصِت النهار بخيَر
بسَ الليل شيخلصهِ
من يبدي هدوء الناس
تبدي بداخِلي الخبصهِ .
............
الطبيب ::- المريضه صار عدها انهيار عصبي لازم ترتاح وما تتعب ولا اي ضغط نفسي عليها...
تنهد سامر بتعب لليل كلش سمحولنه نطلع رجعنه للبيت وتوجهت للاستقبال انام لان كلش تعبت اشوف شلون تريد تصفه ويه ولد الاجود...
أساطير..
تعبت كلش من البجي صحيت على احد يمسح على راسي بحنيه فرحت كل ضني جان كابوس وابويه يصحيني مثل كل مره نطقت
::-بابا وين جنت عني تعبت بدونك....
تنهد سامر وكال
::- ها بابا ها بنتي شبيج...
استغفرت وغمضت عيوني راسي طبول تدك بي من الوجع مو مال ابجي خلص.....
لليل رجعت للبيت والكانيولا بيدي وسامر ينطيني العلاج...
بلشت بالعده مالتي لان اصلا حرام اتأخر من صدك اختنكت وحته من الدوام اخذت اجازه...
بلشت الايام تمضي يوم يتلوه يوم الولد خطيه يوكفون بالباب يصيحون لاساور واني اكمل ويه اساور وارجع لغرفه اهلي احس روحي صارت بيها...
غمضت عيوني وسرحت إلى عالمي البعيد الدافئ تحت جناح ابويه وحضن امي....
في يوم من أيام السادس الاعدادي...
نزلت وحاطه الأقلام بشعري واساور رابع الكسوله بس ترسب واني اصيح يبووووو ولكممممممم يبوووو
اجه ابويه مفزوع وطبوا اخواني وامي اجتي من المطبخ...
الاجود ::- خيرج أساطير اشو يبو ويبو شكو بابا...
كال ازهر وهو يباوعلي بشك
ازهر ::-اقسملك كلشي ما بيها هسه تلكاها شغله تافه...
باوعتله صفح متخصره وتميم هستوه راجع من المحكمه اول مرافعه اله رحت دست على رجله صاح يكمز لان حيل ضغطت عليها واساور جانت تمشط عتيت المشط من شعرها صرخت
اساور ::-اخخخخ هو هيجه أساطير
وسامر هستوه يكعد ضربته بخاصرته خليته يكمز..
سامر ::- ادري مجلوبه انتي؟؟
وازهر تعصب وامي جتي بالجفجير واصيرلك مثل طرزان وبنصهم وادفر الباب على ابويه هستوه يريد يقره قرأن واكمز بحضنه صاح
الاجود ::- خرب شيب ابوج على هل عمله ولج اخخ أساطير...
طبت امي مداهمه بيدها الجفجير تصيح
جواهر ::- انطينياها استهترت حيل استهترت
حضني ابويه وكال بحده
الاجود ::- شسوت اصلا عاقله...
طب تميم يعرج وكال
تميم ::-كسرت رجلي الهايشه...!
وسامر لازم خاصرته وعاكش وجهه بالم
سامر ::- زرفت صفحتي يمكن كلياتي بمكان معدتي ومعدتي بمكان كلبي...
تلتهم اساور مدمعه من شعرها وازهر يخزر
اساور ::- بابا هلستني حيل...
باوعلي بتك عين واني بحضنه ونضراتي بريئه باس خدي بقوه وكال وهو يفل بظفيرتي علمود يمشط شعري....
ويحجي عليهم....
الاجود ::- انتو مو بزر نستله رجلك كلشي ما بيها وانته الثاني بيش ضربتك بتوثيه مثلا هي رقيقه اصلا.... وانته هيوووو البعير لا تضل تخزر بنيتي وانتي اسواره ابوج تشاقه وياج بنيتي
يمشط ويبوس بشعري ووجهي...
واردف مكمل كلامه
الاجود ::- وانتي لا تضلين هاده ع الطفله علمود ذولي الحمير هاي بنيتي أشعل شيب الخلفه الي يحاجيها هاي بنيتي تدلل على الكل....
كال سامر بانزعاج
سامر ::- شني ماخذه خاوه؟
رفع ابويه راسه ما عاجبه وكال
الاجود ::- انجبوا هاي الورد مال ابوها صغيرونتي المدلله...
طلعوا ما راضين كفخني ابويه على كيفه
الاجود ::- ادري مجلوبه انتي خوما مجلوبه...!
ضحكت وكلت واني احضنه
أساطير ::- اوووي اجودنه شنو بزر نستله ما يتحملون....
ضحك يباوعلي بطرف عينه وكال
الاجود ::- إذا انتي تهبدين هبد ولج....
ابتسمت وكلت
::- بابا
اندارلي وكال بحنيه
الاجود ::- عيون بابا كلب بابا عمر بابا روح بابا... كولي يبعد طوايفي...
ابتسمت وكلت
::- كوم نشتري جوعانه
ضحك بقوه وكال
الاجود ::- زين اخوانج يشترولج يرهم...؟
هزيت راسي برفض وكلت بحزم
::- نوووووو الا انته
ضحك وكال
::روحي لبسي ديلا..
طلعت ركض البس ونزلت اعدل بالربطه هو جان يلبس عكاله عدلته اله ابتسم بوسته بجبينه كال تميم وهو يباوعلي صفح
تميم ::- الله يعين الياخذها..
ضربه ابويه بباكيت الكلينس طلعنه واني لازمه ايده شافنهه ازهر بالباب وكال بذهول..
ازهر ::- يابه وين ماخذهااا؟؟؟؟
باوعلي وكال بابتسامه للسوبر ماركت
لطم ازهر على وجهه موسع عيونه وكال بغضب
::- كل عقلك يابههه....
خزره ابويه ومشينه أيدي بايده ورجعنه للبيت همه معصبين واني شمتانه بيهم كعدت يم ابويه يدرسني.. وكل ما انثول يمسح على راسي بحنان ويكول
::-اهدأي ماكو شي صعب ان شاء الله...
وصدك أهدأ.. وافتهم ابتسمت بتعب واني ارجع لواقعي المرير وحاضنه غترته بيدي ااخخ بالدنيا لو رادت تذلك تلچمك بالعزيز امي ابويه زوجي اخواني...
بيا طينه حظي واكع استغفر الله العظيم واتوب...
هيجه الدنيا صعبه ومتعبه لكن.....
مساري طويل وهذا التعب صار نقطه ببحر ويه الخوف والرعب القادم......
سامر....
ما ضل شي وأساطير تكمل عدتها الله يعينها ويصبرها بقه اسبوع واحد وبعد هذا الأسبوع اني لازم اسافر....
شكد ردت وحاولت أخذهم وياي بس ميصير.....
وهم ما فاتحته بالموضوع
كلما ادورها بليل الكاها واكفه بالباب مال المطبخ وشايله بدله اسامه ما عرفت شنو السالفه ولا سبب هاي الحركه تقربت بدون صوت وهي حاضنه البدله ولافه الغتره على رقبتها ترفع البدله تبوس الرتب بقوه وتشمهم بقوه عبالك تريد تملي نَفسها من ريحتهم....
همست أساطير اندارتلي عيونه تلمع بالدمع وهزت راسها بمعنى شنو
سامر ::-ها بابا شجاي تسوين الساعه 3 الفجر شوكت كعدتي لو منايمه
ابتسمت بتعب وكالت
::- صار ساعه من كاعده هنانه...
هزيت راسي بتفهم والى الان ما فاهم شجاي تسوي
سامر ::- زين يا حلوه شنو هاي الي بيدج وشجاي تسوين...؟
ابتسمت بيأس وكانها كانت متحس على روحها شتسوي
أساطير ::- هاي بدله اسامه وهاي غترت بابا كلت بلكي اليوم يجون ياخذوهن علمود اشوفهم...!
انصدمت وبلعت ريك بصعوبه بس ماشيتها لان مجانت بوعيها كلت يجوز حلمانه وكعدت فازه...
تقدمت احتضنتها وما انطت اي رده فعل تباوع للسماء بيأس وعيونها غرغرت بالدموع
كلت بحيره
::- شبيج أساطير شجاي تنتظرين...!
كالت ودموعها تسقط بهدوء وبللت رمش عينها...
::- شفت وحده مات زوجها فجانت روحه تجي تشوفها يوميه... كلت بلكت اسامه هم يجي...
درته عليه بسرعه وكلت بحده
سامر ::- انتي اذنج تسمع الي تنطقينه؟
بابا ماكو هيجه شي بالاسلام هاي بدع لا أكثر وانتي تعرفين اهل البدع مصيرهم جهنم...
حضنتني بقوه تبجي وكانها صحت على نفسها شويه وهي تبجي خليتها براحتها بس ارتاجيت ع الحايط...
شويه وثكلت بحضني شفتها غافيه كوه كومتها للفراش....
ورجعت للاستقبال تمددت بمكاني تنهدت على حالته نطق الايسر الي كل ضني نايم
الايسر ::-جنت يم أساطير موو؟
كلت بتعب
::- اي والله نوب مسطوره..
كام شغل الضوه وتربع مبتسم كال
الايسر ::- يعني شفتها برا موو؟
تفاجأت وما طلعت مني غير كلمه
::- وشمدريك؟
ابتسم ابتسامه جانبيه وكال بقهر
::- راح يصير ٣ أشهر وهي تسوي نفس الشغله بس انته ممنتبه....
انصدمت للوهله الأولى لكن استوعبت تصرفات اختي ووين واصله أساطير اخخ يا الدنيا أساطير الي تشكك بكلشي وما تصدك الا مليار دليل صارت تصدك ببدع؟
كال بتعب
الايسر ::- هنيال اخويه عليها، بحياتي كلها ما شفت أوفى من أساطير يوميه نفس الكلمات والجمل وتشم الرتب وتبوسها مثله تماما وما ملت وهاي ما عاشت ويا لعد لو عايشه شيصير؟
سامر ::- يمكن تموت....
هز راسه موافق وكال
::- اليوم بليل نطلع ان شاء الله علمود نوصل من وقت ازدحامات بغداد هم ياله نوصل البيت وترتاحون يومين وتطلعون لاربيل....
وافقته وكلت بقله حيله
سامر ::- الايسر ما أكدر اعوفها خاف يصير بيها شي يا تنتحر يا من ارجع الكاها متخبله تفتر بالشارع تصيح باسماءهم
حط ايده على جتفي وكال بقوه وحزم
::- من ترجع تستقبلك أساطير القديمه وافقته الرأي وسكتت لان اعرف مستحيل أساطير صعبه كلش صعبه......
ضـي....
تعبنه من هل حاله وبابا بعده ما سدد المبلغ كامل وضياء ماجاي يتعظ لا ونوب صار يتاجر بالسلاح...
طرده ابويه من البيت ومدد مفرفح قهر
سالم ::- من الله يكشني كون ناقصين فلوس يربي اخذني وخلصني لا يم ابويه ارتاحيت ولا ويه ابني ارتاحيت شسوي بعد اني...!
وامي بس تبجي.. صاح ابويه بيها
سالم ::- خاب انتي بس تبجين وهي زادت بالبجي وكام حضنها يبوس بوجهه
سالم ::- سعادتي حبيبتي يا عمري انتي لا تبجين بس هل جلب تعبني حيل تعبني..!
وهي تحضن ابويه أقوى وتشهك
سُعاد::- سالم اني هم تعبت چا هاي اخته مو وياه...
باس راسها قوي وكال.
::- من اروح فدوه للي تحجي جنوبي..!
وردت خدودها كلت واني متخصره
ضي ::- والله يا الله شياب ويدورون رومانسيات...
غمني ابويه يحجي بضحك ويتأمل امي
سالم ::- لج هاي الغاليه عفت اهلي وزادهم وطفحت لبغداد اريدها بنات السلف كلها موجوده واني رحت اركض حافي من العجله، سحلني سمارها وكحلتها المسحوبه..!
ابتسمت وكال ابويه::- تعالي ضيوش احجيلج شلون ام كحله جرت روحي ويه كحلتها...
سالم ::- مره من المرات جنت اشتغل ببغداد وابوها مهندس جبير وهو الي يشرف علينه ف صار بيني وبينه خط قوي المهم عزمني ع الغده...
ورحت ف امج فتحت الباب وطبينه جوه و.......
..........
اساور....
جنه كاعدين اني وأساطير اليوم تخلص عدتها وباجر تكدر تطلع.. وتمارس حياتها طبيعي الساعه
11:00 بليل..
اجه سامر وكال
::- بنات راح تروحون يم بيت عمي مازن ابو ملهم...
باوعتلي ورجعت كالت
أساطير ::- ليش سامر شصاير؟
تنهد وكال
سامر ::- أساطير لازم اطلع لاربيل حته اسوي العمليه واتعالج بس ما أكدر اخذجن وتقريبا مده العلاج ٣ شهور تبقون هناك وتديرين بالج على اختج ايام وراجع اني اريدجن قويات بنياتي...
والله ثم والله ثم والله لو أكدر اعوف العلاج جان عفته بس بعد ما أكدر امشي ابقه على كرسي متحرك شلون بيجن ف تبقن هنه ايام مو بناتي...
وافقته الرأي وأساطير سحبت نفس قوي وكالت بقوه ونظراتها الشرسه ما تتغير نهائيا..
أساطير ::- ولا همك وراك ذيبات يابه روح ولا تشيل هم ولا تفكر اسواره امانتي إلى أن ترجع
واردفت بضحك مكمله كلامها
::- وعود من ترجع اكتلها هههههه
ضحكنه وراح وهي طلعت جنطه صغيرونه وراحت لغرفه اهلي شالت مفتاح ابويه هو ميداليه وبيها مفاتيح كلش ابويه يحبها سحبتها وأخذت تراجي امي الي جانن كلش غاليات على امي وراحت لغرفه تميم اخذت ساعته الي يحبها ولغرفه ازهر وأخذت نظارته الي مو بس يحبها يعشقها يمكن يحبها أكثر من عدنه حته هههههه
وباوعت وعيونه غرغرت بالدموع وراحت لكنتورها وطلعت بدلته وكالت بصعوبه
::- اكيد ما انساك يا روح أساطير انته عيوني السرمديه بعازه شوفتك حبيبي لو تدري كعدت بين اخواني وكلت يمه حبيبي رجعوا اخخخخ اسامتي اسطورتك بحاجتك....
صفطتها وشالت وحده من الرتب من البدله وفرشت غترت ابويه وحطتهم وشدت االغتره عليهن لملمت احتياجاتها تلفونها وأخذت تلفون تميم الثاني تحسبا لعطل احد الاجهزه.. وجهزت كلشي وراحت نامت بس ادري بيها كاعده تنتظرني انام حته تطلع برا تظل تبجي لحدما تتعب وتجي تنام عدها صراعات قبل النوم أساطير
نمنه بهدوء بدون لغوتي وعركات أساطير لان شفتها مالها خلك
بس كعدنه بدلت واكيد كلنه لابسين الأسود الايسر يتابع أساطير بكل تحركاتها حدما اجه سامر على عكازته خطيه وينه ووين العكازه بعده صغير بس أمر الله يصير....
طلعنه متوجهين للسماوه ما جنه ندري شنو ينتظرنا....
ومن وصلنه انصدمنه بالي شفناه جان.......
يتبع.....
هلا ورداتي شلونكم طبعا ضامتلكم مفأجاه كلش كلش حلوه لكن مو هسه نكول لاتنسون متابعه الحساب
الي يريد اكتب قصته او سؤال او استفسار بخصوص الروايه
بنوتات تحملوني هل فتره لان بارت واحد بالأسبوع بس اخلص الوزاري ارجع وبقوه خوش اريد دعواتكم وعندي كومه اخبار تسركم ومفاجأه خاصه لورداتي