الرقطاء وكراتها الثلاث 🐍
اللـدغة الخامسة والأربعين 🐍
بقلم كهرمانه
_____
مسك:-مجيد وابوه خافوا من معاذ وباوعوله بحذر ورى دقايق أجت سيارة شرطه نزلوا منها كم واحد أخذوا عمي وجدي والشرطي حچه ويه معاذ كلام مافهمته لأن چنت بعيده عليهم أبو عضلات اختفى طلع فاشوشي مثل ماگلتله ، اجه معاذ يمي لزم ايدي وصعدني بسيارته والشرطه راحوا شغل السياره ومشه بدون مايحچي ويايه ولا حرف طول للطريق أخذني لبيت وجد
المفاتيح عنده فتح الباب وگلي أدخل دخلت وهو ورايه گلبي نغزني ماعرف لــيش البيت أظلم مابيه روح وبــارد التفتت لمعاذ شفته صافن عليه
-شتريد جايبني هنا ، زين مني ونقذت حياتك مجيد چان يريد يقتلك عن طريقي مسويلك كمين
معاذ:-واني مو غبي لهالدرجة اعرف من اتصلتي وكلتيلي مخطوفه حسيت اكو شـيي غلط واجيت جايب وياي شرطه وخليتهم ينتظروني بالشارع الثاني بَــس انطيتهم أشاره اجو
مسك:-ماتوقعتك ذكي
معاذ:-مشتاقلچ حيتي كُـلش مشتاقلچ
مسك:-اريد ارجع لخواتي عفتهن وحدهن معاذ خليني أروحح
معاذ:دليني بمكانهن حتى أروح اجيبهن وكافي أنهوا هــاي المهزله واليوصللچن أكسر ايده
مسك:-لاا أكو غاية ببالي اريد اسويها
معاذ:مسك خواتچ تعبن كافي وياسين هَـم اتبهذل وكلنا متبهذلين
مسك:-مَـد أيده عالحجاب وسحبه انصدم من شاف شعري مرر أنامله على شعري تنفس بضيق وهو يگول
-لو غادرتني وكاتلتني ولا هــاي سوايتچ لــيش هيچ گاصه شعرچ شِــنو السبب اللي يخليچ هــيچ تسوين
مسك:-أني ما أتمسك بشي كلشي عادي عنده أخسره حتى شعري ، تحررت من لمساتك وحبك الخادع چنت هْوايَــه تلزم شعري
-دفعته والتفتت منطيته ضهري مشيت وأني نبضي سريع حسيت عليه يلزمني من ايدي
-مستعد هسه أروحح اقتلچ آل صحار من چبيرهم لصغيرهم احرگهم حرك الچ لتعوفيني مسك شِــنو اللي ببالچ ياغاية تردين توصلين الها أنـي اوصلچ بَــس اختصري هذا العذاب الجاي تتعذبينه أرحمي روحچ وارحمينا وياچ
مسك:-ركزت بعيونه الحزينه تشرح تعبه وعذابه وحسرته وخسارته واشتياقه
-هــوَ هذا اللي رِدت اوصل أله اشوفك تتوسل بيه
معاذ:-لأن دخلتچ مستشفى مجانين هيچ سويتي
مسك:-اي وبعدين أحنا على شِــنو مستمرين ماعشنا مثل البشر
-راد يحچي اجاه اتصال على تليفونه حچه ويه المتصل طلع مروان طلب من عنده يجي بسرعه لعنوان انطاه اله ومعاذ چان مستعجل
-يله مسك امشي وياي
مسك:-شعندي جايه وياك اريد أروحح لخواتي وحدهن
معاذ:-خبله أعووفچ واني ماصدگت الگاج امشي وياي ومحد يگدر ينطق حرف وياچ والتردين تسوينه أنـي اسوي مكانچ المثلچ مرتاحه وعايشه حياتها كل همها الطلعه والطبه والملابس والمكياج والماركات والتليفون وخواتج اجيبهن هنا يمچ بالبيت مال المرحومة وياسين وياچن تقفلن الباب عليجن وتبقن معززات مكرمات
مسك:-ماريدك افهم أنـي مشكلتي وياك معاذ
معاذ:-هسه امشي وياي شغلة مهمة بعديـن نشوف حل لموضوعنا
مسك:-اريد أروحح لخواتي اتطمن عليهن ورفيف
معاذ:-مسك بلا عناد
مسك:-ولا اتحرك منا الله يعلم وين ماخذني انتَ
معاذ:-امشي خواتج ببيت اهلي اخذچ الهن بعديـن نروح لمروان
.
.
بـَحـر:-لك مروان طلعت اليوسفيه ماكـو مستشفى قريبه هنا
مروان:-خالي هــاي موخوش مستشفى حتى لو بيها أمل تعيش يموتوها اقل من ربع ساعه ونوصل مستشفى أهلية مضبوطه
بـَحـر:-يمعود استعجل رحمة لِـرب الكائنات
مروان:-الزم مكان الأصابه لتخلي ينزف
بـَحـر:-هــوَ ضاغط عليه
مروان:-وصلنا للمستشفى نزل قبل لاا أطبگ السيارة وگفتها نزل بـَحـر شايلها ويركض للطوارئ واني خليت السيارة بالگراج ورحت وراه لگيتهم ماخذينها من عنده وملابسه كلها دم وگاعد يحچي ويه الدكتور
اخذ معلومات من عنده الدكتور وراح انتضرنا ساعة وأجتنا ممرضة بيدها فايل
-العفو منو بيكم زوج المريضة هرم
بـَحـر:-تفضلي أنـي
الممرضة:-أريد توقعلي هنا علمود الدكتورة تسويلها ربط لأن الجنين نازل ومهدد بالأسقاط والدكتورة راح تبذل كل جهدها حتى تحافظ عليه ووقع على مسؤوليتك اذا نزل الطفل وماگدرنا نسعف حاله
بـَحـر:-لحضة ماجاي استوعب يَـعنـي هرم حامل وياشهر
الممرضة:-اي حامل وعمر الطفل ثلاثة اشهر ونص وأكو أمل يعيش لأن نبض موجود بَــس نازل ولهذا السبب دتنزف انطيناها أبرة مثبت ومغذي وخلينالها دم والدكتور ديشرف على حالتها ويه دكتوره نسائية حتى يطلعون الطلقة المستقره بكتفها بعديـن يـله يسوون الربط ادعولها .
مروان:-هسه منين طلعلنا موضوع الحمل
بـَحـر:-راح تجلطني هرم خليها تگعد يصير خير
مروان:-شتسويلها ترى بينها وبين الموت شعرايه گاعد تتحلفلها
بـَحـر:-شسووي شترييد اسوووي ابوسها من راسها وأگوللها رحم الله والديچ على هــاي البهذلة
مروان:-انتَ من الأساس لــيش ضربتها طلقة لــيش خاطرت بحياتها ماگدرت تلزمها طولها شبر ونص
بـَحـر:-طلعت عالشارع العام ولو طالعة عالشارع تچلب الها بسيارة لو تفزع العالم وما اگدر الزمها ضربت طلقه بالهوا ماخافت ولا وگفت استمرت تركض ومن ضربتها چنت متأكد خمسين بالمية الضربه جايه بكتفها ولو أدري بيها تنزف ماچان حاطرت هالمخاطرة
مروان:-هسه شِــنو اللي استفاديته وهيَ هَـم غلطانه من مابلغتك بسالفة الحمل ، خالي معقوله ماشكيت بيها والله عجيبه دتگول الممرضه راح تدخل شهر الرابع مدري داخله يَـعنـي الفتره الچانت يمك بيها ماحسيت عليها حامل أنـي اشوف النسوان تخر وتوكع
بـَحـر:-شمدريني بهالسوالف أنـي مامتزوج قبل وشنو أنتَ حاسب هرم عالنسوان كلشي بيها مختلف
مروان:-الله يهدي سركم
بـَحـر:-حسابي ويه مسك هـيَ التقرأ براسها وتوجهها وتجبر خواتها يسون التريده
مروان:-مسك داهيه والله لو مامعاذ واگف بضهرها لاا چان ذيچ هـيَ المسجونه
بـَحـر:-خابرت معاذ ؟
مروان:-اي خابرته وگال شويه واجي وياه مسك
بـَحـر:-وين لگاها هــاي الرگطه
مروان:-ما اعرف
-لزم جبهته بألم وگعد عالكرسي وهو يرفع راسه
مروان:-ها خالو بيك شـيي
بـَحـر:-شوفلي واحد يجي يقيس ضغطي
مروان:-امشي للطوارئ يقيسونه الك
-اخذته للطوارئ گلتلهم يقيسون ضغطه وقاسوه طلع نازل اكثر من اربع درجات
مروان:-شِــنو علاجه
الممرض:-لازم ياكل أكل مالح بَــس مو سريع مفعوله مثل المغذي المالح اذا عنده حالة حرجه هنا بالمستشفى
بـَحـر:-سوي التشوفه مناسب ، مروان انتَ روح انتظر يم صالة العمليات بلكي يطلعونها
مروان:-مطوله ميطلعونها هسه
بـَحـر:-ميخالف خاف يحتاجون شـيي أنـي شويه واجي وراك
مروان:-يـله رايح ليضل بالك أي شـيي يصير اتصل بيك
.
.
مسك:-أخذني معاذ لبيت أهله دخلت والكل عينهم عليه شفت رفيف گاعده تبچي ووجها أحمر خدودها واضح ضاربتهن حتى صايــر لونهن مايل للأزرق ماسلمت على أحد كل البنات خايفات من عندي اجتني رفيف حضنتني وهيَ تبچي ومعاذ واگف ورايه
رفيف:-هررم يمكن ماتت سمعنا صوت الطلق وبعدها اختفت هرم بـَحـر لگاها وقتلها اي اي مسك شوفيها وين طمنيني عنها راح اموت من الخوف
مسك:-هـ هرم شدتحچييين رفيييييف شلووون تعوفوها بأيده شلووون ، أنهاريت من سمعت كلام رفيف صرخت ولطمت على وجهي معاذ حاول يسكتني ويهديني بَــس ماسكتت
-هررم بعد تعذيب أمـي ألها جسمها كُـلش تعب متتحمل أكيد ماتت هسه معااذ خسرت اختي الثااانيه بسببكم خسرتها وهيَ حامل
معاذ:-أهدي مسك اختچ بالمستشفى رِدت اخذچ الها من البداية بَــس انتِ ردتي تجين هنا أفهمي
مسك:-وديني ألها
معاذ:-امشي بَــس من تشوفين بـَحـر لتنفعلين
مسك:-أخنگه واموته العار
معاذ:-اششش ارتاحي شويه حتى نروح
مسك:-ما هسه امشي هسسه
معاذ:-يـله
مسك:-طلعت بسرعة من البيت صعدت قبله اجه هــوَ صعد وشغل السيارة وطلعنا للمستشفى الطريق كله بالي يخترع شغلات وتخيلات خايفه تصير بهرم باوعت للطريق أحس مشاعري مخبوطه طفل هرم مو چنت ماطايقته لــيش هـسه خايفه لا يطلع واگع يمگن لان شفت لهفتها ولمعة عينها توحي للأمومة ماردتها تحس بنقص وتحزن
وصلنا للمستشفى طبگنا السيارة ونزلنا متجهين الهم وگفنا يم الأستعلامات ومعاذ اتصل بمروان حتى يگله ياطابق هُمَ هــوَ يمشي واني امشي وراه
وصلنا الهم شفت بـَحـر گاعد ومنزل راسه ومروان بصفه وگدامهم باب يودي لصالة العمليات مكتوب عليه ممنوع الدخول مشيت بسرعة متخطيه معاذ هجمت على بـَحـر من شافني گام وگف وكأن متوقع ردة فعلي سحبني معاذ وبحر بقى نفس مكانه ونظراته المستفزه
-عوفني معاذ عوووفني خل اشوف شغلي ويه هذا المجررم اللي حاول يقتل اختي أنتَ شنوو ماعندك عقل شـلون تضربها طلقة وهيَ حامل ماخفت تموت بسببك هــاي اذا ماتطلع ميته وينهااا لــيش محد يحچي شيي
بـَحـر:-معاذ اخذ دوختك وارجع منين ما اجيت وحسابها بعديـن مو هسه كدام العالم
معاذ:-دوختي مو غريبة اخت مرتك وألها الأولوية تبقى هنا تتطمن على أختها خاف تحتاج شـيي
بـَحـر:-مسك الصار كله أنتِ تتحملين مسؤوليته والمفروض تتوقعين هذا الشي والله ما ارحمكم لاعبالچ اختچ بين الحياة والموت أنسى طعنتها بضهري
مسك:-شوف عيني عينك يعترررف والله لاخيسك بالسجون ياعار
-صارت مشادات بالكلام وصياح بيني وبين بـَحـر ، مروان سحب بحر ومعاذ سحبني وگعدني عالكرسي
بـَحـر:-معاذ اذا هــاي اللگعه حچت كلمة زايده أصيح الأمن يسحلونك انتَ وياها مفهووووم
معاذ:-كافي سكتت لتضل تستفزها
بـَحـر:-بعدلك بَــس تعبدها
مروان:-استغفرالله شهالحچي ياخالو
معاذ:-لاا خلي خلي يطلع الحقد اللي بداخله
مسك:-ههه عار الزلم
بـَحـر:-شگلتييي
مسك:-رِدت أحچيها بصوت عالي بَــس معاذ خله أيده على حلگي وجاوبه بمكاني
-مگالت شـيي
بـَحـر:-محد طيح حظها وحظنا غير دفاعك عنها يامعاذ
معاذ:-اذا وياها ما أصير منو يساعدها
بـَحـر:-مو خلينا ساكتين اذا احچي بعد شيسكتني
مروان:-اسكتوا هسه أحنا بمستشفى مو داخلين مصارعة حره من تطلعون من المستشفى أنـي افتحلكم ساحة واجيب مشجعين حتى تتعاركون براحتكم ويصيرلكم واهس هَـم
مسك:-بقيت گاعدة عالكرسي طلعتلنا ممرضة تطمنا عن حالها
- عيني طلعوا الطلقة وخيطوا الجرح وسوولها ربط وهسه شويه ونطلعها للغرفة انتظروها هناك
.
.
-دودي روحي نظفي حمامات الرجال
دودي:-شصخم بحمامات الرجال خلي ميثم ينظفهم
خديجه:-ولچ تعاي شوفي مكتوب الجدول انتِ تنظفين حمامات الرجال ويخلص الشفت مالتچ
دودي:-زحمه والله
خديجه:-ديله يمعوده نظفيهن بسرعه واطلعي من المستشفى روحي نامي
دودي:-أمري لله
-لزمت الماسحة وسطل المنظفات ورحت للحمامات الرجاليه غسلتهن وسحبت المي ورشيت ديتول انفتح الباب ودخل شخص دنگت رأسي وهو انحرج اجتني أم العوافي "شهيگه" من الأرتباك
-أسف ما انتبهت عبالي حمام الرجال
دودي"ورى كل كلمة حچيتها تجيني أم العوافي "
-لاا لتتأسف. ماغلطان. هذا. حمام. الرجال. بَــس أنـي. دانظفه. عاملة. هنا. بالمستشفى
-كتمت حلگي بأيدي ومشيت بسرعه ناسية المنظفات بالحمام سمعته يگول قبل لاا اسد الباب
-چنها ضفدع الحمدلله ربِ
دودي:-غميت روحي وطلعت من الحمامات بقيت منتطرته يطلع حتى اكمل شغلي والم العدة مال التنظيف ، ورى ثواني طلع من الحمام عرفته من حذائه اليلمع وگف گدامي وگال
-لترجعين تنظفين الحمام ترى زحمه ماكـو ولد ينظفون
دودي:-عَـفيه لتحاچيني روح شوف الناس عبالهم مدري شعندي وياك
-ضل مستغرب من كلامي وصافن بوجهي حس على روحه وراح حسيت بحرارة تشع من خدودي تركت الحمام ومشيت مهروله لخديجه شفتها گاعده تسولف هـيَ وميثم وتضحك وياه أستغفرت ودخلت لغرفة التبديل فتحت اللوكر مالتي وبدلت ملابس وطلعت شفتهم يباوعون عليه خديجه وميثم
-أگلكم عَـفيه صارلي موقف محرج كُـلش ياريت لو تطلعون ادوات التنظيف من الحمام مال الرجال وترجعوهن لمكانهن أنـي خلص وقت عملي يـله بــاي
-طلعت من عدهم عفتهم يباوعون عليه طلعت من المستشفى وأني كُـلش خجلانه من اللي صــار لشوكت ابقى أتفشل كل يوم لازم اتفشل من شـيي
لفحني الهوا البارد رفعت رأسي وأني ألتقط أنفاسي بعمق عسى ولعل برودة الجو تبرد حرارة قلبي وصلت للشقق القريبة على المستشفى دخلت بالعمارة وصعدت للشقه الساكنه بيها ويه البنات شريكاتي بالسكن
ألطف بــَنات تعرفت عليهن بحياتي رغم هذا ماگدرت أختلط وياهن هنَ يحبني واني أعتبرهم صديقاتي بَــس مخليه حدود ماحب افضفض لأحد هاي طبيعتي
شفتهن گاعدات بالصالة يدرسن سلمت عليهن ودخلت للغرفة مالتي اخذت ملابس ودخلت للحمام سبحت وطلعت دخلت للغرفة وقفلت الباب مشطت شعري وتعطرت وتمددت عالچربايه وعيني عالسگف أفكر بحياتي شِــنو مستقبلي أبقى أتعب بالشغل
وخايفة من ميثم أحس نظراته ألي وصخه وحتى جاي يتقرب من خديجه حتى يوصل الي ويعرف معلومات عني وعن حياتي نمت من التعب العقلي والجسدي ، وفزيت عالساعة سته الصبح گمت توضيت وصليت وبدلت ملابسي طلعت شفت المكان هدوء سويتلي ريوگ اكلت وغسلت مواعيني وطلعت من الشقة متجهه للمستشفى دوامي الساعة بالسبعة الصبح
وصلت للمستشفى دخلت واني امشي لغرفة التبديل وعقلي مشغول بتفكيره انضربت بوحدة لزمت كتفي وهيَ هَـم اعتذرت ماعرف منو انضرب بمنو مانتبهت
چان يمشي وياها واحد عيونه ملونه وهيَ شعرها قصير ومبين على ملامحها الحزن مشت وطلعت من المستشفى واني بقت عيني عليها لحد ماطلعت
كملت طريقي ورحت بدلت ملابسي وطلعت اتمشى أشوف جدولي هَـم بدلوه اليوم يوميه يخلوني بمكان شكل ماعرف منو جاي يخبث وياي مدري الأدراة عدهم مشكلة لو رئيس العاملين رغم كافيه خيري وشري شفت الجدول ماشين عالقديم مامغيرينه اليوم عالطابق الخامس
حضرت العدة مالتي وصعدت للطابق الخامس غرف ڤي أي بي وقليل ناس موجودين بهذا الطابق دخلت انضف الغرف بالتسلسل ونصهن نضيف
وصلت لغرفة موجود بيها وحده مسويه عملية وگالوا حالتها خطرة البارحه جابوها باوعت للگاعدين گدام الباب انصدمت نفسه أبو حذاء اليلمع وبصفه واحد گاعد واضح عليه الأنزعاج والتعب رافع راسه غمض عيونه واني باوعت للغرفة صرت قريبة من الباب دگيته وجاوبني الولد الشفته بالحمام خجلت كُـلش والكلمة بالشافعات يـله نطقتها
-هوب هوب وين ؟
دودي:-أنضف أ ألغرفة إذا ماكـو أ أأزعاج
-الدكتورة يمها من تطلع ادخلي
دودي:-تَـمام أنـي راح اكمل العندي بعديـن اجي لهاي الغرفة
-كملت مسح الطابق الخامس ويه الحمامات ومكان الأستعلامات الخاص بهذا الطابق ترددت أروح الهم بَــس هذا واجبي وماريد اخسر وضيفتي لهيچ سبب مشيت للغرفة شفت واحد مبين عليه حارس بالباب والغرفة موجودين بيها هْوايَــه أشخاص
أشرت للحارس بالعدة العندي وگلي تفضلي ست منو ست أني ست استغربت أول مرة أسمه كلمة ست دگيت الباب ودخلت شفتهم ٣رياجيل وبنيه البنيه نفسها اللي أنصدمت بيها قبل شويه ونفس الولد وياها البنيه چانت واگفة يم المريضة وتعاتب بيهم
-كله بسبب مجيد ساومني على خواتي وعفتهن بـَحـر شـلون ينطيك ضميرك تضربها طلقه والله ما أسكت الكم والله وراح تشوف كل واحد تسبب ألي ولأخواتي بأذيه مايشوف خير
بـَحـر:-هــوَ محد طيح حضهن غيرچ
مسك:-الله ياخذك بحرر
بـَحـر:-معاذ سكت مرتك لو تاخذها وتطلع ترى بعد ما اتحمل كلامها راح أسحلها واطلعها من المستشفى بعد ما أحذر خليها ببالك
دودي:-رجفت ايدي فرغت سلة المهملات والغرفة أصلًا نضيفه جسمي صــار سعفة من الأحراج طلعت من الغرفة وهمَ منتبهين عليه
.
.
بـَحـر:-مروان
مروان:-هــا
بـَحـر:-روح ورى هــاي اللي چانت تنظف انطيها اكراميه مبينه من اهل الله وفقيرة
مروان:-بَــس خالو
بـَحـر:-لاتضل تبسبس روح
مروان "بأنزعاج":-رايح
-طلعت من الغرفة ومشيت وراها شفتها دخلت لمكان خاص بالممرضين قررت أروحح وبعدين انطيها الأكراميه واذا خالي سألني أگله انطيتها ، بَــس استوقفني ألأتصال الأجاني من كميل ضايج من وجود ديالا بغرفته وخوفه من اللي بالبيت يعترضون الها بقيت أقنع بيه إلا أن سمعت صوت صراخ جاي من الغرفة الموجودة بيها العامله .
.
.
دودي:-دخلت للغرفة مال الممرضات اشوف شِــنو يحتاجلها ماحسيت إلا وشخص يتلمس جسمي ألتفتت بسرعه ودفعته أرتطم ضهره بالباب مد أيده للقفل وقفل الباب
-شتريييد ميثم شتريييد من عنددي
ميثم:-أريدچ شــوَكت تحسين بيه أحبچ شِــنو ناقصني حتى ماتحبيني
دودي:-هــوَ يتقدم وأني أرجع تقرب كُـلش من عندي دفعته وركضت حاولت افتح الباب بَــس المفتاح عنده صرخت بأعلى صوتي
-سااعدوني يانااس الحگولي وينكم أحد يفزعلي سااعدوني ميثم وخر مني والله أنتحر أكتم انفاسي لحد ما اموت وخر لاتتقررب.
-ركض ميثم عليه وخله أيده على حلگي حتى يمنعني من الصراخ ماحسيت إلا أندفر الباب بشكل مرعب انفتح الباب وسمعت صياح نفس الولد الشفته بالحمام
-ولك اليوووووووم اخزيك ابن الكلب
دودي:-طلعت من الغرفة والولد هجم على ميثم ووياه واحد مو الممرضين شاهد عالحادثه لزموا ميثم ثنينهم ملخوا تملخ والممرض أخذ ميثم سحل للأدراة وسط أنظار باقي الموجودين من الناس والممرضين والعاملين والدكاترة مشيت بسرعة أريد اتخلص من الموقف أحس الناس كلها تباوع عليه طلعت خارج المستشفى وأسمع واحد يمشي وراي ويأمرني أتوقف
-نعم شتريد
مروان:-حتى شكرًا ماوراچ
دودي:-شكرًا لو ماچنت انتَ والممرض محسن ماعرف شِــنو چان صــار
مروان:-خاف أگلچ على شِــنو اجيت وراچ وتضوجين
دودي:-شِــنو؟
مروان:-خالي گال انطيها حق تعبها ويانه
دودي:-بَــس أني اشتغل بمستشفى أهلية وراتبي زين مكفيني وحدي ما اگدر اخذ اكراميه من شخص وممنوع عدنا بالمستشفى
مروان:-اعتبري هدية !
دودي:-اعتبرها إهانه بحق نفسي اذا أخذ منك أصلًا أني مُـمتنه منك ماعرف شـلون اردلك جميلك اللي سَـويته والفلوس التريد تنطيهن ألي اتصدق بيهن لواحد فقير هــوَ أكثر يستحق مني
مروان:-شِــنو أسمچ
دودي:-لــيش تريـد تعرف أسمي
مروان:-هــا متردين اعرفه يـله ميخالف مو ضروري ديري بالچ على نفسچ ولاتدخلين مكان فارغ وحدچ اخذي وحده من العاملات وهذا الحيوان راح يطردونه من المستشفى شـيي أكيد مع السلامة
-رِدت أروح استوقفني صوتها وهيَ تگول
دودي:-أديان
مروان:-هــا ؟
دودي:-أسمي أديان
مروان:-عاشت الأسامي واني مروان شوفي الصدفة نهاية أسمائنا تتشابه ألف ونون
أديان:-واضح عليه يحاول يصير لطيف ويايه ويخليني أبتسم وميعرف شـلون راح هــوَ وأني بقيت گاعدة بالحديقة مال المستشفى أتابع الحالات التجي وتروح شفت مروان يطلع هــوَ وزوج البنيه اخت المريضة مالتهم
.
.
مسك:-ثاني يوم الضهر هرم بدأت تصحى وتهذري بأسمي أني وديالا وياسين ورفيف تنطق أسامينا وترجع تفقد الوعي بعدها فتحت عيونها ومن شافتني بچت رحتلها بسرعة وحضنتها
-مسك انتِ مابيچ شيي و وديالا ياسين ورفيف وينهم محد صــار بي شـيي والطفل اللي ببطني
مسك:-مابيكم شـيي أنتِ اكثر وحدة متأذيه
هرم:-لــيش انطيتي بينا ودليتيهم على مكانّا
مسك:-تتوقعين من عندي هيچ شـيي
هرم:-لعد اححم لعد شـلون عرفوا
مسك:-مجيد ضرب عصفورين بحجر اخذني حتى اقتل معاذ وهو بنفس الوقت منطي العنوان لبحر لاا مو بَــس هيچ محادثاتچ القديمة انتِ ومروان كلهن عنده
هرم:-اخخخ يابويه
مسك:-كافي لاتحچين تتعبين
هرم"بتعب":-بـَحـر عرف بيه حامل مو
مسك:-اسكتي ضام النا ضمه بَــس الله يعلم بيها كل مايحچي اسكته بصياحي ماعرف إلى متى بَــس إلا مايعاقبنا
هرم:-تعزيت وتصخمت مسك ماريده ماريـد ابقى وياه خلص اكتفيت من المشاكل أصلًا ماعرف شِــنو ردة فعلي اذا شفته گدامي
مسك:-ارتاحي هسه انتِ بعديـن الله كريم
-لزمت راسها بتعب وغمضت عيونها اجت الممرضة تتطمن على حالتها وگلتلها اللي صــار هزت راسها بتفهم وگالت راح انطي خبر للدكتور يجي يشوفها قبل لايطلع حتى اذا أوضاعها تَـمام تطلع من المستشفى
جابولها أكل حتى تاكل والدكتور شاف حالتها گال متحسنه أكثر من قبل ومنتظرين الدكتورة النسائية تجي تسويلها سونار وتعاين وضعها حتى نطلعها
دخل بـَحـر للغرفة وهيَ من شافته صارت مثل السعفة ترتجف من الخوف حچت برجفه
-شعنددك هـهنا أأطلع يـله وماريدك اريد تطلگني
بـَحـر:-اللكعة وألچ عين تحچين ؟
هرم:-مسك لتخلينه يوصل يمي يخنگني يموتني مسك مسسك لزمي لتخلينه يوووصل
مسك:-هرم حـبـيبتـي أهدي ميسويلچ شـيي لتخافين
هرم:-لاا مجرم بـَحـر مجرم ضربني بالمسدس ميخاف عليه
مسك:-بـَحـر اطلع بره مدتشوفها شـلون خايفه منك وترجف لاا گلبها يوگف اطلع
-گعد عالكرسي الموجود بالغرفة وخله رجل على رجل ويراقبها ببرود وهيَ منهارة تريـده يطلع ، خزرتها بعيوني وأمرتها تسكت سكتت وبس دموعها تنزل صارت الغرفة هدوء كسر الصمت بـَحـر وهو يگول
-أي هرم بعدچ تحبين مروان وتردينه؟
مسك:-مو وقته هالحچي أحترم وضعها عالأقل
بـَحـر:-مسك اطلعي منها لتصيرين محامي يـله هرم حـبـيبتـي جاوبي بعدچ تردين مروان اذا تردينه خلفي الطفل اللي ببطنچ انطينياه وروحيله
مسك:-لاتضل تفتح دفاتر عتيگه بـَحـر شِــنو هالحچي اللي ماله معنى موضوعهم قديم حتى قبل لاتجي أنت لحياتها وتضلمها لو خاينتك وانتَ متزوجها نصير وياك ضدها بَــس أفهم أفهمم قبل لاتتعرف عليك أنتَ دخلت لحياتها وفرضت نفسك عليها وحتى مماخذ رأيها اذا چان أكو شخص بحياتها لو لاا وروح لأبن اختك الصوچ منه لــيش ماگال الك هــاي البنيه أنـي احبها لــيش بقى ساكت
هرم:-كافي أسكتوا وبحر بَــس اجيب تطلگني والطفل تحلم بيه تحلم تشوفه
بـَحـر:-وأني امشي بكيفچ مو
هرم:-بَــس خلي أوگف على رجليه أله أخليك تخيس بالسجن
-ضحك بصوت عالي مستفز اجاه أتصال طلع من الغرفة وهو يضحك عليه باوعت لمسك وگلتلها
-شفتيه شفتي أسلوبه!!
مسك:-أي لأن ضهره قوي وميهتم حتى إذا قدمتي شكوى عليه
.
.
ديالا:-ثاني يوم الضهر انفتح باب الغرفة ودخل كميل بيده صينية أكل خلاها بالگاع وأمرني أكل
-ايع شِــنو هــذا الأكل بيتنجان وطماطه محروگه ولبن ما أريد
كميل:-تعاي اكلي أنـي مسوي هذا الأكل وجبتلج ملابس حتى تسبحين مو چنتي تصيحين الصبح علمود السبح والحمام
ديالا:-ماريـد اكل بالي يم خواتي
كميل:-لتخافين خواتچ بأمان مسك يم هرم بالمستشفى وياسين عدنا كلنا مهتمين بيه وهرم زينه وضعها مستقر والطفل هم مابيه شي ويمكن باجر تطلع من تطلع أنـي أكدر اعوفچ لأن محد موجود كلها ملتهيه
ديالا:-تخاف اشرد مو
كميل:-اي والله انتِ رعنه ينخاف منچ
ديالا:-لــيش انتَ اللي مسويلي اكل؟
كميل:-لأن الموجودين بالبيت وخصوصًا الحجيه كلها تتمنى تلزمچ وامي ماموجوده راحت تشوف هرم قبل شوية طلعت مو بعيده عن الحجيه تأمر الخدامه تخليلچ سم بالأكل وتسممچ
ديالا:-هــوَ انتم مجرمين ينخاف منكم
-أخذت الخبزه وگعدت أكلت شويه مالي نفس أكل شربت مي كُـلش عطشانه كمت من مكاني وأخذت الملابس مالاتي ودخلت للحمام الموجود بالغرفة
قفلت الباب وسبحت بماي بارد رغم برودة الجو كملت سبح بدلت ومشطت بالحمام طلعت شفته متمدد عالچربايه من حس على وجودي فتح تك عين يراقب تحركاتي حچه بهدوء وهو يتسائل
كميل:-ديالا ، لهسه ماعرفت لشنو تردون تنتقمون
ديالا:-انتم مجرمين قتلتوا اختي
كميل"بشك":-بَــس
ديالا:-انفعلت وصوتي صار شبه صياح هــوَ من شافني أصيح نهض من الفراش مالته وأجه وگف گدامي
-لاا طبعًا أبوك هَـم مجرم أنتوا مقترفين جريمة بحق خوالي أبوك قتلهم خالي يونس انقتل بدون ذنب وخالي الثاني ياسين دخل لبيتكم بعد ماطلع
-حچه بنفس النبرة وصوته أعلى من صوتي يحاول يخوفني
كميل:-موو مجرمين احناا جدچ المجرم الطماع
ديالا:-جدي يسواك ويسوى عشرة مثلك ومثل أبوك ياحواوين لاتجيب طاري رياض على لسانك النگس
-دفعني بقوة وگعت بالگاع وضهري تأذى من الوگعه ضرب الكنتور مالته وأجه وگف كدامي وأني مالي حيل أعين نفسي وأنهض لزمني من اليشيرت مالتي وجرني وگفت صرت گدامه أول مره أشوفه بهيچ حالة لزمني من أكتافي بقوة وحچه بعصبية
-جدچ التقدسينه ماخذ حق أبنه الچبير بعد مااعرف أنُ ابوي وعمامي مشتركين بقتله سوو گعده عشائريه وفصلنا چان بيت نفسه البيت البصفنا هذا حق خالچ يونس أما خالچ ياسين هذا أنگس ماخلق ربِ هَـم أخذ ثار يونس بأبشع صورة
يجي يمنه ياكل ويشرب ويبات ويكعد وطلعات وطبات ويه أبوي وعمامي بَــس هــوَ ناويلهم على نية گشرة لچ اغتصب معن أخوووي تعرفين شِــنو يَـعنـي اغتصب طفل صغيررررر
هذا الرجال الجاي تدافعيله وتاخذين بثارررره هــوَ المجرم الله لطف بحال معن وأبوي دخل عليه وشاف خالچ وهو جاي يسوي فعلته الشنيعه
بنفس الساعة ضربه ضرب لحد ما أغمى عليه وطلع سلاحه وضربه طلقه گدام اخوووي الطفولته تشوهت صــار مختل عقليييًا وكل مايطلع يصيح ابوي قتل فلان كدامي ويريد يشرد من البيت لحد ما أبوي ساعة عصبية ضربه طلقة بضهره وفقد المشي ..
.
.
يتبع