#الايسر "سلاسل الاحرار"
#بقلمي كاريانا 🍀♥️
البارت 16
ادورهم بالوجوه وكعدت اتانيهم
نسيت راحوا والبقت بس كلمات اغانيهم...
-بقلم كاريانا..
..........
خلتني صافن مصدوم من كلامها
سماهر::- ضيعتها مره لا تضيعها مره ثانيه.. وتضل ندمان طول عمرك، البكدك بزره بطوله وانته تنتظرها، تحرك هاي فرصتك الاخيره الايسر...
افتهمت قصدها بس ثولت..
الايسر ::- شبيج يمه ياهي؟ ومنو الينتظر يمه ليش تخليني احجي مو صاير فليته..!
كفختني على راسي وجرتني من ياختي همست يم اذني كلمات جانت اشبه بمصيبها وطاحت على راسي...
سماهر :: انه مو عبير التلوص يمها انه سماهر اعرفك من جنت بزر ببطن امك... رجفه جسمك من تصير كبالك لو لمعه عيونك من ينجاب طاريها لو ابتسامتك وانته تحجي بيها الايسر اعترف يمه انك تحبها لاساطير واجبر كسرها...
ابتعدت عنها مصدوم بكلامها شنو اني مسوي كل ذني وما حاس بروحي دخيلك يا علي شنهاي
حجيت امتمت
الايسر :: يمه شبيج حرام..! أساطير زوجه اخويه يمه...
جرتني كعدت بالكاع ع الثيل (احد انواع النباتات وتكون حشائش صغيره) وكالت بابتسامه ماكره
سماهر :: قبل أكثر من عشر سنوات طلعت تريد تروح لازهر مشتاكله من رجعت جنت تضحك تذكر؟ بوقتها لحيتك عاليه وجنت مخربط بسبب المرض اجيت وحلقت وجنت فرحان من سألتك استسريتلي (كلتلي سر او شغله خاصه)
هزيت راسي بايجاب واردفت مكمله كلامها
::- كلتلي يمه احب وحده وكتلك يمه تخطبها؟ ضحكت وكتلي يمه طفله..! تتذكر الايسر لو نسيت؟
تنفست بصعوبه جريت قميصي فتحت اول دكمه كتله بصعوبه
الايسر::- اي يمه اتذكر وكتيلي من قله النسوان تحب طفله وكتلج يمه عيونها وظفيرتها سطرني ولسانها الجنه بكيسي دوخني بيها صح جانت طفله وحبيتها وصح هي حب حياتي الوحيد بس يايمه انه حماها.. لو نسيتي؟
تنهدت تطبطب على اجتافي
::- يمه البنت مالها غير زلمتها والبنت مخلوق عاطفي تقودها العواطف انته واعي وتفتهم وتعرف شلون تكسبها قربها منك ويا ابني لا يغرك كلامها من تشوف اهتمام وحب، هي نفسها تحبك وهي بنيه صغيره يعني اول وتالي تتزوج وبساعه تشوفه عد غيرك تموت قهر....
هزيت راسي بايجاب صفنت بكلامها صحيح كله صحيح بس يا ترى أساطير راح تتقبلني او لا َ؟ راح تحبني أو لا؟
ابتسمت باستهزاء هاي إذا طلعت شايفتني اصلا خرب حظك الايسر وين ما تحطها خربانه حضك ما يكعد ويه احد
بس اشوفلي صوره حل لهاي المشكله وكلام عمتي صحيح لأن إذا شفتها بيد غيري احركه واحركها وياه اصلا مدري شلون تحملت فكره تكون زوجه اسامه بس يبقه الخلل مني ما بادرت بيها....
أود اخباركم :
من هذه اللحظه
ومن هذا المكان
سننطلق لنكتشف ما وراء ذلك الشخص
هادئ صعب الطباع
خلف تلك الملامح الحاده
وعيونه السوداء
نظراته الشرسه التي تبدو كالسهام
خلف رداءه الأسود وبدلته الرسميه
ما سر جرح وجهه؟ واهتمامه الشديد للسلاسل؟
ما سر ذلك الغموض الي يحيطه
كل ما أقوله لكم
-هادئ داخله يعج بالضجيج
حياه هادئه مليئه بالاسرار والمخاطر
حنون قاسي
وحيد وسط عائله
وُلد جنوب العراق بين أحضان والديه
لتسرق منه الحياه اغلى واعز ما يملك
لم يعد يثق بأحد
يكره جنس حواء
حتى جاءت..!
-ومن تكون؟
-فتاه فاتنه
بعيونها السرمديه
بقوتها الجباره
بصلابتها التي كانت تميزها
انها أساطير..
وقد قلبت موازين قصتنا...
ضي...
طلعت جبته سكران لزمه ابويه كطعه تكطع موته وامي تبجي وتتوسل
سعاد ::- عليك الله سالم الولد راح يموت ابني راح يموت بادينك سالم امانه الله..!
صاح ابويه بعصبيه
سالم ::- بسسسس كافي كله منوره دلالج عفت حياه العز كله رجعت السماوه انه طلعت اخلص من كلامهم ارجعلهم تاللي ولجج سعاددد بسبب ابنج الشفيه اصير على كل السان ولج انه سلام خشمه يطخ السمه لو مشه يجي ابنج العار يخلي راسي بالطييين...
ووانهال عليه بالضرب والغلط حرفيا ابويه جان وحش كاسر من العصبيه بس ما الومه لان كلشي راح من ادينه بسبب ضياء
قبل عده سنوات
سالم الابن الثالث لعائله كبيره تعج بالمشاكل لازم كل كعده مشكله سالم جان يختلف عن اخوانه شاطر ونبهه كون نفسه بعمر صغير واخذ الي يريدها وابتعد صار عنده اولاد اثنين ولد وبنت ضياء الكبير وضي أصغر منه....
أبويه موظف في شركة اهليه والدي مهندس معماري كدر يبني بيت كلش جبير وفخم بالسليمانيه واكو فريق كامل من حراسه ع البوابه وطبخ وتنظيف الخ...
جنه عايشين عيشه ملوك مع كل هذا والدي متواضع بشكل ودائما يقول
(هذا المال كله يزول الا الأخلاق فهي كنز دائم)
وفعلا ربانه على هذا النهج ضياء سحبوا أصحاب السوء لكن ما كدرنه نسوي شي وبعد التهديد ابويه باع كل املاكه سيارته كلشي باعه امي باعت ذهبها وكل الي تكدر عليهن اني فلوسي وذهبي كلهم ياله صاروا ٧٧٠ عراقي...
رحت حته انطيهم لابويه
من شافهم بيدي واني نضراتي تمدهم بالقوه حضني وصار يشهك بصوت عالي وهو يردد
سالم ::- تخسى يا ضياء حته اختك شالتها الغيره وانتخت وهي طفله وانته بعير وذابني بحلك الموت...
حضنته هدأته ورجعت...
بعد ما بعنه كلشي بس بقه عدنه وضيفه ابويه وبيت صغير وقديم بالسماوه ورثه من اهله....
وهنا الناس بلشت تتشمت بابويه لان رجع وهو جان قافل ما يرجع وابويه نفسه تعز عليه ويكطع ضياء تكطع....
وامي تبجي... وهسه والله حايره مدري الخلل منين مدري من اهلي لو من ضياء ولو اني وضياء تربينه بنفس المكان... بس الشيطان شاطر اخخخ على حظي المصخم...
اساور...
بقوا الشباب لثاني يوم والايسر طلع وهو يوصي بينه
سامر أثر العلاجات بسرعه يغفه أساطير تأكدت كلشي تمام منعتني اروح ع مسلم وراحت لغرفه اهلي وسدت الباب وبس طبت انهارت تبجي بنحيب ووييه كل كلمه تنطقها تكول
بابا بابا.. الاجود بنتك تريدك..!
الدمعه صارت بطرف عيني طلعت للطارمه صادفت مسلم ستوه يلبس حذاءه يريد يطلع شافني اجه ملهوف خايف
مسلم ::- شبيج اسواره شبيج عيناي ليش هيجه صايره...
اساور ::- اختنكت وحسيت روحي تريد تطلع حضنته حيل وهو تفاجأ بس حضني وصرت انحب وابجي سحبني عن الاستقبال علمود سامر ما يفز خطيه من الوجع كوه ينام
مسلم ::- شبيج بنيتي شبيج؟
اساور ::- مسلم فدوه أساطير والله لو تسمعها شلون انهارت تبجي تخوف فد مره واني ما بيدي شي اختي متماسكه لخاطرنا..
حضني يهدأ بيه وهو يردد
-الله موجود..
كعدنه ب الطرمه وضليت احجي وهو يخفف عني وطبعا الَكعده ما تخلو من كلامه المعسول..
مسلم ::- خرب شيب اهله الما يحبج لجج انتي ورده فديتج انه شلون بيه ويه هل وجهه الحلو؟
راح اكلج يولي..
يحجي ويجعص بخدودي مكزكز ضحكت..
واني اصيح
اساور ::-ااااخخخ مسلم موتتني ولكك مسلم اييي هسه تطلعلك أساطير بسلاحها السري تكطعنه اني وياك...
ضحك وكال بتسأؤل
مسلم ::- وشنو سلاحها السري..؟
ضحكت وهو افتهم وكال
::- لا بس النعال؟
اساور ::- لا حذائها الكعب
وانفجرنه بالضحك... شويه وراح...
سامر....
كعدت فاز جفلان من كابوس مزعج، كعدت وحطيت ايديه على عيوني وسرحت أفكاري إلى عالم ثاني
قبل شهر بين سوالف وضحك جانت أقصى همومنه منو يودي البنات وتصير عركات طاحنه ههههه ونشبع تكفخ من ابويه..
لو من نباوع لاساور بخزر تنفجر بالدموع والبجي مجرد خزرناها وهيجه تسوي اما أساطير لو نكطعها نموتها ما تهتز وتبقه نظراتها الحاده وابتسامه النصر تعلوا وجهها بكل وقت بحيث من تمشي أساطير خشمها يطخ السما مو السكف محد يكدر يكوللها على عينج حاجب..
ماخذه ع الدنيا خاوه وابويه زايدها قوه وما يقبل احد يحاجيها شتان مابين أساطير واساور، أساطير قوه لاساور واساور نقطه ضعف أساطير مستحيل شلون يكونن تؤام ذني الثنين امي الله يرحمها دائما جانت تكول
ام ازهر (جواهر) ::- أساطير مثل الاجود واساور مثل عبد الرحمن
عكد ازهر حواجبه وكال
ازهر ::- شلون؟
ابتسمت امي وعاينت لابويه..
ام ازهر ::- أساطير بقوتها بشخصيتها بنظراتها الحاده بشراستها بمنطقها كلها الاجود بس العيون عيون عبد الرحمن
اما اساور حنيتها طيبه كلبها خجلها لطفها نظرتها للناس كلها بنظره حلوه تشبه عبد الرحمن الله يرحمه
أساطير مالت على ابويه كعدت بصفه حيل دحست روحها بحضنه وكالت وهو يعدل ربطتها بحنيه
أساطير ::- شوف عيني اجودنه بنتك بكلشي تشبهك...
ضحك وحضنها وباس ارنبه انفها هاي حركه بين ابويه وأساطير..
ضحكت امي وكال تميم بانزعاج
تميم ::- ايي بنيت الاجود تغلي بروحها على ابوها
ابتسم ابويه ولمها لحضنه...
ابتسمت بقهر وين جنه ووين صرنه ووين تصفه بينه الدنيا واني بركبتي بنات اثنين هو اني خايس روحي ما اتحملها مو نوب اتحمل ذني يبووو....
قطع دوامه أفكاري تلفوني يدك شفته الايسر يجوز دك علمود عمليتي لازم اسوي عمليه الرجلي حته أكدر ادوس عليها مره ثانيه خطيه بكلشي ويانه الايسر...
الايسر ::- السلام عليكم
سامر ::- وعليكم السلام شلونك ملا؟
ضحك بقوه وكال
الايسر ::- انجب لكك حيوان تحشش
سامر ::- والله يا الله نكوله دكتور ما يقبل نكوله ملا ما يقبل نكول نعال ما يقبل
يضحك وكال
الايسر ::- لككك حيوان احترم... المهم اوووستاذ سامييير هههههه شفتلك دكتور زين...
سامر ::- اييي بشرر؟
الايسر ::- علاجك باربيل ٤ أشهر..
تنهدت بحيره وهو اردف
الايسر ::- هيوووو الخزيه شبيك جنك واحد ناموا جهاله بدون اكل شبيك؟؟
ضحكت وكلت
سامر ::- هههه لا والله بس شايل هم خواتي...
سكت شويه وكال
الايسر ::- سامر انته مو صغير وتعرف انو احنه مالنه ذنب واحنه ولد اليوم خالي مثلما راح ابوك راح ابويه.. خواتك يبقن يمنه ولا تعترض لان هاي وصيه اخوك...
تنهدت وكلت
سامر ::- اي خويه لو باقيه ببالي ما ناسبتكم بس اني بالي يم أساطير َ.. اساور بسرعه تختلط وتتخطى بس أساطير مثل ابويه الله يرحمه صعبه الطباع.. وحاير بيها إذا قفلت عليه الا تروح وياي.
الايسر ::- لا تخاف انته توكل والباقي يمي...
سامر ::- ان شاء الله وره أربعين اهلي
الايسر ::- ان شاء الله خويه...
سديت التلفون من الايسر صافن شلون راح اقنع هاي ام راس اليابس ما اعرف اساور مسلم يقنعها بس هاي لو يطلع جدي الاولي من كبره ما تقتنع...
أساطير...
-تعبت كثيرا
تعبت من دموعي التي احبسها
من صرخاتي التي اكتمها
من الآمي التي اخفيها
من جروحي التي احاول تناسبها
تعبت واني امسح دموع اساور واهون على سامر واستقبل الي يجي وادي الواجبات كافه واني لازم ابين اني بخير...
اطمنت على سامر نام وغطيته وبوسته وكلت لاساور ما تروح يم مسلم لان مصيبه هل بنت شكد تحبه ولو مسلم كلش لطيف..
ولو اني جنت احب اسامه أكثر وأكثر..
اشتاقيت لابويه الريحته الحضنه الدافي الي جنت اختل بحضنه وابجي وابجي لحدما ارتاح بدون تظاهر بالقوه او خجل...
صرخت وبجيت ولطمت وملخت نفسي بس حته روحي تهدأ ماكو نار كبره واجه بصدري اريد اسكت واكو شي يكول ابجي بعد ما اكتفيتي..
سحبت غترت ابويه الي انطانياها وبجيت واناجي بيهم يجون ويخلصوني تعبت حيلل تعبت...
أساطير ::-يابهه وينك ابويه نظر عيني اجودنه هاي اني مثلما سميتني أساطير صرت صدك أساطير والله يا يابه دمعه ما انزل بالعكس ملامحي بارده وروحي تحترك سندت اخواني بس منو يسندني اني...؟
سحبت شال امي وعبايتها ولفيت روحي بيهم
امي الحنينه جواهري انتي يا اغلى ما املك اليوم اني مجرده من كلشي لا حب لا حنان لا اهتمام لاعزوه ولا سند ولجج ييمه اليوم صفيت بطرك روحي وذولي على كلبي....
جريت قمصان اخواني اشم بيهم
ازهر ازهري الدنيا خطره و مخيفه وموحشه بدون نصايحك وتعليماتك وغيرتك الزايده خويه
تميمي حبيب روحي مو تكولي ما دام اني عايش ما تنزل دموعج ولك حبيبي دموعي ما توكف بعد بيتي.
..
ختمتها من كمت ملهوفه سحبت بدلته وحضنتها ابجي
يا روحي يا روحي انته هاي اسطورتك ولك حبيبي عيوني التحبهن انعمت وراكم يابه يروحي انته......
انفتح الباب فزيت ودموعي ما توكف طب سامر خازرني شاف المكان مخبوص واني حاطه غترت والدي على رقبتي.. والعباية على اجتافتي َحاضنه قمصانهم طب على عكازته وسد الباب كعد كبالي
وكال بحده
سامر ::- شبيج انتي ليش تنوحين لججج شكو كل هل دموع انتي ما تحبينهم اصلا..!
اختنكت بس حاولت امثل القوه
أساطير ::- شبيك انته شجاي تحجي؟؟
هز راسه بايجاب وكال
سامر ::- نعم الي يحب ما يأذي وانتي جاي تأذينهم..!
همست من بين دموعي
أساطير::-والله مشتاقتلهم
هز راسه ابتسم فاتحلي ادينه ذبيت نفسي بحضنه اشهك بقوه وهو بس يطبطب عليه ويهون...
اجه اليوم المنشود يوم الأربعين وطول الفتره الفاتت اني هادئه الا هنا بس وصلنه النجف كلبت الدنيا....
عبالك اليوم راحوا احس كلبي راد يوكف كدما بجيت وفرفحت اجه سامر يريد يكومني اني حاضنه قبر ابويه اخخ يا ابويه احس روحي معلكه بروحه اتنقل من واحد الواحد بس ارجع لابويه
سامر ::- كافي أساطير راح تموتين...!
اساطير ::- عوفني عليك الله عوفني..!
سحبه الايسر انطوني مساحتي مثلما يكولون يمكن ساعتين اني بس ابجي وحاضنه قير ابويه اشكيله....
من ردنه نمشي احس كلبي خلص بعد ما يتحمل... وكعت جفي على وجهي وما حاسه بشي....
الايسر....
بعد ما صار أربعين أهلهم ورحنه للنجف عفتهم براحتهم سامر بس عيونه حمر بس هادئ اساور شويه وسكتت واصلا هي صوتها ما ينسمع اساور أكثر اسم رددته امي.!
اما ذيج العرمه لعبت جوله ساعتين على بجيه وحده وتريد ابوها...
ما سكتت الا بالف محمد يا علي وبعدنه ما وصلنه السياره تخربطت سامر فرفح عليها....
من وصلنه المستشفى كعدنه ننتظر وهمه ولا حس ولا نفس شويه طلع دكتور
كمت عليه صدك خفت عليها حيلل بس لازم نسند اخوانها
الايسر ::- اي دكتور شبيها؟
هز راسه باسف وكال...
الطبيب ::- المريضه صار عدها.......
يتبع.....
خطيه أساطير الله يعينها 🥹
من هذا البارت راح ننتقل ونبدي بالأحداث الاكشن 😂😭
الايسر يحجي بثقه عمياء 😭
اسفه على الخط بس الواتباد علك ف اضطريت اكتب البارت ع التلي