#الايسر سلاسل الاحرار
#بقلمي كاريانا ♥️✨
البارت 12
يدخان الجكارة الماعفت ريتي
يالمخليني اتيه وجوه اهل بيتي
يا شيب الراس يابواك عافيتي
كون الدمع ينباع واجمع وعدة
ينعصر ست مرات وجه المخدة
.......
انتفض َكال شبي الايسر؟
حجه شويه بالتلفون وسده واحنه كل واحد يسأل من جهه..
تميم ::- خوما بي شي؟
سامر ::-هسه غير ينطق شكوووو شبي أيسر!
تنهد ازهر بيأس وكال
ازهر ::- حيللل مريض عمت عيني عليه، فد مره ايشي ياكله يرده وعايش ع المغذيات صارله ٤ ايام...
اردف ابويه بقهر
الاجود ::- الله يعين أيسر حالته حاله وره وفاه اسامه الله يصبره..
كلنه بصوت واحد آمين يارب...
كمنه اساور غسلت المواعين وازهر وتميم طلعوا للسماوه امي وابوي راحوا يرتاحون وسامر راح للمختبر...
عفتهم اخذت تلفوني وصعدت للغرفه تمددت بتعب هلكانه وكل معتاد حضنت قميصه مال البدله ابوس الرتب واشمها حيل مثلما هو جان يسوي...
وكعدت اسردله كلشي... عبالك شخص وموجود يمي سبحان الي خلاني اتعلق بي لهل درجة....
وما حسيت عله نفسي شلون غفيت...
ازهر....
بدلت وطلعت وياي تميم مستحيل أيسر حالته عاديه ويدكون عليه طلعت قلقان عليه الايسر من طفولته اني ويا واسامه روح بروح...
كال تميم وهو يسوق..
::- شبيك ازهر؟
ازهر ::- والله خايف عليه شبيه لازم بي شي وخابروني...
هز راسه بايجاب كال بهدوء يحاول يطمني...
تميم ::- لا تخاف خويه هذا الايسر مو ياهو الجان تخطه وفاه والده يتخطى وفاه اسامه الله يرحمه..
تنهدت واردفت بيأس
::- ما اعتقد حالته حاله الايسر...
وصلنه بعد ٤ ساعات تقريبا...
جانت الدنيا غروب دكينه الباب فتحه هاشم سلمنه بعدنه بالطرمه طلع الايسر مكمم حلكه بايده ممنتبه لوجودنه توجه للحمام البره شويه ورجع مبلل وجهه وصدره وشعره...
وكوه يحجي
الايسر ::- كتلكم ما اريد زقنبوت معدتي رايحه ليش ما تعوفوني براحتي...
شافنه ضل مصدوم اعاين لحالته ذبلان حيللل وضعفان ولحيته عاليه وحالته حاله وحده من اديه مزوركه مكان كانيولا والثاني بيه كانيولا
اردف مستغرب ::- ازهر تميم شجابكم؟
ازهر ::- كالولي مريض وجيتك شبيك ولك ليش هيجه حالتك
خزر مسلم وهز راسه بوعيد واجه سلم.. وطبينه وهو كاعد كدام الهوه يجر البدي عن رقبته اجه ملهم سلم وعلك المغذي لايسر ووراها اجو البقيه سلموا كعدوا شويه وراحوا تكابلوا شلت العفطيه ع كولات ابويه (تميم، ياسر، مسلم)...
كال ياسر ::- راح اعالج الايسر خوش!
ضحكنه وكلنه خوش دكتور شوف شغلك...
كام كعد كدام الايسر وكال
::- عزيزي المريض الشجاع افتح فمك...
تنفس الايسر بعصبيه صحت بي
ازهر ::- ديلا الايسر خلي الدكتور يشوف شغله...
كوه عليه فتح حلكه وهذا كلسع يكرصه لو يعضه وهذا يصيح خبلونه اخير شي كال
ياسر ::- انطيني تلفونك الايسر
كال ملهم
::- ترا اني طبيب باطنيه وماكو هيجه فحص
كال ياسر ::- اشششششش لا تدخل اني اعرف شغلي.. هسه يطلع الايسر عاشك ويتعزز علينه حته نزوجه
غمه الايسر ودفره وكال
::- صارلك ساعه تالي هيجه تشخص كوم لكك نعال
صاح مسلم وهو يغمز ل تميم ضحكوا...
مسلم....
شفت الوضع تمام الايسر بلش يطلع من جو الاكتئاب الي دفن نفسه بي.. من مات اسامه وخلصت الفاتحه الايسر حاضن مخدته ومتمدد لا ياكل لا يشرب لا يكوم لا يداوم ومطفي الضوه عله روحه يسمع الاغنيه الي يحبها هو واسامه اسمها (خطار اجانا العشك) تخلص يشغل قصيده هم كانوا يحبونها (مو بس اخو) وهيجه مكضي وقته وما يقبل احد يبقه يمه وهكذا مرت اسبوعين.. ومن يتصل ازهر يضحك وطبيعي يسد الاتصال يرجع لغرفته حته بيته صار ما يروحله..
بس هسه لا والله كاعدين ويضحكون..
أشرت لتميم ضحك كلت
الايسر نفسك تلعب
هز راسه بايجاب.. ابتسمت واردفت
ووجع بمعدتك؟
هز راسه بمعنى اي
دوران؟ استبراد؟
هز راسه اي
ضحكت وكلت تميم وياسر هلهلوا
طكونه بهلهوله المصيبه واحد محامي واحد ضابط اجت ع صوتهم عمه سماهر
سماهر::- عليش الهلاهل ولكم؟
ضحكت وكلت الففف مبروك الايسر حامل بتوم
الولد خربو ضحك الايسر ضربني بالكوشه خربانين ضحك
صد ع ازهر وكاله
::- احجيلك شغله بله َ َ؟
ضحك ازهر وكال
::- الف مبروك حبيبي
الايسر هز ايده ما عاجبه واحنه خربانين ضحك كال هاشم
::- يبووووو تطشر العرض ابو الطفل وين
الايسر ::- راح اكوم اطيح حظ حظكم ادبسزيه سفله والله اذا كمت!
ضحكنه عليه شلون محترك موعد الطبيب مالته ب 8
راح هو وازهر فقط وتميم بقه يمنه كاعد...
الايسر....
بعد وفاه اسامه صرت بسرعه انفعل روحي صارت باشياءه وسادته ملابسه عطره كلشي بي اعتكفت على نفسي هاي طريقتي بالتعبير عن الحزن لكن هيهات الزمن ميتركني حته أحزن عدل...
صرت احضن مخدته وابقه بغرفتنه سابقا مو غرفتنا اني واسامه لا، اسامه ما عاش هنا غرفتنا اني وابويه.!
بدال ما اعالج جرح صرت افتح جروح ستوها بدت تلتم..
احضن مخدته واعاين بالغرفه هنا ابويه جان يمسح على راسي يهدأني حته ما انجن رسمي بسبب تعذيب نوافل
وهنا ابويه حجالي انو الصلاه هي المهرب الوحيد من الدنيا
وهنا ابويه كال انو هو ميضوج لان القرآن ونيسه ولا ينزعج لانه فقد القدره على الحراك او القيام باي شيء
وهنا ابويه جان يحاجيني على رقه النساء وشلون لازم نعاملهن بدون استغلال لعواطفهن ولا تجريدهن من انوثتهن...
وجان دائما يكول مهما قست الأنثى تبقه رقيقه ضعيفه وكال أيضا ان امي صح غلطت بس تبقه امي...
احتضن مخده اسامه واتمدد مثل ما جان ابويه ينيمني قبل وطفيت الضوء وسديت البردات والباب مثل ما جان ابويه يسوي صح جان مريض لكن جان يعتني بيه...
واحس بأمان رهيببب احس طيف والدي محتضني وكأنه يكول لا تخاف اسامه باحضاني وغطيت بنوم عميق وفزيت عله صوت ياسر يحجي بخوف
ياسر ::- شبيك أيسر تون وتصيح ابويه ابويه تراا الكل كعد عله حسك حرارتك ناررر
وفعلا ما كدرت اتحرك ومرت ٤ ايام لا حرارتي تنزل ولا معدتي تتقبل شي والهبوط ملازمني وفوك هذا كله الأحلام ما تركتني مرات افصل عن العالم وافكر بيهم.....
وصلنه الطبيب وكال انو معدتي ك رده فعل على انشغالي الدائم والتفكير الزائد وانو اني لازم ارتاح...
نتر بيه ازهر مزعوج
ازهر ::- الايسر وتالي ويه التفكير الزائد راح تنوتتتتتتت يا بشررر!..
معرف ليش هيجه رديت
::- يا ريت!
ما حسيت غير ازهر شايلني بيده يهزني كل قوته ويصيح!
ازهر ::- كافيييي الايسر ارحموني جهاللل انتو خوما جهال اريد افتهم!..
الايسر ::- اهدئ اعتذر ما قصدي اعصبك والله مدري شلون طلعت مني!
هدني وتنفس بقوه ويحجي بعصبيه.. هدأ شويه وكال
ازهر ::- الايسر خلينه نبني قبر اسامه..!
انصدمت بالبدايه بس حبيت الفكره...
الايسر ::- اني ابني مالك حاجه.
ما حسيت اله شال جتفي من قوه الضربه وصاح بعصبيه
ازهر ::- اسامه اخوي واخوك تخلي ربع اخلي ربع تخلي مليون اخلي مليون تخلي مليار اخلي مليار اريد هل شي يكون من اخوانه اثنينهم مو بس منك الايسر لا تتحيون!
ضحكت وفعلا بنيناه بعد اسبوعين تقريبا وكانت صورته مجمله المكان الموحش الي يقبض القلوب ويزرع الخوف بالانفس ما اعرف شلون نزلت دموعي واني اشوف قبر والدي بصفه قبر اسامه حسيت عله ازهر من لف الشماغ عليه نفس الحركه قبل عشرين سنه
قبل ٢٠ سنه تقريبا...
بوفاه والدي وعمامي ما عبالك اخوهم المات فرفحت بجيت حته امي مجانت منطيه ابويه ذيج الاهميه وهذا احد اسباب حقدي وكرهي الها راح تكولون مستحيل اكو شخص يكره امه لان حب الام فطري...
نعم هو فطري لكن الي سوته كان كفيل انو يدمرني يدمر كل حياتي...
ومع الايام راح يتوضح كلشي الكم...
واني مفرفح عمري ما يتجاوز ال ١١ سنه ذبيت روحي عله قبر والدي ابجي عمي الاجود جان حاير بالزلم رفعوني اسامه وازهر كوه..
راح ازهر ورجع بيده شماغ والده اسود لان اصلا جان محرم...
الناس تحجي عليه لان لعبت جوله يشيلوني وارجع انهد ع القبر وابجي رفعني اسامه حاضني وازهر لف الشماغ على وجهي وكال بهمس لكن بنبره انطتني امل وقوه كالها وهو يعدل الشماغ على وجهي
ازهر::- لا تبين ضعفك لاحد الايد التوجعك ابترها ولا تخلي احد يلزمك منها الايسر...
كانت مجرد كلمات وهسه عادها نفس الكلمات النظرات
ازهر ::- ارجع اكولك الايد التوجعك ابترها ولا تخلي احد يلزمك منها الايسر...
ابتسمت وهو حالته مو احسن من حالتي شويه َكمنه
اساور....
بعد ما راحوا الولد وطمنونه على الايسر وانو مابي شي خطير حمدنه الله وشكرناه لان ما بينه حيل مصيبه جديده....
ثاني يوم رادوا امي وابوي وازهر يروحون للزياره رغم امي واحنه سنه لكن ابويه شيعي وما جبرنه على شي كال كلمن وقناعته...
وتميم يوصلونه للمكتب لان باع السياره وسامر يجيب مسواك ويجي...
سلموا علينه كلهم ووصونه ندير بالنه ع البيت وكالو ما يتأخرون
تخصرت أساطير تضحك وكال
::- عمت عيني البيت راح يضل بدون زلمه..
ضحك ازهر وحضنها وكال
::- هسه يرجع سامر وتميم يجي المغرب وانه باجر من الصبح يمج خوش
ضحكنه وودعناهم
شويه ودك الباب أساطير طلعت وكالت منووو؟
اجانه صوت مسلم
::- اسطوره اني مسلم والايسر
فتحت الباب ورحبت بيهم وعرفوا الولد مو هنا.. رادوا يروحون ما خلتهم أساطير..
شويه ودك تلفون الايسر تشخصت عيونه بصدمه وكانت الحلقه الي دخلتنه بدوامه جبيره كلش قلبت حياه الكل...
راح احرك عليكم ببيت شعري من كتابتي ان شاء الله يعجبكم...
-كتله وين رايح وعايفني وحدي؟
ضحك وكال هسه راجع
اشو الهسه انكلبت بجي ودموع وموادع..!
يتبع...
بنياتي الحلوات جنت هواي متمنيه نوصل لهنا لان راح نبدي نكتشف هاي القصه وشنو ضامتلنه من أسرار يا ترى؟ راح تحبونها أكثر من اسود القادسيه بس اصبرولي...
بقلم كاريانا♥️