بقلمي: ميامي آلـ حيدر
بسم الله الرحمن الرحيم
لا تنسون تصوتون للبارتات حتى يصعدن ❤.
فإنّ الأخت في الدنيا ربيعٌ
وما وصف العذوبةِ فيها كافِ
_________________
ت
ذكير:
وي مادگ التليفون ومديت ايدي اريد اطلعه رفعت راسي شفت سهم على الدرج صافن على ايدي...
ضلينة واحد صافن بوجه الثاني واني استوعبت ونزلت ايدي بسرعة وغطيت صدري ونزلت راسي وصعدت بسرعة وجهي احمر
عزة بعينج سما بعد شلون اباوع بوجهه ياربي
اجيت ابچي من الفشلة قفلت باب غرفتي ضليت ألطم شوية ونمت
_________________
الساعة 2:06 ظهرًا
-هُـيـام
گعدت من النوم متكسرة تكسر البارحه حيل تعبت گمت سويت روتيني وصليت، چنت واكفة بالمطبخ وساندة عكوسي على الكاونتر،منتظرة الچاي يحمة، فتحت تليفوني لگيت جساس دازلي رسالة
جساس: شلونج
كتبتله واني الابتسامة شاگة حلگي من اتذكر البارحة رديت عليه
هُيام: اخذتني النومه ماادري والله البارحه حيل تعبت، الحمدلله انت شلونك
شافها وخابر عليه تحمحمت ورديت
هُيام: هلاو
رد عليه ومبين جاي يشرب جگارة
جساس: أندار فدوة لهل صوت الحلو، مشتاقلج وعلي
گمت ارافس وگوة كامشة ضحكتي احس صدگ فراشات ببطني
هُيام: تشتاقلك العافية
جساس: والله بيج كتلة
هُيام: هاي شبيك جا شكلك عمري اني الاشوق
جساس: چا شبيها اذا گلتي هيج
فريت خصلة من شعري على اصبعي
هُيام: مو بعدني مامتعودة على هل سوالف انطيني وكت
اندمجت اسولف وياه واشتميت ريحة حرگ اتذكرت الچاي بعدني مامطفيتة ركضت للطباخ وعطت
هُيام: الچاااايييي احترگ
جساس: هنيالي
هُيام: شنو تستهزء؟؟
جساس: لا حبيبتي شحدة اليستهزء، بس احچي الصدگ اتسرسحتي علية ونسيتي يحترگ مو؟
هُيام: اويييي روح مني حتى ريوگي خرب
سولفنة شوية انوب اتذكرت سالفة عندي فضول اعرفها
هُيام: اگلك جساس
جساس: عيوني
هُيام: شنو سالفة الثارات بين عائلتي وعائلتك
تغيرت نبرته مال واحد ضايج
جساس: ماضي وراح خيولي
هُيام: بس اريد اعرف شسووا عائلتي بعد
بعد إقناعات وملحة يلا گدرت أقنعة يسولفلي
جساس: حضري روحج ورة العشة نطلع اني وياج اليوم لمكان عام واسولفلج بس مو كلشي ينحجي
هُيام: تمام انتظرك
ودعته وسديت الخط منه بس گلبي مقبوض خايفة من الراح اعرفة، بس السؤال والأكثر شي مخوفني، جساس ماخذني هم ينتقم مني لأن بت إحسان لو من صدگ يحبني؟
كملت يومي عادي لحد آذان المغرب تذكرت نريد نطلع واني مابلغت امي
هُيام: يمةةةة
سارة: وغمة شبيج تجوعرين
هُيام: يمة مساع خابرني جساس گال نطلع اني وياج لمكان عام شوية هم نتعرف على بعض
حچت وهي تمسح بالكاونتر
سارة: اي طلعوا يمة بالسلامة بس مو تروحين منا كلشي مابيج وترجعيلي مطگعة
حچيت بخجل
هُيام: لا يمة حتى بوسة ماخلي يبوسني شني موعيب
باوعتلي صفح
سارة: اي من الخطبة، باوع بوجهج اجيتي توگعين
هُيام: ماحزرتي جنت متوترة
سارة: خايبة تعلميني بيچ، امشي روحي صلي وبدلي راح يجي الزلمة
رحت سبحت وصليت وامي صاحتلي اتعشى، تعشيت قليل وگمت لغرفتي خليت مكياج خفيف،بس ركزت على الكحلة، كملت وجهي وهزيت شعر على السريع حتى ينشف شعري، مشطتة ولبست كيلوت وقميص سود وجواريب سود
ولبست ربطة بيضة ورشيت عطر ريحته ناعمة حلوة كملت وگلت من اريد اطلع اخذ جنطتي وألبس عباتي، انتظرت ربع ساعة ودگ علية جساس: ها حبيبي كملتي لو اخذلي غفية ام الساعتين بعد؟
هُيام: كلشي ماعندي بس ألبس عباتي واطلعلك انت التتأخر
جساس: يا الله يا محمد ياعلي جايج
ضحكت وسديت الخط منه، وگمت لبست حذائي وعباتي واخذت تليفوني وجنطتي وطلعت من سمعتة دگ الباب، بوست ماما وطلعتلة فتحت الباب وسلمت عليه
هُيام: شلونك جساس
جساس: الحمدلله هُيامي .
صعدنة بالسيارة بس ماتحرك باوعتلة صافن علية ورافع حاجبة
هُيام: ها بية شي شبيك صافن
جساس: بعد اشتريلچ حمرة وتكثرين حمرتج
عقدت حواجبي وجريت كلينسة
هُيام: ترة والله مامكثرة وهم لونها خفيف ماتبين هواي
جساس: وكحلتچ شاگة بيها عينج هو هيج اليحط، شگالولچ عليه مگرن ماخذ مرتي محمرة ومكحلة افتر بيهه بالشوارع اشّوف بيهه للناس
جر كلينسة ومسح عيوني بس على كيف حتى ماانجرح، جر رموشي وحچة بأنزعاج
جساس: ذني شلون ينزلن
هُيام: ياااا جساس حتى محد يشوفني دنيا ليل
حرك السيارة وكلساع يعيط بية على مكياجي صارت گبالنا سيطرة
جساس: حطي عباتج على وجهج
ماعاندت لأن شفت هواي زلم واكفين وكلهم لابسين عسكري
هُيام: يلا بس ترة اختنگت اعبر بسرعة
عبرنة منها بس ماگالي نزلي عباتج
هُيام: چا مو گتلك اختنگت من نعبر گلي
جساس: والله تسويلي فضل اذا ترجعين تغطين وجهج، باع عيونها بت المطي
غلست عليه ماجاوبتة خاف احچي ويروح يشتريلي بوشية
جساس: وين عاجبج نروح؟
هُيام: ماادري والله بكيفك
جساس: راح اخذچ لمطعم اله يخبل هو واكله وانوب نحلي ونروح نفتر
هُيام: خوش
باوعلي وهو يسوق والجگارة بين شفايفة
جساس: هاا انعگدت النونة
باوعتلة مغثوثة
جساس: ااه شو گمتي تباوعين صفح شني ماعاجبج
هُيام: اي ماعاجبني جبت الطريق كله تحچي عليه وتمسح بوجهي زلغته تزلغ، لتحچي وياي بعد و يلا رجعني للبيت
جساس: شنو شفتيني ديوث واخذتي راحتچ حاطتلي تخم مكياج وجاية شتردين اتبسم بوجهج واسكت والزلم تباوع عليج
هُيام: انت لو تحبني صدگ چان ماگتلي مسحي مكياجج چان كتلت شكو واحد يباوع علية بس اني ادري انت متحبني
باوعلي صفح
جساس: خايبة انجبي
هُيام: وفوگاها تغلط!! جساس رجعني للبيت وباجر نفصخ
جساس: خرببب انه الگ*** كافي ولج كافي مو نعلتي والديه هاي كلهه على المكياج! عمي حطي بس كفي لسانج مني
هُيام: مو علمود المكياج بس انت هواي حجيت علية وغلطت وزلغت وجهي، رجعني لأمي ماتستاهل احبك رجعني
مارد عليه ولا باوعلي كملنة الطريق اني درت وجهي للجامة احس حبيت شعور من اشوفة معصب ويغار عليه، گوة گدرت اخفي ابتسامتي خيولي ميستاهل زلغ وجهي، انمحت افكاري من انتبهت وگفنة گدام مطعم راقي
جساس: يلا نزلي
نزلت وسديت الباب مال سيارة بكل ماعندي قوة
اباوع جساس شاطت روحة ومن وگفت يمة واحنا ندخل للمطعم همس
جساس: بت الچلب الباب چان انخلع
باوعتلة رافعة حاجبي
هُيام: حتى لو انخلع فدوة الي، لو اكسر السيارة كلها هم ماتحچي خوش لو لا
جساس: دمشي امشي اني بيش ورطت روحي
هُيام: شو چنك ماتحبني؟
وصلنة للطاولة مالتنه گعد وهو يجاوبني
جساس: اشوف دم سنوني ولا اشوفج هسه، من تخففين صخامچ احبچ عود
هُيام: هسه اكل وينمسح بس اسكت مني، ورة الاكل عود نحچي
طلب هو كباب واني هامبرگر وفنگر وبيتزا النه ثنينة وببسيات، اكلنا واحنا هم نتعارك، كملنة الحمدلله واجوا العمال نظفوا الطاولة
حچة من ورة خشمة عود ضايج
جساس: راح اطلب حلا شتحبين
ردت اگلة احبك الك بس توني متعاركة وياه الهيبة تروح
هُيام: شتطلب اطلبلي وياك
هز راسة وطلب كريب اثنين وزنود الست بس مااكلت هواي راسي يگوم يوجعني، ياكل ويباوعلي مقلص عيونة خرج عن صمته
جساس: شو هاي الحمرة ماراحت شني لاطشة
هُيام: لا راحت وهسه اروح اغسل واخلي جديدة
جنت اكل كريب من حچيت هيج ضرب ايدي على كيف ونتر بصوت ناصي
جساس: حتى اشمرچ منا
چنه بالطابق الثاني مال مطعم باوعت للشباك مكان عالي
هُيام: صارن هواي جساس ضربت ايدي وقبلها تصيح عليه وقبلها تزلغ بوجهي ماراح اعديلك ياهن بسهولة بالمرة
جساس: خل اگوم اسأل ابو المطعم عندة گرون يأجرلياهن، مرتي تهددني واني ساكت
هُيام: صدگ احسهن حلوات عليك
فتح عيونه على وسعها واني رفعتلة حاجب
جساس: هاي بعدنة بالبداية وهيج، شو ماتحترمين انتِ
هُيام: چا غير انت گلت ألبسهن؟ وبعدين انت هم ماتحترمني
فرك وجهه بإيديه
جساس: لا إله إلا الله
اخذت جنطتي وگمت
هُيام: اوييي زعجتني، راح اروح للحمامات اغسل واخلي حومررررةةة حمرةةة
بسرعة رفعلي راسة وخزرني
جساس: وعلي اكتلج
ركزت بعيونة ورموشة وحواجبة ثخان يخبلن
هُيام: اويلييي والله بيك جرة ايلاينر
عقد حواجبة بعدم فهم
جساس: جرة شني؟ بس لا زيج و عود جاي تشفرين وعلي صدگ اشمرج منا
هُيام: لا حبيبي هاي شلون الكحل بس ثابت يسحب العيون
جساس: ديلا روحي غسلي ولا تحطين حوووومررررةة
هُيام: لا تخوزر ندري عيونك حلوة، من هسه شفت روحك
جساس: راح ابچي، روحي عليچ الزهرة روحي
الحمامات صايرة وراه، گمت وشلت جنطتي فتت من يمة وفتحت جنطتي وحچيت بهمس بس هو يسمعني
هُيام: وين حوومورتي الحمرةةة
ألتفتلي
جساس: سويهه وشوفي اله اخلي الحومررةة الحممرة توصل لأذنج
ألتفتتله ماعاجبني، عركتنه كلها همس خاف يسمعنة واحد، رحت للحمامات غسلت إيديه ووجهي ونشفت وحددت شفايفي تحديد جوزي خفيف وخليت گلوس وخففت الكحلة، خاف يسويهه صدك ويكتلني، كملت ورحتلة
لگيته دافع الحساب ومنتظرني اجي ونطلع وصلت يمة رفعلي راسة وصفن بحلگي، گام وگف يمي وبحركة سريعة حط ايده على شفايفي صار شوية گلوس بأيده فركه بأصابعة وعقد حواجبة
جساس: انوب شني هذا الييلزگ
حچيت بهمس واحنا نمشي نريد نطلع من المطعم
هُيام: مرطب مرطب الله اكبرررر موتننييي لك شلعت شفايفي مساع تمسح وترد ليورة بيهن وهسه خليتلهن مرطب مشگن، شگد غثيثث خرب يومك
باوعلي صفح
جساس: شو گمزتي بوجهي يمچ بگرباچ اني
هُيام: اوييي من صدگ عكرت مزاجي
وصلنة للسيارة فتحها واني گعدت ورة دار وجهه يباوعلي بأستغراب
جساس: ها شو گعدتي ورة شخيرچ
هُيام: السايق مالتي انت يلا حرك
جساس: خرب انه بيج كتله وعلي اطلعلج جلد ثاني تعاي صعدي يمي خل انمضرط ونرجع
شفته راح ينجلط گمت نزلت وصعدت بالصدر
هُيام: شغلي رعد الناصري
حچة وهو يسوق بدون لا يلتفتلي
جساس: ااه اكو بنات يسمعنة؟
هُيام: احب صوته ودائمًا ارگص عليه
باوعلي متفاجأ
جساس: تعرفين ترگصين؟
هُيام: اعجبك
جساس: يا الله حللت المهر، شتعرفين ترگصين بلا؟
هُيام: كلشي، خشابة، رگص شرقي وعراقي، هچع
جساس: چا خوش من نتزوج اني ادگلچ وانتِ رگصي
هُيام: هو شمصبرني عليك غير صوتك وهاي الفكرة
جساس: يلا هم نعمة
هُيام: سد الجام راح اشغل اغنية
سد الجامات، واني ربطت جهازي وشغلت رعد الناصري واطگ اصبع وياه حتى جساس كلساع يفصل من السياقة ويطگ اصبع وياي، خلصت وغيرتها
خليني صافن بيك
يالروحي بيدك
چا هي مو بالكيف
گلبي اليريدك
مايرضون مايرضون
عمي هلك مايرضون
والعيون والعيون
فدوة اروحن للعيون
بوسة الشفة تهون
واگدر عليها
شمة الرگبة شلون
سولفلي بيها
بهذا البارت من الاغنية جساس ألتفتلي
جساس: اغانيچ أباحية
هُيام: چا هي شني الأغاني كله حبيبي وبوس وحضن ماكو غيرهن
هز راسة ورجعت شغلت يونس العبودي لحد ماوصلنة لمنتزه وگف السيارة بس مانزل، درتله وجهي باوعتلة صافن علية
هُيام: شبيك جساس؟ شو تتنفس بسرعة
حچة وهو يباوع لشفتي وعيونة ذبلانة
جساس: هُيام
بعدني مامجاوبته واتقرب مني بسرعة عبر إيده من ورة راسي وجرني اله، غمضت عيوني وحسيت بشفايفي بين شفايفة!
فتحت عيوني بصدمة وقشعر جسمي شعور حلو، وخر مني وهو يلهث واني صافنة بوجهه
ماادري شسوي اريد اضم وجهي، صحت بصوت ناصي
هُيام: والله انت فلا تستحي
باوعلي فرحان
جساس: أول قُبلة بحياتي، خرب عرضي والله خوش اشتغل
استحي اباوع بوجهه ضليت اباوع للشارع دقيقتين محد من عدنة نطق بس هو چان يشرب جگاير حچة وهو يباوع ليگدام والجگارة بحلگة
جساس: اذا نضل هنا مااضمنلج روحي السيارة مظللة واستغل الفرصة
طفرت فتحت الباب ونزلنة سوية نفتر
هُيام: اذا تعيدها بعد مااحجي وياك
جساس: ادري بيج بعدج تستحين معليج بس باوعيلي واني اقوم بالواجب كلشي لتسوين انتِ
هُيام: عزة بعينك انت صدگ ماتستحي
باوعلي صفح
جساس: على كيفچ لتموعين من الخجل
گعدنة على كرسي واني نفذ صبري
هُيام: جساس احچيلي شنو بين عوائلنا
صفن شوية انوب باوعلي
جساس: قبل لا احچي اريد احلف
باوعتلة بأستغراب
هُيام: عليمن جساس شصاير
حط إيديه ورة ظهرة
جساس: وهاي اچتافاتي للعباس ابو فاضل لا ماخذچ علمود ثار ولا اريد انتقم منچ بسبب اهلچ ولا اكرهچ على كره ابوچ لتفكرين فد يوم اريد اضرچ مستحيل اكرهچ واخو زينب احبچ حب نظيف
ابتسمت واني اشوفة يحچي وعيونة بيهن لمعة
هُيام: اعرف جساس ثاقة بيك ماتكسرني ومهما يصير ماأكرهك
ابتسم وعيونة تدور على ملامحي
جساس: احبچ وحق مُهجة فاطمة .
الگاع ماسايعتني من الفرح ضحكت دنگت راسي
من شافني مارديت شغل جگارة وبدأ يحچي
جساس: چانوا جدي ناصر وجدچ مُنير اصدقاء الروح بالروح
وصحبتهم توارثت لولدهم ابوج إحسان وعمچ سالم وعمچ حسين وعمچ كريم ، وابوي وعمي جاسم وعمي مؤتمن چانوا كلهم اصدقاء طلعاتهم ونومهم وسهراتهم كله سوة مايتفارگون
بس بيوم عمچ كريم سوة شي غير هاي الصحبة لعداوة!...
يتبع....
_________________
هلاو شلونكم اخباركم؟
شنو رأيكم بالبارت؟؟ عجبكم السرد والأحداث؟ شاركوني آرائكم، طبعًا بنات بارت البوسة اكتب بي ومغطية وجهي مستحية 😂😂