#البارت الثامن
#الايسر سلاسل الاحرار
#بقلمي كاريانا ❤️
يا هنيّ و يا شوگ روحي
و يا عزيز و يا مزار
يطفح بچفي حنينيّ
و من حَنيني إعليك أغار
عريان السيد خلف
.....
الايسر...
استغربت طلبه وفتحت الباب وهو بضحكه ماكره كال
::- ابتعدوا
اردف تميم مفاهم
تميم ::- خير يا طير شتريد تسوي؟
ضحك اسامه واردف
::- بس ابتعدوا
ما كالو لا ابتعدوا وهم يعاينوله ينتظرون شراح يسوي حط تليفونه محفظته هويته بجيبه وعدل قميصه وجر أساطير بسرعه باس خدها بقوه وانهزم يركض وخربان ضحك ازهر شال الشحاطه ويركض وراه وتميم يشيل روحه ويركعها بالكاع خوب ازهر يصيح
ازهر ::- اليوووم انعل والديك يا خسيس يا عارر تعااللل إذا ما طيحت حضك
وهو يركض يريد يخلص نفسه من ازهر
اسامه ::- هيوووو شبيك تركض ترااا مرتيي والله مرتيي!
وسامر يتدعبل بالكاع من الضحك
سامر ::- تراا صحيح مرته هاي شبيكم
صاح بيه تميم وهو يكفخ بي
تميم ::- شدهنننن ستيللل وملويات استاذذذ سامر!
وسامر دخل بنوبه ضحك وازهر حيللل معصب.
أساطير...
ضليت مفهيه ولازمه وجهي هذا شسوه المصخم يا عيبت العيبه صخام بوجهك اسامه عله هل سوايه وجماله كدام الايسر يا فضاحه يبووووو عله حضك اسامه...
سامر خربان ضحك اجه ازهر يسحل باسامه وأثر أصابع ازهر طابع بخد اسامه وخربااان ضحك وهو يستنجد بايسر
اسامه ::- أيسر ابو اسامه يبعد هلي تعال والله موتني! هيه مرتي..
عاين ازهر لايسر بنضرات غاضبه وكلها تهديد
اردف الايسر كوه لازم ضحكته
الايسر ::- تستاهل خلي يموتك چا هاي هم سوايه الله عليك...
هز راسه اسامه يتحلف لايسر
ورجع كال بهدوء ::- والله انته كاتلني كاتلني خليني ابوسها صدك بس قبل شويه علمود اغثك بس
وازهر لزمه بيس بي وهو خربان ضحك كوه جره ابويه وهو يصيح
الاجود ::- ازهرر شبيك ولك تكتل باسامه؟
ازهر يحجي بحركه
::- يابه يبوس بأساطير تقبل صاير بلا اخلاق
ابويه يعاين لاسامه صفح وهذا وجهه انعصر من الفشله...
مشه وعافهم واني متصنمه بمكاني زمخ بيه ازهر
::- هاااااي بعدج هناااا
وركض عفتهم وطبيت الطم شافتني اساور وكالت بخوف
::- شبيج ولج أساطير
وكعدت احجيلها وهي ابتسامتها تبين أكثر
غمتني وكالت
::- كبررر لفج موقف بطولي جدااا
عاينتلها صفح معاجبني وكلت ب استهزاء
::- وين البطوله بالموضوع بله....
كامت تحجي ضايجه وهي تتغطه حته تنام
اساور ::- ضحه بنفسه وباسج وانكتل مو تعتبر بطوله...
غميتها دارت وجهها ونامت واني حاطه أيدي عله وجهي وصافنه اتذكره وهو متحمس حته ينفذ مخططه الشرير اعتقد اسامه ما راح اشوفه بعد للعرس من وره سوالفه..
نمت مرتاحه ما اعرف ليش والصبح نستلم الرزايل..
اسامه..
اهوووو شبيك أيسر واذا هسه تراااا عادي!
زمخ بيه بعصبيه
::- ولكككك اسامهه اثكل شوكت اضل اعلم بيك عيبببب هاي الحركات هسه يرجع عليها ازهر ياكل كلبها امداك...
رجعت غميته بدون ما ينتبه صاح
::- هيبي الخزيه المايع تراااا شفتك
ضحكت من كل كلبي عله أيسر معصب اعرف الي سويته غلط بس اهمم شي جان اعصب ازهر وهو غيرته مصيبه ف بهاي الطريقه بس اضوجه..
وبعون الله كلما اروح ما يخليني المح ظلها لحد يوم العرس..
أساطير..
اليوم الحنه مالتي وكلش خايفه ومتوتره ما اعرف ليش وكلبي ممرتاح احس اكو شي بس استغفرت ربي وكمت وراحت ويايه اساور وسماهر وحوراء لاحد افضل مراكز بغداد كلشي بتخطيط اسامه وطبعا تنفيذ الايسر لان اسامه كلشي ميدبر مصيبه
حسيت بهلع وخوف فضيع حضنتني اساور تحاول تهديني استغفرت من حالتي شخبلني ما اعرف بس احس اكو شي راح يصير ودائما احساسي يكون صحيح بس االله يستر وان شاء الله هل مره يكون غلط انتبهت عله اساور وهي تكلي
اساور ::- امشينه أساطير عمه سماهر وحوراء بالباب ديلا يوصلنه ياسر دكومي....!
بسرعه كمت وبدلت ونزلنه سلمت واتجهنه للمركز مو بعيد عنه
وصلنه وبدوا بالمجاملات وكلمن حايره بشغلها وحده تسوي شعري وحده ع كولات تميم تلبخ بوجهي ويضحكون واني بغير عالم فاصله عنهم وعيت عله حوراء كامت ترد على مكالمه
حوراء ::- ااي والله ايي بس روح اييي يمعود اسامه شجاك صار صار بس روح يمعود جاووَ
تحجي معصبه اردفت سماهر بقلق
سماهر ::- حور يمه شبي اخيج؟
اتنهدت حوراء وكالت بتعب
::- خبصنه عبالك اول واحد يتزوج، يكول ممنوع منعا باتا تخلي عدسات اني اريده تبقه بلون عيونها السرمديه.....
وسط كل المشاعر الملخبطه عندي ضحكت بخجل
كالت البنيه الواكفه ::- اي عيني هذا الحب لو مخابر من زمان علمود تضحكين..
ابتسمت مجامله بس اني مطايقتها مدري ليش....
اساور....
اشوف أساطير مو عله بعضها ادري بيها تضل تفكر واعرف انها حاسه بشي بس متكدر تحجي شنو هل شي ما اعرف...
لدرجه احسها ضايجه وعله اي لحظه تنفجر..
وعمه سماهر فرحانه ساعه تهلهل ساعه تصفك ساعه تهوس عبالك صدك ولدها
سماهر :يمههه هنيال ولدي عليجن وحده لاسامه المرعوص والثانيه لمسلم الفاكس
لطمت حوراء وكالت
::- يبووووو ولج عمه فضحتي ولدنه تطشر العرض يبوووو يضيمي
ضحكت كتلها
::- لا خيه كلشي ولا العرض يتطشر، بعدين عاتيي عاتيي اول وتالي نعرف...
موتنه ضحك اما أساطير بعدها عله نفس الملامح....
كملوها ولبست بدلتها رصاصيه نفشتها مو كلش وذابه روحها ما قبلت تخلي هواي مكياج ولا رادت تاج غير مثل السعفات صايره عله جوانب تسريحتها وكلش بسيطه ولا عبالك عروس....
ملامحها ما عجبتني بس شسويلها من تخلي شغله ببالها بعد هاهيه..
طلعنه لكينه اسامه وياسر مشغلين اغاني بالسياره وفاتحين الباب وذابين لحم بنص الشارع والناس تجي وتروح تركص وياهم...
ضحكنه وصعدنه وصلنه للبيت كلها متجمعه أساطير كوه عليها مبتسمه ادري بالها مو ويانه
همست باذنه
::- اساطيررر انسي إذا مو النفسج خطيه اسامه لا تخربين فرحته...
هزت راسها واردفت بخوف
::- اساوور فدوه كلبي لاسبني مدري ليش خايفه
حاولت أهديها وطب اسامتها بكامل اناقته
اسامه..
كلني فرح طاير طيران طبيت حته احنيها بدون ستره جنت شامره عله جتفي وباقي باليلك لابس قاط رصاصي ومتوالمات ويه عيوني المحيره ادري بيها خايفه من نظراتها عاينت لشعري وضحكت
رحت كعدت يمه وكلت بهدوء
::- شلون الحلوه اسطوره؟
ابتسمت مجامله وكالت كوه لازمه نفسها ما تضحك
أساطير ::- أيسر شلون خلاك تطلع بتسريحه شعرك هاي؟
ابتسمت عله اطراءها
::- كوه فلتت منه والله... الايسر لازم إذا طلعت شعرايه وحده يرجع يمشط من جده وجديد يبوووو....
ضحكت بهدوء اخذت ايدها حطيت بيها حنه وهمست يم اذنها
::- ان شاء الله ما نفترق ابدا يا روح روحه لاسامه احبج اساطيري
ابتسمت واردفت
::- اموت عليك اسامتي نظر عيني وعيني..
شويه وكمت طلعت وخلصت الحفله واتجهنا لبيتنا ببغداد وارتاحينه واكيد ثاني يوم هو العرس
من رجعت ما شفتها....
أساطير.......
كلما يتقدم الوقت احس انو صدك راح يصير شي ثاني يوم رحت وياهم وجهزوني من وكت.. علمود الزفه من وقت لان يردون يرجعون للسماوه... شافني بس هل مره أيسر الي مسوي شعره طالع حلو ويضحك بنفس الوقت..
حسيت روحي دتنسحب مني من طبوا اخواني عيونهم دممم حضني سامر قبل الكل وخله المحبس بيدي ومبين باجي لان عيونه مورمه وكال
سامر ::- يروحي اسطورتي زواج الدهر ان شاء الله تشوفين الخير بعد اخوج الذريه الصالحه يارب... وبس يحاجيج عد عيناج اختي سيف ودركه تلكينه..
حضنته ودموعي تتسابق تبعه تميم الي ديلبسني الاسوار بيدي اليمنه عليه علامه تخدير.. ويحاول يبتسم
تميم ::- حبيبه اخوها المشاكسه صارت مره وهسه لازم اسلمها لزوجها احبج ييا نظر عيني يا ماي عيني انتي اموت عليج اسطورتي اخوتج بظهرج يمته ما مال بيج الزمن...
شددت عله حضنه وكلت بصوت مبحوح
::- حبيبي الله يخليكم اليه يروحي
تلاهم ازهر الي شفته ترجف عبالك عنده ميت وهو يسحب تراجيي من اذاني ويلبسني غيرهم..
ازهر ::- بنيتي الوكحه اسطوره شايفه الخير وزواج الدهر ان شاء الله الموفقيه والله يحفظكم لبعض... اسطوره لا تخلين احد يعيب تربيتي اسطورتي...
حضنته كوه يحجي وكلت ::- يبعد اسطورتك وروحها
سحبني ابويه يختمها وخله كلاده برقبتي وكال
الأجود ::- اسطورتي بنيتي اني صحيح ما صار عندي أطفال ولكن رب العالمين عوضني بيكم لا تخلين احد يحجي عله الأجود ودلاله وتربيته خليج مثل ما انتي رفعه راس اليه مو يبويه واذا الهوئ نفسه يغثج اكطعه بنيتي كلشي ولا تنغث...
حضنته اشهك وهو يسكت بيه...
نزع غترته وخلاها بيدي وكال بحنيه
::- يمته ما ضاكت بيج الدنيا واني بعيد هاي يمج مثل ما اني يمج...
لفيتها عله رقبتي.. وصار وكت ابويه يسلمني لزوجي..
حط أيدي بايد اسامه وكال
الأجود ::- موفقين ان شاء الله وليداتي الله يحفظكم ويبارك فيكم ان شاء الله زواج الدهر متنهنين ان شاء الله... اسامه هاي بنيتي وروحي ومدللتي ويلك إذا زعلتها...
ابتسم اسامه وهز راسه بايجاب فاجأءنا ازهر من حط ايده فوك ايد ابويه وكال
ازهر ::- اسامه انطيناك شمعه بيتنا اسطورتنه الحلوه والله اذا يوم غثيتها بحجايه انسه حته الخوه...
بعده اسامه ما لحك يتنفس اردف تميم وهو حاط ايده فوك ايد ازهر
تميم ::- اسامه انطيناك جزء من ارواحنه دير بالك عليها ولا عبالك نسكتلك والله امحيك من وجه الأرض إذا ضوجتها
اردف سامر بنفس الطريقه وايده والله فوك ايد تميم
سامر ::- ما راح اهدد لا والله اختي تحطها بعيونك تستاهل اسطورتنه ورده البيت واختنه..
صاح اسامه بشقه وهمه داير مدايري
اسامه ::- يابه خلوا بنتكم يمكم التهديد قبل كلشي ضحكوا حيل ودعتهم وابويه يسوي
الأجود ::- جبنالجن نفس الشي علمود ما تشتغل الغيره بينجن
ضحكنه واساور حضنتني حيلل دموعه تتسابق كوه سكتتها وطلعنه اسامه الفرح مبين بعيونه والايسر هو يسوق وكلسع شاخط السياره وعمتهم ويانه واني وياي اساور وخالتي وصلنه للبيت وطبينه شويه وظلمت الدنيا ام أيسر كاعده ووجهها نوعا ما ثكيل بس ولا أعطيتها اهميه كفوا كلشي وخالتي واساور رجعن والبيت فرغ...
شويه وحسيت بصوتهم الشباب قريب ما صعدوا للدرج وراحو وهو اجه مبتسم مدري ليش خفت ولا عبالك اسامه هادئ حيييييل ولا عرفته..
فتح الباب سلم وعيونه تشع فرح حضني بهدوء وضل ساكت ولا اني حجيت...
باس راسي وكال بنبره هادئه
::- واخيرا اسطورتي اليه يابعد هلي الماكو...
حسيت كلامه مثل سجاجين بكلبي عرفته مزعوج من اهله كمنه علمود نصلي صار وقتها حط تربه كدامه وبلش يصلي واني ورا بدون تربه..
وره ما خلص مدري شدعا وباس التربه وشال المصلايات وكال بضحك
اسامه ::- امشي ندور اكل جوعاننن حيللل
ابتسمت وخليت أيدي بيده وتوجهنا للمطبخ كال بحيره
اسامه ::- هسه اريد مخلمه وماكو بيض شنو هايي..
صفنت ويا شويه وكال
اسامه ::- تعالي يم الباب هسه اروح اجيب واجي هذا السوبر ماركت بصف مختبر الايسر بس الايسر يتأخر واني ميت جوع ابتسمت وطلعت ويا واني بجادر الصلاه..
بس صار الي خفت منه وما توقعته بهل شكل صوت الطلقات اخترق قلبي قبل مسامعي من الخوف...
يتبع....
لا تنسون متابعه الحساب والتصويت فضلا
بقلم كاريانا
مشاهده ممتعه