Chapter 178
ရှောင်ရှုနှင့် ပတ်သက်လာပါလျှင် ကျိမြန်၏ စိတ်ပါဝင်စားမှုသည် များစွာ တိုးများလာသည့်အတွက် ချက်ခြင်း ကွန်ပျူတာကိုဖွင့်ကာ "နဂါးနှစ်ကောင်ရဲ့ ရာဇဝင်" ၏ ပထမပိုင်းနှစ်ပိုင်းကို ကြည့်လိုက်သည်။
ပထမပိုင်းနှစ်ပိုင်းမှာ လွန်စွာ စိတ်လှုပ်ရှားဖွယ် ကောင်းလှသည်။ လီယွမ်ဟောက်သည် သူ့မိခင်ကို သတ်သွားသူမှာ ဇာတ်လိုက်မ၏ ဖခင်ဖြစ်ကြောင်း မတော်တဆ သိလိုက်ရသည့်အတွက် အမှောင်ဖုံးသွားသည့်အခန်း ဖြစ်ပေသည်။ ဇာတ်လိုက်မမှာမူ ထိုအကြောင်း မသိသေး၊ မနီးမဝေးရှိ ပေါင်းကူးတံတားပေါ် ရပ်လျက် သူ့ကို တောက်ပစွာ ပြုံးပြနေဆဲဖြစ်သည်။
မူရင်းဝတ္ထု၏ လီယွမ်ဟောက်သည် အကောင်းအဆိုး နှစ်မျိုးရောယှက်နေသည့် ဇာတ်ကောင် ဖြစ်ပေသည်။ မြင့်မြတ်သည့် မိသားစုတွင်ပင် အဆင့်အတန်း မြင့်မားလှသည့် ဂုဏ်ပုဒ်တစ်ခုကို ပိုင်ဆိုင်ထားသူဖြစ်ကာ နာမည်ကြီး စာသင်သားတစ်ဦးနှင့်ပင် အလားသဏ္ဍာန် တူလှသေးသည်။ သိူ့သော် ရှောင်ကျားရှု၏ နေရာတွင် အစားထိုးလိုက်သည့် သရုပ်ဆောင်မှာ မိန်းမဆန်လွန်းလှ၏။ ရုပ်ရည်သွင်ပြင်မှာ ကြည့်ကောင်းသော်လည်း အမှောင်ဖုံးသည့် အပိုင်းတွင် မျက်စောင်းထိုး၍ အံကြိတ်လိုက်သည်မှာ စိတ်ဆိုးနေသည့် မိန်းမငယ်လေးတစ်ဦး အလားပင်။ မိစ္ဆာအငွေ့အသက်တို့ကို လုံးဝ မခံစားရ။
ချင်းယွင်ကျစ်ရှန့်၏ ပရိသတ်အများစုမှာ စတီးလို သံမဏိလို ဖြောင့်တန်းကြသည့် အဖြောင့်ကောင်များ ဖြစ်ကြရာ ထိုသရုပ်ဆောင်ချက်ကို လက်မခံနိုင်၊ မှတ်ချက်ကဏ္ဍတစ်ခုလုံးကို ဒေါသတကြီး သောင်းကျန်းလိုက်ကြတော့သည်။
[ဖာ့ခ် ဒါက ချင်းယွင်ကျမ်းဂန်ထဲက နတ်ဘုရားတွေကိုတောင် သတ်ခဲ့တယ်ဆိုတဲ့ လီယွမ်ဟောက်လား လီကွေ့ရီနဲ့ ဇာတ်လိုက်မကို အနိုင်တိုက်ခဲ့တဲ့ မိစ္ဆာလောကရဲ့ ပြိုင်စံကျော် ၊ ဒုတိယပိုင်းမှာ ဂြိုဟ်သားဘုရင်ကို အနိုင်ကျင့်ခဲ့တဲ့သူတဲ့လား ငါ့ရဲ့ ကို့ယို့ကားယား မျက်လုံးတွေကို မေ့လိုက်တော့ တကယ်ကို မကြည့်နိုင်တော့ဘူး]
[ဇာတ်လိုက်မကို ကြည့်နေတာ ရပ်လိုက်တော့ မင်းက ယုန်တစ်ကောင် မဟုတ်ဘူးကွ မုန်းတီးတာကို ဖော်ပြတဲ့ နည်းလမ်းတွေ အများကြီး ရှိပါတယ် မင်းက ဘာလို့ စိုက်ကြည့်ရုံပဲ ကြည့်နေရတာလဲ ]
[လီယွမ်ဟောက်ကို သရုပ်ဆောင်မယ့်သူက ရှောင်ကျားရှုကနေ ဖန်ကျစ်ချန်း ပြောင်းသွားပြီလို့ ကြားလိုက်ရကတည်းကတော့ ဒါမျိုး ဖြစ်လာမယ်မှန်း သိပြီးသားပါ တကယ်တမ်းတော့ ငါလည်း အစက ရှောင်ကျားရှုကို သိပ်အထင်မကြီးဘူး ရိုင်းစိုင်းကောက်ကျစ်တဲ့ လီယွမ်ဟောက်ကို ကောင်းကောင်း သရုပ်ဖော်နိုင်ပ့ါမလားလို့ စိုးရိမ်ခဲ့တာ ဒါပေမယ့် 001 ကိုလည်း တွေ့ပြီးရော သူသာ စိတ်ရိုင်းဝင်လာရင် ဂြိုဟ်တစ်ခုကို ကန်ထုတ်ပစ်လို့ ရနိုင်တယ်လို့ကို ယုံကြည်မိလာရော သူ့သရုပ်ဆောင်စွမ်းရည်တွေက ဖန်ကျစ်ချန်းထက် အပုံကြီး သာတဲ့ဟာ ဘာလို့ သူ့ကိုပဲ သရုပ်မဆောင်ခိုင်းတာလဲ]
[ပြောတာတော့ သူက ဇာတ်ညွှန်းကို ပြောင်းချင်တာ ဒါရိုက်တာက သဘောမတူလို့တဲ့ ]
[ထားလိုက်ပါတော့ မူရင်းလက်ရာကို မလေးစားရင် ဘယ်လောက်ပဲ သရုပ်ဆောင်ကောင်းကောင်း လက်မခံနိုင်ဘူး]
ထိုအကြောင်းအရာမှာ ချက်ခြင်းပင် ဖိနှိပ်ခံလိုက်ရတော့သည်။ တစ်ချို့က တအံ့တဩ ဆိုလာကြပြန်၏။
[ သူငယ်ချင်းတို့ရေ ငါ့ကို ကူကြည့်ပေးကြပါဦး ဇာတ်လိုက်မရဲ့ လည်ပင်းက အရမ်း ရှည်လွန်းပြီး ရှေ့ကို ကိုင်းကျနေသလိုပဲနော် ပြီးတော့ ခေါင်းနဲ့လည်း အဆက်အသွယ်ပြတ်နေသလိုပဲ ဆံပင်နားက အရိပ်တွေက ဘာတွေလဲ တည်းဖြတ်တာကို ရှင်းရှင်းလင်းလင်း မလုပ်လို့လား ]
[Edit ကြီးဟေ့ လုံးဝကို edit ကြီး ဇာတ်လိုက်မ ထွက်လာကတည်းက ခေါင်းကြီးတင် မျောနေပြီး နောက်ခံတွေ ဝါးနေမှန်း သတိထားမိသားပဲ ဒါကသာ သရဲကားဆိုရင်တော့ ရှယ်ပဲနော် သူမနဲ့ လီယွမ်ဟောက်တို့ အပြန်အလှန် ကြည့်နေတဲ့အပိုင်းကို ကြည့်ကြည့်လိုက် မျက်လုံးဆုံချက်တွေက မတူကြဘူး မင်းက မင်းဘာသာပြော ငါလည်း ငါ့ဘာသာ ပြောမယ် ဇာတ်လမ်းတစ်ပုဒ်ကို အဆင်သင့် သရုပ်ဆောင်ကြတာပေါ့ ငါ သူမရဲ့ ခေါင်းကိုပဲ လိုက်ကြည့်မိနေလို့ ဇာတ်လမ်းကို အာရုံစိုက်လို့ မရတော့ဘူး]
[တကယ်ကို ကာရိုက်တာနဲ့ လုံးဝကြီး ကွဲထွက်နေတာပဲ ဒီဇာတ်လမ်းကို ကြည့်ရတဲ့ ခံစားချက်ကြီးက ဆိုးဝါးလိုက်တာကို]
ဇာတ်လိုက်မနှင့် လီယွမ်ဟောက်တို့ကို ကဲ့ရဲ့ပြစ်တင်ပြီးနောက် ချိုးတု သရုပ်ဆောင်ထားသည့် လီကွေ့ရီ ဇာတ်ကောင် ထွက်ပေါ်လာတော့၏။ သူသည် တောနက်တစ်နေရာတွင် စိတ်ဝိဉာဉ်သားရဲတစ်ကောင်နှင့် တိုက်ခိုက်နေခြင်းဖြစ်ကာ မလုံလောက်သည့် ဘဏ္ဍာငွေကြောင့် အထူးပြုလုပ်ချက်များမှာ လွန်စွာ ဆိုးဝါးလှပေသည်။ လွန်ခဲ့သည့် ဆယ်စုနှစ်ပေါင်းများစွာက ထွက်ရှိထားသည့် "အနောက်အရပ်သို့ ခရီးသွားမှတ်တမ်း" သည်ပင်လျှင် ယခုထက်ပိုကာ သဘာဝကျလှသေးသည်။ သို့သော် အမြင်အာရုံ ချို့တဲ့နေသည့် စိတ်ဝိဉာဉ်သားရဲက စခရင်ပေါ်တွင် ဘယ်ညာခုန်ပေါက်ကာ နုံချာလှစွာ ဟန်ရေးပြနေဆဲဖြစ်သည်။
[လုံးဝကို ဆက်မကြည့်နိုင်တော့ဘူးဟေ့ ဒီအစုတ်အပြတ်တွေကတော့ ငါ့စိတ်ထဲက "နဂါးနှစ်ကောင်ရဲ့ ရာဇဝင်" ကို ရစရာ မရှ်ိလောက်အောင်ကို ဖျက်ဆီးပစ်တာပဲ]
ပထမနှစ်ပိုင်းကို စိတ်ရှည်ရှည်ထား စောင့်ကြည့်ခဲ့သည့် ပရိသတ်အားလုံး ကျိန်ဆဲလိုက်ကြတော့သည်။ သိူ့သော် မူရင်းဝတ္ထုကို ချစ်မြတ်နိုးစိတ်ကြောင့် အနည်းငယ် တိုးတက်လာလေမလားဟု မျှေယ်တလင့်လင့်ဖြင့် စောင့်စားနေကြဆဲ ဖြစ်ပေသည်။ ကျိမြန်က ဝဘ်ဆိုဒ်စာမျက်နှာကိုပိတ်ကာ ခပ်ပေ့ါပေါ့ ပြောလိုက်သည်။
"အန်ကယ်ရှို့ အခု မလှုပ်ရှားနဲ့ဦး အပိုင်းတွေ ရုပ်သံလွှင့်မယ့် အချိန်အထိ စောင့်ဦး]
Review site ကို ကြည့်လိုက်သည့်အခါ ဤရုပ်ရှင်၏ အဆင့်သတ်မှတ်ချက်မှာ 3.1 ဖြစ်ကြောင်း တွေ့လိုက်ရသည်။ မည်သည့်အရာတို့ ဆက်ဖြစ်လာမည်ကိုမူ သူလည်း မခန့်မှန်းတတ်သေးချေ။
ည ၁၁ နာရီခွဲသည့်အခါ ကျိမြန်က အချိန်ကျပြီဟု ခံစားရ၍ မတ်တပ်ထရပ်လိုက်သည်။ ရှို့ချန်ယုက သက်ပြင်းချလိုက်၏။
"ငါ့အတွက် သတိထားပေး မြောင်မြောင် မသိစေနဲ့ မဟုတ်ရင် နှစ်ယောက်လုံး သေလိမ့်မယ် ..."
"နောက်ကျနေပြီ အန်တီရွှယ်လည်း အိပ်လောက်ပါပြီ ..."
ကျိမြန်က ဖိနပ်ငုံ့စီးလိုက်သည်။
"သူမက ပုံမှန်ဆို ၁၀ နာရီခွဲရင် အိပ်ပေမယ့် ဒီနေ့က မတူဘူးလေ အခုထိ ဒေါသထွက်ချင် ထွက်နေမှာ ငါ သူမကို စာအရင်ပို့ကြည့်လိုက်ဦးမယ် ..."
ရှို့ချန်ယုက ဖုန်းကို ထုတ်ကာ ပြောလိုက်သည်။
သူမရှိရာ တိုက်ခန်းဆီသို့ လာရာလမ်းပေါ် ရောက်သည်အထိ စာပြန်မလာ၊ သူနှင့် စကားမပြောချင်၍လား၊ အိပ်ပျော်နေ၍လားတော့ မခန့်မှန်းတတ်ချေ။ ပြန်စာတစ်စောင်မှ မရသည့် ရှို့ချန်ယုမှာ တစ်ဖြည်းဖြည်း ဝမ်းနည်းလာကာ ဖုန်းကိုသာ အကြာကြီး စိုက်ကြည့်နေလိုက်ကြတော့သည်။
စောင့်ဆိုင်းရခြင်းသည် ကမ္ဘာ့ အခက်ခဲဆုံး လုပ်ရပ်တစ်ခုပင် ဖြစ်ပေသည်။ လိုချင်သည့် ရလဒ် ရသည်အထိ စောင့်ဆိုင်းနိုင်မည်လား မသိသလို တစ်ဘဝလုံး စောင့်သည့်တိုင် လိုချင်သည့် ရလဒ်ကို ပိုင်ဆိုင်နိုင်လေမည်လားလည်း မသိနိုင်။ စောင့်ဆိုင်းခြင်းသည်လည်း ဝမ်းနည်းဖွယ် ဖြစ်ရပ်တစ်ခုပင် ဖြစ်ပေသည်။
ကျိမြန်က သူ့ကို နှစ်သိမ့်ပေးလိုက်သည်။
"အန်ကယ်ရှို့ စိတ်အားထက်သန်သရွေ့ အောင်မြင်တယ်တဲ့ တစ်နေ့နေ့ တစ်ချိန်ချိန်ကျ အန်ကယ့်ရဲ့ ပန်းတိုင်ကို ရောက်မှာပါ ..."
ရှို့ချန်ယုက ခေါင်းကိုယမ်းကာ ခါးသီးစွာ ပြုံးလိုက်သည်။
"တစ်ချို့အရာတွေက ကံကြမ္မာနဲ့ဆိုင်တာ ဇွဲကောင်းတာနဲ့ မဆိုင်ဘူး ဇွဲကောင်းလို့သာ အောင်မြင်ကြကြေးဆို ရှောင်ချီကျဲက အခွင့်အရေးတောင် ရလိုက်မှာ မဟုတ်ဘူး ထားပါ မင်းကရော မြောင်မြောင်ကို ဘယ်လို နားချဖို့ တွေးထားလဲ သူမကို ရုပ်ရှင်ရိုက်ခွင့် ပေးလိုက်ရုံနဲ့တင် သူမရဲ့ နှလုံးသားကို လှုပ်ခတ်စေနိုင်မယ် ထင်လား ဒီလို တွေးနေတာဆိုရင်တော့ နည်းလမ်းပြောင်းလိုက်ဖို့ပဲ အကြံပေးချင်တယ် အလုပ်ဖြစ်မှာ မဟုတ်ဘူး မြောင်မြောင့်ရဲ့ နှလုံးသားက ကျောက်နဲ့လုပ်ထားတာ ဆုံးဖြတ်ပြီးသွားရင် နွားဆယ်ကောင် ဆွဲလို့ကို ပြန်မရုန်းဘူး မင်းက သူမအပေါ် ပျော့ပျောင်းနေရင်တောင် သူမက မာကျောနေပြီး မင်းက ခက်ထန်ရင် သူမဘက်ကလည်း ခက်ထန်နေမှာပဲ ငါ ငယ်ငယ်က သူမကို ဘယ်လို ခေါ်ခဲ့လဲ သိလား ..."
"Female overload မဟုတ်လား ကျွန်တော့်ကို တစ်ခါ ပြောဖူးသေးတယ်လေ ..."
(Female overload က နားလည်သလို ရှင်းပြရရင် အခုခေတ်အခေါ် ထက်မြက်တဲ့မိန်းမဆိုတဲ့ ပုံစံမျိုးပါ)
ကျိမြန်က ကားစတီယာတိုင်ကို ခပ်ဖွဖွတောက်ရင်း ပြောလိုက်သည်။
"ဟုတ်တယ် သူမက ဘေးပတ်ဝန်းကျင် အကုန်လုံးကို ဘော့စ်တစ်ယောက်လိုကို လွှမ်းမိုးနိုင်တဲ့ မိန်းမမျိုးပဲ အဲဒီ့အချိန်တုန်းက ငါ သူမကို ပြောခဲ့ဖူးသေးတယ် မြောင်မြောင် အနာဂတ်မှာ မင်းသာ အိမ်ထောင်ကျရင် မင်းယောကျာ်းနဲ့ သားကတော့ အတော်လေးကို အနေရကြပ်တော့မှာပဲလို့ သူမက ရှောင်ချီကျဲအတွက်နဲ့ နှစ်နှစ်ဆယ်ကျော် မာန်ကိုထိန်းပြီး ဇနီးကောင်း မိခင်ကောင်း ဖြစ်ပေခဲ့ပေမယ့် ကျန်တဲ့သူအပေါ် အထူးသဖြင့် သူမရဲ့ သားအရင်းအပေါ်ကအစ စိတ်ကို နည်းနည်းလေးမှ ပြောင်းမပေးနိုင်ခဲ့ဘူး သူမ တစ်ဘဝလုံးနဲ့ရင်းပြီး ချစ်ခဲ့ အခုထိလည်း ချစ်ဆဲဆိုတဲ့သူက ရှောင်ချီကျဲတစ်ယောက်ပဲ ရှိတယ် ..."
ရှို့ချန်ယုမှာ ပြောရင်းပင် ပို၍ မသက်မသာ ဖြစ်လာတော့သည်။ အိတ်ကပ်ထဲရှိ ခရီးဆောင် အရက်ပုလင်းကို ထုတ်ကာ သောက်လိုက်ပြန်တော့သည်။
ငယ်ရွယ်စဉ်က အရာအားလုံးကို စွဲလမ်းခဲ့သော်လည်း အရက်နှင့် ပတ်သက်၍တော့ မစွဲလမ်းခဲ့။ ကြီးပြင်းလာသည့်အခါ အားလုံးကို ဖြတ်တောက်နိုင်သော်ငြား တစ်ဖြည်းဖြည်း အရက်ကို စွဲလမ်းလာတော့သည်။
လူတွေက ဘဝမှာ ရှင်သန်ရင်း တစ်ယောက်ယောက် ဒါမှမဟုတ် တစ်ခုခုကိုတော့ စွဲလမ်းမှ ဖြစ်မှာပေါ့ မဟုတ်ရင် အသက်ရှင်ရတာ ဘယ်လိုလုပ် အဓိပ္ပါယ်ရှိတော့မလဲ...
"သူမက ရှောင်ရှုကို ချစ်ပါတယ် မှန်ကန်တဲ့ နည်းလမ်းမျိုး မသုံးလို့သာ ..."
ကျိမြန်က ခပ်ဖြည်းဖြည်း ပြောလိုက်သည်။
"ကျွန်တော် မလှုပ်ရှားဘူး ရှောင်ရှုကိုပဲ ကျွန်တော်တို့ အနာဂတ်အတွက် တိုက်ခိုက်ခိုင်းမှာ သူမဘာသာသူမ သဘောပေါက်လာလိမ့်မယ်လေ ..."
ရှို့ချန်ယုက လှောင်ရယ်လိုက်၏။
"မြောင်မြောင်က သူ့ဘာသာသူ သဘောပေါက်လာလိမ့်မယ် ဟုတ်လား မင်းကတော့ နေ့ခင်းကြောင်တောင်ကြီး အိပ်မက်မက်နေတာပဲ ..."
"သူမသာ ရှောင်ရှုကို ချစ်ရင် အလိုလို သဘောပေါက်လာပါလိမ့်မယ် စောင့်သာ စောင့်ကြည့်နေလိုက်ပါ ..."
ကျိမြန်က ကားကို အရှိန်လျော့ကာ ပြောလိုက်သည်။
"သောက်တာရပ်ပြီး အန်ကယ့်ရဲ့ အိမ်ယာဝင်း ဝင်ခွင့်ကတ်ကို ထုတ်ထားဦး ..."
ဒီကတ်ကြောင့်သာ မဟုတ်ရင် ရှို့ချန်ယုကို အချိန်အကြာကြီး အဖော်ပြုပြီး သောက်ပေးနေမှာကို မဟုတ်ဘူး ရှောင်ရှုက အောက်ထပ်ကို ကြည့်ရင်း မျှော်နေလောက်ပြီ ...
ရှို့ချန်ယုက ကတ်ကိုထုတ်ကာ လုံခြုံရေးကို ပြလိုက်သည်။ မကြာခဏ ဝင်ထွက်သွားလာနေသည့် သူ့ကို လုံခြုံရေးက မျက်မှန်းတန်းမိနေပြီဖြစ်၍ ဂိတ်ကို ချက်ခြင်း ဖွင့်ပေးလိုက်တော့သည်။
ညသန်းခေါင်အချိန်ဖြစ်၍ အိမ်ယာဝင်းတစ်ခုလုံး တိတ်ဆိတ်နေ၏။ တောင်၏ တစ်ဖက်တစ်ချက်စီရှိ လမ်းမီးတိုင်အချို့သာ မှိတ်တုတ်မှိတ်တုတ်ဖြစ်နေရာ လွန်စွာ အထီးကျန်ဆန်ဖွယ်ပင်။ ရှို့ချန်ယုက သူ့ကို ဆက်တိုက် လမ်းညွှန်ပေးနေပြီး ရှေ့တည့်တည့်ရှိ အဆောက်အဦးကို ညွှန်ပြကာ ပြောလိုက်သည်။
"ဟေး ဒီတိုက်ရဲ့ အနောက်ဘက် ခုနစ်လွှာက မြောင်မြောင့်အိမ်ပဲ အပြင်ဘက်ဆုံးက ဝရန်တာကို တွေ့လား အဲဒါ ရှောင်ကျားရှုရဲ့အခန်း မီးလင်းနေတုန်းဆိုတော့ မအိပ်သေးဘူးထင်တယ် ..."
အသုံးဝင်နေ၍သာ မဟုတ်ပါလျှင် ကျိမြန်သည် သူ့ကို အစောကြီးကတည်းကပင် ကန်ချခဲ့မည် ဖြစ်ပေသည်။
သူ့ဘဝကလည်း ဒုက္ခတစ်မျိုးပဲနော် ဘယ်လိုလူတွေနဲ့ လာဆုံနေရမှန်းကို မသိဘူး နောက်ဘုန်းကြီး နှစ်ချက်ခေါက်တွေ ...
ကျိမြန်က ဂရုတစိုက် လေ့လာကာ တည်နေရာကို အတည်ပြုပြီးနောက် drone ကို လွှတ်တင်လိုက်သည်။
"မြန်မြန်လုပ် အိမ်ယာဝင်းထဲမှာ drone လွှတ်တာက အန္တရာယ်များတယ်ကွ ကင်းလှည့်တဲ့ လုံခြုံရေးတွေ မြင်ရင် သိမ်းသွားလိမ့်မယ် ..."
ရှို့ချန်ယုက မိုးပေါ် မော့ကြည့်ကာ ပြောလိုက်သည်။
ကျိမြန်က သူ့ကို လျစ်လျူရှုထားပြီး ဝရန်တာပေါ်အထိ ရောက်အောင် ထိန်းချုပ်ကာ အချက်ပြမီးကို ဖွင့်လိုက်သည်။
အကျယ်ချုပ် ချထားခံရသည့် ရှောင်ကျားရှုက အိပ်ယာပေါ်တွင် သုန်မှုန်စွာ ထိုင်နေစဉ် ပြတင်းပေါက်အပြင်ဘက်မှ မီးရောင်အချို့ကို တွေ့လိုက်ရသည့်အတွက် အမြန်ထကြည့်လိုက်၏။ မတ်တပ်ရပ်နေရင်း တန်းလန်းမှာပင် ဤကဲ့သို့ တွေးမိလိုက်သေးသည်။
ဒါ ကျိကောပဲ ဖြစ်ရမယ် ကျိကောက သူ့ကို ဘယ်တော့မှ တစ်ယောက်တည်း ပစ်ထားမှာ မဟုတ်ဘူး ...
ပြတင်းပေါက်ကိုဖွင့်ကာ ငုံ့ကြည့်လိုက်သည့်အခါ သူ့အတွေးအတိုင်း တစ်ထပ်တည်းပင် သူ့ကို လက်ယပ်ခေါ်နေသည့် ကျိကောအား တွေ့လိုက်ရ၏။ အကွာအဝေးမှာ လှမ်းလွန်းလှသည့်အပြင် အလင်းရောင်လည်း ကောင်းစွာ မရှိသည့်တိုင် သူ၏ နူးညံ့လှသည့် အပြုံးကို ခံစားမိနေပေသည်။
ကျိမြန်က သူ့ကို နောက်ဆုတ်ရန် အမူအယာ ပြလိုက်သည့်အခါ ပြတင်းပေါက်ကို အပြည့်အဝ ဖွင့်ပြီး သေတ္တာတစ်လုံး သယ်ထားသည့် drone ကို ဝင်ခွင့်ပေးလိုက်သည်။ ဖွင့်ကြည့်လိုက်သည့်အခါ ဖုန်းအသစ်တစ်လုံးနှင့် ချောကလက်တစ်ထုပ်ကို တွေ့လိုက်ရ၏။
ရတနာများ ရလာသည်နှင့် တစ်ပြိုင်နက် ရှောင်ကျားရှုက ချက်ခြင်းပင် ဖုန်းထဲရှိ တစ်ခုတည်းသော ဆက်သွယ်ရန် ဖုန်းနံပါတ်ကို video call ခေါ်လိုက်တော့၏။
"ရှောင်ရှု အဆင်ပြေရဲ့လား ..."
ကျိမြန်၏ ညင်သာသည့်အသံ ထွက်ပေါ်လာသည်။
"ဟင့်အင်း ..."
ရှောင်ကျားရှုက ဆောင့်ကြီးအောင့်ကြီး ပြန်ဖြေရင်း မျက်တောင်ပုတ်ခတ်ပုတ်ခတ် လုပ်လိုက်သည့်အခါ မျက်ရည်စီးကြောင်းနှစ်ခု စီးကျလာတော့၏။ အင်္ကျီအနားစကို ပင့်မကာ အရှက်သည်းစွာဖြင့် မျက်ရည်သုတ်လိုက်သည့်ပုံမှာ လွန်စွာ သနားဖွယ်ပင် ကောင်းနေတော့သည်။
ကျိမြန်က ကားတံခါးကိုမှီကာ သက်ပြင်းချလိုက်၏။
"မငိုပါနဲ့ မင်းငိုရင် ကိုယ်လည်း နာကျင်ရလို့ ..."
ရှောင်ကျားရှုက မျက်ရည်တို့ကို သုတ်ကာ နှာတရှုံ့ရှုံ့ဖြင့် ကင်မရာကို ပြန်ကြည့်လိုက်သည်။
"ကျွန်တော် မငိုတော့ဘူး ကျိကော ကျွန်တော်တို့ ဘယ်လို လုပ်ကြမလဲ မားက အရမ်းခေါင်းမာလွန်းတယ် ဘယ်သူမှ သူမကို နားချလို့ရမယ် မထင်ဘူး သူမကို အကျိုးအကြောင်း ပြောပြတာလည်း နားမထောင်ဘူး အခု ကျွန်တော့်ကို အခန်းထဲ ထည့်ပိတ်ထားလိုက်ပြီ ..."
"ဒီကိစ္စတွေအတွက် မပူနဲ့နော် ကိုယ် အားလုံး စီစဉ်ပြီးသား ကောင်းကောင်းအိပ် ကောင်းကောင်းစား အမေနဲ့ စကားမများနဲ့ ရက်နည်းနည်းလောက်နေရင် သူမက သာ့တုန်စတူဒီယိုကို ရုပ်ရှင်ရိုက်ဖို့ သွားလိမ့်မယ် အဲဒီ့အခါကျ မင်းလည်း သူမနဲ့အတူ လိုက်သွားပြီး လီရှန်းကျစ် ဇာတ်ကောင်ကို ရွေးလိုက်နော် မှတ်မိရဲ့လား ..."
"မှတ်မိတယ် ..."
ရှောင်ကျားရှုက ခေါင်းကို ထပ်ကာထပ်ကာ ငြိမ့်ပြလိုက်သည်။
ချစ်စရာကောင်းသည့် အမူအယာကို စခရင်မှတစ်ဆင့် မြင်လိုက်ရသည့် ကျိမြန်မှာ ထိန်းချုပ်၍ မရနိုင်စွာ ခပ်တိုးတိုး ရယ်မောလိုက်မိတော့သည်။
"ဘာလို့ မင်းကို ရုပ်ရှင်ရိုက်ခိုင်းတာလဲလို့ မမေးတော့တာလဲ ..."
"မေးစရာမှ မလိုတာ ကောကို ယုံပြီးသား ..."
ရှောင်ကျားရှုက အောက်ထပ်တွင် ရပ်နေသူကို လက်ဝှေ့ယမ်းပြလိုက်၏။ သူ့လေသံမှာလည်း ဒေါသတို့ ကပ်ငြိမနေတော့။
"ကောနဲ့ အချိန်တိုင်း အဆက်အသွယ် ရှိနေရင် စိတ်အေးအေးထားလို့ ရတယ် ကျိကော ကောလည်း အဲဒီ့ဇာတ်ကားကို ရိုက်မှာလား ရိုက်ကွင်းမှာ တွေ့ကြရမှာ မဟုတ်လား ..."
"ဟုတ်တယ် ကိုယ် မင်းနဲ့ သေချာပေါက် အဖော်ပြုပေးမယ် ..."
X Xxxxxxx
Chapter 179
ကျိမြန်က ဝရန်တာကို မော့ကြည့်ပြီးနောက် ဖုန်းကို တစ်ဖန် ပြန်ကြည့်လိုက်၏။ သူ့အမူအယာမှာ ပျာယာခတ်နေခြင်း အလျဉ်းမရှိတော့။ ဤသို့သော အခြေအနေမျိုးကို အစောကြီးကတည်းက မျှော်လင့်ထားပြီးဖြစ်ရာ ကိုင်တွယ်ရန် နည်းလမ်းတစ်ခု အဆင်သင့် ရှိနေပြီးဖြစ်ပေသည်။
တည်ငြိမ်နေသည့် ကျိကောကို တွေ့လိုက်ရသည့်အခါ ရှောင်ကျားရှုလည်း အလိုလိုပင် စိတ်သက်သာ ရာရသွားပြီး အနည်းငယ် ပြုံးရယ်နိုင်လာတော့သည်။
"အထဲဝင်တော့ အပြင်ဘက်က အေးလာပြီ ..."
ကျိမြန်က သူ့ကို လက်ယမ်းပြလိုက်သည်။
"အိုး ..."
ရှောင်ကျားရှုက လက်ယမ်းပြလိုက်သည့်တိုင် ဖုန်းကို မချနိုင်သေး။
"ကျိကော ကောမရှ်ိတော့ အိပ်မပျော်ဘူး ..."
"မင်းနဲ့ video call ပြောနေပေးမယ် ..."
သူ့ချစ်သူ၏ ပုံရိပ်လေး ဝရန်တာမှ ပျောက်ကွယ်သွားသည့်တိုင် သူကမူ ကားကိုမှီလျက် ရပ်ကြည့်နေမိဆဲဖြစ်သည်။
"ကျိကော ကောလည်း ကားထဲ ဝင်တော့လေ အပြင်ဘက်က ပိုပိုပြီး အေးလာပြီ ..."
ရှောင်ကျားရှုက ခပ်တိုးတိုး ပြောလိုက်သည်။
"ကျွန်တော်နဲ့ ဖုန်းပြောနေပေးဖို့ မလိုပါဘူး ပြောနေရင်း အိပ်ပျော်သွားရင် ဖုန်း မဖွက်လိုက်မိမှာ ကြောက်လို့ မားလက်ထဲမှာ အခန်းသော့ရှိတော့ ကျွန်တော့်ကို အချိန်မရွေး လာချောင်းကြည့်နိုင်တယ်လေ ..."
သူ့အတွက်မူ ဤဖုန်းသည်သာ သူနှင့် ကျိကောအကြား ဆက်သွယ်ပေးနိုင်သည့် အသက်ကယ်ကြိုးတစ်မျှင် ဖြစ်ပေရာ မည်သို့မှ အဆုံးရှုံးမခံနိုင်ချေ။
"မင်း အိပ်ချင်လာပြီဆိုမှပဲ ဖုန်းချလိုက်မယ်လေ ..."
ကျိမြန်က drone ကို ပြန်သိမ်းလိုက်သည်။
"အိုကေ ..."
ရှောင်ကျားရှုက ဖုန်းကို ခေါင်းအုံးပေါ်တင်ကာ ရုပ်ထွက်အကောင်းဆုံးဖြစ်မည့် ရှုထောင့်ကို ချိန်ညှိလိုက်၏။ သက်တောင့်သက်သာ လှဲမချခင် ဘေးကိုစောင်းလျက် ရှက်သွေးဖြန်းစွာ မေးလိုက်သည်။
"ကျိကော ကျွန်တော့်ကို ကားပတ်စီးဖို့ ခေါ်သွားပေးပါလား ..."
"ဘယ်ကို သွားချင်လဲ ..."
ကျိမြန်က အမှန်တကယ်ပင် ကားစက်နှိုးကာ ရှို့ချန်ယုကို မမေ့မလျော့ ပြောလိုက်သည်။
"အန်ကယ်ရှို့ ကျွန်တော့်ကို ဖုန်းကူကိုင်ပေးပါဦး ကျွန်တော့်ပုံကို ရိုက်ပေးရင်း ပြတင်းပေါက် အပြင်ဘက်က ရှုခင်းတွေကိုပါ ရိုက်ဖို့လည်း မမေ့နဲ့နော် ..."
ကျိမြန်၏ အလုံးစုံ အသုံးချခြင်းကို ခံနေရကြောင်း ခံစားမိသည့် ရှို့ချန်ယုက ခေါင်းတစ်ခုလုံး အမည်းကြောင်းတို့ ထင်ဟပ်လျက်ဖြင့်ပင် ဖုန်းကို ကိုင်ထားပေးလိုက်ရတော့သည်။
"ဟေး အန်ကယ်ရှို့လည်း ရှိနေတာလား ..."
ရှောင်ကျားရှုက ရှက်အားကြီးစွာဖြင့် ချက်ခြင်း ထမေးလိုက်၏။
"ဟယ်လို အန်ကယ်ရှို့ ..."
"ရှောင်ရှုရေ မင်းနဲ့ကျိမြန် စိတ်ကြိုက်သာ ပြောကြ အန်ကယ့်ကို မရှိသလိုသာ သဘောထား ..."
ရှို့ချန်ယုက ရယ်ကာမောကာ ပြောလိုက်သည်။
ရှောင်ကျားရှုမှာ တီတီတာတာ ချစ်စကားတို့ ရင်နှင့်အပြည့် စာစီထားသည့်တိုင် ထုတ်မပြောရဲ၊ ကျိကောဟုသာ ကရုဏာသက်ဖွယ်ကောင်းစွာ တဖွဖွ ခေါ်နေလိုက်တော့သည်။
"ကိုယ့်မှာဖြတ်သန်းခွင့်ကတ်မရှိတော့ အန်ကယ်ရှို့ ကိုကူညီတောင်းဖို့ပဲတတ်နိုင်တယ်လေ ..."
ကျိမြန်က သူ့ကို ရှင်းပြရင်း နက်ရှိုင်းသည့် အပြုံးတစ်ပွင့် ပေးလိုက်သည်။
"ကိုယ် အခု သူ့ကို ပြန်ပို့လိုက်မယ် ..."
"မင်းကတော့ ဘုရားပြီး ငြမ်းဖျက်နေတာပဲ အမ် ..."
ရှို့ချန်ယုက စိတ်ဆိုးမာန်ဆိုးဖြင့် ပြောလိုက်၏။ တစ်ဖန် ကျယ်ကျယ်လောင်လောင် အော်ရယ်လိုက်ပြန်သည်။ သူတို့နှစ်ဦးမှာ တစ်ယောက်နှင့်တစ်ယောက် မျက်စိအောက်မှ မခွါနိုင်လောက်အောင်ပင် ချစ်ခင်မြတ်နိုးကြကြောင်း သိလိုက်ရရာ အကယ်၍ သူသာ ရှောင်ကျားရှု၏ဖခင် ဖြစ်ခဲ့ပါလျှင် သူတို့ချစ်ခြင်းကို သေချာပေါက် ကောင်းချီးပေးမည်ဖြစ်သည်။ မည်သူတစ်ဦးတစ်ယောက်မှ မနာကျင်ရသရွေ့ လူတိုင်း ကိုယ်လိုချင်သည့် ဘဝကို စိတ်ကကြိုက် ရွေးချယ်ခွင့် ရှ်ိပေသည်။
ရှို့ချန်ယုကို အဝေးပို့ပြီးနောက် ဖုန်းကို ကားဒက်ရှ်ဘုတ်ပေါ်တင်ကာ ရှောင်ကျားရှုကို မြို့တစ်ပတ် လိုက်ပြလိုက်၏။ အချိန်တိုင်း ရှောင်ကျားရှုက သူ့အား ဖုန်းကိုပဲ ကြည့်မနေဘဲ လမ်းကို ကြည့်မောင်းရန် သတိပေးနေပြီး နှစ်ဦးသား စကားစမြည်ပြောရင်း ညခင်းချိန်ခါရှုခင်းကို ခံစားနေလိုက်ကြသည်။ အိပ်မောကျချင်ဖွယ် အနေအထားမျိုးတွင်ပင် စိတ်ပျက်အားငယ်မှု အနည်းငယ်ကိုမှ မခံစားရချေ။
တစ်နာရီခန့် ကြာပြီးသည့်အခါ ရှောင်ကျားရှုက တီးတိုးပြောလာ၏။
"ကျိကော ကျွန်တော် ချစ်ကြိုက်မိတဲ့သူက ကောသာ မဟုတ်ခဲ့ရင် အခုအချိန်မှာ အတော်လေးကို အခက်တွေ့နေလောက်ပြီ ..."
ကိစ္စရပ်များ ပေါ်ထွက်လာသည့်အခါ မည်သူကမှ ကျိကောကဲ့သို့ အလျင်အမြန် ပြင်ဆင်နိုင်မည် မဟုတ်ချေ။ သူ့အဖို့ ကျိကောမှာ မိုးကောင်းကင်တစ်ခုနှယ်၊ လေဒဏ်မိုးဒဏ် ကာကွယ်ပေးနိုင်ကာ နေရောင်ဖြာပေး မိုးသည်းပေးနိုင်သည်။ သူ့အနေဖြင့် မည်သည့်ကိစ္စကိုမှ ပူပန်နေရန်မလို။ ကျိကော ဦးဆောင်ရာနောက်သို့ ထပ်ကြပ်မကွာ လိုက်လာပါလျှင် ပျော်ရွှင်မှု၏ တစ်ဖက်ကမ်းကို မုချ ဆိုက်ရောက်နိုင်မည်ဖြစ်သည်။
ကျိမြန်ကလည်း သူ မည်သည်ကို ဆိုလိုချင်ကြောင်း သဘောပေါက်သည့်အတွက် အပြုံးတို့မှာ ပို၍ပင် ညင်သာနူးညံ့လာတော့သည်။
"ဒါ ကိုယ် မင်းကို ပြောချင်တဲ့စကားနဲ့ အတူတူပဲ ..."
ရှောင်ကျားရှုက ခေါင်းအုံးကိုဖက်ကာ နှုတ်ခမ်းစူလျက် ကင်မရာကို အနမ်းပေးလိုက်သည်။
"ကျိကော ကျွန်တော် လုံးဝ စိတ်မပူဘူး ကောမှာ နည်းလမ်းရှိမယ်ဆိုတာ ယုံကြည်ပြီးသား ..."
အလားတူ အခြေအနေမျိုးကို ကြုံရပါလျှင် သာမန်သူများအနေဖြင့် သူတို့၏ လက်တွဲဖော် ကြောက်၍ နောက်ဆုတ်သွားလေမလားဟူသည့် သံသယစိတ်ကြောင့် အပြင်းအထန် ရန်ဖြစ်လျှင်ဖြစ် သို့မဟုတ်ပါလျှင်လည်း အပြန်အလှန် သံသယပွားကာ စိတ်ဆင်းရဲနေကြရမည်ဖြစ်သည်။ နှလုံးသားတစ်ခုလုံး ကသောင်းကနင်း ဖြစ်ကုန်သည့်အတွက် စိတ်ဆန္ဒအားလုံး မိသားစု၏ ဖြောင်းဖျနားချခြင်းအောက်တွင် ပျောက်ကွယ်သွားကြရတော့၏။ အဆုံးအထိ တောင့်ခံနိုင်သူမှာ လက်တစ်ဆုပ်မျှသာ ရှိကာ အများစုမှာ စိတ်ကျရောဂါ ဖြစ်လျှင်ဖြစ် သို့မဟုတ်ပါလျှင် အမျိုးသမီးတစ်ဦးနှင့် အိမ်ယာထူထောင်ရခြင်းဖြင့် အဆုံးသတ်သွားခဲ့ရတော့သည်။
အဆုံးသတ်မှာ မိသားစုတွေ ပျော်ရွှင်ရတယ်ဆိုပေမယ့် သူတို့ကိုယ်တိုင်ကရော ပြီးတော့ သူတို့နဲ့ လက်ထပ်ခဲ့တဲ့ အမျိုးသမီးကရော ...
ကျိမြန်သည် ထိုခေါင်းမာလှသည့် မိသားစုတို့ လိုချင်သည့် အရာကို မည်သည့်အချိန်ကမှ နားမလည်နိုင်ခဲ့။
ကလေးတွေကောင်းဖို့လို့ ပြောကြပေမယ့် ကလေးတွေက တကယ်ရော ကောင်းသွားလို့လား သူတို့တွေ စိတ်ချမ်းချမ်းသာသာ နေရဖို့ အတွက်နဲ့ ကိုယ့်ရင်သွေးတွေကိုရော ပြီးတော့ အပြစ်မရှိတဲ့ အမျိုးသမီးတွေကိုပါ နာကျင်စေခဲ့ကြတာလေ ဒါတင်မကဘူး နောက်မျိုးဆက်တွေအထိ ... ပျက်စီးမှုက သေရာပါပဲ တစ်ယောက်ကနေ လူတစ်အုပ်အထိ နာကျင်မှုတွေကို အဆင့်ဆင့် လက်ဆင့်ကမ်းခဲ့ရတာ အကြောင်းပြချက်က လူတောတိုးဖို့ တစ်ခုတည်းတဲ့ ဘယ်လောက်တောင် ဝမ်းနည်းဖို့ ကောင်းလိုက်သလဲ ...
ကျိမြန်မှာ သူ့ကိုယ်သူ အင်မတန် ကံကောင်းလှသည်ဟု ခံစားမိလာတော့၏။ သစ်ပင်ပေါက်ကလေးသည် သူ့ကို သံသယဝင်ခြင်းလည်း မရှိသလို အနည်းငယ်မျှပင်လျှင် တုန်လှုပ်ယိမ်းယိုင်သွားခြင်း မရှိပေ။ သူ့ကို လွမ်းပါသည်ဟု ပြောရုံမှအပ စီစဉ်မှုများကို တစ်ခွန်းမှ စောဒကမတက်ဘဲ အသာတကြည် နာခံခဲ့သည်။ အကယ်၍ သူ့နေရာတွင် အခြားသူသာ ဖြစ်ခဲ့ပါလျှင် အခြေအနေသည် ဇာတ်သိမ်းပိုင်းသို့ ဦးတည်နေတော့မည်ဖြစ်သည်။
ထိုသို့တွေးမိသည့်အခါ မပြုံးဘဲ မနေနိုင်၊ ကြိမ်ဖန်များစွာ ကတိပေးလိုက်မိတော့၏။
"ဟုတ်တယ် ကိုယ့်မှာ နည်းလမ်းရှိတယ် မစိုးရိမ်ဘဲ ရိုက်ကူးရေးကိုသာ အေးအေးဆေးဆေး လုပ်နေနော် ရှောင်ရှု ဟိုးအရင်က ကိုယ် ရူးရူးမိုက်မိုက် ပြောခဲ့မိတာတွေကို အခု ပြန်ရုတ်သိမ်းချင်တယ် ကိုယ် မင်းရဲ့ရိုးရှင်းတဲ့စိတ်ထားကို သဘောကျတယ် ပြီးတော့ ကိုယ့်ရဲ့ ကာကွယ်မှုအောက်မှာ မင်းတစ်ဘဝလုံး အပူအပင်ကင်းကင်း စိတ်ချမ်းချမ်းသာသာနဲ့ တစ်ဘဝလုံး နေထိုင်သွားနိုင်ဖို့လည်း မျှော်လင့်တယ် ..."
ရှောင်ကျားရှု၏ မျက်ဝန်းတို့ တစ်ဖန် နီမြန်းလာပြန်ကာ စကားတစ်ခွန်းမှ မဆိုဘဲ မျက်ဝန်းထောင့်စွန်းတို့ကိုသာ အကြာကြီး ပွတ်သပ်လိုက်ပြန်သည်။
"ဟုတ်ပြီ ဟုတ်ပြီ သွားအိပ်တော့လေ အန်တီရွှယ်လည်း ဝင်လာနေဦးမယ် ဂရုစိုက်ဦး ..."
ကျိမြန်က သူ့အတွေးတို့ကို မြင်နေရဟန်ပင်။ စိတ်လှုပ်ရှားမှုကြောင့် ငိုချမိလုမတတ် ဖြစ်နေသဖြင့် စိတ်ကို မနည်း ထိန်းထားရသည်။
"အိုကေ ကောင်းသောညပါ ကျိကော ..."
သူ့အသံမှာ အနည်းငယ်ပင် ကျွတ်ဆတ်နေသယောင်။
နှစ်ဦးသား တစ်ယောက်ကိုတစ်ယောက် အပြန်အလှန် စိုက်ကြည့်လိုက်ကြကာ မည်သူကမှ ဖုန်းအရင်ချလိုဟန် မရှိ။ ဧည့်ခန်းထဲမှ ဆူဆူညံညံ အသံများ ကြားရကာ ရွှယ်မြောင်နိုးလာသည့်ပုံ ပေါ်နေ၍သာ မဟုတ်ပါလျှင် ကျိမြန်သည် လက်ကျန်ဖုန်းအား နှစ်တုံးလုံးကိုပင် သုံးမိမည်ဖြစ်သည်။ အခက်ခဲဆုံး ညတစ်ည ဖြစ်ခဲ့သည့်တိုင် အတင်းအကြပ် ခွဲခွါခြင်း ခံခဲ့ရသူ နှစ်ဦးမှာ အိပ်မရခြင်း အလျဉ်းမရှိ။ သူတို့၏ နှလုံးသားတို့ကို မည်သူမှ လာရောက် မလှုပ်ယမ်းနိုင်အောင် အခိုင်အမာ ချည်နှောင်ထားကြဆဲဖြစ်ကြောင်း သိနေ၍ ဖြစ်ပေလိမ့်မည်။
........
နောက်နေ့မနက်
ခုနစ်နာရီခွဲတွင် ရှိုချန်ယုက အိမ်တံခါးဝရှေ့သို့ ရောက်လာ၏။ တံခါးလာဖွင့်ပေးသည့် ရွှယ်မြောင်မှာ မျက်ကွင်းတို့ ညိုမည်းလျက် အလွန်ပင်ပန်းနေဟန်ပင်။
"မနေ့ညက မအိပ်ရဘူးလား ရှောင်ရှုရော ဘယ်မှာလဲ ..."
"ဒီလိုကိစ္စတွေ ဖြစ်ပြီးနောက်ပိုင်း ဘယ်အမေကရော အိပ်ပျော်မှာတဲ့လဲ ရှောင်ရှုက အခန်းထဲမှာပဲ သူ့ကို အော်ခေါ်ပေမယ့် ပြန်မဖြေဘူး စိတ်ဆိုးနေတယ်ထင်တယ် ..."
သားဖြစ်သူ၏ အခန်းကို သော့ဖွင့်ကာ ဝင်သွားလိုက်လျှင် တစ်ခုခုကို ဖုံးကွယ်လိုဟန်ဖြင့် စောင်ကို ကမန်းကတမ်း ခြုံလိုက်သူကိုသာ တွေ့လိုက်ရတော့သည်။
"ဘာလုပ်နေတာလဲ ..."
ရွှယ်မြောင်၏ ဒေါသတို့ ချက်ခြင်း ထွက်ပေါ်လာကာ စောင်ကို ဆွဲလှန်ကာ အော်ဟစ်လိုက်သည်။
"ဘာလို့ တအား ..."
သူ့ကိုယ်သူ တင်းတင်းကြပ်ကြပ် ပြန်ဖက်ကာ အသံတိတ် ငိုကြွေးနေသည့် သားဖြစ်သူ၏ မျက်ရည်လည်ရွှဲ မျက်နှာကြောင့် သူမ၏ ဒေါသစိတ်တို့ အငွေ့ပျံကာ ပျောက်ကွယ်သွားတော့သည်။ မျက်လုံးနှင့် နှာခေါင်းတို့ နီမြန်းနေသည့် သူ့ပုံစံမှာ လွန်စွာ ကူကယ်ရာ မဲ့နေဟန်ပင်။
သားဖြစ်သူ၏ ဤပုံစံမျိုးကို ပြန်ပေးဆွဲခံရပြီးနောက် အိမ်ပြန်ရောက်လာသည့် အခါတွင် တစ်ကြိမ်၊ ဟဲရီ၏ ဈာပနတွင်တစ်ကြိမ်၊ ယခုတစ်ကြိမ် သုံးကြိမ်သာ မြင်တွေ့ခဲ့ရဖူးပေသည်။
ကိုယ့်သားကိုယ် ဘာဖြစ်လို့ ဒီလောက်အထိ ဝမ်းနည်းပက်လက်ဖြစ်အောင် လုပ်ရမှာလဲ သူ့ကို ဒီလို ဖိအားပေးတာ တကယ်ကောင်းတာရော ဟုတ်ရဲ့လား ...
ဤကဲ့သို့သော အတွေးမျိုး ဝင်ရောက်လာသော်ငြား ချက်ခြင်းပင် နှလုံးသားကို မာကျောစေကာ ကိုယ့်ကိုယ်ကို သတိပြန်ပေးလိုက်သည်။
ရှောင်ရှုကို လမ်းကြောင်းမှန်ပေါ် တွန်းတင်ပေးဖို့ လုပ်နေတာ သူသာ သာယာပျော်ရွှင်တဲ့ အိမ်ထောင်ရေးနဲ့ အောင်မြင်တဲ့ဘဝကို ပိုင်ဆိုင်ရရင် နင့်ကို တစ်ဖြည်းဖြည်းချင်း ကျေးဇူးတင်လာလိမ့်မယ် ...
"အသက်ကဖြင့် ကြီးနေပြီကို ဘာလို့ ငိုယိုနေရတာလဲ ကျိမြန်မရှိတော့ သေသွားမှာလား ငါ့ဘဝကလည်း ဘာလို့ ဒီလို အသုံးမကျတဲ့ သားမျိုး မွေးခဲ့မိမှန်းကို မသိဘူး မြန်မြန်ထစမ်း အန်ကယ်ရှို့ကို ဒီ လှောင်ပြောင်ချင်စရာ လုပ်ရပ်တွေ မပြမိစေနဲ့ ..."
သူမက သားဖြစ်သူ၏ တင်ပါးကို အချက်အနည်းငယ်ခန့် ရိုက်လိုက်သော်ငြား ခြေဖဝါးတစ်စုံမှအပ တစ်ကိုယ်လုံး စောင်ထဲ နစ်မြုပ်သွားသူကိုသာ တွေ့လိုက်ရပြန်တော့သည်။ ထိုပုံစံမှာ လွန်စွာ သနားဖွယ် ကောင်းလှသည့်တိုင် သူမသည် ရယ်လည်းမရယ်နိုင်၊ ငိုလည်း မငိုနိုင်တော့ချေ။
"အန်ကယ်ရှို့က မနက်စာ ဝယ်လာတယ် အခုချက်ခြင်း ထစားလှည့် ..."
လည်ချောင်းရှင်းကာ ခက်ထန်စွာ ဆော်ဩလိုက်သည်။
"မစားဘူး ..."
ရှောင်ကျားရှုက ဆောင့်ကြီးအောင့်ကြီး ပြောလိုက်၏။
"ကောင်းပြီ ငါ့ကို အစာအငတ်ခံပြီး ဆန္ဒပြချင်နေတာပေါ့ ဟုတ်လား ..."
သူမက မျက်ခုံးတို့ကိုပင့်ကာ ပြောလိုက်သည်။
"မစားရင် အငတ်ထားမယ် မင်း ဗိုက်ဆာလွန်းလှမှ ဆေးရုံကိုပို့ အစာပိုက်ထဲပြီး အာဟာရအရည်တွေ ထည့်ပစ်မယ် သေတဲ့အထိ အငတ်ထားမှာ မဟုတ်သလို ငါ့ကို အာခံမယ့် ခွန်အားတွေ ကျန်အောင်လည်း ထားပေးနေမှာ မဟုတ်ဘူး ဘယ်လောက်အထိ အကြောတင်းနိုင်မလဲ ကြည့်ရသေးတာပေါ့ ..."
ရှောင်ကျားရှုက အသံထွက်မလာသေး။ သူမလည်း သူ့ကို ဂရုစိုက်မနေတော့ဘဲ တံခါးကို ဆောင့်ပိတ်ကာ မနက်စာ သွားစားနေလိုက်တော့သည်။
ဘေးနားမှ ရပ်ကြည့်နေသည့် ရှို့ချန်ယုမှာ ပါးစပ်အဟောင်းသားဖြင့် အံ့ဩနေရတော့၏။
နှစ်နှစ်ဆယ်ကြာပြီးတာတောင် မြောင်မြောင်ရဲ့ စိတ်သဘောထားတွေက အရင်လို အေးစက်မာကျောနေတုန်းပဲ သားဖြစ်သူကိုတောင် အကျောမခံဘူး ရှောင်ကျားရှုသာ တကယ်ကြီး အစာအငတ်ခံရဲရင် ဝက်တစ်ကောင်လို အစာပိုက်တွေ ထိုးပစ် သတ်သေရဲရင် စိတ်ကျန်းမာရေးဆေးရုံရဲ့ အဖြူရောင် အခန်းကျဉ်းလေးထဲမှာ တစ်နေကုန် ကြိုးနဲ့ချည်ပြီး ပိတ်ထားပစ်မယ်ထင်တယ် ...
ကျိမြန်က သူမကို တကယ်ရော အနိုင်တိုက်နိုင်ပါ့မလား ဆိုတာကိုတောင် သံသယဝင်လာပြီ...
သိူ့သော် မည်သိူ့ပင်ဖြစ်စေ သူကမူ ကျိမြန်တို့အား မလွဲမသွေ ကူညီပေးမည်ဖြစ်သည်။ ကျိမြန်နှင့် ရှောင်ကျားရှုတို့၏ ဆက်ဆံရေးမှာ မှားယွင်းသည်ဟု မတွေးသလို သူတို့နှစ်ဦးကို လမ်းခွဲခိုင်းရမည်ဟုလည်း မတွေး။ ဤသည်မှာ ကံဆိုးမှုတို့၏ အစမျှသာ ရှိပေသေးသည်။
"ကလေးကို အမြဲတမ်း ဒီလိုလုပ်နေတာကြီးက မကောင်းဘူးနော် ..."
ရှို့ချန်ယုက မရဲတရဲ ပြောလိုက်သည်။
"ဒါမှမဟုတ် သူ့ကို ရုပ်ရှင်ရိုက်ဖို့ ခေါ်သွားလိုက်ပါလား အလုပ်များနေရင် ဘယ်အကြောင်းမှ စဉ်းစားချိန် ရှိတော့မှာ မဟုတ်ဘူးလေ ငါ ပေးထားတဲ့ ဇာတ်ညွှန်းကို ဖတ်ကြည့်ပြီးပြီလား ဘယ်လိုထင်လဲ ..."
"ရှောင်ရှုက ဒီလိုဖြစ်နေတဲ့အချိန်မှာ ရုပ်ရှင်ရိုက်နေဖို့ စိတ်မပါဘူး ..."
ရွှယ်မြောင်က ခေါင်းကိုသာ အသာယမ်းပြလိုက်သည်။
"သူ့ကို အမြဲတမ်း သော့ခတ်ထားရင် အချိန်မရွေး စိတ်ကျန်းမာရေး ထိခိုက်လာနိုင်တယ်နော် ဂရုစိုက်ဦး သူ့ပုံစံက အချိန်မရွေး စိတ်ဖောက်သွားနိုင်တဲ့ပုံမျိုးဆိုတာ မေ့သွားပြီလား ပြင်းထန်လွန်းပြီး ကလေးကို နောက်တစ်ကြိမ် ဒုက္ခတောထဲ တွန်းပို့မိလို့ မဖြစ်ဘူး လမ်းလျှောက်ထွက်ဖို့ ခေါ် ကျိမြန်နဲ့ ဝေးဝေးထား နှစ်လသုံးလလောက်နေရင် အဆင်ပြေသွားလိမ့်မယ် ပြီးတော့ လူတွေက အလုပ်များနေရင် ဘယ်အကြောင်းမှ မတွေးမိတော့ဘူး ဒီလိုကုသနည်းက ဆိုးတယ်လို့လည်း ပြောမရဘူးလေ ..."
Xxxxxxx
Chapter 180
ဤတစ်ခေါက်တွင်တော့ သူမလည်း အတော်ကြာ တုန့်ဆိုင်းသွားတော့သည်။
"ရှောင်ရှုကို အပြင်ခေါ်ထုတ်လို့က ရပါတယ် ဒါပေမယ့် ကျိမြန်က သူ့နောက် လိုက်မလာဘဲ နေမှာတဲ့လား ..."
"လိုက်တော့ရော သူ ဘာလုပ်နိုင်မှာလဲ ရိုက်ကူးရေးအဖွဲ့က ဟိုတယ်မှာ နေမှာ ပတ်ဝန်းကျင်မှာလည်း ပါပါရာဇီတွေ ပြည့်နေတာကို သူက ရှောင်ရှုကို လာရှုပ်ရဲမှာတဲ့လား ကလေးကို အိမ်ထဲ တစ်ယောက်တည်း ပိတ်ထားမှာနဲ့စာရင် လူတွေ အများကြီးနဲ့ နေခိုင်းတာက ပိုကောင်းတယ် ..."
ရွှယ်မြောင်က ဇာတ်ညွှန်းကို လှန်လှောကြည့်လိုက်ကာ နောက်ဆုံးတွင်တော့ ခေါင်းငြိမ့်လိုက်ရတော့သည်။
"ဒါဆိူလည်း ကောင်းပြီလေ ရှောင်ရှုကို စောင့်ကြည့်ဖို့ လက်ထောက်နည်းနည်းလောက် ထပ်ရှာလိုက်မယ် ..."
"အိုကေ ငါ အခုပဲ ဒါရိုက်တာကို ဖုန်းဆက်လိုက်မယ် ..."
သူ ဖုန်းထွက်ပြောတော့မည့် အချိန်မှာပင် သူမက နောက်တစ်ကြိမ် ထပ်မေးလာပြန်သည်။
"နေဦး ရိုက်ကွင်းကိုတော့ ကျိမြန် မလာလောက်ဘူး မဟုတ်လား ..."
"လာကောင်းလာလိမ့်မယ် လူအများကြီး ရှေ့မှာတောင် သူက ရှောင်ရှုကို အလစ်သုတ်သွားမလား ကြောက်နေသေးတာပဲလား ..."
သူမ၏ စိတ်ကို တမင်တကာ ဆွပေးလိုက်သည်။
ရွှယ်မြောင်မှာ အမှန်တကယ် ထိရှသွားသည့်ဟန်ပင်၊ စကားသံတစ်ခွန်းမှ ထပ်ထွက်မလာတော့။
ရှို့ချန်ယုက သူမကို ဆန်ပြုတ်တစ်ပန်းကန် ထည့်ပေးကာ ဂရုတစိုက် ပြောလိုက်သည်။
"အရင်စားနှင့် ငါ ရှောင်ရှုကို သွားကြည့်လိုက်ဦးမယ် ဒီလိုအချိန်မှာ စကားပြောစရာ ယောကျာ်းလေးအဖော် လိုနေမှာ ..."
ရွှယ်မြောင်က ခေါင်းငြိမ့်ပြလိုက်၏။ သူမ၏ အကြည့်တို့တွင် ဝေဝါးမှုတို့ ထင်ဟပ်နေပေသည်။ သူမ၏ လုပ်ရပ်များ မည်မျှပင် ရက်စက်ပါစေ ရှောင်ကျားရှု၏ ကောင်းကျိုးကို ရည်ရွယ်ကာ လုပ်ခဲ့ခြင်းသာ ဖြစ်ပေသည်။
ရှို့ချန်ယုက အခန်းတံခါးကို လော့ချပြီး အိပ်ယာဘေးနားသွားကာ စောင်ကို မ ၍ ရှောင်ကျားရှု အိပ်ပျော်နေသလား ကြည့်လိုက်၏။
မျက်နှာက နီမြန်းချောမွေ့နေပြီး ခပ်ရေးရေးလေးတောင် ပြုံးနေလိုက်သေးတယ် ဘယ်မှာလဲ သနားစရာကောင်းမှုတွေ ရွှယ်မြောင်ကတောင် သူ့ထက် အဆတစ်ရာလောက် ချည့်နဲ့ပင်ပန်းနေသေးတယ် ...
"ရှောင်ရှု မြန်မြန်ထ မင်းအတွက် ဇာတ်ညွှန်းယူလာတယ် ကြည့်ကြည့်လိုက် သန်ဘက်ခါကျ ရိုက်ကူးရေးအဖွဲ့ထဲ ဝင်ရတော့မှာ ...
သူ့အသံ ထွက်လာသည်နှင့် တစ်ပြိုင်နက် အိပ်ပျော်နေသော ရှောင်ကျားရှု၏ မျက်လုံးတို့ ပွင့်လာကာ မေးလိုက်သည်။
"ရုပ်ရှင် ဘယ်ရုပ်ရှင်လဲ အာ ဟုတ်သားပဲ မနေ့က ကျိကောက ဘယ်အကြောင်းမှ တွေးမနေဖို့ ပြောခဲ့တာပဲကို ရိုက်ကူးရေးကိုပဲ ကောင်းကောင်းလုပ်ကြတာပေါ့ ဇာတ်ညွှန်းကို ပြပါဦး ..."
ထိုသို့ပြောနေရင်းပင် အိပ်ယာ၏ အက်ကွဲကြောင်းအတွင်းရှိ ဖုန်းကိုထုတ်ကာ ကျိမြန်ထံ စာပို့လိုက်သည်။
[ကျိကော ကျွန်တော်နိုးပြီ ကောင်းသောမနက်ခင်းပါ]
[မောနင်း ပေါင်ပေ့ အန်ကယ်ရှို့ကို မင်းအတွက် ပင်လယ်စာဆန်ပြုတ်နဲ့ ကဏန်းပေါင်း ယူသွားပေးဖို့ ပြောထားတယ် အများကြီး စားရမယ်နော်]
ကျိမြန်က စက္ကန့်ပင် မခြားဘဲ စာပြန်ပို့လာသည်။ နှစ်ယောက်အတူ ရှိနေပါလျှင် တစ်ချိန်တည်း နိုးလာကြမည် ဖြစ်ကာ ခွဲခွါနေရ၍လည်း ကိစ္စမရှိ၊ တစ်ယောက်၏ တည်ရှိမှုကို ကျန်တစ်ယောက်က အာရုံခံစားမိနေဆဲဖြစ်ပေသည်။
[အိုကေ ကျွန်တော် ကိုယ့်ကိုယ်ကို ဂရုစိုက်ပ့ါမယ် ကောလည်း ဂရုစိုက်နော် မနက်စာ ဘာတွေစားလဲ ပို့ပေးဦး]
ရှောင်ကျားရှုက ဖုန်းစခရင်ကိုသာ စိုက်ကြည့်နေလိုက်သည်။ ကျိမြန်က ဓာတ်ပုံတစ်ပုံကို အမြန်ပို့လာကာ စက္ကန့်ပိုင်းခန့် အကြာတွင် သူမနက်စာ စားနေသည့် ဗီဒီယိုဖိုင်ကိုပါ ပို့လာ၏။ ရှောင်ကျားရှုမှာ ကြည့်၍ မဝနိုင်သည့်နှယ် အထပ်ထပ်အခါခါ ကြည့်နေကာ လေးငါးမိနစ်ခန့် အကြာတွင်မှ သူ အကြောဆန့်နေသည့်ပုံကို ဗီဒီယိုရိုက်ကာ ပြန်ပို့ပေးလိုက်သည်။
ဤတစ်ကြိမ်တွင်မူ ကျိမြန်လည်း လေးငါးမိနစ်ခန့် အကြာမှသာ စာပြန်ပို့လာတော့သည်။
[မင်းရဲ့ ခါးကိုပဲ အကြာကြီး ကြည့်နေမိတာ မင်းကို နမ်းချင်လိုက်တာ ပြီးတော့ ရှုပ်ပွနေတဲ့ ဆံပင်လေးတွေကလည်း အရမ်းချစ်ဖို့ကောင်းတာပဲ ]
နှစ်ဦးသား အပြန်အလှန် စကားပြောကာ ရှောင်ကျားရှုက ဓာတ်ပုံနှင့် ဗီဒီယိုတို့ကို ပို့ပေးရင်း ဖုန်းကို ကြည့်ပြီး အရူးတစ်ယောက်နှယ် ပြုံးနေလိုက်၏။ ရှို့ချန်ယုက စိတ်ရှည်ရှည်ထားကာ စောင့်သေးသော်ငြား နောက်ဆုံးတွင်တော့ ဝရန်တာဘက် ထွက်၍သာဆေးလိပ်သောက်နေလိုက်တော့သည်
အခွဲခံရတော့ရော ဘာဖြစ်လဲ သူတို့မှာ ဆက်သွယ်စရာ နည်းလမ်းတွေ ရှိနေသေးတာပဲဟာ ...
"ရှောင်ရှု ပြီးပြီလား မင်းအမေ တံခါးလာခေါက်နေလိမ့်မယ် ..."
၁၅ မိနစ် အကြာတွင်တော့ သူလည်း မပြော၍ မရတော့ချေ။
"ထပ်မပို့တော့ဘူး ..."
ရှောင်ကျားရှုက ဖုန်းကို အိပ်ယာခင်းအောက် ထိုးထည့်ပြီး သိချင်စိတ်အပြည့်ဖြင့် မေးလိုက်သည်။
"အန်ကယ်ရှို့ ဇာတ်ညွှန်းက ဘာအကြောင်းလဲ ..."
"<<ဧကရီဘုရင်မ>> တဲ့ မင်းအတွက် တစ်စုံ ယူလာပေးမယ် ..."
ခဏအကြာတွင် ဇာတ်ညွှန်းတစ်စုံကို ကိုင်လျက် အခန်းထဲ ပြန်ဝင်လာ၏။ ရွှယ်မြောင်ကမူ သူသည် ရှောင်ကျားရှုကို နားချရန် ကြိုးစားနေသည်ဟုသာ ထင်ထားသည့်အတွက် အံ့ဩမနေ။
"ဟေး ဒီဇာတ်ညွှန်းကို ကျိကောဆီမှာ တွေ့ဖူးတယ် သူ အခုတလော ဒါကို ပြန်ဖတ်နေတာ..."
ရှောင်ကျားရှုက ဇာတ်ကြောင်းအကျဉ်းကို ချက်ခြင်း လှန်ကြည့်လိုက်သည်။ ဇာတ်ကြောင်းမှာ တရုတ်သမိုင်း၏ တစ်ပါးတည်းသော ဧကရီဘုရင်မ၏ ဘဝခရီးလမ်းကို ဖော်ပြထားခြင်း ဖြစ်ပေသည်။ သူမသည် အကြံကြီးကာ သန်မာပြီး လွှမ်းမိုးချုပ်ကိုင်တတ်သူတစ်ဦး ဖြစ်ပေသည်။ နန်းဆောင်ငယ်၏ အစေခံဘဝမှ တစ်ဆင့်ချင်း အင်ပါယာ၏ အာဏာကို ချုပ်ကိုင်နိုင်သည့် အနေအထားအထိ တက်လှမ်းနိုင်ခဲ့၏။ ကြင်ယာတော်၊ နန်းတွင်းသူ နန်းတွင်းသားများသာမက ဧကရာဇ်ကိုပါ အနိုင်ပိုင်းကာ အာဏာတည်မြဲရေးအတွက် မိမိ၏ ကိုယ်ပိုင် ရင်သွေးငယ်ကိုပင်လျှင် စတေးခဲ့သည်။
အရိုးသားဆုံး ဝန်ခံရပါလျှင် ဤဧကရီဘုရင်မအကြောင်း ကြားလိုက်ရသည့်အခါ ရှောင်ကျားရှု၏ အတွေးထဲတွင် သူ့မိခင်၏ ပုံရိပ်သာ ထွက်ပေါ်လာတော့သည်။ နှစ်ဦးလုံးမှာ သန်မာကာ လွှမ်းမိုးနိုင်သည့် အရာတွင်သာမက မိမိတို့ လိုချင်သည့်အရာအတွက် မည်သည်ကိုမဆို စွန့်လွှတ်ရဲသည့် စိတ်တို့တွင်ပါ တူညီကြပေသည်။
"ဒီဇာတ်ကောင်က မားအတွက် သီးသန့်ဖန်တီးထားတယ်လို့တောင် ခံစားရတယ် ..."
သူက တီးတိုးပြောလိုက်သည်။
"ဟုတ်တယ် ဧကရီဘုရင်မနေရာအတွက် မြောင်မြောင်ထက်ပိုပြီး သင့်လျော်တဲ့သူ မရှိဘူး ..."
ရှိူ့ချန်ယုက သက်ပြင်းချလိုက်သည်။
ရှောင်ကျားရှုက ဇာတ်ကောင်စာရင်းကို လှန်လှောကြည့်ကာ လီရှန်းကျစ်၏ ကိုယ်ရေးရာဇဝင်အကျဉ်းကို ဖတ်ကြည့်လိုက်သည်။ လီရှန်းကျစ်သည် ဧကရီ၏ တစ်ဦးတည်းသော အသက်ရှင်ကျန်ရစ်သည့် သားတော်တစ်ပါးဖြစ်ကာ ငယ်စဉ်ကတည်းက မိဘတို့၏ ကာကွယ်ပေးမှုကို များစွာ ရရှိခဲ့သဖြင့် သူ့စရိုက်သဘာဝမှာ လွန်စွာ ရိုးသားကြည်လင်လှပေသည်။ အလိမ်အညာတို့ ပြည့်နှက်နေသည့် နန်းတော်နှင့် လားလားမှ မဆိုင်၊ အပြင်လူတစ်ဦးနှယ်ပင်။ မူလက နန်းတော်အပြင်ထွက်ကာ ပျော်ရွှင်သည့် ဘဝတစ်ခု ပိုင်ဆိုင်ရန် ဖခင်ဖြစ်သူထံမှ ခွင့်ပြုချက် ရထားပြီး ဖြစ်သော်လည်း ရည်မှန်းချက် ကြီးလွန်းလှသည့် မိခင်ဖြစ်သူ၏ ခြိမ်းခြောက်အကြပ်ကိုင်မှုကြောင့် အန္တရာယ်များပြားလှသည့် နန်းလုပွဲအကြား ပါဝင်လာရတော့သည်။ မိခင်ဖြစ်သူက ထီးနန်းပုလ္လင်ပေါ် အတင်းဆွဲတင်ခဲ့သော်ငြား နာကျင်ဖွယ် ဇာတ်သိမ်းကိုသာလျှင် ကြုံတွေ့ခဲ့ရတော့သည်။
သူ့တစ်ဘဝလုံး မိခင်ဖြစ်သူ ကြိုးဆွဲရာ ကခဲ့ရကာ တစ်ခဏမျှပင်လျှင် လွတ်လပ်မှုကို မခံစားခဲ့ရ။
"ကြည့်ရတာ ရာဇဝင်ထဲက လီရှန်းကျစ်ရဲ့ အဆုံးသတ်က ဒီလို မဟုတ်သလိုပဲနော် နည်းနည်းလောက် ပိုဝမ်းနည်းစရာကောင်းအောင် အဆုံးသတ်သွားသလိုပဲ ..."
ဤဇာတ်ကောင်မှာ သူ့အခြေအနေနှင့် လွန်စွာ တူညီလွန်းနေရာ ရှောင်ကျားရှုပင်လျှင် မရွှင်မပျ ဖြစ်လာရတော့သည်။
"ဇာတ်ကြောင်းကို နည်းနည်း ပြောင်းဦးမှာ ဒါကြောင့် မင်းအမေ ဒီဇာတ်ညွှန်းကို လက်ခံမလားပဲ အရင် ကြည့်လိုက်ကြတာပေါ့ ..."
ရှို့ချန်ယုက သူ့ပုခုံးကို ပုတ်ပေးကာ နှစ်သိမ့်လိုက်သည်။
"မစိုးရိမ်ပါနဲ့ ကျိမြန်မှာ နည်းလမ်းတစ်ခု ရှိမှာပါ သူ့ကို စတွေ့တဲ့နေ့ကတည်းက သူ့တွက်ကိန်းတွေ မှားသွားတာမျိုး တစ်ခါမှ မကြုံဖူးသေးဘူး ..."
<<ဧကရီဘုရင်မ>> ဇာတ်ညွှန်းကို ကျိကောက မနက်အစောကြီး ပို့လာခဲ့ခြင်း ဖြစ်သည့်အပြင် သူ ဟိုးယခင်ကတည်းက အကဲဖြတ်နေခဲ့သည့်ဇာတ်ညွှန်း ဖြစ်သည့်အတွက် အရည်အသွေးမှာ စိတ်ချရပေသည်။ ရှောင်ကျားရှုက အထူးတလည်ပင် ဖတ်မနေတော့၊ လီရှန်းကျစ်ဇာတ်ကောင်ကို လက်ညှိုးထိုးပြကာ အသေအချာ ပြောလိုက်သည်။
"အန်ကယ်ရှို့ ကျွန်တော် ဒီဇာတ်ကောင်ကို ယူလိုက်မယ် ..."
"အိုကေ ဒါဆို မင်းအမေကို ထွက်ပြောလိုက်မယ် ..."
ရှို့ချန်ယုက အပြင်ထွက်မည် ပြင်စဉ်မှာပင် ရှောင်ကျားရှုက သူ့ကို လှမ်းဆွဲလျက် မျက်နှာချိုသွေးကာ ပြောလိုက်သည်။
"မသွားပါနဲ့ အန်ကယ်ရှို့ ခဏထိုင်ပါဦး ..."
"ဘာလုပ်ချင်လို့လဲ ကောင်ကလေးရဲ့ ..."
ရှို့ချန်ယုမှာ မရယ်ဘဲပင် မနေနိုင်တော့။
"ကျွန်တော် ဘာလုပ်ချင်မှန်း မသိရင် ကျွန်တော်နဲ့ ကျိကောကို ကူညီပေးလေ ..."
ရှောင်ကျားရှုက အိပ်ယာအောက်ရှိ ဖုန်းကို ဆွဲထုတ်ကာ ကျိကောကို video call ခေါ်လိုက်သည်။
ရှို့ချန်ယုက စောဒကတက်လိုက်၏။
"မင်းနဲ့ ကျိမြန်က နွားကျောင်းသားနဲ့ ရက္ကန်းသမ ငါကတော့ မင်းတို့ တွေ့ဆုံဖို့ ကူညီပေးတဲ့ ငှက်ကျားတံတားပေါ့ ဟုတ်လား သတိတော့ ထားဦးနော် မင်းအမေ တွေ့သွားကာမှ ငါ့ရဲ့ ငှက်ကျားတံတားလေးပါ ဖျက်ဆီးခံလိုက်ရဦးမယ် ..."
"အမေ ရှာမတွေ့စေရပါဘူး အန်ကယ်ရှို့ ကျွန်တော့်အမေက ဘာလို့ တအား ခက်ထန်နေရတာလဲ ..."
video call ချိတ်ဆက်နိုင်သွားသည်နှင့် တစ်ပြိုင်နက် မျက်မှောင်ကြုတ်နေသော ရှောင်ကျားရှုသည် ချက်ခြင်းပင် ပြုံးရယ်ကာ လက်ကို ဝှေ့ယမ်းပြလိုက်တော့သည်။
ကျိမြန်၏ ညင်သာလှသည့် အသံက မိုက်ခရိုဖုန်းမှတစ်ဆင့် ထွက်ပေါ်လာတော့သည်။
"ပေါင်ပေ့ ကိုယ် အပြေးလေ့ကျင့်မလို့ မင်းကိုလည်း ခေါ်သွားပေးမယ် ဟိုတစ်ခေါက်က ဘဲစာကျွေးဖို့ ကိုယ်တို့ ဖြတ်လာဖူးတဲ့ ရေကန်အတုနား သွားကြရအောင် ဟုတ်ပြီလား ..."
"အိုကေ ကျိကော အစာတွေ ပိုဝယ်သွားနော် ဘဲတွေ အကုန်လုံးကို ကျွေးရအောင်လို့ ..."
"ဒါဆို နားကြပ်ကို မမေ့မလျော့ တပ်ထားဦး ဘဲတွေရဲ့ အသံက အရမ်းဆူလို့ အန်တီရွှယ် ကြားမသွားအောင်လည်း ဂရုစိုက်နော်..."
ကျိမြန်က ဖိနပ်ဗီရိုကိုဖွင့်ကာ ခပ်ဖျော့ဖျော့ ပြုံးလိုက်သည်။
"ပေါင်ပေ့ ကိုယ့်ကို ဖိနပ်ကူရွေးပေးဦး ..."
"Royal blue အရောင်နဲ့ တစ်ခုကို ရွေးလိုက် အဲါ ကြည့်လို့ကောင်းတယ် ..."
ရှောင်ကျားရှုက ကျိကော၏ အကြိုက်တို့ကိုသာ မဆိုင်းမတွ ရွေးပေးလိုက်သည်။
"ဟင့်အင်း ကိုယ် ဒီတစ်စုံကို စီးချင်တယ် ဒါ မင်းဝယ်ပေးထားတဲ့ ပထမဆုံးဖိနပ်လေ ..."
ကျိမြန်က အနက်ရောင်ဖိနပ်တစ်ရံကိုယူကာ တံခါးဝတွင် ထိုင်ချပြီး စီးရင်း ရှင်းပြလိုက်သည်။
"အန်တီရွှယ်နဲ့ ရန်မဖြစ်နဲ့နော် မင်းတို့နှစ်ယောက်လုံး ဝမ်းနည်းရရင် လူတိုင်းအတွက် မကောင်းဘူး သူမကို အဆာအငတ်ခံပြီးတော့လည်း မခြိမ်းခြောက်နဲ့ ကောင်းကောင်းအိပ်၊ ကောင်းကောင်းစား၊ ပြဿနာတွေ အကုန်လုံး ကိုယ့်အပေါ်ပဲ ပုံထားဖို့ ကိုယ် ပြောခဲ့ဖူးတယ်လေ အန်တီရွှယ်နဲ့ ရန်ဖြစ်ပြီး မင်းကိုယ်မင်း ထိခိုက်အောင် လုပ်မိမှာ ကြောက်လို့ကို အန်ကယ်ရှို့ကို မနက်စာ ပို့ပေးဖို့ တောင်းဆိုထားတာ အခုထိ မျက်နှာသစ်တာလည်း မတွေ့ရ၊ သွားတိုက်တာလည်း မတွေ့ရတော့ မနက်စာလည်း မစားရသေးဘူး မဟုတ်လား အန်ကယ်ရှို့ကို ပြန်နွှေးပြီး ဒီထဲ ယူလာပေးခိုင်းလိုက်နော် ဟုတ်ပြီလား ..."
"ဟုတ်ပါပြီ ..."
ရှောင်ကျားရှုကလည်း နာနာခံခံဖြင့် ခေါင်းငြိမ့်ပြကာ ရှို့ချန်ယုကို အားတက်သရော စိုက်ကြည့်နေလိုက်သည်။
အဖုံးကို ဖွင့်၍ ဝိုင်နှစ်ငုံခန့်သောက်မည် ပြင်နေသော ရှို့ချန်ယုမှာလည်း သူတို့နှစ်ဦး၏ စကားများကို ကြားလိုက်ရသည့်အခါ လမ်းပျောက်သွားရတော့သည်။
ဒီနှစ်ယောက်ကတော့ တကယ်ကို ရယ်ရတာပဲ ကျိမြန်က ပေါင်ပေ့လေးဆိုတာကို ပါးစပ်ဖျားကကို မချဘူး စကားတစ်ခွန်းဆုံးတိုင်းလည်း "ဟုတ်ပြီလား" ဆိုတာက ထည့်ပြောလိုက်သေးတယ် ရှောင်ကျားရှုရဲ့ သဘောထားကိုပါ မေးနေတာ ထင်တယ် သူ့လေသံကလည်း ကလေးတစ်ယောက်ကို ချော့ပြောနေတဲ့အတိုင်းပဲ ...
ကိုယ့်နားနဲ့ကိုယ် ဆတ်ဆတ်ကြားလိုက်ရလို့သာ မဟုတ်ရင် ကျိမြန်က သူ့ချစ်သူကို ကလေးတစ်ယောက်လို အလိုလိုက်ပြီး အမျိုးစုံ ချစ်ပေးတတ်တဲ့သူမျိုးလို့ကို ထင်မိမှာ မဟုတ်ဘူး ...
ရှောင်ကျားရှုကလည်း ဒါနဲ့ ပတ်သက်ပြီး နေရခက်တဲ့ပုံကို မပေါ်ဘူး အရမ်းကို လိမ္မာနေတာ သူ့ရဲ့ လူကပ်တတ်တဲ့ ပုံစံက အေးစက်ချောမောတဲ့ ရုပ်ရည်နဲ့ကို မအပ်စပ်ဘူး ဒါကြောင့်လည်း ရှေးလူကြီးတွေက အိုးရွဲ့ကို စလောင်းရွဲ့နဲ့ဖုံးလို့ ပြောကြတာ နေမှာ ထိန်းချုပ်လိုစိတ် ပြင်းထန်တဲ့ ကျိမြန်လို လူမျိုးက ရှောင်ကျားရှုလို စိတ်ထားရိုးရှင်းပြီး လူကပ်တတ်တဲ့ ဝံပုလွေပေါက်မျိုးနဲ့ပဲ ကိုက်ညီတယ် သူတို့ကမှ တကယ်ကို ရှေ့သွားနောက်လိုက်ညီတဲ့ စုံတွဲပဲ ...
ရှို့ချန်ယုက အနည်းငယ် အံ့အားသင့်နေမိသည့်တိုင် ဝံပုလွေပေါက်လေး၏ သနားဖွယ်အကြည့်တို့ကိုလည်း မျက်နှာလွှဲခဲပစ် မလုပ်ရက်သည့်အတွက် လက်ကိုယမ်းကာ ပြောလိုက်တော့သည်။
"အိုကေ မင်းကို မနက်စာ ကူပြင်ပေးမယ် မင်းအမေ ရှာမတွေ့အောင်လည်း ဖုန်းကို သေချာဖွက်ခဲ့ဦး ..."
"ပေါင်ပေ့ ကိုယ် အပြင်မထွက်သေးဘဲ အန်ကယ်ရှို့ မနက်စာ ပြင်ပြီးတဲ့အထိ ဒီနားမှာ ထိုင်စောင့်နေပေးမယ် ..."
Xxxxxxx