بعد انقطاع رجعت الروايه بسبب مشاكل صارت بحسابي عموما الي ناسين الأحداث حقكم عليه وهسه خلونا نبدأ بروايتنا
............
إسلام: صباح الخير شبيكم شنو هل ضحك الي ماله داعي من الصبح
جلال: هههه يا ماله داعي غير مرتك جابت العيد من الصبح
( هوه كبل باوعلي بخزره كلت حيفشلني كدامهم)
ايلا: شبيك والله ما سويت شي بس خالتك تكول ليش اكول عليك جنت تسبح واني سابحه و شعري كوله مي نعرف شصاير البارحه بس صدك مامسويه كولشي
اسلام: خاله شلج غرض بهذا الحجي وفوكاها تحجين جدام خلك الله
ملكه: يا يا اسلام استچن عاد ماتستحي هيجه تزمخ بخالتك
اسلام: خالتي على راسي و عيني بس هذا الحجي الي ماله داعي ماحب ينحجي و كاعدين على سفره يعني حتى ما مخلين احترام النعمة الله و هاي كلام حاضركم ينبه غايبكم ماريد اسمع ولا حجايه تخص زواجي من هاي فاهمين
طالب: هاي شني كاعدين نتقشمر كلبتها هيج و تزامخ ما مقبوله منك يابن اخوي
هلال: كوم اسلام كوم اعتذر من عمامك و خالاتك لاتخليني افشلك بنص الخلك( العالم)
اسلام: يابه
انه شجاي أكولن ( تعال لا تطلع شجاي احجي اسلاااام
جلال: اسمه مفشلنه شفت يابه هذا ابنك العون
هلال: أنه اعلمه بس يلفي لهنا
حاتم: خله خله من يوم يومنا نعرف اسلام على شني مكدر خلكك
جلال: هو ابوي خلا هيج شايخ علينا
هلال: كوممم كومم اطلع انت هم وراه لا بارك الله بيكم
ام تقي: انه اعتذر حبيت اتكشمر واداهرهم
ملكه: يا على بختج يداده أنتو رابي يمكم اسلام وتعرفون وضعه مايكدر يلزم روحه
ام بسام: الله شاهد اذكر نوبه ابوه لزمه موته چيه يعتذر و جان ها كدوته و ما سواها
إيلا: ( طبعا من حجه خالو اسلام هيج الوضع صار حامي و كاموا يطمطوها بضحكه وآني تاركه كولشي وضايجه من كال هاي مو اسمي بلكوه بلعت لكمه و مشيت همه هم كاموا يرتبون ويعزلون و رحاب أخذتها لمى الصالون من الصبح مشايفات ايع اني رحت ورا البيت جان ماكو احد ردت بس هدوء راسي احس يطنطن واعتقد لان تاركه العلاج صارلي هوايه كعدت على الدكه طين غمضت عيوني و حسيت أيد على كتفي باوعت فزيت من شفتها
إيلا: رووح
اي اني روح خفتي مني
لا مخفت بس صارلج هواي ماكو
ماما متخليني اطلع
اها يلا روحي لعبي مدامج طلعتي
ماحب العب وياهم احب العب وياج
بس اني جبيره
كلهم يضحكون عليه و يضربوني محد يريد يلعب وياي بس انتي شبيج وجهج هيج و مدمعه
روح اني تعبانه
احجيلي
ههه تعرفين خلي احجيلج انتي احسن منهم بس كولشي بينه سر
اي سر ( و سوت حركت آش بحلكها)
اني تورطت بخالو اسلام اني عبالي هيج الوضع بس لعب بس من داشوف تصرفاتهم وياي وحتى الغازهم صرت اخاف اني ردت بس اضوجه و اقهره بس شو كولشي رجع عليه
اخذج المكان تنسين كلشي بيه
ههه وين ( اشرتلي على مكان الي ورا البيت باب و من خلالها نتجه للبستان ) للبستان نروح
لا أكو مكان بعد البستان هو مكاني وبيتنا قريب عليه
خاف ميقبلون
همه مو مضوضيج ضوجيهم
صح امشي لعد ( كدتها وصرت امشي وياها رحنا على طريق البستان كولش طريق حلو ) بيتكم بعيد شيجيبج منا لهنا
انتي
شنو
انتي تجيبيني
.....
اريج : كافي حمزه ماكدر عمامي و اجدادي ولدهم كلهم يمنه
شبيج انوب صوتج يكطع دحكي هيه بس ادحكج بعيد ونحجي شويه وهمه ورا البيت ياهو موجود كلها مشغوله
عفيه ماكدر والله اخاف
ولج باباتي لاتصيرين خوافه ياهو يفكدج بهل هوسه اليمكم
خليها ورا الضهر كلها عاد تنشغل
تمام يروحي منتضر شوفتج بفارغ الصبر
وآني هم رغم خايفه بس مشتاقتلك
يمه اروح فدوه لليشتاك
اريج( جاي يحجي وطبت امي )
اسماء: شعندج انتي مباويه الغرفه كومييي سويلج شغله عمله
اي اي يمه كايمه
........
نسرين: منى هم شفتي إيلا
لا وحتى لو اشوفنها ما ركز من الهوسه
نسرين: اوف وين راحت اريج
ها عمه
عمه ماشفتي ايلا
لا والله ستوني نزلت من فوك مادري بيها
وين راحت قابل ملهم عمه ماتشوف إيلا خاف برا وانه ماكدر اطلع
ماشي عمه تدللين
فدوه اروحلك
ملهم( طلعت ادور عليها كلبت الحوش كله ماكو وآني ادور اجه عمي اسلام يخابر عاينلي و انه وجهي انلبك خفت عليها لان اذا دره طالعه و ناس موجوده خاصه بعد هاي الاحداث ينهيها رفع حاجبه و اشرلي )
شبيك ليش وجهك هيج تايه
لا عمي ماكو شي بس محفضتي وكعت و جاي ادورها
بيها مستمسكاتك
اي بيها
اي غير تنتبه أكو واحد يتيه هويته وتعرف البيت مكلوب ضمها
عمي هسه راح اضل اترزل لو ارجع ادور
دور دور بغل
( خله مشى ليجوه وانه حاير شفت باب البرانيه مال البستان مفتوحة معقوله طالعه اي عدها هيج سوالف طلعت للبستان كبل ادور عليها)
........
نسرين: ام ملهم الابنيه جانت مثل الورد الصبح كلشي مابيها وين هجت هسه خاف شو شسوت بروحها
اسماء: كافي ياعيني هسه ملهم يلكاها قابل وين تروح
اخاف عليها الابنيه مو صاحيه اسماء وهاي وصية المرحوم شلون هيج أفرط بامانته صوجي صوجي انه ورطتها باسلام المايرحم انوب لو رايحه مستشفى اشرفلها
كافي نسرين هسه انوب احد يسمعج واذا وصلت السالفه لاسلام شيخلصنه
ملكه: ولجن جاي اسون كومن زهبن الزاد
اسماء: يا عمه بعد وكت
هم يالله بين ماتصبن لان صاير العصر نسرين شبيج كاضه وجهج وعويناتج مغوركه
ماكو شي يمه بس طفر زيت على عيني و شوطني
اي ديربالجن اذا انتن تتراعصن
عمه روحي هسه نطلع نزهب الزاد
شوف هاي البكحه شلون تنتر
نسرين( انوب امي لزمت اسماء برزايل وهنا سكتت من اجاها صوت اسلام من بعيد )
ملكه: جايه يمه جايه انه اعلمج انتي
اسماء: شفتي نسرين شكول اني متحمله كل هل ضيم بس خلي يطلعن قبولات ملهم اشوفلي ديره بعيد عنهم
اوف يا اسماء ماندري يمته تريحنه هل دنيا كل ماكول خلصت اطيح بالاضرب
........
ملكه: شبيك تعيط ناقصين هرجه
اسلام: يمه والله الي اشوفه بعد صاعد فوك أحط رجلي ...
ملكه: يا يا خاب اسكت فضحتنا الصبح سويتلك سالفه وابوك متحاميلك عليها وهسه جاي تصيح جدام الاوادم هوه منو صاعد لمهجومك
شني من صاعد مو ذني باتن فوك
اي شبيهن
ريحة السويت تكتل مدري شمسويات ما مسويات
انهجم بيتك شيسون غير نامن
اووو يمه مابيه حيل اضل احجي هسه إنه طالع خلي وحده من خواتي ينضفنه واذا اجيت لكيته نفس زبالته اهنيهن كدام الخلك
وبناتي شعليهن مو عندك نساوين اثنين جيب ذيج المصكوعه الاولى لو ثانيه ينضفنها
يمه و محمد راسي اليوم يفتر وانت حاطتلي ذني ذيج مو اداري امها والثانيه اشوف الجلب ولا اشوفها نفس ماكتلج هاي هسه جاي خابروني
يا وك وين هاج عاد اكعدلك شويه يم العالم
منى: خير عمه شكو
عمى العماج شوفيلج وحده من ذني المدهورات ينضفن طابق اسلام
جا هوه مو عنده مراه بعد حيلي
انطمي وزلي عن وجهي
....
نسرين: ماكو ميرد اسماء
دتعاي هسه جاي يصيحونه خنخلص شلون ماجان ونرجع اندك
يا البنيه ضايعه اسماء وين بيه حيل اكوم
لمى: ها
اسماء: خيرج
لمى: ماكو بس عمتي اصيحلجن
اسماء: جايات يلا كومي نسرين ( وعضلها شفتي حتى متحسس احد)
.....
ملهم: ( ضليت ادور بالبستان ماكو كلا خلي ارجع اكول وخلي يدورون عليها لان وحدي مجاي الكاهه ستوني اريد ارجع واستوقفني صوت ضحكه صديت ليوره ماكو بس ليغاد جان أكو حفره من اتقدمت واشوفها كاعده بنص هاي الحفره و تحفر زايد بايدها وكلها طين من فوك ليجوه وتحجي كانو احد يمها الموقف جان يصدم بيه عدة مشاعر خوف على تفاجئ على عطف حجيت بصوت متردد)
ملهم: ايلااا( باوعت باتجاهي بخوفه ورجعت باوعت بإتجاه مكان بصفها وحجت بهدوء)
إيلا: اشش على كيفج ملهم حباب ميعصب ولا يكشف مكانج لاحد مو ملهم
ملهم: ( اني من الصدمه اهز براسي ضحكت ومدتلي ايدها حتى اسحبها سحبتها و رجعت مدت ايدها العدم وعود هم رفعت احد اني بس صافن )
إيلا: شوفي مو كوتلج ملهم يختلف عنهم حباب و كيوت ههه
ملهم: ( اني بس صافن دغتني بايدها باوعت بمعنى شكو)
إيلا: شبيك ملهم مو الابنيه دتحجي وياك
ملهم: ها اي شتكول
إيلا: انوب صار أطرش ههه شلونك تكولك شبيك
ملهم: اي اي زين يلا ايلا امشي امج راح كلبها عليج
إيلا: يا ماما خطيه شفتي كوله من وراج لا لا تبجين اسكتي عفيه ملهم سكتها
ملهم: ولج وينها
يا هاي شبيك هياتها كدامك
اي اسكتي مو عليج
شوفي حتى ملهم يكول مو عليج وانت شبيك حوليت تباوع لهنا هاي وينها هيه
( خبلتني اني ضليت بس امشي واقرأ ايات )
إيلا: يا صدوك شبيك ملهم دتحجي وياك
زين الحمد لله
شبيك دتكولك مراح ارجع وياكم راح تروح لاهلها
( الحمد لله ياربي ) اي خلي تروح براحتج( خرب ببليسي انوب انه هم تخبلت ومن كل عقلي اشرلها باي )
شبيك ملهم اليوم شجاك أنصحك تروح دكتور نفسي
( كالت هيج و عافتني وطبت للبيت والله صدك اذا ضليت وياج زايد اروح للشماعيه مو بس دكتور)
ملهم: طبي من هاي الباب متشوفين نفسج مطينه روحج اطين
ايلا: اوفف افتهمنا ( دخلت من باب الممر هوسه ومحد منتبه بسرعه على غرفتي اني و ماما طلعت ملابس ورحت أسبح اول مطلعت لكيت ماما بوجهي توني اريد احجي وياها و ماحس غير وجهي انفر)
نسرين: انتي شنو من بشر ولج ما تخافين على نفسج خافي عليه كولي عندي مهجومه ام اذا طاحت بعد منو إليه ولج اطلع من سالفه اطبيلي باضرب ارحميني لا يوميه مخليتني اشب و انطفي
إيلا: ( باوعتلها و الخنكه و الدموع بعيني ) اسفه ماما
اوف تجبريني امد ايدي عليج استقري يا امي خلي ينتهي العرس الأكشر شوف حل المصيبتنه ويه اسلام
تمام ماما اكدر انام هسه
اخذي علاجج من اول ما اجينه لهسه على حطيته
تمام راح اخذ
لاتزعلين مني غير المصلحتج متفركع كلبي
اعرف ماما خلص لايضل بالج
ماتحضرين العرس
تؤ مالي نفس( رحت نمت وغطيت نفسي ضلت تستغفر و طلعت واني اخذتني النومه)
.......
ملكه: ما تخابره تعاينه وين ما وين صار حته نصب الزاد
هلال: طبه وجع الاجه و الما اجه هذا ابنج انطيته مجال هواي
على بختك جا انت جديد على طبعه
خايبه فشلني جدام ربعنا
اي دستو بطنه و هو حوصلته صغيره ياعيني
انه ماخابر شوفيلج واحد خابري من عنده
نسرين: ها يمه خير أكو شي
هذا ابوج متخارب على اسلام حته مايرضه يدك عليه تا يجي يتغده
هسه انه ادكلج عليه
اي عفيه وانتن يلا صبن
نسرين: ( ضليت ادك ميجاوب اخر مكالمه رفضني ورجع دك)
اسلام: الو
ها اسلام
هلا خوما صاير شي
لا ماكو شي بس امي موتت روحها عليك تريدك تجي على الغدا
حسبالي شو شكو هلكد داكه كولي للحجيه ما اكدر اجي عندي شغل
اسلام مو تعرف أكو ناس كومه يمنه عاد اوكف ويه ابوي نسيه شويه
نسرين وحق محمد روحي بالكوه لازمها يلا روحي خلي اكمل الي بايدي عود المغرب أجي
ماشي الله وياك
هلا
نسرين : يمهه عود اسلام مايجي عنده شغل
هلال: يلا تعالو على الزاد تعالو
لمى: هم مراح يجي حتى نفسي انسدت
مينا : اكلي يختي احسن ما يكتلج الجوع
لمى: اوففف
ملكه: تعالي نسرين وين رايحه
يمه بس اودي اكل الايلا واجي
ام تقي: مزاجها برتكالي ماتجي هين حالها حالنه
ام حسن: ياا جا انه اشوف الرجال اول عرسه يضل مستجن يم المراه هاي شردته
ام تقي: زعطوطه شمفهمها جا هوه عينه ما عاينت لمى جنبذه و تناسب عمره
ملكه: قسمه بعد اكلن اكلن
هلال: عوفوا السوالف من الزاد مصبوب
طالب: عاشت ايدكم الاكل هيج طيب
.........
إيلا: ماما ما اشتهي
دكليلج لكمه يا امي لاتعذبيني
تمام ماما لا اضوجين وانتي ما تاكلين
رايحه اكل يمهم
اوك يسلموو
ههه اخ ام لسان
إيلا: ( ضليت اتفرج على مسلسل واكل جد الاكل طيب خلصت خليت الصينيه على الميز مابيه حيل اطلع ضليت اكلب بالموبايل وذني كل شويه طابات طالعات عود يتجهزن و كل شويه سالتني انتي ليش كاعده اهنا ليش مو فوك و ليش ما تبدلين اني حتى ما اجاوب و اسمع الحش بيه و مطنشه مالي مزاج شويه وصارت الهوسه عود اجتي العروس شلون عروس عاد
.......
اريج: ها حمزه انت جوه
اي يم الباب مال البستان منتضرتج
دكوف هسه دقايق و تجي الزفه عاد اهلي يتلهون بيها
يلا جبدي انتضرج عسى ما اموت على بابج
اسم الله عليك اي اجوي اجوي نازله
منتضرج غلا
اريج: ( نزلت كلها ملتهيه اباوع عليهم اخواتها يبجن و امها و انه كبل سحبت نفسي و طلعت رتبت وجهي على مراية المغسله و طلعت شفته استحيت دنكت راسي هوه اكلني اكل اتقرب مني
حمزه : هاي شطالعه شني هل جمال اخ حتى نسيت اسلم عليج
اريج: ههه كافي ترا خجلتني
خجلي جعل محد غيرج يخجل يصير الزم ايدج
لا لا عفيه
بس اريد احس انتي يمي ما جاي أحلم
........
إيلا: ها خلصت
نسرين: اي راحو
شبسرعه أخذوها
مادري ما طولو كبل مشو ما طلعتي تونستي
يووو ماما اتونس بهيج اماكن تعرفين اني شنو
خشمج نزلي لاترفعي اهنا مو مثل اهناك
What ever
اوف ماصيرلج چاره ديري بالج يحجي وياج اسلام وتلاسنين
دخلي يروح ما احجي ويا اصلا
اي عفيه لاتحجين احسن
.........
مصطفى : اي همزين فضت شكونا شك
ملهم: مبروك اختك عرست
وعلي يا ملهم اجي اغير ملامح وجهك
جا شبيها واذا اختك عرست ( وغمزت اله و ضحكت هوه ركض ورايه يريد يضربني )
جلال: شبيكم صغار
ملهم: عمي اليوم منوو عرس
جلال: رحاب غير
ملهم: ( كلهم ضحكوا و جه مصطفى طك عافنه و طب وانه هم مشيت اعاين باب البستان مفتوحة معقوله إيلا هم طلعت رحت اشوفها)
....
اريج: حمزه عفيه كافي خليني اطب هسه احد يشوفنه
حمزه ملتهين لا تخافين لاتصيرين جبانه يمي و تخافين خلي أشبع عيوني منج
اريج: بس ( توني اريد احجي و اسمع صوت ملهم ورايه قلبي احس حتى نسى يدك سحل حمزه من ياخته وراح بإتجاه البستان حمزه صغير كدام ملهم ضخم اني اباوع عليهم ملهم يجر بيه و يصكع كبل ركضت لكيت امي جاي أصلي بالغرفه اني كعدت بالزاويه و من الخوف ماعرف ابجي شويه واجه ملهم يصيح
ملهم: افتحيي القندرههه انه اعلمج ساقطه والله للعن سلفه سالفاج اليوم
اريج: ( هوه يحجي وآني متت من الخوف امي كبل سلمت و كامت تصيح)
اسماء: يا اسم الله الرحمن خايبين شكووو
اريج: يمه عفيه راح يموتني لاتفتحين الباب
اسماء: شمسويه يمصخمه يمعزايه
والله ماسويت يمه عفيه
ملهم: يمه تفتحين القندررررره لا والله افضح حتى نفسي هين
اريج: ( راحت امي تفتح وآني مجلبه بيها واتوسل فتحته وهوه بسسرعه معشني من امي وضربني ضرب كل و ماعنده قوه وامي ضلت تصيح نامت فوكايه حتى تمنعه بس هو انكلب كلاب الا امي اختنكت و صاحت
اسماء: ولك كلبي فرفحتني راح اموت
ملهم: ولج يمه ترضين هاي بنتج الساقطه تنزل راسنا لكيتها مواعده حمزه الاجرب و كاض ايده
اريج : ( حسيت الزمن وكف من سمعت عمي اسلام يكول من بعيد )
اسلام: هاي شكووو شصايررر
......
للروايا بقايا ❤️
حبايبي تابعوني انستا انشر اشياء تخص الابطال mi_itss5 تعبوا نفسكم شويه دعموا القصه
وتابعوني أهنأ علمود نكبر اهم شي تعليقاتكم اتشجعني اكمل و تصويتكم حبايبي تفاعلو