قيود عشك الشيخ

قيد التاسع

خايف أجَيك بلا وعِي
ومَا بيك تستقبلني
أنه أعرفك تحَب تبتعد
بس ما عرفت تحَبني .

﹌﹌﹌﹌﹌﹌﹌﹌﹌﹌﹌﹌﹌﹌﹌

"ســـمر"

::- اريد الايــسر

::- اعتبري تم

::- شلون وشوكت

::- خليها علية وما عليج بالباقي المهم الاريدة منج تصغيلي وما ترفضيلي طلب

ابتسمت::- هذا هو من ايدج هاي لايدج هاي

ابتسمت وهزت راسها برضا اردفت::- راح تفيديني اكثر وحدة بهل بيت حتى اكثر من الجلبة رؤيا

::- على طاري رؤيا ما اريدج تاذينها حرام

::- هاي الموضوع خاص بية ما عليج بس العليج تعرفين شلون تفرين عقل الايسر وتخلي الج وحدج

هزيت راسي موافقتها عافتني وطلعت راسلت تبارك سولفت الها عن الصار وهي تشجعني عزمتها تجي نقرة سوة وهي كيفت طارت وفرحت تجي نقرة سوة ونخطط شلون ايسر يصير الية

من بعد هل يوم عطلنا وكمنا نقرة للامتحانات الوزارية اية بعد ما شفتها ولا سمعت اخبارها خالة فاطمة اجت اخذت ملابس اية وكتبها وكلشي تحتاجة وهضمتني من باوعتلي ولا عارتني اي اهتمام

عاتبت عمة جميلة لان تهمت اية وعمة جميلة شفتها بعيونها نظرة ندم بس هم ما سكتت وكالت تستاهل هذا عقابها علمود ما تعيد الغلط

مر اسبوع وانا ما اطلع مجرد على اكل كلة بالغرفة اقرة للامتحانات وبيوم جنت بغرفتي كل عادة اقرة ودخلت علية شروق وهي تحجي::- كومي

::- وين

::- كومي نروح للسوك نغير ملابسج

::- ليش

::- تردين الايسر لو لا

::- ها

::- تردين لو لا

::- اي طبعا

::- كومي بدون حرف زايد كومي يلا

كمت بسرعة فرحانة لبست على سريع وطلعت لاكتنا عمة جميلة وهي تكول::- ها وين رايحات

اردفت شروق::- ردت انزل للسوك وكلت اخذ سمورة وياي علمود ما تمل اشوفها دوم حابسة نفسها بالغرفة

هزت راسها عمة واردفت::- زين تسوين خية البت راح تنخرط من السادس

::- اي

::- يلا خية هم يلا نروح ونرد

هزت راسها واردفت::- روحن بس لا تتاخرن تعالن قبل لا يرجع الشيخ

::- عندة علم خية كتلة

طلعنا من البيت ورحنا للسوك لخذتني لمحل حيل راقي وحلو وعدهم شغلات تجنن باوعت للرجال واردفت::- نريد نيشان لهاي العروسة الحلوة طلعنا احلا ما عندك

ابتسمت وفرحة بانت على وجهي اتخايل نفسي وانا عروس لايسر يمة حلم حلم وشوكت يتحقق

اباوع لشروق وين الضيك وين الدشداشة الدلعة تخليها بالعلاكة اباوع الها واردفت::- عمة انا ما البس هل شكل

باوعتلي ما راضية:: من هل يوم تلبسين وتذبين هل اخرك الي عليج

::- ما اكدر و الله استحي

::- امشي لعد نرجع وخلي اية تاخذ منج ايسر

صفنت بوجها واردفت::- لا يلا اخذهن بس شوي حجم اكبر

::- شبيج خايبة هو الزلم تحب هيج لبس اسكتي لا تحجين

سكتت تجيب تراكات وتحط اشترتلي هم مكياج وهي اشترت لروحها بعدها اخذتنلي لمركز تجميل عبالي الها تفاجئت من كالت::- اريدلج تحفيلي هل حلوة وتمشرين حواجبها نظفي بشرتها اريدها تلمع

تقربت الها::- ولله عمة جميلة تموتني

::- اسكتي وما عليج جميلة خليها علية بس طاوعيني

هزيت راسي وكعدت على كرسي والبنية بدت تشتغل بية اول ما حفتلي وشمرتلي حاجبي طلعت غير شكل اباوع لنفسي ومبتسمة فعلا الحفافة تبين البنية على شكلها جان حاجبي ثخين حيل ونازل الشعر على جفن عيني من كد ما ثخين

شمرتة شمرة حلوة وبدت تنظف وجهي وخلتة يضوي يخبل صار اباوع لروحي هاي مو انا فعلا جنت ظالمة نفسي

طلعنا و انا الدنيا ما ساعيتني وكل شوي اتشكر من شروق::- عمة ولله ما اعرف بشنو اجازيج ولله طلعت اخبل حلوة طلعت

وهي تضحك ساكتة بعدها رجعنا للبيت اول ما دخلت جان عمة جميلة وسهاوي كاعدات ياكل جاي وكعك بس رفعن راسهن وشافني ثنينهن شهكن متفاجئات اردفت عمة جميلة

::- دهر صاب راسج خايبة من دهر فلكج شمسوية بروحج ول خايبة يمفلوكة

دنكت راسي خايفة اردفت شروق::- خايبات مالجن البيت صغيرة بعد يومين تدخل كلية خو مو تخلنها هي وشعرها بعدين الزمن اطور الشعر وصاخة وشالتهن خلي البت تعدل من نفسها اطور من روحها روحن شوفن البنات اذا وحدة ما حافة العتب علية

سكتن ما راضيات وعمة جميلة ابتسمت وهي تكول::- اخافن من عين عليها من دهر صاب راسها طلعت البت تضوي ضوي اخافن عليها

ضحكت شروق تباوعلي ابتسمت فرحانة اباوع رؤيا واكفة ةتباوع النا بحسرة خلت ودخلت لجوة ما راضية

وعمة سهى ما علقت ابد بس ملامحها ذيج ياها مبينة مقهورة من عدنا وما راضية على كلشي حتى ما حجت ولا علقت

بسطت بيناتهن وراويتهن الملابس وهي يكولن حلوات باجر الولد يجون وانا متوترة خاف الايسر يحملني ذنب بطلعة اية

نمت وانا بقلق ثاني يوم كعدت من الصبح سبحت وبدلت ونشفت شعري وسحبتة باوعت محظرة تراك ستن وردي

رفعت شعري ذيل حصان وهو طويل واسود خليت مكياج بسيط وبقيت انتظر اطكطك بادية من الخوف والتوتر

الليل وانا على هل حالة ما استقريت وبطني تلويني من التوتر والقلق

سمعت اصواتهم جوة وعمة جميلة تحجي نزلت لجوة اباوع بس اصيل حاظن عمة جميلة رفع راسة تعلكت عيونة علية

يباوعلي وبكل تركيز نظراتة بيها لهفة واشتياق ارتبكت من نظراتة دنكت نزلت هو حتى ما يرمش وصلت يمة هو ابتسم::- الحمد الله على سلامتك

::- الله يسلمج شلونج

بعدني جاي ارد ودخل الايــسر يرعد رعد بمشيتة باوعلنا وما احس الا دفر الطبلة البنص الصالة طشرها وصار الكزاز على كبر الصالة

اردف بصياح رايحة روووحة::- شممسوووين الهااا هااااا شمسوووييين الهااا ماا تقببلل تفتحلييي الباالبب اييية مااا فتحتلي البااااب

ركض اصيل يريد يلزمة دفعة وشال التخم ابو نفر واحد وركع بالكاع انكسر نصين اردف::- ليييشش مااا تفتحليي شمسوووين الهاااا هاااضميننهاااا اصصصيللل هااضمينهااا شكااايليننن الهاااا تكللليييي محددد الييي عشتتت وحيدددة وانتووو موووجودديننن شمسووويلهااااا

دخل اثير يركض ما احس الا الايسر تقرب ركع اثير بوكس بنص وجه واردف::- مووو كتلكك عينكك علييهااا مووو كتتتلكك

شهكت عمة جميلة تبجي::- ولك يمة اكعد احجي وياككك

::- وحككك كلللل عزاز كلبي مناااا لساااعةةة اذذاااا مااا فتتحتتت الباببب اليييي وحككك ربببككممممم احرركمممم وانتووو بالقصصصصر وربيي احركممم كلكم

يريد اصيل يلزمة ماكو اجة اثير سحبو سوة واكفة وجسمي كلة يرجف يرجف من الموقف هزني هز موقفة ردت اموت وانا اشوفة كدامي بهل شكل هذا روحي طلعت لباريها كلبي يخفق بشكل سريع

عمة جميلة تصيح::- جيبو جواريبي ولكم من عمت عينكم على هل هبطة الله ياخذني وارتاح تف عليها من عيشة جيبو جواريبي اروحن لذيج اشوفنها شبيها مفرفحة كلبة فوك شينها

لبست جواريبها وراحت تهف وانا واكفة بنفس صدمتي حسيت تسحبت من ايدي اباوع شروق حجت::- لا تظلين فاهية روحي وراه

ضربت خدي منهارة دموعي تصب::- شفتي شلون مقهور لان ما فتحتلة الباب جنت واكفة اصلا ما شافني ولا عبرني ولكم شفتو شلون منهار عليها ما يريدني ما يريدني

الطم على خدي ومنهارة ابجي سحبتني تتعارك وياي::- كتلج مو هيج مو باول محاولة وتتستسلمين روحي روحي

دفعتني اتحرك وانا جسمي كلة يرجف دموعي على خدي اتقدم خطوة وارجع عشرة لورة

"ايـــة"
طول الايام الي راحت وانا ما طلعت من غرفة ابتهال نقرة انا وياها سوة وبيوم المغرب خلصنا صلاة وجاي نطبخ بالعشة

اتصل موبايل عمو سلام ضحك هو يكول::- هذا الايسر متصل علية

رفعة وفتح سبيكر هو يحجي::- هلا بالسبع شلونك وليدي

جاوبة بصوت غاضب'?::- اية وين

رفع راسة عمو باوعلي ودنك يحاجي::- يمنا اية

::- جايهم انا جايهم اذا ما احرك البيت على روسهم ما اتسمى الايسر

::- شل قضية بوية شنهي ما تصير مشاكل كل بيت والة مشاكلة وبعدين البيت بيتها شوكت ما تجينا هلا بيها

::- هضموها مو?? نزلو دمعتها?!! طردوها?!! اذا ما ازلزل البيت عليهم وحك داحي خيبر اذا ما اخليهم يمشون ويتلفتون جايهم

كالها وسداه طفر عمو سلام هو يكول باستعجال::- انطوني الدشداشة ولكم هذل لا يسويلة عملة هسة بنص الليل

ركضت ابتهال جابتلة الدشداشة طلع يمشي باستعجال غمضت عيوني ونزلو دموعي صعدت لفوك ما اريد اواجه اي واحد بيهم كل هل فترة انا هنا محد سال علية ولا واحد فكدني غير اثير يجي من الباب يسال شمحتاجة ويرجع

اكيد راح يجبرهم كلهم يجون يعتذرون ويرجعني بس انا ما اريد ارجع لان هو طلب منها

ركضت للغرفة وقفلتها ماكو هي لحظات لحظات واسمع دبجة على درج هو يربد الكاع ربد اندك الباب هدوء وصوتة الخايف اجاني::- اية حبيبتي افتحي الباب انا ايسرج اجيب يبعد روحة انتي اجيت

دموعي تنزل على خدي ما حجيت بقيت ساكتة اردف يتوسل::- وربج اندمهم بس طلعي راويني وجهج يبعد وجهي يبعد روحة لايسرج اجي تعبان من الشغل وما يريحني غير ملكاج لا تعبيني فوك تعبي

شهكت غاصة كوة علية رديت بصوت مهضوم::- روح ايسر

ما احس الا كام يرعد علينا رعد ويدفر بالباب::- ورربجج اندممههممم وررربببججج اذببحهمم ذببحح وحقق دااحيي الباب كللل دمعةةة وكلللل شهكةةة طلعتتت منجججج ازووعهممم ددمممم

كالها وراح واسمع اصيل يحجي وياه وهو يشيل روحة ويطكها بالكاع صارت هوسة جوة وعمو سلام يحاول يهدئ الوضع

شوية واختفت الاصوات وانا دموعي على خدي سمعت دكة الباب وعمة جميلة تصيح::- خايبة فتحيلة الباب هذا راح يحرك البيت على روسنا

::- تستاهلون

::- يع يع من دهر صاب راسج خايبة هذا مسودن يسويها ولج فجي الباب لا افج راسج بالعوجية ولج ما اكدرش وصعدت درج من حظرة جنابج

بجيت وكلت بصوت مهضوم::- ما افتحة وين جنتي هسة يلا اجيتي طرديتني من البيت لو عندي اهل ما سويتلي هل شكل كلكم تصدوكن بسمر واية الوكحة المنبوذة الي محد رايدها سمر عدها عم يطلع وراها بس اية ماعدها احد لا عمام ولا خوال

اردفت بحزن::- خايبة اطلعي مردتي كلبي اطلعي خل نسولف

ما احس الا اجة صوت اصيل يدك بالباب بستعجال هو يكول::- اية بروح عزازج طلعي هذا تسودن يريد يحرك البيت اطلعي لخاطري

فزعت بسرعة جريت شال وفتحت الباب اباوعلهم وجهوهم صفر عفتهم ونزلت طايرة على درج طلعت من البيت بتراكي ودخلت للبيت الثاني اباوع للـ الايسر واكف ويرش بانزين على طول الطارمة

ضحت بصوت رايح::- ايييسسسسسررر

التفتت يباوعلي عيونة تتجادح نااااااار ناارر ولله لو عيونة تحرك جان حركت العمارة كلها ذب الدبة من ايدة واصيل دخل يلهث فحطان من الركض

تقدم بخطوات سريعة وما احس الا سحبني من ايدي مطلعني من البيت كلة صعدني سيارتة وساقها تحت انظارهم وفزعتهم

حرف ما نطقت بس صوت انفاسنا الطالعة شهكت وانا اشوف::- العمارة تودعكم

::- وين رايحين ايسر

جارب بكل برود::- ما يردوج مو عساهم انتي هم ما ترديهم نمونة هم?!!

سكتت وانا اتذكر كلام سمر::- رجعني انا حابة ابقى عد خالة فاطمة

::- يحلمون بس يشوفون ضفرج

::- ايسر

جاوب بصوت غاضب ميت قهر::- اشششششششش

غصب عني سكتت وكلام سمر يدور ببالي جسمي ينكث من الخوف::- الله يخليك كافي راح اموت من الخوف رجعني

كلتها وبجيت بعد ما كدرت اصبر روحي وكف السيارة وحجة::- منين خايفة مني?!!

::- لا

::- جا منين

::- ما اريد اجي وياك رجعني

::- ليش بوية ليش حبيبتي ليش?!

بجيت::- ما اريدكم رجعني لخالة فاطمة

::- شنو ذنبي تبعديني عنج لا تعبيني انتي بيدج تنهيني وبيدج ترجعين تحيين لا ادمرين اية

بجيت اكثر حايرة::- رجعني الله يخليك رجعني ما اريد

::- مو على كيفج اذا ما خليتهم يتوسلون بيج حتى بس ترجعين ما اتسمى ايسر

::- وين ماخذني

::- لبغداد

::- بغدادد??!!

::- اي عندج اعتراض

سكتت الطريق كلة بس ينافخ ويكز اسنانة يغلط ويسب كلب الدنيا كلاب

من التعب والهبطة الاخذتها بسرعة نمت كعدت على طبكة الباب اباوع صفينا يم بيت بابة صغير باوعت الة من فتح بابي::- انزلي

::- ايسر

نفخ بقلة صبر::- انزلي اية كوة واكف على حيلي نزلي

اباوعلة يفتح بعيونة ويسدهن كوة واكف ومبين التعب على ملامحة جريت حسرة ونزلت سد الباب السيارة وقفلها وطلع مفتاج صغير من الجيبة فتح بي الباب

دخل ودخلت وراه اباوع للبيت طارمة صغيرة وبيها ركن صغير حديقة خطوتين وتوصل للباب الثاني فتحنا مطبخ صغير وململم وجوة صالة وغرفة وحدة

بقيت افتر بي متعجبة منة حيل حلو وململم اردفت::- منيلك هذا البيت

::- بيتنا انا واصيل نجي بي من نخلص شغلنا

كالها وذب روحة على تخم رايحة روحة ووجه اصفر من التعب اردف::- رايح اسبح اذا تكدرين تسويلي عشة واذا ما تكدرين عوفي من اطلع من الحمام انا اروح اجيب

هزيت راسي واردفت::- انا اسوي

هز راسة وراح دخل رحت للمطبخ اباوعلة ميتة بي كاونتر بيج حيل صغير وحلو ملموم وياه سنك وطباخ هم صغير ابو عينين

رحت للثلاجة متوسطة لا صغيرة ولا جبيرة فتحتها اكو بيض وطماطة وخيار فقط

طلعت البيض والطماطة سويت مخلمة وقطعت خيار هم وسويت وياهن جاي علما خلص طلع اردف::- اجيب صمون واجي

هزيت راسي وهو راح يجيب صمون وانا كعدت انتظرة شوية ورجع كعدنا ناكل بهدوء وانا بالي يم خالة فاطمة اكيد انشغل بالها

كام غسل وانا وراه رحت اردفت::- ايسر

تنهد وهو يجاوبني عيونة بعيوني::- روحـــة

سكتت ابلع ريكي اردفت::- خابرهم طمنهم ما يصير هيج هسة مشغول بالهم

::- خليهم احسن

كالها هو يمشي حتى ما انطاني مجال احجي شي بعد راح للغرفة وسد الباب وراه ظليت كاعدة على التخم بالصالة واتابع مسلسلات هندية مسلسل ورة مسلسل وراها بدة فيلم لشاروخان

ب12 ونص كعد ايسر يحك براسة والتعب مبين بي ذب روحة يمي واردف::- يا بوية تعبان

باوع للفيلم وابتسم::- هندي?!

سكتت هو هم سكت يتابع وياي جان الفيلم حيل رومانسية وبنفس الوقت حزين طلعت لقطة رومانسية هي والبطل

جنت مركزة حيل ما احس الا اجتني دمغة على راسي اباوع لايسر يخزر بية سحب الريمونت مني وداراه على غير قناة

ردت الكاع اطمني على هل فشلة نسيت روحي عبالي كاعدة وي ابتهال فكيت حلكي شبرين امداني

اباوع داراه على غير قناة مال لعبة عكفشت وجهي بقرف وردت اكوم اردف::- كعدي احاجيج

::- ايسر تعبانة

::- كعدي كلت

تنهدت كاعد كدامة كتم الصوت والتفتت يباوعلي::- اي

::- اي?!!

::- اي اية??!!

::- اي شنوو

رفع حاجبة مخنزر::- ما ناوية تحجيلي

بلعت ريك جسمي يرجف من القهر كلما اتذكر الصار دنكت راسي واردفت::- الصار صار وانتهى

::- ماكو شي ينتهي الا اذا انا نهيتة مو بكيفج الحجي هو احجي شصار

باوعتلة معصب ودمارتة مبينة اردفت::- ايسر..

عاط كاز اسنانة::- اية احجيلي هسسسسةةة

غمضت عيوني من صرخ بوجهي دنك يمسح بوجه يحاول يهدئ من نفسة تنهدت وبديت اسولفلة وهو كل ما احجي يتسعن عيونة اكثر ويشد على ايدة اكثر

مسحت دموعي واردفت::- سمر عبالها سويت هيج عناد بيها لان هي عادتني لان ادافع عن رؤيا

اردف ببرود وغموض::- مو جان المفروض ما تتسرع ?!!!

::- ايسر هي رادت تحل الموضوع بس...

::- لا تبرريلها!!!!

::- ما جاي ابرر الها بس هي ما جانت متاكدة وحلا للمشكلة هيج كالت

::- اممممم خوش بوية خوش

اباوعلة يحجي بروحي بس شكلة ما يوحي للبرود باي شكل جان عبارة عن بركان هادئ باي لحظة ينفجر اردفت بخوف من برودة::- ايسر

قاطعني::- روحي نامي يصير خير

::- شراح تسوي

::- كلشي ما راح اسوي هم الي راح يسون

::- من هم?!!

::- الج الصافي نامي رغد

خفت وخفق كلبي ايسر اكيد مفكرلة بمصيبة و الله يستر من مصيبتة هاي

"أثـــير"

كاعدة عمة سهى يمي تحط على وجهي ثلج ايسر مو ايد علية عبالك كرك لكمني بضلبة نص وجهي انكلب ازرك على كولة جمول دهر صاب راسك اي ولله سوالي شلل نصفي بوجهي

اباوع عمة جميلة تلوب واصيل يحاول يهدئ بيها::- شنهي بس واحد يدوسلها على طرف يتسودن يع انوب علينا يريد يحركنا على مودها شنهي صاحي هذا

::- عمة كل نعرف اية ما تسويها

::- من دهر صابكم وصاب اية من دهر فر زماني ما اخذني وارتاح عافني ينشلع كلبي بفواينكم

ابتسم اصيل::- عمة شل قضية كولي يا الله عمرج طويل ان شاء الله

::- خايب ويعة روحي ذاك اخذ الفرخة لوين اخذها كلبي يلوب ساعة تخبلت من وراكم ولعباس ابو فاضل شنهي يتخذها ويروح بيها خابرة كلة وين ماخذ الفرخة

::- خابرتة ما يرد و الله اتصلت علية هواي وماكو جواب

ضربت رجليها تحجي بقهر::- يريد يجيبلنا السمعة يريد يطيح حظ الفرخة فوك ما هو طايح خايب وديتها علمودن ما تزيد المشاكل

::- بس غلطتي يا عمة المفروض ما تسوين هيج

سكتت تلوب تلوب رجعت حجت::- وشنهي هو وياها صح خطأ وياها ما يصير هيج تظل تغلط وما تتعلم ولله ايسر وراي شنهي ما يصير هل شكل بت غير تتعلم من غلطها ضربت ابوك بالشاحنة

طفرت انا واردفت::- غلط على اهلها لو انا بدالها ويجي واحد يغلط على اهلي احطة واكتلة لو مو عمي

صفكت اديها بقهر وشمرت علية الكوشة::- من دهر صاب روسكم مربيتلي مجرمين انا بيتي

ضحك اصيل::- عمة هسة انا تعبان باجر نحجي بالموضوع

راح اصيل وهي بقت تلوب تلوب اخر شي ما تحملت كامت تعد تعد تعد وتغلط وتسب وتفشر علينا ما خلت حجاية بكلبها ودخلت لغرفتها وركعت الباب

ضحكت وانا اكول::- عمي زين هل مرة طولتي يلا ذبيتيهن

راحت ابتسامتي وانا عيني راحت للمخزن ما اعرف شنو الصابني حياتي جانت نظامية وكلشي الة مخطط واهداف شكو شي اريدة اخلي كدامي مثل الهدف واخذة

هيج مشيت على طول حياتي الا وياها ما اعرف شنهو الصابني ما اعرف شنهي الجرالي ما ادري شنو الاريدة

رجعت بذاكرتي لقبل يومين مثل كل يوم بليل بوقت متاخر انزل اكعد على بايات الدرج واسمع نحيبها وبواجيها وتعاتب امها وابوها

كامت روحي تنسحن سحن روحي تنطحن طحن وانا اسمعها تناشغ وتكول::- ولج يمة وين عفتيني ولج يمة بيا ضيم درتيلي ضهرج يمة راح اموت اريدنكم بوية تعال اخذني الكم

توجعني روحي وانا اسمعها حاس بيها انا هم جنت طفل ونحرمت من امي وما شبعت منها رغم السوتة ورغم السمعتة منهم بس اتمنى يوم الاكيها واكول الها::- ليش ليش خلفتينا وانتي تعرفين بنفسج راح تذبينا ما فكرتي بينا ما كلتي صغار منو الهم شلون راح يعيشون شلون راح يظلون وي بصمة العار الي تركتيها عليهم

اختنكت وكمت اسحن بالجكاير جكارة ورة جكارة رجعت بذاكرتي صارلها يوم كامل لا سمعتها ولا سمعت نحيبها

كعدت على بايات الدرج الوب ادك بالباب يربي شنو الاسوي رايح راجع احس دخت طلعت لبرة توجهت للمحل ما اعرف شنو اشتري

اشتريت حليب وعصاير ثنين ونساتل اربع انواع وجبس سويتلي علاكة وطلعت راجع للبيت وكفت يم المخزن ايد تتقدم وايد ترجع لورة

خليت العلاكة يم الباب كلت من تطلع تشوفهن باوعن لا مو هيج رجعت اخذتها ردت ادك الباب واشرد واخلي العلاكة بالباب بس هم تراجعت

ليش ما جاي يطلع صوتها احس روحي فرفحت وانا واكف اخر شي ما تحملت شي خارج ارادتي رفعت ايدي ودكيت الباب بسرعة طفرت وصاحت بصوت::- اية اجيتي تعالي فدوة تعالي ساعديني

روحي انمردت مرد كلت بيها شي حسيت شح الهوة علية وحمحمت اعدل الصوتي الرايح::- احم اا شسمة خوية محتاجة شي

جاوبتني بسرعة وخوف::- لا لا خوية ما بية شي

رجفتها وصوتها البي غصة دولبتني خلتني اشيل روحي واركعها بالكاع اردفت::- خوية محتاجة مساعدة كولي

اردفت مفرفحة::- روح فدوة روح

صوت شهكاتها شكن كلبي شك كمت افتر على روحي متخبل وهي عبالها رحت كامت تبجي تسودنت حرفيا

رحت اتصل بايسر الساعة ب3 الفجر ادك وماكو بالعشر مكالمات يلا رد طلعت روحي يلا رد اردف بخوف وقلق::- ها اثير خيرك

::- اية يمك

::- شنو

::- اية اية

::- شبيك ولك سكران

::- خرررب الكو** اكلة اية شبيك

::- قزرقرط شبيككك

::- انطينياها بروح اعزازك لا تشلع كلبي كوة واكف على حيلي

سكت اسمعة فتح باب وصوت خطواتة شوية واردف::- اية ايوتة حبيبتي كعدي احاجيج

يحجي وياها بكل هدوء وحذر وانا هنا مسموط ابو ابوي مشتعل جدي السابع عشر كمت اسب بيهم واحد واحد

واخيرا من بعد معاناة كعدت الاميرة النائمة روحي طلعت ولعباس بهل عشر دقايق اخذت الموبايل من الايسر واردفت::- ها اثير خير صاير شي

::- اية بروح والديج اريد تحجين وياها ما اعرف شبيها خايفة مني ما تقبل اساعدها

::- منو هي

::- البنية

::- يا بنية

غمضت عيوني اسب بيهم::- رؤيا

راحت روحي وي جرة حروف اسمها اردفت::- وين هي يمك

::- لا بالمخزن ما تقبل افوت الها دكيت الباب عبالها انتي وصاحت ساعديني ومن عرفتني انا كامت تطرد بية

::- روح يم الباب احاجيها

رحت يم الباب فتحت سبيكر دكيت الباب اردفت بشوغة::- روووح منااا

حجت اية::- رؤيا هاي انا

::- اية تعالي مربطيني تعالي راح اموت

انا سمعت هيج وبعد ما كدرت اوكف دقيقة شمرت الموبايل على صفحة ودخلت بسرعة للمخزن اباوع اضلم مديت ايدي فتحتة وريتني ما فتحتة

اباوع الها برجلها سنسلة وشادينها بالشباك احس كلبي واح يوكف وهي تباوعلي وتبجي وتصرخ::- روح روح لا تججيي هناا روح

رجلية احسهن صارن خيوط وانا اباوع الها شلون مكرفصة على نفسها وتبجي دنكت بهدوء افل بالسنسلة ما تنفل عفتها تبجي وطلعت رحت جبت من العدة مكرضة حدايد

ورحت كسرت السنسلة دنكت كاعد جسمي كلة يرجف::- جوعانة تريدين اكل

بجت ساكتة اردفت بنتر::- احجي

::- صارلي يومين هنا محد اجاني اريد بس ماي

غمضت عيوني بقهر هزيت راسي ورحت للمطبخ طلعت بطل ماي وسويت الها لفة جبن ورجعت انطيتها الماي واللفة

اخذت الماي وعافت اللفة اردفت::- اكلي

بقت ساكتة تباوع الها وتبجي كمت طلعت لبرة جبت علاكة الحلويات واردفت::- ما اريد اخذهن

باوعت الها واردفت::- اية وصتني عليج يومية اجيبلج حلويات بس انا انشغلت الايام السابقة عذريني

كلتها وطلعت رايحة روحي احس كلبي وكف كلما اتخايل منضرها .......يتبع

الفاتحة على روح المرحوم عبد ابن هدية 💔

اقرو الفاتحة واهدوها لـ روحة واكون ممنونة منجن 💔

حسابي الانستكرام الجديد 🩵