بين انيابهم

••العثــࢪة الࢪابعـة و العشـࢪون••

بســم ﷲ الرحمــن الرحيــم

السـلام عليڪم

#بيـن انيابهـم

#بقلمـي أنـا: زهــࢪاء

حساب الانستا: zaii1_8

لا تنسون التصويت +التعليق بين الفقرات

+احبڪم زهوراتـي 💋

ـــــــــــــــــــــــــــــــــــــــــــــــــــــــــــــــــــــــــــــــــــــ

شُـــــــذير

سميرة.... روحي كملي شغلج

شُـــــــذير.... يعني مو شايلة ألياس شلون اكمل عندي ثمن ايدين عنكبوت انيي؟

سميرةة... وسممم روحي بدون حجي

نفخت بضجر وكرهت حتى روحي خليت ألياس على الكاونتر يمكن اني هنا غلطت كعدتة ورحت اكمل غسل ستكاين والتهيت شوية واما اسمع الة صوت طيحة قوية التفتت بسرعة وجفلت من شفت ألياس طاح بالكاع على وجهة سڪر بالبجي اتلعثمت ڪُلش واتوترت اريد اتحرك ما اكدر دمعن عيوني وية طيحتة دخلت ليلى ووياها بنية للمطبخ ركضت البنية شالتة واتسكت بي ركضت الها اريدها تنطيني اياه جرتني ليلى عنها ودفعتني وصاحت

ليلى.... كبرر حتى كبرر الهااي الخلللقة طيحتتي الوللد لو متعمددددة حتى نخلصيننن منهم واخد ورة الثاااني ويحلالج الجووو

ما كدرت احجي بس ادموعي تجري
شُـــــــذير.... ا اني ك كلت سميرة ما

بعدني ما مجاوبة وما احس الة ليلى ضربتني راجدي قوي فتحت عيوني بصدمة واحس راسي انسطر من عدها دفعتها عني وصحت واني ابجي

شُـــــــذير.... انتتت منوو وتضربينيييي

ليلى... واڪسررر راااسج هممم باقي بس **** بنات الشوارع علينة

اجيت ارد وانفتح الباب التفتت شفت خالو أيســر دخل اول ما شافنة صاح

أيســر.... وقزز القرط صوتجن واصل الراس الشارع گولن زلم برة استجنن والعباس الاسمع الها صوت راس براس كافي علينة مصايبنة

حجاها والتفتت الـ ألياس شافة يبجي وخشمة ينزف دم رڪض اخذة من البنية ويحجي وهوَ يردد

أيســر.... شبييي منو وياااه وين طاااح

ليلى... هاي طيحتة

باوعتلة وهزيت راسي لا بخوف ايدي يرجفن وامسح ادموعي حسيت نفسي ضعيفة بيناتهم ماحاجني خالة أيســر باوع الـ ليلى

أيســر.... هيَ غريبة لا تعرفنة ولا تعرفهم شكو مڪبرات راسها و مطياتها الجهال كضنهم انتن عوزجن ايدين اي جاهل اشوفة بأيدها احاسبجن انتن

مسحت ادموعي بقهر هم صوجي اني ادخل اجيت انسحب واتذكرت نصيحة خالو زڪـــريا

شُـــــــذير... وداام اني غريبة عليكم بأي حق ليلى تضربني؟

زڪـــريا.... منو ضربج؟

اجت عيني على الباب خالو زڪـــريا جايب الصينية مالت الاستكاين وعاقد حاجبة خفت احجي وكلت خاف اتصير مشاكل بسرعة انسحبت وطلعت برة المطبخ خليت وصعدت فوك بغرفة آرام

دخلت للغرفة وانهاريت بالبجي منو هاي ليلى وتضربني لا اني يمها ولا شي يجوز انقهرت على الطفل بس مو تضربني اني من البداية كلت ما اكدر اشتغل شغلتين سوة انفتح الباب درت وجهي الة ما لحكت وليلى هجمت علي تجر بشعري وتحجي

ليلى..... ادبسززززز الخااايسة تررردين تخلللين راسج براسيي اكسررررة وارحعج الاهلج مابيج شي صااحي

خليت ايدي على ايديها اريد. اوخرها ما اكدر صحت بألم

شُـــــــذير.... وخريييي عنيي شعررري يااا نااااااس آرااام لحكينيييي

جرت شعري وقربتني الها اكثر لزمتني من فڪي وحجت وهيَ تكز على مخارج الحروف

ليلى.... عبالج ما اعررف سوالفج كللج كللج خلكك وحدة من الشارع لاا ضيعتيي اهلج ولا شي هاي جذبة بس حتى تلكين بيت يلفيج لأن محد يلفي هيج شڪول

دفعتها عني وصحت
شُـــــــذير.... كلمن يرررى الناس بعين طبعة

فتحت عيونها بصدمة وصاحت

ليلى.... قصددج انننننه بنتتت شوااارع؟

خفت من ردة فعلها ضليت ابلعم بخوف رجعت ليورة وصحت بتلعثم

شُـــــــذير.... لعد مو ما تقبلين على نفسج اني هم ما اقبل على نفسي

هزت راسها بقبول

ليلى... بسيطة انه الج اذا ما هججتج وانتِ مخبلة

حجتها وطلعت خليت ايدي على ڪلبي واحاول اهدي نفسي ڪلبي دڪاتة الف من الخوف والرهبة الي اني بيها ما اعرف شنو مشڪلتهن وياي وليش هالڪد كارهاتني بالرغم اني مو يمهن ومستحيل اسوي نفس ما يحجن ويتهمني

بلعت ريڪي وڪعدت بالكاع وينج تــــاج تعاي شوفي وين صرت بوسط ذئاب مو بشر شدخلني بنياتهم اڪثرهم كارهيني وما هاضميني غمضت عيوني بدموع مشتاقة التــاج والحنيتها عليّ ما اريد اختلط وية احد ثاني غيرها انفتح الباب فتحت عيوني وعدلت ڪعدتي دخلت آرام عيونها حمر ومبينة تعبانة ڪُلش شافتني وحجت

آرام.... شبيج ليش ڪاعدة وحدج؟

شُـــــــذير.... لا مابية شي احسلي هنا

آرام.... ڪومي نزلي راح يصبون غدة لا تبقين بدون اڪل

هزيت راسي وڪمت انتبهت الوجهي وحجت بنتر

آرام..... هااي منو طاكج؟

خفت اڪللها ليلى هزيت راسي بنفي

شُـــــــذير..... لا محد

خزرتني وكملت ڪلامها

آرام.... منو جاي اكلج خلي اطلع حرڪة كلبي بي ليلى لو سميرة؟

دمعن عيوني واتذكرت الوجع من ضربتني

شُـــــــذير..... ليلى بس عفيها لا تكليلها اني كتلج

اتخبلت آرام من سمعت ليلى ضاربتني جرتني من ايدي ومشت بية وهيَ تردد

آرام.... المايخافن من الله كدرن بس عليج اريد اشوف ماڪو احد يردهن

نزلنة جوة جانن النسوان نصهن يسولفن بالصالة والنص الثاني يصلي اتعدينة من يمهن جانن يشتغلن بالمطبخ اجينة نطلع برة وصاحت سميرة

سميرة.... وين رايحات زلم برة

حجت آرام من غير لا تباوع الها

آرام.... ڪلهم ولد عمي والغربة بالجادر برة

فتحت الباب وطلعنة

آرام..... اڪررم

التفت الها ولد شايفتة يمڪن بالحسينية اجة يمنة وهوَ يبتسم

اڪرم... ها ولج شلونج

آرام... الحمد الله وين زڪريا

اڪرم.... برة ليش

آرام.... صيحلة عفية

اڪرم... صار

اجة يروح وانتبه الي اشر علي وباوع الآرام

اڪرم.... هاي مو نفسها البنية

آرام... اي نفسها

هز راسة وراح برة كضيت آرام من اردانها وحجيت
شُـــــــذير.... آرام عفية خليها بعدين هسه ڪُلها هنا خاف اتصير مشاڪل

آرام..... ما يصير شي زڪريا يعرف شلون يتصرف بس سڪتي حسابج بعدين

شُـــــــذير.... اني ما الي علاقة

ما جاوبتني دخل خالو زڪـــريا ووياه اڪرم اتقدمو يمنة وهوَ عاقد حاجبة وصل يمنة

زڪـــريا..... ها آرام

آرام..... شوف زڪـــريا انه ما راح احجي شي بس شوف.....(كضت وجهي بأيدها واشرت على مڪان الضربة).... بربك حرام لو مو حرام ليلى مستقوية عليها مو بس ليلى حتى امها

فتح خالو زڪـــريا عيونة بصدمة حجة وهوا مو مصدك

زڪـــريا.... ليلى؟؟؟؟

آرام.... شبيك مستغرب اذا ما مصدكني هاي شُـــــــذير كدامك واسئلها

حجتها ودفعتني عليه دمعن عيوني وخالو زڪـــريا يباوعلي ومنتضرني احجي

زڪـــريا.... احجي ليش مدت ايدها عليج؟

شهڪت بدموع
شُـــــــذير..... خالو والله ما سويت شي جنت اغسل الاستڪاين واجت سميرة انطتني ألياس ڪتلها بيبي ما اڪدر اشيلة داشتغل ما قبلت اني خليتة على الڪاونتر وكملت غسل ما ادري بي ووكع بالكاع بس والله مو قصدي يتأذى اني ما اعرف اشتغل هيج لا جنت هناك واختي علمتني ولا شي اجت ليلى وضربتني خالو ليش يطعنون بية بالڪلام اني مو بنت شوارع ولا مو مرباية

زڪـــريا.... آرام اخذيها جوة وكولي الـ ليلى بالليل لا تروح وية اهلها عندي حجي وياها

راح بس مبين معصب ڪُلش اجيت اروح واڪرم هز ايدة

اڪرم... جا من طكتج طكيها شبيج ماعندج ايدين هيَ مرة وانت مرة

آرام.... شبيك هيَ ليلى تنڪدر لا هلا ولا مرحبا

انتبهت الخالو أيســر شايل ألياس ويفتر بي ما يخلي بالڪاع و راح كمل يحجي وية عمة معتز ورحمن

اڪرم... تدرين على اساس خطوبة حسيون بعد اسبوعين؟

آرام.... صددك يعني قبلو اهل البنية؟

اڪرم... ليش ما حجالكم عمي عبد الرسول اجانة للبصرة وراحو الاهل البنية واقتنعو بس المهر غالي واتحداج تعارضين حسن ياهو العارضة وكال بفلووووسي

آرام..... يستاهل والله بس ابوي ليش ما حجة

اڪرم.... ما ادري خاف ما راد يكول الحد ما يصير كلشي رسمي

آرام.... زين وهسه راح تأجلونها؟

اڪرم.... اڪيد مو الهاي الدرجة مستعجلين بعدة تراب البنية ما نشف مهمه جان جانت اختنة

آرام.... الله يرحمها ارغد شلون يدبرها وحدة جانت هيَ شايلة الجهال شيل

اڪرم... هذا عوج ما ينعدل.... يلا مو حلتلج السوالف اخذي البنية ودخلي

آرام... يلا باي

اڪرم.... هلا

اخذتني آرام من ايدي ودخلنة جوة رحنة للصالة كعدتني يم بيبي زهــره

آرام.... ضلي كاعدة هنا

زهــره.... وين جنتن

آرام.... بيبي بعدين اسولفلج

حجتها وراحت التفتت الي بيبي زهــره

زهــره.... وينج اليوم ماشفنة طولج

شُـــــــذير.... هذا جنت وية آرام

زهــره.... آرام جانت يمي ڪبل شوية ڪامت

سويت نفسي ما منتبهة وغلست اجت سميرة ڪعدت يم نسوان شوية وحجت بصوت عالي

سميـرة..... والله ارغد صوجة من البداية ڪنالة اخذلك وحدة من بنات عمك بس ما رد واخذلة غريبة والمرحومة جانت ما تتحمل كل ما تخلف واحد تتمرض

جاوبتها بنية مبينة عمرها بالعشرينات عيونها حمر وكاتلة نفسها بالبجي عاطت بحرڪة ڪلب

... ليش ما تڪولين ارغد جان ما ينحمل ليش انتِ غشيمة عنة لو نسيتي نسوانة ويومية متزوج بالسر ولا جنكم انتم ناس محترمين لا خفتو من الله ولا بنادم جانت اختي تحترك حرك الله ينطني ابو أيســر وزڪريا وأبو أرغد جانو يردونة بس ابنڪم ما يرد جابتلة اتلث ولد شيريد بعد بس ماڪع وخلة رجليه بالكاع اشوف بلا هسه منو اليتزوجها وياهي التحملة

سميرة....وشنووو تعايرينة بأبننة ترحييلة فدوة وينن اڪوو منة الله ينطي وڪلب اختج

هيَ حجت هيج وهنه ڪبن وهاي اخت يمامة صوتها حيل عالي اڪلت بيبي سميرة اڪل بالصياح كامت بيبي زهــره وعاطت بيهن

زهــره..... بسسسسجن البنية هستوها ماتت ابدال ما تترحمن الها وتقرلها الفاتحة وحدتجن محملة سم بكبلهااا

..... مو عيب هالحجي فوووك ما سويتو الفاتحة عدكمم تهينونة ابيتڪممم

زهــره.... خايبة ياهو الهانج ولج صارلج ساعة تهوبزن وانه ساڪتة احترمن النسوان الڪبار الموجودة

باوعت الها مرة جبيرة يمڪن امها عاطت عليها

..... تعاي ڪعددي وسڪتيي خلي الفاتحة تمر على خير.....(باوعت البيبي زهــره وكملت كلامها).... عذريني ام عبد الرسول البنية محترك ڪلبها على اختها

زهــره..... لا خيه ما صار شي مثل البنات هيَ

حجتها ورجعت ڪعدت يمي همست الها

شُـــــــذير.... بيبي هاي اخت يمامة الله يرحمها

زهــره.... اي حبيبة اختها

شُـــــــذير... لعد شبيها

زهــره.... حڪها يمه بس الواحد ما يكدر يحجي

شُـــــــذير.... بيبي جعت اريد غدة

زهــره.... هسه يصبن

شُـــــــذير.... استحي اڪل وهذن النسوان يطلعن صوت من حلڪهن من ياڪلن 

غطت بيبي وجهة بالشيلة وضلت تهتز بس الي يشوفها يكول تبجي خليت ايدي على ظهرها طبطبت

شُـــــــذير.... ڪافي بيبي لا يرتفع ضغطج الله يرحمها ويغفرلها

همستلي
زهــره.... لا يا طايحة الحظ شلون تضحكني بوسط النسوان

شُـــــــذير.... بيبي ڪافيج بجي عيونج راحن عمت عيني

زهــره.... يع يع النوب تجذب

وخرت بيبي الشيلة عن وجها

زهــره.... خايبة سوالفج حلوة

ما عرفت شنو اجاوب غلست حجت مرة جانت ڪاعدة كبالنة

.... ام عبد الرسول هاي البنية المن؟

زهــره.... تعود لأم أيســر

..... يا يا والنعم منها هلا بيج هلا كل الهلا

ضليت ساكتة ما جاوبتها طكتني بيبي بكتفي

زهــره.... كومي سلمي على خالتج

باوعت البيبي بلوم هسه اني اعرفها حتى اسلم عليها كمت للمرة دنكت عليها وصفنت تولتني هيَ بوس من خدودي وتردد.... شلونج شلون صحتج حبيبة.... واني صافنة شنو ارد

كمل هذا اليوم بين المشاحنات والشغل لليل الڪُل نامت فرشتلي اني يم بيبي ونمت فزيت و اني عطشانة مي وخرت البطانية عني وڪمت  طلعت من الغرفة ومشيت على اطراف اصابيعي للمطبخ جانو فارشين للنسوان بالصالة شغلت الضوة ودخلت صبيتلي مي وشربت بسرعة اجيت ارجع وسمعت حرڪة ورة البيت

بلعت ريڪي بخوف منوو هذا معقولة حرامي؟ لا ما معقولة اكو حراس اكيد ميدخلون

عاندت خوفي وفتحت باب المطبخ وطلعت امشي على اطراف اصابيعي والڪاع باردة رحت ورة البيت وكفت ورة الحايط ومديت بس عيني شفت خالو زڪـريا مخلي ايديه ورة ضهرة ويحجي وية ليلى وهيَ تبجي وتحجي

ليلى.... مو قصدي امد ايدي عليها بس هيَ

صاح وهوا يحاول نيصي صوتة

زڪـــريا... شنوو مو قصدج ليلى عندج عداوة وياها فهميني البنية غلطت امنة بالله ترحين الواحد جبير يحاسبها تعاي الي وعاتبيني كليلي سوت كيت وكيت وانه احاسبها انت مو مسؤولة عنها

ليلى.... من حرڪة كلبي على ألياس

زڪـــريا...... اذا محترك كلبج عليه جان شلتيه وما خليتي عدها

ليلى.... زڪـــريا انتبه النفسك ترا انت كلش متغير عليج

فرك وجهة بنفاذ صبر وحجة
زڪـــريا.... متغير بدون سبب؟؟ ليلى البنية خدها رايح ما ترديني احاسبج مو زين ما اجيت طيحت حضج كدام الكل بس كلت لا بعد يومين مرتي ما اريد انزل قيمتها ڪدامهم

مسحت ادموعها وحجت
ليلى.... ما اعتقد انجح السنة

زڪـــريا.... اذبج مو فوك السطح طلعت روحي كل سنة تعيدين ما طلع سادس

ليلى.... مابية حيل ادرس

زڪـــريا..... خوب كولي اريد ابطل واعرس..... يلا روحي نامي وابتعدي عن البنية عديتها هالمرة المرة الثانية الراجدي الضربتيه يرجعلج اضعافة

اشرتلة على عيونها

ليلى.... تدلل

حجتها واتقدمت يمه وحضنتة فتحت عيوني بصدمة وخالو زڪـــريا جمد عن الحرڪة بسرعة دفعها وعاط

زڪـــريا..... شنوووووو هاااي الحرڪاااات ليلللى

اتلعثمت وحسيتة فشلها ما كدرت ابقى اكثر اتراجعت من يمهم ورجعت للبيت سديت باب المطبخ ورجعت الفراشي

مرن ايام الفاتحة عادية جنت اشتغل وياهم حتى ما تصير مشاڪل واطلع اني بالواجهية هذا حسب تعليمات آرام بأول خميسية اليمامة اذن اذان الظهر كامت باجي أسيل وطلبت مني اكمل عنها الزلاطة ڪعدتني بالڪاع وحجت

اسيل.... يمه كون على ما نخلص صلاة وانتِ مخلصتها

شُـــــــذير.... اي ان شاء الله

اسيل.... عفية بنيتي

حجتها وراحت ابتسمت وراها شڪد حلوة وحبابة وحتى اسلوبها يسوي واهس للشغل سمعت باب المطبخ ينفتح التفتت وراي شفتة خالو زڪـــريا شافني وحجة بتعجب

زڪـــريا.... هاي شنو منو اليوم يسوينة زلاطة

شُـــــــذير.... هههههه اني

زڪـــريا.... مغسلة ايديج؟

شُـــــــذير..... اي والله غسلتهن بزاهي

زڪـــريا.... لا عمو لا تغسلينهن بزاهي خاف تصير عندج حساسية

شُـــــــذير.... ان شاء الله خالو بعد ما اغسلهن

ابتسم واجة يروح انتبه للتڪصص مالتي هز ايدة ورفع دشداشتة وكعد على تك ركبة كبالي

زڪـــريا.... شدبرين ما تكليلي شو جيبي

اخذ من عندي السجين والخيار وبدة يكصص وهوَ يردد

زڪـــريا.... هيج تسوة الزلاطة مو اشكال هندسية مسويتلي

علمني شلون اكض السجينة واكصص وراح يصلي ضليت اسوي نفس ما علمني كملتها واجيت اشيلها ما اكدر الطاسة جبيرة كمت غسلت و اجيت اطلع اصيح الواحد يشيلها واتعدة اڪرم وهوَ يطبك بسجادتة

شُـــــــذير.... اڪرم

التفت على مصدر الصوت طاحت عينة عليّ ابتسم واتقدم يمي

اڪرم... ها

شُـــــــذير.... تعال شيل طاسة الزلاطة

اڪرم.... وينها

اشرتلة عليها مد راسة شافها وهز ايدة

اڪرم... ما الوم ليلى من اطكج اذا هاي ما مدبرتها

اختفت ابتسامتي وحجيت بجدية

شُـــــــذير... شنو اني مصڪعة عدكم تردون تضربون بية

رفع حواجبة بتفاجئ

اڪرم.... يا يابة نتشاقة شبيج شديتيها ما ڪلتيلي شنو اسمج؟

شُـــــــذير..... شُـــــــذير

اڪرم.... عاشت الاسامي

سڪتت ما جاوبتة دخل للمطبخ شال الطاسة وخلاها على السنڪي والتفت الي

اڪرم.... محتاجة شي

فجأة اجة صوتها ورانة

ليلى.... جؤ هاي شنو من ورانة

التفتنة الها وهيَ اتقدمت ومكتفة ايديها

ليلى....شعدكم وكافين سوة

اتقدم يمها اڪرم وجاوبها

اڪرم.... عريف شلتاغ خفها شوية ترا كلش نخاف منك

حجاها وهز ايدة وراح ضلينة بس اني وياها بالمطبخ خفت ولزڪت روحي بالڪاونتر مشت للثلاجة عبالي جاية الي بسرعة صحت

شُـــــــذير..... آررررام بيبي زهــرررره

باوعتلي بطرف عينها ورفعتلي حاجبها كملت طريقها للثلاجة فتحتها واخذت فواڪه وكعدت على الطاولة تاڪل بسرعة حركت نفسي واجيت اطلع واستوقفتني بسؤالها

ليلى..... وين بيتڪم؟

التفتت الها وضليت صافنة احجي لو لا فززتني من عاطت

ليلى.... ما تجاوبيننن لو اللسانج يطلع بس يمهم

شُـــــــذير..... بالبصرة

ليلى.... ليش ما ادلين بيتج للولد حتى يرجعونج

احتاريت شنو اجاوبها اخر شي كلت اذب السالفة براس خالو زڪـــريا وهوَ حلها

شُـــــــذير.... ما ادري سألي خالو زڪـــريا ڪلي لا تحجين الاحد وخصوصاً ليلى

حجيتها وطفرت من المطبخ واسمعها تعيط

ليلى... تعاي لج شقصدج

رحت يم بيبي زهــره فتحت الباب بسرعة واني احجي

شُـــــــذير.... بيبي هاي ليلى

سڪتت من شفت احفادها ڪُلهم يمها ضحكت مثل الهبلة وانسحبت وسديت الباب

صبو الغدة ماجان موجود احد غريب بس عمامهم فصبو نسوان وزلم سوة استحيت اڪعد يمهم واحس اني نشاز بيناتهم ڪعدو ڪُلهم اجيت اروح وصاحتلي بيبي

زهــره..... تعاي حبيبة يمي

سوتلي مڪان يمها استحيت اجي واستحيت ارفض

زهــره.... تعاي ولج شذرة لا تستحين

فركت ايدية بتوتر ومشيت ڪعدت يمها جان التلفزيون ڪبالي وبادي افلام ڪارتوني المفضل وقت المغامرة

فهيت عليه وفصلت عنهم ما احس الة التلفزيون انطفة ڪبل باوعت للدكمة خالو أيســر طفاه واجة ڪعد حسيتة متعمد يضوجني ما اهتميت اخذت الخاشوڪة واكلت من الاكل الي خلتة بيبي ڪبالي

عبد الرسول..... معتز وينة

سميرة.... مسافر

عبدالرسول.... وين مسافر سفراتة ڪثرن

سميرة....علمي علمك اخوك واسئلة انه مليت

رحمن.... على كيفج هسه شكنالج بس سئلنة

نادية.... حقها لو انه وانتَ هلكد تسافر الة اشهرك

أيســر.....هه تخيلو يطلع متزوج

حجاها وانفجر بالضحك ضحڪو ڪُلهم وخالو أيســر كمل كلامة بأستهزاء

أيســر.... وعندة ولد ومرتة بغير دولة

سميرة.... ليش بلا شناقصني انه ويتزوج عليّ مو انه هنا وبنتة منيلك هذا الحجي احجي شايف شي عنة

رفع ايديه بأستسلام

أيســر.... لا ڪلشي ما شايف من عندة بس ڪلت يعني تخيلو متزوج شبيج ڪلبتيها مناحة

حسن..... هوَ من يوم الصف وية منيب غسلنة ايدنه

آرام.... صدك منيب وينة

أيســر.... طالع هوَ وزڪـــريا

ما اڪلت هواي عفت الخاشوڪة وڪمت رحت للمطبخ غسلت ايدي وشغلت التلفزيون على وقت المغامرة وكفت وانتجيت على الڪاونتر واباوع بفهاوة وفاصلة عن الڪُل اجة يمي رضاوي ڪعد بالڪاع وهم يباوع
اتعدة ما احس الة انطفة التلفزيون باوعت الخاولو أيســر طفاه ضجت والدمعة وصلت بطرف عيني

شُـــــــذير..... خالو ليش طفيتة

حجة وهوَ يمشي

أيســر..... ما احب ام العلوجة

طلع من المطبخ التفتت الرضا

شُـــــــذير..... يا ام العلوجة؟

رضا... قصدة ملڪة العلڪة

خلصو الغدة وڪفينة المواعين شوية واجة خالو زڪـــريا وخالو منيب رادت باجي اسيل تصب الهم غدة ما رادو بس چاي صبت الهم ليلى وراحت

اتجمعو ڪُلهم بالصالة واني شغلت التلفزيون وكعدت بالمطبخ اباوع اني من زمان من جنت يم اختي نقطة ضعفي التلفيزون احب اباوع واڪلب درتة على افلام ڪارتون وحضنت رجلي الصدري واباوع فاصلة عنهم ڪُلهم فترة وسمعت صوتهم ارتفع نقاشهم واسمع خالو عبد الرسول يصيح

عبد الرسول... البيت بيتيييي اجيب بي اليعجبنييي محد الة شغلللة

رحمـن..... البيت بيتك امنة بالله بس ما يصير البنية تبقى عدنة اهلها وين ودوها

دمعن عيوني وعرفتهم يحجون على كمت واني جسمي صابتة رجفة فجأة وڪفت بباب الصالة واباوع الهم الڪلام بينهم مشحون وخالة عبد الرسول حسيتة راح ينفجر من العصبية

زڪــريا.... البنية زغيرة وما اعتقد ضارتڪم بشي ولو اعرف ياهو الحاجي براسك

رحمـن.... زڪـررررريا شقصدددك انههه يلعبوون بعقلللي؟؟

زڪـــريا..... ما قصدي هيج بس ما اشوف من البنية اي اذية ليش هالكد كعدتها مضوجتكمم

أيســر..... لأن وجودها بيناتنة غلط ما نعرفها ولا نعرف سالفتها شكو مدخلينها بـبيتنة بعد يومين جايبتنة مصيبة وين اكو وحدة اتضيع من اهلهة وما تندل بيتهمم؟

ڪام اڪـرم وصدمنة ڪلنة من حجة

اڪـرم..... اذا ماتكدرون تتحملون مسؤوليتها انه مستعد اعقد عليها على ماتكبر واتروح بسبيلها

صاح خالو عبد الرسول بصوت رجع البيت رج

عبد الرسول ...... لككككك اڪرررررم شنو هذااا الحجيييي شتعقددد عليهااااا البنيية صغيرررررة وعينكككك عليهااااا

اتقدم يمه خالو زڪـــريا وحجة بنتر

زڪـــريا.... احجي شنو ابالك؟

رجع ليورة وحجة بهدوء

اڪرم.... ما بالي شي بس شفتكم مستثڪلينها كلت اخذها البيتنة والله شاهد بنـيتي

نادية.... مو بڪيفك ادخلها البيت بيتي ما اقبل احد يدخل بي

نزلن ادموعي واني اشوفهم شلون واحد يشمرني على ثاني مسحتهن بأيدي الترجف واحس اعصابي تلفت ما اريد اي احد بس اختفي من الوجود ما اريد اعيش بعد رفعت نضري ليفوك وحجيت بداخلي

شُـــــــذير.... ربي تعبت لو ترحم بحالي والڪة اختي لو اموت واخلص

سحبت نفس ورجعت نضري الهم
زهــره.... لا تخافين بنيتنة صارت ما مستعدين ندخلها بيتج

عبد الرسول..... هاي ڪدام الكل والحاضر يبلغ الغايب الحجي الي راح احجي موجه للڪل من جبيرڪم الزغيرڪم شُـــــــذير مكانتها بالبيت مثل مكانة آرام ما تقل عنها ما اررريد ايي احددد كان من يكون يسأل منوو هاي ومنين اجت وليشش ما مرجعينها الاهلها الاسمعة سائل هذا السؤال ما يلوم الة نفس وزڪـــريا مسؤال عنها من اليوم واي احد غريب يسأل منو هاي البنية تكلولة من ڪرايب أم أيســر غيرها حجي زايد منا منا ڪلة يوصلني مفهوووووم

سڪتو ومحد اتجرأ وحجة شي انسحبت وطلعت برة رحت ورة البيت وڪعدت بالكاع لميت رجلية الصدري وخليت راسي عليهن وبجي ما اريد احد بس اختي محد يرحمني غيرها بس هيَ حنينة عليّ

الغصة مالية صدري ليش اني هيج حياتي ما مستقرة ما اريد اي شي من الدنيا غير اختي وبيت يحمينة من الناس وانيابهم
حياتي كُل ما جاي الها وتسوء من غير دراستي الي احس السنة راحت علي وامتحانات نصف السنة بعد الها اقل من الشهر

القهر اڪلني اڪل ماعدت شُـــــــذير نفسي الاولانية الي تضحك وتسولف صح منعزلة بس وية الاشخاص الاحبهم لا

دخولي هنانه غلط لأن دا يسبب مشاڪل بيناتهم بس اذا اطلع وين اروح ما اندل ولا اعرف ادبر روحي ومستحيل اڪدر اطلع لأن صارو يعرفون عني وعن اختي ڪُلشي

حسيـت بأحد يڪعد يمي رفعت راسي وشفت بوضوح آرام ڪاعدة ونضراتها ما عرفت افسرها نضرات شفقة لو عطف لو شنو بالضبط فتحتلي حضنها واشرتلي اجي انفجرت باابجي وشمرت نفسي بحضنها واحجي بهستيرية

شُـــــــذير..... آرام والله مو قصدي اسوي مشاڪل بينڪم ما جنت اعرف جيتي الهنا تسبب مشڪلة جان اصريت ما اجي واشوفلي مڪان ثاني اصلاً اني ما اطول عدڪم والله بس الڪة اختي اروح

آرام.... اعرف بنيتج حبيبتي انتِ بس الناس الهنا مو اوادم مستثڪلتج على شنو اشو شحلاتج وسوالفج ماكو ابرئ منها احسن منهم ضامين وية كل حجاية طن من السمية انتِ مو سبب بالمشڪلة انتِ السبب الي طلع الناس على حقيقتها معليج باليحجي ما طول ابوي نهاهم عن اي سؤال وڪال حسبوها مثل بنتي بعد محد يتجرأ ويحجي حتى أيســر

مسحت ادموعي ورفعت نضري الها

آرام.... اسألج سؤال وجاوبيني اڪرم مبين الج شي يعني ما لاحضتي من تصرفاتة شي

هزيت راسي بلا

شُـــــــذير.... لا ابد اصلاً ڪُلش اتفاجأت من حجة هيج وحتى ماحبيت بعد اباوع بوجهة

آرام.... لا شذورة لا تحجين هيج انه اعرف اڪرم كلش زين ڪالها بنية صافية بس حتى لو ابقي بعيدة عنة حتى لا يصير عليج حجي

هزيت راسي بموافقة
آرام.... تعاي ڪومي خلندخل برد الجو

شُـــــــذير.... لا حبابة اريد ابقى هنا ما الي خلك ادخل جوة

آرام.... انه راح ادخل اذا تردين ابقي هنا بس شوية ودخلي

هزيت راسي وهيَ ڪامت ودخلت ضليت ڪاعدة وحدي الى ان صارت الدنيا مغرب حسيت بطني تأذيني ووجع قوي اول مرة يصيرلي ڪلت يمڪن لأن انقهرت

ڪمت بصعوبة ودخلت جوة لڪيت بيت عمهم رحمن راجعين للبصرة بس بيت معتز ضالين هنا لأن ابوهم مسافر صعدت فوك لڪيت آرام تصلي اتمدتت بالڪاع وايدي على بطني غمضت عيوني بوجع شوية وحسيت لوية قوية اجت بطني وملابسي اتنڪعن فتحت عيوني بصدمة وطفرت من غرفة آرام ورحت للحمام سديت الباب عليّ ورفعت ملابسي فتحت عيوني بصدمة من شفت الدم النازل مني ضليت اطفر وابجي واردد

شُـــــــذير.... راح اموت راح اموت

رجعت نضري للدم وڪلت هاي هيَ راح اموت بلعت ريڪي والدموع اخذني نزلت ملابسي وفتحت الباب لزمت بطني بألم ونزلت جوة رحت ڪبل الغرفة بيبي فتحت الباب وانفجرت بالبجي وحجيت

شُـــــــذير..... بيبي دم دم

زهــره.... خايبة شني شبيج

مسحت ادموعي واجيت احجي انتبهت الخالو أيســر يمها يصلي وخالو زڪـــريا ڪاعدة على السجادة ومنتضرني احجي انخطف لوني وحجيت

شُـــــــذير.... هذا دم

زهــره.... دميشش ولج حبربشية؟

سديت الباب بسرعة ورڪضت فوك امشي بالمرر وخايفة والوجع ڪُل ما جالة يزيد امسح بدموعي ويزيدن المن احجي خاف راح اموت اي اڪيد لعد ليش دا ينزل دم
التفتت واجيت اروح الآرام اندعمت بخالو زڪـــريا رجع ليورة وهوَ يردد

زڪـــريا.... الله الله شبيج اليوم بابا

قوست شفايفي
شُـــــــذير.... خالو راح اموت

زڪـــريا.... شتحجين خالو شبيج

نزلن ادموعي وفرڪت ايدية بتوتر

شُـــــــذير.... دم دم

زڪـــريا.... منين دم فهميني؟

سڪتت وفهيت بوجهة جان عاقد حواجبة من سويت هيج لانت ملامحة ومثل الفهم ضم ابتسامتة وحجة

زڪـــريا.... تعاي بلا

حجاها ومشة بأتجاه الدرج نزل جوة واني نزلت وراه اخذني الغرفة بيبي

زڪـــريا.... بيبي هاي البت شوفيها

زهــره.... شنو شمالها كلساع جايتني

زڪـــريا... هسه تحجيلج انه طالع

طلع خالو زڪـــريا وخالو أيســر لم سجادتة وطلع ورڪع الباب وراه

زهــره..... احجي خايبة

دمعن عيوني وحجيت الها والخوف ماخذني ضحڪت وجاوبتني

زهــره.... تعاي حبيبة تعاي احجيلج

انقهرت لأن تضحك واني متوجعة ضربت رجلي بالڪاع وحجيت

شُـــــــذير..... بيبيي اني راح اموت من الوجع وانتِ دتضحڪين

زهــره..... ويهد منو اليموت من وجعها ڪلنة مرينة بوضعج ما متنة

شُـــــــذير... يعني شنو انتِ هم هذا

زهــره.... اي هم هذا وڪل مرة هم هذا

شُـــــــذير.... يعني حتى آرام؟

زهــره.... بهاي ما اڪدر اجاوبج لين ارويمة تصرفاتها تصرفات ولد

شُـــــــذير.... يعني الولد مو هذا؟

زهــره.... اي مو هذا

شُـــــــذير..... حتى خالو زڪـريا؟

هوَ اني حجيت هيج وبيبي زهــره انهارت بالضحك اريد افهم شبيها ما تحجي

شُـــــــذير.... بيبي فهميني

مسحت وجهة بالشيلة وحجت

زهــره.... من عمة العماج يخايبة الدورة ماتجي بس للنسوان وهسه من اجتج يعني صرتي مرة

شُـــــــذير..... يا لعد اني قبل زلمة

زهــره.... لا مو هيج بس ڪبل انتِ طفلة هسه انتِ مرة وراح تڪبرين اڪثر لا تخافين ماڪو شي هيَ هاي سنة الحياة ڪل وحدة تصير عدها ڪل شهر تتغير هرموناتج والرحم يجهز روحة هسه انتِ مو بعمر هذا الحجي من تڪبرين تعرفينة وتضل عندج سبعة ايام لا اطفرين بيها ولا تتحرڪين زايد ودفي روحج

شعور غريب ما ادري اخجل لو هسه شنو لازم اسوي بلعت ريڪي وحجيت

شُـــــــذير..... زين حتى اختي تجيلها؟

دفعتني عنها بملل

زهــره... جا اختج على راسها جن مالت دجاج ماهي مرة وحتى ما تجيلها

شُـــــــذير..... اييي لعد ليش مجانت تحجي يمي

زهــره.... يجوز ما تريد تعلمج شغلات اكبر من عمرج

حجيت بملل والدموع بعيني
شُـــــــذير.... ما اريدد بيبي مااريدد شنوو هاااي

زهــره..... شني ما ترديين هيَ بڪيفج

انفتح الباب ودخلت آرام

آرام.... شنو صاير اجتماع سري

زهــره.... تعاي اخذيها من يمي اجتها الدورة وجاي ادك وتلطم فارجن يلا برة

اجت آرام اخذتني وطلعنة برة الغرفة صعدتني الغرفتها وانطتني احتياجات وعلمتني عليهن حسيت الكاع راح تنشك وتبلعني من الخجل حتى صخنت طلعت برة الغرفة ورحت للحمام سويت نفس ما علمتني وبدلت ملابسي وغسلت وطلعت رجعت الغرفتها لڪيت ليلى يمها ويدرسن بس ليلى مخلية الڪتاب بحضنها وتلعب بموبايلها عفتهن خاف يڪولن تلهينة ونزلت جوة بغرفة بيبي دخلت للغرفة واتمدتت بالڪاع والوجع مميت بطني راح تنفجر من الوجع

زهــره.... لا تنامين بالڪاع تڪضج الباردة

شُـــــــذير.... بيبي بطنييي بطنييي

زهــره.... تعاي بلا نامي على الچرباية خلي اشوفج

ڪمت بصعوبة رحت اتمددت يمها على الچرباية

زهــره.... ادفي على ما اشوف وة من البنيات تسويلج شوربة

حجتها وڪامت طلعت من الغرفة غمضت عيوني بألم احشائي احسها دا تتڪطع

انفتح الباب بدون لا احم ولا دستور فتحت عيوني بسرعة لڪيتة رضاوي اتنفست براحة ورجعت راسي للمخدة اجة ڪعد يمي على الچرباية

رضا.... ڪولي ليفة

حجيت بأستغراب

شُـــــــذير.... ليفة

رضا.... امج نضيفة

فتحت عيوني بصدمة ضحك ورجع حجة

رضا..... ڪولي ريحة

شُـــــــذير.... ريحة

رضا..... امج وڪيحة

شُـــــــذير..... انجببب لا تغلللط

رضا...... هههههههههههههههههه

حجاها وطفر من الچرباية ماكدرت اڪونلة لأن متأذية صار يم الباب وحجة

رضا..... ڪولي قاصة

شُـــــــذير.... مااا اڪووووول

مدلي اللسانة وحجة

رضا..... امج رقااااا

ما ڪمل انفتح الباب ولزمتة بيبي زهــره من ڪتفة وحجت

زهــره..... طيح الله حضك يابو حظ العلمك اعليهن

رضا.... بيبييي گولييي قاااااصة امج رقااااصة

ضربتة على راسة وصاحت

زهــره... انعل ابوك يابو الرقاصة ولك المرة ميتة شلت راسها من الڪبر هسه

ضحك وفلت نفسة منها ركض برة وهوَ يردد

رضا.... عمو أيســر تعاااال علمني بعد

سدت الباب ودخلت بيبي

زهــره... حبربشية انتَ وأيســر طايحين الحظ

اجت ڪعدت يمي

زهــره..... هسه أسيل تسويلج شوربة ووصيت زڪـــريا يجيبلج شيشين ڪباب

باوعتلها بصدمة

شُـــــــذير.... بيبي لا تڪولين ڪلتي الخالو زڪـــريا؟؟

زهــره..... من البداية انتِ رحتي ڪلتيلة

شُـــــــذير.... لااا بيبيي لاا ما فهمم من كتلة هسهه فهم من حجيتيلة عيب بيبي ليشش

دمعن عيوني وهيَ هزت بأيدها ودارت وجهة

...................................

آرام

جنت گاعدة على الچرباية ادرس وليلى  يمي سمعت اشعار من تلفوني فتحتة شفت رسائل من استاذ حسين رفعت نضري الليلى عينها عليّ طفيتة بسرعة ورفعت الها حاجبي

آرام.... خير؟

ليلى.... هه خير يصيبج... شخبار استاذ حسين يڪولون راح ينتقل

اتلعثمت من سمعت الخبر حاولت اسيطر على نفسي ڪدامها

آرام.... منو ڪلج؟

ليلى.... اممم زمن اخت صديقتي ڪالت

عضيت على شفتي وضليت اهز رجلي بتوتر الدمعة وصلت بطرفعيني من العصبية

ليلى...ههه شبيج انڪلب وضعج

آرام.... مابية شي بس اكيد اضوج استاذ حسين خوش يشرح

ليلى.... و اذا انتقل زڪـــريا يشرحلج

باوعت الها بطرف عيني وما رديت انڪلب وضعي بسرعة اخذت ليلى ڪتبها وطلعت برة  طفرت سديت الباب ورحت اتصلت عليه على الانستا جاوبني بسرعة

حسين.... هلو

آرام.... صدك تنتقل؟

حسين..... ههههههههه الاخبار توصلج بسرعة

آرام.... استاذ جاوبني صدك تنتقل

حسين.... هيَ مالت استاذ..... منو الكلج؟

آرام.... بت اخوك كايلة الزمن

حسين.... اي بس مو اڪيد

آرام.... استاذ ليش تنتقل عفية بس اكمل هاي السنتين

حسين.... انتقلي وياي

رفعت حواجبي بتفاجئ وهزيت راسي بنفي

آرام.... لا لا مستحيل اڪدر اهلي يشڪون

حسين.... قنعيهم

آرام.... ما اڪدر

حسين.... اقنع منيب؟

سڪتت ما عرفت شنو اجاوب

حسين.... خلي يجي يوم الاحد واشوفج والله ڪريم....(شافني ما جاوبتة استرسل بڪلامة).... سمعيني صوتج الحلو

ابتسمت وبسرعة سديتة ما جنت اعرف الي اسويه غلط او ممكن يضرني ولا جنت اعرف شنو نيتة تجاهي بس مع استمراري بالغلط اكتشفت هواي شغلات

انه البنية الوحيدة بين ثلاث ولد عشت مدللة ما يوم باوعت الممتلكات غيري او حسدت احد على عيشتة من طفولتي علاقتي قوية بأيســر الدرجة اتمرضت اضعاف واضعاف من سافر بعدها اتعودت وقوت علاقتي بزڪــريا منيب مو هالكد وياه لأن ملتهي بحياتة بس مع كل هذا مكانتة مستحيل اتقل عن زڪـــريا وأيســر

الشي الوحيد الجان عارضلي بحياتي هوَ مرضي اني عايشة على ڪلى وحدة هالشي متعبني وماخذ من عندي هواي اشوف ابوي ينقهر علي من اتمرض واهلي كلهم احس نضراتهم شفقة علي يزعجني نضراتهم الي اكثر من مرة احجي وية زڪـــريا عنها الحد ما فهمني ان هاي نضرات حب وحرص مو مثل الي اتصورة
نرجع السالفتنة العام بنصف السنة ماكدرت اكمل الامتحانات اتمرضت الدرجة ماكدرت اشيل نفسي من الفراش عفت الامتحانات وما صار عندي قابلية اكمل باقي السنة فتركت اثناء ما انه مريضة اجاني طلب مراسلة على الانستا فتحت تلفوني ودخلت على الطلب عرفتة استاذ حسين الي يدرسني من الثالث متوسط عقدت حاجبي شجاب حسابي عندة الحد ما طخت عندي اكيد ماخذة من حساب منيب لأن هوَ صديقة

اترددت ارد بس بنفس الوقت صار عندي فضول اعرف شنو يريد من عندي

قبلت الطلب بدون تفڪير وجاوبتة

آرام.... اهلاً استاذ

شافها بعد مدة وجاوب

حسين.... هلا بيج آرام شلونج

اتنهدت ودزيتلة

آرام... الحمد الله

حسين.... ليش ما جاي اداومين بالامتحانات يومية امر على قاعتج ما موجودة ترڪتي المدرسة؟

دمعن عيوني من ذكرني بالسنة الراحت عليّ حتى اذا رجعت لازم امتحن دور ثاني بس مستحيل تتحسن صحتي منا للدوام دزيتلة

آرام..... اي استاذ بس ارجع السنة التجي

حسين....حرامات السنة راحت بس انتِ ڪدها وشطورة تشدين حيلج بالسنة التجي انه سألت منيب عليج ڪال مريضة شخيرج

آرام.... ڪلاتي شوية تعبانة المهم استاذ ما اڪدر اطول باي

شافها ودز اعجاب بالرسالة طلعت من المحادثة متوترة ما انڪر جنت احس بأستاذ حسين عندة مشاعر تجاهي بس انه متغابية عن هذا الشي من بعدها قوت علاقتنة نوعاً ما

رجعت للواقع وڪملت دراستي بيوم الاحد جنت مبدلة ومتريڪة وية ابوي وڪاعدة بالهول نزل أيســر من غرفتة واجة ڪعد يمي

أيســر.... صباح الخير ڪيوية

حجاها ولف ايدة على جتفي

آرام.... هههههه صباح النور

أيســر.... متريڪة

آرام.... اي وية ابوي

أيســر.... جبح فلا مرة ذڪرتيني وكعدتيني خو كلكم هيج اذا مو الحجية تذكرني م

قاطعتة

آرام.... ياابذات دكيت الباب وما جاوبتني كلت نايم

حك شعرة بفشلة
أيســر.... ها اي اكول المهم راح اسوي ريوك تتريڪين وياي

آرام..... اي عادي اتريك مرة ثانية

ڪام للمطبخ وكمت وراه جانت امي جاي تسوي ريوك صبح عليها وطلع تاوة من الڪاونتر

أسيل.... عوفها عنك انه اسوي

أيســر.... لا لا انه اليوم حاب اسويلڪم بيض وطماطة اتعلمتة هناك

أسيل..... ههههههه تسوي وتسوي تالي بيض وطماطة

أيســر.... حقڪم متعودين على التشاريب مو مالت هيج اڪل

آرام.... خفها علينة يا دكتورنة الرقيق

باوعلي بطرف عينة ورفع ارداناتة ويشتغل

أسيل... شتكول اذا دارت سنة يمامة ادورلك مرة وتنسى الي ابالك

التفت الها وخلة ايدة على كلبة

أيســر.... اخ ڪلبي اخ يابة رجعنة الطير يلي هم نسوان

أسيل.... خاب شبيك الناس اتريد تستقر وادور الزواج ادوارة

أيســر... استقر من الكالي عيادة مناسبة مو من اتزوج وشجاب امك شجاب اختك وحط وجيب و ودي شتعرفيني يمه انه مالت هيج سوالف ما الي خلك

آرام.... ههههههه اتريد هيَ تجيلك برجليها

حك حاجبة وضحك

أيســر.... عود هذيج الساعة ليش لا

ڪمل ريوکة وكعدت وياه وهوَ يسولفلي شنو راح يسوي بيومة

آرام.... يعني اذا صارلك مڪان العيادة تبدي تجهزة؟

أيســر.... اڪيد ما عندي شي

هزيت راسي

آرام... ان شاء الله

أسيل.... يمه اذا ڪملتي روحي ڪعدي شُـــــــذير

آرام.... ليش؟

خزرتني واشرتلي بعيونة على أيســر باوعت الة لڪيتة منتبه ويانة

أيســر.... شبيجن تتلمضن ما الي علاقة بيها بيها ولا بهذاك زڪـــريا نارهم تاڪل حطبهم نصحتهم والعلي سويتة ولا واحد يعقلها بنية صغيرة شابة ومخليها ببيتة وين صايرة هاي بس عد حضانة بيت ابو أيسـر

أسيل.... ما بيها شي البنية لا تضن بيها سوء

أيســر.... جداً مو مهم..... يلا في امان الله

حجاها وڪام غسل اجة يطلع والتفت الي

أيســر..... تعاي وياي اوصلج للمدرسة زڪـــريا ويا المزعطة كلها من ليلى وشيلي ايدج

ضحڪت وكمت

آرام.... اغسل واجيب جنطتي

ڪمت غسلت وجبت جنطتي وطلعنة صعدنة بالسيارة وحرڪها

آرام..... أيســر شخبار الموصل

أيســر.... كلش مو زينة

آرام... زين خووما يدخلون الذي قار؟

أيســر..... جؤ المحافظات الجنوبية ما يڪدرون يدخلون الها

آرام..... يارب كون ايطيح عليهم صاروخ ياخذهم كلهم من زغيرهم الجبيرهم كون يحتركون وينسلوكوم بنار جهنم فرفحو كلوبتنة الله لا ينطيهم

أيســر..... تاليهتهم ينكتلون كلهم

آرام..... اميييييييين

وصلني للمدرسة وانطاني مصرف بستة بخدة ونزلت صار بوجهي استاذ حسين ينزل من سيارتة ابتسمت ابتسامة خفيفة ودخلت بسرعة للمدرسة رحت للصف اتفاجأت بالبنات واكفات بالباب

آرام.... ليش ما ادخلن؟

التفتت الي وحدة من البنات

فاطمة..... عمال جاي يسوون البنكات

آرام.... جا ليش اكفات هنا خو روحن بالساحة

حجيتها ودرت وجهي ورحت للساحة دك الجرس ورجعت للصف لڪيتهم رايحين خليت جنطتي على الرحلة وڪعدت كعدتي المفضلة اخلي ايدي على الرحلة الوراي واكعد

استغربنة ما اجت النة اي مدرسة شوية ودخل استاذ حسين بالرغم هذا مو درسة كمنة بسرعة

حسين.... السلام عليكم

جاوبناه

... وعلكم السلام

حسين... تفضلن

ڪعدنة وهوا كمل كلامة

حسين..... ست هناء ما جاية كلت اكمل شرح التمارين

اخذ القلم واجة يحل حجت بنية من وراي بهمس

.... اهو شكد لزكة ما انريد ندرس انريد الشاغر

التفت النة بسرعة وباوع بأتجاها رفع حاجبة

حسين..... ڪلتي شي؟

كامت البنية وحجت

..... لا استاذ والله ماڪلت

شمر القلم وصاح

حسين.... لا كلتييي ما عاجببببج الدررس طكي راسج بالحايط وطلعيي برررة ما يحتاااج اتأثرررين على غيررررج

.... استاذ و

حسين.... بدووون صووووت ترديين دررس شاااغر بطلي وكعدددي بالبيت وشبعييي شواغر عمرج كلللة احترررام ماكو استاذ هنا واكف جاي يفهمج فوك ما هذا مو دررسي وجاي اخذة المصلحتجن لأن متأخرررين وامتحاناات نص السنة بعد جم يوم بس انه هم صوجي التمارين يبقن عليكم وناقص درجتين من كل وحدة بيجن

كلها صاحت لا بس انه ساكتة ومنصدمة من عصبيتة ما اعرف شبية كلش خفت اول مرة اشوفة بهذا الشكل اخذ كتبة وقبل لا يطلع صاح

حسين... آرام تعاي وراي اخذي الاوراق

حجاها وطلع التفتت للبنية تبجي والبنات انخبصن خفت اروح لأن جان كلش عصبي التفتت للبنية الي بصفي

آرام.... روحي انتِ

.... يا خية يا شكو انه اروح كال انتِ ارحيلة تردين تورطيني

نفخت بضجر وڪمت طلعت من الصف ورحت للادارة احنه عدنة غرفتين غرفة للمدرسات وغرفة للمدرسين اجيت اعبر وباوعت الغرفة المديرة يمها العمال الجانو يشتلغون ما اعرف شنو يحجون ما اهتميت رحت للغرفة مالت المدرسين دڪيت الباب ودخلت جانت فارغة والمدرسين كلهم بدروسهم بس استاذ حسين واكف وفاتح برباطة ويشرب ماي خلة البطل على الطاولة باوعلي وبسرعة رجعت ليورة

حسين..... شبيج خايفة

هزيت راسي بنفي

آرام..... لا ما خايفة

خزرني واتقدم ناحيتي

حسين.... لا خايفة منين خايفة مني؟

رجعت ليورة وحته لو مو خايفة خفت بلعت ريجي وحجيت

آرام.... شبيك استاذ

استوعب ومسح وجهة الي صار احمر من الغصبية سحب نفس وحجة

حسين.... جيبيلي بطل الماي

رحت اخذت البطال ووديتة الة فتحة وشرب البطل كلة وشمرة على صفحة

آرام.... استاذ بيك شي؟

حسين... لا لا شوية معصب

يحجيها ويفرك راسة ومكان كلبة خفت عليه وضليت افرك ايدية بتوتر لأول مرة اخاف على شخص من غير عائلتي بهذا الشكل كعد على الڪرسي وغمض عيونة اجيت انسحب رفع راسة وكال

حسين.... خليج هنا

بقيت واڪفة شوية وصار احسن كام انطاني الاوراق اخذتهن من عندة بسرعة واجيت اطلع

حسين.... آرام

التفتت

آرام.... نعم استاذ

حسين.... لا تاخذين علي نضرة انه مو هيج ابد بس عندي ظروف

هزيت راسي بأي

آرام.... اعرفك استاذ حتى انه استغربت من عندك لأن جان تكدر تخلي البنية تعتذر منك

حسين.... اعرف بس طلعت عصبيتي بالوقت الغلط..... وزعي الاوراق وجيبيهن لا ياخذنهن

آرام.... ان شاء الله

حسين.... ابتسمي لا تخافين

ابتسمت الة وطلعت وانه مطمأنة رجعت للصف اول ما فتحت الباب لڪيت المديرة واڪفة بصفنة ووياها كم مدرسة اتفاجأت من وجودهن حجت المديرة

..... وين جنتي؟

آرام....ست جنت يم استاذ حسين جبت اوراق الامتحان

اشرتلي براسها

.... دخلي

دخلت وانه مستغربة جيتهن كعدت بالرحلة والمديرة كملت كلامها

..... ما تستحن ما تخجلن هاي عود انتن الكبار عمال جاي يشدون الجن بنكات حتى لا تحترن بالصيف يجيوني يكلولي ست كضي طالباتج شقصدهم ها ما تستحن تخيلي ابوج يشوفج لو اخوج شنو ردة فعلة

رفعت حواجبي بتفاجئ شنو صارت بالعكس البنية تتحرش بالولد هزيت ايدي بأستهزاء وكوة لزمت ضحكتي كضتنة رزالة غسل ولبس وراحت كمت انه اخذت الاةراق وحجيت.

آرام..... انطيجن الاوراق وترجعنهن بسرعة استاذ حسين يرديهنن

وزعت الاوراق وشي تبجي وشي تعترض ما اهتميت اخذت ورقتي وكعدت برحلتي باوعت الدرجتي كاملة وكاتب جوة توقيعة

"احسنتِ يا صاحبة الابتسامة الجميلة" وراسم بصفها وردة

الابتسامة شكت حلكي وطرت من الفرح  ما اعرف شنو صار بية بس حركت بداخلي هواي مشاعر كلبت الورقة بسرعة خاف البنات يشوفنها

اثرت هاي الجملة بية الدرجة كضيت اليوم ڪلة مبتسمة

لليل جانو شُـــــــذير وزڪـــريا وابوي بعدهم ما راجعين من البصرة سديت الباب ورحت امشط بشعري وابتسم واتذكر جملتة واتخيلة من يكتبها سمعت رنة تلفوني باوعت بسرعة لڪيتة يتصل احتاريت شنو اسوي اجاوب لو انتظر شوية خاف ارد ويڪول جانت منتظرة اتصالي وخاف ما ارد وما اعرف شنو يريد انسد الاتصال ورجع اتصل مرة ثانية جاوبتة

حسين.... هلا آرام

آرام.... هلو استاذ

سكت

حسين..... احم شلونج؟

آرام... زينة

حسين... دوم ان شاء الله

سكتنة وما نعرف شنو نحجي كسر الصمت بعد. مدة وصدمني من اتجرأ وحجة

الى هنا و انتهت العثـرة الرابعة والعشرون

تصبحون على الف خير