بســم ﷲ الرحمــن الرحيــم
السـلام عليڪم
#بيـن انيابهـم
#بقلمـي أنـا: زهــࢪاء
حساب الانستا: zaii1_8
لا تنسون التصويت +التعليق بين الفقرات
+احبڪم زهوراتـي 💋
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تــــاج
هُـــــــــذام...جؤ ايدجج عوفيها
شرمخت ايدي بأضافري على عنادة برغم اتأذيت بس موومنم التفتت الة وعطت
تـــــاج.... بكيفي ما الك علاقة بية اني مخبلة و عقل ماكو براسي خوش وقاتلة وابيع وكُلشي اسوي انتتت معلللليك بية عسى ما تشوفني اطك راسي بالحايط ما الك علاقة ل
استوعبت شنو حجيت وسكتت
هُــــــــــــذام... ڪملي؟
حمحت و ردت احجي عاط
هُــــــــــــذام... بدوووون جذب احجيي الصدددك
تــــاج..... يجوز يعني يجوز اني هيج مو اكيد
حجة بنتر وهوَ يكز على مخارج الحروف
هُــــــــــــذام.... احجي الصدك لا بالله يصير شي ما يعجبج
سكتت ما جاوبتة هز راسة وحجة ببرودة
هُــــــــــــذام..... سهله تــــاج ياخبر اليوم بفلوس باجر ببلاش اشوف نهايتج وين بلا
دنكت راسي وضليت العب بأيدي وما اجاوبة بس استمع
هُــــــــــــذام..... بعد ما اطلعين وحدج اني اجيبج و اني اوديج
رفعتلة نضري و باوعتلة ببرائة مصطنعة
تــــاج... اي بس انطيك كروة
هُــــــــــــذام.... خلفلة عليج تنطيني كروة من فلوسي
رفعتلة حاجبي وحجيت
تــــاج....فلوسي هنَ بتعبي اني قابل يضلن الك
هز ايدة ودار وجهة وهوَ يدرم
هُــــــــــــذام.... راس يابس عقل ماكو شايلة عقلها ومخلية بي استغفر الله
تــــاج... عندك شي احجيه بصوت غالي لا تضل تضمضم بحجيك جنك هذن النسوان الكبار ما يعجبهن شي
هُــــــــــــذام.... جاي اكول شايلة عقلها ومخلية بمكانة طن نعل
تــــاج.... و انتَ شايل عقلك ومخلي بمكانة خرخاشة مالت طفل
خزرني وحجة بحدة
هُــــــــــــذام... شكلتي؟
تــــاج.... اعتقد سمعت
حسيتة راح ينفجر وكف السيارة وشال ايديه وقربهم من ركبتي يريد يخنكني فزيت ورجعت ليورة وهمست واني كوة لازمة ضحكتي
تــــاج... هُــــــــــــذام
استوعب وغماني ورجع ساق وصلني للشقة وحجة
هُــــــــــــذام..... نزلي
تــــاج... وبيمن افتح باب الشقة؟
هُــــــــــــذام.... ما اعتقد تصعب على باتمانة بغداد
نفخت بضجر وحجيت
تــــاج... تنطيني اياه لو انام بالشارع
طلعة بسرعة من جيبة وانطاني اياه
هُــــــــــــذام... روحي روحي هيَ هاي العايزة تنامين بالشارع
اخذتة نزلت بسرعة من غير اي كلام وصعدت للشقة دخلت وسديت الباب سمعت رنة موبايلي فتحت الجنطة وطلعتة لكيتة يتصل
تــــاج... ها
هُــــــــــــذام... دخلتي للشقة؟
تــــاج.... اي
هُــــــــــــذام.... قفلي الباب
التفتت للباب وقفلتة بالمفتاح
هُــــــــــــذام... قفلتي؟
تــــاج.... اي
هُــــــــــــذام.... سحبي المفتاح وضمي
تــــاج... خوش وبعد
هُــــــــــــذام.... لا تفتحين الباب الاي احد بس اذا ام حيدر
تــــاج... هسه تطلع ام حيدر مندسة وتاخذ اخباري وتنطيها للعدو
سمعتة ضحك ابتسمت ودنكت راسي هدأ وحجة
هُــــــــــــذام... المهم تــــاج حركات منا منا ما اريد طلعة بنص الليل ماكو لو تنكلب العمارة فوك تحت ما اطلعين
تــــاج...اي اي فهمنة
هُــــــــــــذام... يلا روحي نامي محتاجة شي؟
تــــاج.... لا
سداه واني رحت سبحت وبدلت ملابسي ونمت مرت الايام عادية ڪُل يوم يمر عليّ ياخذني وبالطريق يجيبلي ريوك ويوصلني للمحل خلال هاي الايام ما بطلت تفڪير بشُـــذير وبطريقة حتى افلت نفسي واروح للبصرة بس ما اڪدر هُــــــــــــذام محاوطني من ڪُل الجهات بالمحل ما اكدر اطلع بس اطلع رزان تخابر الهُـــذام وتڪلة طلعت من المحل وبالشقة ام حيدر ڪُل شوية ادك الباب وتشوفني وين اني
بيوم جنت دا ابدل الصبح سمعت موبايلي يدك مشطت شعري بسرعة وركضت الة جاوبتة من غير ما اشوف الرقم لأن ماكو احد غيرة
هُــــــــــــذام.... صباح الخير تــــاج
ابتسمت وجاوبتة
تــــاج.... صباح النور
هُــــــــــــذام.. نزليلي بسرعة مستعجل
اختفت ابتسامتي وجاوبتة
تــــاج... تمام بس البس جنطتي
سداه بوجهي نزلت الموبايل من اذني واني مستغربة من كلامة ونبرت صوتة مو مثل ڪُل مرة اتنهدت ورحت اخذت غراضي وطلعت من الشقة اتلاكيت وية ام حيدر ابتسمت الي وحجت
ام حيدر... صباح الخير دادا
تــــاج.... صباح النور ام حيدر شلونج
ام حيدر.... الحمد الله... تعالي اتريكي ويانة شلون كاهي وكيمر يلوك هالحلك
تحجي ورافعتلي علاكة الڪاهي
تــــاج..... ههههههه لا بالعافية اريد اروح مستعجلة
ام حيدر.... لعد اذا اليوم مستعجلة تعاليلي غير يوم نتريك اني وياج
تــــاج.... ههههه ادللي
سلمت عليها ونزلت بسرعة الة لڪيتة ينتضرني كبال العمارة عبرت الشارع وصعدت بالسيارة اول ما صعدت اختنكت من ريحة الجكاير كحيت واني مستغربة وضعيتة ما منتبهة عليه يشرب جكاير
تــــاج.... شسالفة جكاير من الصبح
طفاها وفتح الجام حرك السيارة من غير ڪلام سڪتت اني هم ودرت وجهي للجهة الثانية بس الفضول قاتل شوية وما صبرت اسڪت التفتت الة و خليت شعري ورة اذني حمحمت وحجيت
تــــاج.... شلونك؟
جاوبني من غير لا يباوع الي
هُــــــــــــذام.... زين
تــــاج.... ها
التفتت الي وعاقد حاجبة
هُــــــــــــذام... اكلج زين تڪليلي ها
تــــاج.... لعد شنو اكول؟
سكت ما جاوبني حسيت عندة حجي ضامة بداخلة الدرجة مخربط وضعة ڪُلة حتى اليوم ريوك ما جايب نفس ڪُل مرة عم الصمت بيناتنة وكمل الطريق قبل لا نوصل للمحل حجة
هُــــــــــــذام... تــــاج اذا فرغت اليوم اجي عليج من وقت عندي حجي وياج
جفلت بمكاني وحسيتة دا يلمحلي على شي بللت شفتي وحجيت
تــــاج.... بخصوص شنو!
هُــــــــــــذام.... لا تستعجلين على رزقج بالعجبة الندامة
تــــاج.... اهو هذا الحجي عندك مو عندي اني اريد اعرف حتى ما افكر لأن راح ابقة اليوم ڪُلة عقلي يفتر
هُــــــــــــذام..... ميخالف خلي يفتر ويشتغل شوية
نفخت بضجر ودرت وجهي للجهة الثانية
هُــــــــــــذام.... لازم ما عجبج؟
تــــاج..... عكرررت مزاااجي
هُــــــــــــذام.... لا عليج الله؟
حجيت واني اجر بالكلام
تــــاج.... هُــــــــــــذام شبييك وياي
هُــــــــــــذام.... شكد تتمغلجين
عفست وجهي وما حجيت بعد شي وصلني للكوزمتك اول ما نزلت حرك السيارة وراح اتخصرت و اتأكدت بي شي لأن ڪُل مرة ينتضرني ادخل يلا يروح لو يفتح المحل يلا
ما اهتميت درت وجهي وردت ادخل بس اتذكرت اني ما متريڪة اتراجعت بخطواتي ومشيت بأتجاه واحد يبيع فلافل اتذكر مرة شايفتة من جنت اشتغل بالمطعم
دخلت للفرع الي يبيع بي وكفت كبالة جان رجال متوسط بالعمر مخلي الة طاولة وكدامة علبة مكلي بيها فلافل ويبيع
تــــاج.... سويلي لفة
فتح الصمونة وخلالي بيها فلافل وسلطة انطاني اياها اخذتها من عندة
تــــاج.... شكد سعرها؟
.... 500 دينار
استغربت السعر ڪُلش رخيص بس كلت يلا اكلها ولا منية هُــــــــــــذام ابو فليس الفڪر
فتحت جنطتي اريد اطلع فلوس انتبهت الموبايلي يدك بسرعة سحبت خمسية دينار انطيتها للرجال وكضيت اللفة بأيد والموبايل بأيد الثاني و جاوبتة
تــــاج.... نعم
هُــــــــــــذام....وينج ليش مو بالمحل؟
تــــاج.... دا اتريك
هُــــــــــــذام... وين تتريڪين؟
تــــاج.... يم خوش وادم احسن منك
هُــــــــــــذام.... لا تخبلينييي وينج انتِ؟ جاوبي ويامن جاي تتريكين
اخذت عضة من اللفة وما جاوبتة
هُــــــــــــذام.... بالعباس لو يمييي الة
سكت واني حجيت
تــــاج... اي بلا شتسوي؟؟(سكت ما جاوبني اخذت عضة ثانية واسترسلت بكلامي)... على كولتك والزهرة اللفة الة بشدة تعال اشتريلك
سداه بوجهي هزيت ايدي وضميت الموبايل بجنطتي واكلت اللفة واني امشي على ما وصلت للكوزمتك كملتها مر الوقت عادي للظهر وحسيت وجع بمعدتي قوي غلست عنة بس ڪُلش زاد كضيت بطني بألم وحسيت جسمي اشتعل نار ما كدرت اكوم على حيلي كعدت على الكرسي واتصلت على هُــــــــــــذام ما جاوبني ما كدرت ابقى بعد اخذت جنطتي وطلعت واسمع رزان تصيح وراي
رزان.... اوكفي وين رايييحة؟
ما حاوبتها اجرت بسرعة تكسي وصعدت حجيت بصعوبة
تــــاج... وصلني للـ *****
حرك السيارة واني رخيت نفسي على الكشن وبعدني لازمة بطني رجعت اتصلت عليه ما يرد ضليت احاول اضل مفتحة عيوني وما ينغمي علي واتمنى اموت من الوجع الي حسيتة
وصلنة المكان العمارة شمرت الكروة ونزلت بسرعة اركض صعدت للشقة واول ما دخلت اتقيئت على الارض حسيت روحي داتطلع مو بس اتقيئ بجيت بصوت عالي ولزمت بطني بألم
سمعت صوت رنة موبايلي بسرعة فتحت الجنطة ورفعت الخط جريت نفس بصعوبة
تــــاج... هُــــــــــــذام الحكننني
صاح بسرعة
هُــــــــــــذام..... شبييج تــــاج ويينج شبيي صوووتج؟
تــــاج.... ما اعرف هُــــــــــــذام معدتي راح اموت
هُــــــــــــذام....اسمم الله وين انتِ احجيي
تــــاج... اني بالشقة
هُــــــــــــذام.... ابقي هنا هسه ادزلج ام حيدر لا تتحركين من مكانج
حجيت من دون لا احس بروحي
تــــاج.... تعال انتَ ما اريد ام حيدر
هُــــــــــــذام.... ما اكدر تــــاج اني مو ببغداد اتأخر عليج
سداه بسرعة غمضت عيوني بألم وشمرت الموبايل من ايدي
شوية واندفع الباب ودخلت ام حيدر شافت حالتي دكت على وجهة وصاحت
ام حيدر.... يا خالة عزا العزاني شصاير بيج
تــــاج.... ما اعرف خالة معدتي راح اموت
ام حيدر... خالة شنو ماكلة؟
تــــاج... مادري ما دا اتذكر
ام حيدر... امشي للمستشفى يمكن متسممة ماكو غيرها
لزمتني من ايدي واني احس روحي راح اطيح ڪُلشي صار بسرعة بسرعة بدون لا اتذكر ڪُل التفاصيل اخذتني للمستشفى واني معدتي احسها راح تتكطع وكلساع اريد اتقيئ بالسيارة غمضت عيوني واسمعها تخابر وتحجي واسمع هُــــــــــــذام يكللها
ام حيدر... خالة هياتنة راح نوصل للمستشفى
هُــــــــــــذام..... خالة احلفج بروح ابنج لا تعوفينها وحدها ديري بالج عليها اني جاي الكم بس على ما واصل صاير الليل
ام حيدر..... بعد خالتك هذا هوَ يمه يمها اني لتخاف
هُــــــــــــذام.... اي شي يصير انطيني خبر لا تخلين بالي يمها
ام حيدر... تأمر
اجذب اذا اكول ما حبيت اهتمامة بية اول مرة احد يحسسني اني مهمه عندة فتحت عيوني من وصلنة للمستشفى نزلتني ام حيدر واخذتني كبل للطوارئ نيمني الممرضات على السدية واجت وحدة حجت موجهة كلامها الام حيدر
.... شبيها؟
كضيت بطني بألم واني اتلوة
تــــاج.... معدتي اتأذيني راح اموتتتتت
..... شنو ماكلة اخر شي
تــــاج.... ما اتذكررررر دااكوول معدتتتي معدتتتي
باوعت الام حيدر
.... راح اكتبلها تحالليل روحي سوينهن الها وكليلهم حالة طارئة خلي يستعجلون
كتبت التحالليل وانطتنهن لأم حيدر اجت كومتني بصعوبة ورحنة للمخبتر سوولي تحالليل وما طلعن الة لمن طلعت روحي اخذناهن الها نيمتني على السدية وحجت
...... عدها تسمم حاد بسرعة خلي احد من المسؤولين عنها يوقعون حتى انسوي غسيل معدة
ام حيدر.... اي اي اني اوقع
.... جنسيتج اخذيها وروحي للاستعلامات فوك
ام حيدر..... يا خالة مجايبتها
نفذ صبري وعطت
تــــاج.... انييييي مو بعينكمممم تردووون مسؤؤؤول عنيييي ماعنددددي احددد سووليي غسيلل المعدةةة مالتكمممم راااح اموووووت ماوتفهمووون يا مسؤووول هذااا طززززز بيي وبيكممممم سوولييي اخخخخ يممههههه ڪُللله من ابتهاااال عساااج تموتين ولا تشوفين الراحة
.... صوتج امي ناس مرضة غيرج داتسبيين الهم ازعاج
تــــاج..... ما تفهمينننن داكووول بطنييي معدتي صخاميي سويلي چاارة ما عندي احد هااي المرة لڪتني بالشارع وجابتني لا اعرفها وولاهم يحزنوننن
رادت تحجي انطتها ام حيدر موبايلها وحجت
ام حيدر.... هاج خالة احجي
.... منو؟
ام. حيدر... خطيبها
اخذت الموبايل التفتت الي ام حيدر وخزرتني
ام. حيدر.... هُــــــــــــذام متحلف بيج على صياحج هذا
حجيت بدون اهتمام
تــــاج.... طزز بيي وبأبتهاال معدتتتي معدتتتي اخخ يمه شسويتت اني شكليتتت مدا اتذكررر
اجت الدكتورة انطت الموبايل لأم حيدر وحجت
.... صعدوها للعمليات
انهبطت بمكاني وعطت
تــــاج... ما اريددد ما اريدددد شلكم علاقة بية عوفوني امووت شنو عملييية شتسوللي شكلالج شنو حجيتوو ليش قبلتييي مو قبل شوية جنتي رافضة
ما جاوبتني اجن الممرضات يردن يشلني رفضت رفض قاطع وخايفة اول مرة هيج تتعب صحتي و اول مرة ادخل عمليات رفضت بخوف والدموع بدن ينزلن على خدي جابتلي ام حيدر موبايلها انطتني اياه
ام حيدر.... هذا هُــــــــــــذام يريدج
اخذتة من عدها اول ما سمعت صوتة انهاريت بالبجي
حجة عود يواسيني
هُــــــــــــذام.....افااا افاا تــــاج تبجي؟ ليش ولج
همست
تــــاج.... ما اريدد اسووي عملية
هُــــــــــــذام.... عمليتيج بابا كلشي ما يسوولج منو الجذب وكال عملية
تــــاج..... لعد شلون؟
هُــــــــــــذام..... يخلولج بنج وتنامين كلشي ما تحسين وهمه بس يغسلون معدتج
تــــاج... شيغسلووون لا تخبلني زولية حتى يغسلونهااا
هُــــــــــــذام.... هههههه هاي عود متأذية وهيج تصرخين
سكتت وشوية وحجيت بغصة
تــــاج..... هُــــــــــــذام خايفة خاف اموت وما اشوف اختي
هُــــــــــــذام....ما تموتين وعد مني
تــــاج..... شنو انتَ ملك الموت
هُــــــــــــذام..... والزهره ما تموتين اعتبري نفسج نايمة ومعليج بكلشي
تــــاج.... اذا متت ترا ادعي عليك
هُــــــــــــذام.... ميخالف هناك اشڪيني يم الموتة يلا تــــاج سباعية انتِ باتمانتي سندريلا البتاوين ما تخافين
تــــاج.... ليش ما تجي؟
هُــــــــــــذام..... بالطريق اني كلها شغلة ساعتين و اوصل.... ليش؟
تــــاج..... لا هيج
سديتة من عندة وقبلت يسوولي صعدوني للعمليات واسمع ام حيدر اتكللهم على حسابنة سووها لبسوني بدلة العمليات ودخلوني للغرفة نمت على السدية والوجع ماخذني من جهة والخوف من جهة ثاني اجت ممرضة شايلة مثل الانبوبة بأتجاهي
.... خو ما خايفة ڪُلش سهلة بس انخليلج بنج موضعي وندخل الانبوبة بحلكج
هيَ حجت هيج واني طفرت كعدت على حيلي وصحت
تــــاج... موو بكيفكممم شنو ادخلووون بحلكيييي هيييته هيييه وخري شو وخررري اخخ يمه ماا اريدد ڪُلشييي ما اريدد رجعووني للبيت
.... ما يصير حبيبتي معدتج هسه عبارة عن سموم و
قاطعتها
تــــاج... ايي ميخالف اني حيه وجسمي ڪُلة سم يلا يلا وخري شنو هوَ جبر خو مو جبر
اجت ممرضة ثانية على صوتي اتقدمت بأتجاهنة وهيه تردد
.... شبيها؟
التفتت الها الممرضة الاولى
.... سمعت راح نخلي الانبوبة بحلكها واتخبلت
حاولن يكضني بأي طريقة رفضت وحنجرتي حسيتها اتجرحت اخر شي من الالم استسلمت الهم غمضت عيوني واحسها من خدرتني تخدير موضعي بس احس بيهم من يدخلون الانبوب مادري الصودنة صخام بوجهم بحلكي لعبت نفسي وكلساع اريد اكوم وادفعهم اخر شي استسلمت ونمت
فتحت عيوني على ريحة مستشفى انتبهت النفسي متمددة على سدية ومغطيني درت وجهي للجهة الثانية لڪيت هُــــــــــــذام كاعدة كبالي ويكلب موبايلة انتبه الي وبسرعة طفاه وابتسم
هُــــــــــــذام..... الحمدُ لله على السلامة
خزرتة وحجيت
تــــاج.... اطلع برة ڪُلة من عندك
هُــــــــــــذام..... لا هنا مخربطة بالدور هاي تنكال من وحدة تجيب وماتريد تشوف رجلها
رجعت صحت
تــــاج.... اطلعععع بررررة
هُــــــــــــذام.... ليشش ولج شعلي اني
تــــاج..... اطلع دا اكوول اطللللع هيج اني عجبني ما اشوفك اطلللع
رخة نفسة على الڪرسي
هُــــــــــــذام.... ما اطلع
نفخت بضجر وباوعت للسقف بس احس يطلع من ذاناتي نار باوعتلة صفح وحجيت
تــــاج.... شكد صارلي هنايه
هُــــــــــــذام...... من امس
تــــاج.... اريد اطلع وما اريد اشووووفك ڪُلة منك شورت بية همه السادة يشورون
ضحك
هُـــــــــــــــذام.. شمسويتلي وشورت بيج؟
تــــــــاج.... حجيت عليك كلت ابو فليس الفڪر
ضحك و عافني وڪام رجعت اريد انام ما كدرت نفخت بضوجة ووخرت الجرجف المغطيني بي ردت اكوم ما كدرت اتأذيت رجعت كعدت على السدية وسندت ظهري عليها انفتح الباب ودخل هُــــــــــــذام ووياه الدكتورة سألتني كم سؤال وكتبتلي ورقة خروج وطلعت
خليت رجلي على الكاع اجيت اكوم وكضيت معدتي بألم بسرعة ركضلي وهوَ يردد
هُــــــــــــذام..... ﷲ ﷲ ليش ڪمتي
غمضت عيوني بألم ولا ارادي لزمت بأيدة قوي وهمست
تــــاج... طلعني منا ما اريد ابقى
ما سمعت صوتة بعد فتحت عيوني لڪيتة عينة على ايدي الي لازمة ايدة خجلت وحسيت روحي دا اتحرش بي
بسرعة سحبتها دار وجهة وحمحم واشرلي حتى نطلع مشة ڪدامي واني وراه مشيط ببطئ بس ما كدرت اكمل وحدي التفت الي لڪاني بعدني واكفة
هُــــــــــــذام... الله مع الصابرين
مدلي ايدة وكمل كلامة
هُــــــــــــذام.... تعاي يابة ما على المريض حرج
مشيت الة ولزمت بأيدة قوي حسيت بدفوها ولأول مرة احس بأمان يم جنس آدم من بعد والدي بلعت ريڪي وصابتني قشعريرة
هُــــــــــــذام.... ما تمشين؟
فزيت من صفنتي وهزيت راسي بأي واني مو مرڪزة وياه طلعنة من المستشفى وصعدنة بالسيارة رخيت نفسي على الڪرسي وغمضت عيوني بألم
هُــــــــــــذام.... شماڪلة ست سندريلا اخر شي اڪلتي فلافل مو؟
ابتسمت وجاوبتة
تــــاج.... والزهره فلافل طيبة
هُــــــــــــذام..... طيبة مو؟ ڪلش طيبة بحيث صابج تسمم ثلاثي الابعاد
تــــاج..... ڪُلة منك ليش ما جبتلي ريوك
هُــــــــــــذام... نسيت عقلي شيصير الف شغلة بي ما بيها شي اذا ذڪرتيني واني اطبك على مطعم واريكج احلا ريوك
تــــاج..... اهووو هسه تريكت فلافل متڪلي شصار
هُــــــــــــذام..... لا كلشي ما صار بس اتسممتي و خربطتي وضعي وعفت شغلي واجت على مودج
فتحت عيوني وباوعتلة بسرعة
تــــاج.... ضايج عليّ لو ضايج لأن عفت شغلك؟
ابتسم بطرف شفتة ولمها للداخل عود يخفي ضحكتة عني حركتلة حواجبي وحجيت بتهديد
تــــاج.... احجي ترا تصير مو خوش ونتزاعل
هُــــــــــــذام.... الاثنين
تــــاج.... هااا
حجيتها ورجعت نفسي على الڪرسي وغمضت عيوني
تــــاج... اصلاً صوج خالة ام حيدر ما اخذتني المستشفى بيها دڪاترة بلڪي اشوف قسمتي
هُــــــــــــذام..... ها هيج صار الحجي
تــــاج..... اي لعد وحد ما اتزوج شناقصني سبع صنايح والبخت ضايع
هُــــــــــــذام.... بهاي صدك
فتحت عيوني وخزرتة
تــــاج.... احسك تستهزء؟
هُــــــــــــذام.... لا وين اني استهزء؟ وبيمن بيج؟ انتِ اڪثر انسانة احترم كلامها
تــــاج.... لعد وين الي يكول بعقلج طن نعل وعقلج يسوي ويص ويص
هُــــــــــــذام.... شقة هذا بس لو نرجع للصدك انتِ ذڪية بس عقلج ما تعرفين شلون تستخدمينة
قدمت شفتي السفلة ليكدام ورفعت كاتافاتي ورجعت على كعدتي
تــــاج..... اصلاً ڪُلة من ابتهال
هُــــــــــــذام... منو هاي!
تــــاج.... فد وحدة نعال ما تسوة عوفها لا تشوه يومك بطاريها
هُــــــــــــذام.... يهمج يومي؟
تــــاج.... لا
هُــــــــــــذام.... ولج هسه على الاقل جاملي وكولي اي
التفتت الة
تــــاج..... شنوو مو انتَ كلت لا تجذبين بشي؟ شلون تريدني اجذب عليك
هُــــــــــــذام.... هيَ هاي الفالحة بيها اطبقين نصايحي عليّ
تــــاج... اهووو هُــــــــــــذام شبيك وياي عوفني اريد انام
ما جاوبني غمضت غيوني ونمت ما فزيت الة على السيارة وهيَ توكف بالكراج فتحت عيوني وهمست
تــــاج.... بعد فرة بروح اهلك خلي اكمل نومتي
هُــــــــــــذام... امشي كملي نومتج جوة
تــــاج.... مو دا احلم حلم حلو
هُــــــــــــذام..... ميخالف يلا نزلي جوة ترتاحين اڪثر هنا نومتج مو عدلة شوفي شلون عاوجة ركبتج
تــــاج.... افتحلي الباب مابية حيل
هُــــــــــــذام.... لا اله الا الله
تــــاج.... شبيك راح تأذن
ما جاوبني نزل وطبك الباب حيل دارلي وفتحلي الباب واشرلي بأيدة بمعنى انزل ڪضيت معدتي بألم كاذب اصلاً احس نفسي صرت شوية احسن
تــــاج....معدتي
هُــــــــــــذام.....هسه تاخذين علاجج
تــــاج.... ما اكدر امشي ساعدني
صفن بعيوني الضاربة عليهن الشمس بدون لا يحجي شي همت بنضراتة بدون اي ڪلام مني استوعبت بعد فترة وحجيت
تــــاج..... شبيك تباوع راح تحسدني
هُــــــــــــذام.... ها لا هيج
ڪضني من ايدي وساعدني حتى انزل صعدنة للشقة وصلني للغرفة وراح للصالة دخلت الها وكبل رحت اتمددت على الچرباية سمعتة صاح
هُــــــــــــذام.... ليش نمتي كبل على الفراش مو نضبف وملابسج وصخات من المستشفى
تــــاج...هسه ابدل بس جوعاانة
هُــــــــــــذام....ڪلت الام حيدر تسوي اكل
سكتت وجريت نفسي ڪوة اخذت ملابسي وطلعت لڪيتة كاعدة بالصالة ويكلب بالتلفزيون اتعديتة ورحت للحمام سبحت شلون ما كان وبدلت وطلعت لڪيتة مخلي الاكل على الطاولة ودا يرتب بي انتبه الي لافة شعري حجة
هُــــــــــــذام.... ليش سبحتي خاف تتأذين؟
تــــاج.... لا عادي
هز راسة
هُــــــــــــذام..... تعاي اڪلي
جريت الكرسي وكعدت انطاني كاسة شوربة مالت خضروات اخذت خاشوكة منها ضكتها وعفست وحجيت
تــــاج.... شنو هاي هُــــــــــــذام
هُــــــــــــذام.... شوربة خضروات زينة الج
تــــاج.... مو طيبة ما اريد
هُــــــــــــذام..... مفيدة الج شربي الكاسة كلها ما تتحركين اذا ما تخلصينها هسه لو فلافل اكليتها بلكمة وحدة مو
تــــاج.... اهو هُــــــــــــذام ما اريد
هُــــــــــــذام.... اكلي بدون تمغلج حتى تصيرين زينة وتروح الاوة
تــــاج.... ههههههههههههه شنو طفلة كدامك
هُــــــــــــذام.... اي
اكلت غصباً عني وكوة جرعت طعمها هيَ طيبة بس اني ما متعودة على هيج اكل انتبهت الهُــــــــذام طول ما اني كاعدة وياه مو مرتاح بكعدتة حتى ما رفع نضرة الي ضجت من تصرفة وما عرفت افسرة لأن مو خبرة بهاي الامور بس حسب ما عرفت عنة ان هوَ يستحرم هواي
تــــاج..... شبيك اليوم؟
رفعلي نضرة ومبين بالة مو وياي حجة
هُــــــــــــذام.... شنو!
تــــاج.... شبيك اليوم مو على بعضك
هُــــــــــــذام.... لا كلشي ما بية
حجة وشال صحنة وخلاه على السنڪي كمت حتى اني اخذت صحني وخليتة على السنڪي وطلعت من المطبخ رحت للغرفة ونمت
ثاني يوم ما طلعت للشغل كال هُــــــــــــذام ارتاحي هذا الاسبوع ڪعدت الصبح عدلت شعري وفتحت الباب على ڪيفي ومديت راسي مالڪيتة بالشقة ولا اكو صوت بالمطبخ استغربت لعد ليش عايفني ورايح
صفنت شوية شنو عايفني ليش هوَ ملزم بية حتى يبقة يمي؟
رزلت نفسي وسڪتت
رحت غسلت وفتحت الثلاجة صفنت عليها بملل وسديتها
رجعت للغرفة صارت عيني على الڪنتور مشيت الة وفتحتة لڪيت ملابس رجالية مشيت ايدي عليهن اكيد الة مو الغيرة
يعني هوا عايش هنايه؟! اكيد اي لأن الملابس هوايه مو مالت واحد يجي يوم يومين زين اذا هوَ جان عايش هنانه هسه وين عايش؟
اجيت اسدة وانتبهت للعطر الي بملابسة نفس ذاك اليوم الرشيت من عندة ضحكت وسديت الكنتور
رحت اتمددت على الچربابة بملل ما عندي شي اسوي مديت ايدي جوة المخدة وسحبت موبايلي فتحتة لڪيتة متصل اكثر من مرة بسرعة عدلت ڪعدتي ورجعت اتصلت عليه من اول رنة جاوبني
هُــــــــــــذام....وين جنتي تــــــــاج
تــــاج... نايمة
هُــــــــــــذام....شنو هذا النوم ما سمعتي صوت تلفونج وجاوبتيني خليتيني حسبة تاخذني وحسبة تجيبني
تــــاج.... شبيك هُــــــــــــذام ترا ذابة موبايلي صامت
اتنهد وحجة
هُــــــــــــذام.....اعتذر اذا عليت صوتي.... المهم وين مكان المحل الشتريتي منة لفة؟
تــــاج.... ليش تريد تشتري منة لفة حتى تسمم
هُــــــــــــذام.... اي عاجبني انتحر
تــــاج..... اي لعد ليش تشتري لفة وتخسر فلوس شال وعلكلك بالبنكة ماكو اسهل منها
هُــــــــــــذام..... ههههههه لا وتنطيني طرق انتحار
تــــاج..... اي ما بيها شي يجوز عندك ظروف او دا تمر بحالة اڪتئاب
هُــــــــــــذام.... وبرأيج هاي الاسباب التافهة تسوة اخسر حياتي على مودها.....تــــاج لا تغيرين الموضوع وين مڪانة؟
تــــاج..... ورة محلك بفرعين ڪبال سوبر مارڪت نسيت اسمة
عرفة وحجة بأستعجال
هُــــــــــــذام.....ها يلا الله وياج
سداه وضل الفضول ياكل بية عود صدُك هذا عاجبة ينتحر لا اكيد لا رجال شكدة وشكبرة ينتحر!
عود شبية اني الذڪية الي محد يغلبني يمة اصير عبالك دجاجة مبللة
غلست ومر الوقت عادي لليل اندك باب الشقة عبالي ام حيدر جابت عشة كمت بسرعة فتحت صار بوجهي هُــــــــــــذام رفعلي حاجبة وخلة ايدة على الدجة مالت الباب والايد الثانية اتخصر بيها
هُــــــــــــذام.... هاي عود اني موصيج ما تفتحين الباب الة تعرفين منو
تــــاج... لا شفتك بالعين السحرية
هُــــــــــــذام.... تضحكين علي ولج ليمتة شفتيني هوَ اني لحكت ادك الجرس عبالك واكفتلي ورة الباب
تــــاج....لا عبالي ام حيدر جابتلي عشة
هُــــــــــــذام..... اني كتلها لا تجيبلج جبتلج وياي... هسه شنو اتخلينة ندخل لا
ابتسمت وابتعدت عن الباب دخل وسديت الباب وراه راح كبل للصالة خلة علاليك على التخم وكعد وخلة رجل على رجل كعدت كبالة وحجيت
تــــاج.... شنو تسوي بعنوان ابو الفلافل
عدل كعدت وحك رانبة خشمة
هُــــــــــــذام... ذكرتيني والزهرة جنت متحلف بيج شلون تاكلين من اي مكان تدرين شنو لكينة من دورنة بيتة!
تــــاج.... شنو؟
هُــــــــــــذام..... يطبخ بالطارمة مالتهم والزيت لڪيناه مكشف والجريذية مسوياتة مسبح للترفيه وحتى اجازة ما عندة
عفست وجهي وحجيت
تــــاج.... لعبت نفسي بس شو ما حسيت لأن جانت ڪُلش طيبة
رخة نفسة على التخم وجاوبني
هُــــــــــــذام.... هسه انتِ حسي بخلق الله النوب حسي بطعم الاڪل
تــــاج.... لا ترا اني احس
حجة يأكد كلامي
هُــــــــــــذام.... اكيد
كام من مكانة
هُــــــــــــذام.... اتعشي على ما اصلي عندي موضوع وياج
كمت بسرعة ومشيت يمه
تــــاج.... شنو هوَ احجي هسه عفية ما اصبر
هُــــــــــــذام.... اتعشي بالبداية واني اريد اصلي
عبرني وراد يمشي قطعت طريقة
تــــاج... اتعشة وياي ما اتعشة وحدي
ابتسم وجاوبني
هُــــــــــــذام... ليش ترديني اتعشة وياج؟
تــــاج.... خاف نتسمم حتى نتسمم سوة
هُــــــــــــذام..... ههههههه صارت بيج خوفة؟
تــــاج..... التوبة اذا بعد اكل اي شي على الوجع مالت معدتي حتى التجيب مو هيج
رفع راسة ويضحك ضحكت وياه وخليت شعري ورة اذني هدأ وحجة
هُــــــــــــذام..... رايح اصلي اذا تردين تنتظرين انتظري نتعشة سوة
هزيت راسي وهوَ راح يتوضى كعدت على التخم وافكر بشنو يريد يحاجيني! اتذكرت من هذاك اليوم كال اريد احاجيج وما صحت فرصة يعني اكيد موضوع مهم اخذت خصلة من شعري وكعدت ابرم بيها وافكر شيريد مني فزيت من تفكيري على صوتة
هُــــــــــــذام.... وين صافنة؟
تــــاج.... احجي شنو اتريد
هُــــــــــــذام... تعاي نتعشة
حجاها ودار
تــــاج.... هُــــــــــــذام
التفت الي
هُــــــــــــذام.... لا تخافين ماكو شي
طمني بنضراتة وابتسم الي اخذ العلاليك وراح للمطبخ رحت وراه لڪيتة جايب اكل جاهز كعدت كبالة وهوَ يشيل اكل ويخلي كبالي بس اني ما الي نفس اڪل
تــــاج... هُــــــــــــذام ترا ام حيدر ڪُلش تضوجني
عقد حاجبة
هُــــــــــــذام.... شبيها.؟
تــــاج.... ترا اعرف انتَ موصيها ما اطلع بس مو بهالشڪل يعني ڪُل ساعة داكة الباب تشوفني طالعة او لا اني اقدر ان المرة تسوي الي انتَ تكول عليه بس دا تضوجوني
طول ما اني احجي وياه هوَ بس يهز راسة كملت وحجة
هُــــــــــــذام.... المصلحتج اني خايف عليج خاف تتهورين
تــــاج.... بشنو اتهور هُــــــــــــذام انتَ شنو تعرف عني!
هُــــــــــــذام....صح ما اعرف الي ابالج ولا ماضيج بس ما طول انتِ يمي لازم احافظ عليج
ضجت من عندة سندت ظهري على الكرسي وعفت الاكل كام هوَ لم الاكل الزايد وضماه بالثلاجة كف ارادانات قميصة واخذ المواعين وغسلهن كمل وخدر چاي اجة يصب والتفت الي
هُــــــــــــذام...تشربين چاي؟
تــــاج.... لا
دار صبلة واخذ ستكانتة وراح للصالة نفخت بضجر ولو بيدي اخنڪة شوية وكمت من مڪاني رحت وراه لكيتة كاعد بمكانة المفضل على التخم كبال التلفزيون وكفت كبالة كتفت ايدي
تــــاج..... هُــــــــــــذام احجي شنو اتريد من عندي
اتنهد وخلة الاستڪانة على الطبلة مسح وجهة وكام وحجة
هُــــــــــــذام.... قبل لا احجي خليج هادئة تمام؟
تــــاج..... لا اني ڪُلش هادئة وماكو بهدوئي
هُــــــــــــذام..... مبين من عقدت الحاجب
هُــــــــــــذام..... تــــاج راح احجي بس لا تفهميني غلط ولا تتسرعين
هزيت راسي بأي اتنهد وڪال
هُــــــــــــذام.... اني رجال اشتريت هاي الشقة لأن قريبة على المدرسة وشغلي حتى اجي ارتاح بيها لأن بيتي بعيد
تــــاج..... اي؟
هُــــــــــــذام..... وخلال الفترة الي انتِ كاعدة هنا ما جاي اكدر اجي وجاي اضطر اقطع مسافة ساعتين حتى اوصل البيتي
نزلت ايدية وعدلت وڪفتي
تــــاج....ليش ترجع للبيت تكدر تجي للشقة واني ما الي علاقة بيك شنو قابل احنه صغار
هُــــــــــــذام.... ما اكدر تــــاج فهميني حرام
لميت شفتي للداخل ورجعت حجيت
تــــاج... اوكِ اذا وجودي بالشقة مضايقك اطلع اني واشوفلي غير مڪان الارض واسعة
اتقدم يمي
هُــــــــــــذام.... بس اني ما اريدج اطلعين
تــــاج.... لا تخبلني هُــــــــــــذام لا تقبل اضل ولا تقبل اطلع شتريد بالضبط؟
اتقدم يمي اڪثر وصعقني على راسي من حجة
هُــــــــــــذام.... تـــــاج تتزوجيني ؟
••••••••••••••••••••••••••••••••••••••••••••
شُـــــــذير
زڪـــريا.... شبيج خالو يعني شنو جنتن تاكلن عدهم؟
شُـــــــذير .... ها ما جانوا يطبهون اكثر شي يجيبون من برة اذا عدهم حفلات ومرات اذا ماكو ناكل اي شي
زڪـــريا..... يعني ما تشكين بيها تخلي شي بالاكل ؟
شُـــــــذير... مثل شنو
زڪـــريا.... مخدرات
شهڪت وهزيت راسي بنفي
شُـــــــذير..... لا خالو اختي تشتغل بيهن فتعرف هاي الشغلات ڪُلها جانت متخليني اكل اذا ما تفحص الاكل قبلي و
اندفر الباب ودخل خالو أيســر طفرت من مڪاني من الخوف كام خالو زڪـــريا وعاط
زڪـــريا...... انتَ شلووون تدخل هيج للغرفة
أيســر.... اشششش ولا ڪلمممة لككككك تالي عمرررنة مكعدييين هيج وحددة بيتنننننة هلاا هلاا والحجي كلة مخدرات؟ واختهااا وينن كاااعدين اتريدد اتخرررب البيتتتت ما فكرتووو بسمعتنة
زڪـــريا.... محددد يمكك والخرااب اذاا صابنة ما يصيبببك لا تخاف
جرة خالو أيســر من ياختة وحجة من بين اسنانة
أيســر.... جان فڪررت بأراام وسمعتها اسممع لك حجيي مو وياك راح يصير وية ابوي
دفعة خالو زڪـــريا بقوة ارتد ليورة
زڪـــريا.... رووح روح يلا احجي لأبوك ليشش ما تدريي ابوي هوَ الجابها ويعررف بكلشيي وبطلل تحكمم على الناس من غيرر لا تعرف سالفتهاا
أيســر..... طززز بيها وطز بسالفتها تـالي عمرنة لافين ال*** ببيتنة لو صدك وبيها خير ما داخلة وياك للغرفة والساعة فوك الـ11 بالليل
فتحت عيوني بصدمة ورجعت ليورة نزلن ادموعي بسرعة صارت عيني على خالو زڪـــريا عيونة نطن حسيتة راح ينفجر اشر على خالو أيسر وحجة بتوعد
زڪـــريا..... لا تطعن بعرض البنية لاتنسة عندك اخت الله لا يكولها وبعد يومين عندك مرة خليها ابالك هالمرة عديتها الك المرة الثانية بيناتنة الدم وخلي الوادم التخاف منها تكول تكاتلو على مود مرة
أيســر...ومنوووو هايي وتجيبهااا على آرااام
انقهرت بشڪل وشلون استصغرني مسحت ادموعي وحجيت
شُـــــــذير.... اني ممجبورة ابقى هنانه ردت اطلع واهمه مخلوني بع
زڪـــريا.... خالو روحي نامي يصير الصبح والحجي يصير ڪدام ابوي
أيســر.... تهددني زڪـــريا؟
زڪـــريا.... انه ما اهدد انه اذا اريد شي انفذ ومحد يوڪف بعيني
اجة يحجي ودك موبايلة عافنة ونزل سمعنة هوسة جوة نزل خالو زڪـــريا نزلت وراه لڪيت مرة شايفتها بالحسينية بأيدها ولد عرفتة ابن يمامة الي احتركت رجلة
.... هذا ابنها عفية ديرو بالكم عليه انه. رايحة وباها للمستشفى
زهــره.... الله يكومها بالسلامة ان شاء الله
عرفتها جابت اخذت الطفل بيبي وراحت الغرفتها وكلمن راح الغرفتة
بقيت بس اني كاعدة بالصالة ادموعي بدن ينزلن وكلام خالو أيســر يتردد بعقلي حسيت اتحاصرت بعد وما اكدر اطلع منا خصوصاً وهمه عرفو اغلب الشغلات عني اني وتـــاج خفت كاعدة وحدي كمت صعدت فوك ورحت بأتجاه غرفة آرام دڪيت الباب ودخلت لكيتها نايمة ومطفية الضوة سديت الباب ورحت الفراشي اتغطيت وانهاريت بالبجي حقهم من يحجون ناس غربة وواني بوسطتهم بس مو من حقهم يطعنون بينة ضليت اتڪلب ما ادري شنو الاريدة فترو وخرت البطانية عني باوعت للساعة العاڪس عليها ضوة الحديقة لڪيت الوقت ماشي وساعات ويصير الصبح كمت من مڪاني ورحت فتحت الباب وطلعت نزلت جوة ورحت الغرفة بيبي ضليت مترددة ادخل لو لا اخر شي كلت خلي ادخل اذا احد اتعدة شيكول واكفة بالباب فتحت الباب ومديت راسي لكيت بيبي كاعدة تقرأ قرآن وخالو أيسر مخلي راسة بحضنها مجرد ما شفتة اتذكرت كلام خالو زڪـــريا من وصاني ما اطلع يمة بسرعة طفرت سديت الباب وطكيتها بركضة فوك رجعت المكاني وغطيت راسي بالبطانية واني اطك سن بسن حرفياً حسيت خالو أيســر صارلي فلم رعب
من الخوف والهبطة غمضت عيوني ونمت ما ڪعدت الة ثاني يوم على هوسة واصوات هوايه جوة فتحت عيوني وكمت شلت فراشي طلعت غسلت وضليت مترددة بين انزل جوة وبين لا اخر شي ضفرت شعري ونزلت جوة لڪيت ڪُلهم على وجهم ملامح الخوف والقلق انهبطت وياهم بدون لا اعرف السالفة باوعت للارجاء ادور على آرام اليوم جمعة وماكو دوام رحت للمطبخ لڪيتها شايلة ألياس وعيونها حمر فتحت عيوني بتفاجئ وحجيت
شُـــــــذير..... شبييج آرام؟
اتنهدت وجاوبتني
آرام... يمامة حالتها ما تسر وطاكها نزيف اثناء الولادة الحد هسه انريد خبر عنها ماڪو
شُـــــــذير.... ياااا وشلون هسه زين محد راح منكم
آرام....كلها هناك ماعدا بيبي ماتكدر اتروح...... تعاي كضي ألياس خلي اخابر الابوي بلكت يرد
مشيت الها وشلت ألياس على صفحتي واتجعن الدموع بعيني خطية يمامة متستاهل هيَ اتصير بنت عم خالو عبد الرسول وبنفس الوقت زوجة ابن عمة بس علاقتهم ڪُلش قوية وياهم ضليت واكفة يم آرام ومتوترة وهيَ مو اقل مني تتصل عليهم محد يجاوبها اخر شي عاطت
آرام.... محددد يحسس ويجاووب عبالك الخبر بفلووس
شُـــــــذير.... زين هيَ جابت؟
آرام.... اي بس الطفل زينة صحته
حجتها ومشت وهيَ تردد
آرام.... ما ضل عندي حل غير الحيه اڪبر راسها
عقدت حواجبي ومستغربة عليمن تقصد مشيت وراها لڪيتها واكفة يم ليلى عرفتها تقصد عليها
آرام..... بلا خابري الزڪريــا بلكت يرد عليج
باوعتلعا بغرور وتبتسم بخبث
ليلى.... طبعاً هسه يرد علية من اول رنة
رفعت الها آرام حاجبها
آرام... ما يهمني بس خابري
لوت حلكها واخذت موبايلها ضلت ادور بالارقام وآرام مادة راسها تباوع اتصلت عليه ما رد
ليلى... خاف ملتهي راح ارجع اخابرة مرة ثانية
اجت تصتل وآرام طكتها بضحڪة بشماتة
آرام.... حبي حضرج
صوفر وجه ليلى وبسرعة اخذت موبايلها وطفرت هزت آرام ايدها وكعدت على التخم وتهز رجلها بتوتر صاحت بيبي من الغرفة
زهــره.... خايبات منو هنا ماكو خبر عن البت والفرخ
آرام.... ماڪو بيبي كلوبنة وجرت ومحد يحس ويطمنة
زهــره.... اخ بيبي خايفة حلمي يتحقق
استغربنة من ڪلامها باوعتلي آرام وهيَ على وجهة ملامح الخوف بسرعة كامت وراحت يمها مشيت اني هم ورخت الغرفة بيبي كعدت آرام يمها وحجت
آرام.... شنو قصدج بيبي؟
زهــره... ماكو شي لا نفاول عالبت
آرام.... لا بيبي عفية احجي شبيهاا
زهــره.... اذا صحت احجيلحن حلمي
حجتها ومدت الـ ألياس ايدها وهوَ شمر نفسه عليها انطيتها ألياس وكعدت يمهن
شُـــــــذير.... شنو يعني نزيف وين يصير؟
آرام... شسالفة ما تعرفين؟
ضربتها بيبي على زدنها
زهــره... ماتعرف البت عبن مو نفسج حبربشية وشكو شي طايح حضة تعرفينة
حجت وهيَ تفرك زدنها
آرام.... اخ بيبي شبيج ترا انه مو زغيرة حتى ما اعرف
زهــره... ولي كومي شوفي رضيوي كعد من نومتة لا
كامت آرام طلعت وبيبي اخذت ايد ألياس وتأشر بأصابعة وتحجي
زهــره.... هذا البابا وهاي الماما وهاي البيبي وهذا الأياس وهذا الحرامي مشة مشة مشة وباكك من اهلك
حجيتها ودغدغتة والياس يضحك ابتسمت عليهم وحسيت بيناتهم حنية حلوة كعدت اباوع الهم
زهــره.... بيبي صعدي جيبي تلفون آرام للألياس يلتهي بي لا يتذكر امة
هزيت راسي وكمت صعدت فوك ودخلت للغرفة دورتة وما لكيتة طلعت من الغرفة ونزلت اول ما صادفتني سميرة
سميرة.... شعندج صاعدة نازلة شتردين تبوڪين؟
اجيت اعبرها بس اتذڪرت خالو زڪـــريا كال لا تخلين احد يتجاوز عليج
شُـــــــذير..... اني مو حرامية حتى ابوك
مدت ايدها وكرصتني بزندي وحجت
سميرة.... اللسانج لج كلج خلك خطار هنا يوم يومين وتولين وبعدين شيتانون ما ادلينهم بيتكم حتى ياخذونج لو متونسة على الكعدة هنا
صفنت بتفكير على كلامها صدك من يسألوني ليش ما اكللهم مكان بيتنة شنو اجاوبهم رجعت نضري الها
شُـــــــذير..... مو شسمة خالو عبد الرسول كال
سميرة... اش اشش مالي خلكج خلي تكف الوادم واشوف منو يخليج هنا ناقصتة احنه بنات شوارع
حجتها وراحت اتنهدت وعبالك لازم يسموني بأي كلمة يروح خالو أيســر تجي سميرة مسوين علي مناوبة... فرڪت مكان الكرصة بألم رفعت ارداني شفت المكان احمر صاير نفخت بضوجة ونزلت ارداني رجعت يم بيبي لڪيت آرام ناطية موبايلها لألياس وملتهي بي وهيَ تخابر من موبايل بيبي وتحاول احد يرد عليها مشيت يم بيبي وڪعدت انفتح ودخلن ليلى كعدت يمنة
زهــره.... وين امج
ليلى.... جاي تطبخ
هزت راسها والتفتت الي
زهــره... اليوم الفجر فتحتي الباب؟
رمشت بصدمة هاي بيبي شلون شافتني هزيت راسي بأي
زهــره.... جا ليش ما دخلتي؟
اشرت الها حتى تقرب اذنها يمي ادنت يمي وهمست الها
شُـــــــذير.... بيبي اخاف من خالو أيســر
همست الي واخذتني على كد عقلي
زهــره.... جا ليش تتشاورين وياي ما تحجين بصوت عالي
شُـــــــذير... لا بيبي هسه يكولون جبانة
زهــره.... معليج بأيســر ما يكدر يسويلج شي
شُـــــــذير.... احسه شرير واني هم اضوج من عندة بس خالو زڪـــريا ڪُلش حباب
ليلى.... شنو تحجن؟
آرام.... جاي يحجن عليج انه سمعتهن
زهــره.... ويهد ياهو اليمج
اجت ليلى تحجي ودك موبايل بيبي شافتة وبسرعة عاطت
آرام.... هذا زڪـــريا
جاوبتة بسرعة وفتحت سبيڪر سلم وحجة
زڪـــريا.... آرام راح نجي انه وابو ألياس جبنة الطفل حضريلة غراضة يم الحجية
حجت بيبي
زهــره.... يا ولكك جا تجيبة وامة تبقة بالمستشفى
زڪـــريا.... اول تالي امة ماتكدر الة لأن تعبانة ليش يبقى بالخدج راح يطلع على مسؤليتهم وانتن ديرن بالجن عليه لأن ام أرغد يم يمامة بالمستشفى
آرام.... زين شنو اخبار يمامة؟
زڪـــريا.... على الله يلا الله وياڪم...... اكلج آرام فاتحة سبيڪر؟
سدت السبيڪر بسرعة وما اعرف شنو حجة وياها بس باوعتلي وسڪتت سدتة وڪامت
دقايق واندك الباب راحت آرام فتحتة ما اعرف منو اجة كمت وراها وشفت ولد هم شايفتة بالحسينية جايب كاروك طفل وجنطة
..... هاج هذن الغراض
خذتهن منة آرام وطلع
شُـــــــــــذير... منو هذا؟
آرام... اخو أرغد زوج يمامة.... تعاي وياي نحضر غراض الطفل
رحت وياها بحماس دخلت الكاروك بغرفة بيبي وكعدت ترتب بي الفراش
شُـــــــذير.... اڪلج آرام هوا طفل لو طفلة؟
آرام.... ولد
شُـــــــذير.... زين شنو تسمونة؟
آرام.... والله ما اعرف خلي تڪعد يمامة وترجع الحيلها وهيَ تسميه
همهمت بأي ابتسمت وضلت اباوع للغراض الي اطلعهن اول مرة اشوف هيج شغلات
شُـــــــذير.... زين هسه هوَ الطفل عمرة 9 اشهر لو شڪد؟
آرام.... لا ولج عمرة يوم حتى يوم ما كامل
شُـــــــذير.... ياا لعد هوَ غير باقي ببطن امة تسع اشهر غير هسه لازم عمرة 9 اشهر.
ضربتني على ظهري بشقة
آرام.... من هوَ ببطن امة مو كامل شلون ينحسب عمرة!
شُـــــــذير.... هاااااااا
انفتح الباب ودخل رضا شافنة مطلعين الغراض طفر وحجة
رضا... راح يجي ابن خالة يمامة وعمو أرغد
آرام.... ايييي حبيبي
رضا... يسسسس خلي اروح اصيدلة جراد
حجاها وراه باوعت الآرام وضحكت..
شُـــــــذير.... هوَ ليش يحب يصيد؟
آرام... هاي سولتة صارلة سنتين يصيد يوم ذبان يوم جراد حتى بريعصية يصيد...
شُـــــــذير.... اييييع
رتبت آرام ڪاروك الطفل بصف جرباية بيبي لليل واجة خالو زڪـــريا وباجي اسيل جايبين الطفل انطونه البيبي وڪُلها التمت عليهم يباوعون للطفل الة اني اخذت الي زاوية ووڪفت بيها لأن حسيتهم ڪُلهم عائلة وحدة وعيب اكون بيناتهم
زهــره... جا وين ابوه ليش ما اجة؟
زڪـــريا... ما يكدر يعوف مرتة حالتها تعبانة
زهــره....ما تدرون اهله شنو يردون يسمونة؟
اسيل... لا والله ما ندري سمي انتِ خطية يبقة بية اسم
زهــره... جا خلي اسمي علي لا يصيرون فرد نوب ويعترضون على الاسم
ليلى.... انه اڪول سمي يزن
زهــره.... دولي ام يزن شني يزن النوب اسم امير المؤمنين وين واسم يزن وين
آرام.... بيبي الماعندة ذوق مايفيد الحجي وياه
سميرة... وشبيجن انتن صفيتن على البنية..... يمه معليج بيهم من تزوجين ويجيلج ولد سمي يزن
اشتد النقاش بيناتهن باوعت الخالو زڪـــريا بالة مو ويانة وصافن انتبه الهن وحجة
زڪـــريا.... آرام وليلى مو عدتجن امتحانات يوم الاحد روحن درسن لا تلمنهن كلهن الباجر
سڪتت آرام وراحت حجت ليلى
ليلى... عندي امتحان فيزية وما مفتهمة على شرح المدرسة عادي تشرحلي
زڪـــريا.... ما فارغ اليوم خليها الباجر درسي هسه الي تعرفينة
لوت حلڪها وحسيتها ضاجت خلت وطلعت ولحكتها سميرة كامت باجي اسيل طلعت ضلينة بس احنه الثلاثة اخذ الطفل من حضن بيبي وحجة
زڪـــريا..... راح أذن بأذنة
زهــره.... اي يمة خلي يتبارك بذڪر ﷲ
هز راسة واتقرب من اذنة وهمس
زڪـــريا....اللهم صلِّ على محمد وآل محمد... إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا.... ﷲ اكبر ﷲ اكبر... اشهد ان لا اله الا ﷲ اشهد ان لا اله الا ﷲ... اشهد ان محمد رسول ﷲ اشهد ان محمد رسول ﷲ... اشهد ان علي ولي ﷲ اشهد ان علي حجة ﷲ... حي على الصلاة حي على الصلاة...حي على الفلاح حي على الفلاح... حي على خير العمل حي على خير الله اكبر الله اكبر لا اله الا الله
انتقل الاذنة الثانية ورجع حجة
زڪـــريا.... الله اكبر الله اكبر... اشهد ان لا اله الا الله اشهد اشهد ان لا اله الا الله.... اشهد ان محمد رسول الله اشهد ان محمد رسول الله... اشهد ان علي ولي الله اشهد ان علي حجة الله... حي على الصلاة حي على الصلاة... حي على الفلاح حي على الفلاح.... حي على خير العمل حي على خير العمل قد قامت الصلاة قد قامت الصلاة الله اكبى الله اكبر لا اله الا الله
خلص وضل مخليه بحضنة ضليت اردد الكلام الي كالة بعقلي شكد حلو باوعت الهم وحجيت
شُـــــــذير..... لعد انتم ليش هيج تسوون؟
رفع نضرة الي
زڪـــريا... شسوينة؟
شُـــــــذير.... اذنتة
زڪـــريا.... ههه قصدج اذنت بذانة... من يصير الطفل نأذن بأذنة اليمنى ونقوم بأذنة اليسرى حتى يتحصن من الشيطان
شُـــــــذير... يعني ڪُل طفل حتى اني هم مأذنينلي أهلي؟
زڪـــريا.... ﷲ واعلم بس على الاغلب اي ليش لا
شُـــــــذير.... يعني اذا ما مأذنين بأذني يعني هسه الشيطان يحبني!
زهــره... خايبة لا الشيطان يحب اليستمع الة
هزيت راسي بس ڪلامهم مو واضح احس اريد اتعمق وياهم بهيج امور بس ماكو فرصة واستحي اطلب منهم يشرحون الي
زهــره.... جا أيســر وينه؟
حجة بأستغراب
زڪـــريا.... شعجب ما اجة للبيت من الصبح ڪال رايح
زهــره... لا اجة ولا شي
زڪـــريا.... هسه تطلع سالفتة نفس سالفة عمي معتز
زهــره.... شبي؟
زڪـــريا.... يومية مسافر عاتبيني اذا ما طلع متزوج
زهــره... خايب شبيك هوَ غير يباوع البراطم سميرة
زڪـــريا.... حجية لا اطلعين رون سايد الڪاع بيها زغار..... على طاري أيســر شبي وية هاي البت؟
زهــره.... يا بت؟
زڪـــريا.... هاي الكدامج
حجاها وباوعلي باوعتلي بيبي
زهــره.... يا فلك جا ما تعرف اسمها
زڪـــريا.... انساه... صدك شسمج؟
شُـــــــذير... شُـــــــذير
زڪـــريا... شذرة؟
شُـــــــذير.... لا شُـــــــذير
زڪـــريا.... شذر؟
شُـــــــذير.... لا خالو اسمي شُـــــــذير
حجة وهوَ مُصر
زڪـــريا.... شذر اسهل شُـــــــذير يتعاجز الواحد يكولة
سڪتت وما جاوبتة بس ضجت بداخلي مو ذنبي اذا اسم بي طول ليش ينطوني اسماء ثانية رفعت نضري الة من حجة
زڪـــريا.... اريد جنسيتج
زهــره.... شتسوي بيها؟
زڪـــريا.... الاحد اريد اروح للبصرة انه وابوي للمنطقة الجانو بيها.....(التفت الي واسترسل بڪلامة)... ڪلتي انتِ جنتي بالمدرسة مو؟
شُـــــــذير..... اي خالو بمدرسة (*****)
زڪـــريا.... يصير خير يلا انه استرخص وحجية ديري بالج عليها من أيســر الخبل
زهــره... لا تحجي عليه خايب وين اڪو نفس عقلة واخلاقة
زڪـــريا.... اي خوش صبغي بهذا الحجي وخلي يرفع خشمة علينة
حجاها وضحك باسها براسها وطلع كمت بسرعة ڪعدت يم بيبي واباوع للطفل بحضنها وهيه تشربة ممة
شُـــــــذير.... بيبي انطيني خلي اشيلة
زهــره.... اتربعي
اتربعت بسرعة وبيبي خلتة بحضني ضليت اباوع الة وابتسم
شُـــــــذير.... الله بيبي ڪُلش حلو....يصير عندي واحد نفسة؟
زهــره.... اي من تزوجين
شُـــــــذير....لعد ما اكدر اسويه وحدي؟
زهــره... خايبة ملفوكة شلون يتسوى؟
صفنت على سؤالها صدُك شلون يتسوي ماعندي اي فڪرة
شُـــــــذير.... يعني انتم تلعموني
بجة الطفل اخذتة مني بيبي وحجت
زهــره.... كومي شو كومي سوالفج فاهيه مو مثل هذيج المصرڪة آرويم
حجتها بضحك كمت من يمها وطلعت برة الغرفة ضليت ادور على آرام حتى اكعد يمها دخلت للصالة لڪيت خالو عبد الرسول موجود شافني راد يحجي واني صرت ام النسوان رفعتلة ايدي وسويتلة هلو
ضحك ورجعلي نفس الحرڪة فرحت وبسرعة ابتسمت من ما ڪسر خاطري
عبد الرسول.... شلونج بابا؟
شُـــــــذير.... زينة
عبد الرسول.. ڪولي الحمد الله افضل بابا
هزيت راسي
شُـــــــذير.... الحمد الله
عبد الرسول... خو ما واحد ضوجج؟
شُـــــــذير.... لا والله محد ڪُلهم زينين
حجيتها بس داخلي العڪس نصهم ما متقبليني
عبد الرسول...زڪـــريا اخذ جنسيتج؟
شُـــــــذير.... اي خالو ڪلي بس بعدني ما منطيتها الة
عبد الرسول.... بابا روحي وديها الة لا تنسين
شُـــــــذير.... اي هسه
حجيتها وطلعت وصعدت فوك وفتحت الباب الغرفة مالت آرام بدون لا ادڪة لڪيتها دا تتصل بسرعة فزت وطفت موبايلهة حاولت تسوي نفسها طبيعية غلست ودنكت على الكتاب تحفظ ما اهتميت رحت بسرعة اخذ جنطتي جانت مخليتها آرام بزاوية فتحتها وكعدت ادور على الجنسية
آرام.... على شنو ادورين؟
رفعتلها نضري وحجيت دون لا انتبه
شُـــــــذير.... جنسيتي
آرام... جنسيتج؟؟ ليش هيَ عندج شعجب اهلج قبل لا تضيعين منهم انطوها الج؟
اتلعثمت وما عرفت شنو اجاوب
شُـــــــذير...ها اي مو هذا سألي خالو عبد الرسول
آرام.... شبيج شُـــــــذير!
سحبت الجنسية من الجيب بسرعة وطفرت طلعت برة الغرفة واني اردد
شُـــــــذير... خالو زڪـــريا صاحلي
سديت الباب وراي ورحت الغرفتة اجيت ادك الباب وسمعتة يضحك ويحجي
زڪـــريا.... ههههههه انتِ على هاي؟.... تحجين صدك ليلى البنية بكد زري تغارين منها؟.... لا ماكو شيلي الفڪرة من راسج وديري بالج ترجعين تحجينها ڪبالي لا بالله الحجي يصير ما يعجبج.... اي هذا هوَ.... تعاي العصر ماعندي شي بس مو تجيلي مطفية اقري التعرفينة.....وانتِ بألف خير
ما فهمت اغلب ڪلامهم دڪيت الباب من حسيتة خلص مڪلامة
زڪـــريا.... منو؟
شُـــــــذير.... اني
زڪـــريا.... اوڪفي
حجيتها وسمعت صوت حرڪة بالغرفة شوية وفتح الباب
زڪـــريا.... ها شذر؟
شُـــــــذير...... خالو هاي جنسيتي خالو عبد الرسول ڪال اجيبها الك
اخذها من عندي وباوع الها
زڪـــريا....ما مخلين صورة بس اسم طفلة
شُـــــــذير.... ما اعرف خالو ما سائلة عليها اختي لأن من انطتني اياها ابتهال جنت اول مرة اشوف جنسيتي
زڪـــريا.... مغيرين حتى محل التسجيل! يعني مفڪرين الها
شُـــــــذير.... شلون يعني!
زڪـــريا.... جنسيتج. مزورة 100% بس شكو واحد ما انتبه اڪبر زوج.... شلون سجلوج بالمدرسة اكيد منتبهين بس شكلهم دافعين الهم حتى يسكتون
شُـــــــذير... ما اتذڪر خالو بس الي اتذڪرة اختي هوايه اشتغلت يلا قبلو يسجلوني
زڪـــريا....اختج هواي مستغلينها زين عدهم اثباتات ضدها؟
رفعت اڪتافاتي وقدمت شفتي السفلى
زڪـــريا.... ﷲ لا يكولها لأن اذا عدهم تروح ورة الشمس ابسط شي بس يڪضونهم يعترفون عليها
رفعتلة نضري وبسرعة حجيت بخوف
شُـــــــذير..... لا خالو لا تڪولها عفية اصلاً اختي خطية همه يجبرونها تشتغل هيَ ما الها ذنب
زڪـــريا.... هسه لا تفڪرين زايد ان شاء الله ماڪو شي
هزيت راسي
شُـــــــذير.... زين خالو اني راح ابقى عدگم؟
زڪـــريا.... اكيد على ما نلڪة اختج
شُـــــــذير..... بس خالو شنو راح تڪول الهم؟
زڪـــريا.... ياهم قصدج الناس؟
شُـــــــذير.... اي خالو يعني ما معقول من تڪول الهم ضايعة من اهلها ما راح يكولون ليش ما ادليڪم بيت اهلها يعني شي اكيد اني اندلة
زڪـــريا..... الله ڪريم تدبر السالفة لا تشيلين هم.... الاحد الجاي ناخذج واحتمال امر على مدرستج انقلج لأن الواضح مدرستكم هيته صايرة
رفعتلة نضري بسرعة وابتسمت بفرح اجذب اذا اكول ما اتمنيت اتمرغل بالڪاع من الفرح
شُـــــــذير.... بس يقبلوني هنايه بهذن المدراس؟
زڪـــريا.... عادي تدبر صديق عمي معتز مدير مدرسة يكدر يلزڪها
زادت ابتسامتي وحجيت
شُـــــــذير.... شڪراً شڪراً
ابتسم الي
زڪـــريا..... هههههههههه عفواً عفواً
اجيت احجي وانتبهت الخالو أيســر ڪاض سترتة بأيدة ومخلي ايدة الثانية بجيبة ورافع حاجبة ويباوع النة اختفت ابتسامتي بسرعة حجة بأستهزاء
أيســر.... ڪملو ڪملو
حجاها وفتح باب غرفتة ودخل وهوَ يبتسم بأستهزاء رجعت نضري الخالو زڪـــريا
زڪـــريا.... خالو روحي نامي
هزيت راسي و انسحبت رجعت يم آرام تمشط شعرها وعينها على المراية وتبتسم وسرحانة سديت الباب وانتبهت الي رجعت الطبيعتها ولفت شعرها وحجت
آرام...... يمكن باجر يطلعون يمامة
شُـــــــذير.... صدَكك يعني صارت زينة؟
آرام.... مادري والله بس هسه مر عليّ أيســر يكول قبل لا اجي مريت الهم باجر يطلعونها اذا استقرت حالتها
شُـــــــذير.....ها ان شاء الله تصير زينة
آرام...... راح انزل يم بيبي حتى اساعدها على الطفل خاف يبجي بالليل وما تكعد تنزلين وياي؟
صفنت الها خاف ابقى هنانه ويجي خالو أيســر باوعت الها وهزيت راسي بهستيرية
شُـــــــذير.... اي اي اروح وياج اخاف ابقى هنانه
آرام..... ههههه ڪومي جا
كمت وياها وهيَ اخذت موبايلها وشاحنتها ونزلنة فرشت النة فراش من النضدة حسب ما يسمونها واتمددنة وحدة بصف الثانية وبيبي على الچرباية وعلاوي على الكاروك يمها
شُـــــــذير.... لعد ما طفون الضوة؟
رفعت راسها بيبي
زهــره.... لا يمة مو زين على الفرخ اذا ماتكدرين تنامين صعدي فوك
شُـــــــذير.... لا لا اكدر انام
زهــره... جا بكيفج
حجتها ورجعت راسها على المخدة التفتت الآرام لڪيتها عينها على الموبايل وتبتسم انتبهت الي وهمست
آرام... تعاي اراويج شي
شُـــــــذير.... شنو؟
آرام.... شخص
شُـــــــذير.... شخص لو شخصة؟
ضحكت وغمتني
آرام... لا شخص
قربت مخدتي يمها دخلت على برنامج ما اعرف اسمة وطلعت صورة شاب يعني زين بس اني ما حبيتة
شُـــــــذير.... منو هذا؟
آرام... مدرس العربي
شُـــــــذير.... يدرسج؟
آرام... اي
شُـــــــذير... هاا زين ليش شوفتيني صورتة؟
همست الي بصوت خافت حته لحد يسمع
آرام.... بعدين احجيلج نامي هسه ولا تجيبين سيرتة يمهم ترا تسويلي مشڪلة تمام؟
هزيت راسي بقبول ورجعت المڪاني جريت البطانية واتغطيت
شُـــــــذير.... آرام باردة شغلي الهيتر
حجت بيبي بسرعة
زهــره... لا خايبات لاتشغلنة لا النوب نحترك بالدنيا كبل الاخرى
شُـــــــذير..... بيبي باردة
زهــره... اتغطي ببطانية ثانية
شُـــــــذير.... بيبي انتِ مو نمتي؟
زهــره..... لع ما نمت بعدني
سكتت وكمت جبتلي بطانة ثانية واتغطيت بيهن اثنيهن بس بعدني بردانة صفنت على وضعي من صدُك الحال يتغير بسرعة وين جنت ووين صرت بس مستعدة اعيش العشتة مرة ثانية بس يم اختي
دمعن عيوني عليها وينها هسه وين راحت معقولة صار عليها شي ما اعرف الدنيا شنو تريد من عدنة جمعتنة بصدفة وفرقتنة بعد ما صرنة سند البعض اني بدونها ولا شي مو استنقاص من نفسي بس تعلقي بيها مثل تلعق طفل بأمة صح جانت تــــاج طايشة بس بالرغم هذا ڪُلة تعاملني وڪأني بنتها
اتنهدت وبلعت الغصة ونمت مالحڪت اغفة وسمعت صرخة بيبي زهــره وهيَ تردد
زهــره... ولڪم يمامة ماتت
طفرنة ڪُلنة وطلعنة برة ما افتهمت الي صار بس ڪُلها نزلت من فوك شي تلبس ملابسها وشي ما تندل دربها فركت عيوني اريد اشوفهم بوضوح حسيت بكلبي دكاتة سريعة من الهبطة الصارت ما اعرف شعوري بوقتها بالرغم ما اعرف يمامة غير كم يوم بس انقهرت عليها صعب يموت احد وانتَ حاجي وياه بلعت ريڪي والتفتت لڪيت آرام واكفة وعيونها حمر وتبجي اتقدمت يم بيبي وحجت وهيه تبجي وتصرخ
آرام.... منووو كالل الكممم شلوون ماتت شلووون
دكت بيبي على رجلها وصاحت
زهــره... ما ادري ما ادري اسيل خابرت وكالت ماتت ولك زڪـــرررريا تعال اخذنيي وينك
نزلن ادموعي وياهم وعلى الفزعة الي همه بيها فركت ايدي بتوتر وهمست
شُـــــــذير.... طلع خالو زڪـــريا
رفعت نضرها الي
زهــره.....وأيســر
شُـــــــذير ... هم طلع هوَ وخالو عبد الرسول بس جنتي ما منتبها
زهــره..... روحي جيبيلي عباتي
رحت بسرعة جبتها من الغرفة وانطيتها الها لبستها وكامت صاحت آرام
آرام... وين رايحة اخذتي وياج..
زهــره..... رايحة المعتز خلي ياخذني الهم وانت وين رايحة ابقي بالبيت وانه هسه اكل السميرة تجي يمجن خاف تجي ناس
طلعت بيبي زهــره انتبهت الصوت بجي مالت علي انسحبت بسرعة ورحت يمه لكيتة يبجي صفنت عليه بحيرة شلون اشيلة شلتة بصعوبة بس احس راح اموت بمكانة خاف يطيح ضليت اهز بي بس ما اعرف زاد بالبجي صحت بصوت عالي
شُـــــــذير.... آرام تعااي
ما جاوبتني ما اعرف شصار بينة اني منا ما اعرف اتصرف وياه شوية ونام خليتة بمكانة وكمت لكيت سميرة تفرش بالفراش وآرام وياها تشتغل وتبجي
ليلى.... جا يسوون فاتحتها هنا ليش مو بيت رجلها؟
سميرة... بيتهم زغير
سمعت رجع بجة رجعت للغرفة ما اعرف اسكتة اجت عيني غلى علبة الخليب والممة مديت ايدي واخذت ما اعرف شكد اخلي خليت خاشوكتين وشوي مي وانطيته الة اخذة وشوية سكت صار الصبح ووللأسف اتأكد خبر موت يمامة ما فهمت السبب بس اسمعهم يكولون شالو رحمها وماتت
ضليت بالغرفة والطفل بحضني بس اسمع بجي النسوان والملاية تنعى اختنكت والدمعة بعيني دنكت راسي على الطفل حسيتة انضلم من انخلق وامة ماتت حتى يمكن ما شافتة
انفتح الباب ودخلت ليلى تضحك شافتني كاعدة اختفت ابتسامتها
ليلى..... شعندج هنا متكركحة على الجرباية كومي ولي ساعدي بالمطبخ مو امي شايلة الشغل
ضليت محتارة اكوم لو لا عاطت بصوت عالي
ليلى.... كووووومي
فزيت بخوف كلت اكوم كفيان للشر اجت اخذت علي مني وراحت كمت من مڪاني وطلعت برة البيت مملي نسوان ما اعرفهن منو بس ڪُلش هواي عبرتهن ورحت للمطبخ لكيت آرام تغسل مواعين وتبجي مشيت الها وحجيت بقهر واني اجر ردنها
شُـــــــذير... آرام عفية لا تبجين
ما جاوبتني انملن عيوني بالدموع وحجيت بغصة
شُـــــــذير.... اني اغسلهن روحي
ما صدكت بسرعة غسلت ايديها وراحت اخذت الاسفنجة وبديت اغسل بالاستكاين مالت الچاي شوية وسمعت طكطكة وراي التفتت لڪيت سميرة شايلة ألياس وواكفة وراي حجت
سميرة... تعاي اخذي ألياس
شُـــــــذير .... ما اكدر دا اغسل
سميرة.... احجي عدل لا افر وجهج براجدي تعااي اخذي هسه من حور شغلج
غمضت عيوني بنفاذ صبر ما الي اي طاقة حتى اردها غسلت ايدية ورحت شلتة وضليت واكفة
سميرة.... خيرر؟
جاوبتها بملل
شُـــــــذير.... شنو؟
سميرة.... روحي كملي شغلج
شُـــــــذير.... يعني مو شايلة ألياس شلون اكمل عندي ثمن ايدين عنكبوت انيي؟
سميرةة... وسممم روحي بدون حجي
نفخت بضجر وكرهت حتى روحي خليت ألياس على الكاونتر يمكن اني هنا غلطت كعدت ورحت اكمل غسل ستكاين والتهيت شوية واما اسمع الة صوت طيحة قوية التفتت بسرعة وجفلت من شفت
ولا زالت الحكاية مستمرة
الى هنا وانتهت العثرة الثالثـة عشرة
جاي افڪر اخلي تــــــــاج تحجي وياكم من حسابي بالانستا بس مو اڪيد اخذ رأيها و اشوفها تقبل او لا بس احاول اقنعها بكل الطرق لأن حابة تتواصل وياكم مرة وحدة على الاقل و تجاوبكم على اسئلتكم فـشنو رأيڪم؟ 🌚💋
تصبحون على الف خير