قيود عشك الشيخ

قيد السادس

هَل ياتُرى.. لَو مِتُأنسى ماجَرى..؟!
هَل ياتُرى.. لو كان عندي غَيرگم..
قلبي إليگم ماسَرى..؟!
ه‍َـل ياترى يحتاچ مني ڪرهگم..
قلباً قويا ثائراً متمرداً وتهچرا؟
ها قد فاضت اجفني..
والدمع منها ماجرى

﹌﹌﹌﹌﹌﹌﹌﹌﹌﹌﹌﹌﹌﹌﹌

"ســمر"
اليوم يلتحقون كل مرة اروح اودعهم بس هل مرة ما كدرت لا اكدر اروح لايسر الي من اخر موقف كام ما يباوع بوجهي ولا اكدر اروح لاصيل

فرشت سجادتي وصليت الهم ركعتين بنية يرحون ويرجعون سالمين نزلت دموعي وانا على سجادة اختنكت بعبرتي وانا اناجي ربي::- احفظهم وردهم النا سالمين غالمين وانصرهم على الاعداء يا رب

غصيت واردفت::- عمري كلة ما طلبت منك غير طلب واحد وهو ايسر ربي لا تعذبني بي و الله انا احبة يا رب اجمعني بي وخلي من نصيبي اموت اذا ما صرت الة و الله اموت

كمت لميت السجادة ومسحت دموعي ونمت بفراشي وكل عادة سحبت موبايلي وطلعت صورة ايسر وظليت اتاملها

صافنة بملامحة الرجولية عيونة الخضر وشعرة الاشكر شاربة الي محدد وحواجبة الثخان مثل السيف كل يوم كل يوم يزيد حبي الة اكثر و اكثر مو بيدي هل شي مو بيدي كلبي يريدة بس هو

فزيت على ركعة الباب طفرت واشوف اية عيونها بكصتها فزعت الها::- مالج اية

::- الحقيرة شروق مسوية رؤيا خدامة عد الخلفوها

عقدت حواجبي ما فاهمة::- شكو

باوعتلي عيونها تريد تنط وبدت تسولفلي وانصدم من كمية الحقارة الموجودة عد شروق

"ايـــة"
وصلت يم الباب واسمع اصوات غريبة عقدت وجهي بعدم فهم فتحت الباب بدون استاذن واشوف منظر قشعر جسمي منة وصدمني?!!

جانت شروق كاعدة على جرباية ومادة رجليها وحدة بالطشت بي مي والثانية خالتها على متن رؤيا وهي تحجي::- نظفي عدل ولج كرضي اظافري وقلميهن

فاتحة حلكي على وسعة من كمية الدنائة والذل الي معيشتة لهل البنية اليتيمة حجيت::- شنو هاي

وكفت رؤيا تباوعلي وعيونها مدمعة من الفشلة اردفت شروق بحقارة::- ولي اطلعي ولا تدخلين شعليج انتي

::- شرايج اجيبهم لهنا واخليهم يشوفون شتسوين

اردفت رؤيا وهي دموعها على خدها::- طلعي اية

باوعت الها::- شنو من نفسية عندج ما عدها ادين حتى تنظفين جيفتها

صرخت شروق بوجهي وهي تتقدم::- وحق ربج اذا ما اختفيتي من وجهي خلال ثواني اروح اسويلي سالفة واخليج اطلعين منا حافي

فتحت عيوني على وسعهن واجت رؤيا طايرة تدفع بية وتبجي وهي تحجي بتوسل::- فدوة لا تحجين بعد لا تدخلين الله عليج ولله تتاذين اسكتي روحي روحي لا تدخلين

روحها مشرشطة وتدفع بية وذموعها على خدها صاحت شروق::- تعالي كملي ولج يلا نعست

يابة حسيت هيج نار وتوسطت صدري من قهر عفتهن ورحت بوجعي لغرفة عمة جميلة فتحتها وهي فزت جان اثير كاعد يمها ما اهتميت

جسمي كلة يرجف وخانكتني العبرة كلت بدون سابق انذار::- عمة تعالي لشروق شوفيها شلون مخلية البنية خدامة عدها وتغسل برجليها وتمسحهن

طفرت عمة جميلة وراحت للمخزن اول ما فتحتة طفرت شروق تمثل دور البرائة وهي تحجي::- ها حبيبتي رؤيا اصرت علية تسويلي رجلية لان بعدني عروس

راحت عيني لرؤيا مدنكة ووجه محتقن رفعت عيونها رمقتني بنظرة بمعنى ليش ادخلتي ودنكت راسها

حجت عمة جميلة بصرامة وهي تضرب عكازتها بالكاع::- خية اتاخر الوكت وانتي عروس روحي لحجرتج ريلج هسة مناطرج وانتي يمة نامي هم يلا تنامين عندج مدرسة مو

هزت راسها بغصة وردت::- لا خالة مبطلة

سكتت عمة جميلة وشروق طلعت وهي تخزر بية رجعت الها الخزرة راحت عمة جميلة لغرفتها وانا ردت ادخل للمخزن واسد الباب

واشوف اثير واكف جامد بمكانة وعيونة مصبوبة صب على رؤيا يبلع بريكة وصافن عليها حمحمت انتبه الي وابتسم هو يروح وبالة شارد استغفر الله شلون ناس

سديت باب المخزن واجيت وكفت يم رؤيا لزمتها من ايدها واردفت::- ليش تخليها هيج تتصرف وياج

باوعتلي ونزلو دموعها ما احس الا شمرت روحها بحظني جمدت حتى ما توقعت منها هل فعل رفعت ايدي حاوطتها وهي تبجي بخنك

وخرت عني وهي تضحك بحزن::- شكرا اية اول مرة بحياتي واحد يدافعلي هل شكل

ابتسمت وجريتها كعدتها على جرباية::- شنو سالفتج ليش تخلينها هيج تتمادة وياج

سكتت مدنكة بلعت ريك واردفت::- ما كان لازم تدخلين اية شروق حية واذا خلتج ببالها ما راح تسلمين ما راح تسكت عليج ما ردتج تدخلين

باوعت الها مصدومة::- دختولي اشك حلكها و الله شتريد تسوي

ابتسمت بحزن واردفت::- كلشي ما يخطر على بال تسوي

اردفت::- تتقرب لسوالف ام عباس

::- ها

::- تتقرب للسحورة وكذا?!!

::- بس هاي العايزة الما سوتها!!

::- جا اذا ما تسوي سحورة مكدور عليها سهلة

ضحكت::- اية انتي ما تخافين

::- اخاف منين يس لا من شروق دخل تطير غير بس اكول لايسر واصيل عنها يطرذوها وينعلون سلف سلفاها

ابتسمت::- الله يحفظكم سوة

::- امين يلا انا وراي دوام وانتي صيري نجرة لا تخليها ادمغ عليج

ابتسمت بحزن وما ردت عفتها وصعدت شايطة روحي اول ما دخلت للغرفة والكة سمر خالة صورة ايسر مقابيلها وتباوعلة ولله هاي بطرانة الوادم تتلاطم جوة وهاي بالعالم الموازي تباوع لصور روميو

ركعت الباب ردتها تتنبه فزت مخترعة باوعتلي وسالتني عن حالتي وبديت اسولف الها كلشي وانا روحي فايرة اردفت بقهر::- مبينة هل شروق مو سهلة

::- دنعل ابوها لابو ساسها

تنهدت::- اية فكينا بداعة الله ما النا خلك مشاكل البنية كالت الج ابتعدي فابتعدي ختولي عوفيها مبينة مو راحة واحنا ما عايزين

::- شنو بوية اذا هي مشرانية احنا عايزين شر انعل يومها ويوم اليطلع وراها شنو طايحة للبت دك وخدمة شايفتها شلون تكسر الخاطر لا من لبس ولا من شكل وجها تعبان وكلة اثار ضرب وملابسها حيل تعبانة مبينات قديماات حيل

جرت حسرة واردفت::- اية شو فكينا هي ومرت ابوها احنا شعلينا وندخل ها?!

سكتت ما راضية وهي ذارت وجه ورجعت فتحت الموبايل وتبوس بي عرفتة بصورة ايسر باوعت الها بقهر وتنهدت على حالتها

جريت الكتب وكعدت اقرة شوية نعست لفيت راسي ونمت

حسيت على لمسات على خدي فزيت ما احس الا ايسر لابس ملابسة العسكرية و كاعد كدامي ركبة ونص شهكت بسرعة اردف::- اشششش

باوعتلة واردفت::- راح تروح

همس::- اي وحبيت اشوفج قبل لا اروح ما ردت اكعدج

برطمت ابتسم::- لا تبجين بوية اندعلينا

::- ترجعون سالمين عزاز كلبي

ابتسم ودنك اخذ ايدي وباسها::- حبيبتي بناتي بعد ما اوصيج مثلما كتلج دراستج اريد من اجي ترفعين راسي وتكليلي مجاوبة

هزيت راسي ونزلت دمعتي غصب عني::- ان شاء الله

جر حسرة بقهر هو يكول::- شلون بيج ما تكليلي شلون بيج كلما اروح تشلعين كلبي هيج لج بوية لا تبجين

مسحت دموعي::- لا تتاخرون

::- ما نتاخر وداعة عيونج نحاول ما نتاخر عليكم بس لا تبجين اسكتي

هزيت راسي هو رفع روحة باس راسي هو يكول::- رجعي نامي بناتي وراج دوام لا تنزلين وهاج هذا مصرف الج ولسمر

هزيت راسي واخذت الفلوس من عندة::- هواي هذا

::- ميخالف ما اريد تحتاجيلجن واحد بغيابي يلا في امان الله

راد يطلع صحت وراه::- ايسري

::- روحـــة

::- لا الة الا الله

ابتسم::- محمد رسول الله

::- الله ومحمد وعلي وياكم يحفظكم الله وترجعولنا سالمين

لمعن عيونة واردف بحنية::- اعـز اعــزازي.'

ابتسمت وعقدت حواجبي اول مرة اسمعة يكولها هو ابتسم بطريقة غريبة وعافني وطلع دعيت من كل كلبي يرجعهم سالمين لفيت راسي ونمت

ثاني يوم كعدتني سمر نروح للمدرسة انطيتها مصرفها واردفت::- هذا ايسر خالة الج

اخذتة مني تشم بي هزيت ايدي وعفتها وطلعت ولله عائلة شافطة علما غسلت وكملت اجت ابتهال وطلعنا كلنا سوة

وصلت للمدرسة مدرستنا بصف مدرسة سمر هي راحت لمدرستها وانا وابتهال رحنا لمدرستنا

"ســـمر"
وصلت لباب المدرسة والحارس يخوزر بية ما اهتميت الة ودخلت بعدني بالباب طفرت تبارك تسلم علية وترحب بية

ابتسمت طول سنوات دراستي ما شكلت صداقات عكس اية مرة رحت لمدرسة تمشي وتبوس بالبنات المدرسة كلها تعرفها ومرات تمرلي نطلع سوة حتى من مدرستي مشكلة صداقاات وتسولف وتضحك وياهن

اردفت تبارك::- اووي شنو من دروس تعبت حيل

::- اي والله شوكت نخلص من السادس

::- اليوم ما وصلج ابن عمج

::- راح التحق

::- عززااااا ظااااااببططط

صرخت صرخة بنص الساحة خلت البنات كلها تلتفت وتباوع النا عضيت شفتي بخجل واردفت::- صوتج تبارك

::- صدك اصيل ضابط

::- اي

::- خرب شبيج مضيعتة من اديج

::- مو بيدي ما احسبة غير اخوي

بديت مثل الثولة اسولف الها كلشي من طفولتي لحد هذا يومي ما عرفت بهذا تصرفي جبت اخرتي وسلمت ركبتي لحبل المشنقة

اردفت تبارك::- بس ما يصير هيج على يا اساس اية تاخذة هي مو تدري بي يحبج

::- شنو باديها اية هو اليحبها هي معتبرتة اخوها وابوها ما عدها كل مشاعر اتجاها

::- انا برائيي لا تصدكين هل سوالف فتحي عيونج شوفي اية شلون تمثل البرائة والطفولية حتى تحصلة وتتقرب منة وانتي بس تشوفي تشردي اليشوفج شايفة بعبع

بعدين اية غير تدري بيج تحبي ومن زمان وعلى كلامج هي قريبة منة والها اثر علية ليش ما حاولت تقربج من عندة او مثلاً تبتعد عنة حتى تنطيج فرصة

شوفي اذا ما طلعت اية حاطة عينها علية وتريدة الها انا ما اتسمى تبارك

صفنت بكلامها فعلا اية من زمان تدري بية احبة ليش ما حاولت تكلة وهي ما تظم شي علية حسيت تبارك شوشت تفكيري اردفت::- تبارك اية مو هيج احتمال رادتني انا الاصارحة

::- ماكو هيج حجي سمر فتحي عيونج لا تصيرين غبية اية لو تحبج فعلاً جان حاولت وي ايسر وجمعتكم بس هي تريدة الها وحدها ما تريد واحد يشاركها بي طبعا وين تحصل مثلة ضابط وعندة خيرات الله فلوس

تزعطط بروحها حتى تتقرب منة وتخلي يحبها ويتعلق بيها وتسيطر علية واخر شي تاخذة وانتي تضلين تتصفنين

عافتني بحيرتي وكامت ظليت افكر بكلامها واحاول ارفض سمها بس ما كدرت كأنو استوحذت على تفكيري وعقلي

فزيت من شرودي على دكة الجرس للصف طول اليوم تفكيري يم كلامها اخر درس انطونا فرصة اجت هم كعدت يمي واردفت::- فكري بكلامي

باوعت الها بحيرة عفتها وكمت طالعة من المدرسة كلها حتى للمدرسة اية ما مريت رجعت كبل لبيتنا اول ما دخلت تلكتني عمة جميلة شافتني جاية وحدي اردفت

::- شنهي وين اخياتج ليش وحيدج

::- عمة انتظرتها بالباب وماكو وانا حيل تعبانة ونعسانة اجيت وحدي

::- يععع من فلك فلك راسج خايبة من شوكت تعيفين اخيتج وحيدها خايبة ليش

اردفت بنتر::- عمة مالج اكلتيني وشربتيني شبيها اية صغيرونة هي تجي وحدها

بعدنا جاي نحجي ودخلت اية باوعتلي بغضب واردفت::- وينج انتي ادور عليج وماكو همزين البنات كالن رحتي جان ظل بالي ولهسة ادور ليش ما مريتي علية

تجاهلتها ودرت لعمة جميلة واردفت::- اها هاي هي اية كلشي ما بيها بعد يومين كلية انا شنو ابتلي بيها
عفتهن ودخلت تحت ذهولهن من كلامي وتصرفاتي

"ايـــة"
بالي اليوم كلة وي الولد اريد بس اخلص الدوام حتى ارجع واطمئن عليهم واصلين بخير وسلامة

طلعنا فرصة ابتهال راحت تدافر وي البنات على حانوت وانا كعدت بالساحة انتظرها باوعت وشفت بنية ويانا بس بغير شعبة حامل وبطنها شكبرها كدامها

رحت توجهت الها وكفت فوك راسها رفعت راسها تباوعلي وابتسمت ابتسمت الها واردفت::- عادي اسالج سؤال

هزت راسها واردفت::- تعالي كعدي

كعدت يمها متوترة شلون احجي وياها باوعت لبطنها واردفت بدون مقدمات::- اكلج انتي شلون حبلتي

صفنت بوجهي البنية تحاول تفهم سؤالي الغبي ضحكت واردفت::- شنو شلون حبلتي حبلت بعد رجلي حبلني

::- اعرف رجلج حبلج بس شلون يعني عادي تشرحيلي

فتحت عيونها على وسعهن ميتة ضحك::- سلامات خية شبيج يا شرح هسة بهل لزك

::- حبابة زين بس كليلي المرة تحبل بوسة من الشفايف

اشوف البنية ميتة من الضحك رادت تموت اختنكت واردفت::- خرب يومج خايبة شنهي لا مو هيج تعالي خل اكلج لا تبعريها وترحين تسالين واحد غيري وتصيرين مضحكة

بدت تشرحلي وانا وجهي صار طماطة من الخجل ردت اطم روحي على هل غباء وانا رحت كلت لايسر راح احبل من صخام الصخمج اية

طاح حظج يا خبلة قشعر جسمي وهي تشرح عفتها وكمت رايحة روحي ووجهي كاب نار من الخجل امداج اية دومج ثولة شسويتي من دهر صاب راسج

اجتني ابتهال تاكل بلفة واللفة الثانية بايدها وحجابها مخربط ابتسمت اظل ادفع وي البنات منا لمن تحصل وتشتري خرب يومج ابتهال هذا اخر درس وهي من اول درس تاكل هاي ثالث لفة غير كلساع تشتري جبس وحلويات وعصاير

اجت انطتني اللفة واردفت::- خاب شنهي من دهر صاب روسهن مو بنات جعصني جعص

ضحكت::- هنا الجعصنج لو انتي ما شفتج ذاك اليوم دفعتي بنية وكعتيها بالطين

::- جا شنهي غير جوعانة وهنا ما شايفات يردن بس ياكلن عييعع

ضحكت وانا اكل دك الجرس وحلينا انا وياها وهي تحجي::- كون امي مسوية تشريب ضلوع وعلية حمص واعصرلي نومية علية اششششاااه جعت جعت شوصلني للبيت

::- وجع الوجعج خايبة مالج مو اكلتي هسة شوكت جعتي

::- اسكتي انتي ما عليج دخلي للمدرسة صيحي سمر الفاهية خليها تجي جعت يلا

ابتسمت ودخلت لجوة ادور عليها وماكو لمن شافتني وحدة وياها وكالت طلعت استغربت هاي اول مرة تسويها ما تطلع ابد تنتظرنا منا لمن نخلص ونطلع سوة

طار كلبي عبالي بيها شي استعجلت بالمشي وصلنا لفرعنا شفتها دخلت للبيت وصلت للمحل ردت اشتري حلويات لليل لان الولد ما هم واثير لو يموت ما يجيبلي شي يتعاجز

ما اعرف ليش خطرت ببالي رؤيا وهم اشتريت الهم علاكة شحط لروحي احطلها

طلعنا من المحل وابتهال فص ملح وذاب تركض للبيت ركض جوعانة شكد تاكل هاي البنت راح تنفجر كد ما اكلت

وصلت للبيت وشفت سمر وتفاجئت من كلامها وطريقتها وي عمة جميلة بس فاتت اردفت::- مالها هاي تخبلت

باوعت الها بتنهيدة::- تعالي عمة تعالي خل نفوت لجوة عوفيها

دخلنا سوة واباوع بس عمة سهاوي بالمطبخ::- ها خير وين العروس

اردفت هي تهز ايدها::- نايمة وريلها كعد من الخمسة الفجر سوتلة جميلة الريوك وهي نايمة والبت رؤيا كعدت من الصبح نظفت من حلك ساكت لمت البيت لم ودخلت للمخزن ما خلت شي ينعتب عليها

اردفت عمة جميلة::- مالجن بعدها عروس لا تخلن بالجن وياها وشوفي اية امس ما عجبني وضعهن ولا عجبتيني لا تدخلين بعد مبينة مو سهلة مالنة خلك كوانة وي عمج فكينا الله يفكج

ابتسمت بشر وغمزت لعمة سهى::- بداية خير ان شاء الله

ضحكت وعمة جميلة تهز بايدها ما قابلة عفتهن يحظرن الاكل بالمطبخ وتوجهت للمخزن دكيت الباب اجاني صوتها الهادئ::- منو

::- اني اية

::- تعالي اية

دخلت الها مبتسمة بس شافتني ضحكت اباوع مخلية المخزن يلمع لمع ومرتبتة وشاديلها مروحة وجرباية جديدة

::- اوووه شنو هل ترتيب عاشت اديج تخبل

::- حلو مو

ابتسمت::- يخبل و الله كلش حلو هاج هذني حلويات مريت بالمحل وانا راجعة وذكرتج

دمعن عيونها صافنة بوجهي اردفت بتفاجئ::- الي انا?!!

::- اي سلسيهن بالليل من تجوعين

ابتسمت من بين دموعها واردفت::- عادي احظنج

ضحكت وتقدمت انا حظنتها وهي حاوطتني ابتعدت عنها وحجيت::- ليش حابسة نفسج هنا بالمخزن ليش ما طلعين تعالي صعدي يمنا انا وسمر

ابتسمت واردفت::- ان شاء الله على جايات وبعدين اليوم انتي بالمدرسة

::- يلا بس هل اسبوع نداوم وبعدها نعطل للامتحانات

::- الله كريم الله يوفقج ان شاء الله

::- تسلمين حبيبتي صدك انتي ليش مبطلة وشكد عمرج

::- انا عمري حاليا 14 وبطلني اخويا من توفة بابة الله يرحمة ما قبل اكمل بعد وصلت سادس وكعدت وسكتت

::- الله كريم يلا رايحة ابدل

::- روحي حبيبتي

رحت لفوك لكيت سمر كالبة وجها ما حجيت شي وياها توجهت للموبايل ردت اخابر ايسر ما احس الا الموبايل انوخذ مني عاطت بصوت::- ليش تاخذين الموبايل

خنزرت بوجها واردفت::- تادبي صوتج ايسر جابلناياه ثنيناتنا مو بس الج

::- لا جابة الي من نجحت من الخامس ولان زعلتي علية وغرتي كالج انتي وياها

صفنت::- شنو هل لهجة الجديدة هاي شبيج بس اريد اطمئن علية اشوفهم وصلو لو لا

دنكت تتصل بيهم نترت بيها::- فتحي سبيكر

فتحت سبيكر والموبايل يرن ويرن وين يلا رفعة اجاني صوتة مليان حنية::- ها يا اعــز اعـزازي جنت منتظر منج اتصال حتى اسمع صوتج

ابتسمت وردت احجي جان سمر تسد السبيكر وتخلي على اذنها وهي تكول::- ها ايسر الحمد الله على سلامتكم

اي اي اكول الهم

اية جوة نزلت تتغدة ستوها اجت من الدوام

اي اي يوصل باي الله وياك

سدت الاتصال تحت ذهولي من تصرفاتها احس شرشطت روحي هي باوعتلي بعدم اهتمام ورادت تنزل لزمتها من ايدها::- شنو هل تصرفات سمر ليش هيج سويتي

::- انتي واعدتيني تبعدين عنة ليش ما وفيتي بوعدج ها?!!!!

نترت ايدي وعافتني تحت ذهولي وصفنتي استغفرت ربي وعذرتها يجوز سامعتة من اجة و ودعني وضاجت اي احتمال هل شكل و الا سمر شعدها وياي ما تتصرف هل شكل

انا صح واعدتها ابتعد بس مو بيدي كلما ابتعد الكة روحي متقربة الة اكثر ايسر هو الرباني مو بهل سهولة اعوفة وادير ضهري الة!!!

نزلت لجوة واسمع شروق تتعذر::- عذرني ولله البارحة الشيخ ما خلاني انام للصبح

قاطعتها جميلة هي تكول::- ما حاجة تشرحين عيني البنات كاعدات عروس ومعذور

اجة اثير كعد هم وعينة للمخزن راحت تقرب مني واردف::- شبيها هاي شروق وي البنية

::- ادبسز خالة كورها وكور البنية بس دبارها عندي

::- خاب كعدي لا تفصمج ما تشوفيها تطبكنا انا وياج والحجي سوة

::- دخل تطير ولله اطيح حظها البنية شايفة الويل منها

صفن عينة للمخزن يفكر استغربت هاي اول مرة نحجي بدون لا نتعارك انا وياه اردف::- جا وينها ليش ما تجي

::- تكلة سوس البلا شو شمسوية الها

راد يحجي واردفت عمة جميلة::- يمة اية كومي شوفي رؤيا خل تجي تاكل ويانا حتى ريوك ما تريكت

ابتسم ونتعشت روحة اثير وعينة للباب ردت اروح طفرت شروق::- انا اروحن اشوفنها خاف تستحي

عافتنا وراحت وانا كمت الوب دنكت لاثير اهمس::- هسة تضربها لو شو شتسويلها

فز يباوعلي عاقد حواجبة::- ليش

::- ما اعرف شنو مشكلتها وي هل بنية المسكينة ولله تكسر الخاطر اليوم جبت الها حلويات رادت تبجي عيونها دمعت وحظنتني تتشكرني احسها فاقدة حنان الاهل

سكت يجر حسرات وعينة ما نزلت من المخزن اردف::- شوفي اذا طلعت شروق والبنية مو وياها اخذي صينيتج وروحي اكلي وياها خطي

هزيت راسي شوية وطلعت شروق فارغة اردفت::- ما تريد تكول تعبانة واريد انام انا من اجوع اكل

اردفت عمة سهاوي::- عمت عيني خطي تعبت البنية بالبيت كامت تنظف

ابتسمت شروق وردت بصلافة::- جا بعد شكو خليها تنظف بدالي وانا اشبع نوم المن جايبتها

سوتها بضحك بس الكل صفن بوجها وهي تفشلت وسكتت دنك يهمس::- كح** و الله كح*- واذا ما طلعتي هيج اكص ايدي

صفنت بوجها متفاجئة شبي هذا باوعلي واردف::- سوي مثل ما كلتج

كمت للمطبخ جبت صينين وكمت اعزل وعمة جميلة تصيح::- ها وين

::- يجوز البنية تستحي مثلما تفضلت مرت العم انا اروح وناكل سوة

خزرتني شروق وهي تكز اسنانها ميتة مني::- كالت من اشتهي اكعد اتزقنبببب

نترت باخر كلمة اردف اثير::- روحي اية زين تسوين

عفتها ومشيت للمخزن خليت الصينية بالكاع وفتحت الباب ودنكت شلت الصينية لكيتها على جرباية مكورة روحها وتبجي

بس شافتني فزت طرحت الاكل بالكاع ورحت الها::- شبيج

هزت راسها بلا وراحت عينها للصينية::- ليش تسوين هيج اية تاذيج و الله تاذيج

::- دخل تروح بعدهي ما تعرفني

::- انتي ما تعرفيها هاي شيطان و الله حتى الشيطان يصفن على سوالفها صدكيني تاذيج وروح امي الما شبعت منها ومن عطرها

صفنت::- ليش تسوي وياج هل شكل شعدها

ردت بغموض::- لان تخاف احجي شي عنها لو حجيت تنتهي

باوعت الها صافنة اردفت::- تعالي ناكل

هزت راسها واجت وياي حتى تاكل واللكمة كوة تبلعها من الغصة عينها دوم مدمعة انتبهت لدشداشتها متمزقة تنهدت ساكتة

لا هي الحجت ولا انا اشوفها تاكل قليل::- اكلي شبيج

::- ما متعودة اكل راح تسمنوني هل شكل جنت كل يومين يلا تخليني اخذ كرصة خبز وماي ومرات تنساني ثلاث ايام اربعة

صفنت بوجها وهي دنكت تبلع بغصتها كملنا الاكل وخلصنا وطلعت الصينية ووكفت بالمطبخ اسوي بالجاي دخل عمي سلمت علية وصبيت جاي ورحت للصالة

جان كاعد يم شروق ويهمس الها وهي تحجي وياه وكانو جاي تشكيلة هز راسة واردف::- اية بوية

::- ها عمي

::- لا تدخلين بـ رؤيا بعد بوية هي امها وتعرف شي واحنا نعرف شي ثاني

سكتت اباوع لشروق منتصرة اردفت::- امنا بالله بس يا عمي مو تعوفها بدون اكل شنو من بشر خطية البنية

طفرت شروق وكالت::- هي ما ردات حتى الاكل رجع نفسة

رفعت الها حاجب واردفت::- اي طبعا غير ما متعودة تاكل كل يومين طبعا تستغرب الاكل

اصفر وجها وكلها كامت تباوع عليها رفعت عيونها تباوعلي بحقد وسكتت ولله يا شروق لو انا لو انتي باوعت باتجاه اثير لكيتة صافن

التفتت وين يباوع واشوفة يباوع لجهة المغاسل جوة الدرج البنية جاي تغسل وعيونة تعلكت بيها ما نزلها

اباوع يبلع بريك وعيونة مصبوبة صب اتجاها اخر شي دنك يهمس بينة وبين روحة كانو جاي يلوم روحة وهنا عرفت وكع اخر ولد بينا و الله يستر من هل وكعة .......يتبع

الفاتحة على روح المرحوم عبد ابن هدية 💔

اقرو الفاتحة واهدوها لـ روحة واكون ممنونة منجن 💔

حسابي الانستكرام الجديد 🩵