بســم ﷲ الرحمــن الرحيــم
السـلام عليڪم
#بيـن انيابهـم
#بقلمـي أنـا: زهــࢪاء
حساب الانستا: zaii1_8
لا تنسون التصويت +التعليق بين الفقرات
+احبڪم زهوراتـي 💋
🚫 ملاحظة // بنــات علقو بين الفقرات جداً مهـم تعليقاتڪم تهمني
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تــــــاج
تــــــاج.... هاك خلي هذا الرمز ما ادري شسمة المهم بس خلي اني ابحث.
هز راسة وخلاه بس بالبحث واني بس ادوس علامة البحث واشوف طفاه وانطاني اياه كمت صعدت بسرعة فوك غسلت واجيت اتمددت ورثت جڪارة ونمت على ضهري وشغلت الموبايل دست بحث و اول ما طلعلي الحساب شهڪت وطاح الموبايل على وجهي
لزمت انفي بألم وشلت الموبايل من الكاع بالايد الثانية رجعت باوعت للحساب بعدم تصديق واني مصدومة نفسة ابو الجوزلان الادبسز شلون يتجرأ ويدزلي ورد صايرلي روميو ومنتضرني اصيرلة جووليت
هزيت راسي بتوعد وڪلت هوَ الورط روحة خلي يتحمل دخلت على المراسلة وبديت اڪتب
تــــــاج...
صدك ما تستحي وما عندك ذرة اخلاق وخبصتني بأول مرة شفتك بيها اتأخرت عن صلاتي واخرتيني واثاري طلعت تمشي وترقم بنات اسمع لك هاي السوالف ما تمشي علي روح بيعها على غيري اني وحدة الدنيا ڪُلها طالعة من عيني والحد هسه بعدني محافظة على اخلاقي والفاضي وياك اذا شفتك اتماديت اڪثر جدك السابع عشر الملائڪة تترحملة من الكد المسبة الراح يحلصلها
كملتها ورجعت قريتها اكثر من مرة وشفت نفسي شكد جافصة غميت روحي وكعدت اعدل الكتابة بحيث الماتستحي مسويتها ماتشتحي والسابع مسويتة شايع عدلتها ورجعت قريتها اكثر من مرة الحد ما اتأكدت منها صح ودزيتها
طفيتة وكملت الجكارة جريت البطانية واجيت اتغطة سمعت صوت رسالة بسرعة اخذت الموبايل شغلتة وشفت مجاوبني من الاشعارات ضليت صافنة ومحتارة ارد عليه لو الصبح اخر شي كلت خلي ارد
دخلت على الرسائل شفتة ڪاتب
.... هههههههه يابة ساعة السودة الڪتلج بيها اصلي
كتبت
تــــــاج... دروح بابا روح نام البڪدك طكطكو انعالاتهم وماتو وانطو فرصة الغيرهم
كتبتها واتأكدت منها ودزيتها شافها بسرعة وكتب
.... راح اسامحج
جريت زيج وكتبت
تــــــاج... لو تدري شسويت!
... شسويتي؟
تــــــاج.... جريتلك زيج
دزيتها وطلعت من المحادثة وطفيتة كلت باجر اكول السوما يعلمني شلون احظر واحظرة غمضت عيوني ونمت
ثاني يوم رحت للصالون لڪيت رؤى بعدهي ما جاية نضفت المكان وكعدت مرت فترة ودخلت رؤى سلمت واجت ڪعدت
رؤى.... صباح الخير
تــــــاج... صباح النور
رؤى... ما عرفتي منو الدزلج الورد؟
تــــــاج... عرفت
رؤى... منو؟
تــــــاج... هيج محد
سڪتت وماحجت شوية وكامت على شغلها واني هم صار عندي شغل كمت سويتة انتبهت الحديثها وية مرت خالها
ام علي... امج تسأل عليج
جاوبتها بفرح
رؤى...شڪلتيلها؟
ام علي.... كتلها انخطبت
رؤى... بس؟... ما ڪالت منو؟
ام علي... كالت الله يوفقها
هزت راسها ورجعت حجت
رؤى..اصلاً عادي... اتشڪري منها على سؤالها زين وذڪرتني
حجتها بس بخنڪة رجعت تشتغل بهمة وعصبية بحيث تجر بشعر البنية وتخلي الماشات بقوة اني من يمي اتوجعت اتنهدت ودرت وجهي محد من عدنة مرتاح لا العندة اهل ولا الماعندة
كملت وجه البنية وعدلت حواجبها اباوع الها شلون فرحانة جانت خطوبتها اليوم ومبينة اول مرة تحف جنة مشغلين اغاني وهيَ كوة ڪاضة نفسها
وخرت عنها ورحت ڪعدت على صفها وخليت رجل على رجل طلعت موبايلي وفتحتة اتذڪرت ابو الجوزلان وابتسمت بأستهزاء صحت الرؤى وكتلها تخليلي رمز النت خلتة وكعدت يمي تخابر دخلت على المحادثة ما راد من امس غميتة ورحت الصفحتة ودخلت على المنشورات ضليت اڪلب بعدم اهتمام انتبهت الصورة كاعدة بمكتب ومكتوب حضرة المدير منشوراتة ڪُلها حلوة وبأماكن راقية حسيتة من هذول الطاكين الحد ما انتبهت الرؤى عيونها معلڪات بالموبايل شافتني انتبهتلها ابتسمت وحجت
رؤى.... يولي ذوقج بيرفڪت
تــــــاج.... ههههه انجبي مو الي ابالج
طكتني بڪتفي من شافتني ضحكت
رؤى.... ها ها علينة؟ هذا ابو الورد مو؟ ايي اكيد هوَ لأن الورد يشتري الوررررررد
هزيت ايدي وباوعتلها صفح
رؤى....باعي خلي نحجي جد مبين ابن اوادم وشاب مرتب وعندة فلوس وخير چلبي بي بأيديج واسنانج
عفت ڪُل الكلام ورڪزت على عندة فلوس عقدت حواجبي وطڪيتها بصفنة وياريتني ما صافنة ولا مفڪرة بس بوقتها عفت ڪُلشي وما صار ابالي غير شُـــــذير والفلوس
ضليت صافنة على ڪلامها الدرجة تيهت ڪُلشي وحتى شغل ما اشتغلت عدل من كد ما بالي اتشتت بالفڪرة الي براسـي يمڪن رؤى ما جان قصدها الي ابالي ونيتها صافية بس اني لا اني افڪاري جانت مو مناسبة ومو من نفس راضية جان الي بالي بس شُـــــذير والفلوس بأي طريقة اريد فلوس
كملنة دوامنة وطلعنة اني رؤى جانت تمشي وتحجي بس بالي مو وياها الحد ما انتبهت الها مو بصفي درت وجهي لكيتها واكفة وكتفة ايديها
تــــــاج.... ما تمشين؟
رؤى... صارلي ساعة احجي وانتِ عقلج طاير مدري وين
اتنهدت وحجيت
تــــــاج... اريدج تساعديني
نزلت ايديها ومشت بأتجاهي بسرعة حجت بحماس
رؤى.... احجي شنو بسرعة
تــــــاج... شوفي اني ما اعرف بس شلون هذا ما ادري
سڪتت ما اعرف ابدي الموضوع واني ماعندي فكرة عن هيج شغلات شافتني محتارة كالت
رؤى... تردين هذا الولد يتعلق بيج؟
حمحت وخليت شعري ورة اذني
تــــــاج.... اي
رؤى... سهله
تــــــاج.... باعي مو اني امس نزلت عليه رزالة دوسة ونص
فتحت عيونها بصدمة وحجت
رؤى... شنو حجيتي بلا صدميني؟
تــــــاج...جريتلة زيج
رؤى... لج انتِ بنية بعد منها وين اڪو بنية تجر زيج وتلبس هوديات مالت ولد لا تخبليني هسه اطلعين انتِ متحولة
خزرتها
تــــــاج... انجبي شنو متحولة شو ما تعرفين تحجين ترا اني اونثى رقيقة وماكو برقتي
رؤى... ها هيج الحجي متأكدة؟.... لعد اني ما الي علاقة انتِ دبري روحج
راحت وعافتني طلعت السجين من الجنطة وصحت
تــــــاج... اموتج اذا ما ساعديني
التفتت الي وشهكت ورجعت ليورة حجت بخوف
رؤى... تــــــاج شبيج تخبلتييي شنوو هااي السڪييين نزليهاااا والله مخبلللة نزليهاااا
نزلتها وضحكت
تــــــاج... شبيج ترا اتشاقة عفية ساعديني
ضلت صافنة ومستغربة حرڪاتي وتصرفاتي ضميت السجين بالجنطة واتقدمت يمها رجعت رؤى ليورة بخوف وضلت تتلفت خزرتها
تــــــاج... شبيج ترا اتشاقة وياج لا تشدينها
رؤى... شقة هذا وڪعتي ڪلبي والله
تــــــاج.... هههههه هسه شنو ڪلتي؟
رؤى... هذا هوَ عمري اساعدج بس انتِ هم اتعاوني وياي ولا تشعلين ڪلبي
هزيت راسي وسڪتت
رؤى... اذا الولد رايدج بالحلال لا تتردين قبلي ويا تــــــاج ترا الناس مو اغبياء وضعج مو مالت عندج عم وشقة وغيرها وضعج ولبسج وكلامج نصرفاتج ڪُلها دتڪول ان انتِ
سطتت ما كملت رفعتها حاجبي
تـــــاج... اني شنو!
رؤى.... مو بعقلج
سكتت ما حجيت درت وجهي وكملت طريقي وما درت بال الڪلامها شنو اسوي؟ الي عليّ داسوي وين اروح وين اكعد مثلاً؟ لا بالبصرة الي مكان ولا بغداد وين اروح ما ادري اني ضايعة اني زايدة بڪُل مكان ما الي حصة
رڪضت وراية رؤى وضلتلي وحجت
رؤى... تــــــاج خو ما زعلتي؟
جاوبتها بدون لا اباوع الها
تــــــاج.... جؤ
وصلنة للمطعم وڪلمن راح على شغلة شوية ومسحت ايدية وطلعت موبايلي من جيب الصدرية فتحتة وڪلت الرؤى تخليلي رمز الواي فاي ووخرت عنها دخلت على الانستغرام لڪيتة ناشر ستوري ابتسمت بأستهزاء ودخلت رفعت حاجبي بتفاجأ من شفت ناشر صورة بالمطعم هذا وڪاتب جواها شعر انتبهت للوقت قبل دقائق
طفرت بسرعة الرؤى
تــــــاج.... رررؤى تعاي ناشر ستوري بالمطعم
غمت كصتها وغمتني
رؤى... ودخلتي على الاستوووري مووو؟
تــــــاج.... اي لعد ليش
رؤى... مو هسسسه يڪول منتضرتني بس حتى انشر
صوفر وجهي ورجعت حجيت بعدم اهتمام
تــــــاج... يو مابية حيل افڪر تعاي ڪُليلي شنو ارد؟
اخذت مني الموبايل شافت الشعر الي ناشر رجعت انطتني اياه
رؤى.... اويلي على الذوق روحي دخلي على ڪوكل واختاري شعر ودزي لأن مبين يحب الاشعار
رحت كعدت على صفحة ردت اكتبت نفس ما كالت بعدين صفنت لحظة شنو هوَ غشيم الهاي الدرجة البارحة اغلط واحجي واليوم اكتبلة شعر لا ابد ما راهمة رجعت دخلت على الانستا وجاوبت على الاستوري
تــــــاج... يرادلك دورة مالت ذوق
دزيتها شافها بسرعة ودز
... السلام عليكم
طكيتها بضحكة عالية حتى رؤى انتبهت الي وخطيبها هزتلي راسها بمعنى شنو اشرتلها بعدين وكتبتلة
تــــــاج... وعليڪم السلام شيخنة نورت المطعم بنورك ما تصلي بينة صلاة جماعة
شافها وڪتب
.... صلاة وبوجود الشياطين؟
فتحت عيونها بصدمة وغميتة اجيت اڪتب وحجت رؤى
رؤى... اعتذري من عندة
انتبه حسنين الحديثنة حجة بأستغراب
حسنين... منو؟
جاوبتة رؤى بسرعة
رؤى.... ابن عمها صاير بنياتهم خلاف
هز راسة وراح الشغلة وهوَ خطية احسة اخوث لا يحل ولا يربط بس فقير ويحب رؤى ورؤى هم يمكن تحبة يوو هسه اني شلي علاقة باللعبان النفس مالتهم.... باوعت الرؤى
تــــــاج... ما اريد اعتذر
رؤى.... هوَ شنو الي ما تردين تعتذرين غير تبدين من جديد وياه
تــــــاج.... يو ما حجيت اني شي
رؤى... صفي نيتج وية الولد تــــــاج
هزيت راسي برضا بس داخلي غيرررر شي تماماااً عقلي يريد من عندة فلوس لا اكثر ما اريد غير شي دنكت على الموبايل لڪيتة داز
... شلونج؟
تــــــاج... عايشة
.... ادري بيج عايشة قابل ميتة
تــــــاج... هه ضحكتني شيخ طلعت تحشش
... انتِ بالمطعم؟
تــــــاج... اي
... طلعيلي
تــــــاج... ما اكدر
شافها وما رد اتنهدت وسديتة فرڪت وجهي واعرف الداسوي غلط بس اختي ما اعرف وينها ولا بيا كاع وما يهمني شي ثاني غيرها كمت نضفت المطبخ ومسحت الڪاع اجة ولد وحجة
..... منو ياخذ مكان علي طلع من وكت مريض
تــــــاج.... يا علي هذا شيشتغل؟
.... يلم الصحونة
صفنت اكيد هوَ بعدة هناك بسرعة باوعتلة وحجيت
تــــــاج.... اني اخذ مڪانة
.... يلا طلعي لعد
رحت غيرت الصدرية احنه زينة بنطرون اسود وقميص اسود والصدرية مارونية عدلت شعري واخذت العربانة الي يخلون بيها الصحون وطلعت ادفع بالعربانة اول ما اجت عيني عليه ضحڪت بخبث ورحت لطاولة جانوا كاعدين بيها شباب اثنين دا يتناقشون عبالي مخلصين اڪل اجيت اشيلهن ضحك الولد وحجة
.... لا دا ناڪُل يمعودة
ضحكت
تــــــاج.... ههه اسفة عبالي مخلصين
حجيتها وصارت عيني على ابو الجوزلان حرك فكة بأنزعاج وسند ظهرة على الكرسي وعينها ما شالها عني رجعت نضري للزبون وابتسمتلة
... شنو جديدة هنا؟.... ڪُل مرة اكو ولد يشتغل يمكن اسمة....
سكت يفكر
تــــــاج.... اسمة علي ما موجود اني اخذت مڪانة
.... هههههه اذا هيج اخذي مكانة دوم
اجيت احجي ما احس الة ابو الجوزلان يمشي بأتجاهنة وبأيدة استڪان چاي اتعمد وسوة نفسة عثر بالعربانة وشمر الچاي على الولد الجنت احجي ويا رجعت ليورة والولد رجلة احتركت كام وصاح
...... شبيييك ما تشووف
جاوبة ابو الجوزلان
..... as you like....
المفروض ما تعصب لأن سويتلك فضل وراح اتروح تسبح لأن كاتلك الوصخ
حجاها وباوعلي وخزرني ما اهتميت باوعت للولد وحجيت بأستفزاز على عناد ابو الجوزلان
تــــــاج..... اعتذر بالنيابة عنة اذا تحب تغسل الحمامات على ايدك اليمنى
حجيتها وكملت شغلي ورجعت للبتاوين اول ما صار عندي واي فاي ضلت الاشعارات تتراكع عليّ طكيتها بضحڪة عالية وبحماس رحت بدلت ورجعت اتمددت على بطني ورفعت رجليّ وفتحت موبايلي شفتة داز
.... شدعوة هالكد ضحكتج عالية وطكيتي ميانة وياه؟
... ماكو غير هذا الشغل؟
... المن ضحكتي وياه؟
... اشو يمي ما تتحاجين لو هذا هم حضي؟
.... ليش ضحكتي وياه؟
طكيتها بضحكة عالية وحجيت
تــــــاج.... اشو هذا واكع بدون لا اتعب روحي
دزيتلة
تــــــاج.... ومنو انتَ وتحاسبني؟
قريتها واتأكدت منها اني اعرف اكتب بالكيبورت بس اجفص هواي ولازم ارحع اقراها اكثر من مرة ما كتابة القلم والورقة ما اعرف اكتب اي شي ولا اكدر اجمع الاحرف وما اعرف بس اسمي انتبهت شافها وما دز
تــــــاج.... الحد هسه ما حاظرتك بمزاجي
دز
..... ذوقج وصخين؟
ضحكت وكتبت
تــــــاج... لا بس ما احب المعقدين
دزيتها ونمت ثاني يوم جان نهاية الدوام وما ضل شي ونطلع كملت شغلي وبدلت ملابسي خليت الجنطة صفح وطلعت من المطعم اول ما طلعت صار ابو الجوزلان ڪبالي صاف سيارتة ومنتجي عليها ومڪتف ايديه اول ما شافني عدل وڪفتة و ابتسم رفعتلة حاجبي البارحة يرزل لأن ضحكت وية الولد وهسه يضحك مشة بأتجاهي وصل يمي حمحم وحجة
.... الله يساعدج يابة
خليت شعري ورة اذني
تــــــاج... ويساعدك
.... نتمشى شوية نسولف؟
باوعت يمنى ويسرى ورجعت نضري عليه هزيت راسي بأي
تــــــاج... بس بسرعة خاف اتأخر
هز راسة وابتسم ومشة مشيت وياه ومابينة اي حوار ڪسر الصمت بسؤالة
.... شنو اسمج؟
تــــــاج..... تــــــاج
باوعاي وزادت ابتسامتة وهز راسة بأعجاب
.... حلو اسمج
تــــــاج... ادري
.... هههههه حلوة الثقة
تــــــاج... هم ادري
ضحك وسڪت
تــــــاج...وانتَ؟
.... شبية اني؟
تــــــاج... اسمك؟
... بعبع
ضحكت وهوَ هم ضحك مسح وجهة ومبين متوتر ما اعرف حجلان مادري شبي
.... اسمي هُـــــــــذام
صفنت بحيرة ما اعرف ارد هزيت راسي واتراجعت ليورة وحجيت بسرعة
تــــــاج... باي اتأخر الوقت
حجيتها ودرت وجهي ومشيت بسرعة واسمعها صاح
.... تعاي وين شردتي اني اوصلج
التفتت الة وصحت
تــــــاج..... خاف تتأخر عن الصلاة
ضحك بصوت عالي واني درت وجهي وابتعدت عنة واجرت تڪسي ورجعت للبيت
نزلت قبل مسافة لأن ما الي خلك حجي وعرڪة سديت باب التڪسي وراح طلعت السجين ومشيت بأتجاه المنطقة واني اتلفت اجذب اذا اكول ما اخاف على يا ساعة واحد يتعرضلي وهنا لو يشوفون الواحد مددينة ويڪتلون بي ما الهم علاقة
دخلت بالفرع جان اكو سيارات متجمعة كدام بيت وكدامها شباب يسولفون ويضحكون اتجاهلتهم واجيت اعبرهم واروح للبيت
صاح واحد
.... ياحلو تعال ادخل
اتجاهلتة ومشيت ما احس الة واحد ڪاضني من زندي ودارني عليه فتحت عيوني بصدمة ودفعتة عني رفعت السجين بأيدي الترجف وصحت
تــــــاج...... اكسرررر ايدددك اذا مديتها لكككك
اتفاجئ من حرڪتي وشلون ادفعة هجم عليّ ويريد يلزمني ما خليتة وضليت اتلاوة وياه واليمة يضحڪون لزمني من خصري وثبت ايدية بقوة وقرب وجهة يريد يبوسني ويحجي بحقارة
..... هههههه ها وين التڪسر ايدي
تفلت بوجهة وسحڪت على رجلة برجلي رفغت نضري لأيدي ڪاضة بيها السجين ورافعها فوك رفعت رجلي ورفستة بمنطقتة وشخطت وجهة بالسجين بحركة سريعة وشردت دخلت للبيت واسمع خطواتهم يركضون وراية وهوَ يصيح
.... لزمووووهااا هال*****
صعدت فوك بسرعة ودخلت للغرفة واني اتنفس بسرعة وايدي على ڪلبي شمرت السجين بالڪاع وانتبهت الها ڪُلها دم ضليت حابسة نفسي وشهڪتي ڪعدت بالكاع ولميت رجلية الصدري وبجيت تصعب عليّ هاي المواقف واني ادافع عن اغلى ما املك... شرفي... تعبت واني عايشة بهيج مناطق مابيها امان صغارهم وكبارهم عدهم هالشغلات عادات يومية
اني صح عشت وياهم بس ما يوم صرت مثلهم اتجبرت اعيش هنا بين هاي البيئة
الموقف هذا دمرني ودمر نفسيتي انفجرت بالبجي وخلين راسي على رجلية وصرت اشهك بصوت عالي
اتمنى احس بالامان بالنضافة انام واني مأمنة ومرتاحة انام واني شبعانة ودافية محافضة على ڪُلشي بية ما اسمع الفاض من اخس البشر والخلق
حسيت ڪُلشي صعب ڪُل ما اكول فرجت ارجع ادخل بداومة ما اطلع منها
مرت فترة واندك الباب فزيت بخوف وحبست شهكتي خليت شعىي ورة اذني سديت حلڪي بأيدي خاف همَ خاف انغام تنطيني الهم سمعت صوت سوما
سوما.... عيني تــــــاج انغام تريدج
بلعت ريڪي ووخرت ايدية وحجيت بتلڪأ
تــــــاج... ش شتريد
سوما... ما اعرف عيني يلا تعالي عندي شغل
تــــــاج... م ما اريد روح كللها نايمة
سوما.... ما اجذب اني عيني
صحت بصوت عالي
تــــــاج... وعمممممة بعينك
كمت مسحت ادموعي وفتحت الباب لڪيتة واكف كبالي ولابس باروڪة ويعدل بشعرة باوعتلة بقرف وحجيت
تــــــاج.... وينها؟
سوما.... جوة
تــــــاج.... منو يمها؟
سوما.... محد
هزيت راسي وعبرتة ونزلت واني افرك ايدية بتوتر نزلت للحديقة لڪيتها كاعدة على ڪرسي وتشرب نرڪيلة وصلت يمها ووڪفت كبالها زفرت دخان وحجت
انغام....شوڪت اجيتي
تــــــاج.... شلج علاقة؟
كامت من مكانها وطبطبت على ڪتفي
انغام.... لا تطاولين على اسيادج
حرڪت كتفي بأنزعاج وخرت عني ونڪثت كتفي بقرف
تــــــاج.... كاعدة هنانه بفلوسي ما مانة علي بشي
انغام... تعرفين وية منو اندڪيتي قبل شوية؟
تــــــاج.... طززز ميهمني
انغام.... الي ما يهمج ضل يمشي ويصيح هال**** خليتها براسي اني هنا اشتغل ورزقي هذا ما مجبورة اتحملج اي شي يسوي الج اني ما مسؤولة فاهمة ماطول كاعدة هنا تتحملين الحجي والتحرش شراح ينقص منج قابل ايد رجل
تــــــاج.... راح ينقص شرف ولو اني مشترجية من وحدة رئيسة بيت **** عدها **** ماڪو اسهل من عندة على العموم اني بس هاي الفترة هنا خلي ادبر مكان واطلع ما مجبورة اتحمل هالكم الهائل من الزبايل
انسحبت من يمها واني اسمع تهديدها وصياحها اتجاهلتها ورجعت صعدت فوك سديت الباب بقوة وقفلتة ڪعدت بالڪاع وابالي الف فڪرة ما الها حل رفعت شعري ليفوك وانتبهت الموبايلي يدك سحبت الجنطة وفتحتها طلعتة وشفت ابو الجوزلان يتصل على الانستا عضيت على شفتي بتفڪير ارد او لا؟
غمضت عيوني وڪلت ماكو غير حل جاوبتها وخليت الموبايل على اذني
هُـــــــــذام..... مساء الخير
ڪلبت عيوني بملل وجاوبتة
تــــــاج.... مساء النور
هُـــــــــذام.... وصلتي لا
تــــــاج... وصلت
هُـــــــــذام..... ها اي واني هم وصلت
تــــــاج.... وشسويلك
هُـــــــــذام..... ها؟
تــــــاج.... اي
ضحك وحجة
هُـــــــــذام.... تدرين شنو من شفتج ڪبل شوية ولا ڪأن انتِ ام اللسان الي بالمحادثة تحجي جريدة
تــــــاج.... يڪلك ابو المثل من السڪوتي موت
هُـــــــــذام.... اي صح
سڪتت واتمددت على بطني واخذت خصلة من شعري وضليت افر بيها
هُـــــــــذام.... متعشية؟
تــــــاج..... شلك علاقة
هُـــــــــذام.... شڪد جحشـة هوَ سؤال
تــــــاج.... يعني اذا ڪلت ممتعشية راح تجيبلي عشة؟
هُـــــــــذام.... اي ليش لا
ابتسمت بطرف شفتي وحجيت
تــــــاج.... دادا افڪارك متعبر عليّ اتريد تعرف عنوان بيتي مـوو؟
سمعتة طڪها بضحكة عالية طويلة بعدت الموبايل من اذني وغميتة حسيتة هدأ رجعتة الاذني
هُـــــــــذام.... نچـــرة عمي نچرة
اتنهدت وما حجيت فجأة شغلو اغاني بصوت عالي والصوت يوصل للطابق الثاني عضيت شفتي واجيت احجي سبقني وڪال
هُـــــــــذام.... شنو هاي الاصوات؟
تــــــاج..... يا خية مڪتلك اسمعني هذا ابن جيرانة سودة عليّ يحبلة وحدة 7 سنوات واهلها ميقبلون ينطونها وين وذاك اليوم وقبلو والولد خطية باجر عرسة واليوم حنتة والهسه يرڪص
هُـــــــــذام..... هههههههههه بيها الخير ان شاء الله بس جيرانكم وين بيتهم؟
تــــــاج... بصف بينتنة
هُـــــــــذام.. زين بيتڪم وين؟
تــــــاج.... اني اڪدر اكلك بس اخليها حسررررة بڪلبك
هُـــــــــذام.....لا جديات تــــــاج وين بيتڪم
تــــــاج....بالشارع الما بي طسة
هُـــــــــذام.... لعد اذا هيج الحجي بيتڪم مطل على البحر المتوسط لأن شوارع العراق اللهم لا حسد ڪلها صافية
تــــــاج... اي حتى اني مستغربة اصلاً اني جنت بترڪيا الشوارع تخبلللل وڪُلها شجر هنانه زارعين ڪابرس ابو البك ومتعجبين
هُـــــــــذام.... جنتي بترڪيا
برمت خصلت شعري وضميت ضحڪتي وحجيت
تــــــاج.... اي
هُـــــــــذام.... وهسه انتِ وين؟
تــــــاج.... بالڪبور مچودرة وكاعدة
حجيتها وطڪيتها بضحكة ضحك هوَ هم وضلينة ساڪتين فترة كسر الصمت بينة بسؤالة السخيف
هُـــــــــذام.... تحبين الدجاج مرك لو شوي؟
تــــــاج... شوي
هُـــــــــذام.... شوي وعليه سماك مو
تــــــاج... ووياه خبز بيت لو تمن اصفر
هُـــــــــذام.... لا تمن اصفر وابيض احلا
تــــــاج.... وبطل لبن
هُـــــــــذام.... بطل سفن يصرف احسن
تــــــاج.... ههههههه ووياه حمص بطحينة
هُـــــــــذام.... اعزمج؟
سڪتت افكر اقبل لو لا هسه اذا اقبل راح يڪول ما صدڪت اعزمها وقبلت واذا ارفض راح اخسر فرصة اتقرب منة اڪثر
هُـــــــــذام.... وينج؟
تــــاج ..... هياتني
هُـــــــــذام..... شڪلتي اي لو لا؟ نطلع وهم ناخذها فرصة نتعرف اكثر
تــــــاج... ما اڪدر
هُـــــــــذام.... ليش؟
تــــــاج.... خلينة هيج افضل اجل العزايم هسه
هُـــــــــذام.... براحتج
ما جاوبتة وبديت اقفل وهوَ بعدة يحجي ضليت اغمض وافتح عين سمعتة حجة بصوت عالي
هُـــــــــذام.... تــــــاج نمتي؟
ما جاوبتة سديت الاتصال وبعدها غفيت ومادريت بأي شي ڪعدت الصبح متأخرة بسرعة بدلت وطلعت رحت للصالون واستلمتني ام علي دك رزايل بحيث اني النعسة بعدهي بعيني وهيَ تحجي واني بس اهز براسي
كملت الرزالتها واني رحت انضف شوية واحت رؤى تفتر وراية وتحجي
رؤى.... بشري ما صار تغييرر منا منا
تــــــاج... صار صار
فتحت عيونها بصدمة
رؤى... شنوو عليج الله احجيي
تــــــاج... حجينة اتصال
رؤى... ايي وبعد؟
تــــــاج... عزمني
رؤى... اي كملي بطيتي ڪلبي قبلتي موو؟
تــــــاج.... جؤ
صفكت ايد بأيد وصاحت
رؤى.... لااااا
تــــــاج.... وسم شببيجج
رؤى... اليسمج ليش ما قبلتي
تــــــاج.... ما اكدر اسيطر على تصرفاتي اذا طلعنة بالمختصر ابقى اجفص
رؤى.... ضروري اطلعون سوة
تــــــاج.... اني ما اريد
رؤى.... مو بڪيفج غير يصير وياكم حوار فيس وفيس
تــــــاج... شنو يعني؟
رؤى... وجهاً لوجه
تــــــاج... هيج برأيج؟
رؤى.... اي
تــــــاج.... تمام بس مو هاي المرة خليها على غير مرة
رؤى.... ماشي بس اذا طلعتو انطيني خبر وخلي اني البسج على ذوقي والله الة اخليه ياخذج كبل للسيد
عقدت حواجبي وحجيت بأستغرام من كلامها
تــــــاج... سيد يا سيد!
رؤى... شبيج السيد اليعقد
تــــــاج.... وليش نعقد!
رؤى..... شبيييج غير تتزوجون لعد شتردين انتِ شنو غايتج!
صفنت على ڪلامها رؤؤؤؤى كلامها وين وانيييي وين اني اريد اخذ من عندة فلوس لا اڪثر مايهمني عقد ما عقد ولا ابالي اصلاً
رؤى.... هممممم صفنت
باوعت الها وحجيت
تــــــاج.... امشي خلي نڪمل الشغل
راحت تڪمل شغلها واني ام علي انطتني وحدة اسوي شعرها بالسنارة حتى تميشة ضليت اشتغل وهاي ڪُل ساعة وصايحة اخ وام علي تجاوبها
ام علي.... ولخلاخ لعد العرس بس تميشن وتصبغن اليريد الحلو يصبر عالمر
وهذيج ما تسڪت وتجاوبها ويوو سوالف الصالونات لعبان نفس اني شجابني هنانه هسه لو ما حاجتي للفلوس فلا اجي انتبهت الصوت رنة موبايل التفتت على الڪرسي موبايل رؤى رجعت باوعت الها وصحت
تــــــاج.... رؤى موبايلج يدك
عافت الي بأيدها وراحت جاوبت انخطف لونها وصاحت
رؤى.... جاااية جاية
سدت التلفون واترخبط وضعها ضلت بس تتلفت ماةاععرف على شنو ادور
ام علي.... شبيج ولج
رؤى.... ابوية تخربط
حجتها واخذت جنطتها بسرعة ورڪضت برة رجعت نضري الام علي لڪيتها تباوعلي
ام علي..... روحي وياها عفية اني لو ما الشغل جان رحت
هزيت راسي واخذت جنطتي ورڪضت وراها لڪيتها تمشي سريع بالشارع ماكدرت الحكها وكقت وصحت
تــــــاج.... رؤى اووووڪفي انتضريني
وڪفت والتفتت الي مشيت الها بهمة الحد ما وصلت الها لگيتها عيونها حمر وكوة كاضة ادموعها لميت شفتي للداخل واجيت احجي قاطعتني
رؤى..... ليش اجيتي؟
تــــــاج.... ما اعوفج وحدج امشي
باوعتلي بأمتنان ومشينة سوة الراس الشارع اجرت تڪسي وصعدنة انطتة عنوان اعتقد عنوان بيتهم حرڪت السيارة وهيَ ماڪدرت تلزم ادموعها شهڪت وطلعت موبايلها فتحتة ومبينة اترد تتصل على احد. بس ماتكدر من رجفت ايدها انطتني الموبايل وحجت برجفة
رؤى... اتصليلي بحسنين
اخذتة من عدها ودورت عليه لڪيت رقم ڪاتبة عليه حياتي الثانية اتصلت عليه بسرعة رد وانطيتة الها اخذتة وحجت بشهڪة
رؤى.... حسنين
انهدت بالبجي وهذاك بس يصيح يريد يعرف شبيها
رؤى.... عفية روح شوف بابا اذا قريب من بيتنة اني ڪُلش بعيدة وما يمة بس جيرانة
سمعتة جاوبها
حسنين... اني قريب على بيتكم هسه اروح بسرعة مسحي ادموعج مابي شي بشنو مفاولة على الرجال
رؤى.... حسنين اذا صار بي شي والله اموت
ما اعرف شنو جاوبها لأن بسرعة سدت السبيڪر وباوعتلي تتأكد اذا سمعت لو لا
تــــــاج.... ما سمعت شي
سڪتت وضمت الموبايل بجنطتها ومسحت ادموعها وصلنة بعد تقريباً اڪثر من نص ساعة وڪفنة كدام بيت قديم شوية حالة حال البيوت العراقية دفعت الڪروة ونزلنة اجت ادك الباب وطلع مفتوح دخلت ترڪض واني دخلت وراها وعبالك ذبانة وذابيلها دوة ما اعرف منين اروح وهاي رؤى من التوتر نست منين تدخل
دفعت الباب ودخلت دخلت وراها يمڪن للهول لڪت ابوها متمدد على القنفة والمغذي بأيدة وكوة بجر نفس ويمة حسنين رڪضت الة وڪعدت بالكاع وكضت ايدة حضنتها الصدرها وتبجي بصوت عالي دمعن عيوني وضليت ادورهن بأتجاهات عشوائية حتى لا ينزلن ادموعي لميت شفتي للداخل واتنهدت رفعت راسها الحسنين وحجت بصوت مبحوح من البجي.
رؤى... ليش ما يرد ويجاوبني؟
حسنين.... الدكتور ڪال مو زين عليه الحجي الزايد
رؤى.... يعني اخذتة للمستشفى؟
حسنين.... لڪيت ابو مهدي ماخذة ورحت وراهم قبل شوية اجينة
رؤى.... شنو ڪال الدكتور؟
مسح وجهة واشر الها تڪوم كامت وراحو على صفحة يحجون
ضليت واڪفة بمكاني استحي اكعد واستحي اضل هنا وهاي رؤى العوبة نستني بس خطية هسه هيَ بيا حال تتذڪرني
رفعت نضري للبيت وضليت اباوع بعيوني وكوة مثبتة روحي حتى ما ياخذني الواهس وافتر واستڪشف شوية واجت رؤى ووراها حسنين شافتني بعدني واڪفة مشت بأتجاهي وحجت بفشلة
رؤى.... والله نسيتج عذريني
تــــــاج... لا شسالفة
رؤى... اتفضلي حبيبتي ڪعدي
كعدت على التخم وهيَ راحت للمطبخ كعد حسنين يم ابو رؤى واخذ ايدة يعدل الكانونة ويدلڪها
حسنين....زاحمناج خوية خاف عطلناج عن شغلج
تــــــاج.. لا ما عندي شي
ضليت اهز رجلي بتوتر احس عيب كاعدة بس غير تجي رؤى حتى استرخص منها واروح... ما اعرف منين نزلت عليّ الرسميات وهالسوالف كضيت عمري ڪُلة ادخل بالناس مستقيم واطلع بيهم عوج
شوية واجت شايلة صينية كمت بسرعة وحجيت
تــــــاج...اني اترخص اخذو راحتڪم
رؤى... يا وين تعاي اتغدي ويانة
تــــــاج....خليها على غير مرة اخاف اتأخر على المطعم
رؤى.... تعاي يمعودة متأخرة متأخرة
رفضت اكعد عافتني براحتي واتشڪرتني وحجت
رؤى.... براحتج حبيبتي بس اني اليوم ما اجي اضل يم ابوي
هزيت راسي وطلعت من البيت ورحت للشغل مشي لأن بيتهم قريب على المطعم دخلت لڪيت عمال الشفت النهاري بعدهم
ڪعدت ارتاحيت على ما راحو وبدو عمال الشفت المسائي يجون كمت بدلت ملابسي واجة ابو المطعم اخذ حضورنة وڪتلة على رؤى وحسنين وطلعو منطينة خبر... مر الوقت عادي للتسعة بالليل سمعت رنة موبايل نشفت ايدية وطلعتة من جيب الصدرية شفتة يتصل نفخت بضجر وجاوبت بأبتسامة ڪاذبة
تــــــاج.... هلاو
هُـــــــــذام..... اهلاً وسهلاً
تــــــاج..... هلا بيك.... شلونك
هُـــــــــذام...... هههههههه لا مطورين وصايرين نسلم ونسأل على الاحوال
تــــــاج.... اهووو مو صوجك
هُـــــــــذام.... لا يابة لا سئلي من حقج
تــــــاج.... مرة ثانية لا ترفس نعمتك
هُــــــــــــــذام.... يا حجاية رجعي المڪانج
ضحڪت وما جاوبتة
هُـــــــــذام.... موجودة بالمطعم؟
تــــــاج.... اي
هُـــــــــذام.... اريد اشوفج
ابتسمت بطرف شفتي واخذت خصلة من شعري وبرمتها جاوبتة بدلع
تــــــاج.... و ليش؟
هُـــــــــذام.... اختم يومي بشوفتج
تــــــاج.... شمعنة اني؟
هُـــــــــذام... ما اعرف
حبيت اشلع ڪلبة حجيت بتلعُب
تــــــاج..... ما اڪدر
هُـــــــــذام.... حاولي
تــــــاج... ما اڪدر اتأخر
هُـــــــــذام.... اني اوصلج
اتنهدت وسڪتت
هُـــــــــذام.... شڪلتي نسنس؟
ضحڪت
تــــــاج.... هههه هذا هوَ بس من يخلص دوامي
هُـــــــــذام.... انتضرج بالمطعم
تــــــاج.... تمام باي
هُـــــــــذام.... مع السلامة
سديتة واختفت ابتسامتي ضميت موبايلي ورجعت على شغلي للساعة بـ11 ونص بدلت ملابسي وعدلت شعري وطلعت على القسم الجوة مشيت واني عيني ليڪدام اجت عيني بعينة جان وحدة ڪاعد بطاولة قريبة من الباب ابتسم واني عديتة وطلعت من المطعم طلع وراية واجة يمشي بصفي وكفت ودرت الة وابتسمت و بادلني الابتسامة
هُـــــــــذام..... اتأخرتي
تــــــاج.... مو بأيدي
هُـــــــــذام.... نمشي ونحجي لو انروح المكان نكعد ونسولف براحتنة؟
تــــــاج..... لا اتأخر الوقت نمشي ونحجي افضل
هُـــــــــذام.... نسنس انتِ نسنس
ابتسمت بخفة وما حجيت
هُـــــــــذام.... شكد عمرج؟
سكتت افكر اجذب عليه بعمري لو لا اتنهدت بحيرة هسه اني مجذبة عليه بڪُلشي ضات على العمر
تــــــاج..... 20
حجة بتفاجأ
هُـــــــــذام.... عشرين سنة! مبينة اصغر
خليت شعري ورة اذني وحمحمت
تــــــاج... بعد
صفن على حرڪتي ونزل نضرة الشعري دار وجه للحهة الثانية واستغفر ورجع باوعلي وابتسم بس ارتباڪة واضح
مشينة شوية وصادفنة ولد يبيع ورد ابتسم واشترة من عندة وردة حمرة وكف كبالي وقدملي اياها اخذتها منة ولا ارادي ايدينة اتلامس سحب ايدة بسرعة واني ضغطت على غصن الوردة بأيدي
تــــــاج.... مبين تحب الورد
هُـــــــــذام..... احب الورد وشبيـــه الورد
اتقربت يمه اكثر وحجيت واني عيني بعينة
تــــــاج.... مو دائماً الورد حلو وملمسة ناعم مرات هالوردة اتأذيك بشوڪها وممڪن هالجرح يبقة بداخلك ما يروح
ابتسم وحاوبني بنفس ثقتي
هُـــــــــذام.... وما طول اني احب الورد اتحمل ڪلشي منة
ضايت اباوع بعيونة وابتسم قطع الصمت بيناتنة بضحڪتة
هُـــــــــذام.... ههههههه هاي شبيج
ضحكت وجاوبتة بأغنية
تــــــاج... اطلعي برة احاجيج بلڪي
هُـــــــــذام.... جؤ محرم
تــــــاج... اوووه اعتذر شيخنة
رفعلي حاجبة واني سويت نفسة انسحبت من يمة ورفعة ايدة سويتلة بأصابعي حرڪة باي ورجعت للبيت
•••••••••••••••••••••••••••
شـــــــذࢪة
رضا... ولج بيبي اخذيني عسمة ببطل اخذيييني
التفتت الي وحجت
زهـره... خايبة شذرة ابقي هنا واڪفة ولا تتحرڪين من بمطانج خلي اودي هذا مكصوف الرڪبة لا النوب يفضحنة بين الوادم
هزيت راسي وهيَ اخذتة وتأكد ما اتحرك من مكاني
راحت واني بقيت واڪفة واباوع للناس بخوف ازدحام ڪُلش هوايه وشي تڪلي تعاي منا وشي منا ما يخلوني واڪفة بمڪاني اخر شي اجة واحد لابس اسود اشرلي بأتجاه وحجة
..... عمو وخري عن الطريق ممنوع الوقوف هنا
وخرت عن المكان وابتعدت وڪفت على صفحة واني اباوع بعيوني المدمعة بخوف ما اعرف وين اني والازدحام ڪُلش قوي جريت ازار الصلاة وغطيت شعري مثل ما وصتني آرام
خفت من الناس وما اعرف اني وين اخذت الطريق ومشيت اريد ارجع المڪاني القديم بس ضيعتة شهڪة وضليت اتلفت براسي بخوف والناس ما تخليني اوڪف ڪُلها اتصيح امشي وامشي
ضليت ابجي وامسح بدموعي ورجلية ياخذني الدروب ما اندلهن
ابتعدت بشڪل عن المڪان والدموع يتنازلن من عيني
وكفت بنص الطريق وضليت الف براسي وادور احاول ارجع النفس المڪان معقولة همَ ضيعوني متعمدين؟
لا لا مايصير افڪر هيج حرام اتوقع بيهم سوء مشيت كم خطوة واني اتعثر بالمحرم وڪُل ساعة شايلتة وطايح من ايدي وصلت يم محلات ومواڪب والازدحام خف شوية بس مو هوايه صفنت بحيرة هسه اسأل منو اخاف منهم ڪُلهم جاي امشي وارح اسأل مرة ما احس الة انجريت من معصم ايدي درت اريد اصرخ وشفتة خالو زڪريا عقد حواجبة وصاح
زڪريا.... وييين رحتتي
سحبت ايدي من عندة ومسحت ادموعي وحجيت بشهڪة
شُـــــذير.... خالو تيهت المڪان
زڪريا... طلعتي وحدج؟ وين الحجية شلون تعوفج وحدج
شُـــــذير.... لا لا طلعت ويايه بس هذا رضا راد يروح للحمام وعافتني وراحت
زڪريا... من انعل والدين رضا من عافتج الحجية ليش ما بقيتي بمكانج اخذج الواهس وانطلقتي؟
شُـــــذير.... هذول الرياجيل يڪلولي وخري طريق منا لا توڪفين واني ضليت امشي بعدين ضيعت الطريق
زڪريا... يلا بابا امشي ما صار شي
شُـــــذير.... خالو وين تردون تاخذوني؟
زڪريا.... المرڪز المفقدوين انصيح بأسمج ولو متأڪد اهلج مو هنا
حجاها ورڪز على ردة فعلي ارتبڪت بس ما جاوبتة لأن اعرف نفسي اجفص
اشرلي براسة
زڪريا.... امشي
حجاها ومد ايدة الردن مالت المحرم جراه وڪضاني من عندة بدون لا يلمس ايدي ومشينة خلة موبايلة على اذنة شوية وحجة
زڪريا.... ها آرام لڪيتها... اي تاهت الحجية وينها؟
سداه وضمة باوعلي
زڪريا.... وبين بيتڪم؟
شُـــــذير... بالبصرة
زڪريا.... لهجتج مو بصراوية
صفنت بتفڪير شنو اجاوبة صح لهجتمي مو بصراوية حتى ببعض الاحرف جاوبتة بتلعثم
شُـــــذير.... مو خالو اني احجي نفس اختي
حجة بشك وهوَ يرفع حاجبة
زڪريا... واختج منين؟
دنڪت راسي وما جاوبتة ضليت بس اخطف نضرات الة ما رد ولا انطة اي ردة فعل ضل ساڪت وجارني من ردن المحرم ويمشي سريع واني اتعثر وصلنة المڪان مثل الڪرفان دخلنة الة وبدة خالو زڪريا يحجي وياهم وفهمهم ان اني ضايعة بس ما ذڪر كدام الموكب ما اعرف ليش التفت الي وحجة
زڪريا.... شُـــــذير شنو؟
فهمت قصدة على اسم ابوي فرڪت اصابعي وحجيت
شُـــــذير.... قاسم سفيان
هز راسة ورجع دار انطاهم الاسم صاحو بأسمي اڪثر من مرة ماڪو احد ولا اي رد دنڪت راسي ولا ارادي بدن ادموعي ينزلن حجة ابو الاستعلامات
....هذا هوَ عوفها هنا وروح
رفعت نضري الخالو زڪريا بسرعة لڪيتة يباوعلي بحيرة ولام شفتة للداخل قوست شفايفي بحزن وڪلت هذا هوَ راح يعوفوني واني اضل هنانه ما اعرف وين اروح ولا وين اجي نزلن ادموعي ورفعت ايدي ومسحتهن وينج يا تــــــاج جانت متقبل دمعة وحدة تنزل من عيني وبس تشوقني ابجي تجي تبوسهن وجملتها الشهيرة
"هالعيون اذا ما بجن من الفرح ما يبجن على غير شي"
اتنهد وحجة
زڪريا..... لا اخذها وياي واذا اڪو اي خبر او احد سأل اتصل على رقمي
.... بصفتك شنو تاخذها اخي ميصير
ما جاوبة كتبلة رقمة بورقة وانطاها الة رفض ابو الاستعلامات اطلع وما قبل زادت المشڪلة وصوت خالو زڪريا ارتفع اخر شي رفع موبايلة واتصل على احد ما عرفتة منو بس بسرعة رد ومبين يعرف السالفة لأن هالو بدون لا يحجي ولا گلمة انطا المويايل لأبو الاستعلامات
اتغير وضعة بسرعة وحجة
..... اي اي اهلاً استاذنة شلون ما اعرفك ابو أيســر
بسرعة طخت ابالي خالو زڪريا اتصل على خالو الشيخ رجعت نضري الة
.... لا هذا هوَ يمڪم واعتذر انا خاف اطاولت بس الحذر واجب....... لا لا هذا هوَ يمڪم أمن وانا اي خبر او اتصاا يجيني ابلغڪم.... الله وياك شيخ.
سداه من عندة وانطاه الخالو وحجة بلوم
..... غير اتڪلي ابن ابو أيســر
ابتسم خالو بطرف شفتة وحجة
زڪريا.... وانتم الة واسطات
.... امانة هاي قابل انطيها لأي واحد
زڪريا.... لا يابة شغلڪم هذا ما سويت الة الحق
سلم عليه ووصاه يتصل على رقمة والتفتت الي اشراي اڪوم سحبت نفس بقهر وحسرة مستحيل اقبل اروح وياهم بس وين اضل هنا الحيرة كمت من مكاني انتبه الي ابجي اتنهد وهمس
زڪريا.... ليش تبجين عمو؟
رفعتلة نضري وحجيت بشهڪة
شُـــــذير..... اريد اختي
زڪريا.... انه الڪاها الج بس خلي نرجع
هزيت راسي بنفي وحجيت
شُـــــذير... خالو صعب تلڪاها
باوع يمنى ويسرى لڪة هذا الولد عينة علينة اشر الي نطلع.... طلعت قبلة وهوَ وراية مشينة بين الازدحام وهوَ ڪاضني من طرف المحرم رحنة المكان فارغ تقريباً بس ڪُلش بعيد ڪعدني على الرصيف وراح اتنهدت رفعت نضري للسماء وحجيت بداخلي
شُـــــذير.... اول مرة رجلي تدوس هايه الڪاع ربي لا تردلي طلب بجاه ابا عبد الله اريد ارجع الاختي ما اريد ابتهذل بين البيوت
دنڪت راسي وانفجرت بالبجي بالرغم ما اعرف ادعي ولا اعرف اڪول كلمتين على بعضهن بس ما اعرف شلون طلعن مني لا ارادي زاد بجيي لطمية... اخاف من اعوفك... الجانو مشغلينها حسيتها تنطبق علينة اني و تــــــاج..... مسحت ادموعي ورفعت راسي من حسيت بأحد يكعد يمي التفتت الة لڪيتة خالو زڪريا بأيدة ڪاسة مي فتحة الي وقدمها
زڪريا.... هاج شربي وخلي نحجي
مديت ايدي الترجف واخذت الڪلاص من عندة قربتة من شفايفي بعدني ما مخلية المي بحلڪي وحجة
زڪريا.... الجابتج كدام الموڪب مو امج صح؟
ولا زالت الحكاية مستمرة
هالحجي موجه الى كم قارئة اذا تحبين تعوفين الرواية على ما تكمل براحتج عوفيها بس رجاءً لا تكتبين لأن اتأثرين ؏ البقية اذا انتِ تعوفينها وغيرج يشوفج عفتيها وهم يعوفها على ما تكمل زين انا المن انشر؟ يعني هم التفاعل قليل وهم جاي احاول بكد ما اكدر انزل الكم بارتات طويلة وثلاث بارتات بالاسبوع ما اعرف شنو الي تحبونة اختاريت هاي الايام مراعاة الظروفي والبعض الطلبة ما احب أثر عليهم ويلتهون عن دراستهم بسبب الرواية على العموم الرواية راح تستمر والجاي اقوى لأجل عيونكم الحلوة واحبڪم 🤎.
تصبحون على الف خير