Chapter 171
ဤသို့ အောင်မြင်ခြင်းမှာ သူ့မိသားစုနောက်ခံကြောင့်လေလားဟု မေးရန် ရှိလာပြန်သည်။ ထိုမေးခွန်းမှာ လုံးဝ မဖြစ်နိုင်ချေ။ သူ သရုပ်ဆောင်ခဲ့သည့် ရုပ်ရှင်နှစ်ကားကို အကဲဖြတ်ကြည့်လျှင်ပင် အငယ်တန်း သရုပ်ဆောင်များအကြား အကောင်းဆုံးဖြစ်ကြောင်း သိနိုင်ပေသည်။ အရည်အချင်းအရာတွင် ကျိမြန်ထက်ပင် မညံ့လှ။ ရုပ်ရည်ချောမောကာ အရည်အချင်း ရှိသော်လည်း ခပ်လျှိုလျှိုသာ နေတတ်ပြီး အလုပ်အပေါ် အလေးအနက် ထားတတ်သည်။ ဤသည်မှာ သူ အောင်မြင်ရခြင်း၏ လျှို့ဝှက်ချက်ပင် ဖြစ်ပေသည်။
ဤစကားများမှာ နာမည်ကြီး အမေရိကန်လူမျိုး တင်ဆက်သူ ဘလိတ်ခ်၏ နှုတ်ဖျားမှ ထွက်လာခြင်းဖြစ်သည်။ သူက ရှောင်ကျားရှု၏ နောက်ကြောင်းကို အတိုချုပ် ရှင်းပြပြီးနောက် ကျယ်လောင်စွာ ကြေငြာလိုက်သည်။
"ဒါဆို ဒီနေ့အတွက် ဧည့်သည်တော်တွေကို ကြိုဆိုလိုက်ကြရအောင် လူတိုင်းရဲ့ နက်ရှိုင်းတဲ့ အချစ်တွေကို လက်ခံပိုင်ဆိုင်ခဲ့တဲ့ 001 ရဲ့ သရုပ်ဆောင် ရှောင်ကျားရှု ပြီးတော့ ကျွန်တော်တို့ရဲ့ မိတ်ဆွေဟောင်းတွေ ဖြစ်ကြတဲ့ ကျိမြန်နဲ့ Stisen... ကြိုဆိုပါတယ်..."
သုံးဦးလုံး ထွက်လာပြီးနောက် ဘလိတ်ခ်က နောက်တစ်ကြိမ် ထပ်မံ အတည်ပြုလိုက်သည်။
"ရှောင် ... ကျား ... ရှု ... ဒါ မင်းနာမည် ဟုတ်တယ်နော် ..."
"ဟုတ်ပါတယ် ..."
ရှောင်ကျားရှုက ခေါင်းငြိမ့ကာ တင်ဆက်သူ၊ ကျိမြန်နှင့် Stisen တို့ကို ပွေ့ဖက်နှုတ်ဆက်လိုက်သည်။
သူ့အပြုံးတို့ကို အထူးတဆန်း ဖြစ်နေသော Stisen က ထိုင်ခုံတွင် ဝင်ထိုင်ရန် သတိပေးခြင်း မခံရခင်အထိ သူ့ကိုသာ အပြူးသား ငေးကြည့်နေလိုက်သည်။ ဘလိတ်ခ်က ဩဘာပေးနေသော ပရိသတ်ကို လက်ဟန်ပြကာ ငြိမ်သက်စေလျက် မေးလိုက်သည်။
"မိတ်ဆွေကြီး Stisen ရေ ရှောင်ကို မြင်လိုက်ရတဲ့အခါ မင်းပုံစံက နည်းနည်းလေး ထူးဆန်းနေသလိုပဲနော် ဘာလဲ အချိန်တွေ တအားကြာသွားလို့ သူ့ကို မမှတ်မိတော့တာလား ..."
"ငါ တကယ်ကြီးကို မမှတ်မိတာ ..."
သူက ခေါင်းငြိမ့်ကာ ဝန်ခံလိုက်သည်။ ထို့နောက်မှ ဖြစ်ကြောင်းကုန်စင် ရှင်းပြပေးလိုက်၏။
"ဒါပေမယ့် မမှတ်မိဘူးဆိုတာ ရှောင်ကို မချစ်လို့ မတွေ့တော့တာနဲ့ ချက်ခြင်း မေ့သွားတာမျိုး မဟုတ်ဘူးနော် တကယ်တမ်းတော့ ငါ သူ့ကို အရမ်းအထင်ကြီးတာ သူ့လို သရုပ်ဆောင်မျိုးကို အချစ်ဆုံးပဲ ..."
"ဒါဆို ဘယ်လိုဖြစ်ပြီး ..."
ဘလိတ်ခ်က သိလိုစိတ် ပြင်းပြနေဟန်ပင်။
"ဘာလို့ဆို ဒီနေ့ ရှောင်က အရမ်းကို တောက်တောက်ပပ ပြုံးနေလို့လေ သူ့အမူအယာက အရမ်းကို တက်ကြွလွန်းနေလို့ ငါ အံ့ဩသွားတာ ငါသိခဲ့တဲ့ရှောင်က ဒီလိုလူမျိုး မဟုတ်ဘူးလေ လုံးဝကို တစ်ခြားတစ်ယောက်လိုပဲ ..."
Stisen က လက်ဟန်ခြေဟန်အပြည့်ဖြင့် ပြောလိုက်သည်။
ကျိမြန်က နက်ရှိုင်းသည့်အသံဖြင့် ရယ်မောလိုက်သည်။
"ငါ့ကိုယုံ ဒါကမှ သူ့ပုံစံ အစစ်အမှန် မင်းသိခဲ့တဲ့ ပုံစံက အတုလေ ..."
ရှောင်ကျားရှုမှာလည်း တစ်ခုခု တွေးမိသွားသည့်ဟန် ပါးနှစ်ဖက်လုံး နီမြန်းနေတော့သည်။
ဘလိတ်ခ်မှာ ပို၍ပင် သိလိုသွားဟန်ပင်။ ချက်ခြင်း ဆက်မေးလိုက်သည်။
"ဒါဆို မင်းသိတဲ့ ရှောင်က ဘယ်လိုပုံစံမျိုးလဲ ငါ့ကို ပြောပြလို့ရမလား ..."
"ရတာပေါ့ ..."
ကျိမြန်နှင့် Stisen တို့ နှစ်ယောက်လုံး ဖုန်းကို တစ်ပြိုင်တည်း ထုတ်လိုက်ကြပြီး ရှောင်ကျားရှုကမူ နာကျင်မှုအပြည့်ဖြင့်သာ ညဉ်းတွားလိုက်တော့သည်။
ဒါရိုက်တာက သူတို့ရွေးပေးထားသည့် ဓာတ်ပုံများဖြင့် slide တစ်ခု အမြန်လုပ်ပေးလိုက်၏။ ဓာတ်ပုံထဲရှိ ရှောင်ကျားရှုမှာ တောက်တောက်ပပပြုံးနေကြသည့် အလယ်တွင် မျက်နှာသေဖြင့် ရပ်နေလေသည်။ သူ့ပုံစံမှာ တစ်ယောက်ယောက်က သူ့ထံမှ သန်းပေါင်းများစွာ ချေးငှားထားသည့်နှယ်ပင်။ နောက်ထပ်ဓာတ်ပုံတစ်ခုတွင် Stisen က သူ့လည်ပင်းကို ရယ်ရယ်မောမော ဖက်ကာ ပြုံးနေသော်ငြား ရှောင်ကျားရှု၏ မျက်နှာထားမှာမူ အေးစက်နေဆဲပင်။ ဓာတ်ပုံတစ်ဒါဇင်ထက်မနည်း ရှိနေကာ တစ်ခုချင်းစီတိုင်းတွင် ရှောင်ကျားရှုသည် အမူအယာ ကင်းမဲ့ကာ အားလုံးနှင့် ကင်းကွာနေဟန်ပင်။
"မင်းတွေ့လား ရိုက်ကွင်းမှာ သူက အမြဲတမ်း ဒီလိုပဲ ရယ်လည်းမရယ် စကားလည်း အများကြီး မပြောဘူး ဒါပေမယ့် ရိုက်ချက်တိုင်းကိုတော့ အရမ်းကို ကောင်းကောင်းမွန်မွန် ရိုက်ကူးနိုင်လို့ ငါတို့အားလုံး သူ့ကို အရမ်းသဘောကျကြတယ် ငါကတော့ သူကမှ ဒီဇာတ်ကောင်ရဲ့ မူလသရုပ်လို့ပဲ ထင်မိတယ် နည်နည်းလေး ရှိုးတိုးရှန့်တန့်နဲ့ ပေါင်းသင်းဆက်ဆံရေးလည်း မကောင်းဘူး အပေါင်းအသင်းတွေနဲ့ ခေါ်တယ်ပြောတယ်ဆိုတာကကို ရှားတယ် ..."
Stisen က ရှင်းပြလိုက်သည်။
ဘလိတ်ခ်က ရီမုကိုယူကာ ကျိမြန် ရွေးချယ်ထားသည့် ဓာတ်ပုံများကို ပြသလိုက်၏။ ထိုပုံများထဲရှိ ရှောင်ကျားရှုသည် ဒူးလောက်နက်သော ပင်လယ်ရေထဲတွင် လက်နှစ်ချောင်းထောင်ကာ ရပ်နေပြီး သွားရှစ်ချောင်းလုံး နေရောင်အောက်တွင် ဝင်းလက်တောက်ပြောင်နေသည်။ နောက်တစ်ပုံမှာ အုန်းသီးတစ်လုံး ကိုင်ထားရင်း သဲသောင်ပြင်တွင် ထိုင်နေသည့်ပုံဖြစ်ပြီး မျက်လုံးတို့ မှေးကျဉ်းသည်အထိ ရယ်မောနေပုံမှာ ဆီခိုး၍ ရလာသည့် ကြွက်တစ်ကောင်နှယ်ပင် ...
တင်းမာကာ စိတ်ဝင်စားမှု ကင်းမဲ့ပါသည့် ယခင်ဓာတ်ပုံများနှင့် နှိုင်းယှဉ်ပါလျှင် ယခုဓာတ်ပုံများတွင် သူ၏ ကလေးဆန်မှုနှင့် ရိုးသားဖြူစင်မှုကို အတိုင်းသား မြင်နေရပေသည်။ တစ်ချိန်တည်းမှာပင် နေရောင်သဖွယ် လင်းလက်တောက်ပနေသေးသည်။
"ဒီနှစ်ယောက်က သေချာပေါက်ကို တစ်ယောက်စီပဲ ဖြစ်ရမယ် ..."
ဘလိတ်ခ်က ရေရွတ်လိုက်သည်။
"ရှောင်က စိတ်ကစဉ့်ကလျား ဖြစ်နေတာများလား ..."
ကျိမြန်က သူ့ကောင်လေးကို နက်နက်ရှိုင်းရှိုင်း စိုက်ကြည့်ကာ သက်ပြင်းချလိုက်သည်။
"စိတ်ကစဉ့်ကလျား ဖြစ်တော့မလို့ နီးပါးပဲ ဒါတွေအားလုံးရဲ့ တရားခံကလည်း <<Zerg 3>> ရုပ်ရှင် ဖြစ်နေတယ်လေ ..."
ထိုစကား ကြားလိုက်ရသည်နှင့် တစ်ပြိုင်နက် ဘလိတ်ခ်အပါအဝင် ကြည့်ရှုနေသူအားလုံး နားကို စွင့်ထားလိုက်ကြတော့၏။ တိုက်ရိုက်ထုတ်လွှင့်မှုကို ကြည့်နေသည့် တရုတ်ပရိသတ်အားလုံးကလည်း တန်းစီကာ အချိုစားရန် ... မဟုတ်သေးပါဘူး ... ဖြစ်ကြောင်းကုန်စင်ကို နားထောင်ရန် ပြင်လိုက်ကြသည်။
ဒီပုံတွေက အရမ်းကို ချစ်ဖို့ကောင်းတာပဲ အိုး ကျိလောင်ရှီးကို ဒါတွေအားလုံး တင်ပေးဖို့ တောင်းဆိုချင်လိုက်တာ ဒါမှ လူတိုင်း စခရင်ကို လျက်လို့ရမှာ ...
ရုပ်ရှင်သမိုင်းတစ်လျှောက် အအောင်မြင်ဆုံးရုပ်ရှင်တစ်ခုဖြစ်သော <<Zerg>> အပေါ် လူထု၏ စိတ်ဝင်စားမှုမှာ လွန်စွာ အားကောင်းလှပေသည်။ talk show ၏ rating များ ခုန်တက်လာကြောင်း နားကြပ်မှတစ်ဆင့် ကြားလိုက်ရသည့်အခါ ဘလိတ်ခ်က စကားဝိုင်းကို လမ်းကြောင်းတည်ပေးလိုက်သည်။
"ကြည့်ရတာ ဇာတ်လမ်းအရှည်ကြီး ထင်တယ် ..."
ကျိမြန်က ခေါင်းငြိမ့်ပြလိုက်သည်။
"ဟုတ်တယ် တကယ့်ကို အရှည်ကြီး ..."
"ဒါဆို အစကနေပဲ စလိုက်ကြမလား ကျွန်တော့်အထင်တော့ လူတိုင်းလည်း စိတ်ဝင်စားနေကြတယ်ထင်တယ် ..."
ဘလိတ်ခ်က လက်မြှောက်ပြလိုက်သည်နှင့် တစ်ပြိုင်နက် ကြည့်ရှုနေသူအားလုံး တက်တက်ကြွကြွ လက်ခုပ်တီးလိုက်ကြတော့သည်။ VPN ကျော်ကာ ကြည့်နေရသည့် တရုတ်ပရိသတ်များမှာမူ တိတ်တဆိတ်သာ မျက်နှာကို ကိုင်ထားလိုက်တော့၏။
အမ်း ဒါက အရမ်းကို ကြည်နူးဆွတ်ပျံ့စရာ ကောင်းတဲ့ အချစ်ပုံပြင်လေးပဲ ဖြစ်လိမ့်မယ် ...
"အစကနေလား ..."
ကျိမြန်က မေးကိုပွတ်ကာ ပြောလိုက်သည်။
"စဉ်းစားလိုက်ဦးမယ် ... တကယ်တမ်း ပြောရရင် တရုတ်မှာ ဇာတ်ကောင်ရွေးနေတုန်းက မိတ်ဆက်စာတွေ အများကြီး ရခဲ့ဖူးတယ် ငါ့အနားကို အရမ်း တက်တက်ကြွကြွနဲ့ ချဉ်းကပ်လာတဲ့ အနုပညာရှင်တွေဆိုတာလည်း အများကြီးပဲ ပြီးတော့ ရှောင်ရှု အိုး ဒါက ငါ သူ့ကို ခေါ်တဲ့ နာမည်ပြောင်လေ ... ရှောင်ရှုကလည်း အဲဒီလို လာချဉ်းကပ်တဲ့အထဲက တစ်ယောက် အပါအဝင်ပဲ ..."
"ရှောင်ရှု ..."
ဘလိတ်ခ်က ထိုနာမည်ပြောင်ကို လွန်စွာ စိတ်ဝင်စားနေဟန်ပင်။ တရုတ်သံ မပီမသဖြင့်ပင် အကြိမ်ကြိမ်အခါခါ လိုက်ပြောကြည့်နေလိုက်သည်။
"ဟုတ်တယ် သစ်ပင်လေးဆိုတဲ့ အဓိပ္ပါယ်လေ ..."
ကျိမြန်က သူ့ကောင်လေးကို အလွန်အမင်း ချစ်မြတ်နိုးသည့် အကြည့်တို့ဖြင့် ပြုံးကာ ကြည့်လိုက်သည်။
ရှောင်ရှုက သူ့နှလုံးသားထဲမှာ ကြီးထွားနေတဲ့ သစ်ပင်လေး အမြစ်တွယ်နေပြီဖြစ်လို့ ဖယ်ထုတ်ဖို့ဆိုတာ မဖြစ်နိုင်တော့ဘူး သူ့နာမည်လေးကို တစ်ခါ ရွတ်လိုက်မိတိုင်း သူ့ကို ချစ်တဲ့အကြောင်းတွေ ဖွင့်ဟဝန်ခံလိုက်ရသလိုပဲ...
ရှောင်ကျားရှုမှာလည်း မျက်နှာပေါ် ပေါ်လာသည့် ခံစားချက်တို့ကို ပရိသတ် မမြင်နိုင်စေရန် အလို့ငှာ လက်ဖြင့်သာ အုပ်ထားလိုက်ရတော့သည်။ သူ့ကို ရှောင်ရှုဟု နူးနူးညံ့ညံ့ ခေါ်ဝေါ်သည့် ကျိကော၏ လေသံကို အမှန်တကယ် သဘောကျလှပေသည်။ ထိုသို့ အခေါ်ခံရလေတိုင်း သူ့ကိုယ်သူ ကျိကော၏ ပျိုးထောင်မှုကို ခံနေရသည့် တကယ့်အပင်ပေါက်လေး တစ်ပင်နှယ် ခံစားလိုက်ရတော့သည်။
[ကျိလောင်ရှီးရဲ့ "ရှောင်ရှု" လို့ ခေါ်လိုက်တဲ့ အသံကလေ ချက်ခြင်းကြီး ပြောင်းလဲသွားသလိုပဲနော် အရင်အသံတွေထက် ပိုနိမ့်ပြီး အများကြီးကို နူးညံ့သွားတာ လျာဖျားလေးနဲ့ပဲ ခေါ်နေတဲ့ အတိုင်းပဲ ]
တက်ကြွလှသည့် တရုတ်လူမျိုး ကြည့်ရှုသူတစ်ယောက်က ဗီဒီယိုအောက်တွင် မှတ်ချက်တစ်ခု ချန်ထားလိုက်သည်။
[ငါတစ်ယောက်တည်း အတွေးလွန်နေတယ် ထင်နေတာ အခုတော့ လူတိုင်း အတူတူပဲကို အကျယ်ကြီးကို အော်ရယ်ချမိပြီ]
ဖရဲသီးစားနေသူများမှာ ချက်ခြင်းပင် စိတ်အားတက်ကြွလာကြတော့သည်။ တစ်ကမ္ဘာလုံး အတွေးလွန်နေကြသည့် အချိန်တွင် ဤCP သည် အစစ်အမှန် မဟုတ်မှန်း သိနေသည့်တိုင် သူတို့၏ စိတ်ကူးယဉ် အတွေးကမ္ဘာလှလှလေးထဲတွင် ပျော်မွေ့နေကြဆဲဖြစ်သည်။
အပြင်လူများက ရှင်းရှင်းလင်းလင်း မြင်နေကြသည့်တိုင် အတွင်းလူများမှာမူ ရိပ်ပင် မရိပ်မိကြသေး။ သူ့စကားနှင့် ပတ်သက်၍ မူမမှန်မှု တစ်ခုကိုမှ မရိပ်မိသေးသော ဘလိတ်ခ်က အံ့ဩတကြီး ရေရွတ်လိုက်သည်။
"ဝိုး ဒီနာမည်ပြောင်က ချစ်စရာကောင်းလိုက်တာ ..."
"ငါလည်း ဒီလိုပဲ ထင်တယ် ..."
ကျိမြန်က ဝမ်းသာအားရ ခေါင်းငြိမ့်ပြကာ ရှောင်ကျားရှုရှိရာဘက်သို့ ထိန်းမနိုင်သိမ်းမရ လှည့်ကြည့်မိလိုက်တော့၏။
စင်အောက်ရှိ ဖန်ခွင်းက သူ့ကို စိုက်ကြည့်ကာ အသံတိတ် သတိပေးနေလိုက်သည်။
"မင်းစိတ်ကိုယ်မင်းလည်း ထိန်းပါဦး နည်းနည်းလောက်လေးဖြစ်ဖြစ် ထိန်းထိန်းသိမ်းသိမ်း နေစမ်းပါ နိုင်ငံခြားမှာဆို ဂယက်မထနိုင်လောက်ဘူးလို့ ထင်နေတာလား ပြည်တွင်းပရိသတ်ရဲ့ အင်အား ဘယ်လောက်အထိ များလဲဆိုတာ သိရဲ့လား CP fan အရေအတွက် နည်းနေသေးတယ် ထင်လို့လား ..."
သို့သော် ကျိမြန်ကမူ သူ့ကို စိုးစဉ်းမျှပင် စောင်းငဲ့ကြည့်မလာ၍ ရူးချင်စိတ်ပင် ပေါက်သွားတော့သည်။
ထိုခွေးစုံတွဲအကြောင်း လူသိသွားမည်ကို စိုးရိမ်နေရသောကြောင့် ဖန်ခွင်းသည် သေချင်စိတ်ပင် ပေါက်လာတော့သည်။ သို့သော် စိုးရိမ်နေ၍လည်း အသုံးမဝင်။ ကာယကံရှင် ကိုယ်၌ကပင်လျှင် ပူးပေါင်းခြင်း မရှိ။ အခြားသူတို့ မမြင်နိုင်မည်ကိုပင် စိုးရိမ်သည့်အလား သူ့အချစ်တို့ကို လူသိရှင်ကြား ထုတ်ဖော်ပြသနေပေသည်။ လူအများစုက သူတို့နှစ်ဦးကြားတွင် ဆက်ဆံရေးတစ်ခုရှိနေသည်ဟု လုံးဝ မယုံကြည်ကြရာ တမင်တကာ ဖုံးကွယ်လိုစိတ် မရှိသည်ကိုပင် ကျေးဇူးတင်ရမည့်သဘော ရောက်နေတော့သည်။
ဆန့်ကျင်ဘက်အနေဖြင့် CP fan အရေအတွက်သာ အဆပေါင်းများစွာ တိုးပွားလာတော့သည်။
(ဆိုလိုချင်တာကလေ သူတို့နှစ်ယောက် တွဲနေတာကို ဖုံးကွယ်မထားတော့ လူတွေက သူတို့ကို တကယ် ကြိုက်နေတယ် မထင်တော့ဘဲ ship တဲ့သူတွေ များလာတယ်လို့ ပြောချင်တာပါ)
သူသိရသလောက်ဆိုလျှင် ကျိမြန်၏ နိုင်ငံလုံးဆိုင်ရာ ဖန်ကလပ်၏ အဖွဲ့ခွဲခေါင်းဆောင် တစ်ဒါဇင်နီးပါးခန့်မှာ ကျိမြန်၏ ပရိသတ်စစ်စစ်မှ CP fan အဖြစ်သို့ ကူးပြောင်းသွားကြသည့်အပြင် တစ်ဦးချင်းစီ၏ အမည်အောက်တွင် အလွန့်အလွန် အင်အားများပြားသည့် အဖွဲ့ပေါင်းများစွာ ရှ်ိနေသေးသည်။ ဖန်ခွင်းမှာ ထိုသူတို့၏ တိုက်ခိုက်နိုင်စွမ်းအကြောင်း တွေးပင်မတွေးရဲတော့။ ကျန်းပင်းကျဲမှာလည်း လုံလုံလောက်လောက် ခံစားရပြီးဖြစ်၍ သူမ၏ comment section ကို ပိတ်ထားလိုက်ရတော့သည်။
အကယ်၍ တစ်နေ့နေ့တစ်ချိန်ချိန်တွင် ဤခွေးစုံတွဲသာ လမ်းခွဲခဲ့ပါလျှင် အသည်းအသန် ဖြစ်နေသည့် CP fan များသည် မီးတုတ်များ ကိုင်လျက် သူတို့ကို မီးရှို့သတ်လေမလားဟုပင် တွေးလိုက်မိတော့သည်။
လက်တွေ့ဘဝမှာ အတူတူ မရှိနိုင်မှတော့ အရိုးပြာအဖြစ် ပေါင်းစည်းကြပေါ့ ...
ဖန်ခွင်းက သူ့ကိုယ်ပိုင်အတွေးတို့ဖြင့် တိုက်ခိုက်နေသည့်တိုင် ဤလူနှစ်ဦး လမ်းခွဲသည်မှာ ဖြစ်မလာနိုင်ကြောင်းလည်း သိနေပေသည်။ ရှောင်ကျားရှုက ကျိမြန်ကို ဟိုးယခင်ကတည်းကပင် ကြံစည်နေခဲ့သူဖြစ်ကာ ကျိမြန်မှာမူ ကျိုးကြောင်းစဉ်းစားတတ်သူဟု ထင်ရနိုင်သော်ငြား ဤအကြောင်းကို အခြားအရာများထက်ပင် ပို၍ စေ့စပ်စွာ အကွက်ချထားပြီးဖြစ်သည်။
"ဆိုတော့ ရှောင်က သူ့ကိုယ်သူ ဘယ်လိုမျိုး တင်ဆက်ခဲ့လဲ ..."
ဘလိတ်ခ်က အကြောင်းအရာကို ပြန်ဆွဲခေါ်လိုက်သည်။
"သူက ငါ့ရုံးခန်းထဲလာပြီး သူ့ရဲ့ ကောင်းကွက်တွေကို ထုတ်ပြတယ်လေ ..."
ကျိမြန်က ရယ်မောလိုက်သည်။
"မင်းတို့တော့ မသိလောက်ဘူး အဲဒီ့အချိန်တုန်းက ဇာတ်ညွှန်းလည်း အပြည့်အစုံ ထွက်မလာသေးဘူးလေ စက်ရုပ်အဖြစ် သရုပ်ဆောင်ရမယ် ဆိုတာကလွဲရင် သူ ဘာမှ မသိဘူး အဲဒီ့မှာ ဒီလိုပြောတယ်သိလား "ဟေး ကျိကော ကျွန်တော့်ကို ကြည့်ကြည့်ပါဦး တရုတ်မှာ ကျွန်တော့်ထက် ချောတဲ့ယောကျာ်း ရှာနိုင်ပါ့မလား ရုပ်ရည်ရော ခန္ဓာကိုယ်ရောက လုံးဝ ပြီးပြည့်စုံပြီး ကမ္ဘာပေါ်မှာ အသန်မာဆုံး စက်ရုပ် ဆိုတဲ့ ဂုဏ်ပုဒ်နဲ့ ကွက်တိပဲနော်" တဲ့ ပြီးလည်းပြီးရော သူ့ရဲ့ ပြီးပြည့်စုံတဲ့ ကြွက်သားတွေကိုပြဖို့ ရှပ်အင်္ကျီကို လှန်ပြတယ်လေ ဒါပေမယ့် ... ဗိုက်ခေါက်တစ်ခုကိုပဲ တွေ့လိုက်ရတယ် ..."
စင်အောက်ရှိ ကြည့်ရှုနေသူအားလုံး လက်ခုပ်လက်ဝါး တီး၍ပင် ရယ်မောလိုက်ကြတော့သည်။ ဘလိတ်ခ်သည်ပင်လျှင် ရယ်ချင်စိတ်ကို ထိန်းမရတော့။ ရှောင်ကျားရှု၏ ဝမ်းဗိုက်ကိုလည်း ခဏခဏ ခိုးကြည့်နေလိုက်သေးသည်။
ရှောင်ကျားရှုလည်း ဗိုက်ကို အမြန်ဖုံးအုပ်ကာ ကျိမြန်ကို ခိုးကြည့်ပြီး အားလုံးနှင့်အတူ ရယ်မောလိုက်တော့သည်။ သူ၏ ရှက်စရာ ဖြစ်ရပ်များအား ကျိကောက အခြားသူများကို ထုတ်ပြောခြင်းအပေါ် မည်သို့မှ စိတ်မကွက်မိ၊ အကြောင်းမှာ ကျိကော ပြောသမျှတိုင်းသည် သူ့အပေါ် ဂုဏ်ယူချစ်ခင်စိတ်ဖြင့်သာ ပြောခြင်းဖြစ်ကြောင်း သိနေ၍ဖြစ်သည်။
ကျိမြန်က သည်းခံပြီးရင်း သည်းခံနေသေးသော်ငြား နောက်ဆုံးတွင်တော့ စိတ်ကို မထိန်းချုပ်နိုင်တော့။ လက်ကို ဆန့်ထုတ်ကာ ရှောင်ကျားရှု၏ ဆံပင်တို့အား ခပ်ဖွဖွ ပွတ်သပ်ပေးမိလိုက်တော့သည်။
ဖရဲသီးစားနေသူများမှာလည်း ဤအတွဲ၏ ချစ်စရာကောင်းမှုကြောင့် သူတို့၏ နှလုံးသားလေးကို မနည်း ထိန်းသိမ်းနေရတော့သည်။
Xxxxxxx
Sue Xing Nway
Chapter 172
ကျိမြန်က လူတိုင်း ရယ်လို့ဝသွားသည်အထိ စောင့်ကာ ရှင်းပြလိုက်သည်။
"တကယ်တမ်းတော့ အဲဒီ့ဗိုက်ခေါက်က အရမ်းကြီး မကြီးပါဘူး တကယ့်တကယ်ကို ပိစိလေး ခါးပတ်ကိုသာ နည်းနည်းလောက် လျော့လိုက်ရင် လုံးဝ ရှိတယ်လို့တောင် မထင်ရဘူး ..."
သူက လက်ညှိုးနှင့် လက်မကို သုံးကာ လက်ဟန်ခြေဟန်ပင် ပြလိုက်သေးသည်။
ဘလိတ်ခ်က ထိုနှစ်ယောက်အကြား တစ်ခုခုရှိနေသည်ကို ခံစားမိသွားဟန်ပင်။
"ခါးပတ်ကို နည်းနည်းလောက် လျော့လိုက်ရင် မရှိတော့မှန်း ဘယ်လိုလုပ် သိလဲ ..."
"ဘာလို့လဲဆို ရှောင်ရှုက သူ့ဗိုက်ခေါက်ကိုလည်း တွေ့ရော ခါးပတ်ကို ချက်ခြင်း လျော့ပစ်လိုက်လို့လေ ..."
သူ့စကားသံ ဆုံးသည်နှင့် တစ်ပြိုင်နက် ရှောင်ကျားရှုက ထပ်ဖြည့်ပြောလိုက်သည်။
"တကယ်တမ်းတော့ အဲဒီ့အချိန်တုန်းက ကျွန်တော် တစ်ချိန်လုံး အသက်အောင့်ထားခဲ့တာ ကျိကော ရုံးခန်းထဲကနေ မထွက်ရမချင်း အသက်ကို မရှူရဲဘူး ဒါပေမယ့် သမိုင်းဝင်ဗိုက်ခေါက်က ဘယ်လိုမှကို ဖုံးလို့ဖိလို့ မရခဲ့ဘူးလေ ..."
ပရိသတ်များအားလုံး နောက်တစ်ဖန် ပွဲကျသွားပြန်တော့သည်။
တရုတ်ပရိသတ်များကလည်း မှတ်ချက်အများအပြား ရေးသားရင်း အားရပါးရ ရယ်မောလိုက်ကြသည်။
[ရှောင်အာ့ရှောက်က တစ်ချိန်လုံးကို ရယ်နေရတာပဲ ကျိလောင်ရှီးတော့ ရယ်ချင်စိတ်ကို ထိန်းနေရတာနဲ့တင် တော်တော် ဒုက္ခများနေလောက်ပြီ ထင်တယ်နော် ငါတော့ ကျိလောင်ရှီးကိုတောင် သနားလာပြီ ..."
[တကယ်တမ်းတော့ ကျိလောင်ရှီးက ဒုက္ခမများလောက်ဘူး ဒီလို ချစ်စရာကောင်းတဲ့လူနဲ့ တစ်ချိန်လုံး အလုပ်တွဲလုပ်နေရတာကိုက စိတ်ချမ်းသာစရာ ကောင်းနေမှာပဲလေ ]
မှတ်ချက်ကဏ္ဍတစ်ခုလုံး အမျိုးစုံသော မှတ်ချက်တို့ဖြင့် ပြည့်နှက်နေသော်ငြား ရှောင်ကျားရှုအပေါ် ချစ်ခင်စိတ်မှာမူ အတူတူပင်ဖြစ်သည်။ ကျန်းပင်းကျဲနှင့် ပြောထားသည့် စကားပြောမှတ်တမ်းကို ဖတ်ကြည့်ပြီးနောက် ရှောင်ကျားရှု၏ အတွင်းစိတ်မှာ မည်မျှ ရိုးရှင်းလှကြောင်း သဘောပေါက်သွားကြတော့သည်။ အခြားသူများကို မကောင်းမြင်ခြင်း လုံးဝ မရှိသည့်အပြင်စိတ်ခံစားလွယ်သည့် နွေးထွေးတတ်သူတစ်ဦး ဖြစ်ပေသည်။ သူ၏ သန်မာလှသည့် နောက်ခံအတွက်သာ မဟုတ်ပါလျှင် ကျန်ဘဝတစ်လျှောက်လုံး အနုပညာလောကထဲ ဆက်မနေချင်တော့မည်ကိုပင် ကြောက်ရွံ့မိနေရသည်။ သို့သော် ကောင်းမွန်စွာ ကာကွယ်ပေးခြင်းကို ခံခဲ့ရ၍သာလျှင် ယခုကဲ့သို့သော လူမျိုး ဖြစ်နေခြင်းဖြစ်ကြောင်းလည်း သိသာလှပေသည်။
"ဘုရားရေ မင်းပြောလို့သာ မဟုတ်ရင် 001 ဇာတ်ကောင်ကို ဒီလို ရွေးခဲ့မှန်း ယုံနိုင်မှာကို မဟုတ်ဘူး ..."
Stisen က သူ့ကို ပါးစပ်အဟောင်းသားဖြင့် ငေးကြည့်လိုက်သည်။
ကျိမြန်က တောင်းပန်သည့် အမူအယာတစ်ခု လုပ်ပြလိုက်သည်။ သူ့လေသံမှာ အလွန်အမင်း စိတ်ထိခိုက်နေဟန်ပင်။
"ဆိုတော့ မင်းတို့ မြင်တဲ့အတိုင်းပဲ အရွေးခံဖို့ လာလျှောက်တဲ့သူတွေထဲမှာ ရှောင်ရှုကို စိတ်တိုင်းမကျဆုံးပဲ 001 ရဲ့ စရိုက်က ရှုပ်ထွေးပေမယ့် အရမ်းကို တိတ်ဆိတ်တယ်လေ ရှောင်ရှုရဲ့ စရိုက်နဲ့ဆို လုံးဝကို တစ်ခြားစီပဲ သူက အရမ်းကို တက်ကြွလွန်းတယ်လေ ..."
ဘလိတ်ခ်နှင့် ကြည့်ရှုသူများက ကျိမြန်သည် အမြဲလိုလို မှန်ကန်သည့် ဆုံးဖြတ်ချက်သာ ချခဲ့ကြောင်း သိသည့်တိုင် အနည်းငယ် အံ့ဩမိကြဆဲပင်။
ဘာကများ သူ့စိတ်ကို ပြောင်းလဲသွားစေပါလိမ့် ...
"ဒါဆို ဘာလို့ နောက်ပိုင်းကျ သူ့ကို ရွေးခဲ့တာလဲ ဒါက အရမ်းကို အရဲစွန့်ရတဲ့ ဆုံးဖြတ်ချက်မျိုး ဖြစ်မယ်ထင်တယ်နော် ..."
"ဟုတ်တယ် တကယ်ကို အရဲစွန့်ပြီး ဆုံးဖြတ်ချက် ချခဲ့ရတာ ..."
ကျိမြန်က သူ့ကောင်လေးကို လှည့်ကြည့်လိုက်သည်။
"ဒါပေမယ့် အဲဒီ့ညမှာပဲ ရှောင်ရှုဆီကနေ ဓာတ်ပုံတွေ အများကြီး ရလာရော သူက စစ်ယူနီဖောင်းကို ဝတ်ပြီး ကင်မရာကို တည့်တည့်ကြီး စိုက်ကြည့်နေတာလေ အရမ်းကို အေးစက်ခက်ထန်တဲ့ အကြည့်နဲ့ စိုက်ကြည့်နေတာ ကျွန်တော်ထင်တယ် အဲဒီ့အချိန်ကတည်းက သူက ဇာတ်ကောင်နဲ့ နည်းနည်းလေး နီးစပ်ခဲ့တာပဲ ..."
"အဲဒီ့ဓာတ်ပုံတွေရော ယူလာရဲ့လား ကျွန်တော်တို့ကို ပြလို့ရလား ..."
ဘလိတ်ခ်က ချက်ခြင်း တောင်းဆိုလိုက်သည်။
"ယူလာတာပေါ့ ..."
ကျိမြန်က ဖုန်းကို ထုတ်ပြလိုက်သည်။
"ဝိုး အရမ်းကို မိုက်တာပဲ ..."
ဓာတ်ပုံကို မြင်လိုက်ရသည့်အခါ ပရိသတ်အားလုံး တအံ့တဩ ဟစ်ကြွေးလိုက်တော့သည်။
တရုတ်ပရိသတ်များက ဂုဏ်ယူတကြီး ပြောလိုက်ကြ၏။
[ငါတို့ရှောင်ရှုက ရယ်စရာကောင်းတယ် ဆိုပေမယ့် အလေးအနက် ဖြစ်တဲ့အချိန်မှာတော့ စင်ပေါ်ကပဲ ]
"ပင်ကိုယ်စိတ်ရင်းကတော့ 001 နဲ့ တော်တော်နီးစပ်နေပြီနော် ..."
ဘလိတ်ခ်က အခိုင်အမာ ထောက်ခံလိုက်သည်။
"နီးစပ်ရုံပါပဲ ဒါပေမယ့် ငါ့လိုအပ်ချက်တွေနဲ့တော့ မကိုက်သေးဘူး ..."
ကျိမြန်က သူ့ကောင်လေး၏ ခေါင်းကို အသာဆွဲဖွလိုက်သည်။
"ဒါပေမယ့် မတတ်နိုင်ဘူး အဲဒီ့ကတည်းက ရှောင်ကျားရှုရဲ့ ဦးနှောက်ဆေးတာကို ခံလိုက်ရပြီလေ ငါ့ကိုယ်ငါ စဉ်းစားကြည့်လိုက်တယ် ကောင်းပြီလေ 001 က တကယ်ကို အပြည့်စုံဆုံး စက်ရုပ်ပဲဟာ ရုပ်ရည်ပိုင်းအရဆိုရင်တော့ မင်းကို အခွင့်အရေးတစ်ခု ပေးလိုက်ပါ့မယ် ..."
"မင်းက ရှောင်ရဲ့ အလှအောက်မှာ မျောသွားတယ်လို့ ပြောလို့ရလား ..."
ဘလိတ်ခ်က အရွှန်းဖောက်လိုက်သည်။
ကျိမြန်က ရယ်လိုက်သည်။
"သေချာပေါက်ပဲပေါ့ ..."
တိုက်ရိုက်ကြည့်ရှုနေသူအားလုံး ရှက်သွေးဖြန်းသွားကြတော့၏။ ကျိမြန်က ဘလိတ်ခ်ကို ပြန်လည်စနောက်နေသည်နှင့်မတူ၊ ရှောင်၏ ဆွဲဆောင်မှုကို အမှန်တကယ် ခံလိုက်ရပုံနှင့်ပင် ပို၍ တူနေသေးသည်။
တရုတ်ပရိသတ်များကမူ မျက်နှာကို အုပ်လျက်သာ ငြီးတွားလိုက်ကြတော့သည်။
ဖာ့ခ် သွေးကန်ကတော့ ကုန်တော့မယ်ထင်တယ် ဒီအချစ်ဇာတ်လမ်းက အရမ်းကို အံ့ဩစရာ ကောင်းလွန်းတယ် ...
သည်းမခံနိုင်သူတစ်ဦးက ဤသို့ ရေးလိုက်ပြန်၏။
[ရှောင်အာ့ရှောက်ရဲ့ ခါးပတ်က ပြုတ်နေပြီဟာကို သူ့ကို လွှတ်ပေးဦးမလို့လား မစ္စတာကျိ ခင်ဗျားကို တကယ်ကို စိတ်ပျက်သွားပြီ]
"အဲဒီ့အချိန်တုန်းက ရှောင်ရှုက 001 နဲ့ အပြင်ပိုင်းပဲ ကိုက်ညီနေသေးတာ အတွင်းပိုင်းက လိုအပ်နေတုန်းပဲ Reiner ကို ဇာတ်ညွှန်းကို စီစဉ်ပေးဖို့ တောင်းဆိုခဲ့တယ် ပြီးတော့ သူနဲ့ စကားပြောဖို့ ဇာတ်ညွှန်းကို ယူလာတဲ့ အချိန်မှာ သူက ငါ့ထက်တောင် ဒီဇာတ်ကောင်ကို ပိုပြီး နက်နက်ရှိုင်းရှိုင်း နားလည်နေမှန်း သိသွားလိုက်တယ် ငါ့အတွက်တော့လေ ဒါ ထိတ်လန့်စရာကောင်းတယ်လို့တောင် ပြောရမယ်ထင်တယ် သူက ငါ့ကို အရင်လာရှာပြီး ဒီလို ပြောခဲ့တယ် သိလား "ကျိကော ကျွန်တော် ဒီဇာတ်ကောင်ကို ဘယ်လို သရုပ်ဆောင်ရမလဲ သိပြီ ကျွန်တော့်ကိုယ်ကျွန်တော် လုပ်ငန်းစဉ်တွေ၊ ညွှန်ကြားချက်တွေကိုပဲ အတိအကျ လိုက်နာတဲ့ စက်ရုပ်အစစ် တစ်ရုပ်အဖြစ် ပြောင်းပစ်ချင်တယ် ကျွန်တော့်ရဲ့ နေ့စဉ်ဓူဝကိစ္စတွေအတွက် ညွှန်ကြားချက်တွေ လုပ်ထားတယ် ပြီးတော့ အဲဒါကို တိတိကျကျ လိုက်နာမလို့ ..." တဲ့ ..."
သူ ပြောနေစဉ်အတွင်းမှာပင် ဒါရိုက်တာက ရှောင်ကျားရှု ရေးဆွဲထားသော ပရိုဂရမ်စာရွက်များကို စခရင်ပေါ် တင်ပေးလိုက်သည်။ စာရွက်တိုင်း၏ ထိပ်ဆုံးတွင် ရက်စွဲများ ရေးသားထားပြီး အချိန်ကာလအားဖြင့် လေးငါးလခန့် ကြာမြင့်ပေသည်။ ဇယား၏ အောက်တွင်မူ သတ်မှတ်ချိန်အတွင်း ပြီးစီးရမည့် အလုပ်တာဝန်များအား မှတ်သားထားပြီး သွားတိုက်ခြင်း၊ မျက်နှာသစ်ခြင်းကဲ့သို့သော ကိစ္စအသေးအဖွဲလေးများမှအစ အလုပ်အစီအစဉ်များအထိ အားလုံး တစ်ခုမကျန် ပါဝင်ပေသည်။
ထိုအချိန်ဇယား တစ်ခုစီတိုင်းကို ကြိုတင်ကာ ဘာသာပြန်ထားပြီးဖြစ်၍ ဥရောပနှင့် အမေရိကန်သား ကြည့်ရှုသူအားလုံး ကြောင်အသွားရတော့သည်။ ဇာတ်ကောင်တစ်ခုကို ကောင်းစွာ သရုပ်ဆောင်နိုင်ရန် အလို့ငှာ ဤကဲ့သို့ အလုံးစုံ ရင်းနှိီးမြှုပ်နှံ ကြိုးစားသည့်သူမျိုး ရှိနေလိမ့်မည်ဟု စိတ်ကူးပင် မယဉ်ခဲ့ဖူးချေ။
ဘလိတ်ခ်က ထိုဇယားတို့၏ ကြောက်မက်ဖွယ်ကောင်းမှုကို သတိမပြုမိသေးသော်ငြား Stisen ကမူ မျက်မှောင်ကြုတ်လျက်သာ စိုက်ကြည့်နေလိုက်သည်။
"လူတစ်ယောက်က အကျင့်တစ်ခု ဖြစ်လာဖို့ ၂၁ ရက်ပဲ ကြာတယ် ငါတို့တွေက ကိုယ့်စိတ်ကို အလွယ်တကူ အကျဉ်းချနိုင်တယ်ဆိုတဲ့ သဘောပဲ မင်းသာ ဒီပုံစံအတိုင်း လေးငါးလ ဆက်တိုက်ကြီး နေခဲ့မယ်ဆိုရင် OCD ရသွားမှာတောင် ကြောက်ရတယ် ..."
သူသိခဲ့တဲ့ ရှောင်က ဒီလိုပုံစံမျိုး ဖြစ်ခဲ့တာ မဆန်းတော့ပါဘူး ...
ကျိမြန်က ခေါင်းငြိမ့်ကာ ပြောလိုက်သည်။
"ဟုတ်တယ် အဲဒါကြောင့် သူ ဒီ့ထက်ပိုပြီး တင်းကြပ်တဲ့ စက်ဘဝ ပြောင်းမသွားအောင် စောင့်ကြည့်နေခဲ့တာ သူ့ကိုယ်သူ ညွှန်ကြားချက် အမိန့်တွေ ရမှ အလုပ်လုပ်တဲ့ စက်အဖြစ် တကယ်ကြီး ပြောင်းပစ်တာလေ ဒါက သူ့ရဲ့ လူသားဆန်မှုတွေကို တမင်တကာ ဖျက်ဆီးနေတာပဲ မဟုတ်ဘူးလား ငါ အဲဒီ့အချိန်က ဘယ်လောက်တောင် ပူပန်သွားရလဲ မင်းတို့ မသိကြလို့ ရှောင်ရှု ဒီဟာကြောင့် ပျက်စီးသွားရမှာကို စိုးရိမ်လို့ 001 ဇာတ်ကောင်ကို ဖျက်ပစ်ဖို့တောင် တွေးခဲ့သေးတယ် သူ့ကို ဆက်ပြီး သရုပ်ဆောင်ခွင့် မပြုနိုင်တော့ဘူး ..."
သူ့ကို ဖျတ်ခနဲ လှည့်ကြည့်လာသည့် ရှောင်ကျားရှုမှာလည်း အလွန်အံ့အားသင့်နေဟန်ပင်။
ကြည့်ရှုနေသူအားလုံး လုံးဝ မရယ်မောနိုင်တော့။ ဖြစ်မလာနိုင်မှန်း သိသည့်တိုင် လက်ကိုယမ်းလျက် အသည်းအသန် ငြင်းဆန်လိုက်ကြတော့သည်။
"မဟုတ်ဘူး မဟုတ်ဘူး မဟုတ်ဘူး ကျေးဇူးပြုပြီး အဲဒီ့လိုကြီး မလုပ်လိုက်ပါနဲ့ ..."
ကျိမြန်က သူ့ကောင်လေး၏ နောက်ကျောကို ခပ်ဖွဖွ ပွတ်သပ်ကာ နှစ်သိမ့်ပေးလိုက်သည်။
"ဒါပေမယ့် သူနဲ့ ဒီဇာတ်ကောင်ကို အများကြီး မြင်ယောင်ကြည့်မိလို့လား မသိဘူး ဒီအကြံကို လက်လျော့ခဲ့မိတယ် ဇာတ်ကောင်ကို ဖြုတ်ပစ်တာက သူ့ကို ကူညီရာ မရောက်ဘဲ သူ့ရဲ့ အိပ်မက်တွေ အားစိုက်ထုတ်ခဲ့ရတာတွေကို ဖျက်ဆီးပစ်ရာ ရောက်မယ်မှန်း သိနေလို့ ဒါ အရမ်းကို ရက်စက်ရာ ကျလွန်းတယ်လေ ငါလုပ်နိုင်တာဆိုလို့ သူ့ကို ဘေးကနေ စောင့်ကြည့်ပြီး အသူတစ်ရာချောက်ထဲ ပြုတ်မကျအောင် ကာကွယ်ပေးဖို့ပဲ ရှိတော့တယ် ..."
ရှောင်ကျားရှုလည်း ထိုအခါမှသာ သက်ပြင်းချနိုင်တော့သည်။ <<Zerg 3>> ရိုက်ကူးစဉ်က ကျိကောသည် သူ့ကို ဂရုစိုက်လွန်းသည့်အတွက် ထိုဇာတ်ကောင်ကို ဖျက်ပစ်ရန်ပင် တွေးခဲ့ဖူးကြောင်း မသိခဲ့ချေ။ လွန်စွာ ဒေါသထွက်မိသော်ငြား ဒေါသစိတ် အပြီးတွင် နွေးထွေးမှုကို တစ်ဖန် ခံစားလိုက်ရပြန်သည်။
သူ့ကို အရိပ်တကြည့်ကြည့် စိုက်ကြည့်နေသည့် ကျိမြန်၏ မျက်ဆံအိမ်ထဲတွင်လည်း အပြုံးသေးသေးလေးတစ်ပွင့် ပေါ်ထွက်လာတော့သည်
ဘလိတ်ခ်က တစိမ့်စိမ့်တွေးရင်း ပြောလိုက်သည်။
"ရှောင်ရဲ့ အတွေ့အကြုံတွေက လူတစ်ယောက်ကို သွားပြီး အမှတ်ရမိစေတယ် ..."
"Heath Ledger..."
Stisen ၏ အမူအယာမှာ ဝမ်းနည်းနေဟန်ပင်။
"ထာဝရ Heath Ledger..."
ကျိမြန်က ခေါင်းငြိမ့်ပြလိုက်သည်။
"ဟုတ်တယ် သူ ရုန်းမထွက်နိုင်ခဲ့ဘူး တစ်ချို့လူတွေကတော့ ထင်ကြလိမ့်မယ် ဟာ သရုပ်ဆောင်တယ်ဆိုတာ အလွယ်လေးပါလို့ တကယ်တမ်းတော့ မဟုတ်ဘူးနော် ဥပမာပြောရရင် Joker ကို သရုပ်ဆောင်သွားတဲ့ Heath Ledger ကိုပဲ ကြည့် စိတ်ရူးပေါက်ပြီး အော်ဟစ်ရုံတင် မကဘူး သူ့အရိုးထဲမှာကို ရူးသွပ်မှုတွေ၊ အကြောက်အလန့်ကင်းမှုတွေက စွဲမြဲနေပြီ သရုပ်ဆောင်တစ်ယောက်က ဇာတ်ကောင်ရဲ့စရိုက်သဘာဝထဲကို မဝင်စားနိုင်ရင် သူ သရုပ်ဆောင်တာက ဘယ်လိုနည်းနဲ့မှ ပီပြင်မှာ မဟုတ်ဘူး ပြီးတော့ ဒါက သေချာပေါက်ကို အန္တရာယ် အများဆုံးပဲ တော်သေးတာပေါ့ ရှောင်ရှုကတော့ ပြန်သက်သာလာလို့ အဲဒီ့အဖြစ်အပျက်တွေကို ပြန်စဉ်းစားတိုင်း စိုးရိမ်ရလွန်းလို့ သူ သရုပ်ဆောင်တဲ့ နည်းလမ်းကို ပြောင်းဖို့ ပြောရတာလည်း အကြိမ်ပေါင်းကို မနည်းတော့ဘူး ..."
"ဆိုတော့ ပြောင်းခဲ့လား ကောင်လေး ..."
ဘလိတ်ခ်က ရှောင်ကျားရှုကို လှမ်းကြည့်လိုက်သည်။
"ကြိုးစားနေပါတယ် ..."
သူက အလေးအနက် ပြန်ဖြေလိုက်၏။
"ဒါပေမယ့် အလားတူ ဇာတ်ကောင်မျိုး ရခဲ့ဦးမယ် ဆိုရင်လည်း သူ့ရဲ့ စရိုက်သဘာဝကို နှလုံးသားနဲ့ရင်းပြီး ခံစားမိဦးမယ်ထင်တယ် ကျွန်တော့်အတွက်တော့ လက်ထဲရောက်လာသမျှ ဇာတ်ကောင်တိုင်းက စိတ်ကူးယဉ် ဇာတ်ကောင်သက်သက်ပဲ မဟုတ်ဘူး အဲဒါကြောင့် သူတို့ကို သေချာပေါက် အသက်သွင်းပေးရမယ် စခရင်ပေါ်မှာ ရှင်သန်နိုင်အောင် ကြည့်ရှုသူရဲ့ နှလုံးသားထဲမှာ ရှင်သန်သွားနိုင်အောင်လေ ရုပ်ရှင်သမိုင်းမှာ နာမည်ကောင်းတစ်ခု ချန်ထားနိုင်ခဲ့တဲ့ ဘယ်သရုပ်ဆောင်မဆို ဂန္တဝင်ဇာတ်ကောင် တစ်ခုထက် ပိုရှိပြီးတော့ အကုန်လုံးကလည်း ပရိသတ်ရဲ့ အောက်မေ့သတိရမှုကို ခံရတယ် ကျွန်တော်လည်း သူတို့လိုပဲ ဖြစ်ချင်တယ် ကျွန်တော့်ကို တွေ့လိုက်လို့ နာမည်ကို မသိချင်နေ ကျွန်တော် သရုပ်ဆောင်ခဲ့တဲ့ ဇာတ်ကောင်ကို ခေါ်ခံရရင်ကို ရပြီ ဒါကိုက ကျွန်တော့်အတွက် အကောင်းဆုံး ချီးကျူးမှု ဖြစ်နေပြီ ..."
"ရှောင် မင်းပြောသွားတာ ကောင်းလိုက်တာ ဟုတ်တယ် ပရိသတ်ရဲ့ ရင်ထဲမှာ မှတ်မှတ်ထင်ထင် ကျန်နေတဲ့ ဇာတ်ကောင်ကို သရုပ်ဆောင်နိုင်တဲ့သူကမှ တကယ့်ကို သရုပ်ဆောင်ကောင်းအစစ်ပဲ ..."
ဘလိတ်ခ်က ပြင်းပြင်းပျပျ ချီးကျူးလိုက်သည်။ ဤအရှေ့တိုင်းသား ကောင်လေးသည် သရုပ်ဆောင်ခြင်း အနုပညာနှင့် သူ့အသက်မွေးဝမ်းကျောင်းလုပ်ငန်းအပေါ် ဤမျှအထိ နက်နက်ရှိုင်းရှိုင်း နားလည်သဘောပေါက်နေလိမ့်မည်ဟု လုံးဝ မျှေယ်လင့်မထားခဲ့ချေ။
ကျိမြန်က Stisen ၏ ပုခုံးကိုပုတ်ကာ ပြောလိုက်သည်။
"ဒါဆို ငါ ဘာလို့ ရှောင်ရှုကို ရွေးခဲ့လဲ သိပြီလား ..."
"သိသွားပြီ .. ရှောင် ငါ မင်းကို အရမ်းချစ်တာပဲ ..."
Stisen က ကျိမြန်ကို ကျော်ကာ သူ့ကို လာဖက်ရင်း အခိုင်အမာ ပြောလိုက်သည်။
"မင်းက တကယ်ကို သရုပ်ဆောင်ကောင်းတစ်ယောက်ပဲ အနာဂတ်မှာလည်း ကျိန်းသေကို ထူးချွန်တဲ့ သရုပ်ဆောင်တစ်ယောက် ဖြစ်လာလိမ့်မယ် ..."
ပရိသတ်ကလည်း တက်တက်ကြွကြွ ဩဘာပေးလိုက်ကြသည်။ တရုတ်ပရိသတ်များမှာမူ ပြောစရာစကား ကင်းမဲ့သွားကာ အတော်ကြာကာမှ ဂုဏ်ယူတကြီး ရေရွတ်လိုက်ကြတော့သည်။
[အရမ်းကို အံ့ဩစရာပဲ ဒီအချိန်လေးမှာတင် ရှောင်ကျားရှုက ငါ သူ့အပေါ် နားလည်ထားတာတွေကို လုံးဝကို ပြောင်းပြန်လှန်ပစ်လိုက်တာပဲ ]
အခြားသူများကလည်း ငေါ့တော့တော့ ပြောလိုက်ကြသည်။
[အရင်ရက်တွေက သူ့ကို ပညာရှင် မပီသဘူး ဇာတ်ညွှန်းကို ပြောင်းပစ်တယ်ဆိုပြီး အပုပ်ချတဲ့ လူလိမ်ကောင်တွေ ဘယ်ရောက်ကုန်ပြီလဲ သူတို့တွေ မြင်ရအောင် ဒီဗီဒီယိုကို ပြည်တွင်းဝဘ်ဆိုဒ်တွေမှာ တင်ပေးရမယ့်အချိန် ရောက်လာပြီ "နဂါးနှစ်ကောင်ရဲ့ ရာဇဝင်" ကို မနက်ဖြန် ရုပ်သံလွှင့်မှာဆိုတော့ ရှောင်ကျားရှုထက်ပိုပြီး စိတ်ပါဝင်စားမှုရှိ၊သရုပ်ဆောင်စွမ်းရည်ပြည့်ဝတဲ့ ဘယ်လိုစတားတွေများ ပါကြမလဲ စောင့်ကြည့်ရသေးတာပေါ့ အရမ်းကို ရင်သပ်ရှုမောစရာ ကောင်းလောက်တယ် ဟားဟားဟား ... ]
[ငါ တကယ် ငိုချင်နေပြီ ကျိလောင်ရှီးသာ မပြောရင် ရှောင်ကျားရှု ဒီဇာတ်ကောင်ကို ဘယ်လောက်အထိ တိတ်တိတ်လေး ပေးဆပ်ထားရလဲဆိုတာ သိမှာမဟုတ်ဘူး ဒါကမှ သရုပ်ဆောင်တစ်ယောက်မှာ ရှိသင့်တဲ့ စိတ်ထား]
Xxxxxx