أنتقام مباح

Part 26

#الـڪاتبه_نَجمه

#أنتقام_مباح

#البارت_السادس_والعشرون

نجماتي لاتنسون التصويت +والتعليق بين الفقره وأخرى +ومتابعة الحساب aa21tt

أتمنى ألكم قرائه ممتعه 💕

★★★★★★★★★★★★★

أنـت الـكـارثة التي أسير لها مُتلهفا للـوقوع ♥️

★★★★★★★★★★★★★

«رومــاڤ»

مر أسبوع ؏ جيتنه البيت جد عز الدين نوعاً ما الوضع هدوء صح ما يخلو من كلام مرت عمهم سعاد بس نَجمه وليث واگفين ألي أبد ميسكتون الها كلمه بـ كمله وياهه

ليث طول هل مُده يطلع ويرجع مايتأخر وسألته مره جاي تروح العز الدين او تشوفه يگول اي وهوه بخير بس ميقبل يگول هوه وين وشبي وليش هيچ بعد عنه وأحس الكل يعرف بمكانه بس ميحچون واني هم ما لحيت سكتت وهوايه تغيرت نظرتي العز الدين بعد ماحچتلي نَجمه عنه بس أنسا الصارلي بسببه

تعرفت ؏ بنت عمهم رحمه كل ما تكون قريبه عليه تباوعلي بنظرات ماعرفت أفسرهن وأفهم عليهن بس ما انكر هيه كُلش حبابه وهادئه وعمتهم وداد وبيبيتهم نفس الشي فقيرات وام ليث ماكو مارجعت هم زين اكثر شي مرتاحه اله

عائلتهم حيل چبيره أذكر بيوم اجينه گعدنه ونَجمه تحچيلي عنهم وتعرفني بيهم وأدوخ وترجع تعيد من جديد

نَـجمـه؛؛تربعي وفتحيلي مخچ

صدگ تربعت گدامها وركزت وياهه وهيه تعدد

نَـجمـه؛؛أبوي الچبير وعائلتنه تعرفيها يجي بعد أبوي
عمو سلطان زوجته سهى هسه مموجوده يم بيت أخوها وعنده رَحمه وسليم وسالم

قاطعتها وگلت

رومــاڤ؛؛لعد أذا رحمه امها يم بيت خالها هيه شكو هنا

نَـجمـه؛؛رحمه متحب تختلط وبيتوتيه وامها من تروح تضل هناك بالشهر وتاخذ ولدها وياها

رومــاڤ؛؛كبار الولد

نَـجمـه؛؛اي سليم اصغر من عز الدين باربع سنوات وسالم بعمر ليث هسه خلي اكملچ

گلت بحماس عبالك جاي تحچيلي قصه

رومــاڤ؛؛اي يلاا

نَـجمـه؛؛بعد عمو سلطان عمو حازم مرته هاي سعاد وعنده منير وايمام وتقى ورهف تلاثتهن مزوجات امهن قبل لا يعبر عمرهن الـ15 تزوجهن

رومــاڤ؛؛هاي شنو

نَـجمـه؛؛اي والله تگول ماريدهن يعنسن مدري شنو من تفكير

هزيت أيدي معاجبني وهيه هم تحچي وعافسه وجها أردَفت

نَـجمـه؛؛وبعد عمو حازم عمتي لمياء عدها وليد و مؤمل ومرتضى وورده ودموع وبعدها عمتي ورده هم متزوجه بس ماعدها خلفه

رومــاڤ؛؛عدكم أثنين وردات

نَـجمـه؛؛أي ورده بت عمه لمياء سمتها ؏ اسم عمتي ورده لان هنه عماتي توم اي يجي بعد عماتي عمي ابو ليث وتعرفين عائلتهم وبعده عمه وداد ما متزوجه وهاهيه

صفنت بوجها شويه وگلت

رومــاڤ؛؛هسه منو عمچ ومنو عمتچ وشگد همه

كفختني براسي ؏ كيف وحچت مال واحد زهگانه روحه لان هوايه عادت

نَـجمـه؛؛روماڤ وليييي مني

ضحكت وتركتها رجعت الواقعي ؏ خاله احلام تحچي ويايه

أحــلام؛؛الماخذ بالچ يا يمه يتهنه بي

ابتسمت وگتلها

رومــاڤ؛؛لا خاله ماكو شي بس أذكرت سالفه النَجمه

نبت من يمها سعاد لان چانت گاعده يمنه

سـعـاد؛؛هيه مو خالتچ هيه عمتچ أم رجلچ شكو هل عياره وخبصتينه خاله وخاله

مدري ليش ارتبكت من كلامها بس خاله أحلام أبتسمت واجت حضنتني گدامها وگالت

أحــلام؛؛بكيفها شتحب وشنو الي ترتاحله تصيحلي بي ماريدها تتقيد بشي بنيتي هاي

دمعت من حنيتها أذكرت امي عمرها ما تعاملت ويانه اني واخواتي وخواني بمحنه وكان جايبتنه من الشارع عمرها ما احتوتنه ولا حضنتنه ولا سمعتنه كلمه حلوه وهسه ام عز الدين مغرگتني بكلامها وحنيتها انهضمت وگلبي وجعني من اذكرتها حضنت خاله حيل وبچيت وصرت أشهگ صارت تمسد ؏ راسي وتحچي

أحــلام؛؛شمالچ أمي ليش هيچ مهضومه

زدت بالبچي اسمع سعاد تگلها

سـعـاد؛؛عيني هيه چنتچ عياره مو حمل الحچايه وصارت تتبكبك

ماردت عليها گومتني مشتني ودتني للمغسله بعدتني عنها وغسلت وجهي وأني أشهگ واشوف بس شفايفها تتحرك وتنفخ بوجهي كملت ولزمت ايدي وگالت

أحــلام؛؛تعاي وياي يمه

امشي وياهه أستغربت من دخلتني الغرفة عز الدين الموجوده هنا خاصه اله صار كم يوم هنا ما داخلتها اكو غيرها انام ونگعد ومخلصيها بيها اني ونَجمه وامها بس هسه ليش جابتني ألها وگفت ماكملت مشي وياهه افتهمت عليه گالت

أحــلام؛؛من تضيگ بيه الدنيا ومن احد يهضمني ألجأ العز الدين ومن هوه ماكو الجأ الاي شي يخصه لان ما شفت أمان اله يمه وما شفت راحه اله بوجوده تعاي يمه انه وياچ شكلنه نفس الضيم تعاي

دخلت بعد كلامها سدت الباب وراحت شالت البرده وفتحت الشباك واجت طفت الضوه صارت ضلمه بس ضوه القمر بنص الشهر كامل وضواه قوي والجو صافي وحلو يدخل الهوى والضوه من الشباك

واجت سحبت ايدي واخذتني للچربايه گعدت بالطرف ومدت ايدها فهمت عليها نمت وخليت راسي بحضنها صارت تمسح ؏ شعري بحنيه گالت

أحــلام؛؛شنهو المكدر خاطرچ بنيتي

مجرد ما حچت رجعت بچيت بحرگه خلتني ماحچت ويايه لحد ما سكتت وحدي مسحت دموعي وباستني براسي گالت

أحــلام؛؛احچيلي اذا تحبين

رومــاڤ؛؛خاله حنيتچ تبچيني

أحــلام؛؛ليش بنيتي ماتردين هيچ اعاملچ ترا انه بطبعي هيچ

لزمت ايدها وگعدت گدامها وگلت

رومــاڤ؛؛لا خاله تخبل سوالفچ بس أني لان مامتعودع عليهن ابچي

أحــلام؛؛ليش حبيبتي وامچ

بچيت وگلت

رومــاڤ؛؛أمي عمرها ماحبتنه ولا عاملتنه بطيب تكرهنا

أحــلام؛؛لا حبيبه ماكو ام تكره ضناها

رومــاڤ؛؛أكو لو شايفه أمي چان ماگلتي ماكو امي ترتاح بأذيتنه ترتاح من تشوفنه متعذبين فرحتها من تضرب وحده بينه وأذا شافتنه مرتاحين تنقهر وتضوج

أحــلام؛؛ ليش هيچ تعاملكم السبب؟؟

رومــاڤ؛؛ماكو سبب او أحنه مانعرفه لان من وعينه ؏ دنيا هيه هيچ ويانه وشويه زينه ويه الولد الا اني وأخواتي متواطنه بعيشة الله

أحــلام؛؛الله يهديها يايمه انه موجوده وحق علي حالچ حال تيجان ونَجمه وأعز وأنتِ مرت الغالي و وحيدي مكانتچ خاصه شتردين وشتحتاجين بس أمري ويجيچ

نزلت دموعي وگلت

رومــاڤ؛؛الأريده بس حنيتچ

أحــلام؛؛غاليه والطلب رخيص أذا ماحن عليچ منو يستاهل احنله

صرت أشهگ وطلبت شي من صدگ اني بعازته وماترددت لو للحضه اطلبه منها

رومــاڤ؛؛احضنيني خاله محتاجه حضنچ

جرتني الحضنها راسي ؏ صدرها وحيل ضامتني وتبوس براسي وتمسح ؏ ظهري وتحچي

أحــلام؛؛بنيتي أنتِ ماريد أشوف دموعچ انه أمچ وعيوني ترخلصچ حبيبه چا انه وين صاحلي تجيني هيچ بنيه مثلچ وتصير بنيتي نامي أمي نامي ارتاحي لاتشيلين هم الشي بعيوني مخليتچ

انفتح الباب ومدت راسها نَجمه گالت

نَـجمـه؛؛شكو يمه شبيها روماڤ

أحــلام؛؛مابيها شي بنيتي روحي وسدي الباب

طلعت نَجمه وسدت الباب ورجعت تسولف ويايه واني ؏ كلماتها ودفو حضنها غفيت فزيت وهيه تخلي راسي ؏ مخده همست

أحــلام؛؛اسم الله الرحمـٰن الزهره تحضرچ بنيتي نامي

رجعت تطبطب ؏ ظهري مثل الطفل من انومه هيچ صرت اغفي طلعت وسدت الباب طخ بخشمي عطره مدري شبيه مشاعري تخربطت گعدت اتلفت عبالي موجود بس ماكو انوب انتبهت ؏ روحي ليش أدور عليه شريد منه رجعت نمت واول ماتقربت للمخده أشتميت عطره بيها غمضت عيني واشم بيها حيل شويه وهم حسيت ؏ نفسي هاي شبيه شهل تصرفات بس صدگ ارتاحيت بغرفته تمددت تغطيت ولأول مره أغفه واني بهل راحه وهم غرگانه بتفكيري بي...

⭑⭑⭑⭑⭑⭑⭑⭑⭑⭑⭑⭑⭑⭑⭑

«نَـجمـه»

ليث ومنير مثل البانزين والنار هيچ أشبهم لان اذا انجمعوا تصير كارثه وما فد يوم عدوها سلامات و واحد وگع للثاني بالعكس واحد واگف للثاني ؏ كلمه وشگد يحچون وياهم ويترزلون بس ولا چنهم يرجعون زايدين اكثر من الاول

بعد أخر مشكله كرهت منير كره ما صاير لان ضربني الحقير صح كتله عز الدين وليث هم بس احس بعدني گلبي ما مرتاح النذل منو هوه ويمد ايده عليه شاف عز الدين ماكو واتمرجل عليه

روماڤ گاعده أربعه وعشرين ساعه بغرفة عز الدين تطلع بس ؏ شي التحتاجه وترجع احسن الها ما تسمع كلام يغث وأني وأمي محاوطيها مانتركها اذا طلعت لان عزوز الله ينطي وصه عليها لحد ماوگعت وذره من اللسانه وأمي ميته عليها راح اطگهم بعين اطيرهم

لا لا انه عيوني زرگ ماحسد

أجت عمه سهى مرت عمو سلطان چانت يم بيت أخوها اول مادخلت وشافتنه ضحكت واجت تبوس امي وتحضنها تحبها احسن من سعاد وانوب اجت عليه هم سلامها حلو ودخلو ولدها وراها سليم وسالم

انتبهت ؏ سليم يتلفت ويدور بعينه عرفت شيريد وهوه هم سأل

ســليم؛؛ تيجان مارجعت

هزيت راسي بـ لا وسكتت صعد الغرفته واخو ورا سليم من زمان رايد تيجام بس هيه ماتريده خطبها من ابوي ومن جدي ومن عز الدين بس هيه راسها وألف سيف ماريده لو اموت ما اتزوجه يابه ليش تگول

تيـجـان؛؛الي ينطي بأمه ينطي بيه

وهاي حچايتها لان مره صارت مشكله بين عمتي لمياء الحيه هاي تجي بس تسوي مشاكل وبوقتها سليم وگف ويه عمتي ضد أمه گدام الكل وحطها بموقف محرج من يومها گالت هذا الي يسوي بأمه هيچ وهيه امه لازم يداريها مثل الماي بالصينيه مو هيچ يسوي وهيه أمه وهيچ تعامل وياهه مو أنه يحترمني فـ قفلت عليه مارادته بس هوه يعشقها يموت ؏ طاريها

هسه هيه وين شصار بيها ما صار تالي نعرفه والگالت عليه روماڤ أخر شي صار قبل لا يخطفها عز الدين أخوها قُتاده عقد عليها ولهذا السبب عز الدين عقد ؏ روماڤ اوووي سالفتهم تخبل اكبر عاقل

هذا خطف اخت هذا وهذا حب أخت هذا وهذا اتزوج أخت هذا وهذا لازم يردها الهذا ويزوج أخت هذا وضالين نمشي ونصيح هذا منو وهذا منو وأحنه ما فاهمين أيدينه من رجلينه وشوكت تخلص سالفة هل ثارات المصخمه ماندري

صحيت من صفنتي ؏ صوت ليث وهوه يگلي

لـيـث؛؛ولا تبطلين طبع ابو صابر

نَـجمـه؛؛عود من أنتَ تبطله انه ابطله

فتح عينه ؏ وسعها واجه يركض عليه وانه بسرعه ركضت وهوه وراي ويصيح

لـيـث؛؛ولچ ادبسسسز عليممممن هاي

نَـجمـه؛؛عليك چا أنتَ حلال تغلط وانه حرام

لـيـث؛؛بس خلي اكضچ

تعبت من الركض حصرني بزاويه بالحديقه اجي منا هوه يجي منا ماگدرت اشرد گلت

نَـجمـه؛؛ليث عليك الله وخر خلي اروح

لـيـث؛؛أعتذري

نَـجمـه؛؛اعتذر منك يلا وخر

وخر من طريقي أنطاني ظهره جاي افوت شفته صافن التفتت يعاين ؏ منير واگف بالطرمه وأحنه بنهاية الحديقه ماحس اله سحبني حيل عليه حضني ولزگني لزگ بي أستغربت رعشه سرت بجسمي حاي ادفعه شدد ؏ حضنته ماقبل همست وصوتي يرجف

نَـجمـه؛؛ليث شـ شبيك و وخر حرام تلزمني

ماهتم الكلامي أبتعد عني كض أيدي ومشى بيه ومنير بعده ؏ وگفته عيونه حمر وخازرنه فتنه من يمه همس اله

لـيـث؛؛الي يحط عينه ؏ أشيائي أفگسها

وبحركه سريعه أنطا لطمه ؏ عينه ولا چنه كمل ودخلنه للبيت نترت أيدي منه شهل تصرفات شبي شكو دخل منير فاير ورانه وراح بوجها للصاله چانو گاعدين عمامي وجدي وگف وصاح

منـيـر؛؛جدييي أطلع شوف احفادك المحترمين شيسوون بره

دخلنه جدو وگف گاله ليث

لـيـث؛؛شمالك تنبح شكوو

عــباس؛؛ليث منير شصاير

متت بدمي من گال

منـيـر؛؛والله ياجدي ليث كاض هاي بت أبنك بالحديقه ويحضن بيها

جدو خزرنه أثنينه بس حچه ليث وعبالي راح يكحلها بس عماها ولاصها بالزايد

لـيـث؛؛أحضنها أبوسها أنتَ شلك غرض أختك لو أنه غريب عنها ومادري

عــباس؛؛لييييييث

لـيـث؛؛نعم جدي حبيبي

عــباس؛؛شنو هذا الحجي؟؟

انصدمت واحس وجهي راح يطگ من الخجل أتمنيت أختفي من گال

لـيـث؛؛جدي انه اريد نَجمه وهيه تريدني ننتظر عز الدين يرجع واخطبها وهاهيه فضت وراحت لأهلها

اعاينله شلون واگف حاط أيده بجيبه ومترهي ويحچي بعنتكه ويعاين المنير بطرف عينه گاله منير بعد ما انتفض من مكانه چنه تكهرب

منـيـر؛؛وشني تريدك وتريدها شهل حچي شو ماتستحون أنتم

عــباس؛؛ولك لويث شنو هل أستهتار الشايلي

انسحبت ؏ كيف وطلعت منهم دخلت للغرفه واسمع يگلهم

لـيـث؛؛هذا الموجود ومحد اله شي عندي

عــباس؛؛انه احاچي عز الدين وممنوع أشوفك قريب من بت عمك فاهم يو لاا

لـيـث؛؛فاهم جدي فاهم

حسيت صوته صار قريب فجأه أندفع الباب ودخل يا هذا مو هسه يگول الجدي فاهم حتى ما يتقربلي ضيقت عيني وگلت واني شايطه

نَـجمـه؛؛لك ليث شهل حچي هااا شنو أريدها شنو تريدني أنتَ صاحي وتدري بروحك شحچيت

لـيـث؛؛چا اطرش يعني

نَـجمـه؛؛بس أريد أفهم شوكت انه گايلتلك أريدك

لـيـث؛؛ميحتاج تگولين انه حاس بيچ

نَـجمـه؛؛ يااارب اطيني من صبر أيووب

حطيت أيدي ؏ راسي راح يجلطني ولا كأن مسوي شي يباوعلي ومبتسم فجأه أختفت ابتسامته وگال بجديه

لـيـث؛؛نَجمه بس يجي اخوچ أخطبچ وتوافقين دير بالچ ترفضين

رفعت حاجبي ماعاجبني كلامه وحچيت

نَـجمـه؛؛نعم نعم وشنو الي يجبرني أوافق عليك بلا وأنتَ شكو خاطبني شتسوي بيه يعني

لـيـث؛؛ماسوي شي شسوي قابل اخليچ يمي بالغرفه وكل ما اضوج اهفچ براجدي

نَـجمـه؛؛حتى أكسر ايدك

لـيـث؛؛شنو ولچ؟!

نَـجمـه؛؛عز الدين حبيبي اخوي يكسر أيدك

فجأه انفتح الباب ودخل جدو سحل ليث طلعه من الغرفه وصاح

عــباس؛؛ أحلااااااااام

وگف خازرني نزلت راسي مدري من شنو خايفه شويه ودخلت أمي تحچي

أحــلام؛؛ها عمي گول

عــباس؛؛هاي بتچ تكضيها وتضبيها لا والله وبالله الزمها انه اجسر ضلوعها

رفعت عيني الليث الواگف وره جدو ونزلت دموعي هوه شافني وگال

لـيـث؛؛جدي الصار انه السبب بي شعليها نَجمه

عــباس؛؛هسسسس صوتك ماسمعنه وين گاعدين وتتمعشگون ادبسسزيه ماخليتو لا أحترام الي ولا للبيت الگاعدين بي

لـيـث؛؛ياااااابه الصار غلطي انه الغلطان وگتلك انه رايدهها

همّ يحچون وأمي تخرط بخدودها وتعض بشفتها وتأشرلي بسيطه طلع جدو وهوه يوصي بيها بعصبيه

عــباس؛؛أحلام بتچ ماريد أشوفها صوب ليث لا انعل ساسهم أثنينهم كضيها وعلميها المچان الموجود بي هل مصخم هيَّ ماتگعد بي

طلع وأمي اجت سدت الباب وكفختني وتحچي بعصبيه وهيِّ راصه ؏ أسنانها

أحــلام؛؛شسويتي يمعزايه شصاير يمدهوره أحچي شماله جدچ هيچ مغتاض منچ

ماحچيت دنجت ودموعي تنزل رفعت راسي وتحچي

أحــلام؛؛عاينيلي ولچ دهر صابچ شكوووو فكي حلگچ وتحچي

حچيتلها ؏ موقف ليث بالحديقه وشلون حچه ويه جدي ويريد يخطبني من يجي عز الدين وهيّ خلصتها يا وصخام اخر شي گالت

أحــلام؛؛والله يا نَجمه و روح أبوچ اذا شفتچ واگفه يمه اله اذبحچ تنچبين وتبعدين عنه لحد مايرد أخوچ ونشوف شني سالفته هل مسودن

عافتني وطلعت ضليت اكل بروحي يابه لو يطيح ليث بيدي اله املخه هسه انه بيها عليها ترزلت من ورا لا ومصدگ روحه يريد يخطبني شمالني ماعندي عقل ارضى بيك يالخبيث..

مرت تلث أسابيع وچنه گاعدين بالحوش انه وروماڤ وأمي وبيبي وعمه وداد نسولف ومانحس اله انفتح الباب ودخلت عواطف وأبتسامة شر ؏ وجها...

⭑⭑⭑⭑⭑⭑⭑⭑⭑⭑⭑⭑⭑⭑⭑

«شَـجـن»

باد حيلي بعد ما شمرتني غمضت عيني ماگدرت افتح توقعت صدگ فَدك تسويها ابد ما اجه ؏ بالي ولو واحد بالميه تشاقه وبس تريد تخوفني سمعت صوت ضحكتها فتحت عيوني واشوفها گاعده گدامي تضحك من كل گلبها

باوعت بالمكان محد يمنه بس اني وياهه اخذت نفس بهدوء وزفرته وگفت وگلت الها

شَـجـن؛؛حقيره هم شقه

فَــدك؛؛عادي حبي الي يريد رسلانو يتحمل كلشي

ويه حچايتها انفتح باب غرفه أُسامه وطلع وجها صاير خريطه من الضرب عرفت قُتاده ورُسلان الي مسوين بي هيچ من وره سوالفه العوج بلعت بخوف من ضيق عينه ويباوعلنه بشك گال

أُسـامـه؛؛شعدچن گاعدات

فَــدك؛؛جعنه وانريد نسوي أكل

هز راسه وسكت راح گعد وسحبت فَدك حتى ندخل للغرفه گال

أُسـامـه؛؛مو تريدن تاكلن شو رجعتن للغرفه

جرت ايدي فَدك ورحنه للمطبخ وهيه تحچي

فَــدك؛؛اي صححح بس هاي شَجن ثولتني يلا تعالي نسوي

دخلنه للمطبخ وبقينه وحده صافنه بوجه الثانيه گلت

شَـجـن؛؛ولچ شنسوي

فَــدك؛؛يمعوده اي شي عسى ما لفات جبن بس خلي يسكت

صدگ سوينه لفات ودخلنه وهوه ؏ گعدته قبل لا نرجع للغرفه حچه

أُسـامـه؛؛شَجن البالچ شيلي وطلعي من راسچ وذبي بأقرب زباله لو تموتين ميصير

صرت أطگطگ من كلامه هذا شبي شيقصد مارديت واساساً شنو شگدر ارد دخلت بسرعه وفدك ورايه تعض بشفتها وتحچي

فَــدك؛؛ولچ صخام خاف عرف بيچ تصعدين

شَـجـن؛؛لا شلون يعرف ويسكت

فَــدك؛؛ هم صح بس كون اتوبين

سكتت منها انطيتها اللفه تاكلها لان ماجوعانه اني ورحت اندحست بفراشي وافكر بكلام رُسلان بنظراته بطوله بعطره بحركاته كله ؏ بعضه ماخذ گلبي ابتسمت بحب ؏ سوالفه ونمت مرتاحه بعد ما اطمنت عليه

گعدت الصبح فَدك ماكو اكيد رايحه للمدرسه هيه ما تركت بقت تدرس بس اني گعدت گمت لميت فراشاتنا وعزلت الغرفه وطلعت أسمع صوت جاي من غرفة بيبي مارحت شفت رحت غسلت واريد اسويلي ريوگ وهيه صاحتني

غـنيـه؛؛بييبي شَجون سوي چاي

سويت چلي ورحت أشوف منو هنا دخلت ضحكت من شفتها رحت حضنتها وهيه هم بادلتني گالت بهمس

تيـجـان؛؛رُسلانوو سحلنه حتى نجي يريد يشوف بيبي

ضحكت درت سلمت ؏ قُتاده ورُسلان الي يباوعلي ويبتسم من جوه الجوه رحت صبيت الچاي وجبته جاي انطيهم واسمع بيبي تحچي

غـنيـه؛؛اي يمه هيه البت حليوه وصغيره ملگاهه يخبل مثلها ومبينين العالم ولد اصول وحموله

استغربت ؏ منو جاي تحچي رُسلان باوعلي بنظرات خبيثه وگلها

رُســلان؛؛اي بيبي شسمها شگد عمرها شنو مواصفاتها

قُـتـاده؛؛اي مو هيه سياره وتريد مواصفاتها

غـنيـه؛؛خلي خلي يسأل البنيه أسمها ضي بيضه ومربربه وعمره يبيبي ماعرفه

رُســلان؛؛اويلي مربربه اي بيبي سوي الي تشوفي مناسب

غـنيـه؛؛يعني هاي هيه نخطبها الك

هوه يحچي ويباوعلي بأبتسامه صرت افور وافور بركان وصار يغلي بداخلي هزيت راسي اله وگلت

شَـجـن؛؛اي بيبي بس من ترحين اخذيني وياچ

رُســلان؛؛لا خو تاخذني اني حتى اشوف مرتي الحلوه المربربه

خزرته ورصيت ؏ اسناني وگلت

شَـجـن؛؛ ايي بعدين تشوفها مو هسه

هز راسه بقبول وگال

رُســلان؛؛خلص مثل ماتشوفين بنت عمي

ورجع يستفسر من بيبي بعد ماتحملت نزلت دموعي ومسحتهن بسرعه ودنگت اسمعه يحچي بحرگه

رُســلان؛؛ولچ اشاقه وروح ابوي اشاقه خرب اشتعل عمي شَجن باوعيلي خرب ابوچ والحسين اتشاقه لا تبچين

اجت تيجان گعدت بصفي تضحك حضنتني وتهمس

تيـجـان؛؛يشاقيچ ولچ عليمن البچي هوه يگدر يفكر بغيرچ حتى يروح يتزوج هوه غير تفكيره بس بشجونه

مسحت دموعي وعيني صارت عليّ يباوعلي بقلق درت وجهي منه رجعو يسولفون بيبي ضغطها يصعد وينزل فـ جايين يشوفوها كل شوي اشوفه الگا صافن عليه وادير وجهي منه صدگ ضوجني وكرهوني بالبنيه وهيَّ معليها شويه وگامو حتى يرحون طلعو قُتاده وتيجان وهوه بقى اخر واحد خله حتى بيبي طلعت واني هم جاي اطلع ماحس اله سحبني وسد الباب وخلاني ورا حچيت بخوف

شَـجـن؛؛عزززا رُسلان هاي شجاي تسوووي وخر فدوه

احچي وأدفع بي حضن وجهي ويباوع بعيني کال

رُســلان؛؛بس باوعي بعيوني تشوفين غيرچ

اني اعرف هوه يشاقه وأعرف شگد يحبني بس مو بيدي حيل انقهرت وضجت من حچه ويه بيبي گلت

شَـجـن؛؛ليش هيچ حچيت هيچ

رُســلان؛؛أحب اشوف غيرتچ الي تخليني اسعد أنسان بهل دنيا احبچ شَجن وعاشگچ مو بس حابچ ولچ شكو بنت أنخلقت وراح تنخلق ما ياخذن مكانچ رُسلان انخلق الشَجن وبس تحرم تصيرلي مره غيرچ فاهمه

يحچي ودموعي تنزل ؏ كلامه و؏ حبه بدون ماحس بنفي مالگيت روحي غير حاضنته وهوه يگول بحرگه

رُســلان؛؛يلا تشعلك وتسمط أجدادك ومن تحچي وياهه تگلك أصبرر شصبببر هااا

بعدت اضحك باس راسي وگال

رُســلان؛؛يلا حبيبي لا تضوجين اني الچ وبس

هزيت راسي وبعدت منه اندفع الباب ودخل قُتاده لزمه من علابيته ويحچي

قُـتـاده؛؛أنتَ وتالي وياك اله تصير مصيبه يلا ترتاح

متت من الخجل ختلت ورا وهوه يگله

رُســلان؛؛خاب دوخر مني هسه شمسوي هوه بس حچيت وياهه قابل نمت

قُتاده بسرعه خله أيده ؏ حلگه بس حيل ضربه ماخلا يكمل ويكله

قُـتـاده؛؛اطيح حضك ارعن انچب وامشي انگلع

سحله طلعه من الغرفه التفت عليه رُسلان شمرلي بوسه بالهوه ضحكت ؏ سوالفه طلعنه كلنه بعدنه بالصاله طلعت عمه أمنه شافتنه واگفين گالت

أمـنـه؛؛ اليوم لافين عدنه

قُتاده ماجاوبها سكت وبيبي رادت تحچي رُسلان حچه قبلها

رُســلان؛؛احنه كل يوم لافين بس هيچ بمزاجنه مخليج تسرحين وتمرحين

أمـنـه؛؛انچب أدبسز اكسر راسك ولك نسيت اني منو

رُســلان؛؛لا لا شلون انساچ اكو واحد ينسه الحيايه الي بحياته ميصير مو عمه

خزرته وقُتاده باس راس بيبي وگال

قُـتـاده؛؛يلا بيبي نروح وهم نجي نشوفچ

تقدمت تيجان هم سلمت ؏ بيبي منحس غير عمه جرت تيجان من حجابها بحيث شعرها من كدام طلع وهيه تصيح

أمـنـه؛؛امشي ولي لچ لا توصلين الامي وتوسخيها يا دايحه ياهجامة البيوت من شفناچ ما شفنه كل خير

فحطت من البچي تيجان و وجها صار احمر قُتاده غطاها بجسمه ويعدل بالحجاب ومانحس اله رُسلان هجم ؏ عمه يريد يضربها وهيه وگفت وره بيبي وتصيح

أمـنـه؛؛دمد ايدك عليه اله اكسرها واردك منين ماطلعت هيه هاي امك ماجابتلنه غير الزباله

رُســلان؛؛والله ماكو غيرچ الزباله واليوم اذا ماعدت تربيتچ اني مو زلمه اصبريلي

يحچي فاير وقُتاده لزم أيد تيجان وكال العمه بغضب

قُـتـاده؛؛ وروح ابوي ما أعديها الچ بس اصبري عليه

واخذ تيجان وطلع اندارت عليه وعاطت بيه

أمـنـه؛؛امشي أنتِ العاشگه وتتختلين ويه هل نذل يجي ابوچ واني اخلي يعلمچ

رُســلان؛؛اني اليوم گاعدلچ واريد مره سوي شي واذا شَجن انطخت طخه حتى لو بدون قصد اهجم البيت ؏ راسچ

وصدگ گعد بالصاله خله رجل ؏ رجل وطلع باكيت الجگاير ورث جگاره وحچه

رُســلان؛؛يلا روحي الأبوها خلي يعلمها

أمي أجت چانت بالسوگ صاحت عليه

يـاسميـن؛؛أمشي ولي الغرفتچ

دخلت واني مرتاحه مدام هوه هنا محد يگدر يفك حلگه ويايه بقيت گاعده بالغرفه ماطلعت..

⭑⭑⭑⭑⭑⭑⭑⭑⭑⭑⭑⭑⭑⭑⭑

«تيـجـان»

حيل أنقهرت من جرتني انه شعليه بيهم وشنو الي مسويته الها حتى الي اتاذو بسببي ما عادوني هيچ اله هاي مدري شبيها بس تشوفني تنگرص وتضل تصيح وتغلط وهاي مو اول مره انحط بهيچ موقف وياهه وحده شرانيه وعدواني متحب الخير الاحد

طلعنه منهم وقُتاده حاضني ويمشي بيه رُسلان ضل يمهم ما اجه ويانه صعدنه بس بالي يمه اعتبره اخوي خاف يجي عمهم ويتعارك ويا اول مادخلنه سد الباب قُتاده گتله والشهگه بعدها بصدري

تيـجـان؛؛قُتاده لـ لعد ر رُسلان ما يجي خـ خاف يتعارك و ويه عمك

أبتسم ؏ كلامي لان أشهگ اتقرب حضن وجهي بيده ويحچي

قُـتـاده؛؛اوووف شلون اني بالحنينه ولچ اريد اكلچ

تيـجـان؛؛هسه انه وين وأنتَ وين اکلك ؏ رُسلان

قُـتـاده؛؛طبهم مرض هسه تلگي گعد الهم گعده راح يكرهم بعيشتهم خلي يستاهلون تعالي هسه أنتِ

اجه عليه سحب الحجاب مني لفه ؏ أيده ومشاني للغرفه مال بنات كعدني ؏ چربايه وگال

قُـتـاده؛؛وين وجهتچ هل همجيه

تيـجـان؛؛جرت شعري حيل بس مو توجعت ضجت لان جرت حجابي

ضل صافن بوجهي يتأملني ابتسمت وگلت

تيـجـان؛؛شكو

قُـتـاده؛؛اني شسويت وحصلتچ وين ألگه باخلاقچ بجمالچ بهدوئچ برزانتچ بنزاكتچ

تيـجـان؛؛انه اجيتك شارده مو أنتَ حصلتني

قرب وجها عليه وهمس

قُـتـاده؛؛ميته عليه واجيتي مو

تيـجـان؛؛لا والله بس طلعت وأنتَ صرت گدامي اهوو جاي ابررلك أنتَ مو وياي چنت

قُـتـاده؛؛حتى لو ما جايتني اني اجيچ واحطچ بروحي وفنه اليوصلچ

هوه يحچي گام جاب المرهم مال حروق واجه گعد يم رجلي ردت اسحبها ماقبل كضها وگال

قُـتـاده؛؛تؤ عوفيها

گلبي صار يدگ حيل من رفع دشداشتي كل ميكون قريب مني ارتبك هيچ بعدت أيده وكلت

تيـجـان؛؛ اطيني قُتاده اني اسوي

لزم أيدي الي لازمه ايده بيها باسها وگال

قُـتـاده؛؛أنتِ بس أكعدي وارتاحي واني اسوي لا تخافين والله نيتي صافيه

وخرت ايدي منه رفع ثوبي لحد نهاية الحرگ الي صاير بفخذي احس اريد أختفي وهوه ماهتم عينه بس ؏ حرگ خله من المرهم عليه وصار يدهن بي ؏ كيف قشعر جسمي من ملمس اصابيعه ؏ رجلي كمل وعاف رجلي ماغطاها اجه گعد بصفي عبر ايده ؏ چتفي حضني الصدره وانه حسبالك چنت منتظره هل لحضه ضميت وجهي بصدره واحس بصدره يهتز رفعت راسي گال

قُـتـاده؛؛شبيچ راح تموعين ترا هوه بس دهن وخليته المن هل خجل كله

تيـجـان؛؛ها لا ماخجلانه

قُـتـاده؛؛يعني أنتِ متخجلين

تيـجـان؛؛لا والله أخجل

طگها بضحكه رجعت راسي الصدره گال

قُـتـاده؛؛اموت ؏ ضياعچ بين ايدي

تيـجـان؛؛قُتاده كافييي

قُـتـاده؛؛شو بلا باوعيلي

رفع راسي هوه باوع بعيوني بلع ريگ وگال

قُـتـاده؛؛أنتِ مو مرتي وحلالي

رجف گلبي وهزيت راسي بـ اي مشى ايده بهدوء على رگبتي وهوه يحچي

قُـتـاده؛؛يعني كلشي اسوي وياچ مو حرام لان أنتِ مالتي الي وبس حبيبتي ومرتي وصديقتي

غمضت عيني واهز براسي اي خليت ايدي ؏ صدره وهوه صارت ايده وره راسي سحبه عليه فتحت عيوني ؏ وسعها من قَبلني بهدوء وصار يتفنن بقُبلته ويسحب بيه اله يقربني أكثر سحب أيدي الي على صدره حطهم ؏ ركبته حاوطتهم بيدي رجعت غمضت فصلت ويا من حس عليه اختنگت واريد هوه يلا أبتعد وانوب رجع بوسني يوسات متقطعه بكل وجهي همس قريب يم اذني

قُـتـاده؛؛هذا ضياعچ الاحچي عليَّ فتحي ياروح قُتاده

فتحت عيني أنتبهت عليه گاعده بحضنه شوكت گعدت هنا حط راسه برگبتي تنفس بشوغة روح وهمي

قُـتـاده؛؛أحبچ وحق علي

ابتعد ويباوع بوجهي عض شفته ورجع گال

قُـتـاده؛؛هاي بس بوسه وهيچ صار بحالچ أحترگ عز الدين

ضربته ؏ صدره وگلت

تيـجـان؛؛لا تغلط ؏ اخوي

قُـتـاده؛؛اويلي لو مو اخوچ اله من باچر اسويلچ عرس

ضحكت وهوه نزلني ؏ چربايه وگام وگف عدل قميصه من سمع الباب انفتح وانسد كال

قُـتـاده؛؛هذا اكيد رُسلان اجه

جاي يطلع من الغرفه گلت

تيـجـان؛؛قُتاده

التفت عليه وهمس بابتسامه مريحه مرسومه ؏ وجها

قُـتـاده؛؛ياعمره وكل هله

تيـجـان؛؛أحبك

ضحك وگال وهوه يطلع

قُـتـاده؛؛ياااعلي صبرني

گمت لفيت الحجاب واسمع رُسلان يكله

رُســلان؛؛أنتَ هم تريد الصبر بلا اني ماعاقد عليها واريد الصبر أنتَ شبيك

ماسمعت صوت قُتاده بس رُسلان صاح بألم

رُســلان؛؛ااااخخخخ اشتعلت صفحتك

طلعت واشوف رُسلان كاض ايده بألم من طلعت گلت

تيـجـان؛؛هاي شبيك

رُســلان؛؛مرت اخوي الحنينه كضي رجلچ بس يضرب انطي من حنيتچ

طفر قُتاده عليه وهوه شرد الغرفته رحت للمطبخ اسوي غده واروح وارجع طلع رُسلان مبدل وگال

رُســلان؛؛رايح الجدي

قُـتـاده؛؛شكو اگعد هسه بس نتغده نطلع

رُســلان؛؛ارجع ويه بهاء

قُـتـاده؛؛بهاء جاي أنتَ شكو مولي

رُســلان؛؛اريد احچي الجدؤ وعمي جلال ؏ عمتك اله اعيد تربيتها

قُـتـاده؛؛خوش روح بس مو تتعطلون ارجعو حتى نروح نشوف وين بلا نلگه البنات

طلع رُسلان كملت الغده وصببت وقُتاده كل شويه يذبله حچايه يخليني احير وين اطي وجهي لحد ماكملنه وسويت چاي وغسلت المواعين وطب رُسلان و ويا بهاء يضحكون گالهم قُتاده

قُـتـاده؛؛خير

رُســلان؛؛اسمع

سلمت ؏ بهاء وخمس دقايق بين ماجبت ماي اخذه مني قُتاده وگبت العيطه جوه وصوت عمتهم تصيح

أمـنـه؛؛ماروووح اريد ابقى هناااا يمممم امي معليك بيه

نزلو الولد تلاثتهم باوعت من الشباچ عمو جلال سحلها وصعدها بالسياره ورجع ؏ امه باسها ومدري شحچه وياهه وطلع شغل السياره وراح بس نظرات أمنه ابد ما تبشر بخير گلبي ما ارتاح الها وحسيت راح تسوي شي

رجعت للمطبخ شويه ودخلو صبيتلهم چاي شربو وطلعو وقُتاده قبل لا يطلع وصاني

قُـتـاده؛؛تيجان الباب ممنوع منعاً باتاً ينفتح لو ينهجم مو يندگ تگعدين بالغرفه ؏ ما أجي ماشي حبيبتي

هزيت راسي بقبول وگلت

تيـجـان؛؛حاظر

باس راسي وطلع قفلت الباب وبقيت وحدي گاعده مر الوقت لليل وانفتح الباب ؏ سريع طلعت من الغرفه واشوف رُسلان دخل الغرفته اخذ سلاح وطلع يركض حتى مالحگت اسأله بس صاح

رُســلان؛؛خويه تيجان اقفليي الباب

طلعت جاي اسده واقفله ماحس اله اندفع عليه حيل الدرجه وگعت بالگاع رفعت راسي جمد الدم بعروگي من شفته واگف گدامي ونظراته كلها شر وراسم أبتسامه خبيثه ؏ ثغره صحت بخووف

تيـجـان؛؛قُتاااااده الحگلليييييي

سد الباب وحط ايده على حلگي كاتم صياحي...
.
.
.
.
.
.
.
.
.
......يتبــ؏

شنو رأيكم بالبارت؟؟

توقعاتكم منو اجه التيجان؟؟

تعالو للتلي راح انزل صوره الليث. https://t.me/nagmatayat

انستا aeat.t21

لاتنسون التصويت 💋💋

نلتقي ببارت اخر في حفظ الرحمـٓن ❤️‍🩹