بين انيابهم

••العثــرة السابعــة عشـر••

بســم ﷲ الرحمــن الرحيــم

السـلام عليڪم

#بيـن انيابهـم

#بقلمـي أنـا: زهــࢪاء

حساب الانستا: zaii1_8

لا تنسون التصويت +التعليق بين الفقرات

+احبڪم زهوراتـي 💋

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

تــــــــاج

دخلت للبيت بوقت متأخر طلع هذا الي اسمة سوما يطوطح و لابس فستان مادري دشداشة اني ما لابسة مثلها هزيت ايدي وعبرتة بسرعة وصعدت فوك دخلت للغرفة وقفلت الباب

ذبيت ملابسي و اتمددت بالفراش جريت الجنطة وطلعت الموبايل فتحتة وضليت اكلب بملل ما اعرف وين اروح وحتى مابي برامج ولا اعرف شي بي بس اكص صور واتصل

دخلت على الصور الي اخذتهن من بيت ابتهال وضليت اكلب بيهن بملل مابية حيل اقرة شي الحد ما وصلت الصورة عدنان وفايلة انتبهت السبب الوفاة اطلاق نار عقدت حواجبي بأستغراب اني اتذكر ضربتة بسجين معقولة ميت بغير سبب لو محورين بالسالفة؟

ضليت افكر الحد ما مليت وكلت بعدين الكة الجواب وقتت المنبه بالاربعة الصبح و خليت الموبايل على الشاحنة الاخذتها من سوما

غمضت عيوني بتعب ونمت ما لحكت ارتاح ودك المنبه كمت بسرعة واني النعسة بعيني ومن التعب احس على يا ساعة اطيح اخذتلي ملابس وطلعت غسلت وبدلت.... رجعت اخذت موبايلي و الجنطة والفلوس وطلعت قفلت الغرفة وخليت المفتاح بالجنطة نزلت الدنيا بعدهي مضلمة طلت السجين وكضيتها بأيدي استعداد الاي شي طلعت من البيت ومشيت بهمة وبسرعة الحد ما عبرت المنطة من طاحن رجلية صرت بمكان مو مشبوه والشمس بدت تطلع ضميت السجين و اجرت تكسي وصعدت

تــــــاج ... الكراج (........)

هز راسة وهمزين جان رجال جبير

وصلني للكراج وصعدت للبصرة بكوستر كعدت بأول كرسي وحدي جان همي ڪُلة اعرف خبر عن شُـــــذير ومو مهم العواقب واعرف ڪُلش زين لليل يلا ارجع واحتمال ابو المطعم يبطلني بس ما يهمني اهم شي خبر عنها وكلتها قبل لو اعرف ابيع نفسي حتى اجيبها يمي ابيعها بدون تفكير

دفعت الكروة وخليت راسي على الجامة حضنت جنطتي وغمضت عيوني ونمت بتعب ومن كد ما تعبانة ما فزيت الة واحنه قريبين من البصرة تقريباً نهاية الرميلة

وصلنة للبصرة نزلت واني ما رايدة ارجع هنا لو ما الي عزيز بيها

من اول ما دخلت الها ما حصلت غير المشاڪل والضياع  اجرت تڪسي وانطيتة اسم المنطقة البيها البيت فتحت الجنطة وطلعت موبايلي وفتحتة باوعت للساعة بـ12 ونص الضهر اتنهدت ورجعت ضميتة وطلعت الكروة وصلنة للفرع كتلة ينزلني نزلني وانطيتة فلوسة ونزلت مشيت بأتجاه البيت دكيت الباب اكثر من مرة واني ادعي الڪة هالمرة استجابة من ابتهال وتلين وتقبل اخذها وياي

انفتح الباب وطلعت بنية اول مرة اشوفها دفعت الباب ودخلت ركض وراي وحجت.

.... وين داخلة

درت عليها وباوعتلها من فوك الجوة

تــــــاج.... دروحي

دخلت للبيت وهاي ضالة تجوعر وراية وكفت بالهول وصحت

تــــــاج.... ابتهال وينج

حجت هاي البنية

.... ابتهال ما موجودة طالعة

تــــــاج.... مشيها على غيري حبحب ابتهال ما تطلع بالحر تخاف خاف مفعول الخلطات يروح

انفتح الباب وطلعت ابتهال تفرك بعيونها شافتني وحجت بأستهزاء

ابتهال... مو كتلج مرجعج الي

جريتلها زيج وضحكت

تــــــاج.... بأحلامج حبي لو ما اختي عندج فلا اجي الج.... اختي وين؟ خابري الهذا الي دفعلج فلوس اريد احاجيها يلا خابري

عبرتني وراحت كعدت على التخم وخلت رجل على رجل كتفت ايدية وحجيت بنفاذ صبر

تــــــاج ....جاوبيني اختتي وين

ابتهال.... الفلوس وينهن جيبيهن واني اجيبلج اختج

اتنهدت وحجيت حتى انطيها امل

تــــــاج....دا اجمع بالفلوس بس اريد اطمأن عليها

سندت ضهرها على التخم

ابتهال..... فلوس ماڪو خبر عن اختج ماڪو اشوف الفلوس كدام عيني وساعتها يصير خير

تــــــاج .... شنوووو الي يصيرررر خيررررر منو يڪوووول ما داتضحڪييين عليّ وتأمليني عالفاااضيي؟؟ اررريد اسمع صوووتها اي شي عنهااااا ما اريد اتأملللل خالي بلاش انطيني رقمممة واني اتصل بي شتردينيي اصدك بوووحدة ***** من انكسس الخلق

جاوبتني برهاوة حتى تفور دمي

ابتهال....هه جاي تجاوزين وكتلج قبل اي غلط من عدج اختج في خبر كان بح اطير محد يعرف الها ڪاع جيبيلي الفلوس وانطيج اياها

تــــــاج ... واذا طلعتي دا تجذبين؟

ابتهال.... عود بوڪتها النة غير حجي

تــــــاج.... صايرة محترمة مو من عوايدج؟ وداعت اهلي يا ابتهال لو عرفت داتلعبين بذيلج ساعتها دمج النڪس يملي البيت

طلعت من البيت واني اغلط عليها ودمي يفور درت اريد ارجع وطلعت هايه البنية حجت

.... تڪول ابتهال اذا بعد اجت وما جايبة الفلوس لا تجي احسن

تــــــاج.... اشوف ابتهال سمنانة اثاري هواي تاڪل نعل ولي عني انتِ وياها لا اطلع حرڪة ڪلبي بيجن

طلعت من البيت ورڪعت الباب بعدني واڪفة و صفت سيارة قاسم نزل منها وابتسم بحقارة اول ما شافني اجيت اعبرة

قاسم.... وين وين هسه نور فرعنة ههههههه

عبرتة ومشيت بالفرع شوية ودرت راسي شفتة دخل للبيت رڪضت بسرعة بأتجاه سيارتة طلعت السجينة وفشيت اول تايرين ابتسمت بشماتة وشخطت سيارتة من الجانبين رفعت راسي وڪلبت شعري وكملت طريقي واني افر بالسجينة

وصلت البغداد الساعة بالسبعة ونص بالليل ميتة من التعب واتمنى اتمدد بالڪاع وانام ڪبل رحت للمطعم اول ما دخلت الة صعدت فوك الغرفة المدير قبل لا ادخل سويت نفسي جنت ابجي دنكت راسي و دڪيت الباب ودخلت بعدني ما حاجية صاح

...... رجعيي الراتب وشغلج عندي انتهى

رفعت راسي وحجيت ببراءة مصطنعة

تــــــاج.... استاذ عمي اندعم وبس هوَ ضال من اهلي

حجيتها وعصرت ادموعي اريد ابجي ضلن عيوني تتنقل عليه وانتضر اي حجاية من عندة

... وعمج من مات م

قاطعتة

تــــــاج... لا لا استاذ ما مات بس اندعم يمه بيش طالبة عسى يومي قبل يومة

.... اقصد من اندعم ما تعرفين تخابرين على واحد من زملائج لو على رقمي بيج خير بس جاية تتبجبجين

فرڪت اصابعي بتوتر

تــــــاج... مو ما عندي ارقامهم ولا حتى رقمك

هز راسة بقبول

.... هسه شلون صار عمج؟

صفنت وجاوبتة

تــــــاج.... ما بي شي بس عندة فطر بالجمجمة وايديه انڪسرن خطية سودة عليّ بية ولا بيه

هز راسة بأسف وحجة

.....هسه هوَ بالمستشفى اذا تردين اكول الواحد من الولد يروحلة

صحت بسرعة

تــــــاج.... لا لا استاذ اني اڪفي واوفي

... هذا هوَ لا تجين باجر وطمنيني عن عمج كلشي ولا هالجمال يبجي

مسحت ادموعي وباوعتلة بنرفزة لازم يخرب شي الشايب الشويب كرشة طافر سبع امتار ليڪدام اشرلي اروح اتشڪرتة ونزلت جوة اجيت اطلع من المطعم وڪلت خلي اروح اشوف الاوضاع بالمطبخ

رحت للمطبخ لڪيت رؤى ڪاعدة وساندة ضهرها عالحايط بتعب ومغمضة عيونها حست بية وفتحتهن رفعتلي ايدها وسوتلي هلو

تــــــاج... اهلاً

رؤى... وين جنتي يمعودة انتضرج من الصبح

تــــــاج.... جان عندي ظرف بس ليش؟

فتحت عيونها عدل وعدلت ڪعدتها

رؤى.... لڪيتلي شغل ثاني عد مرت خالي وعدها مكان فارغ تردين لو لا اني اول ما سمعت اتذڪرتج

تــــــاج.... شنو نوع الشغل

رؤى.... بصالون

طكيتها بضحكة وجاوبتها

تــــــاج.... ههههههههه دادا اني حمرة ما مخلية بحياتي ڪُلها ترديني اشتغل بصالون شطلعهن
بطانية احبك؟

رؤى..... ههههه هسه مو الة تخلين مكياج مثلاً تنضفين او تحفين اني استلمت صبغ الشعر لأن اعرف بهايه الشغلات

اجيت اجاوبها وحسيت الم قوي ببطني ڪضيت بطني بألم واستغربت شنو سببة طكيتها بصفنة وووووووووين يلا استوعبت الدورة الشهرية هيَ ما تجيلي الة بالسنة حسنة حتى مرات انسة نفسي اني بنية

رؤى... ها عمري شبيج

تــــــاج.... احم لا ما بية شي المهم اي اشتغل بس من شوكت يبدي الشغل خو ما يتضارب وية شغلنة هذا؟

رؤى... يبدي بـثمانية الصبح وينتهـي بثنتين اني ڪُتلها على هذا الوقت ولو هيَ لو عليها للتسعة بالليل يلا تخلينة نطلع

تــــــاج.... لعد قبلت بهالسهولة؟

رؤى.... لا طبعاً تڪص من الراتب بس اكو جانب زين الاڪل من عدها

همهت بأي

تــــــاج... وشڪد الراتب؟

رؤى.... 150 اذا شهري واذا يومي 5 الاف

تــــــاج.... شبيهم هذول يعني اندك ساعات واحنه واڪفين على مود 5 الاف زين وين نوديهاا؟

دخل خطيبها شايل صحونة هوايه خلاهن على السنڪي كامت اتريد تغسلهن حجة بنفي

..... لا اكُعدي تعبتي اليوم اني اغسلهن

ابتسمت الة وڪعدت رجعت نضرها الي وحجت

رؤى.... بعد الي يريد شي يعوف شي هسه ما كلتي تردين او لا؟

اتنهدت وهزيت راسي بأي اول وتالي لازم اشتغل لأن 150 وحدها مالت المطعم ماتڪفي حته الاجار وبلڪي احاجي هاي انغام واتخلي الاجار 100 الف

تــــــاج..... هذا هوَ شوڪت نبدي؟

رؤى.... باعي باجر من الصبح تعاي الي الشارع ***** واني اجيج وانروح سوة

تــــــاج... تمام بالسبعة اني هناك يلا باي عندي شغل

رؤى.... باي

درت وجهي ومشيت اجيت اطلع والتفتت الها وحجيت بتردد

تــــــاج.... شڪراً

بسرعة درت وجهي وطلعت من غير لا ترد طلعت من المطعم واني لازمة بطني بألم مشيت بالشارع ادور على ڪوزمتك او محل يبيع شغلات نسائية وكون بي بنية

مشيت مسافة طويلة وانتبهت الڪوزمتك دخلت الة جان اڪو رجال واڪف ومنطيني ضهرة اجيت اطلع والتفت الي فتحنة عيونة بصدمة رجعت ليورة وهوَ صاح

..... هاااااي الحررررامية

بسرعة درت ورڪضت بكُـل سرعتي طلعت من المحل وعبرت الشارع والسيارات تتخاطف وادڪلي هورنات وڪفت على الرصيف وهوَ واڪف بباب المحل ومتخصر وبيناتنة شارع صاح بصوت عالي

..... الحرررامية وووين جوزلاااني

صحت بصوت عالي

تــــــاج..... انيييي مو حراااامية فاهممم بعدين شبايڪة منك هووووَ جوووزلان وفااااارغ مابيي ولا ربععع يعضة الجلب وينجلللب مثلل صاحبة

.... جيبييي الجوزلان

تــــــاج.... لا تصيييح

....ااااااه لا خاااف ما قابلة؟

تــــــاج....اااااي دا تجاوز وتڪُلي الحرامية ما بايكة منك شي هوَ جوزلان وفاااارغ مثل صاحبة

..... هسسسه منو الجاي يتجاوز على الثاني؟

تــــــاج... هسه شخبصتنة بجووزلانك هذا فارغغغ وهيج سويت لو بي فلوس يمكن جان سويتلة فاتحة

...... جيبيي الجوزلان جاي اكلج بي جنسيتي جيبيييي

تــــــاج..... اي هسه انطيك اياه قابل ميتة عليه اوي هم فارغ وهم يڪُلي بايڪتة

فتحت جنطتي ومديت ايدي ادور رفعتلة نضري وصحت حتى يسمعني لأن صوت السيارات عالي

تــــــاج.... اسمع يمڪن ما جايبتة

.... طلعي الي من جوة الڪاع لا هسه اعبر الج واحرك اليوم الشفتج بي

طلعت الجوزلان من الجنطة رفعتة الة وحجيت

تــــــاج.... هذا جوزلانك؟

.... لازم ما تعرفينة لأن هواي بايڪة

تــــــاج.... خلصني اي لو لا

..... اي

صحت بصوت عالي
تــــــاج.... وجعي

دنكت خليتة على الرصيف ورجعت وكفت وصحت

تــــــاج.... تعال اخذة

حجيتها وطفرت ارڪض بالافرع اشتريت الشغلات الي اريدها من محل ورجعت للبيت اڪلت بسڪت وعصير ولفيت راسي ونمت

ڪعدت الصبح لڪيت الدورة مشرفة اتنهدت وسبيت ابتهال ڪمت اخذت احتياجاتي وغسلت وبدلت اخذت غراضي ونزلت من البيت رحت ڪبل للمڪان الڪالت عليه رؤى وڪفت على الرصيف واباوع بعيوني نفخت بضجر وحيل اتأخرت عليّ
شوية وشفتها دا تعبر الشارع وصلت الي رادت تحجي سبقتها

تــــــاج.... اتأخرتي

رؤى.... صباح النور

تــــــاج....هلا.... وين مڪانها؟

رؤى.... بالفرع تعاي نتمشى

مشينة اني وياها ودخلنة بفرع

رؤى.....اذا تسألج انتِ شڪد عمرج ڪليلها بالعشرين

تــــــاج.... وليش عود؟

رؤى.... ما تقبل تشغل بنات صغار تڪول خاف اتورط

تــــــاج.... 18 سنة صغيرة؟ على العموم خوش

رؤى.... اي عاشت ايدج ولو مابين عليج عشرين بس نمشيها

هزيت راسي ووصلنة للصالون باوعت للافتة والاسمة ومبين صالون راقي فتحنة الباب ودخلنة سلمت رؤى على ام الصالون

رؤى... هاي صديقتي الڪتلج عليها

باوعتلي بتفحص ومبينة ڪُلش متشددة

.... شنو اسمج؟

تــــــاج..... تــــــاج حسام

.... وين بيتڪم

حڪيت حاجبي وحجيت

تــــــاج.... بالشعب

...شڪد عمرج؟

تــــــاج.... عشرين

.... ها انطيني بلا جنسيتج

ضليت صافنة وانتقل نضري الرؤى صوفرت حمحت وحجيت

تــــــاج....اني عايشة وية عمي ومأجرين شقة فأبو الشقة ياخذ جناسينة

.... شلون  رهمها ميڪول خاف تحتاجونها شي

تــــــاج.... بعد ناس متفڪر الة بنفسها

ڪعدت على الڪرسي وجاوبتني

.... اي والله متخاف.... ما ڪتيلي شنو تعرفين تشتغلين؟

تــــــاج.... احف انضف بڪيفج

.....ماشي ماما متفقين

ابتسمت الها وهزيت راسي بـأي شوية واجن بنات عرايس بدت هيَ تشتغل الهن و رؤى انتضرت على ما تگمل مڪياج وحدة من عدهن احتاجت حفافة گمت اني لفيت الخيط على رڪبتي وبديت احف الها واحجي بڪلبي الڪعدة وية خلود ونور هم فادتنـي

اجت ام الصالون شافت حفافتي هزت راسها وحجت

.... زينة حفافتج بس رجعي على المڪان الاخذتي منة حتى ينضف والحواجب اذا بعدج ما مسيطرة اخذيهن بالملقط

هزيت راسي ورجعت احف للبنية كملت وجها ورتبت حواجبها حجت البنية

.... الج الفلوس لو الام علي؟

تــــــاج.... يا ام علي؟

... ام الصالون

تــــــاج.... ها لا عند ام علي وية فلوس التجهيز

هزت راسها واني رجعت ڪعدت باوعت الام علي ورجعت نضري الرؤى دا تراسل

تــــــاج.... اكلج

جاوبتني بدون لا تباوع الي

رؤى.... همم

تــــــاج.... ام علي شڪد عمرها؟

ضحكت وباوعتلي

رؤى.... ها تردين تخطبينها

تــــــاج.... الابوج مو جاوبيني

غمتني وحجت

رؤى.... عمرها 45 سنة

تــــــاج..... هااا

حجيتها ورجعت نضري الها حمحت وحجيت واني اخفي غصتي

تــــــاج.... اڪلج خالة ما تعرفين وحدة اسمها نجلاء؟

رفعت راسها الي

ام علي.... خالة يا نجلاء هوايه اعرف بهذا الاسم

تــــــاج.... اسم زوجها حسام

ام علي.... شنو اسم ابوها؟

لميت شفتي للداخل وجاوبتها

تــــــاج.... ما اعرف بس عدها بنية ضايعة من زمان

هزت راسها بنفي

ام علي..... لا والله ما اعرف..... باوعت للساعة ورجعت باوعتلي..... ماطول ماعندج شي تعاي جيبي النة صمون حتى نتريك

ڪمت نزعت الصدرية واخذت من عدها الفلوس دلتني الفرن وطلعت

اتمشيت للفرن صاير ورة الصالون بشارعين وصلت الة لڪيت ازدحام على سرة الرجال بس سرة النسوان فارغ رحت وڪفت مديت راسي جني فارة وحجيت

تــــــاج.... بيش الصمون؟

جاوبني واحد من العمال

....8 بألف

شهڪت وصحت

تــــــاج..... شڪدد قفاصين يعني هنا طحينات تبيعون 8 بألف ليش ماتڪولون هاي الناس منين تجيب وين تولي وهسه ياريت 8 بألف وڪبار اشوو ڪُل وحدة اصغر من ڪف ايدي بس انتم ما تخافون لا من صغير ولا جبير

.... اكلتينة حاصل فاصل عبالك الشغل شغلنة اشو احنه عمال هنا ما النة حجاية

تــــــاج..... المهم انطيني صمون بألف ونص

حطالي بعلاڪة وانطاني اياها دفعت الفلوس ورجعلي الباقي

سمعت واحد صوفر وراية وحجة

..... حلوات النچرات

فتحت عيوني بصدمة ودرت عليه صحت

تــــــاج..... همممممم انتَ؟

حجة وهوَ يقلد ردت فعلي

.... هممممم انتِ؟

تــــــاج...شنو سالفتك وين ما اطلع تطلع بوجهي صايرلي مصباح علاح الدين لو شنو

ضحك ونزل نضرة العلاڪة الصمون رجع باوعلي

.... ها هذا هم بايڪتة؟

رفعتلة الباقي مالت الفلوس

تــــــاج.... بفلوووووسي

ضحك وخزرتة مديت ايدي للعلاڪة طلعت صمونة وانطيتها الة

تــــــاج.... اخذ هاي خاف عينك على الصمونات ونتسمم

رفع حواجبة واخذها وضحك عبرتة وسمعتة همس

..... دعمممني المايشوف بعيونة

حجيت بصوت عالي متعمدة

تــــــاج..... وسم

.... اليسمج

كلبت شعري ومشيت لأبو الفلافل اشتريت ورجعت بنص الطريق وحسيت الدنيا افترت بية ڪعدت على الرصيف ولزمت راسي وعصرتة فجأة وما اسمع الة صوت هورن كمزني خليت ايدي على ڪلبي وفتحت عيوني وصحت

تــــــاج..... وووجع بڪلبك وبڪلب الخلة بأيدك سيارة

انتبهت الة هذا نفسة ابو الجوزلان فتح الجامة مالت السيارة وابتسم الي

.... اوصلج؟

تــــــاج....خااااللللي شكد لزڪة انتَ وين ما اروح تطفر بوجهي عبالك ابو بريص من يطفر عالحايط

..... هههههه تعاي صعدي

تــــــاج...دادا شبيك انتَ اعرفك تعرفني حتى اصعد وياك وتوصلني؟

... ما بيها شي مساعدة لوجه الله

كمت ونڪثت ملابسي ومشيت سمعت صوتباب السيارة انفتح

صاح

.... زين بس اسمج... عنوان بيتڪم.... اول حرف من اسمج هم راضين يمعودة شنو اسمج وداد حوراء علياء ياسمين زينب تقى مروة حنين اديان ايات رسل فاطمة

درت الة لكيتة نازل من السيارة وواكف خزرتة و مديت ايدي للجنطة فتحتها وطلعت السجينة وجهتها الة وحجيت بحدة

تــــــاج.... شوف ترا الڪدامك مخبلة وعقل ما ضال براسها اسويها صدك وادجكك بنص الشارع واخلي ڪُل الذكرت اسمائهن ايدكن وايلطمن عليك

ضل مبتسم وما اتحرك رفعتلة حاجبي اول مرة اهدد واحد وما يفلت

....جاي تعجبيني

تــــــاج.... انعجبت بيك الشياطين ڪول امين

.... ههههه ليش ينعجب بية رجال صايم مصلي ينعجب بية الشيطان؟

حجيت بأستهزاء

تــــــاج.... يا خية لعد الصلاة والصوم وين راحت من موڪف بنية بالشارع ودا تشمر عليها حجي هذا مو اسمة تحرش

اشر على نفسة بتفاجئ

... هذا اني؟

تــــــاج.... اي لعد منو

.... اني ما موڪفج اشمر عليج حجي ولا جاي اتحرش بيج جاي اعرض عليج مساعدة اوصلج شفتج كاعدة على الرصيف كلت خطية

تــــــاج.... خطية بعينك منو عاتب عليك؟

ضحك وما جاوبني اجبت اروح وصاح

... ما ڪلتي شنو اسمج؟

غمضت عيوني بنفاذ صبر وحجيت من بين اسناني

تــــــاج.... اسمي بعبع يلا ارتاحيت؟

شفتة ما اتحرك من مكانة انتبهت الطابوكة صايرة يم رجلي دنكت اخذتها اجيت اشمرها عليه وطاحت بالجام مالت السيارة وتفلش فتح عيونة بصدمة وصاح

..... لااا يا ملعووونة السيااااررة جديدة فلشتيها

طفرت بسرعة و رجعت للصالون اول مادخلت حجت ام علي

ام علي.... هاي عود دزيتج تشترين وهيج طولتي لو كايلتلج اطبخي شتسوين

تــــــاج.... شوية حشرات طلعتلتي بالطريق عذريني

ضحكت رؤى ورفعتلي حاجبها

رؤى.... حشرات شنو؟

تــــــاج... هيج انسي

اتريڪنة ومر الوقت عادي الحد الساعة بالثنتين ونص طلعنة اني ورؤى سوة من الصالون

رؤى...اڪلج نتمشى لو انأجر سيارة

تــــــاج.... طبعاً سيارة شادتلي محرك امشي هاي المسافة

رؤى... عود ڪلت نوفر

تــــــاج.... نصعد فورتات

رؤى.... خاف نتأخر؟

تخ.... لا خليها عليّ اڪُلة جنت عد عمي واخذت رؤى وياي

رؤى... يا عم وينة هوَ ليش شبي؟

تــــــاج.... خطية اندعم

رؤى.... يا عززززا لعد ليش ما ڪلتي حتى انروح للمستشفى

تــــــاج.... لا ما بي شي ولدة يمة

رؤى.... الحمد لله على سلامتة حبيبتي ليش اجيتي اليوم لو كايلتلي اكُللها اتخلي الشغل على باجر

تــــــاج.... لا ما يحتاج اني هم ما احب اضل بالمستشفيات

هزت راسها وابتسمتلي رحنة للمطعم لڪينة العمال بالشفت الي قبلة بعدهم ڪملو شغلهم وطلعو واحنه دخلنة بدلنة ملابسنة وبدو العمال الي ويانة يجون شي ورة شي

شوية واجة ابو المطعم شافني جاية وكعد يسألني على عمي واني ضليت اصفط جذب براسة والشيبة مصدك

اخذ حضورنة وراح لبست الصدرية ورحت على شغلي ورؤى وخطيبها حسنين يشتلغون سوة

ضليت اشتغل وافڪر بشُــــذير وينها هسه وبيا ڪاع زين الولد الي اشتراها زين لو لا ولو الجاي من طرف ابتهال شعرف عنة

اتنهدت بتڪفير شغلي ما جاي يجيب نتيجة زين من يعيشني زين والفلوس الي لازم ادفعهن الابتهال منين اجيبهن؟

زين هنا لا مليون ولا مليونين ولا ثلاثة منين اجمعهن واجيبها يمي

شردت بالتفڪير وخليت ايدي جوة الماي فزيت ورجعت ليورة من ايدي احترڪت باوعت للسنڪي المي يطلع من عندة دخان

غمضت عيوني بنفاذ صبر انتبهت الي رؤى واجت بسرعة

رؤى.... يا يا ليش ما انتبهتي صدك جذب

حسنين.... ها شصاير

رؤى.....حركت ايدها خطية غير تنتبهين مخلية المي الحار يصب

باوعت الها بروح شارة وهزيت راسي بنفي

تــــــاج.... لا ما بية شي هذا هوَ

رؤى.... لا يتهيألج هسه بس يمر وقت اتضل اتأذيج

تــــــاج.... لا شسالفة بسرعة سحبتها

رؤى..... امشي اخذج للصيدلية يشوفها وينطيج علاج

تــــــاج....لا ما اريد شي لا تلتهين وياي كملي شغلج

حسنين.... خوية خلي تاخذج اني هنا بمڪانجن

اتنهدت من شفتهم لحو هزيت راسي بأي نزعت الصدرية وطلعنة من المطبخ مشينة بأتجاه الصالة الجوة لأن الباب الرئيسي بيها

جنت امشي بهمة ورافعة راسي ما احس الة عيني جاية عليه!

نفسة ابو الجوزلان! ڪاعد بالمطعم سبيتة بڪلبي ونعلت والديه على هاي الصدف صرت بصف رؤى حتى لا يشوفني وطلعنة بسرعة

رحنة للصيدلية شاف ايدي وحجة

....حرق بسيط ما يخوف بس الافضل تخلين مرهم

اشتريت من عندة مرهم خليت على ايدي ولفاها الي ردت ادفع الفلوس رؤى ما خلتني رفضت رفض قاطع ودفعتهن اني ما احب احد يدفع عني شي ممكن اغلس وما انطيه اي بس يدفع لا

طلعنة من الصيدلية ومشينة للمطعم اجينة ندخل وصار بوجهي ابو الجوزلان رفع حواجبة وضحك وعبالك يڪول.... ها هم شفتج هنا

خزرتة وحجيت

تــــــاج... وخر عن الطريق رجاءً

ابتسم

..... اخ يابة شنو هالصدف الحلوة اليوم امي داعيتلي من الصبح

تــــــاج.... مو صدف اڪيد انتَ متعمد وجاي تلحڪني

... هههه ان بعض الظن اثم

تــــــاج.... خوش وخر هسه

زادت ابتسامتة ووخر عن الباب دخلنة واني التفتت عليه لڪيتة بعدة واڪف خزرتة وهوَ غمزلي فتحت عيوني بصدمة ودرت وجهي ومشيت بس ما اعرف شصار بية شلون اسڪتلة هيج وهوَ شلون يتجرررررأ يسوي هيج ويغمزلي؟ مو يكول اصلي عشتووو النوب يغمزلي الما يستحي.... ضليت افور بمڪاني واسب بروحي لأن ما فضحتة وڪلت يتحرش بية

ضليت اشتغل بأيد وحدة بس دمي فاير وضايجة عڪر مزاجي وجه الجوب الفڪر فلس ماڪو بحوزلانة وجاي داخل المطعم راقي

ڪملت شغلي وحسيت روحي تعبت وحتى الزبائن خفو بدلت ملابسي واستأذنت وطلعت اصلاً الساعة صارت بـ11 وما ضل شي وينتهي الدوام

اجرت تڪسي ورجعت للبيت غسلت كبل يلا دخلت للغرفة بدلت ملابسي واكلت بسكتات بس سديت جوعتي واتمددت ونمت

ثاني يوم جنت دا اشتغل بالصالون وتقريباً الساعة بالعشرة الصبح دخل طفل شايل باقة ورد حجت ام علي

ام علي.... ها ماماتي شنو هذا المن؟

.... ماما هذا واحد اجة وڪال هاي انطيها للحرامية

فتحت عيوني بصدمة واتلعثمت خليت شعري ورة اذني وحمحت وحجيت

تــــــاج.... احم جيبها بلا اعتقد من صديقي ايام الابتدائية لأن امشي علية هذا اللقب

انطاني اياها وراح ڪعدت على صفحة وعيني على باقة الولد اجت رؤى كعدت بصفي طكتني بڪتفي وحجت بهمس

رؤى.... ورد وحرڪات عليج الله ڪُليلي منوووو

باوعت الها

تــــــاج.... ما اعرف

رؤى.. علينة؟

تــــــاج... ما مجبورة اجذب

رجعت نضري للورد ومشيت ايدي على الباقة بحيرة انتبهت البطاقة موجودة بنص الورد اخذتها بسرعة وشفت المڪتوب بيها رمز ما اعرف رقم ما عرفتة شنو انتبهت للجملة الجوة وقريتها بصعوبة

.... يسُرُّني رِسَالَة مِنْك تُلَامِسْ فِيهَا قَلْبِي

تــــــاج... اكلج رؤى سؤال

رؤى.... شنو؟

شوفتها الرمز وحجيت

تــــــاج.... شنو هذا رقم موبايل؟

رؤى.... لا اعتقد هذا يوزر انستا

تــــــاج.... شنو هذا!

حجت بتفاجأ

رؤى.... عود صدك متعرفينة؟

تــــــاج.... جؤ ما اعرفة

رؤى.... باعي تنزلينة من سوق بلي وتسوين بي حساب وتبحثين عن اي شخص عندج يوزرة وتابعين اشخاص وهيج وحتى اتكدرين تراسلين

هزيت راسي عود فهمت وضميت الڪارت بالجنطة منين عرف اني اشتغل هنا ومعقولة هوَ لو لا؟

زين بس هوَ يڪلي بهذا اللقب وشيريد مني

ڪضيت اليوم ڪُلة افڪر وما صافي بالي ساعة اڪول اسوي حساب واطيح حضة وساعة اڪول البسة احسن

رجعت للبيت وصار بوجهي سوما ڪاعد بالحديقة ويصبغ اضافرة حجيت بسرعة

تــــــاج... تعال اجيت بوقتك

رفعلي راسة

سوما..... ها عيني

تــــــاج.... تعرف تسوي حساب استنكرام ما اعرف اسڪرام

سوما.... اي عيوني اعرف وعندي حساب وصاعد تعاي اسويلج وتابعيني

اجيت ڪعدت يمة طلعت موبايلي وفتحتة الة نزلة واني اباوع الة واتعلم نزل ودخل عليه وبدة يسوي وڪُل خطوة اني اسئلة شداتسوي ووين وصلت الحد ما وصل للرمز انطاني اياه وحجة

سوما.... هاج عيني هلي الرمز انتِ

تــــــاج.... رمز من شنو؟

سوما.... احرف انڪليزية عشوائية وارقام وها ڪثري نجمات

خليت مثل ما ڪال وانطيتة الة

سوما.... شنو تردين اسمج؟

تــــــاج.... ما اعرف خلي اي شي

سوما.... ميصير عيني لازم اخلي اسم

تــــــاج....يصير تخلي نقطة؟

سوما... اي يصير

خلة ورجع حجة

سوما.....اممم وهسه شنو تحبين تڪتبين عن نفسج؟

حجيت بعد تفڪير

تــــــاج.... لـن ازيـل اشواكِ فأنا اريد الضرر بڪم... ڪُل ما عليك هوَ التقدم فحسب

سوما..... واوووو تجنننن

حجاها وخلة التلفون على صفحة وصفڪلي هزيت ايدي وطلعت الكارت من الجنطة انطيتة الة

تــــــاج.... هاك خلي هذا الرمز ما ادري شسمة المهم بس خلي اني ابحث.

هز راسه وخلاه بس بالبحث واني بس ادوس علامة البحث واشوف طفاه وانطاني اياه كمت صعدت بسرعة فوك غسلت واجيت اتمددت ورثت جڪارة ونمت على ضهري وشغلت التلفون دست بحث واول ما طلعلي الحساب شهڪت وطاح التلفون على وجهي

••••••••••••••••••••••

شُـــــذير

يمامة.... حبيبتي كومي وياي ساعديني الج اجر

كمت وياها ورحنة للحسينية فرشنة السفرة وانطتني الخضرة اوزعها على السفرة دا اخليها وسمعنة صياح برة وبجي مالت طفل طفرت يمامة وصاحت

يمامة...... يمه ابني

رڪضت ورڪضت وياها طلعنة برة لڪينة ابنها مفرفح بالڪاع ويبجي ورجلية حمر والحجية تهفي عليهن رڪضتلة امة رادت تلزمة ما خلوها الجو انخبص والصياح ڪام واحد يصيح يمكن ابوه

....... حسابج بعدين اذا صار شي على ألياس تحلمين تضلين على ذمتي

حجاها وشال الطفل وراحو ضلت امة تبجي رفعت راسها وصاحت وهيَ تباوع الليلى

يمامة..... موو خليييتة عنننددج ملتهييية بس تتمضحكينننن لوو متعمممدة تحرڪين ڪلبي

شهڪت وحجت

ليلى....وانه شعلي ما تعرفين تلزمين ابنج

يمامة.... موو انهه فااارغة حتى الزمة رحت اشتغل وخليتة عندج كتلج. ديري بالج عليه م

قاطعتها الحجية

زهـره..... ڪافيجن مابي شي الولد

سڪتتها آرام بس الجو انشحن بينهن راحن النسوان الكبار صبن عشة للزوار بس

ڪعدت يمهم وايدي على خدي وصافنة على يمامة كاعدة على الصبة وتبجي وروحة رايحة ياترى اني من اخذوني من امي هم هيج ضلت تبجي عليّ؟ وهم هيج تحبني لو لا؟ وهم هيج انقهرت

نزلن ادموعي وياها وعبالك يردن الحجة حتى ينطلقن طلعت الحجية من الحمامات وفاتحة شيلتها يمكن جانت تتوضى شافتنة وصاحت

زهـره.... ولجن الدنيا مغرب شبيجن تتباجن مو زين كومن طبن صلن وذڪرن الله حتى يذڪرجن ما بي شي الفرخ هسه اخابر العبد الرسول واشوفنة شيڪول

يمامة...... بيبي والله ڪلة من عدها يعني انه عفته وكمت وين ادري بي شصير المن اڪسم روحي

زهـره.... صوجج انتِ شني هاي المڪلبة واخلي فرخي عدها ما تدرين بيها لابسة مية وجه

آرام.... انه شفتها بس رحتي عافتة وڪلتلة كوم العب

باوعت الها يمامة بسرعة

يمامة..... وليش ما شلتييي؟

آرام....امها ودتني اصيح العمـي معتز مالحڪت والله بس درت وجهي سمعتة صرخ

زهـره.... كافي وحدة تلوم الثانية ڪومن يلا هسه يجون وعمجن رحمن هوَ وليداتة جاي من البصرة عيب اتصير هاي السالفة بوجهم.... باوعتلي وكملت كلامها..... خوب انتِ ترديلج الحجة حتى تتبجبين كومن طبن جوة ويجهن يجيب الفكر لو طار

كمت دخلت جوة والبنات اجن وراية الحسينية فارغة وما بيها بس قرايبهم ڪعدت بعيدة عنهم بزاوية شوية وجابو الطفل اتلڪتة امة واخذتة الحضنها تبوس بي وتبجي حجة الرجال الجبير

....ڪافي يُبة مابي شي بس مرة ثانية ديري بالج على وليدج لا تأمنينة بيد البنيات

مسحت ادموعها وهزت راسها بأي

اجو يرحون ودخلت ليلى تبجي وتشهك دار عليها رجال اول مرة اشوفة بس يمكن ابوها

.... ها بابا شبيج

ليلى..... بابا تقبلها يمامة تڪلي انتِ حرڪتي ابني متعمدة ومفهية بس تتمضحڪين وية الولد مو عيب هالحجي هذا

حجة الرجال الجبير

..... يمامة تڪول هيج؟ لا عمو متوهمة اعرف بتريبتها

صاحت امها

.... اي ابو ايسر تبري مرت ابن عمك وتجذب بتي هاي عود رابية عدك وتعرف اطباعها بس صدك لو كالو اجاك من تالي عڪبك

راد يحجي ابو ليلى خزرتة المرة تجاهلها وباوع الهذا الرجال وحجة

..... امسحها بوجهي اكيد مفتهمة غلط اعرف اخلاق يمامة كلش زين

حجاها واشر الليلى تطلع برة

طلع بس ليلى ما طلعت ضلت ڪاعدة راحو ڪُلهم طشو وخلصت المشڪلة ضليت صافنة عليهم هذول شنو شلون عايشين ليش هالڪد عدهم احداث بحياتهم هههه ديلا على اساس شلون حياتي جانت يم ابتهال

اتنهدت واتذڪرت تــــــاج وين صارت؟ معقولة راح اضل عدهم زين من اطلع منا وين اروح ووين اندلها مليت هنا احسهم عدهم حياة خاصة بيهم وعالمهم جبيررررر وبي هوايه بشر اني ما احب هيج اني احب يصير عندي عالم ومابي احد بس اني و تــــــاج

صارت بالعشرة بالليل وصارت هوسه برة انفتح باب الحسينية ودخلو ولد هوايه ووياهم رجال جبير ڪُلهم باسوا الحجية وڪعدو يسولفون ويضحڪون وياها الي عرفتة هذول هم يعودلولهم عمامهم ما اعرف شنو بس عايشين بالبصرة انتبهت الولد يحجي وية الحجية

..... ووولج زهــررررره حسيون يحب وحدة بصراوية بسس اخ تخبللل غير تموت ووو

طكاها ولد على ظهرة يمكن هذا هوَ حسيون لأن صاح

... اكل خرة مرت اخوك راح اتصير لا تتغزل

زهـره..... ياع غير يوم عيد وتعرس وتتزحزح بلڪت ينفك العقد مالتكم واعرسڪم واحد ورة الثاني

ڪرصتها آرام بزندها وحجت

آرام.... بيبي ويوصل السرة الج

طكهتا على زندها بقوة

زهـره.... خايبين اخذو هاي الملفوڪة من يمي ناوية تجلطني بسوالفها كل ما حجينة وكالت ازوجج وازوجج خايبة ششايفتني بت الـ14

حجة رجال يشبه الرجال ابو هذا اليوزع لفات يمكن ابو هذول الولد

.... يمة حقها مو غير روحج خضرة

ضحڪو والحجية هزت ايدها باوعت الحسيون

زهـره.... عود صدك تحب بنية؟

... اي والعباس احبها واريدها على سنة الله ورسولة بس غير يرضون اهلها

... حڪهم ما يقبلون بهيج شڪول تشبه آل مية

..... أڪرم وتااالي وياك تحسسني انا من اتباع الشمر

آرام..... مو الڪتاب مبين من عنوانة

زهـره..... خايبة وين هاي البت نسيت اسمها صعب... ها شذرة وينها؟

باوعت آرام الارجاء الحسينية الحد ما طاحت عينها عليّ جنت لامة رجلية الصدري وساندة راسي على الحايط واسمعهم من بعيد حجت آرام وهيَ تأشر بعيونها علي

آرام... هذيج ڪاعدة

اتوجهت الانضار الي وڪُلها باوعتلي عدلت ڪعدتي واتربعت

حجة واحد من الولد مو حسيون الثاني

.... ياهي هاي البت؟

حجاها ودخل ابو اللفات شايل صينية بيها استڪاين چاي قدمة الهم وڪعد حجة ابوهم

.... منو هاي البنية؟

رفع راسة ابو اللفات وباوعلي

زهـره.... يمه خطية ضاعت من اهلها

رجع حجة نفس الولد

.....اصيرلها اهل انا هم يتيم

ضربة ابو اللفات على ضهرة ورفعلة حاجبة

.... سالمين البنية عدنة وبحرمتنة شنو الحجي؟

ضحك وحرك ضهرة بألم حجة ابوهم

... جا شعجب ما خليوتها وية النازحين بالحسينية الثانية

زهـره.... خايب رحمن شجاك البنية زغيرة ووحدها هناك شتعرف وياهم هيَ هنا وكل يوم تنحب واتريد تطلع تاخذ الدرب واتروح

رحمن... وانتَ زڪريا شعجب الهسه ما مدور على اهلها

زڪريا.... ما فارغ خلي تخلص ايام محرم ويصير خير

دنڪت راسي وبلعت ريڪي حسيت وين ما اروح ما مرحب بية هه وصح ليش اعرفهم يعرفوني حتى يتورطون بية ومن حقهم لو يعرفون اني منين جاية يتندمون حتى على اللڪمة الي انطوني ياها
دمعن عيوني ونزلت دمعتي مسحتها بسرعة ما اريدهم يلاحظون

ورغم هذا ڪُلة بعدني عندي امل تجيني تــــــاج ورافضة ايأس لأن مڪاني يمها وبس

رفعت نضري الهم لڪيتهم راجعين يسولفون وڪُلهم التمو ياڪلون ڪعك وچاي وملتمين داير مادير الحجية صغير وجبير

انفتح باب الحسينية ودخلت ليلى انتبهت لأبو اللفات نزل نضرة على ملابسها واشر عليه وهز راسة بلا ابتسمتلة ومشت بدلع وطلعت شوية ورجعت دخلت مبدلة ملابسها باوعت لأبو اللفات وبادلها بنضرات رضا اجت ڪعدت يم امها وشارڪتهم بالحديث

رفعت نضري للساعة بـ11 بالليـل عيوني بدن يقفلن وهمَ بعدهم يسولفون واني استحي انام وهمه موجودين ضليت ڪلساع افتح عيوني وارجع اغفى الحد ما نمت واني ڪاعدة

فزيت على صوت بجي مالت طفل فتحت عيوني ڪُلها بعدهي نايمة وخرت البطانية ما اعرف منو مغطيني وكمت على حيلي ضليت ادور بعيوني الحد ما طاحت عيني على الطفل الي احترك امة نايمة وهوَ يبجي عبرت بين النسوان والنعسة بعيني وڪُل ما اعبر اعثر بوحدة وهنا يصيحن

....ياهي هاي ولج ما تشوفين

واني اغلس وصلت للطفل اباوعلة يبجي ومفرفحة روحة وامة يمكن خطية من التعب ما فزت ڪسر خاطري دنڪت شلتة بصعوبة لأن شوية تارس وفتحت الباب وطلعت جانت الشمس بعدهي ما طالعة سديت الباب وراي باوعت للطفل وابتسمت

شُـــــذير.... شنو اسمك انتَ؟

.... ياس

شُـــــذير....ألياس؟

... اي

شُـــــذير... متأذي؟

قدم شفتة السفلة ليڪدام وحجة

ألياس.... رتلي تلس تعوني انه اح اموت

شُـــــذير.... لا حبيبي ليش تموت هسه اتصير زين واطيب

ألياس.... تلس عوني ايد اصبح بخيل

شُـــــذير..... ههههه تشبش عراقي وفصحة

ضحك بس ما افتهمني

شُـــــذير... انزلك تڪدر تمشي؟

ألياس.... لا اعاف اعور

هزيت راسي وضليت شايلتة وافتر بيه واحجي وياه ما اعرف شلون اخذتني رجلي لبرة الحسينية اجيت اطلع وسمعت صوت وحدة صاحت

.... تعاااااي ولج هاي وين ماخذة الفرخ وطايرة

التفتت الها بسرعة شفتها ام ليلى اجيت احجي وادافع عن نفسي ما احس الة صاحت

.... ولڪممم تعالوا ليه اتريد تشرررد بالفررررخ مو ڪلتكمممم مو ررراحة الله يعلم منوو وراهااا

بدو يطلعون على صياحها وصريخها ومن تصيح يبو عبالك واحد مات خفت وانخفض نفسي رجعت ليورة بخوف وبلعت اللساني اريد. ادافع عن روحي ما اڪدر بس ارمش بصدمة واكول هاي شدا تحجي

طلعت يمامة من الحسينية شافتنة وحجت

يمامة.... شنو شبيجن

... تعاي ولج يالمفهية هااي االما اعرف منين جابوها ماخذة الفرخ ورايدة تشرد

هزيت راسب بنفيي وصحت

شُـــــذير.... لا والله ما اخذنة بس بجة واني شلتة حتى

ما احس الة صوت خالو ابو هذا اليوزع لفات وراية وهوَ يصيح

عبد الرسول.... هااي شصايرر صوتجن ليش طالع الزوار الرايح والجاي يفتر علينة

اجة وراه خالو زڪريا شاف الطفل بأيدي اخذة وباع النة بأستغراب على وضعنة اني الدموع متجمعة بعيني وهاي بعدهي اتصرخ

زڪريا.... شبيج عمو؟

... ووتڪللهااا عمووو ولك خذت الجهال ولكيتها اتريد تطلع بي من اكلكم لا ادخلون اي وحدة ةم

صاح بصوت عالي

عبد الرسول.... سميررررة ڪافي ماخذتنة بصوتج العالي خلي نفتهم السالفة حجاية زايدة ما اريد اسمع... باوعلي وكمل كلامة..... احجي عمو

مجرد. ما انطاني الاذن احجي نزلن ادموعي بقهر مسحتهن بأيدي الترجف وحجيت

شُـــــذير.... خالو اني فزيت على صوت بجي مالت هذا الطفل كعدت شلتة لأن امة نايمة خطية البارحة شفتها تعبت وطلعت هناية بس والله ما شردت بس ردت اتمشة والله بعدين مو انتم هنانه ڪاعدين شلون اشرد

انفجرت بالبجي ما ڪدرت اكمل ضلن ادموعي ينزلن وامسحن بڪف ايدي طلعت الحجية بأيدها وڪفن باي الحسينية وحجت

زهـره.... خايبة سميرة شبيج وية شذرة ليش مبجيتها

عبد الرسول.... ما صار شي سوء تفاهم

شهڪت سميرة وصاحت

سميرة.... تجذبني وتصدددك بيها وراس ابو فاضل الحار الفرخ ما بجة هيَ خذتة لأن هايه غايتها

انصدمت من كمية الجذب الكالتها عليّ واني حتى ما فاتحة حلڪي وياها ولا داير حجي بيناتنة انهضمت من اني بيناتهم داخلة وتتهمني
رفعت الحجية عڪازتها ووجهتها الها وحجت

زهـره.... بري منج ابو فاضل خايبة خرعتينة بنصاص الليالي تالي طلعت سالفة غبرة مثل وجهج شلون انطاج كلبج تتبلين اعليها انه جنت كاعدة من بجة ألياس مالحڪت اكوملة وما عانني رجلي كامتلة البت وخذتة برة

سڪتت وانخطف لونها من حجت باجي الحجية هيج مسحت ادموعي ودرت على خالو الشيخ وحجيت بتردد وبتلعثم

شُـــــذير.... خالو اني ما اريد ابقى بعد هنانه اريد اطلع اني ادور اهلي ما اريد اسبب مشاڪل بينكم بس اني والله مو قصدي اشيل الطفل ما اعرفڪم ما تقبلون

مسحت ادموعي واحاول اخفي غصتي بس ما ڪدرت الغصة واضحة بنضراتي ورجفتي ونبرة صوتي

عبد الرسول....لا بابا لاتكولينها ما اطلعين منا وحدج من يوم الدخلتيلة هنا يا اما اطلعين وية اهلج لو ما اطلعين وحدج

شُـــــذير..... لا خالو والله م....

عبد الرسول.... يُبة حسبيني ابوج واطلب منج تبقين هنا هم ترفضين الابوج طلب؟

رفعتلة نضري وهزيت راسي بلا وصدُك اتخيلتة ابوي الي راسمة شڪلة ببالي صح ما اعرفة بس اكعد اتأمل واتخيل ابتسملي وخلة ايدة على راسي مسح على شعري وحجة

عبد الرسول.... يلا يُبة دخلي جوة كملي نومتج ومسحي السالفة بوجهي

انسحبت ودخلت للحسينية جانوا اغلبهم بعدهم نايمين رحت المكاني فرشلتي فراش وجريت البطانية الجنت متغطية بيها اتمددت وغطبت راسي بالبطانية وانفجرت بالبجي ماكدرت اضم شهكتي حسيت الاماڪن ڪُلها ما تحملني اختنڪت من جميع الجهات صرت ادعي من ڪُل كلبي حته تجي تــــــاج وتاخذني منا وين اروح اذا رجعو البيتهم سمعت من عدهم باجر الاربعينية ووراها بيوم يرجعون زين وانييي؟ مصيري شنو بيا ڪاع؟
تعبت يا الهي من ضلم عبادك ما اتحمل بعد ادخل على ناس ثانية وما اريد اريد بس اختي اطمن يمها بسدها انام واني مرتاحة
وبأمان رغم ڪُل الذائب الي محاوطتني

ضايت على هذا الوضع الحد ما حسيتهم ڪُلهم كعدو وخرت البطانية وكمت لفيت شعري ورتبت فراشي من غير ڪلام ورحت غسلت ورجعت كعدت بمكاني وعيني على الفراغ حسيت بآرام كعدت يمي نغزتني بڪتفي وحجت

آرام.... منين ضايجة حبيبتي لا تشغلين بالج بيها هيَ هايه حية وتڪره الي تعرفة والي ما تعرفة

دمعن عيوني ودرت الها خليت عيني بعينها

شُـــــذير.... ما اريد شـي بس اختــي!

آرام... تلڪين اهلج والله ترا انتِ مو اول وحدة اتضيع ولا اخر وحدة لا تخافين خلي اتخلص الاىبعينة وانطي عنوانهم الاهلي وياخذونج الهم

شُـــــذير.... ما اخاف! آرام اني وين اروح انتم وراح تروحون عڪب باجر اني شنو مصيري اريد اختي صارلي كم يوم هنايه ما حاسة بطعم الراحة صح ما عدكم اي قاصر بس انــي ما ارتاح الة يم اختي

صفنت وما جاوبتني كضيت ايدها وحجيت بتوسل

شُـــــذير... عفية ڪولي الخالو زڪريا الي يوزع لفات خلي يدور عليها اني انطيه اسمها وعمرها وشڪلها ويلڪاها عفية

آرام... وادعتج ما ناسيج زڪريا بس هنا زوار  وابوي معتمد بس عليه خلي نرجع ويلڪاها ماكو اسهل من عدها وبالنسبة الهاي الحية طززز بيها خلي تولي

شُـــــذير.... عيب لا تحجين هيج اكبر من عندج هيَ صح مو طيبة شريرة بس... يوو ما الي علاقة بيها اني يوم يومين وتجي علية اختي

آرام.... ههههه هذا هوَ سڪتت

سكتنة وهيَ شوية وحجت

آرام.... جؤ ضجت شوڪت نموت

التفتت الها

شُـــــذير... اني ما اريد اموت اريد اشوف اختي

باوعتلي

آرام.... ترحين ويانة بالليل نكعد بالامام ونحضر الاربعينية؟

ابتسمت وراح بالي للي اشوفة بالتلفزيون ويوم الاربعينية والتجمع والناس اتذكرت الازدحام و رجعت نضري الها واختفت ابتسامتي

شُـــــذير... لا اخاف من الازدحامات

آرام.... شسالفة انه الزمج من ايدج ما اهيتج

شُـــــذير....لا لا والله اريد ابقى هنانه

آرام... لا امشي وياي اني وحدي هناك والبنات كلمن تلتهي بروحها وليلى وية امها تعاي وياي

شُـــــذير... آرام ما اريد اني كاعدة هنا واحس الڪُل مستڪثلني وما الومڪم لعد لو اروح وياڪم شلون؟

آرام.... منو المستڪثلج شو ما تعرفين تحجين هالحسينية الزوار ايا عبد ﷲ والاڪل هم للزاور المتعنين للزيارة وانتِ هنا زايرة حالج حالهم

شُـــــذير.... هذا الڪلام كلامج وتفڪيرج بس مو ڪُلها نفسج عفية لا تلحين علي خليني براحتي

آرام.... بكيفج... كومي تريڪي لو ضلي كاعدة اعرفنج تستحين اجيبلج لفة واجي

كامت راحت واني باوعت الباجي الحجية تسبح وتباوعلي بحيرة غمضت عيونها وضلت تسبح وعاقدة حواجبها شوية وفتحت عيونها رفعت ايدها واشرتلي اجي كمت من مڪاني ورحت ڪعدت بصفها

شُـــــذير.... بلي باجي حجية زهره

زهـره.... ليش ما ترضين ترحين تزورين ويانة؟

شُـــــذير.... باجي انتِ هم ترحين؟

زهـره.... جا اضلن هنا كاعدة بمچاني هم اريد ازور ابا عبد الله ياهو يڪول للسنة التجي عايشة

شُـــــذير.... باجي اني اخاف اضيع وهم ما اريد اروح

زهـره....ماطول اجيتي بطريق ابا عبد الله وتيهتي اهلج روحي زوريه وطلبي منة يرجعج الهم مايرد واحد رفعلة ايدة

حسيت اتحاصرت بعد مااكدر ارفض لأن راح يشڪون ويعرفون اني ما عندي اهل هزيت راسي بأي وسڪتت مدت ايدها بجيب دشداشتها وطلعت نستلة انطتني اياها وحجت

زهـره... هاج هاي وزعوها واخذت الجن جنتن نايمات انتِ وآرام

اخذتها منها وابتسمت

شُـــــذير.... شڪراً باجي زهره الحجية

هزت ايدها وغمتني

زهـره.... يالملفوڪة بكبرج انه واتڪليلي باجي خايبة كوولي بيبي بيبي شبيج سايحة لمي روحج

اتذڪرت العجين مالت السياح من يسوونة شلون ذايب ضحك وحجيت

شُـــــذير... باجي شنو سايحة عجين سياح اني

زهـره... مالامة روحج منين ما الزمج تتطوطحين

شُـــــذير... لا باجي والله اني مو هيج بس انتم كبار ما ادري ليش يعني طوال وسمان احسڪم تعرفون ڪُلشي وهيج تشبهون ابتهال بس انتم حلوين وعدكم اخلاق مو نفسها هيَ ماعدها اخلاق والنوب هذا

عضيت اللساني من حسيت روحي جفصت

زهـره... ياع ياهيَ هاي الماعدها اخلاق؟

اتلعثمت واجيت اجفص بس نقذتني آرام اجت وشايلة لفة واڪلاص چاي انطتني اياهن و تشڪرتها واخذتهن اڪلت شوية من اللفة وشربت الچاي شوية واندك باب الحسينية حجت ام آرام

.... فوت ابو أيســر ماڪو احد غريب

فتح الباب ودخل عدلت ڪعدتي ونزلت الڪلاص وخليت اللفة عليه ومسحت شفايفي اجة خالو الشيخ باس امة زهـره وسلم على الموجودين من بعيد باوعلي وابتسم ابتساكتة حيل حلوة ومريحة للعين

عبد الرسول.... ها عمو ان شاء الله مرتاحة كلشي تمام؟

هزيت راسي ورجع حجة

عبد الرسول....بالليل ترحين تزورين واطلعج الحجية  الزڪريا و المنيب ياخذونج المرڪز المفقدوين ويصيحون بأسمج وهم يشوفون اذا اسمج مسجل عدهم لو لا وان شاء الله خير واذا ما لڪيتهم يحلها الحلال يلا اودعناڪم

حجاها وطلع ما خلاني اجاوبة او شنو اجاوبة ينادون بأسمي؟ ليش ومنو ينتضرني ومنو يريدني اصلاً
طفلة بعمر 12 سنة ضايعة تايهة بين ناس غرب ماتعرفهم شنو ما شنو اهل ماڪو لا ام لا اب لا اخ وين اروح؟

ضعت والله سخرلي تــــــاج جانت متڪفلة بية بڪُلشي هسه وينها تــــــاج؟

لا اعرف نستني لا اعرف دادور علي اني بدائرة ما راح اطلع منها ولا اعرف اطلع
متشوشة وهاي الايام ڪُلها انام واڪعد واني ماڪو ببالي غير تــــــاج وشوڪت تجي تاخذني بدون مل ولا كل
بيومها تعبت من التفڪير واحاول اهدي روحي
ضليت ڪاعدة بالزاوية وحدي وحاضنة تشيرت تــــــاج الصدࢪي

للسبعة بالليل اتعشو وڪامو بدلو اجت آرام انطتني چادر صلاة

آرام... كومي حبيبتي لبسي ما يخلونج ادخلين لأن مطلعة شعراتج الحلوات

اخذتة منها ولبستة عدلتة الي وضلت تضم بشعري وتحجي

آرام.... يمممه يممه تجنن ولك شعراتك اموت عليهن انننننه شنو هذا انتَ ليش هيج حلو

ضحكت من ڪُل ڪلبي برغم قبل شوية ضايجة ومختنڪة دارت ايدها على كتفي ومشيت بية بأتجاه باجي الحجية وكفتني كبالها وحجت

آرام.... بيبي علج العباس شلونها طالعة باعيلها

باوعتلي وابتسمت.

زهـره... حلوات النيات الزغار

زادت ابتسامتي وباجي لبست جواريبها وفتحت شيلتها وشدتها عدل طلعو شي ورة شي ضلينة اني وآرام وباجي الحجية  ڪضتها آرام من ايدها وڪضتني من ايدي الثانية وطلعنة

انقسمنة على السيارات ومشو مسافة قصيرة وڪالو بدة القطع نزلنة وبدينة ننزل بس ڪُلش ازدحام وكُل ساعة فالتة من ايد آرام اخر شي لزمتني بقوة من معصم ايدي وحجت

آرام.... شو تعاي موتيني ڪلساع وفالتة

صح جان ازدحام وهوسة بس الجو ڪُلش حلو وغريب علي اول مرة احضر هيج واشوف الاصوات والازدحام تقشعر البدن وصلنة المڪان سموه بين الحرمين دمعن عيوني لا ارادي حسيت المڪان بي فد شي مميز خشوع ونسمة هواء حلوة بالرغم من الازدحام صاح خالو ارغد امة

منيب....يمه احنه راح انروح ديري بالج على البنات

انقسمنة ودخلنة للامام بس ماكدرنة انزور كعدنة بمكان معزول واني عيوني متعلڪة على المكان وتتلامع من الجمال ما اعرف اوصف شعوري بس حسيتة حيل حلو الدرجة عيوني دمعن حسيت نفسي صدك حييت اليوم وبهذا المڪان المقدس.

انتبهت الآرام بأيدها كتاب اتقربت يمها وحجيت

شُـــــذير.... اريد مثل هذا الڪتاب

رفعتلي راسها

آرام.... جبتة وياي من البيت لأن هنا ازدحام لا تتحرڪين من مكانج وتعاي اقري وياي

هزيت راسي وقريت وياها

السَّلامُ عَلى وَلِيِّ اللهِ وَحَبيبِهِ، السَّلامُ عَلى خَليلِ اللهِ وَنَجيبِهِ، السَّلامُ عَلى صَفِيِّ اللهِ وَابنِ صَفِيِّهِ، السَّلامُ عَلى الحُسَينِ المَظلُومِ الشَّهيدِ، السَّلامُ على أسيرِ الكُرُباتِ وَقَتيلِ العَبَراتِ، اللّـهُمَّ إنّي أشهَدُ أنَّهُ وَلِيُّكَ وَابنُ وَلِيِّكَ وَصَفِيُّكَ وَابنُ صَفِيِّكَ الفائِزُ بِكَرامَتِكَ، أكرَمتَهُ بِالشَّهادَةِ وَحَبَوتَهُ بِالسَّعادَةِ، وَاجتَبَيتَهُ بِطيبِ الوِلادَةِ، وَجَعَلتَهُ سَيِّداً مِنَ السادَةِ، وَقائِداً مِنَ القادَةِ، وَذائِداً مِن الذادَةِ، وَأعطَيتَهُ مَواريثَ الأنبِياءِ، وَجَعَلتَهُ حُجَّةً عَلى خَلقِكَ مِنَ الأوصِياءِ، فَأعذَرَ فىِ الدُّعاءِ وَمَنَحَ النُّصحَ، وَبَذَلَ مُهجَتَهُ فيكَ لِيَستَنقِذَ عِبادَكَ مِنَ الجَهالَةِ وَحَيرَة أهلِ الدُّنيا، وَأشهَدُ أنّي بِكُم مُؤمِنٌ وَبِإيابِكُم، مُوقِنٌ بِشَرايِعِ ديني وَخَواتيمِ عَمَلي، وَقَلبي لِقَلبِكُم سِلمٌ وَأمري لأمرِكُم مُتَّبِعٌ وَنُصرَتي لَكُم مُعَدَّةٌ حَتّى يَأذَنَ اللهُ لَكُم، فَمَعَكُم مَعَكُم لا مَعَ عَدُوِّكُم صَلَواتُ اللهِ عَلَيكُم وَعلى أرواحِكُم وَأجسادِكُم وَشاهِدِكُم وَغائِبِكُم وَظاهِرِكُم وَباطِنِكُم آمينَ رَبَّ العالِمينَ.

كملنة وسدت اللڪتاب وابتسمت

آرام....حلوة الزيارة؟

بادلتها الابتسامة وهزيت راسي بأي

شُـــــذير.... شعور ڪُلش حلو هيج حسيت ماادري، شنو بس حلو

آرام..... ههههههه نعم لحرية التعبير

ليلى... تڪومن تفترن؟

التفتت الها

آرام.... لا وين رايحة ازدحام بالامام الناس اتريد تعبر وانتِ تردين تفترين فڪري بغيرج

جاوبتها بأستهزاء

ليلى... فدوة للمثالية

رفعتلها حاجبها

آرام.... على الاقل ما امثل الطيبة يم فلان والي 1000 وجه يم علان

ليلى.... شقصدج؟

آرام.... الحليم تڪفيه الاشارة بعد روحي كومي افتري انتِ مو مالت ڪعدة لأن هرموناتج تبدي تشتغل

ماجاوبتها عدلت عبايتها وڪامت باوعت اليمامة صافنة بالفراغ و مڪعدة ألياس بحضنها ووبطنها طفل التفتت الآرام

شُـــــــذير..... سؤال هاي البنية يمامة شنو تعود الكم؟

آرام.... مرت ابن عم ابوي

ها نزلت نضري الحضنها اكو طفل عمرة تقريباً 7 او ست سنوات نفسة الي مشة ويانة حجيت

شُـــــــذير.... لعد هذا ابن منو؟

آرام....هذا رضا ابن منيب اخوي

شُـــــــذير.... ها

رفعت نضري للساعة صارت تقريباً بـ10 شوية باجي الحجية موبايلها دك ردت بس بصعوبة تسمع جنت كاعدة قريب مدتلي ايدها وحجت

زهـره... هاج يمه شوفي ياهو الخابرلي وشيريد ما اسمع من الهوسه

اخذتة من عدها وخليتة على اذني بتردد سمعت صوت خالو زڪريا يحجي

زڪريا... يمه يلا طلعي انتِ والبنية يم شارع السدرة اوڪفن وانه اجي لا تتحرڪن

سديتة بسرعة والتفتت الها

شُـــــذير.... باجي خالو زڪريا يڪول طلعولي يم باب السدرة

حجت ام آرام

.... هذا زڪريا هم يلعب شايف باب السدرة شصاير هسه رجل ما الج تخلين

زهـره... شسالفة مو هاي الناس هالتطلع واطب خلي نتوڪل واخذ البت

آرام.... لا بيبي لا اطلعن صدك ترا ازدحام

ما قبلت باجي الحجية واصرت تاخذني ڪامت وكضت عوجيتها واشرتلي اكوم كمت وياها ورضا دك رجل الة ايروح ويانة

أسيل.... اكعد ماما وين رايح ازدحام بيبي ماتكدر اتسيطر عليكم اثنينڪم

رضا... ماااا الة اروح وية بيبي انه رجال جبير شنو عبالج زغير وادرعم واضيع

آرام.... اي اي ندري بيك سبع ابقى يمي

رضا.... لا اريد اروح وية بيبي

حجاها واجة وكف يمنة

زهـره... عوفي يروح ويانة

سكتن وما حجن شي طلعنة من الامام بصعوبة وبطلاع الروح وكفنة يم الباب الڪال عليه وضلينة ننتضر شوية ورضا كال

رضا.... بيبي بية ****

زهـره... يا يا ملفوك

رضا... راح **** على روحي اخذيني للحمام بسرعة

زهـره... يا يا ملعون الوالدين شنو *** من طيح الله حض الخلفوك وين اوديك انه بنص الازدحام

شفتة ضام رجليه ويحجي بصعوبة

رضا... ولج بيبي اخذيني عسمة ببطل اخذيييني

التفتت الي وحجت

زهـره... خايبة شذرة ابقي هنا واڪفة ولا تتحرڪين من بمچانج خلي اودي هذا لا النوب يفضحنة بين الوادم

هزيت راسي وهيَ اخذتة وتأكد ما اتحرك من مكاني

ولا زالت الحكاية مستمرة

البارت 6832 كلمة اذا تكولون قصير ارتكب بروحي جريمة
(لا منو كال متأثرة بتاج؟)

+++اشباه الابطال عن قريب بس اكو وحدة شالعة كلبي ما جاي الكة الها الي هيَ شُـــــــذير فعلى ما الكة الها وانشر ++ وصلو الرواية 100 الف مشاهد قبل البارت عشرين واذا وصلتوها ينزل الكم بارت مو بالموعد 🫣

ملاحظة // التنزيل
خميس
جمعة
ثلاثاء

تصبحون على الف خيرر