بين انيابهم

••العثــرة السادسـة عشـر••

بســم ﷲ الرحمــن الرحيــم

السـلام عليڪم

#بيـن انيابهـم

#بقلمـي أنـا: زهــࢪاء

حساب الانستا: zaii1_8

لا تنسون التصويت +التعليق بين الفقرات

+احبڪم زهوراتـي 💋

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

تـــــاج

.... وين توصلين؟

تـــــاج.... للبتاوين

بسرعة باوعلي بالجامة وحجة

.... متأڪدة؟؟

تـــــاج.... اي

.... انزلج على الشارع ما ادخل اني

تـــــاج.... هذا هوَ

حرك السيـارة واني سندت راسي على الڪشن وخليت ايدية على بحضني ضاااايعة ضاااايعة ما اعرف وين اروح حياتـي ڪُلها خربطة ما اعرف ساسها من راسهـا متهجولة بين الاماڪن ومنو الي اشوفـة يريـد ينهش باللحمـي غمضت عيوني وحجيت بڪلبي اني رايدة الموت ليش ما اموت واخلص اذا هايه العيشة الغبرة ما اريدها اموت وارتاح على الاقل هناك ماڪو ابتهال وغيرها.

مدة و حسيت على السيارة من توڪف فتحت عيونـي لڪيت السايق يباوعلي بالمراية حجة

... هذا حدي

هزيت راسي ومديت ايدي للجنطة دفعتلة الڪروة ونزلت سديت الباب وراح مشيت الحد ما دخلت بأفرع طلعت موبايلي واتصلت على نفس الرقم بسرعة جاوبوا

تـــــاج... وين صاير البيت؟

... وصلتي؟

تـــــاج.... يعني لو ما وصلت المن اتصل؟

... هسه اطلعلج واحد ابقي واڪفة

سديتة بوجها وضميت الموبايل انتبهت الباب بيت ينفتح طلع من عندة ولد بس شنو من ولد؟! ضليت صافنة عليه ضعيف ڪُلش ومطول شعرة ومبين من هذولي المعوجيين ما اهتميت ضليت واڪفة اجة ناحيتي وحجة بأنوثة حتى اني ما عندي مثلها

.... مرحبا

طكيتها بضحكة بصوت عالي وحجيت بأستهزاء

تـــــاج... ههههههههههههاي مراحب عيني

... حياتي انتِ البنية الي تصلت على انغام

خليت ايد على ايد وحجيت

تـــــاج.... اي حياتي اني ادخلوني لو ناوين اقتلڪم على ايدي ترا شلون عندي صبر اويلي ابيضلك صبر شو دوخر ناقصني بس ش/واذ

حجيتها وعبرتة دخلت للبيت عبارة عن حديقة صغيرة رطبة وبيت طابقين بس حيلل تعبان ومطرر لدرجة اي ساعة يطيح التفتت على صوت سدة الباب لڪيتة نفسة هذا الولد ما ادري البنية

تـــــاج.... ها سندوسـة منين اروح ؟ 

ضحك وحجة

.... حبيت الدلع عيوني ابقي واڪفة هنايه واني هسه اروح اصيح نغومة

حجاها ومشة بدلع كبالي غميتة وهمست

تـــــاج.... جيــرة بڪصتك وبڪصة نغومة

دخل جوة شوية وطلع هوَ ومرة متوسطة بالعمر او نهاية الثلاثينيات سمينة ومن السمن جسمها ازرك ما ادري بنفسجي ولبسها فاضح بشڪل اجت ڪبالي باوعتلي من فوك ليجوة وحجت

انغام...الفلوس؟

تـــــاج... قبلها الضمان؟

انغام... ضمان شنو؟

تـــــاج...محد يلمس شعرة وحدة مني ولو صار غير هذا الحجي ساعتها سجينتي تشتغل

انغام.... ههههههه حلوو منين جاية؟

تـــــاج... من اخس مڪان عالعموم شڪد بالشهر؟

انغام... 300 الف

فتحت عيوني بتفاجئ وصحت

تـــــاج.... خااااب شايفتني قشمر ڪدامج؟ شنو مأجرة بجزر المالديف حتى ادفع 300 الف؟

انغام.... هذا الموجود يعجبج ادفعين خير على خير ما يعجبج ادفعين اشتغلي ويانة وضلي ابلاش عاد خوش بيج ربح

رفعت الها حاجبي ونفخت بضجر هايه الـ300 حاسبة الها غير حساب ردت استقر بمكان وارجع اروح للبصرة اشوف الاوضاع اتنهدت وطلعت الها الفلوس حسبتهن واتفقنة على ڪُلشي و اي شي يصير بية هيَ مسؤولة بس هذا ڪُلة وما مأمنة ومستحيل اثق بهيج نماذج اشرت على الطابق الفوك وحجت

انغام...سوما اخذها للغرفة الفارغة

اشر على عيونة وضحك مشة ڪدامي ومشيت وراه نص الطريق والتفتلي

.... نسيت اڪُلج عندج جنطة اشيلها عنج؟

تـــــاج.... لا همزين ما عندي جان انڪسم ضهرج بالنص

.... اوي مو صوجج

صعد على درج قديم ڪُلش اصلا ما اعرف شلون عايشين هنا صعدت وراه واتلكانة ممر رطب وريحة واضحة لعبان نفس مشينة بالممر المتروس غرف وصلنة النهاية الممر فتح الغرفة وحجة

..... هياتها الغرفة بس قفل الباب عطلان

باوعت للقفل مڪسور نفخت بضوجة وطلعت فلوس انطيتهن الة وحجيت

تـــــاج... جيب قفل وتعال سوي

... ما اعرف اني شنو شايفتني اصلح بيبان

هزيت ايدي وحجيت

تـــــاج... وجعة ڪون جيبة واني اسويه

اخذ الفلوس وراح دخلت للغرفة وشغلت الضوة الغرفة صغيرة ڪُلش يمكن لو اجيب شُـــــذير وياي ما تڪفينة وڪُلها تراب اتنهدت ورفعت اردناتي وطلعت الغراض البيها وشمرتهن بالممر شوية واجة هذا الارعن انطاني الغراض

.... محتاجة شي بعد يحلوة؟

تـــــاج.... اي جيب وصلة مسح وتعالي اقصد تعال امسح الغرفة ونضفها وياية

.... بفلوس ترا مو ابلاش

باوعتلة بضوجة وهزيت راسي بأي الفلوس طارن وما ضل شي منهن سويت الباب وهذا نضف الغرفة خلص وفرشها واجة وڪف كبالي واتخصر ومدلي ايدة

.... عيني انطيني حق تعبي

تـــــاج... شسويت رڪصتلي؟

.... نضفتلج الغرفة سويتها تلمع وتجنن خلي انام اليوم هنا

تـــــاج.... خاب كممم لك الاخبن الارعن ناقصني بس انتَ ما ادري انتِ تنامين يمي

طلعت فلوس من الجنطة وانطيتهن الة وراح حسبت الخردة الضلت بيهن 8 الالف ومستحيل تڪفيني واطلع واطب بيها مسحت وجهي بنفاذ صبر ودخلت للغرفة ورگعت الباب قفلتة وذبيت روحي بالگاع ونمت من التعب

ثانـي يوم طلعت من الصبح افتر بالشوارع وحسبـة تجيبني وحسبـة توديني باوعت الملابسي ڪُلهن تراب وملفتات للنضر خليت ايدية بجيوبي واتعديت على ابو اللبلبي  رجعت كم خطوة يمة وحجيت.

تـــــاج.... انطيني ڪاسة وڪثر عليها ليمون

طلعت الف وانطيتة الة رجعلي ربع وانطاني الڪاسة اخذتها من عندة وڪعدت يمة على الرصيف واڪل رفعتلة نضري وحجيت

تـــــاج.... ما تعرف هنا محل محتاج عاملة اي شي؟

هز راسة بلا

.... لا والله ما اعرف

اڪلت اللبلبي بسرعة وكمت رجعتلة الكاسة ورجعت افتر وادور على شغل ابتعدت بشڪل عن المنطة بس ما اهتميت اهم شي الڪة شغل دخلت بسوك واتعديت على محـل بالة اخذت ڪم قطعة بس ادبرلي هاي الايام وعلى كد فلوسي صارن بخمسة الالف اخذتهن وطلعت واني عقلي راح ينفجر من التفڪير احس تعلگت ببغداد وما مرتاحة هنا ماطول شُـــــذير مو وياي ولا اڪدر ارجع للبصرة واطمن من ابتهال لأن ما عندي كروة هنا الفين لو اطيهن للسايق يشمرهن بوجهي ووياهن زيج رباعي

رجعت للبتاوين جان الوقت غروب عضيت على شفتي وضليت اسب بنفسي شلون اتأخر هيج. هالمنطقة خطرة بالليل دخلت للبيت بسرعة لڪيت الباب مفتوح صعدت فوك ورجعت للغرفة اتمددت بالكاع بتعب وخليت ايدي على عيوني بعدني ما غافية وطفرت من الفراش على صوت رمي وصياح شغلت الضوة ورحت فتحت الشباك شفت جماعة تتعارك وصايرة بالاسلحة بلعت ريڪي ورحت جبت موبايلي وسجلتهم

......

فاصل قصير

بنات الفيديو موجود فقط الصوت تردون انشرة + على اي برنامج تحبون لأن هنا ما موجود خاصية نشر الفيديو

......

ما طلعت الة الثاني يوم نزلت غسلت ورجعت صعدت بدلت ملابسي مشطت شعري بأصابعي ونزلت واني مصممة هالمرة لازم الڪة فلوس حتى اطمن على اختي واذا اضطر الامر ابوك ما يهمني المهم ارجع للبصرة واحاول اقنع ابتهال ترجعها الي.

مشيت خارج المنطقة مسافة طويلة الحد ما وصلت المنطقة مبينة زينة وراقية جان جامع قريب من المكان الواڪفة بي والوقت مغرب تقريباً

خليت شعري ورة اذنـي وانتبهت السيارة بيضة ڪُلش حلوة دا تمشي وراح توصل الي بلعت ريڪي وخليتها توصل المكان قريب ڪُلش من عندي بحركة سريعة وشمرت روحي ڪدامها

ڪضيت رجلي بألم وضايت اصرخ بتمثيل واحجي

تـــــاج..... ااااااخ رجلللللي شبيييييك ما تشووووف دعمتنييي اذا ما تعررررف تسووووق المن تسوووق منوووو سلمممك سياااارة يالفااااهي

نزل من السيارة وعاط

..... اكووو واحددد يشمرر روووووحة كدام السياارةةةة عااااقلة انتِ لو مخبللللة

فتحت عيوني بتفاجئ وصحت

تـــــاج..... لا يا متستحييي فوك شينة كوات عينة فوك ما دعمتنييي دا تجذبنييي؟ اليوم الة اشهرك شهيرة

.... شتشهررررين انتتتت الذبيتيي روووحج كدام سيارررتي

تـــــاج..... اااااااخ رجللللي دعمنييي الما يشوووف بعيوووونة يممممه رجلي يممممممه المايستحيييي يتهمنننننني

غمضت عيوني بألم كاذب وصحت

تـــــاج.... رجللللللي عساااك ما تشوف طعمم الراااحة

باوع الساعتة و رجع باوعلي

... كومي اخذج للمستشفى امري الله حتى الصلاة فات وقتها

فتحت عيوني وصحت

تـــــاج.... شقصددددك تاااخذني للمستشفى عااايزتلللك انييييي لك فلوووسي اتسد الشمسس

مسح وجهة بنفاذ صبر ودار للجهة الثانية وهمس

.... ياربي منين تطلعلي هاي النماذج النوب المصيبة حلوة

صحت عليه

تـــــاج.... سمعتتتتك لك احترم نفسك فوك ما دعمتني وما تشوف بعيونك جاي تتغزل بية صدك ما تستحي وما عندك خجل هسه لو وحدة من خواتك جان صارت خط احمر اليباوع عليها تنفڪس عيونة بس احنه بنات العالم لا بنات البطة السودة عادي تتغزلون بينة اكوووول عوف الحجي وتعال ساعدني اڪوم رجلي تأذيني من كون صلاتك ما تنقبل وما توصل الڪبة المسجد ڪوون سيارتك تتفلش وما تفرح بيها

ضل فاتح حلڪة ويرمش بصدمة رجعت صحت

تـــــاج.... ااااخ رجللللي يمممة رجللللي

حمحم واتقدم يمي مدلي ايدة عرفت لهيتة بالحجي من ملامحة الشاردة ڪضيت ايدة صفنت بعيونة وخليتة يضيع بعيوني ابتسمت وبدون لا يحس مديت ايدي بجيب الدشداشة سحبت جوزلانة ودفعتة عني ورڪضت بأقوى سرعة عندي سمعتة يصيح وراية بصوت عالي

..... تعاااي ولللج الحراااامية شأخذتتتتتي منيييي

التفتت الة اني ارڪض شفتة يركض وراية بس اني اسرع منة صحت عليه

تـــــاج.... مرة ثانية لا تسنح هههههههههاي

غمزتلة وضليت ادخل بالافرع الحد ما ضيعتة وڪفت بفرع وايدي على ڪلبي اتنفس بسرعة ونفسي مو مستقر بلعت ريڪي وباوعت للجوزلان عاصرتة بأيدي ابتسمت وفتحتة اول ما شفتة عبالك انصعقت على راسي

فااارغ!! مابي ولا ربع بس الجنسية صحت بصوت غالي

تـــــاج... لا يا فكرررررر يا جلللف النوووب يصيييح الحرااامية شبكت منكك متڪلي جووزلانك فاااارغ يالفڪرررر راحت الخطة والصياح والدك واللطم تفلة بشط امدااك

اجيت اذبة بالحاوية بس كلت لا خلي اضمة ضميتة بجيبي ومن القهر ڪلساع اغلط عليه وامشي واصيح واني اغلط صوتة

تـــــاج ... ولج الحرااامية.... الفڪررر فلس ماكو بجوزلانة جان ڪلت الحرامي الراح يبوڪة شنو يستفاد امداك

صـادفتهُ فـذابت ثـلوج بـالي
ايـن يميـني؟ أيـن شمـالي؟
تـلامست يـدانا.....
ولا اعلـم ماذا جرى لي
ارتعـد قلبي ولمعت عيناني
يالله ما هذا حالي؟
جلس بجـاني قريب
اشعرت بروحي تحلق الـى السماء يحدثني ويبتسم
وها انا بحبة وجدت احـلامي
يهمـسلي بأنـه يحبني!
فسأل الله ان يزيد ثباتي
وماذا عن اول لقاء؟
هذا لقائي
دونتهُ في البال والقلب لأخر حياتي

فار دمي ضليت امشي واغلط بڪلبي واتمنى واحد يدحجني حتى اطلع حرڪة ڪلبي بي مشيت بضوجة واذانتي عبالك يطلع من عدها دخان

صدفة انتبهت اللافتة على باب مطعم مڪتوب عليها.... مطلوب عامل.... المطعم مبين جديد من ريحة الصبغ فتحت الباب ودخلت لڪيت عمال يشتغلون ويرتبون بالطاولات شفت عامل شايل قطعة مالت خشب اجة يريد يعبر من يمي صحت

تـــــاج... وين صاحب المطعـم؟

اشرلي

..... جوة... جاية على مود الشغل؟

تـــــاج ....اي

رحت بالاتجاه الاشر عليه دخلت للغرفة جان رجال جبير ڪاعد ويسجل بالاوراق اتحمحت وحجيت

تـــــاج.... تردون عاملة؟

رفع نضرة الي ورجع ليورة على الڪرسي وحجة

... شنو تڪدرين تسوين؟

تـــــاج ... شنو عدكم نقص اكدر اسوي واني اتعلم بسرعة

.... عدنة نقص بڪُلشي حتى بالحلوات

حجاها وحك لحيتة رفعتلة حاجبي وحجيت

تـــــاج... من الاخير محتاجين عاملات لو لا؟

ضحك وهز راسة بأي

....اسمج وعمرج

تـــــاج..... تـــــاج عمري 18

... شغلج غسل صحونة وتنضيف اكو مشكلة؟

تـــــاج.... جؤ بس من اي ساعة يبدي الشغل؟

.... من 3 العصر للـ12 بالليل

شهڪت وحجيت برفض

تـــــاج.... لا لا ما اكدر لـ12 بالليل فڪر بيها يعني اني بنية وين اكدر لـ12 بالليل يلا ارجع للبيت

... مشڪلتج مو مشڪلتي انتِ الي رايدة هالشغل يعني محد جابرج وهذا الموجود ما عاجبج الله ومحمد وعلي

بلعت ريڪي واتنهدت ما عندي غير خيار ثاني بس بـ12 بالليل صعبة والمنطقة الكاعدة بيها بـ12 يكومون يقرون لطميات و يسبحون

باوعتلة وحجيت

تـــــاج.... هذا هوَ شڪد بالشهر؟

.... الدفع شهري 150 الف

صفنت الحيرة المبلغ حيل قليل بس هذا اكثر شي اكدر عليه وزين ومن لكيت شغل اتفقت وياه وسجلت رقمي عندة وابدي وياه عڪب باجر على ما يكملون الاثاث طلعت من المطعم واني صافنة 150 الف شسوي بيهن؟ للاجار لو الالمن زين وشُـــذير لازم اجمع فلوس حتى اجيبها نفخت بضجر وكلت لازم ادبر فلوس وما تهمني الطريقة لو اعرف ابيع روحي اختي لازم تجي يمي

رجعت للبيت مشي اول ما دخلت للمنطقة طلعت السجينة من الجنطة ڪضيتها بأيدي ومشيت بهمة وحواجبي عاقدتهن الدرجة الي يشوفني يكول هادة عليهم

لڪيت كبال الباب سيارات ما اهمتيت من كثر ما متعودة عد بيت ابتهال وقاسم دخلت للبيت وصعدت كبل فوك وقفلت الباب عليّ نزعت الجنطة واتمددت بالكاع وخليت السجينة على ڪلبي صرت ما أمن الاي شي انام واني خايفة والف حسبة ببالي ما راح ارتاح بحياتي ڪُلها الي ما مفتهمة من عدها اي شي

الموت ارحملي بهووووووواي من هذا التعب والعوز والخوف مرات معدتي تتڪطع من الجوع بس ما اكدر اكل الالف والخمسمية الي اصرفها اليوم تفيدني باجر

جسمي هزيل وضعفت اضعاف واضعاف الدرجة ما اكدر اعين نفسي

غمضت عيوني واجة على بالي الرجال الذبيت نفسي كبال سيارتة ضحڪت وسبيتة بصوت عالي

تـــــاج... ابن الفڪر جوزلانة فارغ ويڪول الحرامية النوب شلون سنح بوجهي جيرة بڪصتة ما صدك انطيتة مجال.... لا تـــــاج انجبي مجاليش اشو شبعتي رزايل وانتِ ذابة نفسج على السيارة

ضليت اهذي وامسلت وحدي الحد ما نمت مر ثاني يوم عادي واليوم الي بعدة طلعت بالثنتين الضهر واني ارتب بشعراتي وامشطهن بأصابعي

سرعت خطواتي الحد ما عبرت المنطقة دڪيتها مشي للمطعم الدرجة رجلية اتڪطعن والشمس سطرتني ما كدرت اكمل كعدت على الرصيف والدنيا دارت بية عصرت راسي بأيدية والدوخة ازدات عندي

بلعت ريڪي وغمضت عيوني وعصرتهن فتحتهن بعد مدة وجبرت نفسي اصير زينة واڪوم

ڪملت الطريق الحد ما طلعت روحي يلا وصلت فتحت الباب مالت المطعم ودخلت جانوا دا يجهزون وبعدهم ما فاتحينة ومستقبلين زبائن رحت القسم العاملين اول ما دخلت لڪيت هواية شباب وهم اكو بنات بس بعدد قليل

جانوا يتناقشون على الشغل ومبينين دايتعارڪون الة شوية

شفت اغلبهم لابسين زي الشغل واحد حمحت وسألت بنية

تـــــاج.... منين جبتو هاي الملابس؟

دارت عليّ وحجت

.... ها انتِ تشتغلين ويانة؟

تـــــاج... اي لعد اذا ما اريد اشتغل شڪو جاية

.... ههههه هم صدك على العموم حبيبتي جيبيهن من المدير

هزيت راسي ورحت الغرفة المدير فوك بالقسم مالت العوائل دڪيت الباب ودخلت

تـــــاج.... استاذ ڪالو الزي اخذة منا

.... اول شي ليش متأخرة؟ اني هالتأخير ما ارضة بي هنا اي شي يصير تتحاسبون انتم جية فوك الــ3 ما اريد فاهمة يحلوة؟

تـــــاج.... بيتي بعيد قابل اجي بطيارة لو ارڪبلي جناحات؟

دك على المكتب وصاح

..... بدووون نقاااش جاااية انتِ هنا تشتغللين عننندي احجي اغلط حلڪج ما تفتحينة وتجادلين ساعتها يصير غير حجي

لميت شفتي للداخل وما جاوبتة بس ضليت اباوع الة بحقد واتمنى ادوس بمصارينة اشرلي على الملابس اخذت ونزلت بدلت بالحمامات وطلعت

رجعت للغرفة مالت العمال لڪيتهم كلمن يحجي بصفحة ڪعدت على جهة شوية واجت كعدت يمي البنية الي سئلتها على الملابس

.... شنو اسمج؟

التفتت الها واتنهدت وما جاوبت رجعت حجت

....يمعودة هوَ بس اسم شنو سائلتج

تـــــاج.... اسمي تـــــاج

ابتسمت وجاوبتني

... واني اسمي رؤى

ابتسمت ابتسامة خفيفة ودرت وجهي شوية واجة ابو المطعم كمنة كلنة ووكفنة سطر واحد وبدة يقسمنة على الشغل والاڪلات الموجودة وطريقة تعاملنة وية الزبون اني وڪع عليّ غسل الصحون وتنضيف المطبخ اخذ من عدنة جناسينة وراح

كلمن راح على شغلة وافتتحو المحل وبدت الزبائن تجي وهوَ مسوي عرض اول يوم افتتاح المطعم الاكل مجاني

وڪفت بالمطبخ ڪُلها ربع ساعة وبدت المواعين تتراڪع علينة بديت اغسلهن ووياي رؤى وولد انتبهت الهم بيناتهم نضرات اعجاب وابتسامة ما اهتميت وعفتهم نارهم تاكل حطبهم الي عليّ شغلي وبس شوية والولد راح دارت علية رؤى وحجت

رؤى.... اكلج تـــــاج انتِ مبينة محتاجة نفسنة خلي نتفق احنه الثلاثة وانكول للمدير يدفع النة الراتب مقدم

صفنت الكلامها وحسبتلها صح اني ما عندي ولا فلس بس الف دينار بجيبي وراس الشهر بعدلة هوايه رجعت نضري الها

تـــــاج... اي خلي نحاول وياه بس خاف يجرلنة زيج ثلاثي الابعاد؟

ابتسمت وحجت

رؤى.... هذا هوَ عمري نهاية الدوام نحجي وياه ونحاول

هزيت راسي ورجعت اشتغل مر وقت الدوام وخلص من روحانة طلعت بدلت ملابسي ولبست جنطتي وطلعت اجيت اطلع وسمعت صوت رؤى تصيح

رؤى.... ها تـــــاج شنو نسيتي؟

التفتت الها وعقدت حواجبي اتذكرت وحجيت

تـــــاج.... ها ها اتذكرت

رؤى.... لعد يلا امشي

اجة الولد مشينة ثلاثتنة وصعدنة فوك دكينة الباب ودخلنة لكيناه دا يلم بغراضة وكرشة مدندل قبلة

حجة بدون لا يباوع النة

..... خيركم

حجة الولد

... استاذي بس بدون امر عليك اذا تڪدر احنه الثلاثة انريد راتبنة مقدم لأن تعرف اغلبنة خريجين وعاطلين عن العمل يعني ما عدنة مبلغ جوة ايدنة

اخذ عود اسنان ونضف اسنانة انقرفت ولو بيدي اركعة بالجنطة وشكو شي بيها

.... يعني هسه تردون راتبكم مقدم؟

تـــــاج... اي

باوع النة بتفڪير وفتح جرارة طلع فلوس وحسبهن وبدة يوزع علينة ومنو ياخذ يوقع وصل السرة الي اخذت من عندة الفلوس وكضيت القلم صفنت على تواقيعهم تخبل هسه اني شلون اوقع اخر شي كتبت شخابيط

وطلعت من المطعم دا امشي وحسيت واحد وراي التفتت شفتها رؤى نفخت بضجر وحجيت بڪلبي هاي شلون لزڪة وصلت يمي وضلت تمشي وياي

رؤى... خاف اضوجج بس بيتنة قريب وما تسوة اخذ تڪسي عاد كلت وياج امشي اخاف وحدي وبيني وبينج ابيع براس خطيبي هيبة حتى لا عبالة اخاف

باوعت الها وحجيت واني اخلي ايدية بجيبوبي

تـــــاج.... خطيبج هذا؟

ابتسمت وحجت

رؤى...اي خطيبي وجايين نشتغل سوة حتى انلم فلوس العرس

تـــــاج....اممم بالتوفيق

رؤى.... سؤال؟

تـــــاج... شنو؟

رؤى....وين بيتڪم؟

طكت روحي وكفت وصحت

تـــــاج... انتِ يا اما احد دازج عليّ لو فضووووولية زيادة بابا هاي حياتي الخاصة عوفيها على جهة ما احب اسولف عنهااا

اتفاجأت من ردت فعلي حجت بفشلة

رؤى.... هه اسفة والله مو

سحبت نفس وقاطعتها

تـــــاج.... لا هذا هو لا تعتذرين اني هم زودتها بس من التعب ما دا احس بروحي

هزت راسها وحجت

رؤى..... يلا تصبحين على خير بيتنة بهذا الفرع

ابتسمت الها مجاملة وراحت كملت طريقي للشارع واجرت تڪسي صعدت وحجيت بتردد

تـــــاج.... للبتاوين

باوعلي بالجامة وغمز خزرتة ودرت وجهي للجهة الثانية حرك السيارة والطريق ڪُلة يذب حجي وصلنة المكان قريب من البيت صحت

تـــــاج.... اوكف هنا

وكف السيارة اجيت اطلع فلوس الكروة سمعتة حجة ڪلام مو حلو

فتحت عيوني بصدمة ومديت ايدي للجنطة وسحبت السجينة وجهتهة الة وصحت

تـــــاج.... شڪلت لك؟

انخطف لونة راد يحجي قربت السجين اكثر من وجهة حجيت واني ارفع حاجبي

تـــــاج...الڪدامك مسودنة والمنطقة الكاعدة بيها تساعد على السوادين يعني هسه من اڪتلك هنا بمكانك وادفنك محد يفك حلڪة

نبتت السجين براسة وضغطت بحافتها عليه فتحت الباب بالايد الثانية ونزلت بسرعة ومشيت واخذتها فرصة حتى ما ادفع ڪروة

دخلت للبيت بوقت متأخر طلع هذا الي اسمة سوما يطوطح و لابس فستان ما ادري دشداشة اني ما لابسة مثلها هزيت ايدي وعبرتة بسرعة وصعدت فوك دخلت للغرفة وقفلت الباب

•••••••••••••••••••••••••••••••••••

شُـــــذير

سڪنت عن الحرڪة وغمضت عيوني بس ما نمت

بديت اغفى بدون لا ادري الحد ما نمت فزيت الصبح على صوت حجي النسوان وضحك وسوالف

فتحت عيوني وانتبهت النفسي مغطاية ببطانية باوعت للصفحة اليمنى البنية البارحة خذتني للحمامات دا اتمرخ برجلين الحجية

ڪعدت على حيلـي فرڪت عيوني وحجيت واني موجهة كلامي للحجية

شُـــــذير.... باجي ما اجت اختي؟

انتبهت الي وحجت

زهـره.... حبربشية كولي صباح الخير بالبداية

سڪتت بفشلة وهيَ حست عليّ ابتسمت وحجت

زهـره.... لا بيبي محد اجة كومي اڪليلج ب
لڪمة فتحي ريجج

شُـــــذير.... لا مو جوعانة

زهـره.... والحسين انتن الاثنين.... (واشرت علينة اني وآرام)... جهرتجن تغمد على الڪلب

آرام.... شترديني بيبي اصير هايشة من الاكل عوفيني على راحتي

اشرت بأيدها وحجت
زهـره.... ولج انه من جنت كدجن اهاا الزند ومربرة تربر بحيث من امشي على الكاع اخسفها خسف

آرام... بيبي هاي تريلة مو بنية

غمتها وآرام كضت زنودها كرصتهن وغمزت

آرام... ضلن هالزنود محد بحالهن ياكلهن الدود بعد يومين

زهـره... ويهد الهلحجي الماصخ... دارت عليّ وحجت..... خايبة نسيت شسمج انتِ؟

شُـــــذير..... شُـــــذير

آرام.... الله حلو اسمج حسيت بالانتماء لأن كلها تحجي على اسمي

ابتسمت الها وضليت كاعدة بمكاني بعدين حسيت على نفسي كمت طبكت فراشي وخليتة على صفحة وكعدت بالزاوية العب بأضافر رجلية وبالي شارد وين اڪدر الڪة تـــــاج بعد معقولة تلگة اهلها وتنساني؟

دمعن عيوني وحجيت بغصة لا لعد هيَ ڪالت ما اعوفج ولا انساج فزيت من صفنتي على آرام وهيَ تعڪس المخدة وتتمدد كبالي حجت

آرام... انتِ بالمدرسة؟

هزيت راسي بأي

آرام.... انه هم يا صف؟

شُـــــذير.... سادس ابتدائي

آرام... جا انه اكبر منج انه بالخامس اعدادي

بادلتها الابتسامة وهزيت راسي بأي

شوية واجت بنية شايلة طشت مالت خضرة وكفت بالنص ووصاحت

.... آرام تعاي ساعدينة مو بس نايمة

عقجت وجها وحجت بهمس

آرام.... استغفر الله هم اجت هاي هسه شيبلعها يراد وراها درام مالت سفن وهم ما تنبلع

دارت عليها وحجت

آرام.... ڪلاتي اتأذيني ما اكدر اكعد

جاوبتها
.... بس شوية ونخلص الشغل ڪلة علينة اتزحزحي شوية ڪلشي ما بيج مو ڪبل شوية سمعتج تردين ترحين تمشين

حجت الحجية

زهـره....ليلى عوفي البت كلاتها البارحة ما نامت وهسه واذا اشتغلتي يكصر منج طول لو عرض وما مشتغلة النة مشتلغة الزوار ابا عبد ﷲ واشتغلي واندعي علواه ينجحج

كلبت وجهة وراحت رجعت آرام دارت وتدرم

آرام.... الحية تتعمد تضوجني

باوعتلي وابتسمت

آرام....راح اطلع امشي خطوات ترحين تمشين وياي وهم بلكت تلكين واحد من اهلج

صفنت عليها شنو اجاوبها لا اعرف صدك تـــــاج هنانه حتى يصير عندي امل ولا اعرف ابتهال تجذب عليّ ضليت مترددة اوافق لو لا

آرام.... لا تخافين نمشي شوية ونرجع

هزيت راسي بس بداخلي تردد جبير وخوف ابتسمت وكامت

آرام... البس عبايتي واجيج

راحت وشوية ورجعت لابسة عباية وشال بس كُلش حلوات عليها عود نفس ابتهال من تلبسها

كمت وكفت يمها

شُـــــذير... عادي بس تاخذيني للحمامات؟

آرام.... اي ادللي تعاي

زهـره....بيبي ديرن بالجن وانتِ آرام لا تضيعين البنية

آرام.... لا بيبي شسالفة

حجت نفس هاي البنية الي كالت الآرام تنضف الخضرة

...جا مو كلاتج تأذيج شو هسه رايحة تتمشين

ماجاوبتها اجينة نمشي وصاحت عليها مرة

..... آرام وين ماخذة البنية تردين تورطين روحج كعدي وسكتي بلا طلعت متفقة وية عصابة كلشي بيها الدنيا كعدي وربزي ولا تسوينة مشاڪل

بلعت ريڪي وانقهرت من ڪلامها ما كالت شلون احجي هذا الحجي يمها صح صغيرة بس الي مشاعر وافهم واتحسس حجت وحدة ثانية

..... يابة شطلابتجن رادت تمشي خطوات وتاخذ البنية وياها بلكت تشوف واحد من اهلها سويتنها طلابة منا انتِ ومن بتج....(باوعت الآرام وحجت).... روحي يمه معليج باليحجي هيَ الناس شعدها غير القال والقيل

كضت ايدي آرام ومشت وهيَ عاقدة حواجبها ومبينة ضاجت من حجيهن طلعنة من الحسينية وكفت قريب من الصحيات واني دخلت قضيت حاجتي وغسلت وطلعت لڪيتها بعدهي تنتضرني مشيت الها

شُـــــذير..... اذا اسويلج مشاڪل بروحتي وياج عادي ما اريد اروح والله روحي وحدج

باوعتلي وابتسمت

آرام.... لا حبيبتي معليج انتِ بس هنا الخبث يمشي بدمهن على العموم تعاي خلي انروح

مشيت وياها واني ما اندل بس هيَ تمشي واني بصفها وكفت كبال المكان الي يوزعون بي جانوا يوزعون عصير اشرت الطفل عمر تقريباً ست او سبع سنوات وهوَ بس شافها اجة يرڪض ناحيتها وصل وهوَ يلهث ويحجي

..... ها عمة ليش طالعة

آرام.... حبيبي اريد نمشي اني وهاي الحلوة روح انطي خبر الابوك

.... ابوي ما هوَ راح يزور  وما قبل اروح وياه

.... جا روح الزڪريا انطي خبر وتعال امشي ويانة

راح بسرعة يرڪض شاور هذا الرجال ابو اللفات واشر علينة باوع الآرام وهز راسة رجع الطفل يرڪض ناحيتة كض بأيد آرام ومشينة الطريق ڪُلة اباوع للناس وللاجواء بعمري ما شايفة هيج ومستغربة ڪُلشي التفتت الآرام

شُـــــذير.... هوَ هذا الطريق يوصل للمزار؟

آرام... تقريباً اي

باوعلي الطفل وحجة

....جا انتِ ما زايرة ڪبل؟

هزيت راسي بلا ورجعت اباوع للطريق وللوجوه بلكي صدك واشوف تـــــاج بس تشتيتي بالوقت الي ضحكت عليّ ابتهال بي بسبب فرحتي ما ركزت ان تـــــاج ما تمشي هنا او تفڪر تجي

اتنهدت ودنڪت راسي دمعن عيوني وغوشن ما كدرت اكمل مشي وكفت بالطريق التفتت عليّ آرام اول ما انتبهت الي ركضت عليّ بخوف وحجت

آرام... لا لا تبجين والله تلڪينهم ما تضيعين ما معقولة يضيعون بتهم اكيد يجون اذا مو هسه العصر او بالليل او باجر تلكينهم هسه مخبوصين وما جاي يفكرون عدل وحتى ابوي ما ساكت واليوم الصبح اجة سأل عنج

رفعت راسي ومسحت ادموعي وهزيت راسي بأي بس كدامها بس داخلي رافض هالكلام هه ما يضيعون بنتهم؟؟ ليش همَ وينهم؟ اني هم عندي اهل؟ مرات اكول تـــــاج اهون مني على الاقل عايشة على ذكراهم بس اني؟ ما اتذكر ولا اعرف اي شي عنهم

مشينة شوية ورجعنة للحسينية

للعصر ما كدرت اصبر غافلتهم وكمت طلعت برة الحسينية لڪيت اكو ازدحام يم الباب وهواي ولد واكفين انتبهت الابو اللفات  منطيني ضهرة ويحجي وية واحد

عبرت الة بتردد همست

شُـــــذير.... خالو

ما سمعني لأن ازدحام وصوت الرادود عالي جريتة من ردن دشداشتة السودة ورجعت حجيت

شُـــــذير.... خالو

انتبه الي وباوعلي عقد حواجبة ودنك راسة من عندي حتى يسمعني

.... ها؟

حجيت حتى لايشك بية ما عندي احد

شُـــــذير.... ما اجو اهلي؟

..... لا

شُـــــذير.... ولا حتى اختي؟

رفع راسة وحمحم وحجة

.... لا محد اجة خلي تخلص هاي الايام وانه افرغ وادورهم انتِ وين بيتڪم حتى اوديج الهم

شُــــــذير... بيتنة هذا

اجيت احجي  قاطعني

.... هسه عمو دخلي جوة ولا اطلعين بعد وانه افرغ واجي اسمعج

شُـــــذير.... بس اني ما اريد ابقى هنا اريد اختي هنا اڪو هوايه بشر واني ما متعودة اشوف واكعد وية هوايه بشر واصلاً همَ بس يتعارڪون على الشغل وباجي زهـره بس تصيح اني اريد اختي وحتى م

سڪتت من حسيت نفسي راح اجفص حك حاجبة وهز راسة وهوَ يضم ابتسامتة راد يحجي واجة هذا الرجال الجبير شافنة وحجة بعدم رضا

..... زكريا البنية ليش طالعة وواڪفة بنص الرياجيل هذول هاي امانة تعتبر بتنة الحد ما نلكة اهلها

جاوبة ابو اللفات

.... اجت تسأل على اهلها ما ادري اختها

باوعلي الرجال الجبير

.... بابا روحي دخلي يم البنات واحنه بس خلي نفرغ الكالج اهلج وعلى هالشارب

اشر على شاربة هزيت راسي بأي ودخلت جوة للحسينية لڪيت مرة كلش حلوة كاعدة يم الحجية وتبجي وتحجي

..... يا يما ما النة حكاية ببلدنة سلبو منة بيوتنة وحريتنة وهجرونة كل ما اقشع بناتي الحزن باين على وجوهن ما اقدر انام ليلي زوجي ما اعرف وينو عبرنة لهين وراح يسحب اخوه من الدواعش بعد ما انضم الهم ولليوم ما بنعرف عنو اي خبر

مسحت الحجية على ايدها وحجت

زهـره..... يا يمة هيَ هاي الدنيا يوم الك ويوم عليك والنصر قريب ان شاء الله وترجعون البيوتڪم الله ينتقم من ڪل واحد الة سبب وايد حسبي الله ونعم الوكيل عليهم عساهم مايضوكون طعم الراحة..... وهذا حماج شجاه وانضم الهم ما عندة لا دين ما يخاف من الله جان كال شلون اساندهم وهمَ يردون خراب محافظتي

..... اتغير كثيغ عن قبل مانعرف كيف غسلو دماغو وغروه وصل حدو يمد ايدو على اخوه الاكبر منو وارد ييبيع بنتي الكبيرة لو ما الرب ستر والجيران ادخلت

زهـره..... يا يا من الله لا ينطيه ڪون ينفشك راسة ما ندري ندعي اعليه لو ندعي حتى الله يهديه........(طبطبت على ايدها وحجت)... لا تشيلين هم يمه الحسينية بيتڪم الثاني صار وهسه احنه هم جم سوم ونرد الديرتنة وانتم هم تاخذون راحتكم بهاي الحسينية واذا ما كفتكم بيت حمد مفتوح للرايح وللراد وما طول الله امڪنة ما نقصر عنڪم

باست راسها واتشڪرتها انتبهت الحجية الي وعاطت

زهـره....وين رحتي يمه ما صدكتي غافلتيني وفلتي درت وجهي ما لڪيتج

كعدت يمها وحجيت واني اخفي غصتي

شُـــــذير.... لا ما رحت بس وكفت برة

.... هذي بنت أبو أيسر الرب يحفضها

زهـره....لا ابو أيســـر عندة بس بت وحيدة آرام هاي البت تاهت من اهلها صارلها يومين واهلها ماڪو هم خطية رويحتها مفرفحة عليهم

.... يا خطية الرب يسهل امرها وتلاقيهم صدك تضيع بدونهم

حجتها واستأذنت من الحجية وڪامت انتبهت الآرام كاعدة وية البنات تڪصص رڪي انتبهت الي واشرتلي اجي يمها كمت من مڪاني ورحت كعدت بصفها انطتني شلف رڪي وابتسمت اخذتها منة وبادلتها الابتسامة

ليلـى.... زڪريا ڪال بس اكمل سادس يخطبنـي

طكتها آرام بضحكة عالية باوعت الها مستغربة والركي بحلكي

آرام... تكملين سادس؟ بالمشمش حبــي سامعينها منج قبل 3 سنوات وهاي الرابعة وانتِ بعدج بالسادس ما طلع سادس راح اطلعين تقاعد وانتِ بعدج بي

انكلب وجهة جاوبتها بحدة

ليلـى.... وانتِ ليش محروك دمج؟ يحبني وينتضرني سنتين وثلاثة واربعة انتِ شڪو؟

آرام.... اعتقد الجاي تحجين عنة هوَ اخوي مو؟ فأحترمي نفسج واسلوبج عدلي

يحجن هذا الحجي واني مفهية اريد افتهم رباط السالفة ماكو حجت بنية وياهن

....كافي بنات شسالفتجن بس تتعارڪن ما مليتن

ليلى..... ما تشوفينها شلون تعايرني لأن عدت اربع سنوات على الاقل انه عدت بكامل صحتي مو راحت عليّ سنة بسبب مرضي

دفعت آرام الصينية وصاحت

آرام... شقصددددج لج تعايرني بمرضي؟؟ الحمد الله راضية واحمد الله واشڪرة المرض مو بني ادم من الله واني مؤمنة وعارفة ابتلاء الله عن حب مو عن عبث وڪلشي من عندة اعتبرة رزق هالمرة راح اعديها بس المرة التجي والله وبالله السالفة توصل عد ابوج

حجتها وطلعت برة بس مبينة انقهرت رجعت نضري للبنية حجت بلوم

.... ليلى شبيج وياها ما صدكنة اليوم زينة  وكاعدة ويانة وتسولف بطلي حقد ترا هيه بت عمج و كلها فترة واتصير حماتج

شالت الصينية وڪامت ضليت كاعدة بمكاني. بس حيل ضجت من هايه ليلى هيَ صح اي كلام بيني وبيها ما داير بس حسيتها مو خوش وحدة وتجرح بالڪلام

كمت من مكاني وطلعت من الحسينية للساحة ضليت ادور بعيوني الحد ما انتبهت الآرام كاعدة على صبة مالت الماطور ومخلية ايد على خدها والايد الثانية ڪاضة موبايل بأيدها مشيت بأتجاها وڪعدت يمها انتبهت الي وطفت الموبايل وابتسمت

آرام...ها

شُـــــذير...انتِ ضجتي من هايه البنية؟

آرام.... انهههه اضوج من هااايه؟ يمعودة طززز بيها وبحجيها اصلاً ما تهمني بس اااااخ (عضت اصبعها واسترسلت بكلامها) االمشكلة خاطبينها الاخوي القاهرنييي زكريا تتمناه الف وحدة تاخذة ليلى ام الكلك الحية يمنة تطلع وجهة الثاني ويم زكريا تتمسكن وماكو نفس طيبتها

ضليت صافنة ما اعرف شنو ارد او احجي

آرام.... خيييييه ليش تصفنين هواي حطيتي علللة بڪلبي

شُـــــذير.... مو ما اعرف شنو ارد. انتم هنا ڪُلشي عدكم غريب مو نفسنة احنه ما عدنة هيج اجواء قرايات وهيج واصلاً اني ما اختلط وية ناس هوايه بس وية اختي

آرام.... شلون يعنـي جا امج وين؟

سكتت من حسيت نفسي جفصت اتلعثمت وجاوبتها

شُـــــذير.... ها مو اني احب اختي اكثر لأن هاي هيَ ربتني

آرام.... اهااا صدك لو كالو الام التربي مو التجيب ان شاء الله تلڪينهم ويرجع يلتم شملڪم حتى لو تحبين اختج اكثر بس هسه انتِ زغيرة ما تعرفين قيمة الام ما تسدها 100 اخت

هزيت راسي بس ما حجيت بالنسبة الي تـــــاج سادة مكان 100 ام كافي حنانها وتضحياتها الي

آرام... ترحين وياي يمهم جاي يصبون العشة؟

شُـــــذير... لعد وينهم؟

آرام... ورة الحسينية الثانية هنا يطبخون

شُـــــذير..... لا ما اريد اروح استحي

آرام.... يمعودة منين مستحية تعاي وياي

كامت واني كمت وياها انتبهت الملابسي

آرام.... تردين تبدلين ملابسج؟

نزلت نضري الملابسي وهزيت راسي بأي

آرام.... جايبة وياج لو انطيج من عندي

هزيت راسي بأي

شُـــــذير.... جايبة الوان

عقدت حواجبها بس خفت استغرابها وحجت

آرام.... لا ما يصير تعاي انطيج من عندي ملابس

شُـــــذير... بس ما يصير

آرام... ليش؟

ضحكت وجاوبتها

شُـــــذير.... مو انتِ اطول مني

آرام.... هههه مو مشڪلة عود انطيج اتراك وطبڪي ارداناتة وبجامتة

اخذتني من ايدي للحسينية ملاية جنطتها على صفحة فتحتها وطلعتلي اتراك اسود انطتني اياه ودارت صاحت على الحجية

آرام.... بيبي وين الخاوليات الجدد؟

جانت الحجية دا تقرأ بكتاب قريت عنوانة مكتوب عليه زيارة عاشوراء طبكتة وباوعت النة

زهـره.... عد امج تلڪينهن

كامت آرام طلعت شوية ورجعت جايبتلي خاولي انطتني اياهن واخذتني للحمامات سبحت وحسيت صدك ارتاحيت جسدياً بس ڪلبي بعدة مشتعل نار ومو مطمنة

لبست التراك وطبكت اردانتة وبجامتة لفيت شعري بالخاولي وطلعت لكيت آرام هم مبدلة ملابسها ومشغلة الغسالة عليهن ضلت عيوني تتجول على الحمام يلمع وبي هوايه غسالات وحمامات حجيت واني عيني عليه

شُـــــذير.... حلوة الحمامات

آرام....تستاهل زوار ابا عبد ﷲ

شُـــــذير.... صدك شو ما يجون زوار الكم زوار هوايه

آرام.... مو وحدة من الحسينيات للنازحين والثانية النة والزلم بالخيمة بس الفجر هم يجن نسوان يرتاحن ويطلعن بس انتِ نايمة ما تحسين

همهمت بأي وفتحت الخاولي مشطت شعري وضفرتة آرام وطلعنة يمكن آرام اكثر وحدة ساندتني بهايه الفترة وخاصةً اني ما احجي وية اي احد ثاني بس وياها وحتى وياها على كد السؤال والجواب

رحنة الورة الحسينية الثانية لكيناهم كاعدين زلم ونسوان وشي تكصص خبز (تثرد) وشي تصب تشريبة على الخبز بصحونة سفري

كعدت آرام واني ضليت واكفة خجلانة من عدهم ڪُلهم لا اعرفهم ولا يعرفوني شكو حاطة نفسي بالنص وياهم
ما احس الة جرتني آرام من ايدي وكعدتني يمها حجت مرة

... جؤ ماما شبيج وية البنية

آرام.... موتتني ماما

كلها انتبهت الها حجة هذا الرجال الجبير وهوَ يباوع الي

....ها بوية مرتاحة عدنة ان شاء الله ما قاصرين؟

هزيت راسي بدون رد همست الي آرام

آرام.... كولي ما منك قاصر عمو جدو بوية بكيفج. بس لا تبقين ساكتة

هزيت راسي وحجيت بتشنج

شُـــــذير.... ما عندك قاصر خالو

ما احس الة آرام طاكتها بضحكة وحتى اذا ما انتبهو هم انتبهو ڪُلهم باوع الي ضحك ولد وصاح وهوَ يضحك

.... لا ما عندة قاصر عندة بس فلاش

ضحك الرجال الجبير وصاح

.... كافي يلا البنية انحرجت

لميت شفتي للداخل وحلفت بعد ما احجي شي انتبهت على هذا ابو اللفات يصب تشريبة ويحجي وية هاي البنية ليلى وهيَ تسئلة وهوَ يجاوبها انتبه الطفل صغير ومبين توة يمشي يم الجدر صاح

..... يمامة تعاي اخذي ابنج لا يتعور

جاوبتة البنية الي مساع تكصص ويانة رڪي

يمامة...زڪريا انطي الليلى اني رايحة افرش السفرة اڪو نسوان اجن

شال الطفل وخلاه بحضن ليلى بس هيَ  ما اهتمت بس بعدين كضتة كامت يمامة واتعدت من وراية طبطبت على ڪتفي وحجت

يمامة.... حبيبتي كومي وياي ساعديني الج اجر

كمت وياها ورحنة للحسينية فرشنة السفرة وانطتني الخضرة اوزعها على السفرة جاي اخليها وسمعنة صياح برة

ولا زالت الحكاية مستمرة

تصبحون على الف خير