_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
فلا هَوىٰ بعدك يُهتوىٰ
نويتُك بَيني وبينَ نَفسي
ولِكُلِ إمرئٍ مانَوىٰ .
لطفا لا تنسون التصويت والتفاعل بين الفقرات
⊰ دُر⊱
وطئ جسده على تخم منا ومنا يثبت بيده
نزل يركز بعيوني : داويت حرگ ايدچ
وانه ياهو يداوي حرگ كلبي .
مسح دموعي بطرف أصبعه وكمل
_ من رحتي ضاع حيلي يا كل حيلي .
يريد يبتعد مني لزمت أيده وعيوني غورگت بالدموع
_ كرهتني؟
_ ماكو اب يكره بنته ؟
_ تعبتك ؟
_ مو بگد تعبچ بوية دُر .
_ لا تروح .
عافني وطلع بنظراته كسرة كلامة يگول شي
وتصرفاته مبين ضايج مني ومقهور لدرجة
رافض يكعد ويايه ويتفاهم ما متحمل روحه .
فزيت بمجرد ما نزل على عركتهم يتعاركن
عبالك عدوتهن رجعت ليشوف عصبيتهن
يگول شكد معذبتهن وهيج يكرهنها
طلعت قلقانه اكل بأظافري اسمعها تصيح
ميثاق : من حقي احجي وانقهر ، هسة يوم يومين
ويرجعون علينة هم مصيبة لو يذبحون احد لو يخطوف لو يموتون
شلون نعيش بالخوف اول تالي نخاف نطلع والله اخاف اطلع
منهم وجهالي محبوسين بالبيت كلشي تغير من دخلت دُر حياتنا
حتى منطقتنا تغيرت صارت مو امان .
ابو حسن : ودُر شلها دخل بنتي فكرررري شغلي عقلچ
قبل لا تحجين البنية جانت بالضيم هي راحت حتى تسكتهم
وعذبوها حالها من حالنا اهلها شياطين شني بيدها .
بتول : عمه احجي دخيلج احجي والله اذا ترجعوها
وتطلع من حياتنا نخلص من هل خوف والرعب .
عمي يفهم بيهن ولا عبالك معاندات وكفت ميثاق
تضرب بجهالها وتصيح : أمشوا ولكممم امشوا
اشتروا بنت آلشر خليها تفيدهم صار سنين
شايلتكم على راسي وشايلة حمل جبال واگول
ميخالف بس لهنا وكافي دخلتوا الخطر بحياتنا
لو انا لو دُر بهذا البيت .
علي الآكبر: ههههههههههههههههه .
سراج الدين : اعذرني خوية .
علي الآكبر: عوفها اطلع النايمات بگلبها خطية
مبين بعد ماتگدر تتحمل ما تحچي .
ميثاق : لا احجي ولا اعاتب بعد اروح انا تعبت منكم .
ابو حسن : الخاطري لچ بوية لا تكبريها مشاكلنا كافي
تعبانين هذولي اخوتچ المفروض على قهرهم تنقهرين .
علي الآكبر: شوفي ميثاق انا بعمري ماتجاوزت عليچ
بكل اغلاطچ الزايدة تعرفين شنو اقصد مشاكلچ هوووووواي
تدرين ليش ؟
رفع ايده واشر بإصبعين وكمل
_ هذا انتِ وهذا سراج الدين من اقرر اتجاوز عليچ
معناها نويت اخرب خوتي انا وسراج المقصد من كلامي
من طلبتي تطلع دُر من البيت اذا واحد من اخواني يگول صح كلامها
اليوووووووووووووم الدين اعتبره ميت اليوووووووووم
الدين ما اشوفه بطررررررررف عيني بعددددد يموووووت
تعرررررفين شنوووووو يموووووت من تطلبين مقابيل
الكل مررررتي تطلع من البيت معناها تطردين اخوووهم
انتِ على اي اساااااس تطرديني من بيت ابوية ؟
گلب الطاولة عليهه والكل صار ضدها بعد ما كلهم جانوا
ملتزمين الصمت ، سراج الدين راسه ملفوف بس من
سمع كلام علي الآكبر وگف بالباب وهو يرجف
_ هذا بيتنا ومشاكلنا ترضين اهلاً وسهلاً
تگولين البيت والمكان ما عاجبچ الله وياج ومحمد وعلي
انتِ ام جهالي وهاي مقابيل الكل ما مقصر انا وياچ
بس اذا توصل وياج تطاولين على واحد من اخواني لهنا حدنا .
ميثاق : اخوك لو يحبكم ينقهر عليكم ويگول خطية اخواني
شنو كل يومين مفتوح راس واحد بيهم واصل الموووت.
ابو حسن : حدچ لهناااا لا توزين ولدي اخوهم وبمصيبة
انعل والدي والديهم اذا ما يساعدونه چا حتى بالقران مذكورة
وشددنا عضدك بأخيك شني يحارب وحده تردين ؟
بدت تسحب بروحها من شافتهم صدها وريمان
كالعادة بالبداية تگمز وياها بعدين تسحب روحها
وتبقي ميثاق بحلگ المدفع كل الكلام عليهه
بس ما تعبر على حسن ، بعدهم يحچون وصاح بيها
_ ريمان تعالي ورايه للغرفة .
ميثاق : يعني عادي عندك تخلينه بنص الموت
صعبة تعوفهااا صعبة تخلصنا من الخوف .
علي الآكبر: هي كم كلمة مو بس الچ لا للكل
انا دُر لو يگولون اذا ماتعوفها تموت اجاوبهم وياها على موت
ما صدگت ارجع اشوفها مخبلة انتِ تريدين اعوفها
لچ لا ليلي ليل ولا نهاري نهار بدونها
لچ حاربت النوم والزاد بلاها
لا بقت اعصاب ولا حيل والشيب ترس راسي
وحگ داحي باب خيبر دنيا مابيها دُر ما اريدها .
كلهم نزلوا راسهم بعد سكتهم بحيث حرف واحد ماطلع ماينسمع منهم
دار وجهه وصعد رفع راسه شافني على درج اضحك
رفع حاجبة ودار وجهه ودخل للغرفة ولا مهتم
اخذ ملابس ودخل للحمام واني بقيت افتر انتظر يطلع واحجي وياه
رحت عليهم مطشرين كل واحد بمكان وجهال ميثاق يلعبون
عرفتها ما طلعت من البيت ، تراجعت خجلانة من طلع
بدل مستعجل بس رش عطر وبطرف اصابعه يعدل شعره
بإهمال يمشي وهو تعبان رفع الحاف ونام بس نزل ظهره
على دوشك صاح : اخخخخخخ بوية ظهري مكسور .
رفع ايده سد عيونه بيها ودار روحه شفت ظهره
مجرح تجرح ، فتحت المجرات ادور على مرهم
او شي يخفف الوجع ماكو ، لزمت مرهم الحروق
قريته يفيد للإثارة احسن من ماكو ، تقربت بحذر
كعدت قريب منه عصرت المرهم وبتردد قربت
ايدي ومسحت الجرح تصلّب ظهره قسا بس
ما عارض ولا حاول ينعني تمنيت يحجي حتى لو يرفض
بس تحمل وجع الجروح ولمساتي وهو كاتم حتى انفاسه
_ تأذيت .
_ اممممم .
_ ليش ماتريد تشوفني ؟
_ اريد انام .
_ انام يمك .
_ لا .
_ ليش ؟
_ اخاف عليچ .
_ من شنو ؟
_ مني .
_ تريد تضربني ؟
_ تنكسر قبل لا تنرفع بوجهچ .
_ لعد ليش تخاف ؟
_ اخاف تطلع كلمة تجرح مشاعرچ بوية .
نزلت من السرير ورحت بتجاهه كعدت مقابيله
سد عيونه مايريد يشوفني وضغط على اسنانه
يحاول يبين بارد بس صرت اعرفه نار علي الآكبر نار
_ احجي اني اقبلها منك .
_ وانا ما اقبلها عليچ .
حاولت اسيطر على قهري من تعامله وبروده ويايه جاوبته
_ بس لازم نحجي ؟
_ مو هسة مهدود حيلي اريد انام .
_ برودك هذا يتعبني .
_ اسف .
_ اني اسفة تعبتك .
_ روحي ارتاحي .
رجع ايده على وجهه ينهي الحديث دقايق بس دقايق
وبسرعة نام واضح التعب على ملامحه وضوع الشمس
وكفت مقهورة فتحت الكنتور لاحظت كم لبسة من ملابسي
مختفية انقهرت بس مو على ملابس بس لان اول مرة اتعرض
لهيچ موقف وقلقت شنو الفائدة ياخذون مني مبين منو اخذ
لو ميثاق لو ريمان بس ليش اني قياسي غير قياسهن .
اخذت تراك ودخلت للحمام سبحت ورجعت اخذت ملابس خفيفة
لبستها ورشيت عطري وبدون تفكير عقلي وكلبي يطلبون
امان علي الآكبر ، رحت بتجاهه باقي مكان كلش صغير
دخلت روحي بين ايده فتح عيونه بتعب وبدون احساس
باس راسي وطوقني بيده وسحبني على صدره الدافي
غمضت عيوني ودموعي من الفرح نزلت جنت حلم
ارجع واحس بهل امان وياه خفت بعد ما اشوفه
ادري بي مو واعي من احتضني بس من بعد
شهر وايام تعذيب وخوف وظلم رجعت احس
اني زينة عايشة واملك الكون من شعور الأمان
والسكينة وعطر النظافة اللي كل ما اقترب اشمها
بي وكأني بنت ولگت امان بحضن ابوها ونامت بسلام .
نمنا نومة طويلة بلا تفكير واحساس
الثاني يوم حسيت بدفء ايده تتحسس شفايفي
وتتلمس خدي يلاعب خصبات شعري ويمسح
على ظهري ويبوس بخدي بكل هدوء
مثلت النوم خفت افتح عيوني ويعرف گعدت
ويبتعد مني ، نزل على راسي طبع بوسة
وطال النظر وكأن يدرس ويحفظ ملامحي .
جر نفس طويل من رگبتي ونزلني على مخدة
بنفس الوقت يمنع نفسه يضعف بقيت امثل
اريد اعرف وين يوصل حاير مايدري شيسوي
بدل ، لزم تلفونه، راح يباع من الشباك ، رجع
مقابيلي يركز ، تحرك اخذ اغراضه يريد يطلع
حجيت حتى ينتبه : صباح الخير .
_ بدلي وانزلي .
طلع بدون مايحجي ولا حتى جاوبني على صباح الخير
نزل واني عدلت نفسي وسرحت شعري ونزلت
شكد صارت مشاكل بس اريد اكعد وياهم اشتاقيت
الأيامي وياهم ، سمعت صوت سوالف وضحك من
الأستقبال دخلت متوترة اطگطگ شفت عجوز
جبيرة بالعمر كلش جبيرة شاده راسها لابسة اسود بأسود
وجهه ابيض بس كله تجاعيد ورغم تعبها وكبرها حلو شكلها
علي الآكبر: هاي مرتي جدة اجت .
رفعت راسها تشوفني وصوتها من الكبر يرعش
_ يا هلا بحرمة عليوي تعاي جدة تعالي احبنچ .
رحت يمها هي تبوس بيه وجود مخلّي مخدة وعاكسها
ونايم بصفها يحشش ويوزوز
_ اجت ام الثقافة اجت ، اكلچ جدة شني رأيچ بمرة علوكي
هي احلى لو هوه احلى منها بصراحة بداعت صلاتچ .
رفعت عيونها تخوزر بيه ودارت على علي الآكبر
كاعد يلعّب بتلفونه ومغلس وكلهم كاعدين مجهزين
الغدا يريدون ياكلون بقت تلاخص طولت بعلي وضحكت
_ هي حليوة بس عليوي ماكو بجمالة .
جود : عبن شني عليوي لا حاف ولا صابغ شعر راسه من الله جمالة .
رفعت حاجبي واني أعيب عليه ورفع ايده بمعنى اصبري شوية
جود : جدة توها كعدت من النوم لا صايرة ولا دايرة وخطية امي
تعرفيها فقيرة وتخاف من عليوي لا يلعب عليهه .
جاوبته وهي تشهگ عبالك سمعت كتلت احد
_ يااااااع صدگ صليت الضحى وكملته خلص اليوم
يا جدة صدك هسة گعدتي من النوم ؟
دُر : اي صح توني .
جود : توني لو لوني هههههههههههه مثقفة
اخخخخ شلعتي افادي بالثقافة .
ام حسن : دُر يمه الخبز من المطبخ بساع .
عفتهم ورحت بالمطبخ ميثاق بعدها تصب اكل وجهه مگلوب
من شافتني بقت ادردم وتفشر بصوت ناصي اخذت الخبز وتجاهلتها
ورجعت عليهم خليت الخبز واشوف راس الخروف درت وجهي
على علي الآكبر هو شافني تخربط وضعي رحت يمه جود
كاعد يتبسبس مريت منهم صاحني
_ دُر .
_ امممممم .
_ ماتحبين الباچة ؟
_ لا ابد .
_ شنو تردين تاكلين ؟
_ اي شي .
_ مثل .
_ حتى لو فاهيتا .
رفع جود ايده على وجهه ويقلد العجايز بالنعي
جود : ويجدة شبيدي على تدبار الله اااااااااه ااااااه
واريد ابني عليه بطو واريد ابني وترا حطوا حديد حطوا حديد
بيدين الولد يا جدة حطو حديد هنا يا يمه هنا يايمه .
وما اشوف غير الحجيه ماقصرت ربطت بلوتوث سريع على نعي
وتبچي وتنعي بعلو صوتها تناشغ
_ اه يا جدة حيرني حيرني مني وبيه حيرني
وماعندي غيره عزيز الولي ماعندي غيره .
وكملها جود وهو يناشغ وايده على وجهه وجسمه كله يهتز
_ وتريد فاهيتا مرت عليوي يا جدة تريد فاهيتا .
ما اشوف غير عمي يغطي وجهه بالشماغ وجسمه كله يهتز
حسن وسراج الدين كعدو بالگاع ويغطون بوجهم وصاروا حمر دم
علي الاكبر شمر التلفون وايده على وجهه ما ادري يبچي يضحك
وهي رفعت وجهه تباوع عليهم عبالها يبجون وجود نشغ وينعي
_ رجال بيكم يگول جاي نضحك مو نبجي
واه يا جدة جبيرة ويا كسرتچ كلششششش جبيرة
وشتموني يا جدة عالوا عليه وشتمووووووني .
ضرب الگاع وهو يصيح وهي تبچي بكل حيلها
واني بهتت سحبتني شهد من ايدي گعدتني
وهمست : ابجي يمعودة لا تحقد عليچ .
دُر : ياااا ناقصين ضيم وبجي .
جود : واليوم فاهيتا وباجر يجدة تريد كنتاكي
ورايده عيوني ودعيتك اناااااا يا عيوني .
سراج الدين : بحضك وبختك .
حسن : الچنة التاكل شاورما كدام جدتي هاي كفرت .
سيف الدين : طلعت عن الطريق .
جود : صوج خيالها يجدة صوچ خيالها .
علي الآكبر: وراح اگوم ادوس راسك والله راح اگوم .
جود : لا قدر لا شان وانا بهل بيت يا جدة لا قدر لا شان
وحيدي باقي بليل وحيدي اتخيل الحيطان نسووووووووان .
گام ابو ضربة وطلعه دفرات لان تعبوا من الضحك
ولازم يمثلون البچي حتى جدتهم ما تزعل طلع شوية
ورجع كعد يمها عمي صاح بي
_ جود كافي راح اطيح صبغك .
جود : جدة تريد رجال ترا العشرة الطويلة تريد رجال
عليچ العباس ابو فاضل تريدين رجال ازوجج ؟
ابو حسن : ولك جووووود ولك الزم السانك راح اطيح حظك .
جود : اكلچ جدة من جنتي چنة بيش الساعة تگعدين ؟
جاوبته وهي تمسح شفتها وتتذكر .
_ بالخمسة الصبح بالستة انا كاعدة .
جود : شعندچ بالخمسة جدة حتى الأرزاق بعدها ما متوزعة
عندچ مجاعة شغل شني هسة دُر بالوحدة الظهر كعدت
وبعدها كاعدة تتصفن المثقفة حتى ما تبادر عبن شني زلمتها
ينطيها عين هاي ميثاق المسكينة مثل المصرع تحود بالبيت .
نعنشت ميثاق من حجاها وكف علي الآكبر يمشي برهاوة
_ هذا ما يسكت بدون غم غم .
ضربة بغمه غدر بحيث لزم راسه وعدل المخدة ونام فاتح ايده
وجدتهم تصيح على علي الآكبر وتعاتب بي لان ضربة .
عافهم وطلع كملوا صب الاكل طلع سيف الدين صاح بي
دخل بيده مواعين اكل مر مني بدون مايرفع عيونه بعيوني
اخذتهن منه ورجع دخل يمهم عدلتهن بالمواعين ورحت
كعدت وياهم كلنا على نفس السفرة اكلنا وعمي يسولف
هو وامه ويفلس الها لحم الباچة ويعصر بالرارنج
كملت ورحت اغسل من كملوا هذني متفقات يبعدني
لملمن السفرة بدقيقة ويغسلن بالمواعين ويجهزن بالچاي
عبالهن اضوج تجاهلتهن ودخلت گعدت بصف شهد
عمتي تغيرت تحجي وتضحك ويايه مو مثل البارحة
صعدت ارتب بالغرفة صايرة كلها تراب اجت شهد
دخلتها يمي لزمت ايدها وبدون مقدمات اعتذرت
_ شهد والله خجلانة منچ على صار وياچ .
_ لا تحملين نفسچ ذنب اهلچ اخوچ المدگدگ
حيوان قابل انتِ ترجعين تربي هو تربية ماعنده .
دُر : والقران انور جان وردة مو لان اخوية بس اخر اربع
سنوات تغير وكل مايكبر يتغير اكثر ويتوحش .
شهد : الله لا يوفقه والله من اتذكر شلون ضربني
بحيث تصوري فقدت الوعي على راسي يضرب بوحشية
مكبر عضلاته وعايف عقله دُر اني ابوية بعمره مارفع ايده وضربني
وحتى اخواني ابوية رباهم اذا يضربون النسوان معناها همَّ نسوان
لا اني ولا اخواني اتدكر بيوم ضربونا يجي هذا شمه يضربني ؟
دُر : خجلانة منچ والله حقچ .
شهد : خفت عليچ من رحتي اني بقيت يمهم كم ساعة شوفوني
الموت والله كرهوني بالحياة بعمري ماجنت متخيلة اكو هيج ناس
ذرة رحمة ماكو بگلبهم .
دُر : الحمدلله انور ماغلط بالأكبر من الخطف .
شهد : يبس حلگي من الحجي وياه لچ لا بقيت كلام الله لا بقيت
كلام رسول لا امام حجيت وياه وتوسلت بي وكل هذا وشگگ ملابسي
خاب كون يوگع بيدي اذا ما اكسر راسه تكسر مثل ما كسر راسي
امداني لچ قبل فترة اعترض طريقي الزمي يا ثوله وكتلي لا اني الخوف
سيطر عليه وبقيت اصيح بينت اله اني خايفة منه امداني .
دُر : الحقد يمه الحقد .
شهد : والله اول ما شفته فد عجبني اثاري بس شكل
كرهته لچ ماكرهت بشر بگد ما كرهت هل انور حتى اسم
انور كرهته تخيلي اكوبس بي وصلت لهل مرحلة .
من دخل علي الآكبر سكتت وغيرت الموضوع
_ اساعدج ؟
_ لا كلبي ارتاحي ماعندي شي بس ارتب .
_ خوش اروح اساعد آميّ آخذوا راحتكم .
هو بسوي نفسه مايشوفنا عبالك فتح الكنتور
طلع مستمسكاته يعدل بيهن ، واخذ ملابس طلعة
مبين يريد يطلع الأستاذ بدل وكشخ وبدون مقدمات قرر يطلع
_ لحظة انتظر .
ألتفت يأشر براسه بمعنى شكو ، رحت قريب منه وخليت ايدي
على خصري اشرت على ملابسة وحجيت
_ وين ؟
_ شنو هذا .
_ شنوو ؟
لزم اصبعي وبعصبية يحاجيني
_ هذا ؟
_ اصبعي .
_ اخلي بعيونچ اذا بعد ينرفع بوجهي .
عرفته عصبي واذا اني اشد بالكلام وهو يشد تكبر ماتصغر
دُر : تگدر ؟
_ شنو ؟
_ تأذي عيوني .
طال النظر بعيوني لدقايق صار يقترب بدون مايحس على نفسه
من قررت ابادر واني اقترب اكثر ذب حسرة وطلع يعاند حتى روحه .
فر الموضوع فر وطلع حتى ماعرفت وين راح
بقيت ارتب شي اخربه وشي اعدله بس مو بالتنظيم
مثل ما جانت صفيّة تسوي ، نزلت العصر الولد طالعين
وعمتي كاعدة هي والحجية بصفهن صوبة ميثاق والباقيات
كلهن بغرفهن كعدت يمهن الحجية من تغفي تجي عمتي تسألني
على صار ويايه ومن احجي تدعّي وتبجي على بجيها بجيت
_ ردت منهم بس يرحمون حالي بس عذبوني وهدوني هد
حجيتها وهي حضنتني تبجي واني ابجي مسحت على
ظهري حضنتها احتاج احد يمسح على ظهري لان هلكت ضعفت
_ احنا اهلچ خيولون طبهم مرض اهلچ اعتبري روحچ يتيمة من اليوم .
سمعت صوت ابتعدت درت وجهي شفت عمي كاعد وعلى وجهه
ملامح القهر ، وعلي الآكبر واكف بالباب يرجف من العصبية
عرفته سمع كلامي عمي درس علي الآكبر عرفه ما ناوي على
خير غير الموضوع من صاروا ينزلون ويجتمعون على صوبة
جهال وكبار ، كعد على الاكبر بصف ابو يتهامسون
جابت ميثاق صينية بيها قوري الجاي وكعك تعرف شنو
يحبون وشنو يكرهون صار الها عمر وياهم
وصاحوا على جود يروح بالباب هو وسيف الدين فات من الباب صاح
_ يا جود تعال ويا جود روح شكوو ماكو غيري بهذا البيت ؟
ابو حسن : اخواتك على وصول هاك فلوس جهز حلويات
واسأل الباقي شنو يريدون حلويات .
طلع تلفونه ويكتب كل واحد شنو يريد
جود : تعبت عشيرة كاملة انتوا دخت كافي .
وصل يمي گلب عيونه وكعد : اي صدميني شنو تريدين .
_ اي شي براحتك ،
بدون ما يخاف صاح بعلو صوته
_ ها ميثاق تخزرين بينه شني تغارين من دُر مبين تغارين اعترفي .
ميثاق : ليش اغار منها شعندي وياهه .
ابو حسن : تحرررررك جوووود .
حسن : نريد عصير وياك جيب اربع أبطاله .
جود : مايحتاج نعصر سم ميثاق ونشربه يكفي النا كلنا .
وهي تخبلت شلون جود هيج يحچي ويايه وليش
وعمي يلزم بيها كسرها جود من رجع يحچي
_ اشاقة وياج زوجة اخي امري واطلبي شنو بنفسج .
بقت ساكتة احسها تحمل حقد بكلبها راحت على مطبخ
وهو راح يشتري ربع ساعة ورجع وزع الحلويآت علينة كلنا
وشربنا عصاير اني اشرب واتذكر كلامه وامرد بروحي
حتى ما اضحك واخليها تنتبه وخربت كل محاولاتي شهد من
شربت العصير وبكل وضوح حجت
_ الله طلع طيب سم ميثاق هههههههه .
هي هيج حجت وكلها تضحك بس عمتي لازمة ميثاق
وتهدي بيها حتى عمي ضحك ، استغلوا فرصة سراج ما موجود
لملمت الأستقبال ورحت اذب الزبل فاتت دفعتني على كاونتر
ولزمتني من ملابسي : شوفي لچ اذا تبقين تخليهم يكرهوني
وتتمضحكين عود شوفوني اني كيوت وتصرفاتي نازكة اموووتچ
بنت الحرام شوفي من يا عصابة امچ جابتچ .
دفعتني صرخت من وجع العملية وبقيت مصدومة منها
وهي تتحرك ولا عبالك فات علي الآكبر شافني عرفها
تجاوزت فتح عيونه بغضب عبرته اريد اصعد بطني توجعني
صعد يمشي ورايه ويهمس بصوت ناصي بس مبين مشتعل نار
_ اي كملي طريقچ واصعدي حتى انا اكمل كتلتها فوك .
وكفت باوعت بوجهه مصدومة
_ هي ضربتني .
_ وانتِ قبلتي على نفسچ وصاعدة فوك ولا عبالك .
_ لعد شسوي اني مريضة .
_ ما ادري شسوين اذا تصعدين هسة اكتلچ فوك كتلتها .
_ والقران مابيه حيل .
_ انزلي اخذي حقچ يلة .
_ ما .
_ اصعدي اكتلچ .
_ شنو لو انكتل فوك لو انكتل جوة .
هز راسه وصعد قبلي وهو يجاوبني بكل برود
_ انتظرچ فوك راجعي حساباتچ .
عافني بنص الدرج خفت اصعد وخفت انزل
مديت راسي اشوف المطبخ بس ميثاق ترتب
بالكاونتر وتجهز الأكل نزلت باوعت عليهم
كلهم كاعدين رجعت دخلت واخذت حديدة
يحدون بيها السجين ورفعت ايدي وظربتها على ظهرها
صرخت رجعت ضربتها على ايدها واني اصيح بنفس علو صوتها
_ اذا بعد ترفعين ايدچ وتضربيني اكلچ اكل والله مو
تگولين لا تمثلين نازوكية هاي شووووووفي
بعينچ شوفيني اكدر اموتج .
ضربتها بكل قوتي ورجعت اقوى اضربها طلعوا يركضون من
الأستقبال لزمني عمي وحسن هو وعمتي يصيحون من الدرج
_ لك علي الآكبرررررررررررررر تعال هنااااااا .
نزل بسرعة نزل عيونه على حديدة مصدوم
علي الآكبر: شصاير هنااااا ؟
حسن : يمعود احجي وياها ماتقبل تعوف الحديدة .
نزل رفع ايدي بيها حديدة وصاح
_ ولچ شنو هاي بيدچ .
دُر : ضربتها هاي الحقيرة بس هيَّ تضربني .
علي الآكبر : نزليها من ايدچ نزليهااااا .
اخذها مني خفت من ردت فعله وتراجعت
ام حسن : مايصير هيچ ولك شوف شمسويه بالبنية
اذا تروح البيت عمها هيچ هسة شلون بينا احجي
وياها عقلها ولك علمها لا تتعارك وتضرب .
علي الآكبر: دواها عندي يمه .
لزمني من ايدي وسحبني مقابيلهم كلهم وهو يكمل
_ كم مرة اعيد بلا مشاكل تعالي كدامي امشي فوووووووك .
صعدني على الدرج ساكت تخيلت راح يعيدها مثل
قبل يضحك ويفرح ويبوسني بس وصلني للغرفة
عاف ايدي وتجاهلني انهضمت كعد على تخم يلعب
بتلفونه وكفت مقابيله وحجيت بقهر : سويت مثل ما طلبت مني .
جاوبني بدون ما يرفع راسه
_ هو هذا المفروض يصير بكل مرة يتحاوب عليچ شخص
حتى لو تنضربين اضربي واخذي حقچ بيدچ تعلمي احفظي هل درس .
دُر : مو هذا قصدي ؟
رفع وجهه وجاوبني
_ شنو قصدچ ؟
_ تتذكر ؟
_ اتذكر شنو ؟
_ يوم ضربتها قبل من صعدت
ردت فعلك جانت تختلف .
_ تريدين ابوسچ ؟
من القهر انهضمت تركته وطفيت الإنارة
ومشيت للسرير نمت وتغطي امسح بدموعي بلا صوت
والله بعد أعامله مثل معاملته بسيطة نمت وقت مغرب
فززني صور تلفونه جاوب بسرعة يحجي بصوت خافت
_ ها ريان ، الحمدلله زينين ، اي عدنا خطار على باجر نبلش
اسمعك احجي ، اختك هاي يمي نايمة ههههههههه ، شبيك غير
هذا الصدگ اجذب عليك تريد ، ليش اگعدها عوفها نايمة تعبانة خطية
ههههههههه لا تصيح شبيك ماشي هاي الخاطر عيونك .
اجه حسيت صار قريب مني خاف لا افز نزل ايده
رفع خصلات شعري واقترب مني طبع بوسة على راسي
وابتعد بسرعة : دُر بوية تسمعيني دُر .
فتحت ودرت وجهي منه جاوبته بنفس طريقته
_ امممممم .
_ ريان على خط يريدچ .
عدلت نفسي واخذت التلفون وريان بس سمع صوتي
انفجر وهو يصيح وفحطان فاير من العصبية
_ يمعودة اكعدي خلصيني هذا الزمال يحرگ بكلبي
صاااااااار رومانسي الخايس يبوووووووووس .
دُر : اسم الله عليك شبيك .
ريان : شوكت تجين راسي شيب .
دُر : كلها راسها مشيب خطية ليش اجي .
ريان : هل بلوة خلصيني منها تعالي احجي وياها تكف شرها مني .
دُر : حرة .
ريان : اكووووووووووووو غيرررررررها
طلعت من البيت من وراها .
دُر : يااا شصاير شبيكم .
ريان : موووووتتني والله موتتني .
دُر : هسة اجي اعصابك دخيلك مو تصير عصبي وتضربها .
سد الخط بوجهي بدون ما يسمع مشيت للكنتور ابدل
وهو رجع على تخم من كملت بدون اهتمام حجيت
_ كملت .
_ وين تروحين .
_ البيت ريان .
_ منو قرر ؟
_ ما سمعت صوته ؟
_ المفروض تطلبين مني قبل التبديل .
_ ماصار شي .
_ ماكو روحه بدلي .
بقيت صافنه بوجهه لدقايق اريد استوعب تصرفاته
_ علمود حرة اريد اروح خطية .
_ اوافق بشرط .
_ شنو ؟
_ تعالي .
مشيت اتجاهه بدون خوف بس متردده صرت مقابيله
سحبني من ايدي شمرني على صدره كعدني على رجله
طوق خصري بتملك ايده وكل جسمه يرجف من قربي
ضعف علي الآكبر واضح بس يحارب نفسه حتى مايبين
_ الشرط بوسة انتِ تبادرين بيها .
_ شلون يعني ؟
_ بوسيني انتِ بوية .
كل عصبيتي تبخرت جسمي بعد ما احس بي بين ايده
بقيت مركزة بعيونه ابلع بريگي وهو هيمان ذايب بيه
دُر : تريد بوسة انت تاخذها .
رفع حاجبة ينتظر رجع جسمه كلّ تركيزه على شفايفي
أقتربت بخجل طبعت بوسة سريعة على طرف شفته وابتعدت
ارجف بعمري ما مريت بهيج موقف استحي والله
_ يلة اخذني .
_ وينها البوسة ؟
_ مو ..
_ هاي بوسة ؟
هزيت راسي ونزلت عيوني منه ردت اموت من نظراته
سحبني اكثر على صدره وطوق خصري وبأيده الثاني
سيطر على وجهي واخذ شفايفي بين شفايفة يبوسني
بكل شغف ولهفة ايام طوال عبر بيهن على اشتياقه ورغبته
يتلاعب بمشاعري يفصلها ويرجع يكررها بنفس لهفته
نزلني من رجله على تخم حركاته وتصرفاته رافضين يبتعد
بس اله رأي ثاني بعدني منه وهو داخل صراع داخلي
_ انتظرچ جوة .
حــرة ...
حياتي بأسبوعين اختلف كلشي بيها من سيئ إلى اسوء
جنت بوسط النار صرت بداخل جحيم صعب اطلع منه
تعذبت وسبب عذابي اهلي ، خسرت احن شخص قابلته
بحياتي مات گدام عيوني ومنظر موته مايروح من راسي
يجيني على شكل كوابيس اني نايمة واني كاعدة
انعدمت ثقتي بكُل الدنيا صرت اكره كل العالم
وما انتظر من شخص شي زين لان شفت منهم مايكفي .
جسمي منهك حد الموت ، الوجع بروحي وبجسمي
خلص مفعول المسكنات والألم نهشني نهش كعدت
من التخم الاستقبال فارغ ، سندت روحي وكفت
أمشي وأتلفت البيت فارغ مابي صوت دخلت للمطبخ
ادور على گلاص اشرب ماي افتح بالمجرات ماكو
شفت كاسة صغيرة غسلتها وصبيت ماي واني اشرب
فزيت انضرب راسي بحافة الكاونتر اختل توازني
والكاسة فلتت من ايدي على رجلي اريد الزم
الكاونتر ما كدرت وگعت بكل حيلي بالگاع
رفعت عيوني امتلت دموع صار مقابيلي ريان
مقلص عيونه يباع متعجب من الثول مالتي مبين
من فشلتي حصرت البجي وصحت
_ تعال ساعدني .
_ نعم .
_ ماتشوف الگزاز تريد امشي على گزاز .
أبتسم بستهزاء وعافني ورجع بغرفة مقابيل المطبخ تصير
وعافني على ارض حتى ما كلف نفسه يشوفني اذا صار بيه شي
او لا سندت نفسي على مكان مابي كزاز ومشيت على طرف اصابيعي
طلعت من الگزاز ومشيت من المطبخ وكفت مقابيل الباب مالته
بصفة حمام ومغسله برا بصف الحمام مشيت للمغسله
اخذت الصابونه وضربتها بكل قوتي باب غرفته وعبرت اريد ارجع
اريد افوت ارجع على تخم وكلبي راد يوگف من علو صوته
_ مكااااااااااااااانچ .
التفتت رفع اصبعه اشر عليه ورجع اشر على صابونه
_ امشي تشيلين الصابونة وترجعينها مكانهااااا يلة .
_ نعم ؟
_ رجعيهااااا .
ضحكت بستهزاء أقلّد حركاته قبل شوية
ودخلت للغرفة واني أجاوبه بكُل برود
_ انت رجعها وبعد لا تصيح لا اهزك هز بصوتي .
نمت بمكاني وهو دفت الباب ودخل
_ تهزين منو ولچ ؟
_ اهزك هز .
_ شو ماتعرفين تحجين ؟
_ طالعة على ابن عمي .
_ شوفي احترمي نفسچ من هل غرفة ممنوع تطلعينً
إني انطيج اكل على وجبات لا تشوفيني وجهج .
_ ها ليش .
_ لا تسآليني .
طلع عافني اهز براسي خطية بعده مايعرف نمط عقلي
راح يتعب هواي هذا الرجال كون يخلص مني بسرعة
ارتاحيت شوية بفراشي نمت ساعة من راح وجع رجلي
طلعت غسلت على مغسلة مرجع الصابونة مشيت للمطبخ
فتحت الثلاجة فارغة بس برتقال موجود شنو صايم ماياكل
طلعت برتقالة شفت خلاط سويت البرتقال كله عصير رجعت
ادور على كلاص مختفيات يمكنّ ماعنده اخذت الخلاط بيدي
شربت منه ودگيت الباب مرة ومرتين وماكو فتحت الباب
مالته نزلته الخلاط صار مقابيلي كاعد وبيده كتاب
حرة : شبيك اخرس ؟
سكت ذب الكتاب ونزل راسه ولزمه بيده
حرة : حركة ابوك هاي سبحان الله ، خربت حبل التأمل ؟
عدل شواربه ولحيته يمسح بيهن بكل قوته مبين صار عصبي
حرة : من ادك الباب مرة الثانية جاوب مو حلوة بحقك تجاهل خطارك .
حك طرف خشمة وشاربة ويتنفس بغضب يخوف
حرة : امشي بلا زحمة عليك طلع سيت كلاصات
اريد اشرب ماي عصير بيمن اشرب بيدي .
ملت جسمي واشرت على مطبخ نزل عيونه يباع
على ارضية الغرفة كلها عبالك مضيع شي
حرة : مخلي سماعات ، لو بسبب البيتزا مخلين
بيها لحم ابو صابر لأن هواي تصفن ؟
مشيت صرت قريبة منه لوحت بيده وبعدني متمسكة بالعصير
حرة : لو انت بلادي هيج ؟
فتح المجر بلحظة شال المسدس وسحب اقسام
لو سحل روحي اريد اندل الباب بعد ما اكدر
نضربت بكل قوتي اني والعصير وگع من ايدي
وكله انصب على ارض يتمشى على موكيت
غرفته هو ابيض صار برتقالي مشيت بيه
مابيه دخلت الغرفتي وسديت الباب
اسمع صوته بالممر يصيح على دُر تجي
خليها تجي اذا ما اروح وياهه ولا ارجع هنا .
بقيت امسح على اصابع رجلي كلها تأذيني
شربت علاجي وبقيت بفراشي الحد ما سمعت
صوت باب الشارع طلع هو فد باااااااارد يمشي
بطيء فتحت البردة اشوفه لو بيدي أروح ادفعه
حتى يوصل فتحه وسحبها من ايدها دُر انصدمت
زوجها دخل وراها واستاذ ريان استلمها
_ امشي فوتي خلصيني منهاااااااا .
_ شبيكم .
_ تعالي ويايه امشي فوتي شوفي شسوت بالبيت .
دخلت دُر وزوجها ينتظر بالكراج وهو اسمع صوته
يصيح منفعل عكس بروده قبل شوية
_ شوفي البيت هجمته هجم .
ماتحملت كلامه طلعت وكتفت ايدي
_ شسويت اني ترا اريد كلاص عندي علاج لازم اشربه
عايفني لا اكل لا شرب بشنو تفرق على عمامك هاااا بشنوو ؟
نزل عيونه يبعد نظراته مني واشر على حال المطبخ
درت وجهي المطبخ مي وكزاز وخلاط مشتغل ومتروك
عبرني ولازم ايد اخته اشر على غرفة خلت ايدها على خدها
حرة : سحب السلاح بوجهي وبيدي عصير من الخوف انضربت
شبيچ انتِ الثانية امشي طلعيني مناااااا ما اريد ولا ساعة أبقه هنااا .
ريان : صلفة .
حرة : اني .
ريان : لا ابوچ .
حرة : ابوك انتَ .
دُر : عركت مثقفين هيلب علي الآكبر بليز .
طلعت دُر وهو طلع وياها مايريد يظل ويايه بنفس المكان
فتت على غرفة اخذت علاجي وطلعت وراهم كلهم التفتوا عليه
حرة : اخذوني منا يلة .
دُر : حرّة حبيبتي بس اهدي نتفاهم يا عيوني .
حرة : انتِ شاهدة شلون يعاملني مو ؟
ريان : شلون اعامل اجيت على غرفتچ وتجاوزت عليچ .
حرة : عزززززا إِنّي تجاوزت؟
ريان : مو تگولين تصفن ماكل لحم ابو صابر .
علي الآكبر: ههههههههههههههههه والله صدك .
ريان : استلم الثاني .
علي الآكبر: چا شبيك تصفن من تحجي جاوبها .
ريان : تتآمر وتفوت عليه للغرفة إني بلغتها
لا تطلع من الغرفة شنو تريد يوصل الها .
حرة : محبوسة؟
دُر : من يطلع من البيت اطلعي فدوة .
حرة : خلصوا مني ليش يتقيد بيه ما اريد اكعد هنا .
ريان : وين تروحين ؟
حرة : اي مكان ما موجود انت بي .
ريان : شمسووووووووووووي ليش هيچ تحجين .
رفعت ايدي عيوني بعيون دُر بإصبعي أشرت بتجاهه
_ شوفي شلون يصيح انتِ شاهدة بعد ماكو داعي احجي .
مسح على وجهه وطلع وهو يصيح
_ لاااا لهنا وكافي ما اتحمل اني مصايبي كااااافي عليه .
علي الآكبر: اخذيها وفوتي جوة احجي وياها .
دُر : عفية علي الآكبر انت هم احجي وياه .
علي الآكبر: تأمرين .
اخذتني دُر رجعتني للغرفة وهي تضحك
_ لچ شمسويه بالبيت مهجوم هجم .
حرة : بالمطبخ هو خوفني بصوته واني تأذيت مساعدني
وبالغرفة رفع سلاح شبي هذا مخبل .
كعدتني وراحت للمطبخ شوية ورجعت بيدها صينية اكل
_ تعالي ناكل اني وياج حتى تشربين علاج .
اكلت من الجوع ابتسمت دُر بوجهي
_ طيب ؟
_ كلش .
_ هذا طبخ علي الآكبر .
_ يعرف ؟
_ هو شيف .
_ تحبي ؟
_ ما ادري .
_ يحبچ ؟
_ يگول مهوس بيچ .
قاطعنا ريان من دخل كتف ايده واستند على باب
ريان : اعتذر منج .
حرة : ما مقبول اعتذارك .
ريان : هاي شبيهااااااا عجيب ؟
كملت اكلي ودُر اخذته وطلعت بقيت بمكاني شربت علاجي
من طلعت سمعت كلامهم بي اسم ابوية تقربت اكثر وصار اوضح
وكفت قريب من باب المطبخ وكلهم كاعدين هناك على ميز الطعام
دُر : الله يخليك طول خلگ وياها وين تروح البنية ماعدها غيرنا .
علي الآكبر: اخوانها طالبيها وبس توگع بيدهم تموت
وابوها العار بعده عدنا وين تروح يمعود .
ريان : ماعندي شي وياها واذا تريد تظل بالبيت واني اطلع
بالعكس بنت عمي واجب احميها بس والله إلسانها طويل
واني عصبي خلگي ضيق ما اتحمل يا اخي .
علي الآكبر: وفر كلشي الها حتى ما تطلب منك .
ريان : بعدني ما تعود جنت وحدي دائماً وحدي
بعدني اريد استوعب ما تنطي مجال خرب ابوهاااا .
رجعت للغرفة لو عايش يا مصطفى جان خلصتني منهم
وين عفتني وحدي مو احتاجك اريد احجي وياك وينك
تعال تحملني ماكو بشر يتحملني مثلك شلون ارجعك بعد شلون .
اهله هسة شلون حالهم من راح وحيدهم
اكيد يدعون علية ترجوني ابتعد منه بس
بقينا مصرين على حبنا وانتهى حبنا بالموووت .
بطني عصرتني من القهر طلعت على صوت عالي صار
فتحت الباب شفت انور ابن عمي نزل من الدرج ودُر صار
عدها رد فعل بدون ما تحس صرخت بكل صوتها
اجه علي الآكبر يركض وريان عبالك عرف سبب صياحها
ركض على درج وانور من شاف علي الآكبر لزم الدرج وعثر
وگع يريد يصعد وريان صار مقابيله تراجعت وكلبي صار يخفق
بكل قوته من فتح علي الآكبر عيونه وهجم على درج ودُر
تسحب بإيده وريان يصيح بي الخاطري لك الخاطري
علي الآكبر : لكككككككك انور شمه دمك مهددوووووور .
يتبع ..
يتبع ..
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..