بســم ﷲ الرحمــن الرحيــم
السـلام عليڪم
#بيـن انيابهـم
#بقلمـي أنـا: زهــࢪاء
حساب الانستا: zaii1_8
لا تنسون التصويت +التعليق بين الفقرات
+احبڪم زهوراتـي 💋
تفاعلكم ابد ما يسوي واهس 👎🏻
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تـــــاج
رڪضت الناحية البيت وادعي كون قاسم ما موجود ما اريدها تتعرض للي اني اتعرضلة
ارڪض واني ارجف ومتوترة وڪُل ساعة اعثࢪ وصلت للبيت بطلاع الروح دفعت الباب ودخلت اول ما فتت للمطبخ صحت
تـــــاج..... شُــذير ووووينج
ذبيت الجنطة بالڪاع واستمريت اصيح بأسمها ماكو احد بالبيت مشيت للغرفة واني اجذب تفڪيري و اردد
تـــــاج... اڪيد هيه نايمة
وصلت كدام الباب وفتحت عيوني بصدمة من سمعت صوت شُذير تبجي فتحت الباب بسرعة وصحت
تـــــاج.... لكككك قااااااسممم
رڪضت ناحيتهم ودفعتة عنها واني أرجف وعيوني رافضة اتصدك للحظة ڪلت هاي هيَ فقدت اختي
كام ويبتسم بحقارة وطلع دنكت على شُــذير وجريتها اريد افتهم منها شي ما اڪدر بس تبجي صحت بوجها
تـــــاج.... احجيييي شسووووالج
ما جاوبتني بس تبجي وتمتم وترجف اريد اسيطر عليها واهديها باوعت الجسمها التشيرت مشكوك ردت افهم منها شي ما كدرت انفجرت بالبجي واتهسترت جريت رأسها الحضني وسيطرت على رجفتها
تـــــاج.... اش حبيبتي انتِ اهدي صيري زينة وفهميني انسي كافي الخاطري
ضلت بس تشهك بدون صوت الحد ما هدأت وخرتها عن حضني وشفتها ساكتة بس ادموعها تجري خليت راسها على المخدة وغطيتها وكمت افتر بالغرفة وارفع شعري وانزلة التفڪير موتني احس راسي راح ينفجر انڪسم المنو اني؟
الروحي لو الشُــذير لو للشغل لو الابتهال لو القاسم
ما اموت واخلص تعبت من ڪُلشي حتى ما دا اكدر اجمع الافكار براسي
اريد اصعد فوك بالسما وبس اني وشُــذير اتمنى احس ولو لمرة وحدة بالامان اتمنى احس بالطمأنينة
باوعت الشُــذير صافنة والدمعة على خدها والشهڪة بصدرها
رحت فتحت الباب وطلعت من الغرفة وكفت كبال قاسم بالهول وصحت
تـــــاج.... شسووويت الشُـــذير وشلووون تتجرأ وتحطط عيننك النڪسة عليهااا؟ شوووف اني الهسه ما مخليتكم ابالي لا وداعت اهلي الحرمتوني منهم اضيعكم وررة الشمس مثل ما ضيعتووونة وللك قاااسم استرر على روحك ومررتككك لأن بحركة وحدة مني احركم انتم وارواقكم وهاااا لا عبالك تهددني بموت عدنان طززز بيك وبعدنان وما متندمة لأن كتلتة ويستاهل الموت وانتت جاايك السررة
دفر الطبلة وكاملي جرني من شعري وصاح
قاسم.... شنووو تهدددينيي ولللج تردددين اخااف من وحدددة خلللك **** اترريد اتصير شرريفة براسي خلي اتونس بيجن فووك ما خليجن ببيتي تاليتجن تنباعن
عقجت وجهي بقرف من رحيتة درت وجهي للجهة الثانية ودفعتة عني ارديت ليورة ورفعت صبعي بوجها
تـــــاج....ساعتها بهذاك الوڪت اذا صارت صدك ووننباع اسهل منها ماكو نفط وجداحة يحترك البيت بالبي والما بي اسمع لك اني مخبلة وعقل ماكو براسي اكتلكم كلكم وادخل للسجن وما يهمني شي
راد يحجي ودخلت ابتهال وواحد وراها شايل علاليك خلاهن بالڪاع واجة سلم على قاسم ومبين يعرفة ردت اتراجع واروح للغرفة واستوقفتني ابتهال
ابتهال... اوڪفي مو شردتي تعاي رتبي الغراض وياي بالليل عدنة اجتماع
حجيت بڪلبي جمعوكم بجهنم كون
ابتهال... ماتجين شبيج صافنة؟
تـــــاج... اختي مريضة اروح اشوفها واجي
ابتهال...شبيها عرج ما يطكها... مابية حيل اناقش ولي ورجعيلي
باوعت الها بطرف عيني ورجعت للغرفة لڪيت شُذير كاعدة على فراشها وصافنة بالفراغ فزت اول ما سديت الباب طمنتها بعيوني ومشيت الها كعدت كبالها وخليت راسها بحضني وامسح على شعرها
تـــــاج... سوالج شي؟
شُــذير... لا
تـــــاج... لعد شسوالج؟
رفعت راسها الي والدموع متجمعة بعينها حجت بخنڪة وهيَ تفرك ايديها
شُــذير... بس باسني وو ما خليتة ضليت اصرخ وهوَ عصب وضربني
تـــــاج... ڪسر الڪسرة..... من شوڪت يحاول يسوي وياج هيج؟
خلت عينها بعيني وعبالك تشرحلي خجلها وخوفها بنضراتها قوست شفايفها وحجت
شُــذير... هاي اول مرة
تـــــاج... مو كتلج لا اترجعين للبيت ليش رجعتي شُــذير يعني لو ما اني جاية تدرين شصاير؟
نزلن ادموعها ودنڪت راسها بقهر اجيت اكوم وطفرت كضت ايدي وحجت
شُــذير... لا اطلعين اخاف تـــــاج عفية ابقي يمي اخاف بجي عفية
حجتها وانفجرت بالبجي حضنتني ومجلبة بيه وتبجي بصياح وبصوت روحي فرفحت عليها ما بيدي شي اسوي اخاف اخطي خطوة وهالخطوة اترجعنة الوضع اسوء من هذا
رفعت راسها بأيدي ومسحت ادموعها بست عيونها اثنينهن
تـــــاج... هالعـيون اذا ما بجن من الفرح ما يبجن على غير شي
بستها براسها ورجعت حجيت
تـــــاج... وداعتج اطلعج منا بس اصبريلي
شُــذير... تعبت تـــــاج وداعتج الما عندي غيرج تعبت اريد انعيش حالنة حال البنات ما ضل الي صبر الدنيا ڪُلها طلعت من عيني
صفنت عليها بقهر هسه هاي شفهمها بهذا الحجي
تـــــاج.... تڪضي و اتصير اسوالف
شُــذير... هه تڪضي مو!... تـــــاج لا عبالج اني بعدني صغيرة ترا ڪبࢪت وفهمت وعرفت شنو تشتغلين يومية ابتهال ڪُل ما اتصح الها فرصة تڪعد تسمم عقلي بڪلامها عنج وتڪعد تحجيلي عنج وشلون تسرقين بهذا وذاك
فتحت عيوني بصدمة وضاع الڪلام مني اتلعثمت ودنگت راسي طاحن الدموع من عيني رفعتة بعد مدة ولميت شفتي للداخل مسخت ادموعي وحجيت
تـــــاج... وانتِ؟ هم اتغيرت نضرتج عني؟
شُــذير... تتغير؟ وليش تتغير ليش بسبب منو انتِ ضحيتي بمستقبلج بحريتج وبڪُلشي على مودي وترديني اغير نضرتي عنج؟ تـــــاج لو اڪعد اعدلج منا الباجر شڪد اني ممتنة الج ما راح تصدڪين اني وياج وبڪُلشي سويتي على مودي
ابتسمت الها وجريتها الحضني ضحكنة وحجيت
تـــــاج... الادبسزز ڪبرانة وصايرة تعرف تحجي
شُــذير.. منج نتعلم
تـــــاج.. ماعاجبج حبي؟
شُــذير.... ههههههه لا عاجبني
وخرت عنها وحجيت واني اطلع
تـــــاج.... اروح اشوف ابتهال لا تخبصنة ولا اطلعين من الغرفة ابد
شُــذير... اريد اروح للحمام
تـــــاج... اجليها على ما أمن الطريق واشوف هذا منو الجايبينة
شُــذير... منو؟
تـــــاج... ما اعرف هسه اشوف
حجيتها وطلعت من الغرفة رحت للمطبخ لڪيت ابتهال مطلعة الفلوس من الجنطة وتحسب بيهن اتڪتفت وحجيت
تـــــاج... اليوم بشارع ال ***** ڪضوهم تدرين؟
رفعت نضرها الي
ابتهال... اي سمعت خذوهم ڪلهم؟
تـــــاج... اي شلع قلع اااخ يوم الالج
ابتهال... وانت ويانة موو؟
تـــــاج... عادي اكابلج بالسجن شعدني
تجاهلتني وكملت حساب الفلوس طلعت من يمها ورحت للهول وڪفت بعيد عنهم واسمع شنو يحجون من خلال حجيهم عرفت هذا واحد يشتغل وياهم بس بأربيل واليوم يبات هنانه اجت عيني على الموبايل الي بأيدة اتڪتفت وضيقت عيوني وثبتتهن على التلفون لازم اجيبة من عندة لأن احتاجة بهوايه شغلات ضدهم واحتاجة بشغلات اريد اصورها
انسحبت من يمهم ورجعت للغرفة لليل اجتمعو ڪُلهم وهاي جمعتهم اعلان عن رجوع شغلهم من الشهر الجاي بس على ما يجيبون مجموعة من البنات
اتمددت بصف شُــذير دارت وجها عليّ شافتني صافنة طكت بأصابيعها كدامي فزيت وحجيت
تـــــاج... ها
شُــذير... شعدهم اليوم؟
تـــــاج...يعيدون احياء اصخام وجهم ولطامة
شُــذير... منين الهم حياء حتى يعيدونة
تـــــاج ... هم صدُك يلا نامي
عقدت حواجبها وباوعتلي بشك
شُــذير... شنو تردين تسوين هالمرة؟
تـــــاج... حسبة ابالي اريد انفذها
شُــذير... ما ناقصنة مصايب
تـــــاج.... اذا ما اتحرڪنة من الدائرة الي احنه بيها محد راح يطلعنة من عدها خلي نخطي الخطوة وڪُلشي سهل
خلت راسها بصف راسي اتنهدت وسڪتت
شُــذير... وعد ما راح تنسيني بيوم؟
تـــــاج... للموت ما انساج افڪر بيج ڪبل لا افڪر بروحي
شُــذير...احبج وحيدتي
ابتسمت وسڪتت عفتها تنام واني ضليت اطفي و احس عزلت اريد انام بس ما اڪدر اكو خطة ابالي كمت بعد فترة من حسيت الصوت خف فتحت باب الغرفة على ڪيفي لڪيت الضوة مطفي وضوة قليل من المطبخ عابر مشيت على اطراف اصابعي للهول وڪفت من بعيد واباوع للولد الاجة الصبح نايم جفي على وجهة وايدة طايحة من القنفة وبأيدة البطل سبيتة وڪملت طريقي ناحيتة ضليت ادور بعيوني على مڪان موبايلة الحد ما استقر نضري عليه مخليه على الطاولة ابتسمت ورڪضت سحبتة من على الطاولة ورجعت رر
ڪض للغرفة
اتمددت بالفراش وغطيت وجهي بالبطانية هدأ نفسي وباوعت للموبايل بأيدي لمس حاولت اشغلة ما اڪدر بي رمز ضميتة جوة مخدتي وڪلت للصبح يصير خير
ثاني يوم الصبح اول ما كعدت سألتني ابتهال على الموبايل اتخصرت وحجيت
تـــــاج... و ليش عيني بس اني عايشة هنانه حتى اتذبينها براسي بعدين تدرين بية ما اطلع بالليل برة
ابتهال....وين راح محد هنا يمد ايدة غيرج
تـــــاج.... هههههههههاااي دخيلج يالمؤمنة الطاهرة ليش منو علمني على هذا الدرب غيرج... اكول اتجفي شري وجفيني شرج عندي شغل عطلتيني من الصبح
وخرت عنها واتعديتها واني ابتسم بخبث طلعنة اني وشُــذير من البيت ومشينة
شُــذير.... تـــــاج احجي الصدك عندج التلفون مو؟
رديت بعدم اهتمام
تـــــاج.... اووويلي عليك خاااالي شڪد تلحون اي عنـدي بس سڪتي ولا تجفصين يم احد
شُــذير.... انتِ ما توبين تࢪا حـࢪام؟
تـــــاج... خوش
شُــذير....خوشين
باوعت الها صفح
تـــــاج... ام اللسان ما وصيج اليوم هم رجعي ضلي كاعدة بباب المدرسة لو بالمدرسة اني اليوم احاجي الحارس ابو راس المثلث يرادلة قبضة البعبع يلا يجر ويانة عدل
شُــذير... تࢪا هذا الحارس مو عدوج شبيج منو شفتي كلتيلة قبضة البعبع ترا انتِ انثى وعندج كيان ولازم اتصيرين رقي
انفجرت بالضحك وحجيت مقاطعتها
تـــــاج... شعندددددي؟
جاوبتني وهيَ تڪـز عالاحرف
شُــذير.... انثى وعندج كيان
تـــــاج... هههههههههههههه اني اونثى وعندي كيان؟ يمعودة كولي غيرها هوَ بيت و اهل ما عندي يصير عندي كيان
شفتها ضاجت ومشت قبلي لحڪتها وضربتها على علباتها صاحت وهيَ تفرڪ ركبتها بألم
شُــذير.... النوب حتى شقاها مالت واحد مطيࢪجي مصجم بنات المنطقة ڪُلهن
تـــــاج... عوفيني من هذا الحجي الاسبوع اليجي ما اريد ترحين للدوام
باوعتلي بصدمة
شُــذير... ليشش ما اكدر الاسبوع اليجي امتحانات شهرية
تـــــاج... اختاࢪي الامتحانات لو الطلعة منا؟
صفنت عليّ وما جاوبتني
تـــــاج... اريدج تبقين بالبيت و اتراقبيلي ابتهال وقاسم وين يدخلون وين يطلعون اني ما اڪدࢪ افرغ الهم هل دا تشوفين ما يخلوني افرغ حتى لا اڪعد افڪر
شُــذير.... و اذا سئلوني ليش ما ادوام
تـــــاج.... ما يسئلون على اساس همَ هسه فارغين حتى يفتشون وراج بس اذا صارت وسألوج ڪليلهم بطلت
خزرتني وردات تحجي
تـــــاج... مو صددك بطلتي بس حجيي
هزت راسها وسڪتت
وصلتها للمدرسة ووراها رحت لأبو الموبايلات دخلت للمحل جان الولد يباوع على التلفزيون انتبه وحجة
.... تفضلي خوية
طلعت الموبايل من جيبي
تـــــاج...موبايلي ترڪتة فترة وهسه ناسية الرمز تڪدر تسويلة حل
... اي عادي افرمتة
انطيتة الة بسرعة ورحت ڪعدت واهز رجلي بتوتر وڪُل ساعة اسئلة كملت لو لا الحد ما مرت فترة وڪملة كملت اخذتة منة ودفعت الفلوس.....(شعبالڪم جا بطلتنة جلف؟)
طلعت من المحل ورحت اڪمل شغلي مرت ايام واني اخطط للخطوة الي راح اخطيها وڪُل ما اريد اخطي اتذڪر الصار بياسر وهذيج اللية الي ردنة نشرد بيها لو خلود من سولفتلي على ياسر
flash back
رجعت البيت ابتهال واني مڪسورة بس فرحتي برجعتي يم اختي نستني ڪُلشي بيومها ڪضيت الليل ڪُلة حاضنة شُــذير وما نمنة بس تنهدياتنة تشࢪح الخيبة الي احنه واصلين الها
ورة يومين تقريباً اجن البنات للبيت اول ما شافتني خلود جرتني من ايدي ورادتني اڪوم وياها دفعتها عني وسحبت ايدي
تـــــاج.... وخري عني لحد يلمسني منڪم كلكم نڪسين
خلود... العوبة سويتي فعلتج وهسه ضميتي راسج ما ڪلتي المكرود الاڪلها شصار بي؟
عقدت حواجبي من ڪلامها
تـــــاج... منو قصدج؟
خلود... ياسر
تـــــاج... شلي علاقة بي هوَ الي اجاني برجليه هاي اولاً ثانياً وخري عني ورجعي الشغلج
هزت ايدها وڪعدت تسولف وية البنات وتڪرز حب صفنت بالفراغ وصار عندي فضول اعرف ياسر وينة ڪمت من مڪاني ورحت وڪفت كبالها رفعت راسها الي
خلود... ها اشتغل فضولج؟
تـــــاج... شنو صار بليلة الطلعنة منا؟
اشرتلي اڪعد كعدت وهيَ بدت تحجي
خلود.... باليلة الطلعتن منا جان عدنة شغل سمعنة صوت طلق فزعنة ڪلنة عبالنة صار علينة ابلاغ گلها طلعت برة لڪينة باب البيت مالت قاسم مفتوح والصوت جاي من عندة ڪبل دخلنة جوة لڪينة ڪل الفرع ملتم نزل قاسم من فوك وڪال الواحد من الولد
قاسم... الزبالة الفوك نزلة
حجاها وطلع بسرعة مبين مستعجل صعدو الولد واحنا ضلينة واڪفين والفضول ڪاتلنة انشوف منو الراح هالمرة شوية ونزلو الولد شايلين بطانية وبيها واحد خلو بالڪاع وصرخت اول ما شفتة ياسر بسرعة عرفت الج ايد بالموضوع لأن اكثر من مرة لكفتج تتواصلين وياه ضليت ادورج ما لڪيتج كمت ودخلت جوة لڪيت ابتهال تخابر ومبينة تحجي وية قاسم
ابتهال.... مااا اريدددها بعد بيتييي طلعهاا منا عسسسة ما تشمرها للجلاب ما يهمنييي ما ارريدهاا بعددد
حجت كلامها وسدتة
خلود.... وين اتروح البنية فطنت هنا يعني عود ما تحسين بالذنب جبتيها وربيتها على الوضع تالي اطردينها
دارت علية وخزرتني
ابتهال.... انتِ معليييج ولا تدخلين هالشغل مو شغلج
ووراها راح كل من الشغلة وكمل حياتة وثاني يوم جابو اختج عبالي انت متي بس ابتهال كالت اسويلها جرة اذن وبس
رجعت للواقع ونفضت الافڪار من راسي الي يريد شي يعوف شي واني اشتري الطلعة منا بدمي والموت رخيص بعيني ماطولني ما ميتة بڪاع نڪسة
بيوم صادف الاربعاء الحد هسه اتذڪر اليوم وڪفت بالرڪن وكبالي عبر الشارع المشاية يمشون ڪتفت ايدية واباوع الهم احسهم طاهرين عڪسي تماماً حتى اخجل اخطي واعبر بالدرب اليمشونة
اتنهدت واتراجعت للبيت دخلت لڪيت ابتهال تحجي وية قاسم انطيتهم الجنطة من غير ڪلام ورحت للغرفة اول ما دخلت طفرت شُــذير
شُــذير... هلاوو... سمعت من ابتهال راح تطلع بالليل بس ما اعرف وين اتروح بس اسمعها تڪول القاسم انتَ ما يحتاج تجي وياي اني بس يشوفوني وحدي يدخلوني الشقتهم
ضليت ساڪتة ما جاوبتها اجت وڪفت كبالي
شُــذير.... وين صافنة يمعودة مو وڪت صفنتج
اتنهدت وجاوبتها
تـــــاج... يصير خير
ابتسمت ولزمت ايدية بڪفوف ايديها حضنتهن الصدرها وحجت
شُــذير... خليني ابالج بڪُل خطوة اتسوينها لا تتهورين الخاطري
تـــــاج... ڪُلشي راح اسويه الخاطرج اريد اخلصج من هذا المكان واني خلي اضيع لأن من الاساس ضايعة
دمعن عيونها وحجت برفض
شُــذير.... لا تحجين هيج بالعڪس تكدرين تتغيرين
تـــــاج... صعب شُــذير اني اتلوثت ما اڪدر انضف
شُــذير... اوعديني حتى لو ما طلعنة منا سوة تتغيرين؟
تـــــاج.... هالشي مستحيل يصير يا اما نطلع سوة او نموت هنايه سوة
حضنتني بقوة و احس بيها ترجف بخوف ايديها التفن عليّ وما تقبل تعوفني
تـــــاج.... ههه شبيج شذوراتي
شُــذير... خايفة لا تعوفيني
تـــــاج...ما اعوفج شنو هيَ هيتة اعوف الشـذر مالتي
رفعت راسها الي وهيَ تبتسم
شُــذير...انتِ احسن اخت بالڪون
تـــــاج.... واصير بعد احسن من نطلع منا
شُــذير.... هههههه زيادت الخير خيرين
ضحڪت وابتعدت عنها كعدت على صفحة وصفنت بالفراغ وبديت ارسم خطة للطلعة منا بس قبلها لازم اتأكد ابتهال وين تطلع وشوڪت تجي ولازم الڪة جناسينة ومستمسكاتنة هنه اكيد فوك لأن اني اكثر من مرة اقافل ابتهال وادخل الغرفتها ادور بيها ماڪو اي شي
ارتاحيت شوية وڪمت طلعت برة وضليت احوم بالمڪان بس بطريقة ما تخلي ابتهال تشك باوعت للساعة راح اتصير بالستة العصر شوية وابتهال حجت
ابتهال.... راح اطلع بشغلة لا اطلعين فاهمة والله لو اسمع طالعة تحومين يم قاسم اقري على روحج السلام
تجاهلت ڪلامها ڪُلة وحجيت
تـــــاج.... شوڪت تجين؟
ابتهال... ليش؟
تـــــاج.... حتى اعرف شوكت اطلع
ابتهال.... ما ادري لو ارجع لو ما ارجع
هزيت راسي وانسحبت من يمها واني مطمأنة لأن مفاتيح غرفتها حتى لو اخذتهن وياها اني اعرف مكانهن لأن قاسم عندة نسخة ويخليها فوك الكاونتر
رجعت للغرفة دخلت وسديت الباب
شُــذير... ها طلعت؟
تـــــاج.... لا بالليل تطلع
شُــذير...يعني اليوم نطلع منا؟
باوعتلها بحيرة وهزيت راسي بترردد
تـــــاج.... سواء لڪيت مستمسڪاتنة او لا نطلع منا بس
شُــذير.... شنو؟
تـــــاج... ما راح اضل وياج اخذج وأمنج بمڪان وارجع اسلم نفسي لأن اول وتالي يشتڪون عليّ بطريقة ما يڪشفون روحهم بيها ما اريد شي غير ارتاح تعبت و روح اهلي على الاقل يجوز من اسلم نفسي و اتحاسب ارتاح
انتفضت وڪامت
شُــذير... وليش تسلمين نفسج انتِ ما سويتي هذا ڪُلة مو بأراتدج انتِ انجبرتي تـــــاج لا تخبلينيي تفڪرين بس بية فكري بنفسج
تـــــاج.... صدڪيني احسن خيار هذا اذا ما سلمت نفسي راح نضل من مڪان المڪان مثل ام البزازين تالي لا احنه كاعدين هنا ولا كاعدين بمڪان ومستقرين ولا حضت برجيلها ولا خذت سيد علي
اجت وكفت كبالي
شُــذير... وقت استهزائج هسه؟
تـــــاج..... ههههههه يمعودة حياتنة ڪُلها استهزاء
اجيت ادور و اكعد جرتني من ايدي
شُــذير...دااااا احجي وياج
فلتت ايدي وصحت
تـــــاج.... شتردينيي اسوووي؟؟ انييي اريد.
أمنج ووراها ما الج علاقة بية انسينييي انسيني استقري بدووووني اني صعب اعيش حياة حررة ما اكدر وحتى اذا ما لزموني راح اضل خايفة وامشي واتلفت
دمعن عيونها وحجت بخنڪة
شُــذير.... صعب عليّ شلون ترديني استقر بدونج اختي وامي انتِ ما اكدر تـــــاج فكريلها صح اذا هيج الطلعة منا تسبب فرڪانة ما اريدها وطز بيها اضل عايشة هنا احسلي
ما جاوبتها رحت ڪعدت بالزاوية وخليت ايدية على راسي واكواعي على رڪبي كعدت كبالي وصافنة الغرفة صارت هدوء ومانسمع غير تنهيداتنة ونضراتنة تشرح ڪُلشي اثنينة ما مقتنعين بالفڪرة بس ماعدنة خيار ثاني اني شوكت ما حسو ما افيدهم راح يسلموني ويڪدرون يطلعون نفسهم مثل الشعرة من العجين وشُــذير على يا ساعة تبيعها
حجيت واني اباوع للسقف
تـــــاج.... اخذج المڪان نضيف تستقرين هناك اتصير عندج صديقات وخوات غيري و
قاطعتني
شُــذير.... مو ڪُلها مثل حنيتج مو ڪُلها تـــــاج اختي
تـــــاج.... تنسيني صدڪي الايام تنسي ڪُلشي مو هاي اني عشت بدون اهل ولا سند
شُــذير... بس الهسه مناسيتهم!
تـــــاج.... شُــذير اتعلمي مو ڪُلشي الي انريدة يصير اليوم الفجر اخذج البغداد اسلمج الدار الايتام وانطيهم مبلغ الج يضمونة الحد ما يصير عمرج 18 سنة اطلعين مناك واتصرفي بي و اني ارجع كبل اروح للمركز اسلم نفسي
شُــذير... مو بڪيفج ما اررررريد ارووووح تـــــاج صعببببة ما اكدررر وين اروح البغداد وووين موديتني الدار ايتاممم وبرأيج هذا حل مناسب يعني؟؟؟ وحتتى اذا رحت ترا ما اطلع من يصير عمري 18 ما اطلع منا الة لمن اتزوج
تـــــاج.... مناك الهذاك الوقت ڪُلشي سهل ما تعرفين شڪد حكمي احتمال اطلع
دكت بأصبعها على راسها وصاحت
شُــذير... انتِ اتخبلتتتي رسمي وعقلج بح طاااار مااا اررررريد اطلللع ياا امااا نطللللع ونعيششش سوة لووو لااااا ماا اررريد
سڪتت عنها وضليت اباوع للسقف الي ياما وياما صفنت بيه حسيت بيها اجت يمي اتربعت ونامت على رجلي وبجت خليت ايدي على شعرها والايد الثانية مسحت ادموعها
تـــــاج... اي ليش البجي يا حبيبتي؟
شُــذير.... ڪتلج اريد اطلع بس مو وحدي تـــــاج ما اڪدر بدونج ما راح تشتاقيلي؟
تـــــاج.... مو بس عليج صعبة صدڪيني عليّ اصعب ڪُل ما اتخيل يومي بدونج ما اكدر شلون اذا صدك بس حسبيها وياية ما ترديني ارتاح؟
شُــذير... راحتج بالسجن!
تـــــاج... راحتي من اشوفج بمڪان امن
شُــذير... ماكو مكان امن ڪُلها تريد تنهش بلحمنة ويخلونة بين انيابهم
تـــــاج... مو ڪُلها من يشوفونج قوية ومحد يكدر يجرج بحجاية ويستقلج محد يتجرأ يحجي وياج حجاية
شُــذير.... هه شيفيد اللسان والقوة اذا الناس شيطان بهيئة بشر
ما جاوبتها رجعت حجت
شُــذير.... اريدج وياي بڪُل خطوة اخطيها
اتنهدت واشرت على مڪان ڪلبها
تـــــاج... خليني هنا دائماً
سڪتت ومو مقتنعة بڪلامي كامت فرشت واتمددت ولفلت نفسها بالبطانية
غمضت عيوني بيأس وسندت راسي عالحايط ضايعة ضايعة!
احتاج احد يدليني الخطوات الصحيحة
احتاج احد يرشدني تعبت من التفڪير حسيت ڪُل الطرق انسدت بوجهي
نزلت ادموعي بڪسرة صعب عليّ اعوف شُــذير بس ما بيدي شي على الاقل هناك تنام وهيَ ومطمأنة عڪس وياي راح تنام يومية بمڪان راح تشرد وياي من مڪان لمڪان
ماعندي واهس للدنيا ولا اريد اعيش الباجر حسيت نفسي عاجزة وما دا اكدر اتخذ قرار صحيح
سمعت صوت شهڪتها بسرعة فتحت عيوني وڪمت مشيت بسرعة لفراشها دنڪت ووخرت البطانية عنها
داحسة وجهة بالمخدة وتشهك جرت البطانية ورافضة تشوفني دحست نفسي يمها واخذتها الحضني
تـــــاج... ليش تقهريني ليش
شُــــــذير.... ما اكدر تـــــاج ما اكدر اتقبل فكرة اعيش بدونج انتِ مو بس اختي انتِ امي وڪُلشي بالنسبة الي من راح تعوفيني ما راح اخسر بس اخت راح اخسر ام و اب و ڪُلشي
تـــــاج... سهلي ڪُلشي الخاطري اذا عندي معزة بڪلبج
شُــذير.... تـــــاج ما اڪدر احس داموت مجرد الفڪرة رعبتني شلون ترحين للسجن
تـــــاج... ماكو اسهل منها اروح هناك اكل ونوم ابلاش وڪُل ما لذ وطاب الواحد شيريد غيرهن
رفعت راسها وخزرتني
شُــذير... اني ابجي وانتِ تضحڪين؟
تـــــاج...تعاي ڪليلي مو انتِ اونثى على كولتج وعندج ڪيان وشخصية وڪذا واليشوفج يحوفج طلعتي تبجين على اتفه الاسباب
شُــذير... برأيج هذا سبب تافه؟
تـــــاج...اڪيد لا بس فڪري بيها عيشة مريحة بعيدة عن قاسم وابتهال اااخ ولج لو اني منج اشرد بروحي العزيـزة
شُــذير.... ما دا تفهميني ابــدد ما ادري دا تستهزئين بڪلامي شنو وضعج؟
اتنهدت وخايت راسي بصف راسها
تـــــاج... ما استهزء بڪلامج وداعتج ڪلبي مشتعل شعل بس اني تعبت من شغلهـم خلـي اسلم نفسـي ڪبل لا همه يسلموني ويعتبرون نفسهم فازو علية
شُــذير... اذا رحت للداࢪ وانتِ رحتــي للسجن راح ترتاحين؟
تـــــاج.... اي
شُــذير.... هذا هوَ قابلة
حجتها بس بخنڪة رفعت راسي الها
تـــــاج... يعني شنو؟
شُــذير.... سوي الي تشوفينة صح انـي اثق بيج وراح اضل انتضرج لأخر يوم بعمࢪي
ابتسمت وبستها براسها والدموع اتجمعت بعينـي حاولت اخفيها وابتسم الها درت للساعة بالتسعة بالليل رجعت نضري الشُـذير
تـــــاج... نامي يلا ورانة ڪعدة الفجر
غمضت عيونها ونامت كمت طفيت الضوة وڪعدت بالزاوية ضميت رجلية الصدري وخليت راسي عليهن بدون حرڪة
معقولة هالمرة خطوتي صحيحة؟
راح انجح لو لا؟
راح يتحقق الي ابالي لو نفس ڪُل مرة افشل؟
رفعت راسي واباوع الشُـذير ما ڪاسرني غيرها اعرف ڪُلش زين صعب عليها اتضل وحدها وخصوصاً شُــذير من النوع الهادئة بشڪل وما عدها تواصل وية اي احد وبأوقات المدرسة وية معلماتها حتى صديقات ما عدها فصعب تتقألم بس احسن الها من هنا وأمن
زين واني؟ انسجن ويروح شبابي ڪُلة بالسجن؟ اروح ضحية واني لا بيها ولا عليها
هما عدهم ضهر ڪُلش قوي من احزاب وغيرها بسس انييي؟
مستحيل اطلع من عدها واذا سلموني هما اغلب الجرائم الي مسوينها راح يڪربسونها براسي
رفعت شعري ليفوك وڪلت الوقت يحلها صارت الساعة بـ11 باللـيل ڪمت بدلت ملابسي وخليتهن بالڪاع ولبست ثانيات مريحات اڪثر لأن وراي شغل
اخذت الموبايل وضميتة بجيبي وطلعت من الغرفة باوعت بأرجاء البيت ماڪو فارغ والوقت اتأخر ما اتوقع بعد يرجعون وقاسم اذا طلع ما يرجع الة للفجر
رڪضت للمطبخ وجريت ڪرسي وصعدت اخذت المفاتيح من فوك الكاونتر
قاسم ما ياخذها وياه لأن يضيع او ينساها بمڪان دائماً اسمع ابتهال تحجي عليه واڪثر من مرة يضيعهن ويرحون يغيرون المفاتيح
هالاشياء ڪُلها عرفتها بسبب مراقبتي الهم نزلت من الڪرسي ورڪضت الغرفتهم رفعت ايدي اريد اخلي المفتاح بالباب ما اڪدر من ورة رجفتها ڪضيتها بأيدي الثانية وثبتتها فتحت الباب وسحبت نفس ودخلت شغلت الضوة ورڪضت كبل للكناتير بديت ادورهن بسرعة بسرعة وعيني بين الساعة والباب تعبت وما لڪيت شي
ايست وڪلت هذا هوَ خلي اطلع اجيت انسحب وانتبهت العلبة بيها ادوية ضيقت عيوني عليهن هذن المنو؟ الي اعرفة ابتهال وقاسم صاحين ومطيحل ما يطڪهم منين اجتهم الامراض
دنڪت جبتها من الكنتور وفتحت العلبة وطلعت الادوية الباڪيتات ڪُلهن ثڪال فتحت اول باڪيت ولڪيت بي مفتاح عقدت حواجبي بأستغراب مفتاح والمن؟ بسرعة طكت ابالي للطابق الثاني
اخذت المفاتيح من العلب ڪُلهن وطلعت من الغرفة رڪض
طلعت برة وطفرت من الباب الي مخلينة بنهاية الدرج وصعدت بسرعة واني اعد انفاسي واعد الوقت طلعتي منا رفعت المفاتيح وبديت اجربهن واحد واحد الحد ما انفتح الباب ابتسمت ودفعتة ودخلت
ولا زالت الحكاية مستمرة
تصبحون على الف خير