غُرفة باردة وفارغة .. سرير فقط وضوء فوقه أبيض .. جسد هَزيل مَشقوق من صَدره وحتى حِجابه الحاجِز اربع أطباء تشريح واقفين وواحد يُقطع الاوتار والشبكات الدموية يقتلع الأعضاء ويضعهُم في كيس وفي صندوق .. اقتلع القلب والرئتان والامعاء واقتلع اللوزتان والعيون
اسماعيل: دكتور الست ايلول رح تجي بعد شويه تشوف الجثه
يومئ اسماعيل وهوَ بعده يقتلع الاجزاء الباقِية شوية وأنفتح الباب اجتي ايلول ولابسة كمامة وكفوف وخروا من طريقها الا اسماعيل الي كان غاطِس ايده في داخل الجثة كتفت ايديها لصدرها وتباوع
أيلول: اعضائه سليمه
إسماعيل: كان غذائه ممتاز
عقدت حاجبها ونبست
ايلول: بس كان واحد من السكارى
عقد حاجبه والتفت عليها بحيرة هز أكتافه ميدري وفجأة تجاوب جَمُر
جَمُر: اي ماچان سكران هذا تهجم على مَارلين
همهمت ايلول بفهم وفزت وگالت وهيَ دتطلع
ايلول: نسيت اغيرلها الشاش رايحة انتِ فتشي بقية الغرف
هزت راسها جَمُر وطلعت أيلول .. هذا اليوم الثالث من الجريمة الي هزت بغداد لبشاعتها .. لگوا الجثث طالعة من المَقابر أثر الانفجار يعني لسوء الحظ المقابر الي كانت قريبة على الانفجار جديدة والادمي المَدفون بعده ماشابع موت .
دخلت على مَارلين ولگت عندها مُهاب وأيليا ويَاقوت تمسح على شعرها وهيَ نايمة باوعت حولها وسألت بعفوية
ايلول: مَجد وين؟؟
اول ما استوعبت حچت بصوت عالي وفززت مَارلين
ايلول: قصدي .. وخروا دا اغيرلها الشاش
تقربت وگام مُهاب منها حچت مَارلين بتعب واضح
مَارلين: شكو؟
تبتسم ايلول بوجهها
ايلول: ماكو شيء خل اغيرلج الشاش حتى مايتلوث الجرح ..
رجعت راسها للمخده ورفعت تيشيرتها وباوعت لمُهاب
ايلول: مُهاب ..
مُهاب: هاا؟
استوعب مُهاب وگال تمام وطلع بره وبقوا البنات .. رفعت تيشيرتها أكثر وشافت أكو وحمة حلوة على خصرها ابتسمت وبدأت تشيل الشاش والقطن ومَارلين ما الها أي حس بس تباوع للسگف بحيرة أيليا تباوع لياقوت وياقوت تباوع لأيلول الي بدلت الشاش وعدلت ملابسها وگعدت يمها
ايلول: شلون صرتي؟
مَارلين: الحمد لله
أيليا: مارلين منو حُر؟
شافوا مَارلين فتحت عيونها على وسعها وشفايفها ترجف راحتلها ياقوت وتمسح بوجهها
ياقوت: اشش مارلين شبيچ شكو؟؟
ومارلين ترجف وأيدها اليمين ماتتحرك
تضرب على خدها بخفه لحد ماهدأت وغمضت عيونها وحچت بهمس
مَارلين:اطلعن بره
يعقدون حاجبهم الا ياقوت الي تفهمت وأشرتلهم يطلعون
تحچي مارلين بهمس
مَارلين: ياحبيبي عمري انتَ روحك مامرتاحة هناك ادري والله بس أفا أسكت لوحدة رح اخليك ترتاح حبيبي انتَ
تنزل دمعتها وتمسحها بسرعة ماتحب تبچي حتى گدام نفسها
غمضت عيونها بتعب ونامت
فرت عَلى صوت دق الباب سمحت بالدخول وشَافت وهَج بأبتسامه وشايله صينية فطور وياهم عصير برتقال وراها وهَج تگمز أبتسمت من شفتهم
وهَج: جَمُرر اثبتي رح اوگع
جَمُر؛ عود اذا وگعتي اكضج لتخافين
ايلول: والله عيب عليچ
التفتوا على ايلول الي تخبصهم خبص اذا شافت شي مال هتلية عيب ماعيب
دخلت وهَج وحطت الصينية گدامي وساعدتها ترتجي على تاج السرير
جَمُر: اهوو شراح يخلصني هسه شگلت انا؟
أيلول: عيب عليچ تكضين بنية
ضحكت جَمُر وگالت بسرعة
جَمُر: چا المن اكض خالتييي؟!
ايلول: والله عيب عليچ تصيحين عليَ
جَمُر: عمي دروحي
ضحكوا مَارلين ووهَج عليهم وبدأت وهَج تسوي لقمات صغيره وتحطها بحلگ مَارلين أكتفت مَارلين وأشرتلها خلص اخذت العصير وشربته كله وتريعت
جَمُر: ومرض
ايلول: عيب عليج تتريعين
مَارلين: اهوووو دگومن
ضحكت وهَج وگالت
وهَج: معليكم الف عافيه حبي على گلبچ
ابتسمت مَارلين بغرور لأيلول وجَمُر وجاوبتها وهَج وهيَ تلحن
وهَج: زيدي بغرورچ يا حليوة زيدي
ضحكت مَارلين وگعدت يمها ايلول وجَمُر يسولفون وياها وهيَ تنتظر الأكل ينزل وساعدتها جَمُر تمددها
جَمُر: اگلچ مارلين ليش ماناخذج مستشفى؟
أيلول: علويش؟ هياتها دتتشافى ماشاء الله وجرحها نظيف
مَارلين: اي جَمُر ميحتاج انا هنا مرتاحة اكثر
ضلوا يسولفون وياها لساعتين وطلعوا گالوا رايحين للشركة الي ورثتها أيليا من جدتها بالحقيقة هنَّ شركتين بأدارة ايليا وسوت البقية مسؤولين راحوا جَمُر وايلول وياقوت وايليا للشركة وبقت يم مَارلين وهَج والمَجد ،.ومُهاب وأُحُد طلعوا يتمشون
دخل مَجد بعدما دگ الباب وگعد بصف مَارلين ويسولف ويتشاقه
مَارلين: تتذكر لمن جدك راد يكتلك واني وديتك للشجرة؟
ضحك بصوت وگال
مَجد: ايي واتذكر غدرتي بيه وكتلتيني
مَارلين: طبعًا اكتلك بايگ من فلوس جدك حتى تتوب لو بعدك ايدك ماشاء الله خفيفة تخمط
رفع ايديه مستسلم
مَجد: ماعليه انا بطلت هالسوالف من زمان كنت مراهق
ضحكت مَارلين شوية ودخلت وهَج بأيدها صحن بيه تفاح مقطع وفوگاه نوتيلا
مَارلين: الله! طبقي المفضضلل
اخذت الشوكة بسرعة وبدت تاكل بكل استمتاع وهيَ تسولف وتضحك ومَجد كلساع يگوم يسوي فعاليه ويضحكهم
وهَج: اخ بطني كافي مَجد رح اموتتت
مَجد: ههههههه والله يركض وراية ويصيح انتَ كتلت حمودي وانتَ كتلت زنوبة عمي منو ذولة رحمة لجد جدك
زادوا بالضحك لحد ماتعبوا
وهّج: اخ يمه تعبت صدگ السوالف وياك حلوة اتعجب ليش ايلول تضوج منك
سكت مَجد والتفتت عليه وهَج
وهَج: مضايقها بشيء؟؟
مَجد: لالا . لا والله كلشي مامسوي هيَ من وحدها ما أعرف ليش
وهَج: اممم يلا اعذرها هيَ هيچ دائِمًا هرمونات
ضحك مَجد بخفة وصفن شوية
بَعد اربع ساعات اجوي ايليا وجَمُر وياقوت وايلول للبيت تعبانين اتلگتهم وهَج هم ينزعون الاحذية وگالت جَمُر
جَمُر: اووفف اخذلي غفة ام الخمس ساعات
وهَج: اطيح حظچ اذا تنامين الساعة ستة المغرب شتنامين
ياقوت: ستة لو شيعة
دفرتها ايلول وطبت
ايلول: دنچبي
جَمُر تقلد على ايلول وتعيب
جَمُر: مو عيب؟؟
دخلت ايلول تجاهلتها والبقية دخلوا يرتاحون .. دخلت ايلول على مَارلين وسلمت عليها
ايلول: السلام عليكم
مَارلين: وعليچ السلام
ايلول: ها شلون صرتي؟ خوما الجرح يأذيچ؟
مَارلين: لا بس جوانبه تحكني
ابتسمت ايلول بفرح
ايلول: اي ممتاز معناها دينلحم
ابتسمت مَارلين وگالت
مَارلين: صيحيلي وهَج
ايلول: تمام تريدين شي بعد؟
مَارلين: لا حبي شكرًا
طلعت ايلول ودزت وهَج دخلت وهَج بأبتسامة ووراها صوت جَمُر وأحد
مَارلين: شكو؟
وهَج: ديتعاركون
رفعت راسها بملل ورجعت
مَارلين: اهوو شنو جهال منو البدأ؟
وهَج: ههههه جَمُر ذبتله بسمار وگبوا نار وبارود
همهمت مَارلين
وهَج: اي شردتي مني؟
راحت ابتسامة مَارلين وبلعت ريگها وأشرت لوهَج
مَارلين: تعالي گوميني
سندتها وگامت وگفت وباوعت لوهَج
مَارلين: وهَج رح اسألچ وجاوبيني بصراحة وبدون چذب
قلقت وهَج
وهَج: مَارلي شكو؟ احچي اجاوبچ
مَارلين: ايليا شمعرفها بحُر؟
فتحت عيونها وهَج وبلعت ريگها وتوترت وبسرعة حاوطت مَارلين وابتسمت
وهَج: حبيبتي شعندچ بهالكلام؟
مَارلين: وهَج جاوبيني ايليا شمعرفها!!!
صاحت بآخر كلامها بوجه وهَج وزفرت وتستغفر مسحت وجهها واندارت لغير جهة ررجعت لوجه وهَج تحچي بهدوء
مَارلين: وهَج ايليا منين تعرفه؟ هاه؟ جاوبيني عيني انتِ اني حچيت شي؟؟
وهَج: مارلين انتِ متدرين بوضع ايليا؟؟ مو چانت مريضة نفسيًا تخربط بالكلام لتهتمين
مَارلين: شلووون ما اهتم شلوننن!!!؟؟ منين تعرف اسمه لعد؟؟
وهَج: اگعدي مَارلين ولترفعين صوتچ بوجهي
گعدت ورفعت عيونها وباوعت لوَهج
وهَج: وانتِ نايمة تگولين اسمه وسمعتچ وهذا كل ما بالأمر .
مَارلين: اكيد؟
وهَج: اكيد .
لانت ملامحها واستغفرت تحت انفاسها هزت راسها موافقة
مَارلين: تمام
همهمت وهَج وتريد تطلع بس سحبتها مَارلين وحضنتها
مَارلين: اسفه
بادلتها الحضن وابتسمت
وهَج: انجبي لتتأسفين يلا خل اروح اشوف الحراس
مَارلين: تمام بس ساعديني ادخل للحمام
سندتها ودخلت للحمام وراحت وهَج افترت حول القصر تتأكد منه ومن الحراس ومن كل شيء .. دخلت للبيت وللصالة لگت الكل گاعدين وجَمُر وأحد واحد يخزر بالثاني ومَارلين گاعده بصف ايلول وتسولف وياها .. دخلت وگعدت وياهم
مَارلين: عاجبني نروح للملهى مالتنا ونشرب شويه ونتونس شنو رأيكُم؟
جَمُر:يلا ليش لا
أحد: محد اخذ رأيچ مو مهم
جَمُر: سد حلكك لا اشگه
يفتح حلكة
أحد: تعالي شكي
تريد تگوم ولزمتها ايليا
جَمُر:هديني لا الزگچ بالحايط
ايليا: دگعدي وچفينه شركم وأحُد انتَ هم كافي
أُحد: مامسوي شي اني
ويباوع لجَمُر بغرور
جَمُر: اوكف اوكف فديوم الزمك وانيم القندرة براسك بلكت يشتغل عقلك شويه
مَارلين: اوووف اتورط احچي حچاية گدامكم؟؟؟؟؟
جَمُر: مَارليينن شوفيه هوَ والله هوَ بدء اني مو يمة
مُهاب: كافي انچبوا ، مارلين شلون نروح وانتِ متگدرين تمشين
مَارلين: خوما اليوم يعني اتحسن ونروح
التفتت على يَاقوت الصافنة واستغربت مو من عوايدها تصفن هواي
مَارلين: ياقوت؟
فزت وجاوبت بسرعة
ياقوت: ها ها
مَارلين: بيچ شي؟ اكو شي؟
ابتسمت ياقوت ابتسامة مُزيفة
ياقوت: لا عيني مابيه شي هيچ دا اريد ارتب روتيني ههههه
همهمت مَارلين وبقت تسولف ويَاقوت صافنة وتفكر وتهز رجليها
السَاعة 10:27pm ..
گاعدة بالشُرفة امام نهر دِجلة والاضاءة الخافِتة الي توضح جَريان النَهر وگدامها حَديقتهم الي مليانه زهور بمختلف الألوان والأنواع وتتوسطها نافوره كبيره .. تاكل اظافرها وتهز رجليها وفاير دمها
يَاقوت: تهددني يا حشرة ..؟! تهددني اني ياقوت تهددني؟ اصبرلي باچر باچر اذا ماخليتك تمشي وتخاف من ظلك اني ما أتسمى يَاقوت ال عطردَة .
ألصُبح السَاعة 9:28
گاعدين على طاولة الطَعام وكل شوية ايلول تباوع لساعتها
أيلول: ياقوت تأخرت مرت نصف ساعة .. گومي جَمُر شوفيها وين
تومئ جَمُر وتگوم تصعد على الدرج وتدگ الباب ماكو جواب ترجع تدگه وهم ماكو تغطي عيونها بأيدها وتفتح الباب
جَمُر: مدا اشوف مدا اشوف يَاقوت وينچ دننتظ ..
سكتت من فتحت عينها وشافت الغرفة فارغة ومرتبة عقدت حاجبها مستغربة وقربت اذنها على الحمام ماكو صوت ودگته هم ماكو فتحت الباب ودخلت الحمام فارغ ! وينها!
جَمُر: وينچ يا ياقوت وينچ
استغفرت ونزلت عليهم تركض
جَمُر: ياقوت ماكو!
شهقوا كلهم والأخوان استغربوا
وهَج: استغفر الله العظيم وينها هسه هاي !
تطلع تلفونها ايليا وتتصل ماكو رد وتتصل اخر شيء انغلق تلفون يَاقوت
ايليا: غلقت تلفونها
مُهاب: على الاقل عرفنا انها بخير هسه وغلقت التلفون اهدأوا هيَ مو صغيرة هسه تجي
گعدوا كلهم بحيرة ويفكرون بيها ..
تمشي فِي المَمرات الضيقة والقَذرة المَاء يخرج من تحت السُجون .. تمشي بِجانب السجون بِسرعة وامامَها الشرطي يقودها نَحو ابن عمتها مُجاد .. توصل لزنزانه عكس جميع الزنزانات فَهي أصغر واضيق .. حاطيه بالمُنفردة لشدة عدوانيته
توگف بغضب عارِم والشرطي يفتح الباب أول ما انفتح دفعته ودخلت عليه كان واقف مثل المَجانين بالزاوية دخلت عليه ولزمت رگبته تخنگه على الحايط وهوَ يبتسم بِجنون
ياقوت: انتَ شنو تهددني!!!!! من زمان خلصت من زبالتك ليش اجيت هسه ووگفت گدامي!؟؟
تحچي بصياح وهيَ تضغط على رقبته بقوه يدفع ايدها ويضحك ويگول
مُجاد: گلتلچ يا ياقوت رح انتقم منچ اشد الأنتِقام وانا اعرف زين شنو هيَ نقطة ضعفچ .!
ياقوت: انچب!!!!!!!
ضربته بوكس على وجهة ووگع بالگاع داست على صدره وگالت
ياقوت: وحگ العالي اطيح حظك يا مُجاد اكتلك خلاص اذا طلعت بطريقي بعد .!
گالت بتهديد وطلعت من سجن أبو غرِيب تتنفس بقوة ابتعدت مسافة عن السجن ووكفت ايدها على رگبتها وتنزل دموعها وتمسحها بعنف
ياقوت: اشش اش لاتبچين خلص انتهى ميطلع بطريقچ يخاف يخاف اهدأي اسكتي اشش
هدأت شوية ورجعت لمَلامحها البارِدة .. فتحت تلفونها ولگت الدنيا محترگه كلهم يدگون عليها .. شافت اخر اتصال من ايليا ضغطت عليه وحطت التلفون على إذنَها .. شوي واجاها صوت ايليا تصيح وتغلط وتسب
ايليا: وينچ يا نعال!!! صارلي شكد ادگ عليچ وانتِ غالقة تلفونچ! ردنا نموت وينچ انتِ!!؟؟؟
يَاقوت: اهدأي ايليا انا بخير مابيَ شي
ايليا: وتگلي اهدأي دنچبي انچبي واحچي وينچ؟
ياقوت: أبو غريب
ايليا: شنو!؟
يَاقوت: من ارجع نحچي
سدت التلفون بوجهها وصعدت السيّارة وانطلقت
——————————————————
إيليا: سدته بوجهي الحيوانه
مَجد: ماگالت وينها؟
إيليا: ابو غريب
وهَج: ابو غريب؟ شعندها هُناك؟
سكتوا كلهم مِنتظريها
بَعد ساعة ..
دخلت وبدون لا تنزع حذائها دخلت عليهم بالصالة واول ماشافوهَا وكفوا الا مارلين ضلت گاعده
مَارلين: وين چنتي؟
تكتفت ووكفت وزفرت بعصبية وگالت ببرود
ياقوَت: أبو غريب
مُهاب: ياقوت شتسوين هناك؟
جاوبته بعصبية
ياقوت: شنو صغيرة اني تحاسبوني؟؟ شنو شعندي هناك شغل عندي شغل!
عافتهم ودخلت لغرفتها گعدوا وزفروا
وهَج: شبيها هاي ضايجة اليوم
أحد: الي يشوف وجه هاي هم يفرح
أشر على جَمُر
جَمُر: مو اكوملك
ايليا: كافي عاد!!! مدتشوفون نحاول نعرف ليش ياقوت راحت ابو غريب؟؟ كافي مناگر عيب عليكم
ايلول: ايليا أكو عندها شخص تزوره هُناك؟
صفنت ايليا وفكرت
ايليا: يعني عندها هناك بيت خالتها
ايلول:عندها عداوة وياهم او لا؟
ايليا: لا
ايلول: اذًا مايفيدون احنا نريد نعرف ليش دخلت معصبة هيچ
مَجد: ميخالف خل نخابرهم ونعرف شكو شحچت وياهُم
مُهاب: اي فكرة جيده ايليا عندچ رقمها؟
ايليا تطلع تلفونها وتدور وتلگى رقم خالة ياقوت
ايليا: لگيته!
تضغط على الإتصال وتفتح سبيكر وتنتظر والكل ساكتين
شويَ واجه صوتها
رانيا: هلا ايليا حبيبتي شلونچ
ايليا: هلو خالة اني الحمد لله بخير انتِ شلونچ بناتچ شلونهن؟
رانيا: بخير كلنا زينين نسلم عليچ
ايليا: الله يسلمكم ، خالة عندي سؤال الچ
رانيا: اي حبيبتي گولي
ايليا: خالة ياقوت اجت عليكم اليوم؟
رانيا: ياقوت ..؟ لا ما اجتني هاي الثوله مع الاسف بيها
ايليا: اوه تمام عبالي اجتچ
رانيا: ليش؟ صاير شي؟؟ ياقوت بيها شي؟
ايليا: لا لا خالة مابيها شيء بس هيچ عبالي
رانيا: ايليا
ايليا: ها خالة
رانيا: اذا دتچذبين اطيح حظچ
ايليا: ههههههه
رانيا: لچچ
ايليا: لا خالة مابيه شيء يلا هسه لازم اروح مع السلامة
سدته بوجهها قبل لا تجاوبها
وهَج: هاا؟؟ صارلچ ساعة
ايليا: ماچانت يمها
وهَج: لعد ماكو مارح نگدر نعرف الا نسألها
أحُد: ايليا اكثر وحدة قريبة عليها روحي اسألي شبيها
جَمُر: اول مرة تحچي شي بي خير
احُد: دائِمًا بس ما اگول گدامچ
مَجد: كافي عاد وانتِ ايليا روحي شوفيها شبيها
هزت راسها موافقة وراحت للغرفة ودگت الباب ماسمعت رد وفتحت الباب ودخلت لگت ياقوت مبدلة ملابسها ومدده وايدها على عيونها
ايليا: يَاقوت
يَاقوت: طلعي بره
ايليا: ياقووتتتتت
ياقوت: اطلعي بره ايليا لتلحين
تگعد ايليا وتحط رجل على رجل
ايليا: ماگوم
توخر ايدها وتباوعلها
ياقوت: ايليا حبيبتي عمري طلعي بره وفكيني
ايليا: ماطلع اذا ماتحچين شكو
ياقوت: استغفر الله العظيم لاحول ولاقوة الا بالله
ايليا: بعد گومي صلي بينة
تزفر بأنزعاج وتگعد على حافة السرير
ياقوت: رحت لمُجاد
تشهق ايليا بصدمة وتباوعلها
ايليا: شوداچ لهذاك المُجرم!!!!!
ياقوت: ايليا شغلة بيني وبينه معليچ انتِ لاتتدخلين
ايليا: ياقوت احچي بسرعة شچنتي تسوين هناك!!!!
صرخت بأخر كلامها التفتت عليها ياقوت ولزمت ايديها
ياقوت: ايليا اطلعي بره بسرعة دمي ديفور تره!
صفنت عليها ونترت ايديها وطلعت بره وراحتلهم
مَارلين: ها؟
تتوتر ايليا وتتلعثم بالكلام
ايليا: ها ها؟
تعقد حاجبها
مَارلين: ياقوت؟
ايليا: م..مابيها شي
ايلول: ايليا شبيها ياقوت؟
تفكر شويه ايليا وتجيلها فكرة بس ..
ايليا: عليها الدورة وضايجة!
يخلون ايدهم على راسهم بحرج والاخوان انحرجوا وأحُد غص
ايلول: والله عيب عليچ
تركض ايليا لغرفتها بحرج وهيَ تمشي تحچي
ايليا: اي عفيه بالزماله عليها الدورة ليش ماكو غير هاي امداچ امداچ
تضرب راسها وتدخل لغرفتها
تباوع وهَج لمَارلين ويفطسون ضحك وضحكوا وياهم الباقين
مَارلين: اخخ ماگدر اضحك ولچ كافي هههههههه
وهَج: هههههههه شفتي وجهها؟؟
مُهاب: استغفر الله كافي يلا مَجد امشينا
مَجد: يلا يلا
مَارلين: وين رايحين؟
مُهاب: هيچ شغله هنا ونرجع
هزت راسها موافقة وطلعوا بس ايليا بغرفتها تفكر ليش راحت هناك شسوت شنو الي صاير .، تاكل اظافرها بتوتر ورجلها تتحرك وترجف وتعرگ .، بدأت تحس انُ حالتها دترجع گامت بسرعة تدور حبوبها وين الحبوب!! وينها! دفرت الغراض الي على الميز وتدور على الكومدي اخيرًا لگتهم اخذت تلث حبايات وشربتهم بالمي وگعدت تفكر وتمسح على راسها وشعرها
تدخل ياقوت عليها وتلگاها على هذا الحال ترجف وتمسح راسها وعرگانه تتقرب بسرعه وتحضنها
ياقوت: ايليا شبيچ؟ شكو؟؟
تجاوبها ايليا وهيَ ترجف
ايليا: ياقوت لتروحين بعد لتروحين هناك هذا المُجرم يسويلچ شي لتروحين
تضمها ياقوت لحضنها وتهديها
ياقوت: ما اروح ما اروح اهدأي اشش اخذتي حبوبچ؟
تهز راسها وتبقى ياقوت حاضنتها وتهديها
ألسَاعة 5:17pm
ايلول: مَارلين جرحچ ماشاء الله بسرعة يلتحم
تسد صندوق الطوارئ وتضمة تنزل ملابسها مارلين وتمدد
مَارلين: هههه شعبالچ
تدخل وهَج وبأيدها التلفون وتباوع بنظرات متوتره
مَارلين: وهَج شبيچ؟
وهَج: ااا هَذا أبوچ
تنصدم مَارلين .. شراح تگله؟
تهمس مَارلين
-گلتيله على الجرح؟
-لالا
تهز راسها وتاخذ التلفون وتحطه على اذنها اول ماسمعت صوت زفر جگارته بعصبية
مَارلين: الو بابا
بتّار: بدون چذب شبيچ؟
تبلع ريگها وتگول بتوتر
مَارلين: شنو قصدك بابا؟
بتّار: لا اله الا الله بابا مارلي بيچ شي؟
مَارلين: ل..لا بابا شبيه يعني؟
بتّار: أكيد؟
مَارلين: أكيد
بتّار: شلونچ عيني
مَارلين: الحمدلله عايشين انتَ شلونك؟
بتّار: الحمد لله
تتذكر كلام مُهاب وتتوتر
مَارلين: بابا
بتّار: ها حبي
مَارلين: بابا تحس احد يراقبك شي؟
بتّار: اممم لا بابا ليش ؟
مَارلين: اها هيچ اسأل تعرف انتَ اعدائك هواي
بتّار: امم ههههه اي صح بابا يلا اني لازم اروح
مَارلين: الله معاك بابا
تسد التلفون وتتنفس بأرتياح
مَارلين: خررببببب الة شويه انكشف
وهّج: ليش ماگلتيله؟
مَارلين: اوي يمعوده يضل يدگ ويلح اضوج
وهَج: رح يعرف
مَارلين: شلون؟
ترفع اكتافها وتفتح الباب
وهَج: أما بطريقة أو بأخرى رح يعرف
بَعد مَرور شهر .. ألخامِس عشر مِن أكتوبر .
يَاقوت: وربك أقتلك واقطع جثتك واشمرلك للچلاب حتى حرامات تندفن يا خايس
گالت بعصبيه وانفعال وصياح وهيَ تخنگ مُجاد الي ما أكتفى بتهديدها بنقطه ضعفها يدفع ايدها ويلويها ورا ضهرها ابتسم بحقارة
مُجاد: ههههههه يلا اذا صدگ مرة سويها اذا ما أگوللها كلشي واخليكم ناركم تاكُل حطبكم
تضربه على رجله برجلها وتضربه بوكس على وجهة
ياقوت: جرب بس!!!! جرب تحچي اخخخ يا مُجاد تشوف شخالق ربك
يلزم حلگه ويمسح الدم
مُجاد: نشوف نشوف يا ياقوت
تطلع من الزنزانه وتوگف گدامه والشرطي يقفل الباب تحچي ويه الشرطي وعينها بعين مُجاد
ياقوت: عمر هذا السَجين موتوه جوع شوفوه لحد ما امعائه تتقطع انطوه نص خبزه كافي
يضحك بحقاره مُجاد تبتسم ياقوت بحقارة اكثر
ياقوت: بالتوفيق .. ابن عمتي
تتفل العلچ الي بحلگها على وجهة وتبتسم وتروح تعوفه يسب ويغلط تشوف تلفونها ايليا دتدگ تجاوبها
ياقوت: ها ايليا
ايليا: ياقوت انتِ وين؟؟؟
ياقوت: ها امي وما ادري؟
ايليا: انتِ يم هذا المُجرم مره ثانيه؟!
ياقوت: لا لا ايليا اني .. اني ببيت خالتي رانيا
ايليا: انطينياها اسلم عليها
ياقوت: ها؟ لا مو دتسبح
ايليا:انطيني وحدة من بناتها
ياقوت: طالعات
ايليا: ياقوت لاترحين هناك اخاف عليچ
ياقوت: ايليا لاتخافين مارايحة هناك اهدأي واخذي مُهدئ واسترخي
تسد التلفون وتخابر على "مُقداد"
ياقوت: شلونك مُقداد؟
مُقداد: اهلًا ياقوت
ياقوت: مُقداد معوزتك بشي
مُقداد: ابشري اختي
ياقوت: جيب وياك رِجالك ورح انطيك عنوان مال سجن بي سجين اسمه مُجاد حسين صباح اذوه وودوه لخرابة او بيت مهجور
مُقداد: تأمرين
ياقوت: شكرًا الك
تسد التلفون وتدزله موقع السجن شويَ ودزلها رسالة
-*المُكان تريدي بأبو غريب؟
تفكر شويه وتكتب
-*لا جيبه قريب القصر يم الساحة
-*تمام باچر يكون موجود
ترجع للقصر
السَاعة 10:47pm
الكُل نايم نزلت ايلول من غرفتها حتى تشرب مي دخلت للمطبخ أخذت كوب وحطت بيه مي وبدأت تشرب حست بحركة وراها ما اهتمت لان جَمُر دائمًا تلعب بلي بالاستقبال لكن لمن حطت الكوب على القاطِع حست بأيد ضخمة حاوطت خصرها .. تجمدت بمكانها وحست الدم توقف بشرايينها ..
محاوطها بقوة وانفاسه على رقبتها .. فجأة سمعت صوته
مَجد: امممم
حست بثقله عليها وعرفت بي شارُب گالت بهمس وهدوء
ايلول: مَجد
مَجد: عيونه وگلبه
ايلول: ايدك لا أكسرها
يشد على الحضن اكثر
ايلول: ايدك مَجد
مَجد: ما اوخر ما ما ما
تدفعه وتنادر عليه عاري الصدر وشعره مُبعثر على عيونه وعيونه حمرة وعرگان
تتوتر ايلول وتگول بسرعة وتوتر
ايلول: انت .. انتَ شبيك؟؟
يعقد حاجبه ويعوفها ويصعد لغرفته .. تتنفس الصعداء وتمسح رقبتها من عرگه
ايلول: اني اعلمك
السَاعة 9:15
على طاولة الطعام كلهم وايلول گضتها تخزر بمَجد
جَمُر: يابة شنو سالفتكم انتوا؟
مَارلين: منو؟
جَمُر: هاي ايلول ومَجد شو ايلول تخزر ومَجد مغلس
ايلول: هوَ يعرف ليش
يغص باللگمه ويكح وايلول تبتسم وتگول بسخرية
ايلول: اسم الله طگوه عين طگوه عين
يستغربون كلهم ويتقرب أحُد لإذن مَجد
احُد: شمسوي؟
يدفر راسه بأيده
مَجد: دوخر لا اهينك
جَمُر: عيب عليك تهينه بدوني
أحُد: سدي لبوزچ ميتعب
وهَج: ايلول احچيلنا ليش هيچ انتِ ويه مَجد والله خطية ماشفنا منه شيء
ايلول: ها احچيلهم؟
گالت وهيَ تخزر بِ مَجد
مَجد: ترا ماچنت ادري بروحي والصُبح اعتذرت منچ
مَارلين: شصاير؟؟؟ احچوا عاد فتيتوا گلبي
ايلول: البارحة بالليل مَجد تحرش بيه
شهقوا الكل وايليا غصت بالأكل
ايليا: شنو؟!
يلزمه مُهاب من ياخته ويگومه ويعته
مُهاب: شسوالچ؟؟
مَجد: مُهاب چنت سكران ما ادري بروحي وخر ايدك!
مُهاب لازمه ويعت بي ومَجد ميگدر يسوي شي اخوه الچبير وسوء فهم
مَارلين: شلون هيچ تسوي مَجد!
يضربه مُهاب بوكس على خشمه والكُل ينصدم وتصير لحظه صمت .. يگوم مَجد من الگاع ويباوع لمُهاب الي خازره ويمسح الدم الي طلع من حلگه
مَجد: شكرًا مُهاب .. ايلول اسف ماچنت بوعيي
يباوع لمُهاب الي زفر بغضب ويروح يطلع برا القصر
وهَج: مُهاب ليش ضربته؟
مُهاب: فقدت اعصابي ماگدرت
تنقهر ايلول عليه وتگول بحزن
ايلول: والله ماچنت اريد هيچ يصير .. ماردتك تضربه هوَ صح چان سكران
أحُد: اهدأوا ميخالف هوَ بوكس خفيف حتى يتأدب هاهيَ ماصار شيء ايلول ميخالف
تركض ايلول لغرفتها والكل گاموا
مَارلين: استغفر الله ياربي
وهَج: اهدأي مَارلين هسه يجي ونگعدهم سويه ويتصالحون .. ياقوت وين مابينت؟
مَارلين: طلعت للشركة الصُبح گالت ماريد ريوگ
همهمت وهَج بفهم
———————–——————————————
يمشي على حدود القَصر بعصبية وهوَ يمسح الدم الي بحلگه
مَجد: دا اگول مو بوعيي ليش ميصدگوني؟ وهذا مُهاب الكلب اني اعلمك يا مُهاب
بينما ديمشي لگه ياقوت دتمشي بأتجاهة وملابسها بيها قطرات دم
يَاقوت : مَجد؟
مَجد: اهلًا ياقوت
تشوف الدم الي بحلگه وتتقرب
ياقوت: هاي شنو؟
مَجد : هيچ لاتهتمين
تضحك
ياقوت: كتلوك؟
مَجد : ياقوت على الأقل انتِ صدگيني
ياقوت: احچي شبيهم وياك؟
مَجد : البارحة اني شربت بالليل وبدون وعي حضنت ايلول بالمَطبخ وضربني مُهاب ومحد ديصدگني چنت سكران
ياقوت: اممم منا ايلول ضايجة منك من الاساس ألتمت عليك
يصفن مَجد بقهر وتطلع ياقوت كلينسه من جيبها وتمسح جرحه
ياقوت : كُل قصص الحُب تبدأ بِعداوة لاتفقد الأمل
تغمزله وتدغدغ حنكه
مَجد : هههه اي اي وانتِ ليش هدومچ بيها دم؟
تنگلب مَلامحها للعصبية
ياقوت : ماكو شي يلا اني رايحة محتاج شي وين رايح؟
مَجد: لا شكرًا هيچ رايح للنهر وراجع
ياقوت: تمام
تعوفه وتمشي لمدة طويلة الى ان وصلت الى مكان مَهجور تمامًا ونصفه مَهدوم والدنيا غيم وظلمة تقريبًا ورطوبة
تدخُل وتلگى مُجاد على الكرسي ومربط ووجهة مليان دم ومُغمى عليه وحوله رِجال ضخام القامة ووراه مُقداد
مُقداد: جبنا الامانات ياقوت
يَاقوت: هه الامانات رح تتگصب اليوم
مُقداد : سوينا واجبنا تحتاجين شيء بَعد؟
يَاقوت: تِسلم ماقصرت فلوسك رح توصلك خلال يومين
مُقداد : يلا شباب
راح مُقداد وجَماعته وبقوا يَاقوت وبعض الرِجال الي طوقوا المَنطقة .. تجيب سطل مملي بالمَي وتكبه كله على مُجاد شهگ وگعد يتنفس ويلهث ويباوع حوله
مُجاد : اني وين!!
يَاقوت : بأحضان المَوت
يرفع راسه عليها ويشوفها
مُجاد : ياقوت!
يَاقوت : ههههههه زين تتذكر عبالي فقدت الذاكرة. من شفتك غرگان بدمك
تتحول ملامَحه من الخايفة للشريرة والخَبيثة وتتقزز يَاقوت من شكله
مُجاد: خايفة؟
تضحك ياقوت بِصخُب
يَاقوت: مِن أيش؟
مُجاد : مِن الحقيقة الي رح توصل لِ إيليا
يفور دمها وتتقرب وتخنگه من رگبته وتگول بين اسنانها
ياقوت: لك لاتختبر صَبري ترا أخلي حتى الأرض ماتتقبل جثتك
يضحك مُجاد وتنتره ياقوت وتوخر
مُجاد : تخافين كلش من الحَقيقة ..
يَاقوت: مُجاد !
مُجاد : تخافين أگول لإيليا أنها هيَ الي قتلت أبوها بأيدها
تصرخ ياقوت
ياقوت: مُجاد !!!
بس الي ماكان بالحُسبان ..
بين أكياس الاسمنت والسكراب خرج صوت مألوف جدًا ومُهتز
إيلـيا : ياقوت ..
——————————————————————————
يتبععع ..
حِساب الرواية 👈🏻 @baghdad_storm
#wattpad