الرقطاء وكراتها الثلاث🐍
اللـدغة الخامسة والثلاثين🐍
بقلم كهرمانه
______
هرم:-وجد توفت اختنااا دفنناها قبل ساااعااااات ،ضربتني كف وصرخت بوجهي
-حيواانه لاتتفاولين على وجد بالمووووت والله اذا سمعتچ عايدتها
نقاء:-يمه مسك اهدي التحچي هرم صحيح متشوفين الهوسه اللي بالبيت والعالم الموجوده البقيه بحياتچ حـبـيبتـي
مسك:-لاا لاا لاا متموت روحوا صيحوها تچذبون عليه مجتمعين وكنان ماخلاها تجي مو اي كنان ماخلاها تجي يخاف عليها
نقاء:-لاا شوفي هذا ابنها موجود ياسين وكلنا موجودين بَــس هـيَ ماكـو اختنا مااتتتت مسك
هرم:-مسك صارت تتصرف تصرفات غريبه تصرخ وتملخ بروحها تريـد تنزل دموعها وكل الموجودين انتبهوا
اغمى عليها وركضنا سحبناها ونقلناها للغرفه مالتي بدأ البيت يخف من الناس وبقينا بَــس أنـي وخواتي وخالة نقاء ورفيف
حاولنا نصحي مسك انتبهت عالملابس اللي لابستهن جوه الكوت ملابس مستشفى
كعدت ماتحچي بَــس صافنه عالفراغ خفت احاچيها شـيي اجه بـَحـر يتطمن عليها بعد ما بلغته بحالتها
ضل يسولف وياها ويفهمها إنُ لازم تستوعب اللي صار وماكو واحد ميموت ومن هالحچي باوعتلنا وعيونها حمر وگالت
-شـلون ماتت شنوو السبب انقتلت لو قضاء وقدرر
هرم:-مرام قتلتها
مسك:-مرااام ام معااااذ ؟؟
هرم :-اي أم معاذ
مسك:-شلووووووووون وين چنتووا عنهاااا
هرم:-وجد جانت نايمه وجايه مرام ماخذه ابنها ومغرگته بالحمام وشايفتها جينا العامله ضاله تصرخ وگعدت وجد قبل لا مرام تطلع
بعدها أنـي وبحر اجينا عود زياره الهم وشفنا اللي صــار ومن اجوا كنان ومعاذ والشرطه
مرام قتلت وجد بمسدس منو ما اعرف وشلون هَـم ما اعرف لان جنت ملتهيه اسكت بياسين اللي اختنگ من البچي ومحد چان بحاله
مسك:-بـَحـر چنت موجود منين جابت السلاح
بـَحـر:-اهدي هسه انتِ بعديـن نسولف روحي ارتاحي
مسك:-هادئه متشوفني هااادئه گلي شـلون قتلتها بوسط الشرطه والناس شـلون محدد گدر عليها وانتم زلم وهيَ مرررره ترتكب جرييمه بنصكم
بـَحـر:-حضنت معاذ وجرت المسدس مالته من حزامه ضربت طلقه بالسقف مال البيت وطلقه بأتجاه وجد
مسك:-حلوووو يَـعنـي معاذ وامه مشتركين بالجريمه
بـَحـر:-لاا مسك معاذ معليه لاتضلين تلومين بيه هــيَ امه رادت تحضنه قبل لاا ياخذونها الشرطه ، معاذ شمدريه راح تسوي هيچ
مسك:-اندمهم والله اندمهم كلهم واطلع موتت اختي من عيونهم ماخلي واحد بيهم يتهنى بحياته ثارها يبقون يعانون منه طول عمرهم الجاي خلي يصبرولي
بـَحـر:-سمي بأسم الله هسه انتِ بعديـن تاخذ عقابها بالقانون لاتخلين هالشي يخرب حياتچ القانون ياخذلچ حق اختچ
هرم:-بعد ما عرفت منو قتل وجد ضلت هادئه وبرودها خوفني على حالتها صح چانت قوية لدرجة تواسينا وتبوس بينا بس أكو شي بيها غامض چانت حالتها تعبانه كلشش رابع يوم چنت مگابله ياسين وگاعده ديالا نايمه يمه ندگت باب البيت گمت من مكاني ونزلت فتحته صار بوجهي معاذ من شفته عطت بي
-شتسوي هناااااا ، هوه چان مدنگ وما حچه ولاحرف دفعته وردت أسد الباب استوقفني صوت
مسك:-نزلت وبيدي كوت أسود وملابس سود شفت هرم تطرد معاذ إبتسمت بتعب وحچيت
-لا تدفعينه هرم ، وإبتسمت بإستهزاء
هرم:-إنداريت عليها وعيوني تحرگني من الدموع
-شنوووووو ولچ قليل بحقه أدفعه أمه كتلت أُختچ ولچ قتلت أملي الثالث قتلت نصي الثاااالث مو بس هاي قتلت طفل تعرفين شنو طفل من وره غيرتها
مسك:-تقدمت عليه وحچيت وأني أحاول ألزم أخر ذره بقت بأعصابي البارده
-شعندك أجيت هنااا ؟!
رفع راسه وعيونه حمر يحاول يضم غضبه بين خجله ، لعوب معااذ اعوووذ منك ومن شرررك شيطان هرر اسود متنكرر بقناع لطيف اكره اسممه
معاذ:-اجيت عليكم أسأل عليچ بالي يمچ گلولي حالتچ تعبانه
مسك"قاطعته" :-ههه خفت لا أگول حبستني بمستشفى مجانين بتقارير كاذبة مثل حبك الكاذب وتمثيلك
هرم:-شنوو مستشفى مجاااانيييييننن أحد يفهمني مسك وين چنتي
مسك:-حچيت واني أباوع بعيون عوذه بنضرات برود وحقد
-اي چان حابسني بمستشفى مجانين طول فترة وجودي بأربيل
معاذ:-هسه مو وقته هذا الكلام
هرم:-هجمت عليه ضربته وهوَ رجع ليوره ومسك ضحكت وسحبتني أني تخبلت شنو حابسها بالمستشفى
-إنت المخبل إفهممممم انتَ وأمك وكل نفررر بيكم مخبل والله إذا القاضي ما حكمها إعدام اني اقتلها بأيدي
مسك:-روح منا ولا تشوفني وجهك هـا نسيت قبل لا تروح انتظرني
هرم:-راحت مسك تصرفاتها غريبه بس سكتت راحت جابت تليفون ديالا وإجت شوفته مقطع امه ويه عمه عابد بوضع أبدًا مو حلوو أتخبل من شافهم صارت عيونه بگصته راد يسحب تليفون مسك بس مسك خلته ورى ضهرها وحچت بضحك
مسك:-لا لا اعصابك عوذه منك ههههه شفت الوصاخه بعينك ، تحچي علينا مووو دشوف عرضك شملوووصه ، راد يسحب التليفون من عندي مره ثانيه گلتله
-لــيش مستعجل على رزقك عوذه
معاذ"حچه بصوت عالي":-مسكك هذا مفبرك مستحيل امي هيييچ تسويي
مسك:-شرايين رگبته نطت ضرب الباب بأيده وعافنه وطلع
هرم:-ليش ماشوفتي لكنان هيجچ أحسن
مسك:-لاا كنان مايگدر يسوي شي فاقد ما يدري بروحه متأثر بموت وجد كلش بس هذا الهـرر إذا ما أشوفه الفيديوو راح يحاول يتوسط ويدافع لأمه وتطلع منها مثل الشعره من العجينه
مستحيل يخلي أمه هناك وتنعدم حتى لو يروح لأصدقائه اللي بالدوله هواي عنده أطراف قويه يكدرون يطلعوها أو يخففون الحكم عنها هالزانيه بس الفيديو راح يجيب نتيجه
راح يتأكد من عمه وإذا نكر عابد معاذ يعرف لأن ذكي بهالسوالف وهيچ من يعرف بوصاخة امه راح يفتحلنا الساحه ويشيل أيده من أمه الزانيه
هرم:-لازم تنحكم إعدام ما اريدها عايشه ، زين أگلچ مسك ابوها لمرام شلون هذا هم اللي أدري بيه تاجر چبير اكيد يساعد بنته
مسك:- التجار يخافون على سمعتهم بالسوك بعد ما أدزله المقطع من رقم غريب وأهدده إذا فكر يطلعها هالمره من السجن
فـ راح ينتشر الفيديو بمواقع التواصل الأجتماعي وهيچ هوَ هم راح يبتعد لأن سمعت أبو مرام يشم لفلوس شم يموت عليهن مثل مرمر تخرب عالفلوس
هرم:-ايييع والله الفيديوات مال مرام وعابد تلعب الروح خطـيـه سلمى شِــنو ذنبها هيچ ينضحك عليها
هرم :-عفت مسك بالصالة صافنه بدون حركه ووجهها ذبلان واني بعدني بصدمة وجد ممصدكه راحت بعد ما أسمع صوتها
طلعت من عدهن ورحت توضيت وقريتلها قرآن ديالا عايشه بغير عالم تبجي إذا بچه ياسين نفسيتها تعبت
أما بيبي مرمر سمعنا بعد شهر من وفاة وجد وإبنها تريد تسافر لتركيا يم فارس خالي ورفيف ماقبلت تروح وياها أجت يمنه بقت حالها من حال ديالا نفسيتها تعبانه وحزينه على وجد كلش
صح چنت أغار منها لان عزرائيل چانت تعاملها أحسن من عدنا بس هيَ مالها أذيه على أحد وفاهيه بشكل
صدر حكم الأعدام بس ماتنفذ لأن حكم الأعدام بوقتها جان متوقف التنفيذ مالته للنساء
فعلا حچي مسك صحيح ابوها ما تدخل ومعاذ بعد ما عرف بعمه تعاركوا وطرده من البيت
والحجيه من الصدمة انجلطت وسلمى مادخلت روحها چانت خايفه على إبنها اللي من موت وجد چان يبچي واحلامه كثرانه يشكي من احلامه
والليل كله بس يعيط ويبچي وأمه ملتهيه بحالته ومتريد تعوفه حسب حچي رفيف اللي تتواصل ويه رانيا
بيومها ارتاحيت بس مسك چانت تخطط تدمرهم كلهم بـَحـر بهالفتره رجع للبصرة عنده شغل
بقى إسبوع هناك صح ما أنسى وگفته اللي وگفها ويايه وخله محاميين لقضية وجد (الله يرحمها) بس ما أنسى بيوم الحنه شسوه بيه طلعت من غرفتي لأن صايره أغلب الوقت بيها وبس أبچي وحالتي النفسيه تعبانه
من طلعت شفت مسك تحك برقبتها قووي صفنت عليها ثواني شفتها مثل المختنگه رحت لزمت أيدها لأن زلغت رقبتها بأضافرها
-شبيچ مسك گوليلي شبيچ ، بچيت وأني أحاول ألزم إيده وهيَ تصرخ وعيونها تريد تطلع من مكانهن ديالا إجت هيَ ورند ورفيف على صوتها المخنوگ وصياحي
رفيف:-يـمه شبيها مسك شووو لونها متغيررر
ديالا:-ركضت ترست گلاص مي وقريت عليه سبع مرات اية الكرسي والمعوذات ورحت أركض لزمت راسها والبنات لزمن ايدها
- مسك حبيبتي أمي أنتِ أشربي دخيلچ أشربي مي حتى ترتاحين
عاطت كل قوتها وعيونها نگلبن بچيت بالزايد رفيف گامت تلطم على حالتها لأن أول مره تشوفها هيچ تأزمت بالزايد بعد موت وجد كلش
ديالا:-هرم فتحي حلگها راح تعض لسانها
هرم:- فتحت حلگها لأن چانت صاكه على لسانها وطلع دم متت بدمي خوف عليها ابجي ولازمه أيدها ورنده لازمه رجلها ورفيف يم راسها وديالا تحاول تشربها مي
أخر شي ديالا صبت المي بحلگها ومسك تريد تستفرغ حسيتها إختنگت ، توسلت بيها تبلع المي بَــس هـيَ فاقده تعيط وبهالأثناء الجرس مال البيت يندگ
ديالا:-مسك حبيبتي أعرفج قويه تگدرين تتجاوزين يله أمي أشربي هذا المي للأخير كملي ، شربته بس بنفس الوقت فقدت الوعي تخبلت ايدها نار عبالك مطلعتها من تنور وأنفاسها بطيئه عطت وأني أبچي
-يمممه لاااااا عفيه راحت من ايدنااااا مسككك
هرم:-قـز القط اششش ، ركضت جبت عطر وحاولت اصحيها لحد ما شويه صحت بس تعبانة ذبت روحها عالقنفه ولزمت شعرها وتون صامته ماحاچتنا شي بچيت وحضنتها
-حبيبتي ما عندي غيرچ قوي روحچ انتِ امي لا تخوفينا عليچ لا تخذليني مثل ماخذلتني وجد وعافتني
ديالا:-رحت حضنت مسك من الجهه الثانيه صارت بنصنا تباوع علينا وهيَ ساكته أنفاسها هادئه ونظراتها شرارة وأيدها اللي چانت حاره ترجف حچت رفيف ودموها ماجفن دقيقه هـيَ ورنده
-مسك لازم نشوفلها شيخ لو سيد نوديها اله لأن مستحيل تبقى هيچ مو كل مره تسلم منها
مسك:-باوعت عليهن اقتراح رفيف صح لازم اتعالج ما ابقى على هذا الوضع هزيت رأسي وتمددت عالتخم
وخواتي محتوياتني حسيت بأمان بس مكانها خالي بنيتي الثالثه أم الشعر الأصفر الحلو تنهدت والحزن اريد اطلعه بأي طريقة ما أكدر نار بصدري
هرم:-سمعنا الجرس هم رجع يندگ رحت فتحته طلعت ام موسى وجهها أصفرر شافتنا وصاحت بخوف
-تحچين صدگ ياهرم گلبي وگف واني اسمع صريخهن شصاير ، يعني أطلع للسوك دقايق وهيچ صوتچن يا أمي أخاف عليچن
هرم:-خالة ماصار شي بَــس چنه نتعارك أني وديالا
باوعتلي بصدمة وهيَ تأشر على روحها خزرتها يـله نزلت ايدها الغبيه
مسك إبتسمت وأني ساندتها وصلتها للغرفه وجسمه كله حااار يسمط تمددت ونامت
ورى ما مسك نامت ورفيف خابرت خالة نقاء حتى تجي وطلبت من رنده ماتلمح عن اللي شافته
صح متگدر تحچي بس تعرف تكتب أم موسى إلتهت بالمطبخ وديالا أخذت ياسين وطلعت بالحديقة
ديالا:-طلعت للحديقه وياسين يناغي كُلش حلو وعيونه هَم حِـلوه نفس عيون وجد بسته من عيونه حسيت أكو حركه ورايه مثل الواحد وديمشي على ثيل
عرفته هوَ صار فتره يوميه من أطلع للحديقه أشوفه يباوع من بعيد لو يدخل للطرمه ويضل صاف ورى الزرع ، تقدم ناحيتي ولزم ايدي تفاجئت من عنده نكتت ايدي ورجعت كم خطوة ، ياسين من شافه بقى يكمز وهو بحضني يريده يشيله
إبتسم وأخذه من عندي بالقوه حضنه بقوه وضل يبوس بيه
-أفيشششش بيك ريحة من الأحبهم رمااااادي
ديالا:-حضنت نفسي وباوعتله
- شلونك
-باوعلي بـ لهفة باس ياسين وگال
-لا تگليلي شلونك وأني يمچ تأكدي اني كُلش زين ماطول مگابل هالوجه هذا الحلو
ديالا:-گلبت عيوني ليفوگ ومشيت رِدت أگعد بالمرجوحه وهوَ يمشي وراي گعدت وخليت رجل على رجل وگلتله
-يعني ماراح تستسلم
كميل؛-ما كاتب هاي القاعدة بعقلي ماكو يمچ إستسلام ،ممحي بمساحه أحبــچ وأضل أحبج لأخر يوم بعمري
ديالا:-ليش بعدك مُصر إنُ أكوو حُـب
كميل:-موجوده انتِ يعني موجود حب
ديالا:-بس أني شرررر أني ظلام راح يحاوطك انتَ واللي حواليك ماراح تسلم من هالظلام
كميل:-الله اموووت عالظلام
ديالا:-ماگدرت أخفي إبتسامتي اخذت ياسين من عنده ودخلت للبيت
.
.
هرم:-بقيت الليل كله سهرانه عيني على مسك ماگدرت انام دقيقه بَــس ترجف وتهذري بأسم وجد
ثاني يوم الصبح رفيف اتصلت على خالة نقاء وگالتلها كل اللي صــار وخالة نقاء اجت ومن شافت مسك ماگدرت تسيطر على دموعها بچت وضلت تلوم وتغلط على خيزران
أم موسى تريـد تفهم شِــنو اللي صــار بَــس من شافتنا محد تحچي ابتعدت ماتدخلت گعدت على صفحه اجت خالة كعدت يمي حچت بخفوت وهـيَ عينها على مسك
-يــاا يمه سوده بوجهي أنـي من زمان أگول لأبويه ياخذها يراجع بيها البنيه حالتها مو طبيعيه وهو يرفض يگول كلشي مابيها حسبي الله ونعم الوكيل عليك يارياض انتَ وبنتك المجرمه ام الزلم
هرم:-خالة مو وقته البچي أنـي اريد مسك تتعالج بعد مابيه أفقد وحدة من خواتي خسرت وجد ولهسه مامتخطيه غيابها هدت حيلي من راحت ماريـد انفجع بمسك
نقاء:-اي ولا أنـي الي حيل افقد وحده منچن إنتن هَـم بناتي
هرم:-جبناچ حتى تاخذينها لسيد أو شيخ لأن حالتها فـدد مره لاا نفسيه ولا جسديه
نقاء:-اي اي ناخذها
ديالا:-بَــس خالة فدوه شيخ زين مو من ذوله اللي يچذبون
رفيف:-لازم نستعجل حالتها ماتسمح ننتظر اكثر أنـي من شفت جسمها شـلون صــار حار گلت هسه الشرايين اللي بجسمها تطك من الحرارة لو شايفتها شـلون صارت قبيييحه تخوف عبالچ مو مسك
هرم:-سدي حلگچ احلى منچ ام كفشه
رفيف:-مو هيچ إفهمي يالثوله يعني متسيطر على نفسها قبل ماچانت هيچ مو اربعه وعشرين ساعة يمنه شنو ما أعرفكم لو تقشمرين روحچ
هرم مو مال عرك ومشاكل وسوالفچ ذني لازم كلنا نتحد نخلصها من هاللعبان نفس لازم نوديها لشيخ ويقرأ عليها ونعرف شنتصرف
لأن صاعد براسها نقاء لو تشوفيها تبچين دم على حالتها لذلك رجاءً هرم مسك مو بس أختج ممسك أختي وصديقتي وبنت إختي العار هم
ديالا:-باوعت على هرم حچي رفيف صح بس هرم نار صايره متعرف شنو تسوي تخاف على مسك وبنفس الوقت ماتحب واحد يشاركها بمسك ولا تحب تبقى متأذيه
مسك أشرت لهرم لأن رادت ترد على حچي رفيف بس سكتت
خالة نقاء ضلت تخابر وتتصل على معارفهم وگرايب بيبي وأهل جدو رياض تسأل واللي يسألها منو المريض
وهيَ تگول الهم بنت صديقتي وصديقتي كلفتني أسأل الها عن شيخ او سيد معروف،أخر شـيي إستقرت على واحد بمحافظة كربلاء إسمه أبو علي كلها حمدت بيه سدت التليفون وگالت
-راح أخابر على زوجــي واخويه محمد هرم تمشين ويايه ورفيف عينچ على مسك انتِ ورنده ، ديالا انتِ هم هذا إبنچ ديري بالچ على ياسين
هرم:-صعدت لغرفتي بدلت ملابسي وتركت خالة رفيف توصي بيهن لبست بنطرون وتيشيرت واخذت وياي بالجنطه حجاب نزلت وخالتي شافتني عاطت بيه
نقاء:-ولچ أمشي لبسي عبايه شنو بنطرون رايحه لهيچ مكان لابستلي بنطرون
هرم:-بَــس اريد اعرف ألمكان شعليه باللبس مالتي بلا تفلسف خالة
نقاء:-اوووف أمري لله أمشي يـله اجه زوجــي بالباب هــوَ راح ياخذنا
هرم:-ومحمد موجود؟؟ ، تنهدت وحچت بأنزعاج
نقاء:-لا گال بنتي مريضة ميگدر يجي عود غير مره گال اجي
ديالا:-باوعت على هرم إستهضمت وسكتت محمد هو مدلل جدو بس يحب روحه اكثر من كلشي تخلى عن أُمه وأخته على أساس هُمَ گاعدين و مأمن عليهم يم بيت آل صحار سكتت وودعتهن طلعن من البيت وكعدنه عالعشى بعد ما كل وحدك من عدنا صافنه وما عدنا شهية بكلشي وياسين بحضني ورفيف باوعتلي وحچت
رفيف:-ديالا شو أني خايفه
ديالا:-باوعتلها بنضرة إستهزاء وگلتلها
-عندچ أم وخايفه عندچ أخ وأخت مثل نقاء وخايفه من شنو تخافين صراحة اني احسدچ
رفيف:-غلطانه أني حالي من حالچن بَــس
ديالا:-قاطعتها وحچيت بعصبية وقهر
-شنو حالچ من حالنا ولچ احنه أول مادخلنا بيت ابوچ تبهذلنه وما عشنا مثل باقي الأطفال جبت طفولتي كلها أتحسر على لعبه ولچ اتجرني من شعري وتضل تلطخ راسي بالحايط اذا گلتلها أريد لعبة
وانتِ انتِ كلشي عندچ چنتي مدلله وعايشة حياة ورديه ألعاب عندچ وأخوتچ يحبونچ وابوچ يوميه مطلعچ واحنا وين من هوَ يطلعچ كاعدين نتدرب بأخيس مكان ببغداد
يطلعنه من الصبح نتدرب ونسوي شغلات انتِ بهذا عمرچ ماتگدرين تسويهن ابسطهن نقل الخشب بالبرد لحد مانكمل ايدينا اكثر من جرح بيهن وحتى وجع منحس بيهن الدم يطلع بدون وجع من الخدر واحنه كل عمرنا ثمانيه لو عشرة سنوات نحلم يوم يجي إذا ما ننكتل بيه
نحلم بحضن يلمنا بكلمة تشافي جروحنا وتجبر خاطرنا چنت اتمنى اشوف شخص يحبنا بدون مقابل هيچ حب عفوي
-طلعتلها ايدي شوفتها أثار الچويات هيَ سكتت ونزلت راسها اني فقدت ما أعرف ليش يمكن لگيت حجه أبچي عليها
بهالأثناء سمعنا صريخ مسك بصوت مو صوتها صوت مرعب ويقشعر البدن بس الشكل والمنظر يرعب أكثرر
عيونها مگلوبه وجسمها يختض خض تركت ياسين يم أم موسى ووصيتها ماتجي وهيَ تخبلت دخلت أني ورنده ورفيف تريد تلزمها متگدر
.
.
هرم:-انقهرت من موقف محمد بس سكتت أصلًا مو جديد هالشعور مال الخذلان عندي إذا اختهم خيزران شيطلعون وراثة بالحنيه
اباوع من الجامه وزوج خالتي يحچي ويحاول يلطف الجو وأني بالي مو يمه لحد ماوصلنا كربلاء وأني قلقه خالتي گالت لزوجها
-اتصل بيهم عيني شوفهم وين يم الگنطرة بالضبط
هرم:-اتصل زوجها بالشيخ ووصفلة المكان بالضبط وگله راح اطلعلك واحد واني رقمك يتصل بيك على ماتخلي السيارة بمكان
صف السيارة ونزلنا ورى شويه اتصل بيه رقم فتح عليه خط وحاچاه ضل يمشي وأحنا وراه احد ماشفناه أشر لعمو ورحناله اخذنا للبيت مال الشيخ
دخلنا للبيت الباب معلگين بيه بردة تفصل بين الزلم والنسوان أول مادخلت خالتي گالت السلام عليكم الأنضار كلها صارت بوجهي همست بأذن خالتي بعد ما گعدنا بالگاع
-اگول خالة أني كاتله متعاركه ويه أحد هنا قبل
نقاء:-لا وين عمرچن وحياتچن ما أجيتن لهاي المنطقة
هرم:-لعد شبيهن صافنات بوجهي
نقاء:-سكتي أجه أجه الشيخ
هرم:-سكتت بعد ما دخل واحد لابس دشاشة سوده وشعره خفيف بي شيب سلم والنسوان كلهن ردن السلام حچه ويه كم وحده ومدنگ راسه بعد ما خالتي راحتله وحاچته رفع راسه وصارت أنضاره عليه خزرته إبتسم ورجع نزل راسه وكمل حچي ويه خالتي رحت تقربت عليهم چانت تگله
-مانعرف هيَ شنو حالتها هسه بالبداية عبالنا خوفة مغربيه وما بيها شي بس من توفت اختها زادت حالتها
الشيخ:-جيبيها ليهنا سهله خويه سهله بالجلسات المستمرة تتشافى ان شاء الله
نقاء:-زين واذا أني أريدك تجي ويانه هناك للبيت منريد جلساتها هناا گدام العالم وهيَ مُستحيل تقبل تجي هنا اعرفها
الشيخ:-لا جيبيها خويه هنا حتى بعد كل جلسة تروح تزور وترتاح نفسيتها أكثر
هرم:-تقدمت أكثر وحچيت بعد ما همَ سكتوا
-بس هيَ عدها مشكلة ثانية
رفع راسه وطبگ حاجبه واني كملت حجي
-هيَ ما نزلت دمعة منها بموت أختي
الشيخ:-أكيد هاي صدمة
هرم:-لا مو صدمة هيَ متبچي اصلًا
-صفن بوجهي فاتح عيونه إندار على خالتي وحچه بأسف
الشبيخ:-خويه هاي البنية شلون عايشه هاي متأزمه نفسيًا وجسديًا لا حول ولا قوة إلا بالله جيبيها مثل ماگلتلچ و إن شاء الله خيرر
هرم:-بعد ما حچينه وياه ردت أشوفه شلون يتعامل ويه المرضى بعد ما طلبت من خالتي
لزم طفل من راسه وصار فوكه فتح عيونه بأصابيعه وچان يقرأ آيات ويردد أشياء همس لحد ما الطفل تقيء هوَ إبتسم وطبطب على ضهر الطفل
تطمنت من ماشفت أدوات ضرب لأن اللي سمعته الأكثريه يستخدمون أدوات ضرب
طلعنا من كربلاء ونص الطريق إتصلوا علينا فتحت التليفون شفت بـَحـر متصل ١٨ مره وديالا أربع مرات قلقت لأن تليفون خالتي هم متصلين رفيف و بـَحـر وديالا
.
.
ديالا:-ماگدرنا نسيطر على مسك گامت ترافس وهذا قلقني أكثر لزمت رجليها لأن چانت فاقده وعيونها بيض
رجلها نار تسمط وايدها اليمنى ترگعها بالگاع رگع وصوتها تغير حرفيًا عشنا الرعب بيومها رنده أشرتلي راحت جابت ورقه وقلم وكتبتلي
رنده:-لازم نحچي ويه بـَحـر صدگ هوَ اللي يگدر يساعدها
رفيف:-يمممه سوده عليه ولچ دياااالا شسوووي يمه صخام الصخمني راحت مسك من ادينااا
ديالا:-اااشششش ااااشش كافي أني بيا حال إذا تخافن اطلعت عوفنّا وحدنا ورنده إنتِ اطلعي منا أخاف تتخربطين
-بهالأثناء مسك صرررخت صرخه قوية وعيونها احسها حتطلع دم صارن حمررر
رفيف :-دممم عيونها دمممم شلوووون
-طفرت لزمت راسها لأن كاعده ترگع بيه عالحايط وگلت لديالا
- هيج مانگدر نسيطر عليها خابري اخوي محمد خلي يجي
ديالا:-حضنت مسك اندك الجررس فتحته ام موسى ورنده راحت تركض تشوف منو ..
.
.
يتبع