العقاب المتناقض

بارت 21

بنات قلبي لتنسون التصويت بين الفقرات + متابعه لحسابي فضلاً وليس أمراً ✨

#الكاتبه_اماني_المحنه✨

اسفه على الگطعه بس الشخص الي يرويلي احداث القصه انشغل وهم التفاعل ميسوي واهس الصراحه لذلك ما لحيت علي هواي خليته على راحته 🙃

🌼♡🌼♡🌼♡🌼♡🌼♡🌼♡🌼♡🌼

دخلو ايار و زمرد للبيت ايار كعد على الجربايه واخذ نفس عميق وزفره بضوجة خلك كعدت بصفه زمرد واردفت

: اوهه شنو هل حسره الي بداخلك

حط ايدنه ايار على راسه واردف

: ضايج زمرد ضايجج..

حطت ايدها زمرد على ضهره واردفت

: ليش ضايج يروحي فضفضلي بلكت ترتاح ويخف الثقل الي عليك..

نزل راسه ايار واردف بحزن

: كلما اذكر هذاك المشهد احس روحي تريد تطلع.. واحس بندم وغضب مو طبيعي

زمرد: هسه شكو غير تفهمني.. يا مشهد!

باوع الها ايار واردف: اهووو تعرفين شقصد زمردد

زمرد: رجعت ديمه لحالتها القديمه..

وكف ايار على حيله مزعوج من كلام زمرد واردف: شنو رجعت ديمه اني وين وانتي وينن.. ولج كلبي مجمر كلما يجي على بالي مشهد امي وبحضنها طفل وتعامله بكل حب وحنيه وتضحك بوجه اموت من القهر اموووووتتتت افهميييي

اردفت زمرد وهيه كاعده بكل برود

: وعليمن كل هل قهر هاي اني مثلك بس صرت ما اهتم..

ايار: وليش صرتي ما تهتمين..!

نضرتله زمرد واردفت: لان الله دزلي العوض فماكو داعي اضل اللطم على شخص ما حبني ولا اهتم بيه المفروض اهتم واحافض على الشخص الي يبادلني مشاعر الحب والاهتمام حتى لا اخسره..

نضرلها ايار واردف: ومنو هذا العوض؟

زمرد: انته...

ابتسم ايار بأستهزاء وانطاها ضهره واردف: ههه من كل عقلج تشوفيني عوض، ما عرفتج تجاملين والله

اردفت زمرد: لا مو مجامله وهسه راح اثبتلك كلامي

وكفت زمرد ورا وحضنته من ضهره وحطت راسه على كتفه ابتسمت واردفت: اكيد هل لحضه ذكرتك بشي

لمعت عيون ايار واتذكر اليوم الي راح حتى بي يفصخ الخطوبه وشاف زمرد هاربه من ابوه واحتمت بي..

زمرد: ها.. اتوقع اثبتت الك صحة كلامي

ايار: بس صدك انتي ليش احتميتي بيه بهذاك اليوم وانتي تعرفيني واني طفل يعني ايار الشاب انتي جاهلته..

زمرد: ايار انته هواي مستهين بنفسك..

ايار: مفهمت!! هاي شجابه على هاي!

اخذته زمرد من ايده وكعدو على الجربايه لزمت ادينه واردفت وهيه تباوع بعيونه

: شوف ايار انته بهذا عمرك كدرت تسوي اشياء الاكبر منك مكدر يسويها

ايار: مثل شنو؟

زمرد: مثل انك ما مديت ايدك للاحد واعتمدت على نفسك بوقت جنت بأمس الحاجه للمساعده اشتغلت بجد ذراعك وحسنت مستواك الدراسي و حافضة على بيتك و زوجتك..

ايار: كل هذا بيه!!

زمرد: شفت شلون مستهين بنفسك، لذلك اني ما اريدك تضوج على شي فات او تغار انته قوي وما محتاج للاحد اكتفي بالي عندك وانسه خلص لان غضبك وحزنك ما راح يغير شي يروحي انته..

اقترب منها ايار وحط ادينه على وجه واردف بنضرات حب
: زمرد جنت اشوفج مجرد عقاب امي عاقبتني بي بس كلما اقضي وياج يوم اعرف انو انتي نعمه جبيره هداها الي ربي وكل يوم احبج اكثر واشكر ربي على وجودج بقربي..

زمرد: بس مو بكثر حبي الك

ايار: اني اكثر

زمرد: لا اني اكثر

ايار: لا انيييي....

**

ثاني يوم الصبح راح ايهاب وابو لبيت ابو سمير شافتهم جوري وركضت لغرفه عبير
: عبير عبير اجه حبيب القلب

تجمدت عبير بمكانها وقلبها كام يرعد رعد من الخوف، اقتربت منها جوري واردفت
: شبيج ولج ليش كل هل خوف شنو راح يفترسج الولد مبين كاتل نفس عليج

عبير: حقج تحجين هيج لان ما شفتي نضرات عيونه الرعب ولج يخوفففف يماااااا شلون بيه اني من خره بحضي يعني لو ياخذني واحد حقير و اناني لو واحد رعببب اوففف..

جوري: اذا هذا وما عاجبج لعد اني شكول على حضي..

اردفت حوراء بفضول: مامه عمو ايهاب شيسوي جاي يوميه لهنا؟

ردت عليها جوري: لان راح يصير بابه مو عمو

حوراء: يعني شنو؟

جوري: يعني راح يزوج امج وتصيحي بابه..

فرحت حوراء وكامت طفر وتصفق وتردف: صدك مامه صدكككك.. عمو ايهاب الحلو راح يصير بابه..

عبير: هففففف محد يفهم عليه هناااا

كعدت عبير و بنتها حوراء مقابيل ايهاب وجان تبلش نضرات ايهاب الحاده عبير لمن صدت عيونها بعيونه كضت ثوبها حيل ونزلت راسها من التوتر والخوف..

ابو ايهاب: هاي ابو سمير هسه اتفقنه على الموعد؟

ابو سمير: اي اكيد وبعدين البنيه صارت الكم اذا تردون من اليوم اخذوها

ابو ايهاب: لا يابه شسالفه خليهم يتعرفون عليه بعض شويه لمن ما نجهز غراض العرس صح وقتنه قليل بسبب دوام ايهاب بالعسكريه بس ان شاء الله نلحك ويصير خير..

وكف ابو ايهاب على حيله واردف

: اني استأذن بعد

وكف ابو سمير واردف: وين بعد وقت اتغده يمنه وروح

ابو ايهاب: تسلم ما تقصر، بس عندي شغل وايهاب راح يضل شويه يم خطيبته اذا متصير زحمه

ابو سمير: هه لا هذه حقه طبعا..

راحو وضلو ايهاب و عبير وحدهم، ايهاب اشر لعبير وهوه يضرب على القنفه بيده حتى تجي تكعد بصفه لكن عبير متحركت من الخوف فأيس ايهاب منها وكف على حيله عدل جاكيته وراح كعد بصفها، عبير منزله راسها وتهز برجلها من التوتر فحط ايهاب ايده على رجلها واردف
: ليش كل هل توتر؟

ماردت عبير وضلت تهز برجلها كضها ايهاب حيل من رجلها وخلاها توقف هز واردف وهوه يباوع عليها

: ليش ما تردين عليه عبير؟ شنو زعلانه مني لو شنو!!

ماردت عبير رجع ايهاب اردف

: شوفي هوه حقج لان اني فاجأتج بهل شي بس صدكيني مكدرت اصبر لان تفكيري بيج موتني انتي ما طلعين من راسي صرتي هوس بالنسبه الي ودوم اتخيل نفسي وياج لذلك قررت انو احقق هل خيال لحقيقه وقبل لا اخسرج وترحين من ايدي..

نضرتله عبير بدون كلام باوع ايهاب بعيونه واردف بغزل

: وتلوميني على حبي الج يا عبير وانتي شايله هل عيون.. جمال عيونج دمرني ولج وسهرني الليل

عبير بصوت خافت: ليش ختاريتني من دون البنات

ايهاب: القلب وما يهوا مو بيدي هل شي بعد قلبي هواج وتمناج، اتوقع ماراح تفهمين هل مشاعر بس راح يجي يوم وتحسين بالشعور الي احس بي حاليا وتفهمين قصدي..

وكف ايهاب واردف: راح اروح لان اشوفج ما مستعده لقائي وارجع بغير يوم واتمنه اشوف منج لقاء احسن.. في امان الله..

طلع ايهاب وعبير تباوع علي وهيه كاعده اجت جوري واردفت

: يااا ليش ما وصلتي للباب شمالج؟

عبير: اريد اروح للحمام...

ضحكت جوري واردفت: لعد شكد خوافه

طلع سمير من الغرفه مسرع وكفت مقابيله جوري واردفت

: ها وين؟

سمير: عندي شغله اخلصها و ارجع

جوري: هااا سمير لعد احنه شتفقنه

سمير: لتخافين اني بعدني على الوعد

جوري: لعد راح اجي وياك

سمير: لا وين تجين تره المكان خطر عليج ضلي هنا شويه وارجعع

جوري: اوف منك اوفففففف...

طلع سمير لفت جوري وجان تشوف امه وابو واكفين وراها

ام سمير: شنو هذا الوعد؟

جوري: وعدني انو راح يترك الشرب ونزوج بعد ما يتشافه جسمه من هل سم

رفع راسه ابو سمير وضحك بصوت عالي نزل راسه واردف

: وانتي من كل عقلج صدقتي مووو..
تره سمير يضحك على عقلج لان لو يموت ما يترك الشرب ادمن علي لذلك اذا تحبين روحي اني افك قيدج من هل بيت..

اردفت ام سمير بحزن: فعلا كلام عمج صحيح يا بنيتي.. ولو احنه تعودنه عليج وحبيناج بس ما نريد نضلمج ويه ابنه..

سمعت كلامهم عبير وعصبت اقتربت منهم واردفت بحركت اعصاب

: ما اصدك هل كلام يطلع منكم وانتو اهله.. المفروض من سمعون هل شي تشجعون ابنكم و توكفون ويا حتى لا يحس نفسه وحيد ويصعب علي هل شي المفروض تفرحون وتشجعون جوري على الاستمرار ويا لان لو ملاحضين انو لولا جوري جان ما فكر يترك هل سم..
سمير حاليا جاي يمر بمرحله صعبه ومحتاج التشجيع والقوه منكم مو الاحباط والاستهزاء..

جوري: اني واثقه بسمير ولهذا مستمره ويا لليوم ومستحيل استغني غنه لان سمير يحبني والي ثبتلي هل شي اكثر هوه انه راح يترك ادمانه علمودي وهذا كلش كافي...

الام والاب نضرو لبعض وتندمو على الكلام الي طلع منهم..

**

ابار بدل ويريد يطلع وكفته زمرد واردفت

: وين؟

: للشغل مادام عطله

: اليوم ماكو شغل لان عدنه عمل بالبيت

: عمل شنو؟

: اليوم راح نبني المحل بالبيت و نفلش جزء من الحايط ونخلي باب على الشارع للمحل

: بس اني ماريد اخذ تعبج زمرد

: شنو تعبي هذا تعبنا ثنينه

: لعد اروح اصيح سند يعاوني بالبناء

سند جان كاعد باب البيت منتضر ايار يطلع حتى يرحون سوه وهوه ينضر ومستمع باشعة الشمس فجأه انحجب عن الضوء وضهرت بنت تركض مسرعه جانت حلوه بشكل بحيث شعرها الذهبي وعيونها العسليه ذوبن سند بمكانه...

شافه ايار صافن و وضعه مو طبيعي اقترب منه واردف

: شبيك ولك ليش صافن مثل ابو صابر

سند: هيه هاي الي ابحث عنه نفس الموصفات

ايار: يا هيه ولك

سند: فتات احلامي

ايار: ليش وانته هم عندك فتات احلام  لان ما خليت بنيه ما زحفت عليها

سند: شفتها وعقلي طاررر من جمالها احس هذا حلممم

ايار: اتوقع هذا الي الحب من اول نضره!!

سند: اي والله تخبل بس غريب اول مره اشوفه بهل شارع شنو معقوله ناس جدد كعدو هنا

ايار: والله مدري المهم جايك بطلب

سند: اطلب عيوني الك

ايار: تسلم عيونك الحلوة يا غالي

حضرو مواد البناء الي جانت من الطين طبعا نفس بيوتهم وبلشو يشتغلون

سند: اكلك ايار انته باركت للايهاب بمناسبة خطوبته

ايار: لا وما راح ابارك اله اصلا

زمرد: ليش يا ستار

سند: لا ماكو شي بس ايار و ايهاب واحد ميطيق الثاني من زمان

ايار: خلي يولي واصلا هوه سوه هل حركه وخطب اخت زمرد حتى يقهرني ويقلدني بكلشي

سند: شدعوه ايار ليش تفكر هيج وللعلم تره ايهاب حب البنيه من قبل لا يعرفها اخت زوجتك فلا تضن بي سوء

زمرد: صدك ايار شنو هل عقليه مالتك مجنت متوقعه هيج تفكر

ايار: تره ايهاب واحد حقير وحرامي ويدخن واسلوب ما عنده لذلك اتخبل منه واصلا اني معاجبتني الخطوبه من اساسها لراسها وراح يجي يوم لا سامح الله ويدمر اختج ويا والمسكينه معايزه مصايب الي بيه مكفيها خو ابوج ما صدك شال ونطاها وما كلف نفسه يسال حتى

زمرد: تره الموافقه تمت من قبل سمير لان يعرفه وسال عنه والولد زين لذلك وافقو..

سند: اي والله تغير وترك كلشي سيئ بحياته وتغير لذلك لازم تنطي فرصه يا ايار وتره الانسان اذا جان يسوي غلط وتاب فمعناها لازم ننطي فرصه لان تغير واما اذا يعرف الغلط وضل مستمر علي فهذا مينطي فرصه ولا تنسى كلنه خطائين بس الاهم التوبه.. لذلك لازم تنطي فرصه وتغير طريقة تفكيرك تجاهه
انته انسان طيب ومتفهم لذلك لا تسمح للافكار السيئه انها تصيطر عليك يا صاحبي

زمرد: فعلا كلامك درر خير الصديق انته وما شاء الله منطي اسمك حقه.. وما يلام ايار لمن يكعد يسولف بيك طول النهار

ابتسم سند واردف: اهااا يمج يسولف عني ويمي يسولف عنج..

شال ايار طين وشمر على سند وعلى زمرد واردف: شهرتوني.. وبعدين شعندي غيركم اني هوه انتو اعزاز قلبي

**

سمير وصل للمكان الي يشتغل بي وقبل لا يدخل حتى يكلهم انه راح يترك العمل سمع المدير يردف بعصبيه ويضرب بايده على الطبله سمير ضل واكف بصف الحايط ويسمع علي

: اكو اخبار جاي تسرب عنه للشرطه لازم تشوفون منو الي يوصل عنه هل اخبار لان كلما هربنه مواد ينلزمون جماعتنه من قبل الشرطه وصاير تحقيق وساعه و وعرفو مكانه لذلك اريد تحفرون الكاع وتجيبولي هل جاسوس الي يسرب هل معلومات عنه اريد الزمه بأيدي واكطعه وانثر لحمه بكل مكان مثل ما سويت ب علي قبل 18 سنه..

حبس انفاسه سمير وبلع ريكه وتعرق بشده وخاف انه يدخل عليهم بهل وقت لان جانو يحجون بموضوع سري ما لازم هوه يسمعه.. تحرك سمير بطئ الى ان طلع من المكان مشى مسرع قبل لا احد يشوفه واردف

: معقوله يقصدون علي ابو ايار؟ بس هوه ما جان يشتغل بهل شي هوه جان عسكري فشنو الربط بالموضوع.. لازم اسأل ابوي عن هل شي حتى اتأكد

وصل سمير للبيت وراح للابو كعد يمه وسأله بدون مقدمات

: علي ابو ايار جان صاحبك بالعسكريه اريد اعرف شلون مات؟

استغرب ابو من سؤاله نضرله واردف

: ليش تسأل عنه؟ شنو الي ذكرك بي اليوم؟

: ممكن جاوبني بدوه هل اسأله؟

اخذ ابو نفس واردف: علي جان عسكري محبوب وما اله اذيه على احد والناس تمدح بي وما ذمه بس بهذاك اليوم اني مكدرت اداوم لان تمرضت كلش فراح هوه وحده ومن بعدها ما رجع ابد فلمن صار التحقيق سألو جماعته بالدوام كالو جان موجود خلال 14 يوم ونزل وما جان مريض او بي شي غريب جان طبيعي، فيعني هوه اختفه بطريقه وهوه نازل وبعد فتره راعي الجمال اجه وبلغ عن راس ولمن اخذو الشرطه وحللو تبين انه راس علي رحمة الله علي وماكدرو الشرطه يوصلون الشي بس بعدين ضهرت اشاعات انو علي انقتل وتقطع ونباعت اعضاء جسمه ولهذا جسمه تناثر واختفه وبعض الناس كالو انو الي صار وي علي مجرد اخذ ثار لان طريقة قتله الوحشيه تثبت انو الي قتله جان مقهور منه وانتقم منه باشد انتقام... هذا كل الي اعرفه

وكف سمير واردف: هنا السالفه لعد...

ابو: هسه غير تفهمني شكو؟

بهل لحضات سمعو صوت صراخ عبير جاي من المطبخ فركضو ثنينهم عليها...

******يتبع

اكتبولو توقعاتكم * احبكم 💜🫶