الـرقطاء وكراتها الثلاث

اللـدغة الرابعة والثلاثين🐍

الرقطاء وكراتها الثلاث🐍

اللـدغة الرابعة والثلاثين 🐍

بقلم الكاتبه ::كهرمانه
___
احب اشوف تفاعلكم عالبارت يسويلي حافز حتى أستمرر واكتب بسرعه🥹💋
_____
بحر:-هاي مال اروح للـ *** بطليها ولتگوليها بعد ما عندي اني غيرچ محتلني وهرم عسى ماتضلين قرن ماتسبحين اني شعليه المهم انتِ يمي أحبچ وكلام الله احبچ

هرم:-طاح حظه أثر بمشاعري دفعته على كيف وباوعت بعيونه وحچيت

-اي زين اني هم ، هسه اريد اروح !.

بـَحـر:-يله روحي منو لازمچ

هرم:-أي اني رايحه اجهز روحي حتى تاخذني لاختي .

عفته  گالب خلقته وطلعت خطيه راح بيها دخلت لغرفتي بقيت صافنه بكلام ام موسىٰ لزمت چف ايدي بأيدي الثانيه وأحچي بيني وبين نفسي 

-محد يفهم معاناتچ ويه المي عبالهم أني ما أريد اسبح

ضحكت بـ قهر اخذت ملابس ودخلت للحمام فتحت الدوش ورعش جسمي كل ما أشوف المي يذكرني بيچ الله ينتقم منچ ذبيت ملابسي والتيشيرت الچنت لابسته خليته قريب عليه خارج المي دخلت جوه الدوش خليت شامبو اختنگت مديت ايدي عالتيشيرت مسحت وجهي بيه طلعت اخذت نفس ورجعت جوه الدوش إستمريت على هالحال اختنك واطلع امسح وجهي بالتيشيرت وادخل جوه الدوش من جديد كملت سبح بعد معاناة طلعت حتى عيوني صارن حُمر 

بدلت وشسورت شعري هوه دخل باوعلي شافني سبحانه ونضيفه أجه طاير حضنّي ويشم بيه كزبر جسمي مباشرةً بعدته عني إستغفر وصك على أسنانه بس اني سويت روحي ملتهيه ماحچه شي سكت رحنا لبيت وجد وياريتني ما رحت
.
.
.

ديالا:-سجلت بجم مختلط أول يوم رحت صــار بوجهي كميل إستغربت من وجوده وهو من شافني ابتسم وگال

-هلا بـديالا شعجب اليوم هنا

ديالا:-متشوفني لابسه ملابس رياضية

كميل:-اي اهلًا وسهلًا

ديالا:-انتَ شعندك هنا مو دكتور ماعندك عمليات

كميل:-هههههه عمليات شِــنو هــوَ أنـي كلي خلگ دكتور أسنان حشوات وقلع وزرع سويتيها عمليات لايسمعونچ ويعفطون .

ديالا:-عابت

كميل:-صدگ ويعني واذا دكتور لازم يهمل نفسه ؟

ديالا:-ما اعرف بَــس ماچنت ادري انتَ هنا تتمرن

كميل:-أگلچ !

ديالا:-گول

كميل:-مبدله رقمچ؟

ديالا:-اي لــيش

كميل:-مو عندي القديم أتصل عليه ماكـو ميوصل اتصال

ديالا:-منين جبته ؟

كميل:-يَـعنـي هسه أحنا صرنا گرايب غير رقمچ لازم عندي

ديالا:-والله شِــنو هالمعلومه ويجوز أنـي ماريـد اخلي رقمك يمي

كميل:-تحتاجيني اشلعلچ سن اسويلچ ابتسامه تجميل اسنان حشوات

ديالا:-هَـم صدگ بَــس انطيك رقمي بشرط

كميل:-يــاا الله شِــنو الشرط

ديالا:-تشتغل أسناني مجاني

كميل:-سهله عبالي مدري شِــنو شرطچ عمي أني والعياده كلنا گدامچ

ديالا:-ههههههه

أخذت رقمه وأجه واحد گال لكميل

-كابتن تعال علمني على هذا الجهاز باوعتله بأستفهام هــوَ ضحك وگال

-نسيت أگلچ بوقت الضهر أني كابتن هنا بــاي

ديالا:-خليت السماعات بأذني وبديت أتمرن وهيج مر اليوم طبيعي وخلال هــاي الفتره ضل يوميه دازلي شعر لوو بالجم أشوفه ويبقى يباوع عليه واني اتجاهله فتحت تليفوني شفته دازلي رساله مكتوب بيها

كميل:-ديالا اريد افاتحچ بموضوع اليوم العصر اذا ماعندچ شـيي نطلع نحچي

ديالا:-توسعت إبتسامتي وحچيت بگلبي

-اكيد حيصارحني ‌‎ههههه أصبرلي اشوفك الرد

"تمام فارغه مرلي لبيت كنان"

كميل:-اوكي نلتقي بعديـن

ديالا:-بايي ، طلعت من الغرفه الگاعده بيها ونزلت شفت ياسين ويونس يناغون وجد فارشه بالصالة خراخشهم وفرحانين بيهن يخبلون

امهم گاعده يمهم عبالك طفلة موأمهم مدري هوَ شعورالام هيچ حلو تلاعبهم وتناغيلهم وتشم بيهم

گعدت بالگاع يمها وشلت ياسين الوكيح حبيته حيل اكثر المرات أخذه وأضل احچي وياه مرات أحس نفسي خبله شـلون احچي وياه بكل جديه

بس أگول عادي حبيت افضفض له ،الطفل هذا تعلقت بيه بهاي الفتره ، ضلينه هيچ اني العب ويه ياسين وهيه يمها يونس لحد ماجاعوا

أخذتهم بحضنها ترضعهم وجد هيَ ترضعهم طبيعي ومرات مميه تنطيهم من تنام

حضنت ياسين وشمته بيومها عيونها چانت مفتحتهن ببهجه وبس تضحك فرحت لفرحها وگلتلها

-جيبي ياسين هذا صار إبني

وجد:-هُـم ولدچ هَـم

ديالا:-باوعتلي بجديه وگالت

-احبهم ديالا واخاف عليهم لا يصيرون مثلنا أريد اشبعهم حنان ماجاي أعرف شسوي حتى يحسون اني امهم وحنينه عليهم

ديالا:-حضنتها كل قوتي وهيَ شابگه ياسين قوي ويونس يناغي ويدفر برجله

وجد:-ديالا

ديالا:-هممم

وجد:-اذا صار شي عليه ديالا ضميهم بين زيجچ وريجچ ياسين ويونس ما تضربيهم ابدد خافي عليهم أكثر حتى من روحچ خاف بالمستقبل يصير عندچ جهال اعتبريهم جهالچ ديالا هذوله روحي وإنتِ تشوفيهم وجد امانه ذوله يمچ

ديالا:-نغزني گلبي قوي وأفكار سوده حاوطت دماغي بلعت الغصه وحچيت بعصبيه

-كافي وجد شهالحچي اني ما أربي احد ذوله ولدچ الچ انتِ امهم يبقون تحت ظلچ كافي تحچين هيچ

وجد:-طمني گلبي وريحي بالي وگليلي ذوله أمانه يمي

ديالا:-باوعت بعيونها ورجعت باوعت على وحجيت ياسين ويونس وحچيت

-امانه يـمي هاهيه ان شاء الله انتِ تبقين يمهم وخيمه على راسهم وتشوفين أحفاااادهم .

وجد؛-هسه ارتاح كلبي الدنيا فوت وموت وخصوصي احنا الله يستر من الجاي

ديالا:-هزيت راسي نام ياسين اجت جينا العامله اخذت ياسين خلته بفراشه بس يونس بقى كاعد

دخلته للغرفه ويونس نايم بحضن أمه تشم بيه وتبوسه بهالأثناء دگ تليفون وجد باوعت رقم غريب استغربت ورفضته

بعدين ضل يتصل بأستمرار فتحت سبيكر وحطته بالگاع اجاها صوت مرام وهيَ تدعي على وجد وتصرخ

مرام:-الله لاااااا ينطيچ ولااااايوفقچ ولچ تااااااخذين الورث الچ ولجهالچ واني وبناتي وابني كلشي مااااكووو هاااااا

وجد:-منو

مرام:- أنييييييي تااااااج راااااسچ ولچ اليوم أني إلچ أعلمچ شلون تستحوذين على كلشي يخصني بعدتي زوجي مني وخليتي يحبچ ام السحوره بنت الـ* المگضيتها بحضن الزلم طبعًا متعلمه منها وعلي أبو طالب اليوم اذا ما نهيتچ فلا أتسمى مرام ولچ من شاف جبتيله ولددد عافني وخذاجچ يالـ**

وجد:-كافي يـله ولي

ديالا:-ضحكت على حچيها وأخذت الأمور بضحك وشقه بَــس وجد جانت خايفه حضنت يونس قوووي وباوعت عليه وكالت

وجد:-ديالا حـبـيبتـي أني راح أنام تعبانه گاعده من الصبح باعي خلي جينا تصبلچ غده

ديالا:-عندي طلعه بس اخاف مرام تجي تسويلچ شي

وجد:-لا هرم فد ساعه وتجيني

ديالا :-اني هم ما اتأخر شغلك ساعة لو ساعة ونص ، چان شكلها قلق وتريد تضم إبنها بنص روحها قبل لا تگوم كالتلي

وجد:-انتِ شِــنو وين رايحه وياكم

ديالا:-باعي اليوم راح أطلع ويه كميل يريد يگلي أحبچ صارله كم يوم يلمح علمود هــاي الشغله ، هزت راسها وگامت ، واني گمت صبيت لنفسي غدا تغديت وحضرت ملابس كشخه حلوات لبست وتعطرت طلعت من البيت ورى ماا كميل إجاني اخذني وطلعنا أني وياه
.
.
.
هرم:-بدلت وبقيت منتضره بـَحـر يبدل حتى نروح  ورى شويه نزل جاهز مشيت گدامه فتحت السيارة وصعدت وهو صعد بصفي شغل السيارة ورحنا لبيت وجد

بنص الطريق قبل لا ندخل فرع بيت كنان حسيت بخنگه وگلبي عصرني قوي وعيوني وجعتني لزمت گلبي بألم وغمضت عيوني بـَحـر إنتبه عليه خفف السياره التفتلي وگال بقلق

بحر:-حبيبي شبيچ لــيش لازمه گلبچ هرم

هرم:-لزم أيدي اللي چانت على گلبي ويباوعلي بقلق باوعت عليه وگلتله

- ما أعرف إجتني نغزات بگلبي

بحر:-تعال أبوس گلبك ونغزاته

هرم:- باسني بخدي وسألني وكل شويه يسألني شلونچ وضل قلق لحد ماوصلنا باب بيت وجد

شفت باب البيت مفتوح وشبه صرخات مبحوحه دخلت أركض واني أسمع صريخ وجد وكل ما أتقرب يزيد الصوت أكثر مثل صوت واحد روحه تطلع

دخلت من باب الصاله أسمع صريخخ مو طبيعي وشفت جينا العامله تبچي وترجف رحت عليه لزمتها من أكتافها وگلتلها

-وينهاا اختيييييي احچييي شكوووووو

بحر:-هررررم على كيييفچ الصووووت جااي من الحمام روحي شوفي شــكوو وصيحيلي ماكدر ادخل للحمام بسرررعههه على ما اخابر كناااان

هرم:- ركضت للحمام المسافه صارت شكبررررهاااا شفت مرام گاعده بباب الحمام وباب الحمام مفتوح وتباوع على شي وتضرب على وجها وتصررخ صريخها قشعر جسمي

رحت تجاهلت وجود مرام ودخلت للحمام شفت يونس أبن اختي بالطشت وصاير قطعه زركه مبين صارله هواي من ميت وجد منهاره گاعده على ركبها خدودها حمر ويجرن دم مملخه خدودها تصرخ وتضرب على رجلها وتصيح

-يااا الله دخييييلك وليددددييي يمه راح راح حبيب امه راااااااححححححح يممممهه جسمه ازرك بااااارد سوده عليييييه

هرم:-ردت أمد ايدي واشيل يونس من المي جرني بحر بقوه وعاط بيه

بـَحـر:-لاااا ديري بالچ تمدين أيدچ وخرررريي طلعوووا مناااااا يـله

هرم:-بعدني ما مستعوبه اللي شفته واللي صار طفل يااااا عالم طفل منو كتله وشجابه بالطشت وليش مرام هناااا ضليت مفرفحه على وجد مملخه روحها تملخ وصوتها شبه مبحوح من الصريخ رحت حضنتها ووگعت دمعتي وهيه متدري بروحه

وجد:-هررم راااح ابنيييي رااااح ونيسي رااااححح

هرم:-سوده عليه يااارووووحي بس كوليلي شلووون ومنووو سوه هييييچ

بـَحـر خابر على كنان يشوفه وين وصل واني أحاول اكومهااا هـيَ تصرخخخ طلعتها من الحمام ومرام واگفه بباب الحمام ترجف تركت وجد ورحت على مرام جريتها من ثوبها وحچيت بصياح

-ولچ احچي شسويتي للطفل ياااااااا كافرره ولچ اننتووووو  حيواناااات مو بشرررر احچيييي لچچچ

مرام:-وخرررييي منييي عوفييينيييي وين الثاااااني وينه

وجد:-اااابني شبععع مي واني نناااايمه بحرررر افتحلي باااب الحماااام المييي بارددد علييييه خل اشيييله

بـَحـر:-جرييمه هااي جرييمه مالازم تفوتين للحمام الشرطه جايه بالطريق وأبو معاذ همم دقايق ويوصلون

هرم:-ركضت على مرام وجريتها من ايدها وضربتها على گلبها دفعتني ورجعت جريتها ايد من ملابسها وايد بشعرها نتفت شعرها تنتف تريـد تفلت من ايدي واني اصرخ بوجهها

هرم:-وييين رايحه تكتلين الثاني موووو

ضربتها كف وهيَ مدري شبيها مثل الخبله تضحك  وتهز براسها نرفزتني واني شايطه على ابن اختي ، واختي اللي صريخها شگگ گلبي شگ بهالأثناء اجو ضباط وشرطه كنان ركض على وجد وحضنها والشرطه تتتفحص رحت ركضت للغرفة وشلت ياسين اللي چان يصرخ على صرخة أمه

خليته بحضني قوي وبچيت ما أعرف شلون أتعامل ويه الجهال وين راحت مسك عنه لزمته أحاول اسكته طلعت باب الغرفه وسمعت صوت طلقه گلبي وجعني وحسيت نفسي أنگطع

ركضت واني ياسين بحضني بالي يم بـَحـر ووجد وصلت يم باب الطرمه طلعت وشفت قطعتي الثالثه متمدده ودم دم بالگاع فقدت حواسي كلي ما أعرف شنو صار بالعالم اللي يمي

بـَحـر معاذ  كنان الشرطه كلها تصيح ، صريخ ياسين وخوفه من صوت الطلق أبچي على حالة هذا الطفل لو على اخو وامه انطيت الطفل لبحر واني ركضت عليها

كنان مخليها بحضنه وبحر لازم ياسين بأيد ويهدي بمعاذ ومعاذ منهار بسبب أمه  اللي واگفه ولازمينها الشرطه

فاتحين تحقيق وياها وهيه تحچي كلمه وياهم وترجع تغلط وتفشر كدامهم كلهم ماتستحي لزمت وجد من ايديها الثنين چانت أتجر النفس وتختنگ من تزفره يطلع دم من حلگها

ياربي شنو هذا البلاء شنو هالمصيبه اللي وگعت على راسي هذا فلم لو حلم ماكو غيره هزيتها وحچيت ودموعي تنزل

-وجد حبيبي گومي

سمعت صوتها لأخر مره حچت اخر أحرف تنطقهن

وجد:-أمـ..ـانـ..ـه يمـ..ـچـ..ـن يــ..ــا سسيــ.ــن

هرم:-حچتهن وبعدها إختفى صوتها
.

ديالا:- رجعت للبيت وصلت للباب أباوع شرطه وصريخ وعياط وناس ملتمه بالباب وصريخ مو طبيعي حتى شفت سلمى باب البيت باوعت عليه وعيونها بيها دموع كميل طفر من السياره وركض قبلي جوه لأن سمع صوت معاذ وعياطه

دخلت للبيت وشفت مرام لازمينها الشرطه وهيَ تفشر وتسبب انصدمت من شفتها تذكرت مكالمتها

شهكت وضربت على خدي واني اردد وجدددد وجدددد ماشفتها متمدده بالگاع وكلهم ملتمين عليها وصوت هرم اخترق مسامعي

دفعتهم وصارت هرم گبالي شفت منظر وجد وشلون دم طالع من حلگها كنان ممدد رجليه ومخليها بحضنه ويبچي وهرم لازمه اديها تبوس بيهن وتصرخ

حسيت رجليه مايشيلني وگعت بالگاع اريد استوعب ماجاي استوعب سحبت وجد من عدهم وحضنتها واني اصرخ ومنهاره

بعدها انگطع صوتي بَــس شهگتي تطلع باوعت لهرم وحچيت بصوت مبحوح بالگوه ينفهم

-منوووووووو كتلها منوووو هرررم  أختي عايشه موووو احچي يمممه اختي ماتتنفس شلوووونننن بييييههههه

الزم بشعرها الأشقر اللي متغطي بلون الدم گلبي إنعصرر اجه معاذ شالني هوَ ونسوان ووجد سحبها بـَحـر من كنان من سمعوا صوت الأسعاف كنان ماقبل ياخذونها هــوَ يجر وبحر يجر وكنان يتوسل بيه يعوفها ويبچي بحرگه

شبيهمممم يربي عوفوووني اريددد اودعهاااا اريد اشمهااا اخررر مررره  قبل سااااعه چنت گاعده وياهها

معاذ:-يابه كااافي الأسعاف اجهه يله شيلووووو الجثث

ديالا:-إنصدمت شنو جثثث منو مات الثاني منووو الثاااانييي اجوي الأسعاف واني اصرخ اريد ألزمها وهرم نفس الحالة

-ولكمممم هاااااي توأمي هاااي مشاركتني بكلشييي من اول بوم اجينا بيه للدنيا أحنااا سويييه مانتفاااارققق شلوووون عافتنيييي وراااااحتتت

چنت أصرخ منهاره وشفتهم طلعوا جثه من الحمام طفل لافينه بنايلون وفوگه الغطا مالته شهگت بصددمه

-هااي منوووو هااااي ابني يربي لاااااااا لاااا وخرووووا هدتني سلمى هـيَ ووياها وحده رحت وخرت الغطه من وجهه غمضت عيني بقهر بچيت بونين واني أگول

-اووووويلي على وجعع گلبي يمااااي يممممه

-طلعوا الطفل وشالو وجد اني انتهيت أصرخ واملخ بروحي حتى جرحت وجهي بأضفري من طلعوا من البيت وجد ويونس عرفت بعد ماكو رجعه اختفووووا طلعت أجر بروحي وهرم لازمها بـَحـر تريد تصعد وياهها منتهيه

هرم:-روووووحكمممممم اطلعهههها فهمتتت أريد اختي ددوخررررر

لازمني وحاضنّي ميقبل أطلع وراهااا تخبلت نسيت كلشي كل اللي اريده اتوسل بالزمن يرجععع ولو نص ساعة چان اخذتها للغرفه وياايه ولچ وجد  وين رحتي وعفتيني اذا مسك رجعت شتگوووول على فراااگچ شتسويييي

شالني بحر وداني لبيت آل صحار اصررخ وأحجي بعصبيه

-مووووو هنا الفاتحه متصيرهنااااا متصييير بهذا البيت

بـَحـر:-اللي تردينه يجرالج حبيبي بس لا تدگين على وجهج ولچ هررم  مو زين اللطم وعذاب النفس عالميت تجيه ذنوب

ديالا:-كاعده بالصالة مال بيت أهل معاذ ونسوانهم مدري منين تطلع واني فاقده بس أبچي واون على اختي تذكرت مسك ااي هيَ لازم تحضر طفرت واني رجلي احسها ما تمشي من الثكل الي صار بيه ردت اوكع اسمع صريخ هرم وسلمى تبجي وبحر حاضنها يهدي بيها رحت عليها وكلتلها

-مسسك ليش مو هناااا شفت معاذ موووجوود ومسك مااااكوووو وين مسككك .

أحچي بعياط مادري شسوي

هرم:- ما أسمع ديالا اصلاً بالي مو يمها يم اختي الي كل عمره بالعشرين والتراب حيتلگاها خرت ايد بـَحـر وحچيت بصوت مبحوح

-بـَحـر الفاتحه إذا صارت هنا يصير كاتل ومكتول ومرام  اذا مانحكمت اعدام اكتلهم كلهم تفهمني اكتلهم كلهممم

بحر:-گومي لعد گومي الفاتحه نسويها ببيتي هناك

سلمى:-اجتي نقاء وبيت جدچ كلهم

هرم:-تجاهلتها گمت وديالا تحچي وتبجي طلعت من المطبخ وبحر بلغهم الفاتحه متصير هنااا الحجيه اعترضت اصلاً
ممصدگه هيَ ماتت او چنتها كتلت ضرتها كلها مصدومه بيومه دموعهم تنزل على وجد لوعلى مرام

ديالا:-طلعنا وكلها طلعت ورانه خالتي نقاء اجتي حضنتني وتبچي بيبي هم تبچي وسلمى شايله ياسين رحت دفعت خالتي وشلت ياسين منها

شلته وبوسته واني ابچي صعدت بالسياره گالو اخذوا وجد هيَ وأبنها للطب العدلي بس الزلم حيدفنوه مقبلوا احنا نروح مع إنُ هرم گطعت روحها

وحتى خرمشت وجه بحر وهوَ يحاول يهديها اخر شي صاحني واني ارجف وأبچي وبحضني ياسين اللي صافن وساكت

بـَحـر:-ديالا انطي ياسين لسلمى وامشي نروح وراهم كنان فاقد الوعي هناك مامتحمل أني لو تبقى عليه ما اخليچن ترحن لأن ماتتحملن المنظر التشوفنه

ديالا:- لا لا أروح ما ابقى اريد اشوفها أخر مره دخيلك ، ماحچه شـيي مقهور چان اخذنا كلنا عدا سلمى أنـي وخالاتي وهرم للطب العدلي

صعدت اني ورفيف ويه معاذ والبقيه ويه بحر ، طبگ السياره شويه ونزلوا من الدرج توابيت ثنين واحد چبير واحد صغير

روحي فرفحت هرم تدك على راسها وتبچي وخالتي نقاء زلغت وجهها وتبچي اني فقدت أختنگت وتفكيري خبلني زيادة هسه هـيَ بالتابوت يمممهه وجدد بعدچ ششايفه ياروحي يا أم العيون الحلوه رحتي ويه وليدچ وعفتينا

اجه كنان صعد بالصدر حالته مو احسن من حالتنا حتى قمصيه مشگگه وشعره مخربطة  وهرم منتهيه كلشش

واني اتذكر حجيها من تگلي ذوله أمانه وعديني صوتها بعده يرن بأذني طلعنا للنجف ومعاذ موجود تذكرت مسك كل ما أريد احچي انسى طبطبت على كتفه لأن چان گاعد گدامي وگلتله

-مسك وين خل تجي ليش مو هنا مو على أساس مسافرين سويه وييين ودييييت اختيييي خاف هم قتلتها نفس ماسوت أمك.

باوعتله بشك وقهر

معاذ:-ديالا لاتضلين تخربطين بالحچي مسك خفت عليها أحچيلها گلت اجيبها اني وبعدين اخليها تعرف لأن ادري كُـلش زين اذا كلتلها واحنا بأربيل راح  تتخربط لو يصير بيها شي

ديالا:-سكتت وضليت أبجي شنو راح تسوي مسك اذا درت بوجد ماتت هيَ وابنها اوووف ، الله ينتقم منكم يا بيت فياض آل صحار كله بسببكمم مجرمين

چنت احجي بگلبي ووبالي أسم واحد يتردد  مرام مرام مرام اخخخخخخ يااااربِ محتااااجه الصبررر

رفعت رأسي وغمضت عيوني وكل شـيي يذكرني بيها عقلي عبارة عن ذكريات ومواقف ماجاي استوعب شـيي غيرها تحس روحي انفصلت عن العالم وخصوصًا أني وياها دائمًا سويه مامتعوده اتركها صارت الدنيا ليل وصلنه للمغيسل هرم اللي غسلتلها بمساعدة من صاحبة المغيسل واني اشم بيها وابوس  والنسوان كلها حچت

-ميصير ادعولها بالرحمه راحت عند الرحمٰن الغفور يم رب العرش العضيم

هرم:-سدي حلكچ لحدددد يتدخل خوشششش عود من تموت اختج لاتحضنينها ولا تبچين عليها عوفونها ملتهين بمصابنا

ديالا:-هرم گبت بالمره وذيج سكتت ، هرم باوعت عالطلقة اللي بگلبها كملنه وهيَ وجهها چان مبتسم ملامحها حِـلوه لزمت هرم وابتسمت گلتلها

-هرم باعي وجد عايشه شوفي ملامحها شـلون مبتسمه شوفيها

هرم:-بچيت بنجيب وأني ابتعد بخطواتي من عدها خليت أيدي على حلگي وأنحب على حالنا ،يممممهههه خيييتييي ديالا عبالها عايشه عجزت شگوللها وحدتنا تبچي الصخرر خلصنا تغسيل واخذناها دفناها هـيَ وابنها واحد بصف الثاني
كنان متخبل عليها واني اباوعله بحقدد طلعنا من النجف دفعت روحي الثالثه وقطعه من قلبي عفتها نايمه بالتراب وصلنا بغداد للبيت مالتي ،  لگيتها كلها موجوده دخلت شفت ملايه جايبات ومحضرات روحهن حجيت بأعصاب وشبه صريخ
—ماااااااااكوووووو ملاااااااايه تردن تعذبنها لأختي وتدگن وتلطمن هااااااا عوود تحبنها انتن ماكو وحده بيچن تحبنا يله برررره يللله

طردت الملايه والنسوان مدري منين منهن اللي سكتت ومنهن اللي زعلت وطلعت اجتني خاله نقاء تحچي ويايه ومعصبه من تصرفي السويته

نقاء:-هاااي ليش هيچ سويتي موووو عيب بعدين اذا مالطمتي على أختج منو يدگ ويلطم هااااا

هرم:-وتتعذب بگبرها واني اطلع ضيمي على أساس بالدم واللطم مووو هيچ قصدچ خالة والله محد يحبناااا محدددد كلهن هنا جايات شمتانات بييناااا يتشمتن بموتت اختيييي

چنت احچي بعياط ومنهاره وهنه يحاولن يسكتني ضاجت خالة نقاء وگالتلي

نقاء:-الحجي مو وياج ويه مسك وينها شو ماكـو وين مختفيه

هرم:-مسك صدددك مسك ويييين لــيش ماموجوده مو معاذ موجود شِــنو عايفها وحدها بأربيل وجااااييي

ديالا:-تقدمت عليها وأني اجر بروحي جرر مابيه احچي وصوتي مختفي

-معاذ حيروح يجيبها هررم ماتدرررري  مسك ماتدررري بوجد ماتت عايفها باربيل وجاي

هرم:-المهم حتچي بعد كم ساعه لازم تجي تشوف النگسه مرام شلون قتلت اختها وابن اختها

-گعدت يم النسوان وفتحوا قرآن وهنَ گاعدات يحچن ويبسبسن وأني أبجي وبيدي القرآن وديالا نايمه على چتفي وتبجي بحرگه وياسين بحضنها

لحد ما بدت النسوان تروح خوات معاذ محاضرات يخافن من عدنا بس الحجيه ونسوان ولدها غسان وعابد 
.
.
مسك:- شمروني بالغرفة شربوني أدويه غصب لازم اخذهن من اخذهن أحس نفسي اريد انام وراسي ينمل وراها يضرب إبره بالوريد بعد ما ايدي ورجلي يثكلن يطلع

غفيت وحلمت نار تحرك جسمي وصريخ اخواتي فزيت شفت معاذ طفرت من مكاني بس ايدي رابطيها بالچربايه ماگدرت اكوم أجه ناحيتي راد يتقرب صرخت بيه

-اااااااااااانت حيوووان سـ*  ابن  سـ* ولكك شسوووويت حتى هييييچ تذبني بعد ما ثقيت وحبيتكككككك طلعني منااااااا گلتلك طلعني من هذااا المكااان من مووت اليكرفك اأصبرررلي اذا ما ادگركم أصبرررلي كلب حقيرررر

هوه حاط ايده بجيوبه ويباوعلي بحيره عض شفته واشر للرئيسة الممرضين تطلع هيَ ضحكت وطلعت تقرب عليه وأني ادفررر بيه ومنهاااره حضنّي وحچه بصوت تعبااان بيه غصة بچي

-البقيه بحياتچ مسك

مسك:-جسمي يبسس هدأت بعد ما چنت أدفع بيه  بعدته عني بايدي مسح دموعه وحط ايده على خدي وبالي يم كلمه ''البقيه بحياتج مسك '' تتردد بذهني

-شحچيت منو مااااات منوووو ، باوع بعيوني وحچه

-أمشي خلينا نطلع مناااا وبعدين أفهمچ

مسك:-ولك احچي اعصابي دمرررتتتتتهههااا منوووووو مااااات ، باوعلي بحزن وحچه وهـوَ يفتح ايدي الرابطيها بالچربايه گصها بالمگص وأني هجمت عليه لزمني وگال بنفاذ صبرر

-عذبتچ مثل ما عذبتيني بس عذابچ صار اقوىٰ لهذا السبب تگدرين تطلعين

مسك:-لااااااا ماعذبتني ومااااا عاااااش اللي يعذب مسك وخررررر

-دفعته وطلعت أمشي وجسمي ثگيل كلشش وهوَ يمشي ورايه الي عجبني كلها متحچي ويايه والدكاتره من يشوفونه يسلمون عليه

طلعت وصلت للمصعد وهوَ طلب رقم G نزل المصعد ودخت ردت أوگع لزمني دفعته وضربته ببطنه غمض عيونه كاتم وجعه

دفعته ومشيت لان انفتح باب المصعد شفت باب المستشفى ضوه خافت شِــنو الدنيا فجر طلعت أركض حافيه ملابسي مال المستشفى مال مجانين ملبسيني ركض ورايه جرني من زندي وحچه ويايه بهدوء

معاذ:-يله حبيبي أمشي نرجع بطياره أحسن  واسرع حجزت النا هيچ تتعبين

مسك:-صرخت ودفعته واني روحي مفرفحه من الغضب هواي سوالف جاي تمر بعقلي

-انتَ شعليككككككك بيه وخرررر يله تدعبل شنو متفهم روح عن وجهي -

مشيت وتذكرت كلمته رجعت نداريت عليه واني الخوف محتلني وجسمي يرجف خوف على خواتي

-منو مات احچي

تقربت عليه وهوه عيونه حمر ويباوعلي بحيره مايعرف شيجاوبني

معاذ:-تعاي وياي واني افهمچ

مسك:-لزمت راسي بوجع وعيوني تباوعله والغضب حاوطني تقربت منه ولزمته من ياخته

-منووووو ماااااات لاتضل تلف وتدووور أحچيي

معاذ:-مسك اللهم طولچ يا روح

لزمني من ايدي ودخلني للسياره وهو صعد بصف السايق  واني ببالي راح ارجع يم خواتي بس لا صار لهرم شيي حاطه أيدي على گلبي اللي ينغزني أحسه يريد يطلع من صدري على گد ما وجعني

وصلنا للمطار لبسني كوت وجايبلي بوت لبسه الي واني بالي يم اخواتي وحقدي على معاذ زاد جرني وعدل شعري باوعت بعينه وگلتله

-أحچي عاد تره راح اطگ وانفجر منو اللي اتوفه احجي

باوعلي بقلق رجع مسح وجهه بأيده قوي حچه وملامحه كلها حزن ويحاول يسايسني حتى لاا انفعل

-مو شخص قريب عليچ بس تعرفينه معرفه زينه ومن نوصل تعرفي

مسك:-لا تكذب ، جرني يكمل إجراءات المطار شويه أنتضرنا بعدها  رحنا صعدنه بالطيارة

بالي وكلشي وحتى نسيت وجعي ونفسيتي وكلشي يم خواتي بناتي ما أعرف شسوي بس معاذ اللي يكدر يوصلني الهن خليني اسايسه بين ما المححح بغداد حتى لو انهزم وأجر
تكسي

خاف عنده لعبه ثانيه چنت أفكر وهوَ عينه عليه وعيونه تفسرر نضراتي باوعتله وحچيت

-صدك هالمره مو مثل كل مره اردها الك سالفة المستشفى مال مجانين بس أكو سؤال ببالي شنو الي خلاك تنتقم مني بهالطريقه شنو سويت حتى هالگد تسببلي أذيه

بس خليها ببالك ما اسكتتت ابدد ولا راااح أعديييها تذكر أني حيهه  والحيه تگدر تسممك انتَ ماحسبت حساب شگد راح أكون خطره على روحك

معاذ:-مسك مو وكته هالحچي ماسويت شي من عندي حالتج تتطلب هيچ علاج فوگ ما ردت اعالجچ واسويچ أدميه وترى هاي مجرد مقبلات بالنسبه للمرض النفسي انتِ مريضة نفسسيه وكل تقاريرچ تثبت إنچ ضرر للمجتمع ولازم نتخلص من هالمرض الماكرر

مسك:-مرييضه نفسيه كلتلي هههه هسه فهمت اني مضره عالمجتمع بسسسسس موووو تشمرني هالشمره بوسط ألاف المجانين وعذاب ونتل وادويه موجعه للشريان صدك وثق راح اسمك سم اخليك تموت گدامي وما يرفلي جفن غلطت وياي ياااااا عوووذه غلطت وغلطك ما ينغفرر يا إبن كنان

سكت واصلًا تجاهلني بادلني إبتسامه مرهقة وغمض عينه تقريبًا ساعه وصلنا لبغداد نزلنا وهوَ لزم ايدي ضربته بوكس عض شفته وگال

-بابا شبيچ مو كدام العالم مسك

مسك:-جرني واخذني للگراچ مال المطار وگفنا گدام سيارته أشرلي أصعد

-مو على كيفك وخر أني ارجع تكسي

معاذ :-مسك تعاااي اصعدييي

مسك:-صعدت وأني گالبه وجهي شغل السياره ومشه خارج المطار لزم ايدي وحچه بجديه

-مسك الموت للكل لازم تصبرين روحچ على الفاجعه هاي يمكن اني راح أكون الملام بنضرچ وحقچ بس مو بيدي هذا طبعي لازم أريح نفسي بأذية اللي يأذيني أمشي عُـمري خواتچ محتاجاتچ

مسك:-شنو تره كلشي ماجاي أفهم احچي بيهم شي احچي لا تخبلني

معاذ:-راح أخذچ الهن بعديـن تفهمين كلشي تَـمام

مسك:-وصلنا لفرع بيت هرم سكتت وأحس راسي نمل صار قريب واسمع صياح بابب بيتهم بعده ماموگف السياره فتحت الباب ونزلت اركض دخلت للبيت عيوني مغوشه ومامركزه وأشوف البيت مليان ناس ونسوان لابسات أسود

ما عرفت احد ام موسى وجهها جان احمر من البچي شافتني زادت ببچيها دخلت لوسط الصاله حسيت احد شمر روحه عليه خفت باوعت شفتها هرم

أرتاح گلبي وراها شفت ديالا حضنتهن وبستهن وحچيت

-شبيكم يمه لعد وجد وين منو مات معقوله بـَحـر لو بيبي مرمر لو منووو مرمر ماتت مووو باوعت بأنحاء المكان شفت ياسين إبن وجد بحضن خالة نقاء بَــس ماشفت وجد رجعت راسي لهرم واحچي وياها بهمس

- شبيچن وجد وين ؟؟

سكتت لحضة بعد ما شفت دموعهن تزيد كل ما أجيب طاريها

-داگوللچن وجدددد وييين لييش محد تجااااووووبببب وين وجد
.
.
يتبع☘️.......

حسابي الأنستا انشر تغشوشه بعد كل بارت للبارت القادم 🤍

اكتبولي توقعاتكم