ثم قست قلوبهم

part20 ج2

ثم قست قلوبهم
متابعة ممتعة+لاتنسون تعليق بين الفقرات
__________
گشـخ بيـه التعـب
متلوگلـي من ارتـاح
وجـع زايـد تـره
المـذبوح مـن يـرفس
___________

ااباوع النفس عصى بصدري اريد ازفره ماگدر بس ارجف تيبست اريد اتحرك اصرخ اسوي ماكو ومواضح شي حوالية مجرد صوت الهوا يخلي جسمي يقشعر

ضلام مجرد خيوط اقل مايقال عنها بسيطة من الشمس الي اوشكت على الشروق بعده الظلام مرعب

بالزور حركت راسي اباوع وراي اكو ضو لايت بعيد عني حيل ورجعت نظري لنفس المكان واصلا مواضح شي گبالي اريد امي ماكو شي گبالي مجرد ظلام

: يمة اني خايفة فدوة شغلي الضو

اني گلتها وحسيت نرش عليه شي بدون وعي اصرخ مفرفحة مادري شنو هذ الجاي يلمس جلدي احسه سوط ويكطع بيه وامي تگول كلمات مو مفهومة

: يمة هاي انتي الدتسوين هيج يمة دا اخاف وينج سمعيني صوتج يمةةةةةةة

نرش عليه 3 رشات ادركت ان هذ مي بس مو مستوعبة بعد ان هذ مي عليه بس اصرخ واشهك ماكو متحجي بس كلمات مو مفهومة بصوتها مادري هاي امي لو جني لو منو وصار هدوء

: ماما وينج يمةةةة وين انتي

ماكو بلاعيمي تشرحت وماكو صوت وكعت على ركبي اصرخ اريد يصير شي ينقذني ماكو مفرفحة تذكرت تلفون جايبته اني بسرعة مديت ايدي وارجف اريد التلفون دا اضوي ماكو ايدي ميتة اصابعي متتمسك بشي

مدري شلون كدرت اطلعه من جنطتي واني لابستها جوا البشت اصرخ اريد اسكت من رهبة ماگدر اتخايل هذ الجني

ايديه يرجفن شفته دا يدك واُذين يتصل بسرعة فتحته وخليته على اذاني ارجف واصرخ گبل اجاني صوته گال كلمة وحدة بس

: جايج

وسده مگال كلمة ثانية وسده شسالفة شديصير احس عقلي مضروب اني بفاتولة امي وين اُذين شنو يگلي جايج اني وين هو وين يربي

صريخي متوقف الا لمن اجر نفس مع ما كطعته سمعت صوت ركض جاي من وراي هو اني سمعته وراحت روحي صرت اصرخ بصوت اعلى مشنجة ايديه احس اضافري نغرسن بجلدي واني ادوسهن ورجليه ميتات اريد اشرد ماگدر

اُذين : لتخافين لتخافين انا هنانا لتخافين انا جايج

باوعت بسرعة شفت بس ضو التلفون وهو بسرعة اجا شبكني واني على فرد صرخة

: اجيتج سديم اجيتج

ماكو مو وياه بس اصرخ وارجف منا خوف منا برد احس يكص عضمي بلاعيمي من الصراخ طبكن وابجي بحركة

: لتخافين وياج انا اهدئي راح نطلع منا طالعين كومي

لزم ايديه يريدني اكوم واني منتهية احس رجليه ميتات بالزور گدرت اعدلهن هو شابكي ويمشي واني اشحط برجليه شحط

: راح نطلع بابا راح نطلع لتخافين قوي روحج قوي روحج لتصرخين كافي بلاعيمج

خطواتي ماحس بيهن بعد ماگدر امشي نهديت رفعني من خصري ويمشي بسرعة اجاني صوت امي تصرخ

: رجعها رجعها تعال

ولا يمها رافعني ويمشي صوتها تركض وهو يمشي بسرعة لمن طلعنه من المكبرة روحي راحت فتح السيارة وخلاني من ورا بيها شغل تدفئة سد الشبابيك كُلهن وللان الرهبة مسيطرة عليه

اجا صعد يمي وجرني لحضنه مجلبة بيده ابجي ومتهسترة مو مستوعبة يهدي بيه ممبين بس عيونه ملثم ياشرلي اهدء بيدي يمسح وجناتي واني مستمرة

وخر اللثام من وجهه ويحجي
: انا هنانا انا هنانا هذ انا وياج اهدئي يلب گلبي سُكر حبيبي اهدئي

: اُذين؟؟؟

: لب گلبي لب اللب انتي اهدئي انا اهنانا بابا لب لبه لگلبي

هو يحجي ونزع جاكيته لبسني اياه ولبسني لثامة يدفي بيه هو يحجي والشباج اندك بقى يندك باوعله وغلس رجعلي اجا صوت امي تريده يفتح وتگله انت منو رجعها

تركها ادك مفتحلها يهدي بيه

: وياج بابا انتي مو وحدج مو وحدج سُكر بابا شوفيني انا هنانا لتخافين والله العظيم احركها الج والله ماخليها

وفتح الشباك
: ها شتردين؟

امي: هذ انت لاحكنه لهنا

: شوفي هنَ حجايتين توخرين منا لاسويج اثنين

: جيب بتي ووخر دا نرجع للبيت

: لا رجعي وحدج انا ارجعها السيارة الجابتج ترجعج مارجعها وياج
وحق ابا عبد الله الحسين وحق الامام علي الاحنا بارضه هسة تروحين منا لا بتلفون اطيح حظج اخابر اهلج واهلها واگلهم ع الجاي تسوينه بالبت

اگل لعمامها من راح ابوها انسجن وكامت تلعب بالبت بكيفها ووالله هاي سالفة تعوفين البت وحدها بالمكابر مينسكت عليها وبكلشي اتهمج

سحر شعوذة دجل كلهن احطهن براسج والله

تراجعت شويه حجت برتباك
: ترجعها انت

: روحي معليج انا ارجعها

: باوع ترا اني جنت اعالجها لمصلحتها مو سحر وشعوذة

: يا علاج مجاي تگدر تتنفس ياعلاج وين المصلحة بالموضوع

: الشيخ گالي مكان لازم تخاف خوفة قوية وشكد تصرخ وتكون خوفتها اقوة يطلع الجني منها

: هسة ليش تخليني اصيح منا العالم اخزيج خوفة قوية ويطلع منها الجني شنو جاي اگلج مابيها شي يا جني يا صخام مو الف مرة اگلج مابيها شي انتي تسودنتي تريدين تسودنيني

كاضتلي البت بالمكبرة هسة وين اوديها حاطتها تخلسين بيها بالليل ماعدج گلب ماعدج رحمة تجننينها وتذبيها بركبتي

: ايي انت دا تگلي انتي سحارة وانتي مشعوذة ترا لمصلحتها والله واني معدي هذ الطريق

: روحي السيارة الجابتج ترجعج

: انت رجعها لبيتنه خاف يجون عمامها لو احد

گالتها وراحت مشت خطوات وردت رجعت گالت مو تتاخرون بالرجعة جيبها ع البيت

: ترا هي يمي امان اكثر من يمج

گالها ورفع الجام هي بقت تحجي وهو سحكها صعد الجام عافتنه ومشت

اني بعدني برهبتي فاتحة عيوني على وسعهن وحاضنته حيل ارجف هو يهدي بيا ويطمني يبوس بيديا

: من ارجع والله ماسكت ع الصار اعاقبها والله وخلص نسوي عرس واخذج يمي لتخافين اداريج والله وتروح من عندج الخوفة

مو يمي رجفة ولساني معكود وحنجرتي طابكة احس قيود بكُل جسمي ماريد اتركه مجلبه بذراعه ارجف وهو شابكني

: وخري سُكر اسوق

ماتركته مجلبه بي
: ماشا والله ماعوفج ابقى يمج بس احول كرسي هذ انا وياج بس اسوق حتى نرجع للناصرية حبيبي وخري

ماكو ماريد اتركه مجلبة بتيشرته اصابعي متيبسات دم مابيهن ولا عقلي وياي

اُذين.
: لج بابا شبيج نبقى نبات بالمكبرة ابقي هنا تمددي وانا بس اكعد گدام حتى ارجعج

ماكو ولا وياي جسمها ثلج وترجف مادري برد رعب وانا احس روحي موجرة اشوف امها رجعت بنفس السيارة الاجت بيها بالله هاي ام هاي

رجعت نظري لسديم الي جسمها يختض وكل شهكة تشهكها تكطع الكلب بنية بهل ترافة شلون تهون عليها تسوي بيها هيج

: بابا ارفعي راسج

رفعت راسها بيدي دموعها منكطعن صافنة وفاتحتهن على وسعهن
: تكعدين يمي؟ وانا اسوق ها ابقى يمج بالصدر وابقي لازمة ايدي

محجت فتحت الباب وانتجت عليه اشوف رجليها متگدر تجرهن قبضتها راخية عليه كومتها تقريبا شلتها كعدتها من كدام

رجعت الكرسي لي ورا غطيتها بجاكيتي بعدها ترجف وثلج وجهت التدفئة عليها ولزمت ايدي كُل شويه جسمها تصير بي رجفة

لفيتها زين حولت كعدت بكرسي سديت الباب لزمت ايدي وحركت

بس اباوعلها وهي عيونها ثابتات بمحجرهن ايديها الناعمات صفر قطرة دم مابيهن حتى نفسها بي صوت واشوفها لمن تبلع ريكها تتوجع

امثل الهدوء عن لاتخاف وانا بداخلي جهنم موقدة محروك حرك عليها الى ان ثكل نفسها باوعتلها غافية زفرت هاي شلون اخلصها من يمهم

اباوع لروحي بهل وضع رجال شطولني عاجز اخلصها من يمهم عاجز اكون الها السند الوعدتها بي مبيدي شي عليها لا لمن حبيتها لا لمن خطبتها ولا هسة وهي مرتي اكدر اخلصها منهم

لازمة ايدي برخاوة عضيت شفتي حيل على ترافتها حاولت اسحب ايدي دا اسوق عدل فزت مخروعة فتحت عيونها على وسعهن خايفة بسرعة گتلها

: هاج ياها هاج ياها خذيها

اخذتها مرة ثانية ضمتها الها ورجعت غمضت عيونها ساكتة

افرجها من يمك يا رب

بقيت اسوق بالي يمها ليصيرلها شي اثر الخرعة ليروح صدك يصير بيها جني

قوت الشمس وهي على فرد نومة لمن فتحت عيونها تباوعلي جريت نفس اهدء روحي ماريد اخرعها اكثر ابتسمت بوجها

: شكرايتي

محجت بس تباوع تغمض وتفتح
: حبيبي تريدين نوكف هنا اريكج؟ زين تريدين نوتيلا واندومي اجيبلج؟ تغسلين؟ زين اجيبلج عصير؟ اجيبلج صمون وككو لو احطلج بي كندر مثل ذيج المرة؟
جاوبيني لتبقين تباوعيلي خوفتيني

مليون سؤال سئلتها وهي بس تباوع جامدة اريدها بس ترد عليه ماكو تغمض وتفتح من الشمس

طبكت السيارة على جهة نزلت اخذت الغترة منها وخليتها ع الجام عن لاتفوت عليها الشمس ولا تحركت ولا انطت اي ردة فعل

صعدت مرة ثاني انطيتها ايدي خليت راسها على ايدي عن لا ياذيها الكشن وهي عينها بعيني
: ارجعي نامي

غفت ومشيت انا لمن وصلت الناصرية كعدت
: سُكر اخذج لبيتي؟

هزت راسها بحركة بسيطة لا الحمدلله بدت تستجيب
: نعمة بديتي تستجابين

كملت الطريق لبيتها سحبت ايدي خدرانه عدها المفتح اخذته ودخلتها لبيتها امها ماهي هي بس تتحرك شلون ماريد احركها ولا وياي

غسلت وجها ع المغسلة وايديها ودخلتها اجت كعدت ع الجرباية عينها بعيني متحجي
: سديم حبيبي تفوتين تسبحين وتبدلين ملابسج ذني اللابستهن تذبيهن مايبقن يمج واطلعين تلفين راسج وتنامين

ماكو رد
: جاي تسمعيني؟ وياي انتي؟ سديم ردي عليه انتي جاي تسمعيني

ولا حركة بس تصفن بوجهي بدون حتى مترمش
: جاي تسمعيني؟ جاي تسمعيني شجاي اگلج؟ انتي متسمعيني لو متردين تحاجيني ترا انا اتنفرز جاوبيني؟
فوتي اسبحي وذبي هذول اللبستهن قبل متنامين

مترد يربك شبيها هاي كعدت على ركبي احاجيها

: تروحين تسبحين وترجعين تنامين
جاي تسمعيني؟
سُكر لتشلعين كلبي عمري انتي انا لمن اشوفج متردين اخاف احس بيج شي اخاف عليج

ماردت ماكو فايدة
: لتسبحين انا رايح

جذب بس اريد اشوف شنو ردة فعلها جاي اوكف جلبت بيدي
: ها تردين تجين وياي؟

محجت
: اسبحج؟

محجت دنكت نزعتها الحذاء والجواريب رحت للكنتور مالها طلعتلها ملابس ورجعت عليها وخرت الشال وفليت شعرها

: هاي ملابسج وفوتي سبحي ذني شمريهن ماريد يبقن عندج

ماكامت گتلها يالله كدامي سبحي ماكامت
: رايح انا

داامشي ولزمتني
: تجين وياي؟

ماحجت كومتها مشت دخلتها الحمام فكيت البشت عنها

وخرت الجاكيت والبدي حتى الكيون صح هي مرتي بس ابد نظرتي الها وهي بهل حالة بين ايديه مو نظرة رغبة بيها بالعكس كلبي محروك

لزمت زنودها اباوع لمتونها وضهرها بعد بيهن اثر الكدمات طبكت حواجبي حيل مهضوم

: شمسوين بيج يالحيل ترفة شمسوين بيج هاي انتي الكطنة هيج يسون بيج وانا بعدني اشم الهوا عمت عين الوكت

متحجي ولا تتحرك جان اسمع صوت الباب مال شارع نفتح مديت راسي امها دخلت شافتني
: نورتي

: شنو هاي وصلت انت

: چا انتي توج وصلتي؟

: لا وصلت من زمان بس جنت بيت صديقتي

: اي اي خير انشالله فوتي بدليلها تستحي مني

يجي يوم واكسر راسج دخلت للحمام وسديم بعدها مجلبة بيدي بقوة دخلت للحمام ردت اوخر

شافت امها تريد تلمسها جفلت ونهارت تصرخ رجعت طاير، احاجي امها

: وخري عنها وخري عنها ماتريدج وخري عنها

ابتعدت ودخلت عليها ركض حضنتها وهي منهار تبجي وتصرخ

: والله ماخليج يمها والله هاي انا يمج
راح اخذها متريدج

: اي مدام متريدني وانت رجلها صارت حلالك بدللها

: اي ابدللها قابل استنكف منها اي ابدللها واغسل هدومها بعد

گلتها وباوعتلها بعدها تلهث باوعتلي
: تريدين ابدلج؟ لو اخابر اختي تجي هنانا؟

محجت بس ترجف ترددت مديت ايدي الها جريت الكيمونة بعدها بجمودها اباوع الكدمات البيها تاخذ روحي
: تسبحين يالله طلعين لتخافين انا هنا

مترد
: اسبحج؟ اصيح اختي تدخل وياج؟

هزت راسها رافضة مديت ايدي الها داساعدها تنزاع باقي ملابسها وانا انظرلها والله انظرلها جنها طفلة بيدي ابد مو زوجتي

مع ما لمستها نترت دفعتي
: ها اطلع تسبحين وحدج؟

هزت راسها موافقة واشرت على باب الحمام اطلع تراجعت وكفت باب الحمام وسحبته دسده شفتها فتحت عيونها خايفة تركته

: ابقي مفتوح؟ وادير وجهي تمام؟

هزت راسها قابلة فتحته شويه ودرت وجهي عنها  سمعت صوت المي بس شويه وطلعت شعرها يقطر مي ضحكت وسحبت الخاولي اجيت انشف شعرها

: يمة شنو هالجمال صرتي تخبلين يالله نروح ننام

سحبتها من ايدها دخلتها لغرفتها كعدتها ع الميز سشورت شعرها ابتسم بوجها حتى متبقى خايفة

مشطته وضفرته سحبتها ووديتها لجربايتها بعدها ترجف مسكت ايدها بردانة غطيتها ببطانيتها كلش زين شلت ملابسها القديمة وذبيتهن رجعت عليها جبت كرسي وكعدت كمشت ايدي وحضنتها

: راح اتصل على امي تريدين شوربة؟ شي دافي؟

متحجي بس تباوع طلعت التلفون خابرت امي وگتلها تسوي شوربة

: وينك يمة من البارحة مشفناك

: جنت طالع ويا جماعتي بس اريد تسويلي شوربة مال خضروات تتذكرين لمن سويتيها لسديم لمن جانت بيها كورونا هاي الطيبة اريد نفسها تسوين

: ليش مريضة بيها شي؟

: لا مشتهيتها

: هاي هيه نص ساعة وتعال اخذها

گالتها وسديته باوعتلها
: اجيبلج وحدة من بناتنه تكعد وياج تونسج؟

ماكو رد خليت تلفونها ع الشحن جاي اكوم اخابر فزت جلبت بيدي خابرت صاحبي مراسلني ووصيته ع المرضى وسديته

: سديم والله نكسر ضهري من كعدت الكرسي اروح اريح وارجعلج العصر

جلبت بيدي قوي وبرطمت
: لالالالا ماروح ماروح انام يمج والله

سكتت وانا كعدت ع الكرسي احس ضهري نقسم بس لمن اشوفها مغمضة ومأمنة على روحها بين ايديه يهون تعبي

اشرتلي اروح يمها ادنت سوتلي مجال اجيت بصفها مددت فتحت دكم قميصي وهي صعدت راسها خلته على صدري اشم عطر شعرها يرد الروح

غلغلت اصابعي بشعرها واطبع بوسات بيديها كل نيتي احسسها بالامان الفقدته

: محد يلمسج بعد دام انا وياج وابد ماسمح اخليها تاخذج مكان ومو بكيفج بعد العرس راح يصير باسرع وقت حتى اذا انتي مارضيتي اخذج اداريج هناك

احجي ولا يمها مخليت حجاية محجيتها لا انا ابوج ولا انا حبيبج لاخليت تهديد ولا خليت كلام يطمئن مكلته الها بس ولا يمي حجاية مطلعت من حجيها لمن ثكل نفسها ونامت

جريت نفس هسة هاي شلون اسويلها حل شلون اخلصها من محيطها السام شلون اعودها ع الطمئنينة بعد كمية الصدمات التعرضتلهن

اهمس لشعرها واتلمس ايديها وابوسهن شلون ينطيهم كلبهم بيها مادري

لمن تاكدت نامت وخرتها من صدري وكمت سديت دكمي ولبست جاكيتي وطلعت صارت امها بوجهي معاجبها

باوعتلها هاي ذبحها حلال
: شلون ام انتي؟

: والله ردت اي طريقة بس اعالجها بيها

: تگليلها رايحين نزور اختج وانتي رايحة تسويلها شعوذة
تاخذيها لمكبرة قبل الفجر وتعرفيها تخاف
تذبين عليها مي بهل برد بنص الجول
تتركيها تصرخ ولا تگليلها انا يمج الا بلاعيمها تشرحن
شلون علاج هذ

سكتت ماحجت خليت ورحت جبت الشوربة من امي ورجعت الها لكيتها بعدها نايمة خليت الاكل بصفها ورديت لبيتي لاكاني اخوي الجبير

: الله يساعدك

: مشكور

: خطيبتك بعدها مريضة

: مو مريضة نفسيتها تعبانة ترتاح وميضل بيها شي

: اُذين البت مريضة متفيدك بعد يخوي

: گلت مو مريضة

: امها بنفسها تگول بيها جني مسودنة

: وانا جاي اروح واشوفها ولابيها جني ولا ابد صاحية اكثر مني من رخصتك تعبان ارد انام

تركته ورحت لغرفتي

سديم.

كعدت ضلام دامس المكان اتلمس اُذين ماهو كمت علكت الضو شفت شوربة يمي ماشتهيت كمت فتحت الباب اخاف من باب المغلق ورجعت لتلفوني

باوعت ساعة 2 بالليل تذكرت البارحة بهيج وقت صار وياي هذ الموقف كتمت شهكتي واني اتذكر ثانية ثانية صارت وياي شلون ردت بس اتنفس ومگدرت

اريد انام مابعد اگدر وين الكه اماني بعد اني نزلت جوا حتى اأمن على روحي بصفها شلون اأمن هسة وين اروح

اسد الباب اخاف من الجني افتحه اخاف من امي

غطيت نفسي كُلي بالغطا وابجي بصمت مرت الايام وابد ماخذ اكل من امي ولا اگدر اشوفها اصلاً الاكل اُذين يجيبه الي هو والمي يومياً ثلاث وجبات

شعري يجي يمشطه ماسيطر اني علي ولا ليه واهسه اصلاً يجي يسويلي كصيبة ويوكلني لان ايديه يرجفن والهدوء مسيطر عليه اريد احجي بس ماكدر بعدها خوفة بيه

ادري بالدا يصير حوالية واحس بي بعد بس ماگدر اتحرك او اتصرف اي شي لساني معكود عن العالم المحاوطني وحتى اتصالاتي ويا الكُل كطعتها

انقطعت علاقتي بامي فد نوب لا اسئلها وين رايحة ولا وين جاية اشوفها هي بس خايفة من ردة فعلنا وخايفة من سكوتنا اكثر

اجا زارني وكعد يوكلني كالعادة اخذت تلفونه اقلب بي بالاسماء من الملل شفت رقم مسجله وليدي فتحته استغربت هذ مو رقمي

: اُذين هذ رقم منو؟

: ياهو

اخذ التلفون وتغيرت ملامحه
: شنو رقم بنية هذ؟

: لا

: لعد

بلع ريكه ضايج
: منو هاي

: صميم اخوي

سكتت من گالها ورجعتله التلفون
: ميهون عليه احذف رقمه من جهازي
اذا ادك علي يطلع مغلق هو راح بس منمحي كل اثره

سكت ضايج حيل رحت حضنته
: هسة لتضوج

: وصلت ارض النجف ومگدرت اروح علي

: جان رحت

: مگدر ولا اروح اذا ماخذ ثاره

: معرفت شي عن القتله؟

: جاي اجمع معلومات

ثاني يوم اجا وجابلي طفل وياه باوعتله مستغربة
: هذ اُذين الصغير ابن صميم

رجف گلبي حيل اخذته شبكته وبسته الطفل ينوكل حيل حلو ينحب ووكح انطيته حلويات ياكلهن واُذين يگله هاي مرتي
: بابا

: ها بابا

: هاي راح تسير ماما مالي

: اي حبيبي هاي ماما

راح الطفل وهو طلع من جيبة علبة باوعت مستغربة شنو هاي طلع كلادة على شكل سيف الامام علي ومكتوب نفس الكتابة

"لافتى الا علي ولا سيف الا ذو الفقار"

لبسني اياها وراح فتحت تلفوني لكيت جايتني رسائل من حساب جديد
: الوو وينج
ردي هذ انا اريد احاجيج
سُكر ردي عليه هذاك حسابي لغيته ردي عليه

: هلو

: شلونج

: تمام

: اشتاگيتلج حيييل

: اني حتى لمن اكون يمك اشتاگلك

جذب اصفط حجي من يمي بس ماريد بعد كُل اليدا يسوي وياي ابين ناشفة وياه
: احبج

: واني بعد احبك واعيش بيك

بقى بس يتغزل واني ارد علي وراح لي ورا ساعات اتصل بيه اُذين وصرنه نحجي
: شكو ماتتصلين عليه ولا تراسليني؟

: شنو ماراسلك هسة جنه نحجي بالتلي

: شنو هو؟

: اي تراسلنه اني وياك

: سُكر انا حتى تلي مافتحه

استغربت شدا يكول
: شسالفة؟

: هاا يجوز صديقتي دا تسوي بيه مقلب هاهيه ماكو شي

رحت للتلي حظرت الحساب المراسلني شويه واجتني رسالة من حساب حسيت حرارة تطلع اذاني واني اشوف صور غزوان ع الحساب كاتب
: ليش حظرتيني من ذاك الحساب؟

بسرعة حظرته ولزمت التلفون ضميته لكلبي ارجف هذ غزوان شرجعه المن جايني شذكره بيه لا يالله

اگول لاُذين؟ لا لا ماگله هسة يسويلي طلابة ويگلي المن تردين لا مااگله ولا اله داعي هاهيه

مرت ايام واجا كعدنا بالاستقبال گال خلي نتزوج
: لا

: حاجيت امج انا وگتلها داخذج هل اسبوع ووافقت

: ماتزوج هسة مو مستعدة لتجبرني اُذين

: مجابرج بس انا اريدج يمي حتى اداريج

بقيت رافضة وهو يقنع بيه ماتحمل بعد صرت ابجي
: هاهيه هاهيه منتزوج هسة كيفج

سكتت ولمني لحظنه
: تعبت اُذين والله

: اريد اگول لاهلج ع السوته

: لا

: ليش ليش متقبلين خلي عمامج يعرفون خلي اخونج يكونون على علم شنو سوت بيج لوين ودتج ولشنو تعرضتي

: ماريد اذا دروا حتصير مشاكل ويجون يلومونها وشبيدهم يسون غير يهوسون ماريد اسمع اصواتهم  ماريد يتعاركون مرة ثانية مجرد اسمع هوستهم ويروحون قابل احد حياخذني

: اخذج انا

: ماروح مكان

: هاهيه

رحنا لغرفتي لان امي طابة طالعة ع الصالة اجيت ع جربايتي واجه كعد يمي دفعته
: وخر اريد امدد

: شو مالج خلك

: شتريد يعني اركصلك

: مو تحسين جاي تحجين بنترة! 

: لا ما احس اكيد

: عدلي اسلوبج

گالها ودار وجهه راد يطلع كام للباب
: تعال

: اعتذري حتى اجي

: باوع  ترى الانسان ساعات يغلط بدون قصد بس أني قاصدتها وعساك ماترضى

اني گلتها ورجع لزمني من ياختي واني روحي طالعة لزمته من قميصه واحجي

: السبع يطلع دم يالله

ابتسم غمزلي
: مو هسه بعدين

وعافني وراح نفرزني الخبيث عدت ايام وصرت اتخربط اكثر المغرب ابقى اصرخ خايفة واذا امي تحاول تتقربلي تهديني افقد بلا شعور اصرخ واريد تروح احسها تريد تذبحني

ماهدى لمن يجي اُذين يهديني بكلامه وحركاته انوب يوكلني ويمشطلي يبقى يقنعني ارجع لطبيعتي وافتح تلفوني حتى اطلع من الحالة الصارت بيه واني مو يمه انام يالله يروح

كعدت العصر صفنت بوضعي الى متى ابقى مقيدة ودافنة نفسي خلي احاول ولو محاولة كاذبة اطلع من ثوب الكأبة الغط گلبي

فتحت تلفوني دخلي للتلي اگلب بالقنوات شفت جايتني رسائل من حساب استغربت هذ اليوزر ماعرفه

دخلت للمحادثة الرسائل قديمة وعبارة عن تسئل عليه تريد مني جواب وحساب مال بنية

ذاكرة اسمي وتگلي انتي خطيبة اُذين ذاكرة اسم مدرستي وصفي وتفاصيل دقيقة عليه

: تفضلي

لانشافت ولا ردت عليه تركت التلفون وكمت غسلت واكلت ورجعت اتكلب بالتلفون عدت ساعات واجاني اشعار
: انا اعرفج وانتي متعرفيني

: منو انتي؟

: انتي مو خطيبة اُذين؟

: اي اني تفضلي شرايدة ومنين تعرفيني؟

: اُذين جان يحبني

بقيت ساكتة مارديت هاي تحجي صدك لو مقلب شنو
: عفواً

: انا حبيبته وبقينى بعلاقة فترة طويلة ولمن اجيتي انتي خربتي عليه

من شافج خرب عليه جان يحبني انتي خربتي سعادتي وبنيتي بيتج وسعادتج على تعاسة وخراب بيت غيرج

: مستحيل

: لا مو مستحيل هذ الواقع انتي اخذتي مني

: وشنو دليل كلامج

دقيقة ودزتلي صورة اتكطعت لمن فتحت الصورة

ايد لازمة تيشرته لو شي من ملابسه هذول الملابس اعرفهن هذول مالوته بقيت بس لازمة التلفون ومطككة عيوني احس دخان يطلع من اذاني

: انا لداخل بيته داخلة ووصل بينه الامر للخطوبة من اجيتي خرب كلشي هو ممصارحج لان يدري بيج اذا دريتي متتقبلين الامر وتخرب علاقتكم بس هو جان يحبني وبعد متزوج سابقاً

مو بت عمه عمه لبعقد سيد قبلها جان يعشكني وميريدج تدرين بحياته السابقة مليانة بنات حتى شوفي

گالتها ودزتلي صورة ايد بنية لابسة سوار ركزت هذ الاسوار اني اعرفه اني هاديته اياه هذ اني اشتريته وانطيته اياه وميلبسه

: هذ انتي هاديته اله
عرفتي؟

بس ماسكة التلفون وعيوني ماكدر ارمشهن متمركزات ع الشاشة وارجف الدم صعد لراسي وهي مستمرة تحجي مكان شغله وتعدد اسماء اهله تحجيلي بكتبه واشعاره

اهز راسي رافضة تصديق لا لا مستحيل
: مستحيل

: شنو تريدين اكثر صورنه سوية هم ادزلج عادي
ترا مثل معافني يعوفج ع المستقبل لتثقين بي بعد الحب الجان بينه ماتصورت انه ينتهي بهل سهولو سابني لحاكر وحدة باول متوسط شنو تترجين منه

: حتى جان يحجيلي عنج وعن تصرفاتج الطفولية

: طفولية؟

: تتابعين ماشا ويحجيلج قصص

: وانتي معندج كرامة باقية ويا واحد يحجيلج عن وحدة ثانية

: هو لهل سبب انا عفته لان شفته متعلق بيج وماريدج تغلطين نفس غلطي وتبقين وياه

بقيت لاخذ ولا انطي عقلي انقسم شي يگلي صدك شي يگلي مستحيل اُذين يسويها هو يحبني اني هو ميريد غير سديم

لعد هذني شنو؟ اذا هي جاذبة هذ تيشرته هذ اسواري اني جبته اله
بقيت سؤال ياخذني وسؤال يجيبني وبس دموع تنزل بصمت

زين اسكت عن الامر واحسبه ماضي وراح اغض بصري عن مافات مثل مسوا هو؟

لا اني مصارحته بكلشي كل جبيرة وصغيرة بحياتي يعرفهن لعد الى متى ابقى انصدم واتحمل خيبات من الحواليا؟

هاي الافكار كلها اجت بجزء من الثانية

: وانتي الي راح خطب غيرج تبقين وياه؟

: هاي بيناتنه ننجاز مرجعه اليه

: كيفكم اني راح ابتعد عنه وانتي شغلة بقت يمج لمن خانج وتراح تزوج
انطي لليشبه زحمة يبقى وياي وانتم نفس الصنف الرخيص للرخيص خلي الج

: يعني بعد متريدينه

: لا خلي الج

: يعني متحبينه

: لا ماحبه اضحك علي شرايدة

: ليش تضحكين علي؟

: داخلة على طمع واصلاً احب غيره

گلتها وحظرتها ولا ليه واهس لشي لا عاتب ولا احجي ولا اگله ليش هيج ومنو هاي الامر واضح مو مال مقلب لو تدبيرة

اعرف حيوصله حجي الحجيته ومتاكدة خلي يحترك گلبه مثل ماحرك گلبي لو يحبني يصارحني ويگلي عن مشاعره بصدك ميخبي عني متخلة بهيج موقف بسببه

انهاريت بسكوت بس فاتحة عيوني مطككتهن ممصدكة احس روحي نسلبت كُل ذاك الوكت جان بالنسبة اله بديل عن علاقة سابقة

مثل معافها يعوفني مثل متخلى عنها يتخلى عني اذا كُل هالحب بينهم تدخل لبيته وهذ اسواري بيدها تاركها ومسوي روحه يحبني تخلى عنها حيتخلى عني

طفيت التلفون وذبيته هاهيه زهكت وبزعت روحي مسحت دموعي مابجي عليك كاضيها بس تجذب عليه مرة تزوج وهسة يحب وحدة قبلي  داخلة لبيته

انتي قوية سديم وتگدرين تتخطين وحتتخطين اكيد اني مخسرت هو الخسرني الميحبني ويروح ماعتبر روحي خسرته

ماعرف شلون نمت جني جثة كعدت الصبح عقلي خالي من اي فكرة

طافي عقلي مو وياي كمت بكل برود غسلت ورجعت لغرفتي ممشتهية اكل باوعت تلفوني مراسلني

زفرت هسة هذ شيريد مني خليت لايك ع الرسالة وطلعت وهو بعد احس مشاعره بردت تجاهي ومهتميت

صرت اتجنبه اكثر يراسلني لو اشاهد بدون رد لو بس اخلي لايك ومشفت منه اعتراض على هل شي ولا حجيه مثل قبل مجرد يگلي اكلي نامي لو ويامن تحجين

خابرني رديت هو بارد واني، ابرد منه
: ويامن جاي تحجين

: صديقتي

: وديلي سكرين

: شنو هو؟

: وديلي سكرين ويامن تحجين

اخذت سكرين ودزيته
: هاي سكرين برد گلبك

: مو هواي

: لتخاف اني مو مثلك

: انا المو مثلج شوية الله عليه انا زين

: لا لتخاف مو كُل الناس مثلك

: جنتي صاعدة اتصال قبل شويه ويامن

: غزل

: وديلي سكرين

وديلته واني روحي طالعة
: انت شبيك شتريد

: دا اسئلج سؤال وجاوبيني

: شرايد

: انتي عدج حساب انا مادري بي؟

: حساب ايش؟

: مادري اي حساب انستا تلي واتس

: لا

: ارجع واعيد السؤال سديم
عدج حساب ثاني انا مادري بي

: واني گتلك لا

: حجايتج هاي راح اخذلها سكرين ترا مو باجر عكبه مو يطلع عدج حساب ثاني تجين تگليلي مادري بي عدج لو لا

: گتلك لا

: اخذي سكرين للحسابات خل اتاكد

: ترا انت تلح انت منو تشوف وتتاكد

اكتب وحيل منهارة عيوني مغوركة حتى الحروف ماشوفهن من دموعي ارجف ارجف وارفض دموعي تنزل ارفض ابجي واضعف

: روح عني تعبانة

: دزي دا اشوف الحسابات

: روح گلت

سديته منه ابجي الصلف عباله كُل العالم مثله تخون بس يسفط حجي بس يزامط وهو ميسوي شي دموعي متنزل علي سديم لتنزليهن غاليات متنزليهن

ماكدرت اتحمل نزلن دموعي حيل اشهك امسحهن وينزلن بعد زاد وضعي زاد كرهي لمحيطي ولروحي

اتجنب احجي ويا احد بس صديقاتي يخابرني مرات ارد مرات لا واذا اخابرهن يراسلني يشوف مشغول يتخبل عليه ويامن تحجين وليش مشغول

يطلب سكرينات مني اني مرات ادزله اسايره اريد اعرف وين يوصل ومرات اعاند واغلس علي وهو يتخبل شكو متجاهلتني ومنو شاغلج عني

: محد ماليه واهس

: مالج واهسي انا

: اي واهسك انت ماليه واهسك

: اهاا غيري الج واهسه تحجين وياه وتتذكرين ايامكم القديمة

: احتمال

: لا مو احتمال اكيد

تركت التلفون وعفته خلي يبقى يحجي براحته مو مهم خلي اشوف وين حيوصل بهاي تصرفاته حيحجيلي على حبيبته لو لا

اختنكت من كُلشي قررت ارجع اصلي ماالي حل غير هذ توضيت ووكفت ع السجادة بس قمت الصلاة شهكت ابجي

اختنكت قبل ماركع دموعي تنزلي لمن اسجد ارفع ايديه ثنينهن وادعلي علي من كُل گلبي ويا دموعي الينزلن

لا وهو ابو الراهي الصلف يلوكله استمر هذ الوضع ايام مجرد يدز ويامن تحجين مرات اجاوب مرات لا لو انطي لايك وانكطعت جياته من يمي

زادت حالتي صرت ماكدر اكوم من فراشي بشرتي تدمرت صارت كُلها حبوب شعري تساقط واريد بس انام

كمت من فراشي احس روحي بمرجوحة الارض تروح وتجي گبالي اغمض وافتح بعيوني دا اركز ماكدر ماحسيت غير على ضربة راسي بالارض

ما كعدت الا على ايد امي ادك بوجهي فتحت عيوني اريد استوعب شدا يصير

: كومي سديم كومي محالة هاي والقران محالة

محجيت بس صافنة بوجها
: كومي حتى خطيبج بزع

: خمو خابرتي ماريده يجي

: لا اطمني ميجي خابرته گتله تخربطت يگلي مبيها شي عيارة منها

باوعت هاي شبي هو اليتحجج عليه فوكاها مسحت وجهي بقلة صبر كمت من حضن امي رجعت لفراشي وهي تحجي وراي

امي: ترا مو حالة هاي خلوني بفراشي لو اكوم واطيح سديم شوفي روحج لوين وصلتي كافي

ولا يمها ولا مهتمتلها شنو تحجي

ثاني يوم اجا هو صارله سبوع متغير عليه بحجيه ولا يقبل يجيني واني منا ضايجة ومريضة طلعتله ع الاستقبال كتفت ايديه اباوعله

: هاا

: شنو اليوم مطنكرة وكالبة خلقتج لازم اليوم ممراسلج

: لا تعودت انت يومياً متراسل واحسن لان مراسلتك صايرة متنجرع

: لا مو انا اقصد البديل

باوعتله باستغراب هزيت راسي
: يابديل لا ترا اني مو نفسك لتشوف الوادم كُلها بعين طبعك

: لا انا زين لتشبهين روحج بيا انا وفي مو مثلج

: اي كولش وفي اگلك ذبهن العندك لتضل تبسمر شقصدك بهذ حجيك شعندك

: لا واضح حيل انتِ احجي العندج شكو صارلج فترة مطنكرة ومتتحاجين اسئلي نفسج المن ضايجة

: تعرف البيه كلش زين انت الاشبيك

: تعرفين البيه كلش زين انتي البيج

تركني وطلع معصب ولا حاولت اوكفه او اعتبه خليت ورجعت لغرفتي تمددت بفراشي امي تسئل شكو ماحجي وياها مجرد مغمضة عيوني واحس نار بداخلي

ثاني يوم مليت امي ما هي بالبيت لبست ورحت لبيت صديقتي كُل لبالي اطلع من مودي بس بالحايط واصلا هاي البنية علاقتي بيها مو قوية سلمت ورجعت

بالدرب شفته واكف وياه شلة شباب خزرني خليت ومشيت للبيت ممهتمة اول ما دخلت اتصل عليه فتحته بجزع اجاني صوته يرعد

: انتِ شكو اطلعين بدون متگليلي؟

: واي والمن اگلك انت منو

: انا زوجج وانتي على ذمتي ابوج هسة مو موجود انا المسؤول عنج يعني تمشين بشوري

: ابوي ماهو صح بس انت مالك دخل بيه لمن اجي لبيتك ذاك الوكت اصير زوجتك

: شرعاً وقانوناً انتِ مالي

: اي زوجتك ومالتك وتخون بيه

: انا الخاين لا سديم اسئلي روحج ياهو الخاين انتِ الدتخونين بيه ورجعتي لماضيج

:  اصلاً لعبتك مكشوفة واني ممشيتها بمزاجي

: مو مثل المشيتها انا سديم

: انت وين؟

: مالج علاقة

: يمها مو؟

: ياهي هاي

: انت طالع وياها اني ادري

: اي يالله طالع وياها وشنو؟

: يعني متگول وين

: لا ماگول وياها مو وياها شي ميخصج

: شنو ميخصج ترا اني مرتك

: جج ماريد بعد تصيرين مرتي سديم انتِ....

لاتنسون التصويت⭐⭐⭐⭐⭐
اسراء العزاوي
💜💜💜💜