بسـم الله الرحمــن الرحيــم
السـلام عليڪم
#بيـن انيابهـم
#بقلمي أنـا: زهـراء
حساب الانستا: zaii1_8
لا تنسون التصويت +التعليق بين الفقرات
احبڪم زهوراتـي 💋🥹
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تـــــاج
ابتهال.... هسه اجه دورج
بردن اطرافي من جملتهة وڪُل فڪرة مو زينة اجتي ببالي قويت نفسي والتفتت الها
مشت بناحيتي وعيونها يشرحن الي راح يصير بية وشنو ناوية وصلت الي ودنڪت المستواي حرڪت فڪها وابتسمت بأستهزاء
ابتهال...شايفة الهوسة الي صايرة هنا؟
هزيت راسي بأي من غير ڪلام
ابتهال... نضفيها على ما اجهز تدريبج
عقدت حاجبي من جملتها الاخيرة.. عفتها ورحت شلت البطالة وذبيتهن وطفيت المسجل اجيت ادخل للغرفة ودخل قاسم وكعد على التخم ڪبالي
قاسم... يلا وين صرتي
جاوبتة ابتهال وهيا بالمطبخ
ابتهال... جاية
اجت بعد مدة شايلة سجين بلعت ريڪي وضلت عيوني تنتقل عليهم
ابتهال... انطيني جداحتك
طلعها من جيبة وشمرها عليها بضحك ضحكت واخذتها
شعلت الجداحة وبدت تحركها على السجين لوقت طويل وماڪو اي صوت بيناتنة فقط النضرات المشحونة
خفت وكمت من مڪاني بعدني ما خاطية وصاحت
ابتهال...اووكفيييي
تـــــاج.... حبابة عوفينيييي
ابتهال...هه لا حبيبتي منو كال اني حبابة؟
نزلن ادموعي وضليت واكفة وارجف منتضرة الي راح يصير بية
كام قاسم ووكف بصفها وهيَ بدت تشرح وتحرك السجين
ابتهال...اسمعيني احنه من جبناج هنا لأجل غاية تمام؟
هزيت راسي بأي
ابتهال... يعني تنفذين غايتنة نصعدج فووووووووك ومحد يڪدر يحاجيج اما اذا ما نفذتيها؟
مشت بأتجاهي وبحرڪة سريعة شالت رجلها وسحڪت رجلي صرخت بأعلى صوتي وعيوني طلعن من مڪانهن جرت شعري ورجعت حجت بصرامة
ابتهال... ساعتهة راح انسحكج واخس واحد هنا راح يلعب بيج
بالرغم ما فهمت كلامها ولا شنو داتقصد بس ضليت اتوسل بيها حته تبتعد
ابتعدت وهيا تضحك
ابتهال... هسه اعلمج شنو راح اتسوين اولاً اريد تجيبين محفظة قاسم من غير ما يحس
رأستاً باوعت لقاسم واڪف يمها ومڪتف ايديه رجعت نضري الها واني مو فاهمة شي نطقت بعد مدة
تـــــاج.. ما فهمت
بدة صبرها ينفذ وهيَ تشرحلي شلون تريدني امد ايدي واخذ المحفضة من غير ما يحس بيه
اخر شي انطت السجين القاسم وبحرڪة سريعة خلتة يلتهي وسحبت الجوزدان من جيبة ضليت فاتحة عيوني شلون سوتها وهوَ حته ما حس الة لمن خلته ڪبال عيونة
ضحكت وباوعتلي
ابتهال.... ها حلوة الشغلـة مو؟
ضحكت وهزيت راسي بأي
ابتهال... يلا تعاي جربي... بس هاااا لو حس عليج العقاب قوي
خفت واتراجعت اسويهه بس ماڪو مهرب منها اتقدمت بتردد ووڪفت كبال قاسم اجيت امد ايدي لجيبة رأستاً كض ايدي وڪال
قاسم.... هههه شتردين يحلوة؟
بعدني ما مستوعبة وما احس غير السجين على ايدي وصوت بالسما وصوت بالڪاع شاطت روحي يلا وخرتها باوعت الايدي عليها طبع احمر ضليت انفخ عليها وابجي واطفر
ساحت روحي وڪعدت بالڪاع على برودة الڪاشي غمضت عيوني ورجعت صاحت
ابتهال... وييين بعدة التدريب ما خلص
حجيت بتوسل
تـــــاج.... تعبت ڪافي
حجيتها وغمضت عيوني بدموع ما احس غير دفرة اجتني بصفحتي
كمزت من مڪاني واني افرك بصفحتي
ابتهال.... يلا ڪدامي ما جايبتج هنا بس للاكل والنوم
مشيت وحاولت مرة ومرتين وثلاثة وبڪُل مرة افشل وترجع تحرڪني لحد ما هيَ تعبت وملت
ابتهال... ولي للغرفة باجر انڪمل
ما صدڪت حجت هيج طفرت للغرفة وسديت الباب باوعت حوالية واني اتنفس بسرعة والدموع ناشفة على خدي اجة نضري على ايدي بلعت ريڪي وكعدت ورة الباب لميت رجلية الصدري وخليت راسي بيناتهن
احس بروحي جاي اذبل شي ورة شي والنار مشعولة بداخلي
سمعت خطوات ناحيتي رفعت نضري ببطئ لكيتها شُـذير واكفة واصفنة على حالي
زادت الدموع بعيني والشهكة ملت ريتي
شُـذير... ايش ابجين؟
(ليش تبجين)
تـــــاج.... خايفة
حجيتها وانفجرت بالبجي
تـــــاج... اريد اميييييي طلعووني مناااااا.... طلعينيييي وين اميييييي وينهاااااا
انفتح الباب بقوة واندفعت بالكاع شاطت روحي من الم ضهري خليت ايدي على المكان وابجي
دخلت ابتهال واتوجهت ناحيتي كعدت المستواي وضحكت بحقارة
ابتهال ... شنو تردين؟؟
جاوبتها بتلڪأ
تـــــاج... ا امي
ابتهال... امج ماتت
بلعت ريڪي وهزيت راسي بـــلا
تـــــاج... جذابة
ابتهال.... كيفج لتصدكين طبج مرض
رادت تكوم جلبت برجلها وحجيت بتوسل
تـــــاج... حبابة اريد امي رجعيــني الها وينهاا ليشش ما اجتت
خلت رجلها بوجهي ودفرتني بقوة ساحت روحي وما كدرت اتحمل ضربها والم ايدي غمضت عيوني واني اسمع بجي شُـذير
فزيت من نومتي جسمي ڪُلة ايأذيني وبعدني بمڪاني على الڪاشي كمت بصعوبة واول مارحت للمراية باوعت الوجهي عيني زرڪة وخشمي مورم والدم ناشف عليه سحبت نفس بصعوبة وسڪتت
رحت حاولت افتح الباب لڪيتة مقفول اتنهدت وعفتـة ورجعت ڪعدت بمڪاني
كضيت بطني بألم ما ماڪلة شي ومنا ضرب ابتهال نهانـي احس احشائي شي تريد تاڪل بشي
الي استغربتة ان البيت هاي المرة هدوء عڪس كُل مرة من اڪعد صوت الهوسة والاغاني ما يحملة العقل
هما ليش هلڪد يشغلون اغاني ويرڪصون زين منو هذول الزلم الي تجي
اني الي اعرفة بس قاسم موجود زين نورة وخلود شنو شغلهن
ڪُل هاي الافكار ضلت ادور بعقلي الي ماجاي يستحمل اي فڪرة ولا شنو الي جاي يصير
وين قبل من جنت عند اهل همي ڪُلة لعبة او حمرة ووين هسه؟
تفكيري ڪُلة متمحور على الطلعة منا
فزيت من تفكيري على صوت اتكسر ڪُلها ثواني وكام صياح ابتهال وبجي شُـذير
طڪ القفل مالت الباب ڪمت بسرعة وبخوف خاف هم جاية تضربني
دخلت وهيا كاضة شُـذير من طرف كتفهه وتضرب بيها فتحت عيوني بصدمة شلون ما عدها كلب وتضربها ضرب الجبير ما يتحملة
مشيت الها بسرعة وجريتها من ايدها وصحت بوجهه
تـــــاج... ايددج تنكسرررر اذا مديتيها عليهااا
ابتهال... احمي نفسج بالبداية وولي منااا
تـــــاج.....ليشش تضربينهااا طفلة شنو تفتهمممم من الضرببب
دفعتني عنها ورجعت اخذتها من ايدي شڪلها يخوف حواجبها تتحرك من تحجي اي كلمة وعيونها فاتحتهن بقوة
دفعتها عنها والتفتت الي وحجت
ابتهال... حضري نفسج باجر من الصبح نطلع
حجيت بسرعة
تـــــاج... وين؟
ابتهال... المڪان وهسه شوية وطلعيلي انعيد التدريب
جفلت بمكاني خاف هم تحرڪني ما خلتني احجي عافتني وطلعت
باوعت الشُــذير تبجي بسڪتة من الخوف حسيت بيها شي و مو طبيعية كعدت بالڪاع واخذتها الحضني وهيَ بس ترجف
نامت والشهڪة بصدرها غلست وما ڪمت رحت لأبتهال
اتمددت بصف شُـذير وضليت صافنة
انرسم بخيالي وكفتي كدام المحل والعرڪة الصارت ومن صاحو عبوة ناسفة
او من ابتهال حاولت اجي وياها ومن عثرت لو من الطفل مات
ومن ومن ڪُل هاي الاسباب خلتني اجي هنانه
صاحت بصوتها الحقير
ابتهال... يلا تعاااي
كمت من غير ڪلام لأن ڪُل المحاولات وياها فاشلة طلعت من الغرفة واني امشي بتردد
شنو راح تسوي الي ووين راح تاخذني باجر
رحت للهول ما لڪيتها
ابتهال... تعاي بالمطبخ
رحت الها لڪيتها مخلية يمها جنطة سوة صغيرة وڪاعدة بالڪاع اشرتلي حته اڪعد
ڪعدت ڪبالها وبدت تعلمني شلون افتح السحاب مالت الجنطة بسرعة ومن غير حس
هوايه اسئلة ببالي بس ما اڪدر اسئلها او اخاف وتردد بداخلي
والرهبة مالت ايدي كفيلة بأن اخذ كلامها واي شي اتريدة اسوي
العصر ڪُلة كضيتة وياها وتعلمني الحد. ما خلتني اضبط الشغلة
شلون افتح السحاب بدون لا احد يحس
وشلون امد ايدي واسحب ڪُلشي بالداخل
والجوزدان نفس الشي
ابتهال... عفية هيج اريدج
هزيت راسي وحجيت
تـــــاج... زين ليش اتعلميني هيج. شغلات؟
ابتهال... باجر افهمج واذا شفتج ضابطتها انطيج مكافئة
تـــــاج... شنو هيَ؟
ابتهال... خلي يجي باجر وعود عرفي
جاي نحجي واندك باب المطبخ كامت بسرعة وفتحت دخل قاسم وهوَ فحطان شرب كلاص مي ووجه كلامة لأبتهال
قاسم... وصلت البضاعة
حجاها واثنينهم انتقل نضرهم الي اشرتلي ابتهال حته اكوم
كمت بسرعة ورحت للغرفة اجت وراي وقفلت الباب من برة
ضليت صافنة والفضول صابني شنو اكو برة ويا بضاعة؟
ركضت للشباك الي صاير بالغرفة حاولت اوصل الة بس ما اكدر
رحت جبت فراش ورتبتة وصعدت عليه وخرت البردة بس ما شفت اي شي لأن صاير بالجهة الثانية من الشارع شڪلهم حاسيبن لڪُلشي حساب منين ما اجيهم ما اكدر
صار صوت عالي وضحك وسوالف هوايه نلس نزلت بسرعة ورحت خليت اذني على الباب
.. بشر ماكو سهرة منا منا
قاسم... هههه تعالو باجر وادللو اليوم استراحت البنات
... لا انريد جدد
قاسم... الجدد على الاسبوع اليجي
صفنت بڪلامهم مو واضح شنو بنات جدد قابل البنات قديمات؟
رجعت حاولت اسمع بس ضلو يحجون بهدوء وبهمس
مليت ورجعت ڪعدت بمڪاني مرت فترة وانفتح الباب دخلت ابتهال شايلة صينية خلتها بالڪاع وحجت بأمر
ابتهال... تعاي اتسممي
خزرتها وسويت الها بأيدي حركة شفت نورة اتسويها الخلود غمتني وطلعت برة وقفلت الباب
ادنيت يم الصينية وباوعت الها بتفاجئ بيها لحم وتمن هوايه
مديت ايدي اريد اكل بس اجت بعيوني شُـذير نامت وهيَ جوعانة
رحت كعدتها وشلتها بصعوبة كعدتها يمي وضلت تاكل والنعسة بعينها
شُـذير سمينة كُلش وعدها كرش نفس مالت بيبي وخدود كبار بس ڪُلش حلوة
من اول ما شفتها حسيتها الي وحدي وخلال الايام الي عرفتها بيهن حبيتها
اڪلنة بشراها وكأن ما ماكلين لأن صارلنة كم يوم بس تمن وروبة والنة وجبة وحدة باليوم
اباوع الشُــذير شلون تاڪل بأيدها والتمن يطيح منا ومنا وكوة تحجي
شُـذير... هميه
صفرنة الصحن ونمنة رأستاً ما ڪعدت الة لثاني يوم طلعت من الغرفة بعد. ما ابتهال فتحتلي الباب باوعت للهول ڪُلة مواعين فارغة وابطالة كزاز يمكن مالت عصير التفتت على ابتهال
تـــــاج.... لعد اذا شاربين عصير ليش ما جبتونة؟
ابتهال.. مو عصير هذا
تـــــاج... لعد؟
ابتهال... ام اللعد ولي غسلي وبدلي عدنة شغل هواي اليوم
حجتها وضربتني بڪتفي مشيت للحمام غسلت وقضيت حاجتي وطلعت لكيتها جايبة شُـذير وكاضتها بقرف وتمشي بيها للحمام
رجعت للغرفة وما طولت واجت هيَ وشُــذير دفعتها ناحيتي بنتر
ابتهال... بدلي الج والاختج يلا الملابس بعلاكة بالميز
حجتها وطلعت صفنت على كلمتها اختج.... باوعت الشُــذير صافنة علية ابتسمت الها
تـــــاج... صح انتِ اختي لأن ماما هم كالت تسمي اختي شُـــذير
هزت راسها وهيَ مو فاهمة بدلنة بسرعة ووطلعت الها اشرتلي حته الحكها طلعت من الباب وطلعت وراها التفتت للبيت شفت اكو درج بس ما اعرف المن يودي ضلت عيني عليه الحد. ما طلعنة من الشارع مشينة مسافة ووكفت كدام بيت سحبت سيم ودخلت
تـــــاج.. بيتمن هذا؟
ابتهال.. بيتي
تـــــاج... منو عايش بي
ابتهال...نورة وخلود وباقي البنات
دخلت وراها لداخل البيت طلعت نورة من الغرفة عقدت حواجبهه وصفنت علينة
ابتهال... اخذي خلي هاي يمج نكمل شغلنة ونجي عليها
حجتها وجرت ايدي وطلعنة بدون حته لا تنطيني مجال احجي او. نورة ترفض
تـــــاج... ليش ما خليتيها تجي ويانة؟
ابتهال... عدنة شغل
تـــــاج... خاف تضل تبجي؟
مجاوبتني عفتها وسكتت مشينة مسافة بين بيوت وناس تدخل وتطلع منها
تـــــاج... هذول اتعرفينهن؟
ابتهال... معليج بشي
تـــــاج... وين امج؟
ابتهال... ما عندي ام
تـــــاج... زين وخلود ونورة وين امهن؟
ابتهال... ماعدهن امهات
تـــــاج... لعد شلون اجن عند طريق الزراعة؟
ابتهال.. لا تكثرين اسئلة
تـــــاج.. ليش ؟ ماما تكول لازم اتسئلين على ڪُل سؤال ببالج لأن كُلشي الة سبب
ابتهال.... منطق امج غلط كل سؤال اتسئلينة جوابة راح يضرج
تجاهلت كلامها ورجعت حجيت
تـــــاج.. زين خلود ونورة انتِ اختهن؟
ابتهال... شايفتني بڪدهن؟
تـــــاج... لا هنا احلا..... زين اكلج قاسم زوجج نفس بابا زوج ماما زين هذا ابو لابد. مدري لبدة منو هوَ وليمتة اترجعوني الامي وابوي ما اجة سأل عني؟وبيبي وينها زين احنه وين رايحين
وكفت بنص الشارع ووكفت وياها صاحت بصوت عالي
ابتهال... بسسسسسس شكد اتسئلينننن ڪاااافي
انخرست من صوتها وسڪتت رجعت جرتني بنتر
وكفت صاحت بصوت عالي
ابتهال....مشتااااق تعااال
باوعت لولد واكف بالرڪن مالت الشارع مجرد. ما صاحتله اجة يرڪض الها
مشتاق... ها ابتهال
ابتهال... وصلني للسوك
راد يحجي وانتبه الي ضل صافن علية ورجع باوع الها
مشتاق... منو هاي؟
تـــــاج....اني تـــــاج
ابتهال... سدي حلكج وانتَ معليك عليك بشغلك
مشتاق... جا اذا علي بشغل ليش ترديني اوصلج
ابتهال... مشتااااااق
سڪت ومشة كدامها ضليت اباوع الها شلون سككتة بصوت واحد ومسيطرة على الڪُل حته على قاسم
صعد بسيارة وابتهال صعدت يمه واني ورة وحرڪها
مشتاق... شتسوين رايحة للسوك؟
ابتهال... اجربها
مشتاق... منو؟
اشرتلة براسة علية باوعلي من الجامة ورجع حجة
مشتاق.. من ليمتة ادربينها؟
ابتهال... من امس
صاح بصدمة
مشتاق... شنووووو؟؟؟ شلون من امس التدريب اقل شي تحتاجيلج شهرين
ابتهال... معليك انتَ اني اعرف بشغلي لو ما اعرفها تكدر ما اتهور واطلعها وياي
مشتاق... وصلت البضاعة امس؟
ابتهال... اي... وتعال اكلك اريدك عينك على خلود
باوع الها بخوف
مشتاق... شبيها؟
ابتهال... جاي تلعب بذيلها وصيها اذا تتجرأ لأي شي ساعتها راح ينڪص
هز راسة بس ضل قلقان وهيَ عينها عليه وعلى ردة فعلة طلعت تلفونها من الجنطة وما اعرف شنو سوت بي ورجعت ضمتة
وصلنة للسوك نزلنة وراح كضتني من ايدي بقوة ومشت بسرعة
ابتهال... اي حرڪة منج ادفعين ثمنها لا تنسين انتِ تحت رحمتي
هزيت راسي بأي وسڪتت
ابتهال... راح ندخل لمحل بي ازدحام نفس ما وصيتج اني الهيهن بالڪلام والباقي عليج
تـــــاج... زين واذا حسو؟
ابتهال... ما يحسون
بلعت ريڪي وسكتت دخلنة المحل بي شغلات منزليـة ومزهريات يصير بالطول والنسوان اتروح وتجي بي واتعامل
اكو صفحة من المحل يصيحون بيها تنزيلات جرتني واخذتني هناك دخلت بين النسوان وضلت تحجي وتسأل عن السعر اشرتلي حته اتحرك
باوعت المرة جنطتها بأيدها مديت ايدي بتردد بخوف من ان افشل او تشوفني احس هذا الشي غلط بس هيَ تڪلي عادي وحته لو مو عادي مجبورة اسويه
فزيت من افكاري على كرصة بزندي من ابتهال اتشجعت وفتحت السحاب وبحرڪة سريعة وبخفة ايد سحبت كلشي بالجنكة وطلعت من بين النسوان ارجف واباوع الايدي بيها فلوس بس ما اعرف شڪد روحي راحت واحس اتوصخت اني شداسوي بروحي وبأيدمن واڪعة فجأة اجت ايد على ڪتفي وانسحبن الفلوس من ايدي باوعت الابتهال تباوع يمنى ويسرى وهيَ اتخليهن بجنطتها اشرتلي حته نطلع بسرعة
طلعنة من المحل وزفرت بهدوء
فجأة اجت على بالي المرة شتسوي هسه من تعرف افلوسها ما موجودات
اخذتني الواحد يبيع حلويات وعندة مثل البسطية ضلت اتعامل بالولد وتنغز بڪتفي
خذت كم شغلة وكلت للولد يخليهن بالعلاڪة
ابتهال... اكلك خالة ما تعرف هنا محل يصلح مڪاين
عرفتها جاي تلهي اخذت كم شغلة واجيت اضمهن بجيبي وفجأة صاح الولد
... اوووكفييي لجج
نزيت والغراض ڪلهن طاحن من ايدي رفعت نضري بسرعة وضليت اباوع الة بخوف راد يحجي وما احس الة راجدي من ابتهال فرت وجهي بي
ابتهال.. ولج ادبسززززز اتمددين ايدج علىىىى الغرااااض
خليت ايدي على خدي مصدومة وما مستوعبة رجعت ضربتني وتجر بشعري بقوة لدرجة حسيتة دايطكع من جذورة
ابتهال.. فشلتيني امداج الله لا يوفقج وين انطي وجهيي ادبسززز
حجيت بصعوبة
تـــــاج...ا اا انت
ماخلتني اكمل دفعتني بالڪاع وانهالت بالضرب وبالشتم والناس تحجي عليها حته توخر بس هيَ فقدت ضربتني ڪدام الڪُل بدون رفة جفن ولا شي عدم رحمه تحت صريخي من الالم لدرجة حسيت الناس شفقت علية حته الولد يكللها
... عوفيها خالة طفلة ما يسون
بس هيا وين؟
ما صدكت تلكت فرصة حته تضربني جروني الناس من عدها بصعوبة ومرة اخذتني الحضنها وتمسح وجهي بالعباية واني اشهك وجسمي ڪُلة يختض خض من الخوف والالم حسيت روحي جاي تطلع
... ادري شجاج خية اتضربين طفلة كدام الكل
ابتهال... خلي تولي ﷲ بلاني بيها
... عاباج ﷲ كون جا اذا بلا ﷲ بهذا الحلاة يا محله بلواه
اجت جرتني منها بقوة ومشت بية واني الدم يجري من خشمي وراسي راح يطك من الوجع
طلعنة من السوك وهيَ تتحلف بية وتسب
ابتهال....**** بهاي ما فلحتي بعد. يومين بشنو اتفلحين ****
نترت ايدي منها وصحت بصوت عالي واني ابجي
تـــــاج..... لا تضربينيييب انتِ مو امييي
ابتهال... ينعل ابو امج
تـــــاج... لا تسبيييين لا تسبييين
انفجرت بالبجي وهيَ تجر بية واني اصيح انتِ مو امي اجرت سيارة وسدت حلكي بأيدها حته اسكت هدأت واباوع لاولد الي يسوق مستغرب
عفتة وانتبهت الايدها قريبة من حلڪي فتحتة وعضيتها بڪُل قوتي طلعت حيف ڪُل ضربة ودمعة مني
اباوع الها شاطت روحهه وهيَ تغلط علية ضربتني بأيدها الثانية على راسي يلا عفتها
مسحت حلڪي بقرف وسڪتت
مشة بينة مسافة قصيرة وكلتلة اوڪف انطتة الكروة ونزلنة اباوع الحالتي لا تحسد شعري مكوش ووجهي كلة دم واحس بي مورم
بهاي الكم يوم الصارلي عدها ما يوم شفت وجهي طبيعي
مشينة للبيت مسافة ڪُلش طويلة على ما وصلنة احس انتهيت ورجلية راحن من الم الضرب والمشي دخلنة البيتهم واني رأستاً ركضت للغرفة كعدت بالزاوية وسڪتت خاف تضربني لو تجويني اخاف منها وحركاتهه ما تنحزر
ضميت رجلية الصدري وخليت راسي بيناتهن وادموعي ضلن يتجارن شي ورة شي
جسمي يون من الوجع وكلبي احسه راح يطلع من مكانة على كد ما ايأذيني
كل هذا ليش؟
شمسويتلها اني ليش تضربني هيج
اااه وينج ماما جنتي ما تقبلين بابا يرفع صوتة علية
وهسه؟
اني بأخس مكان واقذر بقعة
يمڪن ما اعرف شنو قذارة هذا المڪان من جنت صغيرة بس اخ من كبرت واستوعبت اني وين عايشة وبيا زبالة؟(حشاڪم)
طفولة اخس ووية ناس اخس ڪدام عيني صارت هوايه شغلات مستحيل الناس الطبيعية تسويها
عيني شهدت على هوايه احداث دمرتني ومدرت الڪُل
المفروض هذا اطهر وقت امر بيه بسسس.....؟
هذا اوصخ وقت مريت بيه
.. ااخ يا وجع روحي..
... بداخلي شهڪة تهد شيوخ عشيرة...
شنو ذنبي اذا اتريد. اتخيلني جوة ايدها تحت رحمتها؟
ليش اني من بين الڪُل
رفعت راسي ما اشوف بعيوني بوضوح من الدموع والبجي سندت راسي على الحايط واتخيل هسه لو بحضن امي مثل ڪُل بنية بعمـري
اتخيل يجي بابا من دوامة ويفتحلي ايديه واني اركض احضنة ويشيلني ويفتر بية
لو بيبي من تجي من مڪان تريدني انزعها جواريبها وامرخ رجليها وهيَ تڪعد تحجي الامي شنو سوت ومنو شافت
ياترى هسه شنو حالهم وبابا رجع من الدوام لو لا
وماما وبيبي وينهن
من بين التفڪير الزايد والتعب والضرب غمضت عيوني والتجأت للنوم
كعدت الصبح على ضربات خفيفة بوجهي وضحك
فتحت عيوني ببطئ لڪيتها شُذير فاتحة حلڪها وتضحك وتباوع الي
ومن ڪثر ما فاتحة حلڪها لعابها طالع ضحكت واخذتها الحضني الصغير
انفتح الباب ودخلت نورة واتربعت بالغرفة ما ڪدرت ارجع انام
ضليت فاتحة عيوني واباوع الهن شنو يسون
دخلت وراها خلود شايلة جدر صغير خلتة وڪعد
خلود... يلا نزعي
ضليت صافنة عليهن ونورة رفعت دشاشتها ونزعتها فتحت عيوني بصدمة وغمضت عيون شُـذير وصحت
تـــــاج.. عيبببب
خلود... هههههاي عيبيش حبيبتي بعد. يومين نلڪاج ويانة
تـــــاج... مو نفسجن اني
خلود... هه لنشوف تربية ابتهال شتطلع
نورة... شتطلع يمعودة دكتورة لو امام بمسجد حالها حالنة مو هاي كدامها ربتنة ابتهال
هزت ايدها وسڪتت كمت من مڪاني ورحت يمهن اباوع شيسون جانت نورة ضالة بس بدشداشة قصيرة ومادة رجليها الها
تـــــاج... شنو جاي تسوين الها
خلود... شيرة
تـــــاج.... وين امجن؟
مجرد ما كلتها انفجرن بالضحك حسسني كايلتلهن نڪتة
ضليت صافنة عليهن وهنا كل ما يشوفني يضحكت
تـــــاج... شبيجن ترا بس داسئلجن
خلود... بربج هذا حال مالت وحدة عدها ام؟
تـــــاج... لعد وينها؟
باوعتلي بنضرة ما اعرف افسرها ورجعت تشتغل نمت على بطني ورفعت رجلية وضليت اباوع الهن واسمع لسوالفهن وحته لو احسهن مو مناسبات العمري واصلاً ما افهمهن بس احب اسمع
تـــــاج... بابا جان ڪُلش يحب ماما
ما جاوبني رجعت حجيت
تـــــاج....ووين لسانجن لعد. بس بالليل ضحكتجن شعلوها
ما جاوبني غميتهن وكمت رجعت يم شُـذير تلعب بمكياجهن بدون صوت حته بلعبهه هادئة
تـــــاج.. اني احبج. بس انتِ ومن ارجع اخذج وياي اخلي ماما تسويج اختي
هزت راسها وهيا مو فاهمة كلامي
تـــــاج... انتِ تعرفين امج؟
شُـذير... تع اوحي بس اني اعب
(لا روحي بس اني العب)
تـــــاج... دروحي هوه منو جاي على العابج
باوعت على المكياج صدك حلو مثل مكياج ماما اخذت منهن وضليت اخلي لشُـذير وهيَ متونسة وتصفك
اانفتح الباب ودخلن بنات اول مرة اشوفهن هنا نزعن عبيهن وعيوني تتجول على ملابسهن بأعجاب باوسنهن البنات وڪعدن يمهن
تغريد... ما تدرين ابتهال اتعاركت وية مشتاق
رفعت نضرها خلود بسرعة وحجت
خلود.. ليششش؟
نورة.. اول تالي مشتاق يتعارك. وياها
خلود... احجن فتيتن ڪلبي
ياسمين.... وشبيج هالكد مهتمتة؟
خلود... اسكتي انتِ وعليج بشغلج ماطول اليوم انجمعنة سوة ما نريد مشاكل وخلي اتعابنة توصلنة كاملة
ياسمين... هه عاد من حلات الشغل النشتغلة اشو نهز للرايح والجاي
تجاهلهته خلود ورجعت تحجي وية الي اسمهه تغريد عن مشتاق
تغريد.. ما ادري والله بس سمعت على اساس ناقصة من البضاعة وقاسم شاك بمشتاق
كمت من مكاني بسرعة ورحت كعدت يمهن خليت ايدية على خدي واستمع لحديثهن
نورة.. من شوكت البضاعة تنقص وليش توة يلا حجة؟
ياسمين... ما ندري يمعودة هذا قاسم لا تشوفينة على سڪتة اذا خلة واحد براسة ما يطلع صاحي
تغريد... طكت روحي اريد ارجع لبغداد.
تـــــاج... اني هم من بغداد
اتوجهت الانضار الي وڪُلهن سكتن
ياسمين... هاي من ليمتة هنا؟
تغريد... عزا بس لا توصل كلامنة لأبتهال
هزيت راسي بلا
تـــــاج... لا اصلاً ما احبها
نورة... حبتج حية
تـــــاج.. ميخالف بس جاوبني انتن هم بغداد؟
تغريد... لا من كافة المحافضات شطلبين موجود
حجتها وضحكت ضحكن البنات وكامن كلمن على شغلها شي اشسور شعرها وشي تخلي مكياج واني بس اباوع الهن واسأل مرات يجاوبني ومرات يغلسن باوعت الشـُذير ملتهية تلعب لو تصفك على الاغاني الي مخلياتها
شفتهن ڪُلهن ملتهيات ابتسمت بخبث وطلعت برة الغرفة البيت يصفر وماكو صوت بس صوت ضحكهن والاغاني
مشيت حافية على برودة الكاشي اعتبرتها فرصة وسرعت بخطواتي برة
طلعت من المطبخ واستغربت الباب مفتوح
اتجاهلته واجيت اطلع بس انتبهت على الدرج رجعت بخطواتي يمه
عبارة عن درج طويل بس ما اڪدر اصعد الة لأن مخلين باب بأولة
الشمس طكت بعيني واني لا زلت اباوع فجأة سمعت صوت فتح الباب الرئيسي واصوات جاية بأتجاه الكطارمة على السريع لبدت جوة الدرج وضميت رجلية الصدري، حبست نفسي وصرت اعد الدقايق وكُل ساعة اكول راح يشوفوني
اذا كضتني ابتهال تنهيني بلعت ريڪي وهدأت
صوت خطوات تجاه الدرج. بس لأكثر من شخص فجأة وكفت وبدو يحجون من خلال اصواتهم عرفتهم
قاسم... اريدك الليلة توكف هنا على ما اجيب حارس
مشتاق... من ليمتة انتَ اتخلي واحد يحرس بيتك؟
قاسم.. الي هنا كلهم جلاب وما الهم امان اولهم انتَ
مشتاق... اذا هيج الحجي ليش مأمن بية؟
قاسم... لأن اعرف عقلك بشنو يفڪر وايدك قبل لا تنمد تنكص
ما رد عليه مرت فترة وما اعرف اذا مشتاق بعدة او لا
ضليت محبوسة هنا ولا عندي جرأة حته اخاطر واطلع والحر كتلني واحس دبڪت
مشتاق... ميوو بززز اكو بزونة جوة الدرج لابدة
حبست انفاسي ولميت رجلية الي اكثر
مشتاق... اطلع الجلب الياكلك ذبحناه
اطمنت من خلال نبرة صوتة مديت راسي وحجيت
تـــــاج... وينها ابتهال خاف تشوفني؟
مشتاق... ماهي بالبيت
طلعت بسرعة ونكثت ملابسي باوعتلة وحجيت بأمر
تـــــاج.. اسمع لا تكول الهم جنت هنا
مشتاق... شبي وجهج منفوخ؟
تـــــاج.... عمتك ابتهال نفختة
مشتاق... ليش؟
رفعتلة ڪتافاتي واتعدية اجيت اعبر وصاح
مشتاق.. اوكفي تعاي تعاي
التفتت الة ورجعت يمة نزل المستواي
نزل المستواي وحجة
مشتاق.. انطيج هديه وتوصلين رسالة لخلود؟
تـــــاج... ما اثق بهدايتكم قبلها ابتهال كالت انطيج هديه النوب خوش انطتني
ضل صافن لفترة ورجع حجة
مشتاق.... موش لسان عبالك بندقية عمايرچي بوية منين انتِ؟
تـــــاج... بغداد
مشتاق.. اها تشرفت وانا من البصرة
حجاها ومدلي ايدة خليت ايدي بأيدة وحجيت
تـــــاج... وين صايرة هايه؟
مشتاق... منيه؟
تـــــاج.. البصرة
مشتاق.. هههه بالعراق
تـــــاج... شنو بالعراق ما فهمت
مشتاق... محافضة بالعراق شلون بغداد محافضة والناصرية
سكتت مو فاهمة كلامة
مشتاق.... ها شڪلتي؟
تـــــاج... انطيني الهدية اول شي
اشر على عيونة وطلع جكليتة من جيبة ابتسكت واخذتها بسرعة
تـــــاج... انطيني بعد وحدة لأختي
عقد حواجبة
مشتاق.. اكو وحدة وياج بعد؟
تـــــاج.... اي شُـذير
هز راسة وطلع وحدة ثانية اخذتهن منة
تـــــاج... يلا انطيني رسالتك
طلعهة من جيبة وانطاها الي
مشتاق... الة بأيدها خوش؟
تـــــاج... تمام
مشتاق... بوسيلي اياها
تـــــاج... ليش؟
مشتاق.. ههه عوفي الليش وسوي الكتلج عليه
هزيت راسي وركضت جوة شديت قبضتي على الجكليت والرسالة
دخلت للغرفة الي كاعدات بيهن البنات انتبهن الي وحجت نورة
نورة... وين وليتي هاي ضلت تبجي عليج
باوعت الشـُذير عيونها حمر وتشهك شافتني وكامت الي وانفجرت بالبجي ركضت الها شلتها وانطيتها جكليتة سكتتها ورجعت نزلتها باوعت لخلود ملتهية بشعرها رحت ندستها وهمست
تـــــاج... خلود.... خلود
جاوبتني من غير لا تباوع الي
خلود... شكو
تـــــاج... عندي شي الج
خلود.... شنو؟
تـــــاج... ما اكدر كدام البنات
عافت قلم الكحل واشرتلي حته نطلع طلعت وطلعت وراها
خلود... احجي شعندج؟
انطيتها الرسالة وحجيت بهمس
تـــــاج... هايه من مشتاق
حجيتها وضحكت بهمس وهيَ اتغير حالهه والضحكة شكت حلكها لدرجة اول مرة تضحك من غير هههههههههاي
خليت ايدي على حلكي واضحك بسكتة
بعد مدة من حالة التحول الصار اشرت الها حته تنزل المستواي
نزلت وطبعت بوسة على خدها
تـــــاج... هايه من مشتاق ولو ايع
زادت ابتسامتها ورجعت باستني
خلود... ولي يلا
اكلت الجكليتة على كيف حته لا اتخلص صارلي فترة طويلة ما ماكلة حلويات
رجعت كعدت بالغرفة واباوع للبنات وشُـــذير يمي تلعب
دخلت ابتهال هيَ وعبايتها عبالك حيوان الرفش الجان بابا يسولفلي عنة
ابتهال.. كملن يلا الجماعة على جية
نورة... ما عدنة شي
ابتهال... جبت الجن ملابس جدد لا تفشلنة الجماعة جايين من مكان بعيد
تغريد... بعيونة نخليهم
خلود... قصدج من عيونج نحميهم
ابتهال... بس كافي... يلا كملن
طلعت ابتهال وهنا بدلن كدامي بدون مستحة بس اني ما اكدر اباوع استحي فأغمض عيوني وعيون شُذير
كملن وطلعن وانقفل علينة الباب
اتأخر الوقت ونعسنة نامت شُذير جفي على وجهه واني هم سبلن عيوني ونمت متفاددين الهوسه الصايرة برة والرخص ملتجأين لعالم طاهر
فزيت من نومي بسرعة من حسيت راح اسويها على نفسي خليت ايدي على فراش شُذير حته اسند نفسي و اكوم واتفاجئ لفراش مبلل عرفتها بمللة نفسها
غطيتها وكمت واني افرك رجل برجل حته لا اسويها خليت ايدي على يدة الباب وانفتح فرحت وطرت عبالك صار افراج
لأن كُل مرة ابتهال تسد الباب بس هالمرة مفتوح مخليتة ما اعرف ليش بس هيَ من رجعت العصر مو على طبيعتها
طلعت من الغرفة ومشيت للحمام الي صاير قريب على المطبخ
اجيت ادخل واستوقفتني حركة برة بلعت ريڪي بخوف وعفت الحمام مشيت بأتجاه المطبخ ودخلت الة لكيت الباب مفتوح فتحة صغيرة
اتخطيت كم خطوة ووصلت مديت راسي وجفلت من شفت
ولا زالت الحڪاية مستمرة
الى هنا زهـراتي وانتهت العثـرة الثانية
توقعاتكم؟
+زهوراتـي انشروا الرواية بڪل مڪان 🤎
تصبحون على الف خير