قيود عشك الشيخ

قيد الثاني الجزء2

‏حسبالي حبك صدك
وعيونك تحبني
ثاريني مثل الورد
من اذبل ذبني...
♡&

﹌﹌﹌﹌﹌﹌﹌﹌﹌﹌﹌﹌﹌﹌﹌

ايــة::- ضليت كاعدة لليل ما نزلت وهو حتى ما كلف نفسة يجي يصالحني انا ما كلت شي خطا هي هاي كلمات عمة جميلة دائما تكولها النا جا واذا كلت كح*** جا هو على اساس ما سامعها لو ما يعرفها بس هو يحب المثاليات عود يابة لا تغلطين وعيب ولله يا الله

سمر بعد ما اجت خاف البت تسرسحت على ايسر وفضحتنا كمت اريد اشوفها لاكتني عمة سهى والهم تارس وجه انقبض كلبي::- ها عميمة مالج شنهي ويهج ينطي الوان

جرت حسرت وباوعلتي وصفنت بوجهي دقايق واردف::- لالة حبيبتي كل ما بالموضوع رجليني ويعاتني

::- عمت عين الوجع ريتة بية كعدي لا تكومين

ابتسمت::- يا بعد افادي انتي ولج ام لسان صح من كالو لسان عالي وكلب خالي ماكو اطيب واحسن من كلبج

ابتسمت::- اكعدي اجيبلج مرهم لريليج

ردت اروح اردفت وهي تلزمني::- كعدي عمة اخيتج نامت هساع لا تفززيها

عقدت حواجبي::- منو سمر??

::- اي يمة نامت وكالت لا تكعدوني

::- شنهي مالها البت ما من عوايدها تنام هل وكت خل اروحن اشوفنها شبيها

لزمتني مانعتني::- كتلج نامت هساع خليها خطي ترتاح وراها دراسة

ظلت عيني على باب سمر ما تنام ولا تحب النوم هذا كل احنا نام بالنهار الا هي  تنام بس بليل مدري منين متعلمة هل سوالف انا شوكت ما الكة مخدة احط راسي وانام عسما ستوني كعدت والمشكلة اغط اغط وارجع اكول نعسانة

نزلنا سوة انا وعمة سهى لاكانة ايسر على درج يسحل بروحة سحل تعبان ما اعرف رغم الزعل رف كلبي علية

بس هو تجاهلني سلم على عمة سهاوي وعبرني كل مرة يكلي تعاي حظريلي ملابسي وجهزيلي الحمام هل مرة ابد

عيوني دمعن من القهر باوعتلي عمة واردفت::- ها يم السان شمفينة مالة ايسر كالب ويهه عليج

اردفت بحركة::- عساه كالبة دوم

جمدت من سمعت صوتة وراي هو يكول::- عفية عفية بـ بنيتي

التفتت واشوفة قابض ايدة بقوة ويباوعلي بخزر كسرت عيني ودنكت باوع لعمة واردف::- كائن من يكون ما اريد يصعد للطابق الثالث تعبان واريد انام الابرة اذا وكعتوها اسمعها لا طلعون خبالي

اردفت::- روح نام جفينا شرك

كالتها وسحلتني هو واكف على نفس الخزرة احس حطو جواي صمغ تجمدت وما عاد تحركت بعد سحلتني تغم بية::- مالج يم السان ما تعرفين تلزمين لسانج كون كتلج وانا ما اكدر افج حلكي

::- شنو تايهتلة ما عندي اهل...

كلتها واحس غصيت بالكلمة اي انا ما عندي اهل الي يطلعون وراي ويكولون ليش ضربت بنتي باوعتلها هي تندت ورفعت ايدها تريد تمسح دموعي دفعت ايدها ما قابلة سوينا عشة وتعشينا ووكفت اغسل ماعين العشة

دخل عمي ساجت جان عندة كعدة بالبصرة وراح الها ابتسمت من شفتة ورحت سلمت علية::- الله يساعدك عمو

::- هلا بيج بنيتي شلونج

::- الحمد الله

::- حضريلي استكان جاي من ادينج الحلوات

ابتسمت وهزيت راسي ورحت للمطبخ احظر استكان جاي هو وعمة جميلة وسهى كعدو بالصالة يسولفون عن المشكلة الي صارت

حطيت الهم الجاي شوية ودخل فهد اخو ابتهال عمرة اربع سنوات تقدمت ناحيتة وابتسمت جريتة ابوس بي::- ها حبيبي شو وحدك

::- لا اجيت وي اهلي هساع يجون

::- وابتهال اجت

هز راسة وادف::- اي

ابتسمت شوية ودخلو عمو سلام وخالة فاطمة وابتهال ركضت لخالة فاطمة حظنتها::- بعد روحي روحج عزيزتي وبنيتي الحلوة

::- شلونج خالة

ابتسمت وكالت بحنية::- بعد رويحتي ريحة الغالية انا زينة من شفتج يبعد طوايفي

ردت ابتهال وهي تاكل بلفة جبن هاي البنت راح تنفجر من كد ما تاكل سمنانة بشكل فضيع::- جا الغزل بس لست اية وانا يمة

::-وغمة التغمج وتغم امج خايبة جيبي اللفة مالج ملكوفة

جرت اللفة من ايدها وابتهال تصيح::- يمة ولله ما شبعت صابتلي بس ماعونين ادري شنهي انا عصفور

::- وكابلتي اخوج واكلتي ماعونة وكملتي بالجدر وفوكاها سويتلي لفة ولج يمة مالج بطنج مزروفة شنهي الصابج

انا اظحك عليهم وخالتي تحجي بحركة دخلنا لجوة جريت ابتهال اسولف الها على موقف اليوم ولحجي بحركة كالت::- خايبة ويعة روحي فد عرمة انتي شلون هيج تكوليلة يمة ما ستحيتي

::- غير سامعتهن من عمة جميلة

::- خايبة اي افتهمنا من جميلة جا ترحين تكوليها كدام ايسر ولله زين ما ذبحج

سكتت ضايجة كلها تلومني هي من شافتني هيج اردفت::- بس مالة لزوم هل حجي والقساوة اوي

ضحكت دخل ايثر اختفت ضحكتي هل ولد من يوم يومنا ما نتصافة رغم هو حباب حيل وي ابتهال وسمر ويحبهن الا انة لا وهو يطيقني ولا انا اطيقة ما اعرف ليش كيمة التنافر بيناتنا رغم لا هو عندو شي وياي ولا انا

باوع لأبتهال وكال الها::- ها بونبي

ابتسمت::- هلا بعود البخور شنهي هاي سمنان

::- يا الله يعني صارت بية لحمة

::- لا زين زين يمكن فاد وياك الجيم

::- اي ولله احس جسمي متحسن

ضحكت::- غير جنت فلم ضيييف حيل وطولك 180

ابتسم هو يباوعلها اردف::- جا شتكولين على ايسر واصيل واحد 185 والثاني 190

::- لا ذولة وضع خاص

ضحك وهز راسة باوعلي خزرني رديتلة الخزرة ونترت بي::- عيونك لا اشلعهن واحطهن ب ايدك

ضحك::- ولا تكعد ام الهبن

::- مستهين بية لو شنو اسويها وربك

::- بابة استرخي

عافني وطلع تفلت وراه شكد اكرهك باوعتلي ابتهال::- ها شبيج صافنة

::- ترة اثير كيوت وطيوب مالج وياه

::- هي المحبة مو من الله?!!

::- اي

::- انا اكرهه من الله

::- الله اعد

ضحكنا سوة ورحنا كعدنا وياهم اردفت ابتهال::- شنهي سمر مالها حس

::- نايمة

::- ها

::- اي

::- اية شفتي مهند وسمر اليوم

::- مو تدرين اليوم ايسر هنا واذا عرف بية اتابعهم يعرس على راسي ما يقبل

::-يااا ولج غير تخبل حلقة اليوم

كعدت تسولفلي على حلقة اليوم مال العشق الممنوع وانا فاكة حلكي مترين واستمتع من اشوفها

شوية ونزل ايسر سلم وبقى شوي يسولف وياهم وطلع نزلت سمر العيون منفوخة وروحها رايحة كمزت الها لزمتها

::- سمورة مالج

::- تعبانة اية ما بية شي

::- تعالي كعدي هنا

اجت سلمت وكعدت ويانا احنا نحجي وهي بالها مو ويانا طول الكعدة وانا عيني عليها وبالي يمها

شوية واجة ايسر ابتسمت وانا اشوفة بايدة ثلاث علاليك كل مرة من يجي يجيب علاليك النا احنا الثلاثة اكيد راح يصالحني بعلاكة حلويات ومن هذمي الاحبهن

بس سرعان ما اختفت ضحكني من شفتة جايب بس ثنين وحدة انطاها بحظن ابتهال والثانية بحظن سمورة الي ابتسمت غصب عنها وردت بهدوء: :- شكرا ايسر

ابتسم الها الكل صارت نظراتهم علية احس اختنكت حيل والدمعة صارت بطرف عيني درت وجهي اسوي روحي نشغولة واسولف بس اكو شي ياكل بية حيل ضجت

ما طولو لان عدنا امتحانات شوية وراحو صعدنا لفوك انا وسمر اردفت::- اخذيهن ما اريدهن بس لا تزعلين هسة يتندم ويجي يصالحج

هزيت راسي بخنكة واردفت::- لا ما زعلانة رايحة اسبح

اخذت ملابس وطلعت للحمام لاكاني بالممر ولا كانو شافني خلة ونزل لجوة وانا كلبي احس فرفح متت متت ما اتحمل فكرة زعلة علية ولا بية اروح واصالحلة دخلت للحمام وشبعت بواجي من طلعت هم لكيتة بوجهي بس هل مرة انا الما عبرتة ولا باوعتلة اصلا

دخلت وركعت الباب بوجها وانا روحي مفرفحة فزت سمر اردفت::- شبيج اية مو نايمة

::- اعتذر ما ادري

تنهدت وبقت ساكتة باوعت علاكة يم راسي عرفتة هو الجابهن اردفت بقهر::- منو الجابهن هذتي

::- ايسر انطانياهن وكال هذني الها

متت من الحركة اشايفني ميتة على حلوياتة شمرت الخاولي من على راسي واخذت العلاكة وصعدت للطابق الفوك اول ما صارت غرفتة كدامي فتحتها بدون مقدمات

جان واكف مقابيل المراية ولابس بس بجامة ومن فوك عاري اردفت بهدوء::- حلوياتك ما ميتة عليهن اخذهن

اردف بنتر::- شلون ادخلين بدون لا ادكين الباب مو جنت ابدل لو مصلخ وفايتة علية

احس روحي صخنت من الفشلة دنكت واردفت::- انت الصوج منك غير تقفلها

::- ها هسة الصوج مني??!!

بجيت وعطت بي::- اي الصوج كلة منك شنو معناتها تفشلني كدامهم وبعدين وتجي وتجيبلي بعازة حلوياتك انا بعد لا اريدك ولا اريد حلويات

ردت اروح واطلع ما احس الا سحبني من ايدي طبكني على كنتور باوع لشكلي واردف::- ليش ما لابسة حجاب ولجججج????

بجيت اكثر::- لااا تصييح انااا موو زعطوططةة

سكت انفاسة مقابيلي باوع لشعري الي يقطر مي دار وجه يستغفر وانا احس جمدت غرفتة ثلج ثلج وانا منا سابحة ردت اطلع اردف::- اخذيهن وطلعي

::- ما كلشي ما اخذي وراح اروح لاصيل اوصي

رجع سحبني علية وهل مرة مرد حلكي ب ايدة مرد دموعي تنزل وهو خازرني اردف صاك اسنانة::- لا تستفزيني اية طلب من غيري ما اطلبين الا اذا انا ما موجود او متت

دفعت مفرفحة احس شفايفي صارن ببهن نار رفعت ايدي واشرف دم صار باصابيعي شهكت هو واكف مخنزر باوعتلة واردفت::- اكرهك حققييرر اكرهك ما احبك

رجع علية سد حلكي وانا ارافس سحبني من خصري علية والايد الثانية خالها على حلكي وانا جواه ارافس دفعني على جرباية واردف::- انطمري وحق داحي الباب حجاية وحدة اسمعها منج ما يصير خير انطمري هسة

خفت منة ومن منظرة تغطيت باللحاف ونمت وانا اشهك شفايفي يوجعني غطيت حتى راسي وهو بس يجر حسرات ما اعرف شنو يسوي

هدئت من بعد فترة بقت بس الشهكة متعلكة ببلعمومي. هو ما الة حس حسيتة طلع وسد الباب وراه شوية ورجع غمضت عيوني ونمت

كعدت ورة فترة على طكطكة يمي رفعت راسي بثكل تعبانة وعيوني منفوخة وراسي احسة ثكيل صخونة موتتني نمت على سبلت

جانت الغرفة فارغة باوعت لكيت سمر نايمة يمي كمت طلعت من غرفتة كارهتة هو وياها كوة مفتحة عيني ما اعرف بيش الساعة بس الفجر جانت

لاكاني اصيل وايسر كاعدين بالصالة هو شافني اطوطح طفر خلة الخاولي على راسي واردف بخزرة::- شبيج وين طالعة

دفعتة بخفة من صدرة احس روحي تطلع منها نار وعيوني ذبلانات دخلت للغرفة اسمع بس الهوسة ما اعرف شكد مر وقت شوية واجت عمة سهى

لزمت كصتي واردفت::- يااا من فلك فلكني خايب ايسر البت واجة نار

دخل واردف بخوف::- شنهي ناخذها للمستشفى

::- مالها لزوم بس انزل بالمطبخ اكول حبوب التهابات وخافض حرارة جيبهن وتعال تلكاهن بالصيدلية

هز راسة ونزل لجوة شوية واجة كعدت على طرف السرير ولزمت الدوة اعرف هل دوة طعمة مر ما حبة

رادت تشربني ما شربت دفعت ايدها واردفت وانا اغطي راسي::- ما اشرب طلعو برة اريد انام

اردف بنتر::- تأدبي ولج وكومي شربي علاجج

::- ما اشرب وخاصة انت اطلع برة

ما احس الا نرفع الغطة ونذب على وجهي ماي ثلج انا شهكت بقوة هو واكف خازرني اخذ الدوة من عمتي سهى وتقرب عصر فكي كمت ارفس جواه وعمتي تصيح

::- موش هيج خابب

اردف::- هي مو مال عين واغاتي راح تنشمر من كد حرارتها وتعاند وي روحها تريد تشلع كلبي

سكتت شربني وانا انهاريت::- اطلع برة اكرهك ما اريدك اطلع برة

خزرني وطلع روحة مفرفحة مثلي وازيد ظلت عمتي سهى يمي نامت على جرباية سمر وانا هم رجعت نمت

ثاني يوم كعدت احسن بهواي تمغطت ونزلت لجوة كاعدين اصيل واثير وايسر يتريكون صبحت على الكل وتجاهلتة هو يباوعلي ساكت ما حجة شي

جنت لابسة ججابي شامرتة شمر اردف اصيل::- خوب نزعي هذا شعرج واضح

ابتسمت ونزعت االحجاب خليتة على متوني اعرف بهل شي غلط بس عنادي وقهري من عندة عماني

راد يحجي نزلت سمر وصبحت علينا سكت يباوعلي مخنزر وهم من شافوني نزعت حجابي دنكو راسهم الا هو بس يخوزر بعيونة الخضر

كعدت سمر يمي لزمت ايدي وباستها ابتسمت على حنيتها طفر اصيل واردف::- صباح الخير سمورة

هي ابتسمتلة بخجل واردفت::- صباح النور

سكت يباوعلها مبتسم اردف::- شلونج بالسادس محتاجة شي

::- لا سلامتك

جر حسرة وبقى ساكت ما نطق شي بس عيونة ما شالهن منها وهي ما تدري شصاير نكزتها باوعتلي مستغربة ابتسمت واردفت::- شصار وياج البارحة بغرفة ايسر??

بهت وجه وغيمت ستغربت حالتها سكتت ما حجت شي عيونها علية هو مدنك ياكل بكل هدوء نزلت عمتي سهى فحطانة من الدرج اردفت::- صباح الخير حبايبي

الكل::- صباح النور

باوعتلي وابتسمت::- شلون صرتي حبيبتي

::- زينة عماتو الجميلة

ضحكت وراحت تسوي ريوك وانا صحت وراها::- عمة اريدن بيض من اديناتج الحلوات

ضحكو الكل الا هو مخنزر بية وانا ميتة خوف ما اعرف هل صلافة والجرئة منين اجتني بس بعد مشيت بهل طريق لازم اكمل بي لا انكتل

كام واردف::- سمورة اتصلي ب ابتهال اليوم اطلعجن مدام عطلة وانا هم ما عندي شي

سكتت سمر تباوعلي احس نار تطلع كامت مني باوعلي واردف::- بس انتن واليحب يجي هلا بي ما نطردة خوش سمر

هزت راسها بتوتر واردفت بخفوت::- خوش

عافنا وطلع احس روحي جمرت من القهر عيوني كامت اطلع نار بس مقاومة ما اريد ابجي شيحس بالله من يسوي هل تصرفات وياي ها?? يدري بية انهضم الا واحد اهتم بالبنات وتركني يدري ما عندي اهل واستهضم الحجاية

كمت صاحت وراي عمة::- تعالي تريكي

::- ما اريد سم

طلعت لبرة ونزلت دموعي على خدي شكد اتمنى وجودكم وياي شكد اشتاق الكم رغم ما شايفتكم يجوز ما لحكت على حنيتكم بس احسكم ترافقوني بكل مكان بوية يمة حيل مشتاقة اشم عطركم اتمنى حالي حال البنات من ارجع من المدرسة امي تتلكاني وتحظني وانا اشم ريحتها اتمنى ابوي يكعدني ويعلمني الصح من الغلط

شكد افتقد حس امي وابوي وشكد اتحسر من اشوف صديقاتي يحجن باهلهن صح هم ما مقصرين وياي ابد بس لو امي وابوي عايشين جان ما رضو بـ تصرف ايسر وهم طلعوني جان ما احتاجيت احد

ردت من عندة اهتمام وردت من عندة حب الاهل بس خذلني واذاني ظليت كاعدة لوقت طويل والشمس طلعت وكامت تصكع بية وانا على كعدتي لا كمت ولا تحركت

الا من شفت ابتهال دخلت وذاك اللبس وعطر سابقها وقتها من صدك كرهت ايسر كره العمة حيل ضجت من تصرفة وحسيت نفسي منبوذة بين اهلي

شافتني كاعدة اجتني تضحك وفرحانة وصلت يمي واستغربت حالتي اردفت بعدم فهم::- ولج ليش لهسة ما مبدلة وثول

ابتسمت الها بغصة ما حبيت ابين نفسي ضايجة::- مالي خلك اطلع

فتحت حلكها شبرين::- ولج اول تالي ما تحبين اطلعين انتي لو على فراش الموت ويكولولج خل نطلع تكومين واطلعين

::- اوووف ابتهال لا تلزكين ما اريد هل مرة وبعدين انا مصخنة

::- دكومي بدلي ولله عبالي ترحين هل بدلت واجيت ولله فلا اطلع وي ايسر وسمر عييع

::- شبيهم ولج ما اسمحلج

::- خاب دولي انتي وياهم واحد بس يخوزر يطلع الطلعة زقوم والثانية تمشي وتصيح حرام عيب عوزها بس تخلون عمامة على راسها

ضحكت من بين حزني::- ولله لو يسمعج

بعدهي تريد تحجي واجانا صوتة::- سمعتها

التفتت جامدة بمكانها عيونها بقلحت بي كامت تبلع بريكها ووجها كام ينطي الوان ضحكت كبس هو دنكت راسها تقدم ناحيتها كفخني عطرة غمضت عيوني احاول اصبر نفسي::- شنو تفضلتي ست ابتهال ما عاجبج اطلعين ويانا

ابتسمت بخجل واردفت::- لا اصلا الطلعة وياكم ماكو مثلها صدك جذب بس جاي نتشاقة

هز راسة واردف::- زين

باوعلي درت وجهي من عندة اردف بنتر::- كومي بدلي

باوعتلة وعيوني تجمعو بيها الدموع::- ما اريد

عفتة ودخلت لجوة لاكاني اصيل وسمر يمشون شافتني سمر لزمت ايدي واردفت بتوسل::- تعالي ويانا حجيت وي ايسر وكال خل تجي

عطت بيها::- منوو كلج انا اريد اطلع

صفنت بوجهي وانا منهارة جسمي كلة يرجف من القهر عفتها وصعدت لفوك احس اعصابي ترجف شنو تحرمصلة حتى اطلع وياهم وبالناقص منة ومن طلعتة ما اريدها

ضليت كاعدة وابجي منا لمن سمعت صوتهم وهوستهم اجو كمت اخذت ملابس ما اريد واحد يشوف عيوني وخاصة انا من ابجي يضيعن عيوني ينفخن نفخ

دخلت للحمام فتحت الدوش احس وجع بكلبي مهضوم وبلعومي يحركني اريد ابجي اريد العبرة تروح ماكو

مو مشكلة الطلعة عندي البعض راح يفكرون ابجي لان ما طلعوني وياهم لا انا بطبعي حيل حساسة واستهضم ليش عزمهن وما عزمني ليش طلعهن وما طلعني لبش يعاملهن بلطف وانا كلة بصياح

اجاني صوت سمر ادك بالباب::- ايوتة

::- ها

::- انت بالحمام

::- لا انا بالغرفة بس هذا الجني مالتي جاي يسبح

::- برد حيلج الدنيا مغرب وانتي بالحمام اطلعي لا تحجين بهل سوالف

::- روحي سمر

::- شبيج زعلانة مني

::- سمر تردين اشرحلج وانا بالحمام يعني?!!

::- تمام منتظرتج بالغرفة

سكتت ما رديت عليها وهي هم اختفى صوتها شوية واندك الباب عطت::- سمر شبيج مو جاي نسبح الله اكبر حتى بالسبح ما تخلون الواحد براحتة شوكت اموت واخلص منكم شوكت

اختفى الصوت وما عاد دك الباب ما اهتميت بقيت اسبح منا لمن خلص المي وطلعت لافة المريول على جسمي ركضت للغرفة لكيت سمر نايمة على جرباية

تنهدت اكيد زعلت لان صيحت عليها بس شوكت لحكت تنام هستوها دكت علية الباب غطتها واخذت الفير وطلعت

خليت الفير وستوني اريد افتحة طلع اصيل بس شافني بالروب عاط::- خرب غيرتج يولو لبسيلج شي يسترج لا يشوفج ويسولنا عرس

خليت الخاولي على راسي واردفت::- شتريد هسة
رجع مد راسة بس شافني خليت الخاولي طلع::- يول لا تستفزينو ما تعرفينو خبل يروح يعمل بيج شي ساعتها شراح نكدر نسوي

::- اي طبعا مو ضالة الة ملطشة لا ام تطلع وراي ولا اب

اختفت ابتسامتة وتقرب اردف بحنية::- له له شنهي هل حجي بوية جا واحنا وين رحنا

سكتت فكي يرجف تقرب سحب ايدي وراسي باسها::- ليكون متكدرة لان ما طلعوج وياهم

هزيت راسي ب لا ونزلت دموعي عقد حواجبة بغضب وصفك ايد ب ايد::- ولله اشكة نصين يول هل كد مضوجج

لزمتة مانعتة يروح الة::- لا تعال بس انا اليوم ضايجة

سكت يباوعلي ما مقتنع::- يول شنهي غزالتنا تبجي دنعل ابو الطلعة باجر اطلعج وين ما تردين

ابتسمت بفرح::- و الله صدك

ابتسم::- والله صدك خاب شنعدي غيرجن انا

ابتسمت وبانت الفرحة بعيوني::- تدري بروحك انت ابن عم يشك

ضحك::- وانتِ بت عم خبلة وتجفصين

ضحكت::- هو مال اجفص اجفص بس مال خبلة لا ما اسمحلك عقلي يوزن بلد

ضحك بعدها باوع بأتجاه الغرفة وتحسر سكتت من شفت حزنة بعيونة اردف::- اليوم لاول مرة الحظ حبها!!!

عقدت حراجبي ما فاهمة::- منو?! شنو ما فهمتك?

ابتسم بحزن::- سمر تحب ايسر اليوم اول مرة اشوف عيونها تلاحقة وين ما يروح

احس تجمدت رجلية وخفت على سمر خاف يحسبها مو زينة سكتت منتظرتة يكمل اردف بحسرة::- حسبتها من هي وصغيرة الي تالي تحب غيري عيونها تفتر وراه وين ما يروح

توترت واردفت::- لا اصيل مو مثل ما انت فاهم كل ما بالموضوع هو انو سمر تعز ايسر حيل ما معقولة هيج السالفة يجوز فاهمها صح

هز راسة ووجه خيم علية الحزن والهم مرد كلبي::- لا شفت الحب بعيونها بس مو الي هذا الحب لايسر

راد يروح لزمتة من ايدة بخوف واردفت::- اصيل ما راح تسوي الها شي مو??

عقد حواجبة مستغرب اردف::- انا?? اية وهاي انتي تعرفيني اكثر وحدة اذي روحي وما اذيها تحجين صدك?!

سكتت عيونة مدمعة بس يحاول ما يبين حزنة بس ذاك هو مبين منكسر صعبة منا ابن عمك الي ربيت وياه طول العمر ومنا حبيبتك الي وهي صغيرة تحبها ورابين سوة

راد يروح صحت وراه::- وايسر??

الفتت مستغرب::- ايسر شنو??

::- ايسر يحبها لو لا??!

ابتسم وبعدها خنزر بوجهي::- مو انطيتج مجال

ابتسمت بفشلة صدك جني رحت زايد بس مدام ما حجة يعني يحبها::- هذا هو ساكتة

ابتسم وهز راسة بـ اي وراح ظليت كاعدة وافكر من جهة اصيل ومن الجهة الثانية اختي سمر وحبهغ ومن جهة ايسر

لا اكدر اروح واكول لسمر ايسر يحبج لان راح ادمر اصيل ولا اكدر اتجاهل حب سمر لابسر واكول الها اصيل يحبج ساعتها راح اشتتها وراح ادمر حب سمر وايسر

حايرة اتمنى ما اعرف هل اسرار ما اريد انحط بيناتهم واختار واحد منهم كلهم احبهم وكلهم يهموني ويهمني زعلهم صعبة علية اختار واحد منهم لان الثاني راح يتدمر

دخلت لجوة سمر رايحة بغير عالم نايمة رحت لفراشي واتكلب هيج وهيج منا لمن نمت كعدت ثاني يوم ساعة بالخمسة الفجر وقت الاذان كمت صليت ونزلت لجوة ضايجة وجوعانة بنفس الوقت هسة اروح اكعد سهى لو اروح لجمايل اكعدها يربي متت جوع

ظليت كاعدة بالمطبخ وصافنة ما بية حيل اكوم اسويلي شغلة حسيت بخطوات جاية الي ابتسمت اكيد جميلة كعدت للصلاة يلا جا خل اكربها بالريوك

ما احس الا دخل ايسر من شفت اختفت ابتسامتي حتى الجوع راح ردت اروح لزم ايدي سحبني الة لحظنة حظنتة وبجيت ضحك::- اخخخ من لسانج اخخ علعلتيني يول ولله علعلتيني

شهكت مهضومة::- ليش تسوي وياي هيج ها ترة ولله حرام عليك تدري بية ما عندي اه..

قاطع حجايتي واردف::- شنو هاي جديدة مال ماعندي اهل انجبي ولج ما عندج اهل شنو وانا وين رحت

::- انت كل اهلي ومن تسوي هل شغلات احس نفسي منبوذة بين اهلي لا تسويها بعد

::- هذا عقاب الج حتى ما تعيديدن الغلط والفشاير بوية زينة البنية بأدبها واخلاقها ليش ما تعرفين كلامج قبل لا تكولي فكري بي يلا تحجي بوية مو كلشي يخطر ببالج تحجي زط بط

::- انت هم علمني مو هيج تسوي بية تقهرني وتوجع كلبي ليش تعتمد اذيتي تدري بية احبك

بعدني جاي احجي ابتسم::- تحبين منو??

ابتسمت::- احبك الك انت ابويا وامي واهلي كلهم بس مو اختي لا عيب اتخايلك اختي وعندك كصايب وشوارب

ما احس الا دمغني على راسي واكتافة تصعد وتنزل يضحك من كلبة من شفتة هل شكل يلا ارتاحيت لان كلت راح احصلي كتلة معدلة ضحكت وياه على واهس علمود ما يكول هاي خافت اي جا شلون ما يصير نبين للناس احنا خايفين علمود ما يفترسونا انجبي انجبي اية وين كاعدة بغابة اسكتي احسلج وفكري بطريقة يخلي ايسر يعتذررلج ويطلعج

::- اعتذر يلا

::- ها صارت انا الاعتذر مو لازم انتِ?

::- لا انت الي لازم تعتذر مني

::- وليش بلا??!

::- لان صيحت علية وهضمتني

::- وياج زين منو غلط وكال كلمات مو حلوة بحق اي بنية

دنكت راسي بفشلة واردفت::- انا

::- ومنو غلط علية وكالي اكرهك

::- انا

::- ومنو نزع الحجاب وراوانا عطوبة

::- انا

::- ومنو طردني من غرفتة ويعاند

::- هم انا

::- هسة منو الغلطان انا لو انتِ??

::- انت

عقد حواجبة::- ليش?!!!!

::- لا صيحت علية

ضحك وكرصني من خدي شلعة شلع وانا اصيح::- وخررررر اوووييي

بسرعة رفع ايدة خلاها على حلكي مبتسم::- يول يمدهورة بلاية الاوي احنا مشتعلين لا تزيدين من ناري

::- شنو ما فهمت

::- احسن

::- يلا اعتذرلي علموود نتصالح

::- يلا يابة طايحة هاي الج اعتذر منك تاج راسي

ضحكت::- مقبولة ايسري انت

ضحك وعيونة ذبلت اردف بخفوت::- روح ايسرج انتي روحة

ابتسمت باوعت للمطبخ ونزلت ايدي لبطني واردفت::- شنو هسة جوعانة ما توكلني من اديناتك الحلوات

::- تدري بروحج لوتية وحيالة مو?

::- ادري

::- وتدرين بية ضعيف كدام الحجي العسل مو?

::- هم ادري

ضحك وراح باتجاه الطباخ مبتسم اردفت::- ايسري

::- روحــة

::- لو لو لو لو ...

::- اختصري

دنكت اعظ بشفتي خجلانة من عندة اردفت::- انت هم تحب

::- احبج الج

::- ههههههه لا ادري تحبني الي بس يعني حب حب يعني تحبها وتزوجها

سكت يتحسر وانا ما لحيت وياه اخجل من هيج مواضيع بس ضلت ببالي رجعت كلت بخجل::- ايسري

::- روحـــة

::- ما كتلي

::- شلج بهل حجي بوية عيب مو الج

::- مو تكول الحب مو حرام

::- مو حرام وياج بس اذا كان ما يعارض قانون الديني

::- شلون يعني

::- يعني تحب شخص من بعيد لبعيد لا اكو مراسلات ولا مواعدات حب نظيف طاهر نيتك وياها حلقة وزفة هيج راح الله يوفقك وتاخذها اما عن حب هسة مراسلات ومواعدات هذا لو يجتمع اهل الكون كلة ما راح ينجمعون لان كلشي اساسة غلط فهو غلط

::- زين شنو رايك بالبنية الي تراسل حبيبها

::- اكلج شغلة وحدة ما احب احجي بهل مواضيع بس مدام فتحتي هل موضوع نحجي بي مو مشكلة

هي من تحجي وياه بدون علم اهلها مو صح?

::- اكيد ليش وين اكو بنية تحب وتروح تكول لاهلها انا احب فلان واراسلة?!

::- تمام خلصانين مدام تراسلة بدون علم اهلها يعني غلط وهي تعرف بهل شي غلط يعني هذا لو صح ما سوتة بالسر

فكرت بكلامة وصفنت شوية التفتلي وانطاني اللفة الجبن وكلاص حليب ابتسمت واخذتهن من ايدة سحب كرسي واردف::- كلشي نسوي بالسر معناتها غلط اذا جان صح جان علنة عنا وسوينا كدلم العالم كلة

ليش هسة المتزوجين يمشون ايد ب ايد كدام العالم كلها بدون خوف وقلق

وتلاحظين الي مرتبطين بعلاقة يمشون مرتبكين وخايفين

سبحانه الي رفع وقدس الحلال وابغض الحرام

ابتسمت واقتنعت بكلامة::- انت لو تعوف السلك العسكري وتصير بالحوزة احسلك

هز راسة وابتسم ظلينا كاعدين ما احس الا صوت صريخ نسوان بالشارع احس كلبي راد يوكف وهل صريخ جاي من بيت عمو ابو سلاااام??!!! .......يتبع

الفاتحة على روح المرحوم عبد ابن هدية 💔

اقرو الفاتحة واهدوها لـ روحة واكون ممنونة منجن 💔

حسابي الانستكرام الجديد 🩵