A/N:
Maine kuchh curse words (only english) use kiya hai strong and intense emotions dikhane ke liya taaki ye zyaada realistic lage aur inka gussa ya frustration express ho sake. Main maanti hoon ki bina curse kiye bhi log jee sakte hain (main khud curse nahi karti hoon), par kabhi kabhi, hamse ho hi jaata hai.
--------------------------------------------------------------------------------------------------------------------------------
Haldi ki rasm shuru hoti hai. Ek- ek karke sab Kunal ko haldi lagate hain. Bagal mein Aarohi ko bhi haldi lag rahi hoti hai. Dadi, phir Kunal ke parents Sonia aur Raj, aur phir Maya pehle Kunal ko haldi lagate hain uske baad haath dho kar Aarohi ko haldi lagate hain. Baaki rishtedaar bhi dono bhai- behen ko haldi lagate hain.
Anshuman aur Veer bhi Kunal aur Aarohi ko haldi lagate hain. Nahi, lagate nahi hain, unke pure chehre pe rang ki tarah mal dete hain. Jaldi hi chaaron ka aapas mein haldi se holi khelna shuru ho jaata hai. Isse pehle ki Kunal apne bhaiyon ke pichhe daud ke unhe haldi lagaye Dadi Kunal ko daat ke use aur Aarohi ko apne apne jagah baitha deti hain.
"Haldi abhi puri nahi hui hai. Bela, Kavya, tum dono bhi haldi laga do." Bela Aarohi ko haldi lagati hai aur pichhe hat jaati hai. "Puttar, Kunal ko nahi lagaogi?" Kunal peedhe pe baithe upar Bela ko dekhta hai lekin Bela usse nazar nahi milati hai.
"Nahi, Dadi, ham Kunal ko haldi nahi lagayenge."
"Kyun?"
"Hamare yahan sirf dulha- dulhan se bade hi haldi lagate hain. Haldi lagana ek tarah se aashirvaad dena hota hai. Ham Kunal se chhote hain to ham unhe haldi nahi lagayenge."
"Achha, koi baat nahi hai. Agar tumhare yahan aisa hota hai to ham tumhare saath zabardasti nahi karenge," Dadi kehti hai. Jab haldi ki rasm puri ho jati hai tab sab haldi se holi khelne lagte hain. Bela andar chali jaati hai apne haath dhone. Wo dhyaan nahi deti hai ki Kunal uske pichhe hi aa raha hota hai.
Jaise hi Bela guest bedroom ke bathroom mein haath dhokar bahar aati hai to dekhti hai ki Kunal wahan khada hai, kamre ka darwaza band kiye hue. Lambe kadmon mein uske paas pahunchta hai aur uske dono taraf se apne haathon ko diwar pe rakhta hai aur uske kareeb aata hai, uske bhagne ka har raasta band kiye. "Kya keh rahi thi tum? Apne se badon ko haldi nahi laga sakti." Kunal dheemi aawaz mein bolta hai.
"Haan, to hamne galat kya kaha? Ham nahi laga sakte." Bela bhi dheemi aawaz mein kehti hai.
"Galat hi kaha hai. Ham dono ek hi age ke hain."
"Aapko kaise pata hamari umar kya hai?"
"Jaise tumhe pata chala ki main tumse bada hoon."
"Paheliyan mat bujhaiye, hamein bataiye aapko kaise pata."
"Tumhari file padhi maine. Mere liye jo kaam karta hai main sabki file padhta hoon."
"Ham umar ki baat nahi kar rahe the. Aap hamein apne aap se chhota, apne se neeche hi maante hain na."
Kunnal Bela ko dekhta hai, usne jo kaha use unsuna karke. "Tum mujhe haldi nahi laga sakti ho, lekin main to tumhe haldi laga sakta hoon na."
Bela ki saas gale mein atak jaati hai. "K-kya?" Lekin Kunal jab bhi uske kareeb jaata hai to uski saas kam ho jaati hai aur dil ki dhadkan badh jaati hai, usmein naya sirf yahi hai ki is baar Kunal Bela ke bohot hi kareeb hai. Bela ko lagta hai ki aisa is liye hota hai kyunki use Kunal darawna lagta hai. Lekin usi darawne Kunal se behes karti hai aur jhagadti hai. Bela ke dimaag ki to jaise dahi ho gayi hai. Use kuchh samajh nahi aa raha ki kya ho raha hai.
"Tumhari bhi shaadi hone wali hai agle mahine. Tum ise apni advance haldi samajh lo."
"Par aap haldi kahan se layenge?"
"Main haldi kahan se launga? Ab to ek hi chaara hai."
"Kya?"
Kunal Bela ki taraf aage badhta hai aur apne chehre pe lagi haldi uske gaal pe laga deta hai. "Kunal." Bela lambi saans kheechti hai.
Kunal door "Ho gayi tumhari haldi."
"Aapne aisa kyun kiya?"
"Tum mujhe haldi nahi laga sakti thi to maine hi tumhe haldi laga di."
"Nahi lagani chahiye thi."
"Lakin lag gayi. Ab kya karogi?"
"Aap aise kyun hain? Kisi ki baat sunte kyun nahi hain, Akduchand? Kisi ki baat maan lenge to kya aapke pool se pani kam jayega, sookh jayega?"
Phir shuru ho gayi apni ajeeb batein lekar.
"Ham kab se aapko batane ki koshish kar rahe hain ki Adhij Aarohi ke liye sahi nahi hai. Aap hamari baat sunne ko tayyar kyun nahi hain?"
"To batao." Kunal kehta hai. Use andar se gussa aa raha hota hai lekin wo seedha chehra rakhta hai. "Bolo tumhe kya kehna hai. Aaj is baat ko khatam hi kar dete hain, once and for all. C'mon, batao kya hai tumhare paas."
"Adhij, wo Aarohi ke liye sahi nahi hai. Balki, dono bhai- behen ke achhe iraade nahi hain. Maan aapse paison ke liye shaadi kar rahi hai-"
"Jaanta hoon."
"Aap jaante hain? Phir bhi aap yeh shaadi kar rahe hain-"
"Waise to main tumhe kuchh batana zaroori nahi samajhta hoon, lekin bata hi deta hoon taki tumhara muh band ho jaaye. Meri Mr. Randhawa ke saath deal hui thi. Main unki beti ke saath shaadi karunga in exchange of a merger. Mujhe pata hai, Maan ko pata hai aur ghar mein baaki sab ko bhi pata hai ki yeh shaadi ek deal hai."
"Aur Aarohi ki shaadi ke badle kya deal mil rahi hai aapko?"
Kunal apni jaw clench karta hai. "There's no deal. I won't sell my sister, not for anything. Aarohi aur Adhij ek dusre ko 4 saal se pasand karte hain. They're in love-"
"Koi love nahi hai. Adhij Aarohi se paison ke liye shaadi kar raha hai. Wo badla lena chahta hai Mehrotras se, aapke pariwaar ko barbaad karna chahta hai."
"Achha, itna bata di to yeh bhi bata do Adhij hamein kyun barbaad karna chahta hai?"
"Wo hamein nahi pata, lekin-"
"Nahi pata ya yeh kahani abhi tak sochi nahi hai?"
"Aapko bharosa nahi ho raha hai na hampar? Hamare paas saboot hai. Use dekhne ke baad aapko hamari baat par vishwaas hoga." Bela apna phone nikalti hai aur video laga ke phone Kunal ko dikhati hai.
Kunal video play karta hai par video dekhte hi Kunal ko bohot gussa aa jaata hai aur wo Bela ka phone phek ke use tod deta hai.
"Hamara phone! Yeh aapne kya kiya? Hamara phone tod diya? Agar aapko Adhij pe gussa aa raha tha to hamare phone pe kyun nikaala? Sab ke paas aapke tarah paise nahi hote hain ki har kuchh mahinon mein phone badal sake-"
"SHUT UP!" Kunal chillata hai zor se. Bela dar jaati hai. "Shut your god damn mouth! Paisa, paisa, paisa, paisa! Tumhare dimaag mein sirf paisa ghoomta hai na? Aur kuchh nahi sujhta hai tumhe. Mujhe usne bataya tha ki tum yeh sab paison ke liye kar rahi ho. Mujhe laga I should give you the benefit of doubt, lekin he was fucking right! Main tumhare jhaase mein nahi aa raha tha to tumne aisa raasta apnaya? Agar tum mujhe blackmail karna chahti ho to ek baat samajh lo, tumhare mujhe blackmail karne se mera kuchh nahi bigdega. Lekin tumhara bohot kuchh bigdega. In fact, tumhari puri zindagi bigad jaayegi. I will fucking destroy you!"
Bela dar ke pichhe kadam lene lagti hai. "Kunal, hamari baat suniya. Aap galat samajh rahe hain." Kunal Bela ke taraf ek kadam mein pahunch jaata hai aur uska haath zor se pakad leta hai. "Kunal, chhodiye hamein. Thande dimaag se ek baar hamari baat suniye warna baad mein aapko pachhtava hoga."
Kunal Bela ko kheech ke ghar ke bahar lekar jane lagta hai. "Pachhtaogi to tum. Tumhara wakt is ghar mein khatam, Bela Narayan."
Sab koi tab bhi haldi se khel rahe the jab Dadi Kunal ko gusse mein Bela ka haath pakad ke use bahar kheechte hue dekhti hai. Dadi hairan reh jaati hai. "Kunal, yeh kya kar raha hai tu, puttar? Bela ke saath- uska haath chhod puttar."
Sabka dhyaan ab Kunal aur Bela par chala jaata hai. "Kunal? Ab kya kiya is panauti ne?" Sonia puchhti hai.
"Bhabhi."
"Zaroor isi ne kuchh kiya hai, Maya. Tu aisi ladkiyon ko nahi jaanti hai, par main achhe se jaanti hoon."
Kunal rukta hai, lekin Bela ka haath nahi chhodta hai. "Yeh ladki yahan aur kaam nahi karegi. Isne jo aaj kiya hai, uske baad agar yeh mere saamne dobara aane ki jurrat karegi to apne paida hone pe ise pachhtava hoga. Isne mujhe halke mein liya hai, yeh jaanti nahi hai main kya kya kar sakta hoon. Main iski zindagi palat ke rakh dunga, barbaad kar dunga ise!"
"Par hua kya hai?" Maya puchhti hai.
"Hamein nahi pata aap itna gussa kyun kar rahe hain. Hamne aapko sab bata diya-"
"Kavya! Aarohi ko andar lekar jao. Right now!" Kavya Aarohi ki andar lekar jaati hai. "Dadi, yeh ladki jispar aap itna vishwaas karte hain, Ansh aur Veer, tum dono jise behen maante ho wo saap nikli jo hamein hi dasna chahti hai. Jab se yeh aayi hai tab se mere pichhe padi hai Aarohi ki shaadi todwane ke liye. Isne Adhij ko bhi threaten karna shuru kar diya. But she crossed all the limits today. Main iski baaton mein nahi aa raha tha to isne mujhe blackmail karne ki koshish ki. Iske paas Dad ki pandra(15) saal pehle ki scandal wali video hai!"
"Kya?" Sonia ghabra jaati hai. "Iske paas yeh kahan se aayi?"
"Yeh hamare ghar mein itne din rahi hai, bohot mauke milein honge ise. Par yeh jaanti nahi iska paala Kunal Mehrotra se pada hai."
"Kunal, tune ise safai dene ka mauka diya? Tune isse puchha isne aisa kyun kiya ya ise yeh video kahan se mila?" Dadi puchhti hai.
"Haan Kunal, did you ask her? Kyunki yeh possible hi nahi hai ki yeh video ise ghar se-"
Sonia Maya ki baat beech mein kaat deti hai. "Isne itna bada kaand kar diya aur aap log abhi iski safai sunna chahte hain? Main to pehle se hi jaanti thi iski neeyat mein khot hai. Kunal, abhi ise ghar se nikal de."
Kunal Bela ka haath pakad ke use kheechte hue drive through se ghar ke gate ke bahar le jaata hai. "Kunal, hamari baat suniye. Aapko koi galat fehmi hui hai. Hamein nahi pata tha us video mein kya tha. Hamein laga ki wo wahi video hai jo hamne Adhij ke khilaf sabbot ke taur pe liya tha. Hamein nahi pata wo video wahan kaise aaya. Please, hamara yakeen kijiye."
"Tum pakdi gayi, Bela. Ab ise chhupane ki koshish mat karo kyunki mujhe tumhare kisi bhi baat par raddi bhar bhi vishwaas nahi hai."
"Kunal!" Ansh aur Veer bhaag ke dono ke paas aate hain. "Kunal, tujhe koi misunderstanding hui hai. Aisa mat kar, Kunal. Don't do this."
"No one can change my mind, tum dono bhi nahi. Aise logon ke saath yahi hona chahiye taaki phir kabhi kisi ka ghar barbaad karne se pehle sau(100) baar soche ki unke saath kya hoga."
Kunal Bela ko gate se nikaal deta hai aur gate band kar deta hai. "Yeh ladki dobara ghar ke andar dikhni nahi chahiye, understand? If I see her in the house again, tum sab ko nikaal dunga." Kunal security ko warn karke chala jaata hai.