နတ်နဂါးစစ်သည်
အခန်း ၁၆၁
( ခေတ်တစ်ခေတ် အဆုံးသတ်ခြင်း )
သံအမတ်ကြီးက ကျိုးကျီ ကို မျက်လုံးများ ကျွတ်ကျလုမတတ် ပြူး၍ မယုံကြည်နိုင်စွာ ကြည့်နေ၏။ အကယ်၍ ရဲများသာ ဤစုံစမ်းစစ်ဆေးမှုတွင် တစ်စုံတစ်ခုကို အမှန်တကယ် တွေ့ရှိသွားပါက ဟွာရှတွင် ဝေ့နိုင်ငံ၏ ဂုဏ်သတင်းရော သူ၏ အသက်မွေးလမ်းကြောင်း အလုပ်ပါ ဆုံးခန်းတိုင်ရပေတော့မည်။
ကျိုးကျီ မှာလည်း လွန်စွာ စိတ်နှလုံးတုန်လှုပ်နေ၏။ သူ၏ မျက်နှာမှာ သိပ်မဟန်တော့ချေ။ ရှုချန်းက ဤလျှို့ဝှက်တံခါးကို တွေ့လိုက်သည့်အပေါ် သူ လွန်စွာ အံ့အားသင့်နေမိ၏။
သူ့အား အစိမ်းလိုက် ဝါးစားမတတ် ကြည့်နေသော သံအမတ်ကြီးကို ကျိုးကျီ က အလွန် တိုးညှင်းသည့် လေသံဖြင့် ပြောလိုက်သည်။
"ဒါက လက်ဗွေနဲ့ မျက်စိသူငယ်အိမ် နှစ်ခုပေါင်းပြီး စကင်န်ဖတ်တဲ့ အီလက်ထရောနစ် လုံခြုံရေးတံခါးလေ... ခန်းရီ တစ်ယောက်ပဲ ဖွင့်နိုင်တယ်... သူက အခု ဒီမှာမရှိတော့ စိတ်မပူပါနဲ့... "
သံအမတ်ကြီးက သူ့ကိုကြည့်လိုက်၏။
"အဲဒီထဲမှာ ငွေမည်းတွေ တကယ်ရှိတာလား..."
"... "
ကျိုးကျီ ဘာပြန်ဖြေရမှန်းမသိဘဲ ခေါင်းတညိတ်ညိတ်သာ ပြုလိုက်၏။
သံအမတ်ကြီး၏ မျက်နှာလည်း ချက်ချင်း ပျက်ယွင်းသွား၏။
ကျိုးကျီ က ...
"သံအမတ်ကြီး... ဒီနေ့ကို ဖြတ်ကျော်နိုင်ခဲ့တဲ့အခါ ခင်ဗျားရဲ့ ကျေးဇူးတရားတွေ ကျွန်တော့်အပေါ် တော်တော် သိသိသာသာကြီးကို များလာမှာပါ... "
သံအမတ်ကြီးက ...
"ဒီထဲမှာ ဝင်ဖို့ လုံခြုံတဲ့ လျှို့ဝှက်လမ်းကြောင်း မရှိဘူးလား... "
ကျိုးကျီ က ...
"ရှိပါတယ်... ဒါပေမဲ့ စကားဝှက်တွေ အကုန်လုံးကို ခန်းရီ ပဲ သိတာလေ... ဒါပေမဲ့ သူက အခု အဖမ်းခံထားနေရတယ်... "
သံအမတ်ကြီးက ...
"ငါ သူတို့ကို အချိန်ဆွဲထားမယ်... တစ်ယောက်ယောက်ကို ဒီနေရာကနေ ငွေတွေ မြန်မြန်လွှဲဖို့ မင်းစီစဉ်လိုက်... မြန်မြန်လုပ်... သူတို့မှာ ရှာဖွေရေးဝရမ်းပါတဲ့အတွက် မင်းတို့ကို ဖွင့်ဖို့ အမိန့်ပေးခွင့်ရှိတယ်... အဲဒီအခါကျရင် ငါတို့ အားလုံး အဆုံးသတ်သွားမှာ အသေအချာပဲ... "
ကျိုးကျီ က ...
"ဒါပေမဲ့ ခန်းရီ ကို ဖမ်းထားပြီးသားလေ... "
သံအမတ်ကြီး မျက်လုံးမှိတ်လိုက်၏။
"သူ့ကိုဖုန်းခေါ်ဖို့ ငါ စဉ်းစားကြည့်ပါဦးမယ်... သူ စကားဝှက်ပေးပြီးတဲ့အခါကျရင် ငါတို့မြန်မြန်ဆန်ဆန် ငွေလွှဲဖို့ ပြင်ကြရအောင်... "
ပြောပြောဆိုဆိုနှင့် သံအမတ်ကြီးက ဖုန်းကို ချက်ချင်းဆွဲထုတ်လိုက်ပြီး ရှေ့နေကို ဖုန်းဆက်လိုက်၏။
ဤအခြေအနေအထိ ရောက်လာပြီဖြစ်၍ သံအမတ်ကြီးကိုယ်တိုင် ဝင်ပါရန်မှတစ်ပါး ရွေးချယ်စရာ မရှိတော့ချေ။ ယခုအချိန်တွင် လက်ပိုက်ကြည့်၍ အရှုံးပေး အညံ့ခံလိုက်ပါက ဟွာရှမှ ပြည်သူများက ဝေ့နိုင်ငံ၏ သံတမန် အခွင့်အာဏာကို နှိမ်ပေတော့မည်။
ထို့ကြောင့် ယနေ့ကဲ့သို့သော အခြေအနေမျိုးတွင် အရှုံးမပေးဘဲနေရမည်ပင်။
လီချောင်နှင့် ဝူကန်းတို့က အထူးရဲတပ်ဖွဲ့ဝင် အနည်းငယ်နှင့်အတူ တံခါးပေါက်ကို ချက်ချင်းသွားရောက် စစ်ဆေးခဲ့သည်။ ထုထည် ထူထပ်လှသော သံမဏိပြားကို ကြည့်ပြီး ဖောက်ခွဲရေးကျွမ်းကျင်သူက ...
"ဒါ A အဆင့် အထူးထုတ်လုပ်ထားတဲ့ တံခါးပဲ... ဗုံးဒဏ်တွေကို တောင်မှ ခံနိုင်စွမ်းရှိတယ်... ဒီတံခါးရဲ့ လုံခြုံရေးအဆင့် သတ်မှတ်ချက်ကလည်း အရမ်းမြင့်မားတယ်... လက်ဗွေရော မျက်စိသူငယ်အိမ်ပါ နှစ်ခုပေါင်း စကင်န်ဖတ်မှပဲရလိမ့်မယ်... "
"ခေါင်းဆောင်... ကျုပ်တို့ ဘာလုပ်ကြမလဲ... "
ရှုချန်းက ကျိုးကျီ အား လှည့်ကြည့်ပြီး ...
"ဆာ... ဒါကို ဖွင့်ပေးလို့ရနိုင်မလား... "
ကျိုးကျီ က အေးဆေးတည်ငြိမ်စွာဖြင့် ...
"ဆောရီး... ငါ မလုပ်နိုင်မှာ ကြောက်တယ်... "
ရှုချန်း မျက်မှောင်ကြုံ့လိုက်၏။
"ဘာဖြစ်လို့လဲ... "
ကျိုးကျီ က ...
"စီးပွားရေး မဟာမိတ်အဖွဲ့က ကျုပ်ရဲ့ တစ်ဦးတည်းပိုင် မဟုတ်ဘူး... ဒီနေရာက စီးပွားရေး မဟာမိတ် တစ်ဖွဲ့လုံးရဲ့ ရုံးခန်းပဲ... စကားဝှက်တွေ လက်ဗွေရာတွေ သူငယ်အိမ် စကင်န်နာတွေအကြောင်း ကျုပ် ဘာမှမသိဘူး... ပြီးတော့ ဒီတံခါးရဲ့ နောက်ကွယ်မှာ ရှိနေတဲ့အရာက ကျုပ်တို့ စီးပွားရေး မဟာမိတ်အဖွဲ့ရဲ့ အရေးကြီးဆုံး လျှို့ဝှက်နေရာပဲ... ဒါကြောင့် ခင်ဗျား အနေနဲ့ ကျုပ်တို့ရဲ့ လျှိုဝှက်ချက်တွေကို ဆက်ပြီး မဖော်တော့ဖို့ မျှော်လင့်ပါတယ်... ခင်ဗျားဆက်ပြီး ရှာဖွေဖို့ပြောနေရင်တော့ ဟွာရှက နိုင်ငံခြား ကုန်သွယ်မှုကုမ္ပဏီတွေရဲ့ အခြေခံအကျဆုံး ကိုယ်ရေးကိုယ်တာ အခွင့်အရေးတွေကိုတောင် အာမ မခံပေးနိုင်ဘူးလို့ တစ်ကမ္ဘာလုံးကို ထုတ်ပြောရလိမ့်မယ်..."
သံအမတ်ကြီးကလည်း အခွင့်ကြုံသည်နှင့် ဝင်နှက်တော့၏။
"ဟုတ်တယ်... ပြီးတော့ ဒီလိုမမျှတတဲ့ ဆက်ဆံမှုကို ကုလသမဂ္ဂဆီမှာ အယူခံဝင်ဦးမှာ... "
ထိုသူနှစ်ဦးကို ကြည့်လိုက်ပြီး ရှုချန်းက ...
"ရှာဖွေရေးဝရမ်းရဲ့ သဘောသဘာဝကို ထပ်ပြီး စဉ်းစားကြည့်ကြပါဦး... "
သံအမတ်ကြီးက ...
"ကျုပ် သိပါတယ်... ဒါပေမဲ့ နိုင်ငံကြီးသားဆိုရင် နိုင်ငံကြီးသားတွေလိုပဲ ပြုမူသင့်တယ်... ခင်ဗျားတို့ အဆောက်အအုံတစ်ခုလုံးကို ဝိုင်းထားပြီး နေရာတစ်ခုမကျန် ရှာဖွေတဲ့အခါမှာ ကျုပ်တို့ လုံးဝကို ပူးပေါင်းဆောင်ရွက်တယ်... ရိုးရိုးသားသားပြောရရင် အခုလိုတွေလုပ်နေတဲ့အတွက် ကျုပ်တို့ စီးပွားရေး မဟာမိတ်အဖွဲ့ရဲ့ ဂုဏ်သတင်းကို ထိခိုက်စေမယ့် အခြေအမြစ်မရှိတဲ့ ကောလဟာလတွေ ထွက်တော့မှာ သေချာတယ်... ဒါပေမဲ့ ဒီကိစ္စနဲ့ပတ်သက်ပြီး ကျုပ်တို့က ခင်ဗျားကို နည်းနည်းလေးတောင် ရန်မရှာခဲ့ဘူး... ခင်ဗျားလူတွေက ဘာတစ်ခုမှ မရှာနိုင်တော့ ကျုပ်တို့ရဲ့ လျှို့ဝှက်အခန်းကိုပါ သံသယဝင်လာကြပြီပေါ့... ဒီအိပ်ခန်းတွင်းမှာ မူးယစ်ဆေးတချို့ ဒါမှမဟုတ် တရားမဝင်တဲ့ လုပ်ငန်း အထောက်အထားတွေ တွေ့တာနဲ့ ဒီနေရာကို ချိတ်ပိတ်ပစ်မယ်လို့ ဆိုလိုချင်တာလား... ကျုပ် ခင်ဗျားကိုပြောမယ် အရာရှိရှု... ကျုပ် ဒီနေရာမှာ ရှိနေသရွေ့ ဒီလိုမျိုးတွေဖြစ်လာဖို့ လုံးဝ ခွင့်မပြုနိုင်ဘူး... "
ထိုအချိန်မှာပင် နိုင်ငံတကာမှ နာမည်ကျော် ရှေ့နေများ ရဲစခန်းသို့ ရောက်ရှိလာကြသည်။ သူတို့အားလုံးနှင့်အတူ သက်ဆိုင်ရာ စာရွက်စာတမ်းများလည်း ပါရှိလာ၏။
"ကျုပ်က မစ္စတာ ခန်းရီ ရဲ့ရှေ့နေပါ... ကျုပ် အမှုသည်နဲ့ တွေ့ချင်တယ်... "
"ဆောရီးပါ... လူကုန်ကူးမှုနဲ့ ငွေကြေးခဝါချမှုတွေမှာ ပါဝင်ပတ်သက်နေတယ်လို့ သံသယရှိထားပါတယ်... ခင်ဗျား သူ့ကို တွေ့ခွင့်မရှိပါဘူး... "
"သံသယဖြစ်တယ်ဆိုတာ သူ့ကို တရားစွဲထားတယ်လို့မှ မဆိုလိုတာ... သူ့ရဲ့မှန်ကန်မှုအတွက် ကျုပ်တို့မှာ ခုခံပိုင်ခွင့်ရှိတယ်... ဒါ့ကြောင့်လည်း ရှေ့နေ တွေ ဖြစ်တည်နေတာ... ဒီအချိန်မှာ ခင်ဗျားတို့ သက်သေရှာပြီး တရားမစွဲခင်မှာ ကျုပ်အနေနဲ့ သူ့ကို တွေ့ခွင့်ရှိတယ်... ကျုပ်က ဝေ့နိုင်ငံ သံအမတ်ကြီးရဲ့ ဥပဒေအကြံပေး တစ်ယောက်လည်း ဖြစ်တယ်... နိုင်ငံရပ်ခြားမှာ ဖမ်းဆီးခံရတဲ့ ကျုပ်တို့ ဝေ့လူမျိုးတွေဟာ နိုင်ငံရဲ့ပုံရိပ်ကို ထိခိုက်စေနိုင်တာကြောင့် ဒီကိစ္စနဲ့ပတ်သက်ပြီး အသးစိတ်သိရှိဖို့ သူ့ကို တောင်းဆိုရလိမ့်မယ်... "
တာဝန်ကျ ရဲတပ်ဖွဲ့ဝင်များက ထိုသူများ မည်မျှ ရန်လိုနေကြောင်း မြင်တွေ့ခဲ့ရ၏။ သို့သော် သူတို့က အချက်အလက်နှင့် ကိုင်ပေါက်ပြောဆိုနေသည်မှာလည်း မှန်ပေ၏။ ထို့ကြောင့် ထိုသူများအား ဝင်ခွင့်ပေးရန် တံခါးဖွင့်ရန်မှတစ်ပါး ရွေးချယ်စရာ မရှိတော့ချေ။
ရှေ့နေအထဲသို့ဝင်သွားပြီး ခန်းရီ အား အသံတိုးတိုးဖြင့်...
"ကျုပ်က သံအမတ်ကြီးရဲ့ ဥပဒေအကြံပေး တစ်ယောက်ပါ... စီးပွားရေး မဟာမိတ်အဖွဲ့ရဲ့ အခြေအနေကတော့ သိပ်မဟန်ဘူး... သူတို့ရဲ့လျှို့ဝှက်ခန်းကို ရှာတွေ့ထားပြီ... ဒီ လျှို့ဝှက်ခန်းကို သူတို့မဖွင့်ခင်မှာ သံအမတ်ကြီးက ခင်ဗျားကို ကျိုးကျီ နဲ့ဆက်သွယ်ပြီး စကားဝှက် ပြောပြစေချင်တယ်... ဒီလိုမှပဲ ငွေကို ဘေးကင်းလုံခြုံတဲ့ လမ်းကြောင်းကနေတဆင့် လွှဲပေးနိုင်မှာ... ကျုပ်တို့ အချိန် မရှိတော့ဘူး... မြန်မြန်လုပ်ရအောင်... "
ခန်းရီ အနည်းငယ် ထိတ်လန့်သွား၏။ လျှို့ဝှက်အခန်းအား ရှာဖွေတွေ့ရှိလိမ့်မည်ဟု သူလုံး ဝ မျှော်လင့်မထားချေ။
သူ ယခု ဘာလုပ်သင့်သနည်း။ အကယ်၍ ငွေများအားလုံး သိမ်းဆည်းရမိပါက မိမိကိုယ်ကိုယ်မိမိ သတ်သေလိုက်လျှင်ပင် အပြစ်ကြွေးတို့ ပြန်ဆပ်နိုင်မည် မဟုတ်ချေ။ ထို့ကြောင့် ရှေ့နေ၏ ဖုန်းကို အမြန်ယူကာ ကျိုးကျီ အား ခေါ်လိုက်၏။ ရှေ့နေ၏ လက်ထောက် ယူဆောင်လာသော အိတ်အတွင်း၌ ဖုန်းခေါ်ဆိုမှုများကို အကျဉ်းခန်း အပြင်ဘက်မှ မည်သူမျှ မကြားနိုင်စေရန် ဖြတ်တောက် အနှောင့်အယှက် ပေးနိုင်သော ကိရိယာငယ် တစ်ခုပါ၏။
ကျိုးကျီ ဖုန်းသို့ နံပါတ်စိမ်းတစ်ခု ဝင်လာ၏။ သို့သော် သူ ပြန်ဖြေလိုက်၏။
"ဟယ်လို... "
"ငါပါ ခန်းရီ..."
ကျိုးကျီ မျက်လုံးပြူးသွား၏။ သံအမတ်ကြီး၏ လုပ်ဆောင်မှု ဤမျှထိရောက်မည်ဟု သူ မျှော်လင့်မထားချေ။ မိနစ်အနည်းငယ်သာ ကြာပြီးနောက်တွင် ခန်းရီ က သူ့ကို ဖုန်းခေါ်နေလေပြီ။
ဖုန်းခေါ်သံကြားလိုက်သည့်အတွက် ရှုချန်း၏ နားများ အနည်းငယ် လှုပ်ခါသွား၏။ သူက ကျိုးကျီ ဘက်သို့ လှမ်းကြည့်လိုက်သည်။ ရှုချန်းနှင့် ကျိုးကျီ တို့အကြည့်ချင်းဆုံသည့်အခိုက်တွင် ကျိုးကျီ ၏ ခန္ဓာကိုယ် တစ်ခုလုံးမှာ ကြက်သီးမွေးညှင်းများ ထသွားရလေသည်။ ထို့ကြောင့် ထောင့်တစ်နေရာသို့ လျင်မြန်စွာ လျှောက်သွားကာ ...
"မြန်မြန် စကားဝှက်ကိုပြောတော့... " ဟု ပြောလိုက်၏။
ခန်းရီ က ...
"စကားဝှက်က ၂၀၀၅၁၂... ငါတို့စီးပွားရေး မဟာမိတ်အဖွဲ့ ထူထောင်ခဲ့တဲ့ နှစ်နဲ့ လကို ယူပြီး ပေးထားတာ... အဆောက်အအုံအပေါ်ထပ် အိပ်ခန်းရဲ့ ရေချိုးခန်းထဲမှာ လုံခြုံတဲ့ လမ်းကြောင်းတစ်ခုကို ဦးတည်ထားတဲ့ လျှို့ဝှက်တံခါး တစ်ချပ်ရှိတယ်... "
"ကောင်းပြီ... မင်း အဲဒီမှာဘယ်လိုလဲ.... "
"ရိုးရိုးသားသားပြောရရင် ငါထောင်ကျဖူးတာ ပထမဆုံးအကြိမ်ပဲ... ငါ တကယ်ကို မပျော်ဘူး... ငါ့ကို ပြန်မလွတ်စေနဲ့ပေါ့ကွာ... ငါ အပြင်ရောက်တာနဲ့ အဲဒီခွေးကောင် ရှုချန်းကို သတ်ပစ်မယ်... "
"အေးဆေးပေါ့... မပြီးသေးပါဘူး... "
ထို့နောက် ဆက်လက် လုပ်ဆောင်ရမည်တို့ကို သူ့လူများအား တိတ်တဆိတ် ညွှန်ကြားလိုက်၏။ သို့သော် သူတို့၏ စီစဉ်မှုအလုံးစုံကို ရှုချန်း ကြားသိပြီးပြီဖြစ်ကြောင်း သူ မသိနိုင်ခဲ့ချေ။
ရှုချန်းက သံအမတ်ကြီးကိုကြည့်ကာ ...
"သံအမတ်ကြီး... ခင်ဗျားကို ကျုပ် မေးချင်တာက ကျုပ်တို့ ရဲလုပ်ငန်းတွေမှာ ဝင်စွက်ဖက်ဖို့လာတာလား... ခင်ဗျားနိုင်ငံ ကိုယ်စားပြုအနေနဲ့ လာတာလား... ဒါမှမဟုတ် ခင်ဗျားရဲ့ ကိုယ်ပိုင်သဘောထားနဲ့ လာတာလား... "
"ကျုပ်တို့ဝေ့နိုင်ငံကို ကိုယ်စားပြုပြီး လာတာပါ.. "
"ဒါဆိုရင် ဒီအထဲမှာ ငွေမည်းရှိရင် ခင်ဗျား တာဝန်ယူမှာလား... "
"ကျုပ်ဆီက စကားနှိုက်ဖို့ ခြောက်မနေနဲ့... ကျုပ် ခင်ဗျားကိုပြောပြမယ်... သံတမန်ရေးရာ ကိစ္စတွေမှာ ပြိုင်ဘက်တွေ အများကြီးနဲ့ ကျုပ် ကြုံဖူးတယ်... ခင်ဗျားက ကျုပ်ကို စိန်ခေါ်ဖို့ အရမ်း အတွေ့အကြုံ နုသေးတယ်... "
ရှုချန်း ရယ်မောလိုက်၏။
"ဒါဆိုရင် ဒီနေ့ ခင်ဗျားရဲ့ခေတ် ကုန်တော့မယ်ထင်ပါရဲ့... တရားမဝင်လှုပ်ရှားမှု အထောက်အထား တကယ်ရှိရင် ခင်ဗျားနဲ့ ခင်ဗျားနောက်မှာရှိတဲ့ သံရုံးဝန်ထမ်း အကုန်လုံးကို ဖမ်းဆီးပြီး ရာဇဝတ်မှုနဲ့ စွဲချက်တင်မယ်... သံတိုင်တွေနောက်ကို ရောက်တဲ့အခါ ခင်ဗျား အခုလိုပဲ နှုတ်သီးကောင်း လျှာပါးဖြစ်နေဖို့ ကျုပ် မျှော်လင့်ပါတယ်... "
ရှုချန်းက ပြောပြောဆိုဆိုဖြင့် ယခင်က ခန်းရီ ၏ လက်ဗွေရာများကို စုဆောင်းထားသော တိတ်ကို အိတ်ထဲမှ ထုတ်လိုက်ပြီး မကြာသေးမီက သူကြားထားသည့် စကားဝှက် ၂၀၀၅၁၂ ကို ရိုက်ထည့်လိုက်၏။ အီလက်ထရောနစ် စကင်န်နာဆီမှ စက်ရုပ်အသံ ထွက်ပေါ်လာ၏။
"လက်ဗွေ မှန်ကန်ပါတယ်... စကားဝှက် မှန်ကန်ပါတယ် ...ကျေးဇူးပြုပြီး သင့်မျက်လုံးများကို စကင်န်နာရှေ့တွင် နေရာယူပေးပါ..."
ရှုချန်း ဖုန်းကို ထုတ်လိုက်ပြီး မကြာခင်က ရိုက်ကူးထားသော ခန်းရီ ၏ အနီးကပ်ဗီဒီယိုကို စကင်န်နာရှေ့တွင် ပြလိုက်၏။ ယနေ့ခေတ်တွင် မျက်စိ စကင်န်နာ အများစုမှာ ဓာတ်ပုံများဖြင့် လှည့်စား၍ မရတော့ချေ။ သို့သော်လည်း ရှုချန်း ရိုက်ကူးထားသည့် ဗီဒီယိုမှာ ခန်းရီ ၏ သူငယ်အိမ် အရောင် အသေးစိတ်ကို တိကျစွာ ရိုက်ကူးထားသည့်အတွက် စကင်န်နာကို အရူးလုပ်ရန် ပိုမိုလွယ်ကူခဲ့၏။
"သူငယ်အိမ် စကင်န်ဖတ်တာ အောင်မြင်ပါတယ်..."
စက်ရုပ်အသံ အဆုံးတွင် လျှို့ဝှက်တံခါးချပ်ကြီး ပွင့်လာ၏။ ထိုမြင်ကွင်းကြောင့် သံအမတ်ကြီးနှင့် စီးပွားရေး မဟာမိတ်အဖွဲ့မှ လူများအားလုံး ချက်ချင်း ထိတ်လန့်သွားကြကာ မေးရိုးများ ပြုတ်ကျလုမတတ် ပါးစပ်အဟောင်းသား ဖြစ်ကုန်၏။
ရှုချန်းက တံခါးကို ဆွဲဖွင့်လိုက်ပြီး ပစ္စတိုကို ချက်ချင်းထုတ်လိုက်၏။ အထဲ၌ ငွေရွှေ့နေသောသူများကို သေနတ်ဖြင့် ချိန်လိုက်ပြီး...
"တစ်ချက်လှုပ်တာနဲ့ ပစ်သတ်လိုက်မယ်... "
အခန်း ၁၆၁ ပြီး