﷽
سلام المحبة عليكم حبايبي
._._._._._._._._._._._._._._.
بعدها اعيادي تفاحات
شجرتهن مواعيدك
وبعدني شما ملت عيني سفينة نوح
ابادلها بحضن ايدك
ولحد هسه
اليكلي عيدك مبارك
يباركلك
لان عيدي انه من عيدك
مر الصبح شايل ضوه
وما شافك و رد منجفي
و مر ليلي شايلك گلادة من النجم
ما شافك و صاح الگمر گله انطفي
ما تستحي
الايام وفصول السنة
من هي بغيابك تجي
مو عناد
بس احس عني ابتعادك
رعب مو بس ابتعاد
البياض انت الوحيد بكل حياتي
ومن اخسرك يعني منفى
و طرد
من جنة ضوه لدنية سواد
عيني على سكة بريدك
بلكي تركضلي رسالة تصيح اريدك
ريدني ليا حد اضل كل صفنة اريدك
يا حلم مر بطريق الليل
محد شافه غيري وما حجيتك
اشتهيتك فرحة يل مريت دمعة
تلاوي بجفوني وبجيتك
ما اريدك
بس شكو بروحي يريدك
________________
علو أصوات الرمي المتبادل، أصوات أشبال الرجال المنهكه، نزيف الدماء الطاهرة ع هذه الأرض الخائنة، الدموع المنهمره من قلوبهم حزناً والماً ...
حيدر
صعدت الهمر ويه مرتضى وكرار وانه كلبي يدك يلوب من هالسالفه مامرتاحلها ابد
وخوفي لا يطلع كلامي بمحله وتصيرلنه مصيبه، حرك مرتضى وطلعنا بدرب المنيه ماندري شمكتوبلنا بي
جزينا مسافه ال ٥ دقايق او أكثر واشوف همرات الدواعش طايره علينا ويسبق ريحهم رصاصهم.
اجاني صوت فرقان من الجهاز
_ ريييسسس شديصير يمكم ريسس تسمعني شديصيررر شنو هالرمي؟، حاجيته وهو انفجر عليه يصيح، انفجرت عليه
حيدر : نعلعله صفحتكم ياطايحين الحظ نعلعله ضمايركم ارتاحيتوا هسه فاخت الدودة مو كتلكم السالفة بيها شي ديلااااا طلع كمين منهم.
حسام : حول تسمعون اكلكم شنو هاي الرمي لخاطر الله شديصيرررر؟
حيدر : ديصير اكلااااان التبن مالتكم طبكم مررض، مرتضى بسرررعه عالج الدبابات الكدامنا، صار رمي قوي علينا، اخر شي سمعته من فرقان يصيح عليهم ينزلون
صار رمي قوي ع جام الهمر لدرجه تفلش اضطرينا ننزل ونخلي الابواب درع النا من مطر رصاص العدو
_ حسام بالك ع ام جلنار زين فهمتتتت؟
حسام:- حاضر ريس، احنا مكملين نقاتل وياهم بشكدر مانكدر.
حيدر:- حول حول وين اللواء حازم تسمعني سيدي؟
ماكو جواب، الووو سيدي حول.
اللواء حازم: ألوو نقيب حيدر اسمعك اسمعك شنو هالصوت اليمك شديصيرررر شبيكممم؟
حيدر:- سيدي حدزلك موقعنا عالجوا بساااااع وكعنا بكمين والعدو أمامنا مباشرةً وجها لوجه وويانا امه وبتها.
اللواء حازم:- دز موقعكم هسه نعالج، دزيتله المكان وماكو اي معالجه نعلعله.
حيدر:- مرتضى عالج بسرررررررعه.
مرتضى :- أمرك سيدي ركض نزل رمانات من الهمر اخذتهن منه وحددت وين اضربها،
ضل بالي ع جلنار ألتفت اباوع لهمرهم وماشوف من بعيد غير امها واكعه جنازه ودمها ساح
بالمكان كله خفق كلبي بوجع ونغزات قويه سيطرة علي
وجلنار فرقان يسحل بيها وهي منهاره لآخر شي
_ فرقاااااااننننننن انعل ابوكم لأبو الخلفكم اخذذذذ جلنارررررر واعبر ع بساتين بسااااااااااععععع
فرقان:- حيدررررر حيدررر ام جلنار ماتت حيدر ماتت جلنار حتموت نفسها ماكدرلهااا والله.
حيدر:- اعبر كتلك اعبرررر راح ارمي رمانه وشردد بسرعه شيل جلنار واركض بيها.
فرقان:- حاضر ريس.
حيدر: فرقان امانتي يمك خويه ماوصيك بيها.
فرقان:- يمي ولايهمك، ضل بالي يمهم شمرتها ودوا صوت انفجار قوي ودخانه عجت المكان عج.
فتحت الثانية وشمرتها والثالثه والرابعه لحدما اجاني ريحة لحم محروك وحسيت الرمي انكطع نهائياً.
بقينا بمكانا لدقايق تحسب لأي شي
حيدر:- مرتضى نادي للولد خل يجون بسرعه، صار واحد وره الثاني وانه بمقدمتهم مشيت وسلاحي موجه ع
سياراتهم فحصنا المكان زين وتاكدنا الكل ميتين أخذنا الاسلحه والاجهزه واوراقهم ورجعنا لهمرنا لكينا التايرات كلها مزرفه من الرصاص
_ هاي شلون سال.....
حسام: ولك عبااااااااااااس لاااااااااااا عباسسسس، ركضت ع همر حسام ونلكه عباس مضروب طلقه بكصته وغارك بدمه ع طوله.
حيدر:- انا لله وانا اليه راجعون لاحول ولاقوة الابالله طلعوا شيلوا خل نرجع لنفس البيت وندفنه ونبلغ اهله بشهداته.
مرتضى :- حيدررر فاررسسس مستشهدددددددد، ركضنا علي واكع بالكاع مضروب ببطنه ثلاث طلقات ولحم بطنه كله طالع ظلمت عيوني من المنظر.
حيدر:- استغفرالله ربي تعال مرتضى خل نشيله، ماكو صوت ومحد اجه التفت عليهم
واشوفهم كلهم يبجون بصمت وكاعدين بالكاع والضعف باين عليهم من ذبلت اجتافهم الشامخه
ماانكر واكول عادي عدي بالعكس تدمرت كلش بس كقائد الهم
واجبي ألملمهم من قاع التعب والحزن والانكسار وأشعل بداخلهم القوة والصبر والتحمل
احنا كلنا بأختبار صعب، احنا هنا وورانا وطن وشعب يريد يرتاح من الطغيان والتعدي ع أراضيهم
ناس تريد تعيش ببيوتها مرتاحه وبأمان
بدون خوف انو يتعرضلهم العدو بأي لحظه وينهدم سكف بيتهم عليهم وتنهدم وياه أحلامهم وحياتهم واحبائهم
جريت نفس بس يانفس هذا عبالك ساحب صخرة جبل بصدري وتنفستها، مسؤوليتي زادت الولد كلهم استسلموا لجروحهم وجلنار أمانة بركبتي مادري بيها وين واخوي
اخوي فرقان ماعرف شديصيرر وياه
_ يالله ياربي منك القوة وعليك التوكل، صحت بيهم
_ يلا اخوتي النشامه علي وياكم كوموا يلا خل نشيل اصحاب الجنه ونروح ندفنهم وندعيلهم بالرحمه
ولاتنسون المفروض تتتمنون تحصلون هالشهاده العظيمه هاي يلا يلا عفيه بولدي الاسباع سولكم همه وفرغوا الهمرات من كلشي
لاتعوفون شي ورانا اثر، تكابلواعليهم وشالوهم بقيت اخر شي انه وحسام و الخالة زينب محد شالها
حسام :- حيدر شنسوي هسه شلون نشيلها؟
حيدر:- جيب غطه شي من الهمر وخل نغطيها، جاب شرشف خفيف غطيتها بي وقرينا الفاتحة ع روحها
_ اوووف ياربي .
حسام:- ها تفكر بحال جلنار مو؟
حيدر:- اي والله صارت هسه يتيمة الأبوين ونوب كدام عينها ماتت مادري اذا حتضل عايشه بعد هالكسره هاي
بعد عيني عينك ربي شنو ذنب هالطفله هاي تعيش كل العذاب لوحدها اااخ اخ اكلك حسام كوم خل نفرغ الهمرات من الاغراض ماكدرو الولد يشيلون كلشي
اخذت جنطتي واغراض مرتضى وكرار والاجهزة والايبادات وكلشي يخصنا أخذته صاحني حسام.
حسام:-حيدرر هذا المطي ناسي جهازه النداءات هنا
حيدر:- منو ياهو الناسي؟
حسام:- فررررررقااااان البكي ابن البكي استغفرالله ربي هسه شلون راح نندلهم شلووون، احس وجهي نشف بي الدم واعصابي وكفت
حيدر:- شنو ناسي الجهاز ؟؟ شلون ينسى شلوووووننن ياكلب ابن الكلب شلون نلكاهم هسه بلا لكوهم الدواعش وخطفوهم، فارت اعصابي ونهديت بحسام ذبيت حركتي بي
عقلي كام يمنتجلي سيناريوهات عليهم دمرتني ضليت ارجف من العصبيه وين راحوا هسه وييييين وين حلكاهم ياربي منا جلنار ومنا اخوي
حسام:- هاي جنطهم هنا ضلت هم
حيدر:- استغفرك ربي استغفررررك رحت لهمرهم باوعت لجنطة جلنار الانطيتها الها اخذتها بين ايديه واحس كلبي
نمرد مثل ماتنمرد جنطتها بغضب جفوف ايدي وين انتي هسه شصاير بيج ابني
لبستها ع جتفي وأخذت جنطة فرقان لبستها فوكها هم
مشى حسام كدامي وهو شايل الاغراض كلها
حيدر:- روح كدامي انه اشيلها ولي عن خلقتي لاتضل تتصفن بوجهي، سميت بأسم ربي وناديت مولاي يعيني وينطيني الصبر دنكت شلتها بأثنين ايديه ومشيت بيها راجع لمئوانا
_ استغفرالله استغفرالله ربي استغفرالله، خلصت الطريق استغفر اول مره اشيل مره غير امي
_ ربي والله مجبور والله موقصدي لاتحسبها معصيه عليه استغفرالله ربي واتوب اليه لاحول ولاقوة الابالله
بطلعان الروح يلا وصلت والدنيا ظلمت خليتها بالكاع وصحت الولد حتى نحفرلهم مكان وندفنهم
كملنا الحفر بدموع وكسرة ظهورنا ع فقدهم، اشخاص عشنا وياهم بفترة قليله مواقف وأيام حتضل مغروسه بكلوبنا للموت
سوالفهم ضحكهم شقاهم مواقفهم ذكرياتنا وياهم لهفة اهاليهم ووشوقهم للحظة اللقاء وياهم
أطفالهم أمهاتهم وعوائلهم المنتظرة اقل الأخبار عنهم لعل يروي قطره من عطش اشتياقهم للضناهم
كلها نزلت وياهم بالحفره ندفن كلشي وياهم ومالهم من لقاء بعد الموت الا الموت...
صليت بيهم جماعه صلاة الميت واسمع من وراي بس شهكاتهم المكبوته، كملنا الصلاه وسلمت اخذت نفسي وذبيته بتعب وهم جبير غمضت عيوني
خشعت روحي لرب العالمين اشكيله مصابنا وحالنا وادعوا بالصبر لاهاليهم
هدلت اجتافي بتعب بفقدهم وفقد اخوي وامانتي
ضليت فاتح ايدي وكلبي يحجي لربي ودموعي جرت نار موجره ع وجهي، اختبارك صعب ياربي كلش صعب
فراك امي وايدها التمسح ع وجهي بحنيتها
جلنار وفرقان بامانتك ياللهي سلمتهم لحفظك ولرحمتك ولرعايتك وانت أرحم الراحمين
ضلينا نقرأ قران لحد ما غبش الفجر علينا، التفت ع الولد ولا واحد بيهم نايم كاعدين وعيونهم ذبلانه من البجي ووجوهم صفر من التعب
حيدر:- شبيكم وجوهكم تتلاطم كوموا سووا ريوك لاتضلون بدون اكل يلا بسرررعه تحركوا.
مروان :- دخيل بختك ريس منو اله نفس يخلي سم بطنه بعد
حيدر:- اكو نفس ماكو مو شغلي هذا ورانا رجعه ندور فرقان شنو نسيتوا شردوا هو وجلنار ولازم صير بيكم طاقه شويه يلا كلت ماعيد كلامي بعد
مرتضى:- حسوي جاي بس، كلهم قبلوا.
طبيت للبيت ودخلت لنفس الغرفه الجنت بيها باوعت للفراش تذكرت جلنار من جانت نايمه هنا وهي بأمان امها يمها وهسه لاجلنار ولاأمها نغز كلبي حيل
شمرت الجنط وطلعت يمهم
مر هاليوم وانه ع تواصل مستمر ويه الجيش واللواء واعرف منهم اخر الأحداث المستجده وياهم
انطفى ضوه اليوم وتغلفت السمه بسواد فاحم يعلن عن بداية لليل مظلم وموحش طويل....
خليتهم يرتاحون اخذت كلاس جاي وطلعت برا كاعد صفنت ع المكان لساعات طويلة
حسيت بطبطبت ايد ع جتفي رفعت عيني طلع كرار
حيدر:- كرار.
كرار:- يابعد حيل اخوك انت
حيدر:- والله انتم حيلي كله ضياع واحد بيكم يضيع حيدر وياه
كرار:- هسه نلكاه ويرجع شبيك ماتدري بفرقان شيطان املس يعمي حتى شيطان اهون منه لاتخاف علي يرجعلنا وترجع لمتنا القوية بعون الله، استمع لكلام كرار
الي دائما يزرع الراحه بكلبي كلما يشوفني مهموم كلامه بلسم لجروح كلبي، صفنت والخنكه ضاكت بصدري ، وينها هسه؟؟
كرار ابو عرب:- يكول باسم
تمثل نار الغضه نيران فرقاهم
لون بيدي يصح جان أمشي وياهم
أدور عالأحبهم وين ألقاهم
إذا أنسه الهوه هيهات أنساهم
ما أكابر بعد...و الحبيب ابتعد
ليلي خلص نوح و سهر...روحي
حيدر:- الله ع حبيب الجروح ومعالجها باسم اووف
كرار:- ها تذكرتها؟
حيدر:- لا
كرار :- عليه ابو الدروب، وغمزتله.
حيدر:- اسكت يخوي اسكت مالي خلكك ترا.
كرار:- هههههههه ماشي ماشي سكتت لا احجي صدك تحبها ؟
حيدر:- شبيك انت كتلك هاي أمانة عندي ياحب هذا شدتحجي انت
كرار:- علينا يبا علينااااااا
حيدر:- عليك ونص شنو شفتني لاعب بإعراض العالم من قبل حتى اورط هاي الطفله وياي
كرار:- زين منو المشطلها وجهزلها جنطه ويحرص ع اكلها ابوي الكاعد بالبصره سواهن؟
حيدر:- تدري بيه مامتقرب لبنيه لهل الحد هذا
بس مادري شلون صار كل هذا يمكن
رب العالمين دزني بطريقها حتى اهتم بيها وامها تشوف حرصي وخوفي عليها وتطمئن ع بتها اذا راحت عنها وعافت وحدها بهالدنيا هاي
ماكو احد يدخل حياتنا او احنا ندخل بحياته عبثاً
لابد لوجوده درس او موقف او عشره لحياتنا
ممكن يكون هالشخص السند او الكسر ممكن الملجأ او السجن ممكن الأمان وانقاذ او الخوف ويدخلنا بمتاهات ومصايب جبيره
كلشي من ربنا بي حكمه وفائده النا...
مشت هاي الايام بينا يوم يجر يوم نطلع ندور ونرجع للبيت والنداءات والدنيا مكلوبه عالكه فد نوب هناك
لحد ما واني كاعد بالليل احرس واللعب بالسلاح
اجاني اتصال من رقم غريب شكيت بي رفضته ثلاث مرات واتصل لمره الرابعه!!!!
فتحت الخط وضليت ساكت
_ الروح والريه عضيدي ابو لبدة ، كزبر جسمي كله وتوسعن عيني بصدمه وكفت صارخ بفرحه
حيدر:- فررررررقاننننننن، ودموعي صبت فرح لأول مره اعيش هالفرحه
عزيز روحي اخويه الماجبته امي يابعد ابو لبدة ياخويه فرقان هذا انت هذا انتتتتت ماصددكككك والله
فرقان:- ها ولك سرسري تبجي عليه حراااااامات فاتتني هاللقطه التاريخية
حيدر:- انجب حيوان مشتاقللك حيل وينك انت وين مكانك شدسون شلونك شلونها جلنار وينها شديصير وياكم ليش ماخابرتوني كل هالمده احجي شبيك ساكت احجي وين انت ويننننن
فرقان:- خاااااااايب دكااافي الله ولحد عليك انطيني مجال اجاوبببككك
حيدر :- لاياكلب والله اشتاقيت لصوتك ماظنيت يجي يوم واشتاقلك هالكد من كثر مالازك بخشمي ٢٤ ساعه مدبك بيه.
فرقان:- هههههههه لعد شعندي غيرك أحبل اجيب وخل اجاوبك انطيني مجال اول شي تريد الصدك لو الجذب؟
حيدر:- طبعا الصدك وياويلك اذا تجذب بحرف.
فرقان:- ماشي ماشي اول شي انه موزين دست ع مصياده ورجلي تنزف وتعبان كلش وجلنار.....
حيدر:- شكو!! شبيها جلنار ماتحجي شبيييهاااا انه شموصيك عليهاااا فرقااان بس لا صاير بيها شي وللك
فرقان:- لا والله مخليها بنص عيني بس حالتها تكسر باب الكلب وحق علي مكسوره ع موتت امها كلساع تكلي اريد اموت واروح لأمي
ووجهه صاير نوميه ماعدنا لاكل ولاشرب راح تموت من الجوع والعطش ومجلبه نهار كله بغلاف النستله مالتك
ودموعها تصب وانه ماتواصلت وياك لان جهاز النداء مالكيته بهندامي واكع مني من جنت احاول اشيل بجلنار
واشرد بيها ومكانه حدليك عليه افتح ايبادك...
حيدر:- حددت موقعهم طفرت من مكاني وشنيت هجوم عليهم صرخت بيهم وهم بسابع نومه
_ لكيت فرقان بسااااااااااع ثواني والكاكم محضرين روحكم بسرعه خل نوصللهم فرقان ينزف
حسام:- فررررررقااااان تحجي صدككك، طفرت من مكاني ركضت ابدل ملابسي.
كرار:- لا بربك شوكت شلون ليمته دريت ووين هو كايم ابدلللل.
مرتضى :- ها شني ياهو وفاتح تك عين شبيهم ذوله يصيحون تالي الليل نريددددد ننطمرررر وماحس غير ايد شالتني من ياخة قميصي ورفعني لفوك
حيدر:- تكعد لو اشيلك واركعك بالكاع وهيج تصحصح؟
مرتضى:- هيهيهي ريس اشاقه وياك ضحكت اسلكله حتى لايركعني يسويها هذا مسودن
مروان:- الف الحمدلله ربي لكينا مكانه
حيدر:- الحمدلله يلا اخواني استعجلوا اريد همتكم
كملوا ع سريع وطلعنا بدينا نطلع من مكان البيت
ومشينا ع الشارع نرجع لمكان الهمرات مثل ماوصف فرقان كبل طريقه مستقيم كللله انه مشيت شويه وبعد ماتحملت
رجليه ماشالني كمت اركض وبكل قوه وحيل عندي اريد اوصل لأخوي بأسرع وقت مرت ساعات من الركض واللهفه والتعب وصلت ولكيته......
حيدر:- فر فررقا ااننننن، واكفلي بباب البيت المنقض ومسند نفسه ع الحايط بتعب وذبول ملامح روحها لروحي من الألم كسر حيلي تجمدت رجليه عن المشي وصدري يصعد ويهبط بعنف مخيف
فرقان:- يابعد نظر اخوك، ودموعي صبت سحلت رجلي المجروحه ورحتله من شفته عاجز يجيني من الصدمه
حيدر:- فرقان ونكطع نفسي جريته شبكته حيل بكل قوتي
فرقان:- عيون فرقان ياخويه شفت الويل بدونك وعلي صدك جنت ظل وسند ورانا بس احنا ماحاسين بهالشي
حيدر:- شلونك خوما متاذي انطينك رجليه وعافيتي وعمري بس لاتتاذى من شي
فرقان:- فدوه رحت لعمرك لا عضيدي مابيه شي جني حصان شرطه
حيدر:- امانتي؟
فرقان:- بالحفظ والصون وببطن العين ورمشها هذيجياها جوه توها كعدت
طبيت للبيت دخلت ممر صغير وكامت تلالي نار كدام عيوني
نار شعرها الحرك كلبي حرك وخلاني اشتعل بمكاني
محنيه الظهر حاضنه رجليها لصدرها وترسم بالكاع مدري شنو وظفيرتها السويتها الها متربه وخربانه
اذاني منظرها ندهتلها بهدوء..
حيدر:- ابني.. التفت مفزوعه من الصوت ومن شافتني فتحت حلكها من الصدمه ووسعة عيونها ابتسمتلها بس فجأه ذبلت معانيها بحزن ونظرة الانكسار غزت ع عيونها
عرفت شبيها وفهمتها
جلنار:- ححح حيدررررر وشهكه غصت بيها انفاسي اريد احجيلو اريد اشكيلو بس اختفى النطق عندي.
حيدر:- ادري ابني ادري تعالي، فتحتلها ايديه ركضت جايه عليه ودخلت لحضني ولململتها بين ايديه
احاول الملم جروحها، كسرها، ضعفها، خوفها، احساس اليتم اليهدم بالروح هدم...
جلنار:- حيدررر اميي ماتتت حيدررررررر، صرخت متوجعه من كلبي الشبع ضيم وقهرر
حيدر اريد اميي انت حباب هسه تجيبها اليه موو؟،ماجاوبتها ضليت امسح ع ظهرها واردد بآيات القرآن خير علاج للمكسوره كلوبهم
حيدر:- اخ يابويه ألتمت هالدنيا كلها عليج ومارحمت بحالج
جلنار:- حيدر فدوه دحكلي انت حترجعلي امي مو والله ماعندي غيرها والله ماعندي حيدر احلف بالله محد اليه غيرها قبانو حيدررر قبانو الله يخليك
حيدر:- اششش ابني لاتعب نفسك كافي ماتشوفين شصاير بحالج منتهيه فدمره وثانيا ليش محد الج شنو انه هنا لوحه بمعرض الخلفوج
جلنار:- اري اريد امييي انه ماعيش بدونهاااااا
حيدر:- كلنا نعيش وتمر حياتنا هذا قضاء وقدر كتلج ذاك يوم كلنا حنمر بهذا الدرب بس هو صعب علينا نفقد اعزاز كلبنا بهيج طريقه
جلنار:- موتني موتني اكتلني خلاص خلي طلقه براسي وريحني من هالعيشه هاي السوددده خلي اروح يم امي حباب ابوس ايدك موتني
حيدر:- شبيك جلنار تخبلتي شنو هذا الحجي اذا سمعته بعد منج حتشوفين شي مايعجبج، فتحت ايدي من ثانيه وحضنها تعالي ونجبي يلا.
جلنار:- ضليت حاضنتو وابجي لوقت كلش طويل فرغت البكلبي كلو كلشي صار ويانا فرغتوا هينا من ألم وحزن وتعب وهم وقهر من فتحلي احضانو حتى يخفف عني كسري مارفضتو لان مالي ملجأ هسه غيرو هو
حيدر:- وخرتها ع كيف مسحت دميعاتها عيونج ورمن من البجي ورمن شنهاي الكفشه ولج شو تعالي اكعدي جريتها كعدتها
فتحي شعرج خل امشطه الج باوعتلي ودمعه نزلت منها
جلنار:- انه مو بحال شعري الزفت
حيدر:- انه بحاله ولتكولين عليه زفت تادبي لسانج صاير طويل يراده كص هاج، طلعلتها نستله من جيبي
فتحت ايدها وخليتها بيدها، يلا اكليها علما ادبرلج شي تاكلينه تمام.
جلنار:- ماشي اخذتها منه بعد مافتحها إليه.
حيدر:- وبالعافيه ست نار جهنم.
جلنار :- هاا، مافهمت قصدو اخذت ظفيرتي بيدي مرتبه بشكل حلو
_ شكرا حيدر
حيدر:- ع شنو تشكريني ولج.
جلنار:- ع كلشي اشكرك حيل......
__________________________
انتهى هالبارت
شنو رأيكم بي؟
أكثر مقتطف عجبكم؟
_ الله واكبر
_ سبحان الله
_ لا إله الا الله
_ الحمدلله
_ استغفرالله ربي واتوب اليه