العقاب المتناقض

بارت 16

بنات قلبي لتنسون التصويت بين الفقرات + متابعه لحسابي فضلاً وليس أمراً ✨

#الكاتبه_اماني_المحنه✨
_---_
                         روحي يمچ وين ما رحتي وسِكنتي"🩵🫧..
______________ •_•

اقترب منها حسام شويه شويه وهوه مصدوم من منضرها والحاله الي هيه بيها، اردف بخوف

: ع.. عع.. عبيرر.. ششبيج ش.. شنووو.. شصصااارر..

لكن عبير ما ردت علي ولا تحركت، باوع لبنته رفع ايده وتلمس وجه..
لا صوت و لا نفس ولا حركه..
جسمها بارد .. وعيونها مفتوحات على كبرهن..
رجع حسام لوره مصدوم وادينه على راسه واردف: مماتت.. ززهراء.. ماتتتتتت

خافت بنته حوراء وبلشت تبجي وكأنها فهمت انو بعد ما تشوف اختها للابد

اردفت عبير بصوت خافت و بنتها بين ادينها
: كله بسببك.. انته الي قتلها..

حسام: اني شكو بالموضوع شنو تردين تلبسيني تهمه وتسجنيني...

عبير صاحت بصوت عالي: كله بسببك يا حقيررررر

حسام: يمعوده كولي يا الله.. شنو بسببي تره هيه طفله عليله من ولادتها بعد شكو تهميني شبيج تخبلتي انتييي..

تهسترت عبير واردفت وهيه شايله بنتها

: روح.. روح جيب الاسعاف بسرعه

حسام بحسره ودموع اردف: ولج يا اسعاف الطفله طلعت روحه وهيه بين اديج..

باوعت عبير لبنتها وهزتها حتى تكعد لان ما تكدر تستوعب انو بنتها ماتت بين اديها واردفت
: زهراء مامه... زهوري يروحي.. باوعي عليه.. حاجيني يروح امج.. شوفي.. شوفي هاي حوراء تبجي عليج كومي اللعبي وياها.. باوعيلي زهراء مامه... زهوري حاجيني يمه.. بس كولي شنو اليوجعج.. شبيج مصدوفه وجهج صار لونه شاحب..

هزتها حيل ودموعها تجري، رجليها ما شالنها كعدت على الارض تصرخخ وتنحب وما ترضى تخلي بنتها على الارض حتى لحد ياخذها منها و اردفت منهاره

: حاجينييييي يمه بنيتييييييي.... زهرااااااء...

حوراء صرخت وخافت من انهيار امها وشافت شكل اختها انرعبت اكثر..

حسام من شاف الوضع هيج صار طلع من البيت بدون تفكير وركض وماحس بروحه اله وجلينه ما خذاته عند باب بيت ايار و زمرد.. وكف محتار متوتر الوقت متأخر ودنيه ليل العالم نايمه والشوارع تصفرر.. صوت حشرات الليل وكلاب الشوارع تنبحح.. رفع ايده ودگ الباب

زمرد و ايار جانو بسابع نومه بس لمن اندك الباب فز ايار باوع شاف زمرد نايمه بصفه و حاضنته باسها على كصتها و شال ايدها عنه بشويش حتى لا تفز.. دكات الباب تعلى.. نزل ايار من الجربايه ولبس قمصلته لان الجو بارد واردف متعجب وهوه يمشي

: غريب منو يجينه بهل وقت..!

فتح الباب وجان يشوف حسام لكن ما عرفه لان ما شايفه من قبل

: منو انته؟

: هذا بيت زمرد مو؟

: اي ليش منو انته؟ وشتريد منها؟

: اني حسام زوج اختها عبير

: خير شصاير خوفتني؟ شمسوي من مصيبه؟

: جيب زمرد وتعالو وياي للبيت لان وضع عبير كلش تعبان ومكدر اسيطر عليها..

: شصايررر احجيييي خرعتنيييي

: هسه جيب مرتك وتعال وتعرف هناك بس بسرعه لان عفتهن وحدهن بالبيت و حالتهن صعبه..

وصلو لبيت حسام وسمعت زمرد صراخ عبير و نوحها حطت ايدها على قلبها ودخلت وجان تشوف المنضر القاسي و المفجع كدامها.. شافت عبير متربعه على الارض وتنوح وبنتها زهراء بحضنها الوجه شاحب والعيون مفتوحه و حوراء خاتله وره امها ولازمتها حيل وتصرخ مرعوبه.. زمرد بهذيج اللحضه حست انو الزمن انعاد عليها لمن شافت اختها علياء تموت كدامها وهسه بنت اختها جثه كدامها.. تحجرت بمكانها ومكدرت تستوعب عيونها قطرن دمع بدون ما تبجي من الصدمه.. ايار شاف وضعها وكف يمها لزمها من جتافاتها هزها واردف
: زمرددد.. لا تنفجعين حاولي تصيرين قويه وتساندين اختج هسه ماكو مجال للصدمه لازم تقوين روحج للاجل اختج.. زمرددددد

غمضت عيونها زمرد بقوه والدموع تنزل فتحهن وباوعت للايار واردفت بحزن

: صح مو وقت الانهيار هسه لان اختي بحاجه الي...

مسحت دموعها وتصنعت القوه
راحت لحوراء شالتها وباوعت شافت حسام كاعد وساند ضهره على الحايط واديه على راسه وينحب على فقدان بنته فراحت وانطتها للايار واردفت

:خلي حوراء عندك ضل شايلها واحضنها حاول تحسسها بلامان حتى تهدء لان الطفله مصدوفه

اخذها بحضنه ايار واردف: بس دليني بغرفتها حتى اخذها هناك اتمشه بيها وانومها خطيه...

اخذته زمرد لغرفة اختها ورجعت لعبير  اقتربت من اختها وحاولت تجنب انو عينها تصير على زهراء حتى لا تنهار حاولت بقدر الامكان انها ما تشوفها او تصد عينها بعين هل طفله المسكينه..
نزلت على ركبها يم اختها حطت ادينها على وجه اختها تمسح بدموعها وتبعد الشعر عن وجه واردفت

: عبير.. اذكري الله حبيبتي..

رفعة راسها وباوعت بعيونها واردفت

: شوفي هاي اني زمرد خيتج..

اردفت عبير ودموعها تنزل: ماتت بنتي ماتتت بعد ما اشوفهااا.. مكدر مكدر على فراكها ولججج مكدررر..

زمرد: لا زهراء نايمه ما ماتت لتخافين هسه باجر الصبج تكعد يروحي

باوعت عبير لبنتها نوب باوعت لزمرد واردفت بفرح ممزوج بحزن

: تحجين صدك! يعني زهراء ما ماتت..!

زمرد: لا يروحي ماكو هيج شي..

باوعت زمرد لحسام واردفت: تعال اخذ زهراء نومها بفراشها

باوعلها حسام وهز راسه ب (لا) لانه يعرف ومتاكد انو زهراء ماتت فصاحت علي زمرد واردفت: تعال اخذ الطفله كتلك.. بسرعه..

وكف حسام على حيله واجه لزم زهراء يريد يشيلها وجان تلزمها عبير حيل وتصرخ بوجه
: لااااااااا.. لا تاخذها من حضنيييي.. لا تاخذوهااا الله يخليكم.. خلوني اشبع منها لا تحرموني من شوفتها..

ابتعد حسام ونزلت دموعه على خده لمن شاف حالتها.. حطت زمرد ادينها على خدود عبير واردفت
: لا حبيبتي شلون نحرمج منها مو كتلج راح ناخذها لفراشها لانها نامت

عبير: بس زهراء ما تنام اله على ريحتي وحضني اخاف تفز بليل وما تلكاني يمهاا.. خلوها بحضني فدوه..

زمرد: لا حبيبتي ميصير خلي نحطها بفراشها لان انتي تعبانه شويه من ترتاحين روحي يمها.. يلا حسام تعال شيل زهراء وحطها بفراشها..

اخذها حسام من حضن امها وضل واكف يباوع على بنته بحسره وما يعرف شيسوي..

اجه ايار واردف: نامت حوراء بس خطيه مستهضمه وخايفه..

زمرد كومت اختها على حيلها واردفت وهيه ساندتها حتى تمشي لان رجليها ما يشيلنها من الهبطه..

: تعاي نامي وارتاحي والصباح رباح يروحي انتي..

وكفت يم ايار وهمست بأذنه: خابرو سمير خلي يجي بس لا تكله بشي لان امي مريضه وخاف يصير عليها شي.. عود الصبح نكلهم..

ايار: صار هسه اخابره..

رن مبايل البيت الارضي الي بصالة الكعده وجان نايم بيها ابو سمير لان جوري نايمه يم زوجته بالغرفه وسمير بغرفته.. رفع الاب المبايل

ايار: سمير تعال لبيت اختك عبير بسرعه بس لا تكول للاحد..

وانقطع الاتصال..

زمرد ضلت يم عبير بالغرفه حتى تهدئها وتنومها وايار ضل يم حسام اقترب منه معصب واردف
: انته واحد بلا وجدان واحد اناني ومصلحجي والي مثلك المفروض ينقرضون.. شنو شعورك هسه وانته شايل بنتك وهيه جثه بسبب بخلك وتقصيرك.. شتكول لنفسك هسه.. شنو ذنب زوجتك وبنتك الثانيه حتى يشوفن هل صدمه الي ما راح يتخطنها اصلاااا..

نزل راسه حسام وبجه اردف

: اسكتتتت الله يخليك والله الي بيه مكفيني..

ايار: ليش ضميرك هسه يلا صحى.. شنو ذنب هاي الملاك الي بين اديك! امثالك حرام واحد يزوجهم ويصير عدهم خلفه
لان هاي امانه وانته مو كد الامانه الي الله وهبها الك.. انته ما حافضة على الامانه ولا صنتها..

حط ايده حسام على وجه بنته وغمض عيونها ودموعه تجري..

بعد دقائق اندك الباب

راح ايار واردف: هذا اكيد سمير اجه..

فتح الباب وجان ينصدم بشوفة ابو سمير مو سمير اردف ابو سمير

: شصايررر..!

باوع ايار لحسام بسكوت وهوه مندهش
زمرد سمعت صوت ابوها فطلعت من الغرفه بعد ما نامت عبير

ابو سمير: شصاير..!

زمرد: ابويه!

ابو سمير: زمردد..! شكو مجتمعين هنااا احجووو..

باوعت زمرد للايار وهمست بأذنه: اني كتلك سمير مو ابوي

ايار: والله مادري تره بسرعه طلبت من سمير يجي بس الضاهر ابوج الي جان وياي على الخط..

ابو سمير: شبيكم تتهامسون..؟ عبير وين؟ تره قلقتونيييي..

دخل ابو سمير للبيت وجان يشوف حسام كاعد وبنته على الارض ومن النضره الاولى عرفها ميته..

باوع الهم ابو سمير واحد واحد واردف

: واحدددد منكممم يفهمنييي السالفه...!

رفع راسه حسام واردف بحزن: زهراء ماتت.. ما تحملت المرض.. و..

ابو سمير: عبير وين..؟

زمرد: عبير انهارت واخذتها لغرفتها ونومتها لان وضعها كلش صار صعب وخفت لا يصير بيها شي لا سامح الله

ابو سمير: كوم انته خو ما ضل تباوع بوجه الطفله وتتحسر.. كوم خلي ندفنها

حسام: وين ندفنها؟

ابو سمير: بمقبرة الجهال قريبه منا..كوم هسه لان ماريد عبير تكعد وتشوفها..

زمرد عصبت من برودة مشاعر ابوها واردفت وعيونه مليانه دموع

: شكد بارد قلبك لعدد..! معقوله ما حن قلبك على حفيدتك وخاصه لان بعد ما تشوفها..

باوع الها ابوها بس مرد عليها شال زهراء بين ادينه واردف

: حسام تعال وراي وخلي ايار يضل يم زمرد و عبير لمن ما ندفن الطفله و نرجع..

طلع ابو سمير و حسام من البيت زمرد انهارت واردفت

: شفته شكد بارد وبلا مشاعر

ايار: بالعكس احس سوه زينة العقل يعني بمكان ما يصيح ويتعارك مباشر فكر بالطفله علمود يدفنها وماضل بالكاع هيج خطيه.. ماعرف بس لمن ابوج شال الطفله وطلع بيها حسيت بحنيه

زمرد: لا ايار هاي لان انته انسان طيب وحنون عبالك الناس كلها مثلك.. ابويه يكره الاناث بشكل عاممم افهمم..وعمره ما حن على زهراء و حوراء تريده حسه يحن لمن ماتت الطفله سوده عليه

ايار: تمام اهدي لا تعصبين تماام..

كعدت زمرد بالكاع وبجت بكل حرقة قلب مكسور كعد يمها ايار وسند راسها على جتفه حط ايده على خدها واردف

: لا تبجين عليها لان هيه خلصت من الالم والعذاب وراحت لاجمل الاماكن والاحلى انها طير جنه..

اردفت مستهضمه: بس الفراگ شيحمله يا ايار.. تخيل انك تحب شخص ومتعلق بي وبدون سابق انذار تفقده للابد و بعد ما تشوفه.. و مع مرور الايام تنسى حتى ملامحه.. الله يصبر عبير على فقدان بنتها مثل ما صبر امي على فقدان علياء..

ايار: اللهم امين يارب العالمين..

او ما طلع الفجر صحة عبير وما لكت زهراء بحضنها كامت مفجوعه وهيه دور بالبيت عنها، شافت ايار و زمرد غافين وهمه كاعدين وحسام وابوها نفس الحاله.. اردفت بصوت عالي

: وينهااااا وينهاا بنتي زهراااء..

فز الكل على صوتها.. اقتربت من زمرد واردفت ودموعها تنزل

: وين زهراء انتي مو كلتي نامتتت هااا... وين اخذتوها

ايار عصب من زمرد لمن عبير حجت هيج، باوع لزمرد بغضب بس كتم بداخله..

اردف ابو سمير: الطفله ماتت و دفنها لان حرام ضل هيج بالبيت ميصير..

لطمت عبير على راسها وكامت تنكش بشعرها وتردف

: يماااا... يمااا.. دفنتوها! شلون انطاكم قلبكم تعوفوها وتجون.. تره هيه تخاف وحدها متعوده تنام بحضني وعلى ريحتي.. ش.. ششلون قنعتوها تبعد عني.

وكفت زمرد على حيلها وحضنة عبير بقوه..

لكن عبير دفعة زمرد بقوه واردفت

: كله بسببج انتي..

زمرد: اني..!

عبير: اي انتي..

زمرد: ليش شسويت اني...!

عبير: كتيلي لا ترجعين لحسام لان مو كل مره تسلم الجره كافي توبي لان راح يجي يوم ويكسر قلبج الكسره الحبيره الي بعد ما تكومين منها..دامج تعرفين هل شي راح يصير ليش بوقتها ما اخذتيني يمج وقفلتي عليه الباب ومنعتيني من الطلعه جان ما فقدت زهراء هسه..

رجعت زمرد وحضنتها لانها تعرف بيها منهاره وتحجي هيج من حركة اعصابها

اردف ابو سمير: لازم تصبرين وتتحملين هاذا امتحان اصبرو انتي و زوجج وهم بعدكم شباب

وخرت عبير عن زمرد وباوعت للابوها واردفت: اني طالبه الطلاق ومستحيل اضل ثانيه بعد ويا شنو انتضر او صبر حتى تموت بنتي الثانيه موووو..

ابو سمير: جيبي بنتج وتعالي يلا

عبير: بس اطلق منه ومارجع لهنا بعد

ابو سمير: ان شاء الله..

راحت زمرد وجابت حوراء وطلعو كلهم ما عدا حسام صفه وحيد بين اربع حيطان...

وصلو للبيت دخلو كلهم شافتهن الام واردفت
: اسم الله شبيها وجوهكم هيج تعبانه؟ اشو بس حوراء وياكم لعد زهوري وين؟

سمير: مفتهمت ليش كلكم جايين ويه ابوي؟

اجت جوري و كفت كدامهم واردفت

: منو هذوله؟

زمرد: منو هاي..!

_____________يتبع *