اتصل ليها قال ليها: اطلعي انا جيت
مَهره مشت كلمت امها قالت ليها: انا طلعت خلاص
نُزهه قالت ليها: خلي بالك من نفسك يابتي
مَهره باست راسها ومشت ، لقت عمران واقف بالعربيه،جات وقفت ليهو بالشباك قالت: والله م عرفتك جبتها متين
عمران ضحك وقال ليها: من زمااان انتي م كنتي حاضره بس
مَهره ركبت قالت ليهو: مبروووك
عمران ابتسم وقال ليها: الله يبارك في عمرك
اتحركو مَهره قالت ليهو بإستغراب: ماشين وين؟
عمران قال ليها: اصبري قربنا خلي الشفقه
مَهره كشرت وشها وقبلت منو، عمران ضحك وم قال شي ،
قال ليها: وصلنا انزلي
عاينت ليهو بإستغراب: انزل هنا؟
قال ليها: اي في شنو؟
مَهره حمرت ليهو ونزلت بقو ماشين برجلينهم ومَهره ساكته ، عمران قال ليها: بتفكري في شنو؟
مَهره سكتت ،عمران وقفها قال ليها: يابت مالك
مَهره عاينت ليهو وقالت: بفكر في حياتي الجايه
عمران رفع حاجبو وقال ليها: حياتك الجايه عباره عن بيتنا واولادنا
مَهره خجلت م قالت شي، وصلو محل فاتح ع النيل مَهره كانت مستغربه من المكان، خلاها تدخل وهي لقت الباب فاتح دخلت وعمران دخل وراها ، مَهره بقت مخلوعه من الفخامه بتاعت المحل بقت واقفه مذهوله فجأه اشتغلت الاغنيه الهي بتحبها وكانو بيغنوها هي وعمران طوالي "من بسمه ونظره" ابتسمت وعاينت ليهو وبقت تدندن مع الاغنيه وتعاين ليهو بكل حب بعد الاغنيه انتهت بقت تعاين لعمران قالت ليهو: عملت شنو في الدنيا دي عشان ربنا يختك في طريقي
عمران قال ليها: عشان ببساطه انتي طيبه وعلى نياتك وربنا بحبك عشان كدا بيسهل ليك اي شي انتي بتحبيهو
مَهره بقت سرحانه فيهو ومشاعرها م مفهومه فرح على شوق، كل البتعرفو بتتمنى يكون معاها على طول
ساقها من يدها وقعدها في التربيزه ،مَهره اول م قعدت اتخلعت قالت ليهو: رسوماتي بتعمل هنا شنو
عمران ابتسم ليها وم قال شي، هي بقت تشوف رسوماتها رسمه بعد رسمه ، وعمران راسم ابتسامه على وشو ، لحدي م وصلت اخر رسمه رفعت الورقه لقت كرت مَهره ظهرت في وشها ملامح الاستغراب رفعتو عاينت ليهو وعاينت لعمران ، اول م خلصت قرايه قلعت عيونها قالت ليهو: عمران،؟؟؟
وقفت على حيلها قالت ليهو: بجد عملت كدا؟ بجد هاشارك في مسابقه؟؟
عمران حرك راسو بمعنى"اي" ، هي بقت تكورك وبتنطط وفرحانه عمران قال ليها: رسلت ليهم تصاميمك ورشحوك للمسابقه ، بعد شهر ونص من هسي
مَهره عاينت ليهو وعيونها بتحكي الف كلمه قالت ليهو: يعني هنسافر؟؟
عمران حرك راسو بمعنى" اي" وطلع من جيبو تذكرتين قال ليها: حجزت من بدري
مَهره م قدرت تتكلم بقت واقفه بتعاين ليهو وهي مذهوله ، قطعت صمتها وقالت: بحبك يا عمران بحبك شديددد
عمران جا عليها ومسك يدها وقال: وانا بريدك شديد يا مَهره
طلع علبه من جيبو وفتح ليها العلبه مَهره بقت مخلوعه وبتعاين ليهو قالت ليهو: دا الخاتم الكنت عامله عليهو ريتويت في تويتر
عمران ابتسم وقال ليها: زمان م كنت قادر اجيبو عشان بادي شغل يادوب بس قدرت اجيبو ليك هسي
مَهره دموعها نزلت وم قالت شي ، عمران طلع الخاتم ولبسو ليها قال ليها وهو مبتسم: كدا بقيتي خطيبتي ، معليش م هأقدر انزل ع ركبتي واعمل دراما وبتاع لاني عجزت "وضحك"
مَهره عاينت ليهو مخلوعه قالت: كيف يعني خطيبتك؟
عمران ضحك وقرب منها خطوتين هي وقفت في مكانها اتصمغت نزل راسو براحه وقرب من اضانها همس ليها: بقيتي خطيبتي والعقد بعد اسبوعين من هسي والعرس بعدو باسبوعين وم هانقص يوم واحد
زح منها ومَهره بتستوعب هو قال شنو بعدها قالت ليهو: عمران!!والمسابقه!
عمران عاين ليها وابتسم قال: هنمشي انا وانتي عروسين نخلص مسابقتك ونواصل شهر العسل
مَهره ابتسمت م قالت شي، عمران ضحك قال ليها: يوم بتموتي بخجلك دا
مَهره ضحكت ومشت قعدت مع عمران في السفره وكل شويه تعاين للتذكرتين والخاتم والكرت ، عمران مبسوط لفرحها
رجعت البيت وهي بتدندن مشت لامها قالت ليها: امي عايني عمران عمل شنو
نُزهه قالت ليها: عمل شنو
مَهره بفرحه ظاهره في ملامحها قالت ليها: عمران رسل رسماتي لمسابقه ورشحوني في المسابقه وهنسافر الاردن ، "ورفعت ليها التذكرتين وواصلت" وهنمشي انا وهو
نُزهه ابتسمت وانبسطت من عمران قالت ليها: عمران دا سيد الرجال والله
مَهره رفعت يدها وقالت ليها: وجاب لي الخاتم النفسي فيهو
نُزهه ضحكت وقالت ليها: ان شاء الله دايما مبسوطه يابتي واشوف اولادك واشيلهم
مَهره باست راسها ودخلت غرفتها وهي مبسوطه وطايره من الفرح ...
في جانب عمران
جا داخل بدندن وبينادي في اختو: مَهره!! مَهره
جاهو صوت خالتو نجوان قالت ليهو: مَهره في الحمام ، مالك
عمران قعد في الكنبه وقال ليها: طالما انتي هنا تعالي عايزك في موضوع
جات خالتو ومَهره كمان جات بوراها قعدو الاتنين عمران قال ليهم: قررت اعرس مَهره خلاص
نجوان وقفت على حيلها وختت يدها في صدرها بخلعه قالت ليهو: سجميي
عمران بإستغراب قال ليها: مالك؟ في شنو
نجوان قالت ليهو: انا مش قلت ليك البت دي م معروف عملت شنو من ورانا؟
عمران وقف على حيلو وقال ليها: قلت ليك م عملت شي وانا عارف مَهره عملت شنو في غيابي
نجوان لوت خشمها وقالت ليهو: والله هتندم ندم عمرك انت لسه في بدايه عمرك عايز تعرس واحده زي دي
عمران قال ليها: خالتي معليش انا غير مَهره م بعرس ، وكلمت اعمامي جايين بعدين هنمشي ليهم
نجوان قالت ليهو: عايز تعمل شي غصب عني؟؟ يحليلك يا اسمهان يا اختي ولدك م اداني قيمه ماشي لاعمامك الما سألو منكم لمن ابوكم سافر ؟
عمران قال ليها: يا خالتي امي زاتها لو كانت قاعده هنا كانت اول واحده مشت خطبتها لي وانتي عارفه بتحب مَهره قدر شنو وبالنسبه لابوي ف انا كلمتو وهيجي في العقد واعمامي سايقهم عشان دي الاصول بتقول كدا وانتي عارفه لو خالي زاتو قاعد هنا م كنت احتجت لاعمامي صح؟
نجوان سكتت م قالت شي، قال ليها: بعدين هنمشي ليهم لوو عايزه تجي تعالي، بس من غير م تخربي شي وم تعايني لمَهره بنظرات تضايقها طيب ياخالتي؟
نجوان لوت خشمها وم قالت شي، عمران دخل غرفتو دخل الحمام اخد ليهو دش وطلع يجهز هدومو ، الباب خبط قال: ادخل
جات مَهره اختو داخله وهي مبتسمه قالت ليهو: واخيراً هأفرح بيكم
عمران ابتسم ليها وقال: هأفرح بيك انتي زاتك قريب
مَهره قعدت قالت ليهو: ان شاء الله
عمران ضحك وقال ليها: الشفقه تطير
مَهره ضحكت قالت ليهو: خليهم بكويهم انا
عمران ابتسم وقال : انا م عارف السر فيكم ولا في اسمكم
مَهره بإستغراب قالت ليهو: سر شنو اجي؟
عمران قال ليها: حنيتكم وخوفكم علي
مَهره قالت ليهو: عشان الاتنين بنحبك
عمران باس راسها وقال: يابختي بيكم وبُحبكم
في المساء
عمران كلم اعمامو وفعلاً جو الاتنين الكبار وساق خالتو واختو ومشو خبطو باب مَهره، احمد فتح ليهم الباب وضيفهم دخلو وقعدو كلهم جات نُزهه سلمت عليهم ورجعت لمَهره في الغرفه ، جرت منها البطانيه قالت ليها: قومي النايمه ليها شنو
مَهره بخلعه قالت ليها: امي م نايمه بس متمدده اجي؟ ودا منو الجا؟
نُزهه قالت ليها: يابت ها؟؟ انتي جنيتي ولا شنو دا عمران واهلو شكلهم جايين يطلبوك عامله فيها غبيه وم عارفه؟
مَهره ضربت راسها وقالت: عمران م قال لي جاي يا امي
نُزهه حمرت ليها ومرقت تضايفهم ، مَهره رفعت التلفون بتتصل لعمران بيقفل الخط ، رسلت ليهو رساله في الواتس قالت ليهو: انت جنيت؟؟ م كلمتني مالك؟
عمران طوالي رد ليها قال: يفترض تكوني عارفه هأجي في اقرب وقت لاني م بستحمل تاني
مَهره ردت ليهو وهي معصبه قالت ليهو: جاي تخطبني يعني؟
عمران رسل ليها: اي يابت انتي غبيه ولا شنو
مَهره قالت ليهو: م طالعه م طالعه وم جاهزه انا هسي اطلع لاهلك كدا يعني
عمران رسل ليها وقال: م بتحتاجي صدقيني
مَهره رسلت ليهو قالت: والله يوم هتجلطني
قرا الرساله وم رد ، بقت ماشه وجايه في الغرفه جات نُزهه قالت ليها: شوفي ليك اي شي تلبسيهو سريع
مَهره عصبت قالت ليها: البس شنو ياخي هو م كلمني
قبل امها تتكلم جات مَهره اخت عمران دخلت ، مَهره قالت ليها: شفتي اخوك عمل شنو؟
مَهره اخت عمران ضحكت وقالت ليها: م تتضايقي ارح اقعدي بمكيجك انا
مَهره قعدت وهي مكشره ، اخت عمران قالت ليها: يابت افردي وشك دا بيقع منك
مَهره قالت ليها: دا كلو من اخوك لو كلمني كان حصل شنو
مَهره اختو ضحكت وقالت ليها: كنت عايزه اجيك من قبيل لكن هو ابا لي
مَهره اتنهدت وقاعده مكيجتها مكياج بسيط وطلعت ليها فستان من فساتينها ولبستو
عاينت في المرايا وقالت بزعل: هسي دا شكل واحده جايين يخطبوها
مَهره اخت عمران قالت ليها: مالك هسي زي العسل
مَهره سكتت م قالت شي، جات امها قالت ليها: امرقي اطلعي ليهم
طلعو الاتنين ، عمران اول م شاف مَهره عيونو بقت قلوب عديل، بقى يحاول يداري نظراتو عشان اعمامو وابوها قاعدين ،مَهره سلمت عليهم وقعدت ، خالتو بتعاين ساي وم قالت شي ،
ابوها قال ليها: اها يابتي عمران طلب يدك موافقه؟
مَهره خجلت ودنقرت راسها ، ابوها قال: السكوت علامه الرضا ، على بركه الله
امها ومَهره بقو يزغردو ومبسوطين ، عمران قام وجا قعد جنبها طلع العلبه وفتحها شال الدبله ولبسها ليها ، مَهره للحظه نست اي شي وبقت مبسوطه شديد وبتعاين لعمران وهي مبسوطه ، مَهره اخت عمران بتصور اللحظه وامها بتزغرد ، عمران طلع وصل اعمامو وخالتو وجا عشان يسوق مَهره اختو ، طلعو ليهو الاتنين عمران قال: ياساتر
مَهره حمرت ليهو وقالت: م كلمتني مالك
عمران قال ليها: معقول عسل زي دا في يوم خطوبتو يكشر كدا
مَهره اختو بتضحك فيهم ، عمران قال ليها: طلعتي حلوه شديدد شديد
مَهره فصلت طوالي ، عمران ابتسم وقال ليها: بيناتنا تلفون "وغمز ليها"
ومشو وخلاها واقفه مبتسمه وبتعاين للدبله، بعد لمت البيت مع امها عايزين ينومو كدا الباب خبط
مَهره طلعت بإستغراب الصاله قالت ليهم: دا منو؟
نُزهه قالت ليها: بري م عارفه
احمد طلع فتح الباب وجا داخل معاهو ايمن
نُزهه قالت بخلعه: ايمن ولدي!!!!
#يتبع....