العقاب المتناقض

بارت 14

بنات قلبي لتنسون التصويت بين الفقرات + متابعه لحسابي فضلاً وليس أمراً ✨

#الكاتبه_اماني_المحنه✨

°^°^°^°^°^°^°^°^°^°♡

اندهش سمير وابتعد لورا واردف

: منو انتي!

البنت وهيه لازمه رجلي وتتوسل وتبجي اردفت
: يردون يعتدون عليه ساعدني الله يخليك ماعندي احد غير الله وغيرك فدوه لطولك ساعدنييي

سمير انقهر عليها وعلى حالتها التعبانه انحنى عليها ومد ايدينه ولزم اديها وكومها واردف وهوه يباوع الها

: تمام تمام اهدي لتخافين

اردفت: اخذني وياك فدوه لتخليني

سمير: وين اخذج وياي؟

: اخذني لبيتكم فدوه

: لا مستحيل ما اكدرر

لزمت ادينه حيل واردفت وهيه تبجي

: لا لا الله يخليك اخذني وياك حباااب ساعدنييي

: يابه بيتي بعيد كلش وطريق طويل وين اخذج وانتي ليش تثقين بيه اصلااااا؟

: عادي اخذني وياك موافقه

: عمي شلون اخذج وياي الناس شيكولون علينه يابه ميصير

: لعد شلون تخليني بحلگ الذيااب

*

زمرد تكلمت ويه عبير وهنه بطريقهن راجعات للبيت

زمرد: منو هذا ولج هااا؟

عبير: شسالفه زمرد ليش تكبرين الموضوع

زمرد: تره اني مو غبيه يابه، طول السفره واني عيني عليكم وشفت نضراتكم لبعض

عبير: لا نضرات ولا شي بس مجرد نعرف بعض وخلص شنو نسيتي اني وحده مزوجه شبيجج

زمرد: لا والله شكلج انتي الي نسيتي حبيبتي

عبير: هسه شنو المطلوب شسوي

زمرد: احجي منو هذا وشنو بينكم بسرعه

عبير: تره احنه بالشارع يابه بعدين احجيلج شبيج فضحتينه

زمرد: سهله خلي نوصل واني اعرف حسابي وياج

سند يمشي ويفكر بعركة اهله وباله مشغول بيهم ايار جان طول الطريق ملاحض علي فسأله
: شبيك سند احجيلي اشو اليوم ماكو لا ضحكت ولا اشاقيت مو سند الفرفوش الي اعرفه

زفر سند بضوجه واردف: والله ما اعرف شكلك يا خويه اني نفسي ما اعرف

ايار: اي شكو لعد ليش ضايج يا عيني

سند: ابوي و امي مدري شبيهم

ايار: اسم الله ليش صاير شي؟

سند: والله مادري بس صار كم يوم العلاقه بينهم مدهوره وكذا

ايار: اي عادي شي طبيعي يابه تره المشاكل الزوجيه صير بين كل ثنين خوفتني عبالي شو شصاير

سند: امي طالبه الطلاق

انصعق ايار لمن سمع هل كلمه لانه يعرف كلش زين انو العلاقه بين ام سند وابو ممتازه وعمرهم ما تعاركو بينهم دومهم العائله المثاليه المحبه فكيف وصلت بينهم للطلاق!

ايهاب وهوه ماشي اقترب شويه من عبير وسأل

: اكول زهراء شلون صارت؟

جاوبت عبير بخجل: بعدها مريضه بس ان شاء الله راح نعالجها بغداد عن قريب

زمرد عصبت وكفت بوجه ايهاب واردفت

: ليش انته منو حضرتك حتى تسأل؟

ايهاب: مجرد سؤال تره مسويت شي لا تسوين من الحبه كبه خيه

وكفت زمرد مقابيل ايهاب بغضب تخصرت واردفت: لا والله خاف متقبل عيني تعال اخذلك راجدي بعد تعال

ايهاب: مو من النوع الي يمد ايده على مره

عبير لزمت زمرد من ايدها واردفت

: تره الولد ساعدني لمن جانت زهراء مريضه لذلك يسأل عنها زمرد شبيج مو فضحتينه اسكتتتييي..

ايار انتبه عليهم وشاف زمرد وايهاب واحد مقابيل الثاني ماتحمل ايار هل منضر وحس روحه رادت تطلع من الغيره لان ايهاب جان اطول واضخم منه لذلك خاف يخطف الاضواء منه وتنعجب بي زمرد لان زمرد دوم تحسسه انه صغير و مو كفو.. مشى ايار ووقف بنص ايهاب و زمرد وجه صار بوجه ايهاب لزمه من ياخته واردف

: شعندك ويه زوجتي هااا

نزل عيونه ايهاب على ايد ايار الي لازم بيها الياخه نوب حط عينه بعين ايار واردف بغضب

: شيل ايدك

ايار بنضرة تحدي: واذا ما اشيلها شراح تسوي

سند اجه عليهم حتى يهدء الوضع

: هوب هوب يولد اهدو

ايهاب: والله شوف صاحبك الحقود جاي يدور مشكله

ايار صك سنونه واردف: لا حبيبي تريدني اتفرج عليك وانته تتعارك ويه زوجتي

ايهاب: ما متعارك وياها ولككك افهممم مجرد سوء تفاهم تره

ايار: لا مو سوء تفاهم بس انته هيج واحد حقير وتستغل الفرص شفتني مشغول شويه وهنه وحدهن واجيت عليهن انته حتى تنتهز الفرصه وتزحف عليها لان محد مگلبك

سند: لاه ايار شنو هل كلام

ايهاب عيونه جدحن نار وما تحمل رفع ايده وضرب ايار على وجه بوكس بكل قوته بحيث ايار رجع لوره من قوة الضربه، زمرد اشتعلت بنار لمن شافت ايار حبيب قلبها انضرب كدامها وخشمه ينزف دم.. ما كدرت تضل واكفه بمكانها راحت للايهاب والنار تطلع من عيونه وحواجبها معقوده وكأنها تريد تفترس ايهاب وتخلص علي لانه اقترب من اعز ما تملك، وهيه تمشي اردفت بكل قوه وغضب

: الايد الي تنمد على ايار اكسرهاااا
والي يرشه بماي ارشه بدممممممم

ايار باوع عليها شلون تحجي ودافع عنه
والطلاب كلهم منعجبين ومصدومين بنفس الوقت بقوتها وجسارتها وكأنها لبوه تدافع عن احد صغارها..

عبير تضرب على خدها وهيه خايفه وتردف

: يا ستار يا ربي راح تعلگ...

*

سمير حك راسه واردف

: انتي منين طلعتي الي هوه اني ناقص مشاكلل

باوعت البنت بعيونه واردفت بزعل

: يعني افهم من كلامك انو ما راح اساعدني مو؟

سمير: شسمج؟

توترت البنت وضلت تفر بعيونها يمنه يسره واردفت: اسمي!

سمير: اي اسمج شبيج توترتي هلكد شنو ناسيه اسمج؟

ابتسمت بتوتر واردفت: ههه لا بس انته فاجأتني بسؤالك

رفع حاجبه سمير واردف: هممم فاجأتج!

اردفت: اي

سمير: هسه شنو جاوبين لو بعدج متفاجأه

: اسمي جوري

: جوري..! عاشت الاسامي، زين منو وين انتي وشصاير وياج؟

: شنو ضروري اجاوب على هل اسأله

: انتي مو تردين اساعدج؟

: اي اكيد

: لعد مجبوره جاوبين

: هففف.. يعني ما اعرف شنو اكلك بس اني تربيت بالميتم اوو لمن طلعت من الميتم لكيت نفسي ملاحقه من شباب يردون يعتدون عليه ولكيتك انته واحتميت بيك هاي كل القصه

سمير رفع راسه للسماء وضحك مستهزء بكلامها عوجت حلكها جوري وهيه تباوع علي واردفت
: تره ماكو شي يضحك

باوع الها سمير وهوه يضحك واردف

: يعني انتي من كل عقلج ترديني اصدك هل قصه الي اخترعتيها من راسج يحلوه... وكمل ضحكته وهوه يضرب على فخاذه ويباوع عليها..

جوري: يعني هسه شنو ما راح تنقذني؟

سكت سمير عن الضحك ودار وجه عنها يمشي واردف

: شوفي يحلوه روحي شوفي واحد غيري تنصبين علي لان اني واحد مفلس وسكير واهلي متبرين مني يعني ما افيدج اسمعي نصيحتي وبعد لا تشوفيني وجهج لان ما ناقصج صراحه

ركضت ورا جوري ولزمت ايده واردفت تتوسل
: لا فدوه لا تتركني انته مجبور صدگني حباااب اذا تركتني ورحت راح اموت راح يقتلوني استر عليه فدوووه مالي احد غيرك شبيككك ليش هل قساااوه.. انته تعرف شنو يعني تنقذ شخص من الموت وهوه بلحضاته الاخيره و يشوفك انته امله الوحيد..

وكف سمير عند هل جزء من الكلام واتذكر مشهد علياء وهيه تصارع الموت كدامه وعيونها حمر وتباوع علي تريده يخلصها وهوه جامد بمكانه ما تحرك هل شي جان مأذي كلش وجان يتمنه يرجع بي الزمن حتى ينقذ اخته ويتحرك ويتغلب على الخوف الي تغلب علي بهذيج اللحضه.. انترست عيونه الحزينه دموع وعبس وجه وتغيرت كل معالم وجه باوع لجوري وفكر بينه وبين نفسه

: معقوله علياء هيه الي دزت هل بنيه الي حتى انقذها ويرتاح ضميري وارتاح،
معقوله رب العالمين دزها الي رحمه منه حتى يغفر كل ذنوبي الي تثاقلت على ضهري وصارت اقوه من اني احملها وامشي بيها، معقوله اذا ساعدت هل بنيه راح تتغير حياتي وارجع انسان طبيعي وارضي ربي و امي ونفسي! وينتهي هذا العقاب الي اعاقب نفسي بي...!

باوعتله جوري واردفت وهيه تسحب بأيده: هااا شو صفنت عليه شبيك احجييي؟

سمير دار وجه حتى لا تشوف جوري دموعه مسحهن ورجع باوع عليها واردف

: شلون ترديني اساعدج؟

جوري: اخذني لبيتك وراح اخدمك بعيوني

سمير: ابوي رجل صعب التعامل ويا وامي مريضه واني ماموجود دوم بالبيت تتحملين هيج وضع؟

جوري: اي اي اتحمل عادي ما دام بيت هاي كلش كافيه بالنسبه الي

سمير: بس هم صعبه لان اني عايش بقريه صغيره والخبر بيها ينتشر بسرعه يعني اخاف على سمعتج..

جوري: لعد قدمني للاهلك كزوجه

فتح عيونه سمير من الصدمه ورجع لوره خطوه واردف: لا مستحيل

جوري: ماكو شي مستحيل انته اخذني وقدمني للاهلك كزوجه يعني كلهم اني اريد ازوج هل بنيه وخلصت السالفه

سمير: من كل عقلج انتي!

جوري: اي والله من كل عقلي لعد من نصه، شوف اني وياك متشابهين يعني اني يتيمه واحتاج سند الي وبيت ستر وانته سكير وعطال بطال فهمتني..

سمير: وانتي موافقه تعيشين ويه واحد مثل وضعي هذااا يعني انتي بعدج شابه وحلوه ليش تخربين حياتج وياي تره راح تعبين وتشوفين الضيم اني ما اكدر اوعدج بحياة سعيده من هسه جاي اخليج على الامر الواقع واكون صريح وياج حتى باجر ما تشوفين نفسج انضلمتي وياي.. من النهايه اني مو حق زواج يابنت الناس..

جوري: تره ماكو انسان عايش حياة ورديه وسعيده بهل دنيه واليوم الي يريد شي يعوف شي ثاني واني اريد الستر ومكان يؤيني وهل شي موجود عندك والباقي ميهمني.. ها موافق لو لا

باوع عليها سمير وهوه محتار شيجاوب

*

ايار ما قبل على زمرد اني تتعارك ويه ايهاب لذلك راح يمها ولزمها من ايدها واردف بقوه

: ابتعدي لوره وخلي الي، مستحيل اخليج تتعاركين ويه ولد واني موجود.. وخاصة ويه واحد مثل ايهاب

ايهاب طگت روحه واردف بحرقة اعصاب: ايااااار هواي تجاوزت بكلامك عليه تره

ايار: اتجاوز واكسر راسك هممم

وجان تعلگ بينهم العركه التمو الطلاب عليهم يتفرجون و سند يريد يخلصهم من بعض بس ماكو فايده كأنهم قنبله موقوته وانفجرت

عبير: كله منج انتي يا زمرد

زمرد: ولج اني اخاف عليج طيحين بالغلط شنو ترديني اباوع واضل ساكته هاااا غير انتي اختي الصغيره واخاف عليجج

عبير: يعني هسه الوضع عاجبج مثلااا، جان صبرتي لمن نرجع للبيت وتحجين لو انتي هيج مخلوقه تحبين المشاكلللل

زمرد: ها يعني فوگ ما اخاف عليج وادافع الج اخر شي طلعت احب المشاكل يا عبير!

عبير: اي دورين مشاكل لان الولد ما سوه شي الج حتى تسوين كل هذا

زمرد: لا والله شنو انتي ما شفتي اسلوبه وياي شلون مستفز لو عاجبج عيني

عبير: لازم ما انتبهتي للاسلوب زوجج ويا

زمرد: ايار يعرفه شنو مو انتي تعلمي

عبير: اي طبعا ما تنطين بحبيب قلبج ايار لان انتي من يوم يومج هيج عندج ايار اغلى من نفسج ومن الكل واذا واحد سمعه كلمه تتحولين اسد وتفترسي

زمرد: اني ويه الكل هيج مو بس ايار

عبير: لا بس ويه ايار وخليها بالج اني ايار كرهته من يوم الي جابته امه للبيت حتى تعتنين بي واني تركتيني انطيتي كل الحب والاهتمام لا وشنو من كبر رجعتي وكملتي حياتج ويا من كثر ما تحبي واني اني عفتيني وما سألتي عليه ابددد..لان ايار جان همج الوحيد..

زمرد انقهرت من كلام عبير واندهشت من كل هل مشاعر المكبوته داخل عبير تجاه ايار من الطفوله لليوم اقتربت منها واردفت

: انتي منتبه لنفسج شتحجين!

عبير: منتبه ونص

زمرد: يعني هذاك اليوم سمير كسر بخاطري واني الي رجعت وحجيت ويا وعتبرت شي ما صار واليوم انتي! شنو شبيكم وياي ليش هيج تقهرون بيه وتكسرون خاطري واني ماعندي بهل دنيه غيركم، ولج بشنو مقصره وياج اني بشنووو ليش كل هل حقد الي كابته بداخلج! صدمتيني الصراحه لان ما توقعت هل مشاعر تطلع من وحده طيبه وحبابه مثلج يا عبيررر، ماجنت اعرف انو وجودي مدمركم لهل درجه عبالي بس ابوي يكره وجودي ويا لان شهدت على بالمحكمه واخذت حق علياء اشو طلعتو كلكم هيج شايلين بداخلكم عليه.. ان شاء الله يجي يوم وتخلصون بي من شري و المشاكل الي اسببها الكم كولي امين..

عبير اختنگت من كلام زمرد وماكدرت ترد عليها ضلت ساكته وتباوع بعيونها

من بين كل هل هوسه بجت زهراء الصغيره بنت عبير لانها خافت وجان تبجي وياها حوراء ونوب اخوات ايهاب وعلى اثر هل بجي توقفو ايار و ايهاب بعد ما وجوهم صارت مدمايه.. ابتعد ايهاب عن ايار وشاف البنات الصغار كلهن يبجن وخايفات، عبير ضمتهن بحضنها تسكت بيهن بس ماكو فايده متوقفن عن البجي

سند عصب واردف: خربسفرتكم وباليطلع وياكم همينه هسه حتى الجهال انرعبت صدك تحجون... لو ضال بالبيت هواي احسن.. اغير جو هوه هذا الجو الخبصتني بي يا اياررررر امده حضي الاغبر اي والله..

ايار مسح الدم عن حلگه وضل ساكت ما يحجي..

ايهاب اقترب من البنات وابتسم بوجهن واردف بحنيه

: نروح نشتري من المحل حبيباتي

حوراء وهيه مستهضمه ودموعها تجري

: انته هم تخوف مثل بابه، شوف شلون طلعت دم عمو ايار..

دار ايهاب وجه على ايار ونضر اله بغضب نوب غير ملامح الغضب وابتسم ورجع باوع لحوراء كعد على ركبه ولزم ادينها واردف

: لا يروحي هذا صديقي وجنه نشاقه سويه اني احبه اموت علي

باوع للايار واردف: مو صح كلامي ايار؟

ايار: اي صحححح اني وايهاب كلشش نحب بعض كلشششش هوايه..

باوع ايهاب لحوراء واخواته وزهراء واردف
: سمعتن حبيباتي يلا هسه شتحبن نشتري من المحل

مسحن البنات دموعهن واقتنعن بالكلام وهدء الوضع واخيرا لكن زمرد ضلت مقهوره وعبير ضايجه وحده ما حجت ويه الثانيه وكلمن راح بطريقه لبيته..

ايهاب قبل لا يروح اردف لعبير

: اعذريني والله ما جان قصدي يصير كل هذا اليوم

عبير: لا عادي ما صار شي

ايهاب: بس انتي واختج.. زعلانات من بعض

عبير: لا اني و زمرد مستحيل نتزاعل او نتخله عن بعض ليضل بالك مجرد نزاع بسيط يصير بين كل اخوات..

ايهاب: اهاا لعد اروح اني

عبير: الله وياك

ايهاب: بس اشوفج ضايجه كلش واحس اني السبب..

ايهاب بعده واكف يباوع بعيونه الي ماليهن الحزن ومقهور عبير اجتها رغبه شديده انها تحضنه وتحجيله عن همها بس الحرام يمنعها لذلك استجمعت قوتها واردفت
: روح ايهاب روححح..

وجان تسد الباب بقوه بوجه سندت ضهرها على الباب وبجت وطلعت الحسره الي بقلبها..

ايهاب اخذ اخواته وراح وهوه ضايج عليها..

*

ايار: زمرد انتي ادخلي للبيت واني هسه جاي وراج

زمرد: تمام

ايار راح وره سند واردف

: شسالفه سند حاجيني هسه اني شسويت

سند: وخر مني ايار تره روحي واصله لخشمي وانته وايهاب ما قصرتو ما شاء الله

ايار: هسه انته ما شفت الصار بعينك

سند: مو على الاساس تطلعني من الجو الي اني بي

ايار: صح والله حقك عليه

سند: دروح هسه اسبح وارتاح لان شبعت ضرب وعود بعدين نحجي ولو اني مالي خلك حتى احجي وحتى روحي كارهه..

ايار: لا سند شنو هل حجي والله ماعرفتك هيج

سند: هذوله امي وابوي ايار وانته تعرف شكد روحي متعلقه بيهم واحبهم ومافد يوم تعاركو او طلع صوتهم هاي غير محبتهم الي وللاخواتي فكيف اذا اسمعهم يحجون بسالفة الطلاق.. تره اني مصدوم وما مستوعب هل شي ابد وكل شويه اجذب على نفسي واكول لا اخاف اتوهم وهسه خايف ادخل للبيت ويطلع كلشي صححح..

تذكر ايار كلام زمرد عن ابو وعن الوهم الي جان عايش بي وصدمته لمن عرف الحقيقه و اردف بحزن : تدري نوبات الانسان لو يضل عايش بالوهم ارحم اله من انه يواجه الواقع او الحقيقه

سند: بس بالنهايه راح تنصدم اول و تالي لان ماكو مفر من مواجهة الحقيقه
ولانك اختاريت تعيش بوهم فراح يكون صعب عليك تقبل الحقيقه وهل شي راح يأثر عليك سلبيا..

ايار بعيون مدمعه: اتفق وياك.. بس المجرب هل شعور راح يفهم كلامك ويحس بي

حط سند ايده على جتف ايار واردف

: اكو شي اني ما اعرفه ايار!

ايار: لا خويه ماكو شي ليضل بالك اصلا البيك مكفيك.. روح للبيت ارتاح شويه

نزل ايده سند وزفر نفس بحسره واردف : اخخخ يابه لو تعرف شكد قلبي خايف من هل سالفه وحاس وراها شي جبير لان مستحيل اهلي بيوم وليله يكرهون بعض لهل درجه وتطلب امي الطلاق بهل شكل وبدون لا احد يفكر بينه او يفهمنه شصاير على الاقل

سحبه ايار لحضنه واردف: خليها على الله ولتفكر هواي لان راح تتعب نفسيتك خليها على رب العباد وباجر ينكشف المستور ويتبين منو الصح ومنو الغلط ماكو شي يضل بلا حل صدگني

سند: الله يسمع منك يا خويه..

رجع ايار للبيت وشاف زمرد كاعده على الجربايه وتبجي بصمت ومنزله راسها فطر قلبه هل مشهد واقترب منها رفع راسها وشاف دموعه ماليه وجه اردف

: تبجينن! ليش ليش كل هل دموع!

لكن زمرد متجاوب بسبب الحسره الي بداخلها اكتفت بالنضر بعيونه كعد ايار عند رحلينها ومسح دموعها واردف

: زمرد القويه منزله راسها وتبجي ما اصدك يعني اليوم شفت الكسره بعيون اكثر ثنين اقوياء ويواجهون الحياة بنضري انتي و سند

باوعتله زمرد واردفت بنبرة حزن وانكسار: لا ايار ماكو داعي تقشمرني بهل كلام لان انته الوحيد الي هيج تشوفني تره بالنهايه اني وحده صاحبة مشاكل وافرق بين الي احبهم وعمري ما وكفت ويه احد وساندته اني انانيه

هز براسه ايار بمعنى لا ولزم جفوف ادينها وخله عيونه بعيونها واردف بأبتسامه خفيفه انرسمت على وجه

: لا زمرد انتي غلطانه بحق نفسج هواااي.. هذا الكلام مو الج لان انتي عمرج ما فكرتي بنفسج دوم مخليه مصلحة الجميع فوق مصلحتج انتي الاخت القويه والسند والزوجه الحنونه الي عمرج ما سكتي عن الحق ولو هل شي يكلفج حياتج بكبرها، انتي مثال للمرأه القويه، زمرد انتي بطله واني افتخر بيج واحس نفسي من المحضوضين بهل دنيه لان انتي من نصيبي.. اني اعرف انو كلامج هذا لان مقهوره وتعاركتي ويه اختج بس اتمنه مره ثانيه ما تقللين من قيمتج مهما كان السبب.. ثقي بكلامي زمرد انو انتي اقوه واروع مره شفتها بحياتي يعني ماعرف شوصفج محتار والله..

ابتسمت زمرد من كلامه الجميل اردف ايار: اي هيج اريدج دوم تضحكين وماعاش الي يزعلج وينزل دموعج..

زمرد: يلا هسه روح اسبح وذب التراب  و الوصخ وهم حتى جسمك يسترخي لان اكلت هواي ضرب اليوم

ايار: اي وجسمي يوجعني يعني احتاج وياي احد يسبحني ويهتم بيه

دفعته زمرد للحمام واردفت: دمشي اسبح لا اجلدك واعلمك الاهتمام شلون يصير

ضحك ايار واردف: اي هاي زمرد الي اعرفهااا

*

سمير اخذ جوري وكف بعد مسافه عن بيت اهله واردف

: متوتر وما اعرف اشلون اقدمج للاهلي بهيج اوضاع تعبانه

جوري: ماكو داعي تتوتر اتشجع وامشي

سمير: هيه المشكله انو اهلي يعرفون بيه رافض فكرة الزواج من اصلها فكيف اذا افاجأهم هسه ماعرف احس صعبه

جوري: لا بالعكس اني اكول راح تفرحهم لان اكيد امك وابوك يتمنون يشوفوك مزوج ومستقر واحفادهم يلعبون كدامهم هذا حلم كل اب وام عدهم ولد

سمير: انتي ماتعرفيني تره يعني هل كلام الي حجيتي مستحيل يتحقق لعلمج

جوري: اويي ليش كاره الدنيه ومأيس هيج شبيك..

سمير: ها تردين اركص مثلا

جوري: لا مو قصة ركص بس اضحك شويه نفه عن نفسك شبيك مكتأب هيج وساد جميع ابواب الرحمه بوجهك شسالفه خلصت الدنيه تره بعدك شاب وكدامك هواي اشياء منتضرتك تعيشها وتجربها ليش كل هل بؤس واليأس وانته بعمر الشباب..

سمير: صعبه كلش

جوري: لا ماكو شي صعب ان شاء الله وبعدين انته كتلي امي مريضه فليش ما تحاول تسعدها وتغير نفسيتها وتفرحها شبيك فكر من هل ناحيه شنو معقوله ما ناوي تفرح امك عزيزة قلبك قبل لا الله ياخذ امانته

سمير: فعلا كلامج صح امي كل همها ازوج واكون عائله هيه وابويه

مدة جوري ايدها واردفت: خلي ايدك بأيدي وخلي نتوكل على الله ثق بيه سمير

اندهش سمير لمن صاحت بأسمه باوع الها بتعجب واردف
: سمير!! ليش انتي منين تعرفين اسمي!

_____يتبع♡

اكتبولي توقعاتكم الحلوه✨💜
ولتنسون تشتركون
بقناتي على التلي انشر عليها صور للبارتات تكدرون تاخذوها وتصممون عليها وتنشرو بالتيكتوك وهم انشر الكم موعد تنزيل البارتات ♡