انا اخلصت له رغم المشاكل والتنافر البيننا ، حتى اني كنت بتصدى لأمي لمن تهاجمو ، بس الشي الماقدرت اتقبلو خيانتو لي وانا على زمتو وام اولادو !!
نزار جاء قعد جنبي وخت راسي في حضنو بعداك مسح دموعي وقال لي : احكي مدام الموضوع مؤلمك كدا
كان في بيننا تنافر ومشاكل روتينيه ، انا بتجاوزا ذي غيري من الزوجات ، ولو انو كان بزودا كتير ، حتى تعاملو مع اولادو ما حلو ، ما بتحسو الاب الحنون الحريص على اولادو ، او العايش عشانهم وممكن يضحي بشي عشانهم ، مدثر كان بنزعج لو واحد من الاولاد بكى او مرض !!!! ، لو اتصلت به وقلت له حاصل كدا ، بقول لي اتصرفي ، انا ما بتزكر انو شال واحد من الاولاد ديل يوم وداه المستشفى عشان عيان !!!!! ، انا البمشي وانا البعالج واسهر ، بس برضو ما حصل قلت شي ، لاني ما بقدر اجبرو يكون اب حنون!!!! دي عاطفه بتنولد مع الانسان ، والربنا نزعا من قلبو مافي سبيل انو يتأثر بكلام زول ، كان بعاملهم على اساس انهم عبئ ، شادن دي ما فرح بولادتا ابدا ولا سمى لها ، حتى انو قامت مشكله كبيره بينو وبين امي لمن جات تنفسني ، بس انا وقفت معاه هو قصادا وقلت لها ما تدخل .
في موقف هزاني شديد ، وما اظن هاني يكون نساه !!!
كان كل ما يجي من الشغل يكون زهجان وينبذ من الباب
وكانو هم الاتنين بجرو له ، بابا جاء ، بابا جاء ، بكونو منتظرين انو يجيب لهم العاب وحلويات ذي باقي الاطفال ، او حتى يضمهم لصدرو ، بس كان ببعدهم ويقول ما ناقصكم ، هاني بطل يجري له ، بس شادن صغيره وكل يوم بتعمل كدا ، رغم انو بصدا وبصرخ عليها كمان
يوم قلت له : انت ليه ما تمشي لابوك في الباب ذي اختك؟
قال لي : واستفيد منو شنو وهو بطردني ، انتي قاعده تقولي لينا التكرار بعلم « الحمار » !!!!! وانا ما « حمار »
اليوم داك شاكلت مدثر وقلت له : لو على الحلاوة انا بديك قروش جيبا لهم معاك بس فرحهم ، زعل وقعد يشاكل ، واصواتنا علت شديد ، هاني قال لي : ي ماما انتي ما تشوفي لك راجل غيرو يكون بابا!!!!!
مدثر حلف يضربو اليوم داك ، والله الا قفلتو منو في الغرفه ، يوم كامل وهو قاعد جوا منتظر متين الوضع يهدأ عشان بس يطلع ، حتى اكلو دخلتو له .
اليوم داك اتخذت قرارات حازمه معاه ، بس هو ما اتأثر لأنو عارفني ما بقدر ارجع لأهلي او حتى اشكي لهم ، لاني اتزوجتو غصبا عنهم ، ودي حاجه بزكرني بها ويعايرني في كل مشكله تحصل ، كان انسان سيئ شديد معاي ومعيشني في ضغط كبير ، لمن اجي انوم بحس اني ما بقدر اصحى تاني من شدة الارهاق والالم النفسي ، حقو دا ما بتنازل عنو لأي سبب لا بعرف تعبانه ولا عيانه ، ولا براعي ، اتشاكلنا كم مره للسبب دا
نزار كان بمشي يدو على شعري وقف لفتره طويله ، بعدها قال لي : كملي .
: استمرينا بنفس النمط دا يا نزار ، كان عندو تصرفات مريبه وواضحه ، بس بسبب انشاغلي ما انتبهت ، امي جاتنا وقبضتو كم مره بتكلم مع واحده في التلفون وبقول ماشي لها ، انا ما كنت بصدقا ، وبقتنع بأعزارو الواهيه عشان الحياة تستمر واحافظ على العلاقه دي من الانهيار ؛ لأنها اخر علاقه سليمه فضلت لي ، او انا كنت فاكره كدا .
تلفونو دا بقى ما بديه لزول لأي سبب ، ولا بسمح لي حتى اشوف الزمن من خلالو ، الأولاد طبعا ولا بفكرو حتى يطلبو منو يديه لهم يلعبو به ، وصامت ٢٤ ساعه ، كتير كنت بفقدو بليل والقاه بتكلم بالتلفون ، بقول لي شغل ، انا ما كنت بصدق لأني ما مقصرة معاه وشايفه انو مستحيل يعاين لمرا غيري لحدي ما امي مره قبضتو بعمل مكالمة فيديو مع واحده ، كان في حالة صعبه شديد ما بتتخيلا ، وامي دي اتشاكلت معاه شكله كبيره ، انا جيت من الشغل لقيت الشكله فوق ، وهو ينكر ، لمن سألتا متأكدة من الشفتيه؟ ، قامت علي انا زاتي شاكلتني ، وقالت لي : انا ما طفله عشان تسأليني سؤال ذي دا !! ولو ما متأكدة ما كان سألتو ، ياخ لبس ملابسو في قدامي منتظره اكتر من كدا شنو دليل؟؟ ، اصلا انتي تستاهلي كل البحصل معاك
المهم زعلت شديد ومشت ، انا شكيت فيه من لحظتا لحدي م اتأكدت انو بخوني ومع مرا متزوجه !! راجلا مغترب ، بمشي لها
البيت !!!! اليوم داك طلعت كل الفي قلبي وطلبت الطلاق لأنو فاض بي ، يعني الحصل دا خلاني اشوف كل السؤ الفيه ، واعرف انو العلاقه دي وهميه ومافي لها اي اساس ، طلبت منو الطلاق فورا ، وهو طلقني لأنو خاف من الفضيحه ، وكان مصر يقعد معانا رغم الطلاق ، الا قمت عليه وطردتو ، لانو البيت بيت اولادي ، هو كمان ما صدق نسى كل مسؤولياتو ، قال لي انا بمشي انتي اقدري على اولادك ديل وربيهم براك ابقي لهم ام وأب ، انا ما مسؤول عنهم تاني ، منها تاني ما شفتو وكنت حامل بمهيلم ، باقي القصه انت عارفو
نزار كان ساكت ، رفعت راسي قلت له : م حتقول حاجه؟؟
: الحصل مقدر ومكتوب .
: انا بحمد ربنا على الحصل دا رغم السؤ الحسيتو ، لانو انكشف قدامي ، والا كنت عايشه في وهم لحدي اللحظة دي 😭😭😭
نزار كان بهديني بس ما علق ابدا ، حاساه ما راضي عن الحصل دا ، وفي الواقع هو انجرح ، حس اني لجئت له كحل لمشاكلي ، وانو كلام مدثر صح !!!!! انجرحت منو لأنو خاني ، واحتمال يكون شاكي انو لسه في مشاعر في قلبي تجاه مدثر ، ودا سبب عدوانيتي الشديدة !!!!!
جاء يوم المحكمه واتواجهنا كلنا قدام القاضي ، مدثر كان مبسوط ، ما عارف انو موقفو ضعيف شديد ، وبما انو الاولاد في سن الحضانه مستحيل ياخدهم .
المشكله انو حضانة هاني وشادن انسحبت مني واتنقلت لأمي ، لأنو هي البتجي بعدي في الاحقيه بما اني اتزوجت ، وهو الزموه بالنفقه عليهم الثلاثه .
غضب وقعد يجوط ويشاكل واول ما طلعنا هو قام مسك في نزار الا بعدوهم عن بعض ، وانا زعلت من نزار لانو كان هادي وما متأثر ، كأنو كان عارف الحايحصل وما مهتم .
انا طلعت زعلانه وسبقتو للبيت ، قعدت ابكي عشان ح ياخدو مني اولادي حتى لو لأمي ، اتصلت بمدثر نبزتو
: ان شاء الله انبسطت؟ هدا القانون حرمك منهم نهائي ، كنت فاكر انو حايدوك لهم يعني؟؟؟
: المهم عندي انك خسرتي حضانتهم ، وكونو تاخدهم امك اهون علي من يعيشو معاك انتي والراجل العرستيه دا .
قفلت فيه ، قعد يتصل وانا اكنسل رسل لي رساله
احسن لك تردي وخلينا نتفاهم لو ما عاوزه تخسري اولادك
جدعت التلفون بعيد ، وقعدت في الارض !!! خاته يديني الاتنين في راسي ، دا الشي الكنت خايفه منو من البدايه ، رغم كلام نزار المطمن .
ليان جاتني بليل خايفه قالت لي : يعني عاوزين ياخدو الاولاد منك؟ الحايحصل شنو اسي؟ انا ما بتحمل اعيش بلاكم والله
حضنتها وقلت لها : مافي حاجه ذي دي ح تحصل نحن عندنا محامي وهو ح يحلها .
نزار كان عندو عمليه ، عشان كدا اضطر يمشي المستشفى من المحكمه مباشرة ، وجاء متأخر شديد من دخل انا عملت نفسي نايمه لاني ما قادره اسمع منو كلام يطمني ، وانا عارفه انو تخدير بس ، هو مشى استحمى وجاء رقد حضني لحدي الصباح ، ما قمت نهائي واظن هو زاتو ما عندو حاجه يقولا لي
اول ما حسيت به طلع قمت اتصلت بمدثر
: يا سلام ياخ بديتي تفهميني ذي زمان .
: احترم نفسك ، انا عارفه انو غايتك الانتقام مني ، والاولاد ما بهموك في شي .
: اولادي ما بهموني؟؟
: ايوا ما بهموك نسيت القلتو لي لمن مشيت؟؟ ربي اولادك بطريقتك ، وانا ما مسؤول عنهم ، اسي جاي ليه يعني؟ ما تمشي تتزوج البنت الخطبتها وتعيش حياتك بعيد مني ، حرام عليك ياخ انت ضيعت سنين عمري كلها في حياة كلها نكد ودموع ، انت كنت بتضطهدني عشان ما عندي غيرك !!! واهلي مخاصمني ، خنتني وما ندمت ولا حتى قدمت مبررات ، كأنك ما صدقت اتحررت ، مشيت خليتني براي حامل في ولدك الما شفت وشو!!! ولا سألت هو اتولد ولا نزل !! في ظروف الحرب دي ما فكرت تعرف نحن متنا ولا حيين!! ولا عايشين كيف ، جاي اسي عشان كلمات قالتهم لك امي تخرب علي وعلى اولادك سعادتنا؟ خليك انسان لمره واحده في حياتك وارجع مدثر العرفتو زمان !!! اتزوج وابعد مننا .
: ابعد منك وين يا سمر؟؟ انا ياهو مدثر القديم ، نسيتي انك الطردتيني؟؟ انا ما كنت عاوز البعاد دا ، بعترف اني غلطت ، بس مافي زول معصوم من الغلط كنت محتاج فرصه تانيه ، انا اصلا لا خطبت ولا عندي نيه ادخل لحياتي اي مرا غيرك .
: كيف يعني؟ 😳
: عملت كدا عشان استفزك بس ، سمر انا ندمان والله على العملتو معاك !! ولسه بحبك ، خلينا نرجع نتلما تاني مع اولادنا انا عارف انك اتزوجتي الراجل دا عشان ما تفضلو في الشارع انتي والاولاد !! بس خلاص انا بوفر لك السكن ، اتطلقي منو منو وانا بتزوجك تاني .
قعدت اضحك عليه ، قلت له : انا ارجع لك؟؟ شوف لو السماء دي انطبقت على الأرض انا ما برجع لك تاني !! ونجوم السماء اقرب لك مني ، دي حاجه انساها واطرد فكرتا لو بالغلط خطرت لك .
: بتقولي في شنو انتي؟ ، عاوزه تعيشي مع الراجل دا عشان اولادك يعني؟ ما بدل دا عيشي مع راجلك ابو اولادك !!!!
: انت غلطان ، انا فعلا ممكن اكون اتزوجت نزار عشان اولادي وعشان بناتو كمان ، بس عايشه معاه لاني بحبو !! ❤.
: هههههههه 😂 انتي بتغشي في منو؟ انتي بتحبي اي زول يظهر في طريقك ويساعدك
: بس لازم الشخص دا يكون راجل ، وفي الرجال يكون نزار بالذات !! انا ما مضطره اغش ولا اثبت لك ، انا بحب نزار من جوا قلبي ، معاه اكتشفت اني كنت عايشه في وهم كبير وبحمد ربنا لانك طلقتني ، وعلى الظروف الحصلت لي دي لأنها رمتني في طريق الزول دا !!! دا الراجل البستحق الحب والتضحيه ، غيرو لا🤚🏻
: انتي بتقولي كدا من قلة حيلتك .
: معناها خليك فاهم كدا .
عاوزه اقفل قال لي : انا ما خلصت...... ، فضلت على الخط بس ساكته .
قال لي : انتي حاتندمي على كلامك دا صدقيني ، احسن لك يا سمر اتطلقي من الراجل دا وتعالي معاي ، نربي اولادنا سوا ولا احرمك منهم .
: معناها احرمني منهم ، انا عندي اسره تانيه ، فيها بنات بعوضوني ، وزوج بحبو ولسه ح أحبو اضعاف واملى له البيت الاولاد ، ما خايفه ابدا وهو معاي .
قفلت فيه وانا بالجد خايفه لمن جسمي برجف ، قعدت في السرير ، ختيت يدي في وشي ، فكرت في اسواء الاحتمالات وعاوزه ابكي بس سمعت صوت !!!! صوتو...
: انتي متين بقيتي ضعيفه كدا؟ ، وبتحلي مشاكلك بالبكاء؟ رفعت راسي لقيتو نزار !!! واقف متكل على الحيطه وخالف رجلو ، مسحت دموعي وقلت له : انت جيت متين؟؟
جاء هداني بحضنو كالعاده وقبل راسي قلت له : الحركه دي بتريحني شديد ، ما حسيت عليك لمن جيت ، قال لي : انا اصلا قاعد
رفعت راسي مخلوعه قلت له بتمتمه : ك كنت قاعد؟
: ايوا انا ما طلعت فتحت الباب وقفلتو بس عشان اشوف مسرحية الاميرة النائمه دي حاتستمر لمتين؟
: ما تقول انك ، سمعت مكالمتي؟
: وانبسطت بها كمان .
رجعت تاني لحضنو وقلت له والله العظيم يا نزار انا بحبك ، وما قلت كدا عشان اغيظو!! او اثبت له حاجه معينه ، انا قلت له كدا بقناعه ، بس خايفه ، وما عارفه اذا كنت ح اتحمل ، نزار انا عاوزه اعيش معاك !!!! وعاوزه اولادي يفضلو معاي كتير علي دا؟؟
: لا دا حقك الطبيعي ، واطمني اولادك ح يفضلو معاك ، مدثر ما بقدر يعمل شي ، هو بيت ما عندو يسكنكم وين لو فرضنا انتي قبلتي؟
انا شفت بيت خالو القاعد فيه دا ، مليان ، فيه قريب الاربعه أسر الغرف م شايلاهم ، وهو عندو سرير واحد في الديوان اها؟ .
: بس انا عاوزه الاولاد يفضلو معاي !! حتى امي ما بقبل تاخدهم مني .
: ما فهمتي قصدي حبيبتي ، انا زكرت لك على النقطه دي عشان افهمك انو ما قادر على النفقه الألزمو بها القاضي ، نسيتي؟؟ من وين حايقدر يدفع المبالغ دي كلها؟ اسي لو مشينا وديناهم له وقلنا له اسي وديهم لحبوبتهم في الفاشر بقدر؟؟
دا مستهبل ساي ، غايتو الاساسيه يضغط عليك عشان يخرب سعادتك ، وحتى لو قبلتي ترجعي له حاتلقي انك اتورطتي للمره التانيه ، لانو ببساطه ما بقدر يقدم لك شي غير الألم ، تقدري تقولي لي هو ليه ظهر اسي بالذات؟؟
لانو عرف انك اتزوجتي ، قبلها ما كان فارق معاه ، هو رجع يدمر سعادتك ويخليك محطمه زيو بس .
: يعني حانضغط عليه بالنفقه؟؟ عشان كدا قلت لي طالبي بها !!!
: بالضبط ما عشان هم محتاجين يا سمر ، بس وسيله !!! ذي ما هو بعمل .
: انا متأكده انو ما حايقدر يدفع قرش واحد ، واكيد حايهرب كالعاده .
: ودا العاوزنو حبيبتي ، فشنو بطلي بكاء واطمني .
وفعلا في جلسة المحكمه قلت للقاضي : انا ما عندي اعتراض ، بس في ظروف الحرب دي ما بنقدر نخاطر بسفر الاولاد لمكان بعيد وغير أمن ، وهو لازم يتحمل مسؤوليتو تجاه الاولاد ، وطالبت بالقديم كلو .
مدثر غضب شديد وبقى يحمر لي ، ما كان عندو كلام يقولو اصلا ، ومن يوما انا ما شفت وشو ، اختفى فجاءة ذي ما ظهر .
: اخيرا ارتحنا من العقبه دي ، نزار انا لو شكرتك لبكرا ما بوفيك حقك .
: كدي اشكريني عشان ازعل منك .
: اي حاجه ولا زعلك حبيبي .
احم احم الاولاد قاعدين .
: خلاص خلينا نمشي الغرفه .
: سمر بقيتي صعبه شديد .
: مش راجلي ومن حقي اخطفك خمسه دقائق تحضني فيهم؟🙈
: حقك اكتر من خمسه دقائق ، دي بسيطه شديد اصلا .
قام على حيلو قال للاولاد : يلا على النوم .
لين قالت له : خلينا نحضر المسلسل الزمن بدري يا بابا .
: ما بدري ولا شي يلا نومو عشان تصحو بدري .
: بس نحن ولاعندنا مدرسه ولا شي نصحى بدري ليه؟
قلت له : يا نزار الزمن فعلا بدري ، خليهم شويه .
قام همس لي : خلاص انا بسبقك بعد شويه الحقيني
: هههه حاضر ..
قعدت اتمل كدا ، بعد شويه شلت مهيلم وقلت لهم : اقفلو التلفزيون والنور بعدين ما تنسوهم ونومو بدري .
: حاااضر .
: يلا تصبحو على خير حبايبي .
: وانتي بخير ماما .
مشيت طبعا لحبيبي واستقريت في حضنو الدافي لمن قربت اغفى
كان عندو حراره قستا بجبيني كالعاده
: حبيبي انت لازم تفحص والله وضعك ما عاجبني .
: انا كويس ما تخافي علي ، ياهو الالتهاب وخلصت الحبوب .
مهيلم كان معانا في السرير يعاين لينا ساااي .
نزار قال لي : والاخو دا فهمو شنو؟ 😅 شوفيه مركز كيف !!! وترني عديل ، خايفو يقول لي زح من امي😅
: انت المركز معاه زياده ، مالنا عملنا شنو؟
: سمر الاطفال بفهمو .
: نحن حاضنين بعض بس ، ما عملنا شي .
: يا زوله؟؟ يعني ح نفضل كدا ؟؟😏
: لحدي ما ينوم🙈
( الصباح !! )
نزار ، نزار ، نزار حبيبي قوم ، نزار مالك؟ ما سامع؟ نزار ، نزار ليه ما بتتحرك؟ لا كدا كتير.!!! نزار قوم .
لمست اطرافو لقيتو باااااارد !!! انخلعت 😱😱😱😱 طوالي مديت يدي وهي بترجف اتحسست نبضو ما كان في نبض قلبي قعد يدق 💔
لا ، مستحيل !!!!!!!
قعدت اهز فيه : مستحيل تموت!!! لا يا نزار ، قوم انا اقبل وين؟؟؟؟!!!!! لا ، لالا ، انت ما ممكن تموت وتخليني لااااااا😫😫😫😫
يتبع