طبعا في اسئله كتيره ذي دي ومواقف بتعرضو لها الازواج البكون عندهم أطفال لانهم ما بكونو فاهمين طبيعة العلاقه بين الزوجين وفي عمر معين صعب الزول يشرح لهم بس برضو غلط نتجاهل اسئلتهم دي ولازم نديهم اجوبه مقنعه ومنطقيه بحيث ما يسألو في مكان تاني ولا يتشوش ذهنهم وتدخلو افكار تانيه
انا طبعا شاركت نزار الغرفه من اليوم داك ، وكنت حاسه بالغرابه كل شويه لازم امشي اطل على الاولاد ، اما مهيلم دا قصه تانيه ، بكون منوماه وسطنا في حضني ، بصحى القى نفسي في حضن نزار🙈 وهو وراي متمدد على راحتو وشايل مساحه اكبر مننا .
سميره كل يوم بتسألني عن الجديد في علاقتنا وانا اصلا ما حكيت لها .
بعد فتره بسيطه بقيت الاحظ عليه تصرفات غريبه ، يعني طلعاتو كترت خاصة بليل حتى لو ما عندو مناوبه ، وبجي متأخر ، وتلفونات ، دخل جواي الشك والله قربت احكي لسميرة بس خفت من الرد الح أسمعو منها ، قلت امكن في حاجه انا عملتا غلط او قلة اهتمام بسبب انشغالي بالاولاد .
بقيت احاول اقضي معاه اطول فتره ممكنه بعيد من جو الاولاد ، حتى مهيلم مرات بنومو مع ليان عشان ما يتضايق من وجودو ، ومهتمه بنفسي شديد والغريبه ما حاسه انو في رفض منو تجاهي ، بالعكس في شوقو ولهفتو الزمان ، بس تصرفاتو مثيره للشك مرات بتجيه مكالمات بليل يطلع بالتلفون برا ومرات عشان تلفون يطلع من البيت نص الليل ويجي قريب الصبح ، لمن ليان زاتا لاحظت ، قلت لها : ما دي طبيعة شغلو بتجيه حالات مستعجله فجاءة .
: بس هو ما براه دكتور في البلد دي ! وزمان ما كان بعمل كدا خاصة طلعة بليل دي .
: زمان انتو كنتو براكم بخاف عليكم بس اسي مطمن عليكم معاي .
انا كنت بطمن فيها في حين انو انا نفسي شاكه وما قادره اصدق المبررات البختا له دي ، بس ما بقدر احاسبو خاصة بعد العملو معاي ، انا اصلا ما عندي غيرو ، كفايه انو لماني انا واولادي من الشارع .
يوم كنا قاعدين نتعشا بليل سمعنا صوت جوطه ، والاصوات دي كل مره تعلى وقريبه شكلا جايه من واحد من بيوت الجيران ، كلنا ركزنا معاها وسكتنا ، بعد شويه بقينا نسمع صوت ضرب ومرا بتستنجد ، نزار دا كان بياكل خت اللقمه من يدو وقام جاري ، انا لبست توبي ولحقتو ، اتوقعت القى الشارع مليان ناس ماشه تشوف الحاصل ، بس ولا حتى حيوان في الشارع مافي ، والصوت متعالي ، نزار مشى دق ، بعد تعب جاء فتح له راجل وصاري وشو وزهجان قال له : نعم عاوز شنو؟
: سمعنا صوت صراخ جاي من بيتكم ان شاء الله خير؟
: لالا ما من بيتنا .
: يعني اوضاعكم تمام؟؟
: وانت مالك اصلا؟ جاي تدق ابواب الناس نص الليل !! ما عندك شغله ولا شنو؟ امشي من هنا يلا وطاخ قفل فيه الباب .
انا شدة ما زعلت من اسلوب الراجل دا تقول اقتلو ، وكمان احرج نزار ، احييينا 🤬 قعدت اشاكل طول الطريق .
نزار قال لي : طولي بالك عادي بتحصل ، ما كل الناس بتقبل المساعدة وانتي عارفه .
قلت له : انت قاصدني انا صح؟
قعد يضحك
قلت له : انت زاتك ما عندك موضوع ، ذي ديل خساره فيهم الكلمه الطيبه ، ما عندك شغله بهم تاني ، ان شاء الله يموتو😡 .
: كيف الكلام دا؟ عاوزاني اشوف الغلط بعيوني واتغاضى عنو؟
: ايوا تتقاضى ذي كل الناس !! اسي في زول فتح بابو ولا عاين ساي بالحيطه؟ ما تدخل نفسك في مشاكل انت في غنى عنها .
: سمر لو كل الناس عملت كدا البساعد منو؟؟ دي مشكلة مجتمعنا ، انو الناس بتسكت !! واي زول بخاف يبادر وبفضل انو يكون مع العامه سواء في الصح او الغلط ، وكدا عمرنا ما ح نتقدم ، لازم على الاقل واحد يحرك ساكن .
: والزول دا لازم يكون انت طبعا ، عامل نفسك عظيم وبتساعد الناس🙄 ، هدا لمن احرجوك .
: سمر انتبهي لكلامك ، انتي شايفه اني بعمل كدا عشان يقولو عظيم؟
سكت ومشيت قدامو .
اليوم داك غضبت شديد ومشيت نمت مع الاولاد خليتو ؛ مع اني الغلطانه ، ومفروض هو اليزعل .
بس نص الليل حسيت بالذنب ، واتزكرت انو لو ما سمع لصوت اولادي اليوم داك ؛ ما كان نحن عايشين لحدي اسي ، يعني لو سكت واتفرج ذي كل الناس انا الكان ح يساعدني منو؟
قمت بليل داك ، مشيت دقيت له الباب واظنو نايم ، ما جاء فتح ، عاوزه ارجع كدا النور ولع لمن خلعني .
قال لي : الباب فاتح ادخلي .
دخلت لقيتو واقف جنب الباب قلت له : انت صحيت؟
قال لي : اصلا ما نمت وخليت لك الباب فاتح عشان عارفك ح تجي .
طوالي حضنتو وقلت له : انا اسفه على الكلام القلتو لك قبيل .
ضميري عذبني وما قدرت انوم واخليك زعلان .
: بس انا ما زعلان منك حبيببتي ، والقلتيه دا كتير بسمعو حتى من بناتي .
: بس انا بالذات م المفروض اقول كدا ، لاني جربت العوزه ، ولو ما يدك الاتمدت لي كان غرقت في الوحل💔 اسفه كمان لاني زعلتك واخدت دور الزعلانه .
ضحك وقال لي : ضربني وبكا سبقني واشتكى .
: بس ياها انا ، ما تزعل مني واديني راسك ابوسو .
: لالا خليه راسي للصباح اسي بوسي خدي 😉.
: هههههه حاااضر يا ابو البنات .
: بنات شنو؟ انا بقى عندي ولدين ، خلاص طلعنا من ابو البنات قولي يا نزار مثلا او يا حبيبي لو عندك الجراءة😏
طبعا كان فاكرني ح أهرب منو ذي كل مره ، بس عاينت جوا عيونو وقلت له : حاضر يا حبيبي .
هو زاتو استغرب شديد بس فرح اكتر ، من زمان منتظر يسمعا😅😅😅
في الفتره دي انا اتلعقت به شديد ، لدرجه خوفتنى انا زاتي !! يعني احساس اني ح اخسر الزول دا ، وزول زيو ما بستمر في الحياة ، والموت بياخد اطيب الناس ، كنت دائماً بفكر في الشي دا وبخاف !! عاوزه اطمن انو عايش في كل دقيقه !! وبتصل به لدرجه تخنق ، حتى لو شغال ! ومن يجي احضنو واتخبى فيه هو زاتو اتحير ، مستلمه حضنو الليل دا كلو ما بخليه ينقلب الا بي . بتجيني رغبه في انو اعيش جوا حضنو ، مرات اتصل به في الشغل واقول له : تعال عاوزه احضنك لمن يضحك علي😅
بدل ما كنت بنبهو للاولاد بقى هو الانبهني ويقول لي : الاولاد بشوفونا ؛ لاني بسهى مرات واخد حضنو قدامهم ، اصلا بقيت اغير منهم عديل واقول له بتحبهم اكتر مني ، وعاوزه افضل معاه فتره اطول منهم .
: ما هدا نحن مع بعض دائماً .
: لا ، بتمشي الشغل تخليني ، وتشيل مهيلم في حضنك اكتر .
: يا بنت ، عاوزاني اشيلك زيو ولا شنو؟؟؟!!!
: لالا ما كدا نزار احضني يلا .
: والله انتي 😅😅😅
طبعا هو ما بمل نهائي ولا بزهج من حركاتي دي ، بالعكس بسايرني ويكون مبسوط ، بس تلفوناتو وطلعاتو الكتيره دي حارقه قلبي .
اما الجيران ديلك كل يوم والتاني صوتهم ، طالع يلا مره كدا الصوت علا شديد ، ومن الاستنجاد بقينا نسمع صوت طرقات بابهم وانا عيني على نزار الغالبو الاكل ، في النهايه قام زي م اتوقعت ، ومشى دق بابهم ، لقى الراجل كالعاده عاوز يتفاصح ويشاكل .
نزار قال له : انتو قاعدين تزعجونا كجيران ، ومن حقنا نعرف الحاصل شنو؟
في وقفتو ديك جات المرا جاريه ، توبا م لابساه وجسما دا كلو دم من اثر الضرب ، وقعت له عند رجولو واترجتو .
: الحقني يا ولد الحلال ، عليك الله الراجل ، دا ناوي يقتلني الليله .
وهو قام جراها لجوا وضربا في قدام نزار .
نزار انفعل وعبى يدو اداه بوكس على وشو لمن قرب يقع .
والمرا قامت جاريه بجلبابا ، وتصرخ ، انا طوالي طلعت لقيتا في نص الشارع .
قالت لي : الحقينا يا اخت ، راجلي بتضارب مع واحد من الجيران ، ود حلال جاء يحلني من يدو .
انا عرفتو دا نزار قمت جاريه ، لقيتو بتضارب مع راجلا وداك بنبز ب ابشع الالفاظ قعدت اكورك الحقونا .
ولا زول ما عبرنا ، قلت لهم : اصلا الحي دا ما فيه رجال ، بس حريم نايمين مع اخواتهم ، العياذ ب الله .
مشيت عليهم ، وبقيت احاول ابعدهم من بعض ، ونزار بقول لي : ما تدخلي ، سوقي المرا دي ووديها البيت.
الراجل غافلو وهو بتكلم معاي عاوز يضربو ، انا جيت وقفت وسطهم .
اتغاظ ، وبقوة دفرني هناك ، لمن وقعت والمرا بجاي تصرخ والبنات واولادي الجو وراي .
رجال الحي برضو جو ، بعد كلماتي المستفزه ديك عشان يحجزوهم .
نزار اصلا انشغل بي لمن وقعت وخلى داك على الرجال ، زلوه وضربوه ضرب شديد .
انا من الوقعه ديك ما قدرت اقوم ، حاسه برجولي اتربطو .
نزار جاء يرفعني كدا لقى دم في ملابسي !! لمن انخلع ، المرا قعدت تصرخ ، قالت له : جاها نزيف .
هو كان مستغرب شديد وما مصدق .
الراجل خاف وبقى يحاول يمرق نفسو ويبرر ، نزار قال له : لو مرتي دي حصلت لها حاجه انا ما برحمك ابدا .
قام شالني وداني المستشفى واسعفني ، انا اصلا فقدت الوعي في الطريق وما عرفه وصلت متين وكيف والحصل شنو .
صحيت لقيتو قاعد جنبي ، ويدينو الاتنين في وشو ذي الزول الحصلت معاه كارثه ، قمت وقلت له : نزار !!
رفع يديه بقلق ، قال لي سمر صحيتي خلاص؟ حاسه بشنو؟ وريني في الم؟ تعبانه؟
قلت له : اهدا يا نزار انا بخير .
قال لي بصوت مكسور : كنتي عارفه انك حامل؟؟
انخلعت قلت له : انا حامل؟؟
سكت .
قلت له : والله العظيم ما كنت عارفه صدقني .
ختيت يدي في طرف وشي وقلت له : ي الله !!! كان لازم اعرف انو البحصل معاي الفتره الاخيره دي وحم .🤦🏻♀️
كسر عيونو و قال لي : كان حمل يا سمر !! انتي اجهضتي بسببي 💔 نزل راسو ولفاه بيديه الاتنين .
انا انخلعت شديد وعاوزه ابكي ، بس لمن شفت حالتو ما قدرت اضعف قدامو ، هو كان اضعف مني مية مره لحظتا 💔 مكسور وحاسس بالذنب ، وكسرة الراجل يا جماعه صعبه شديد ، مافي زول بقدر يتحملا ، هانت علي مصيبتي قدام مصيبتو هو .
مديت يدي الاتنين ، بعدت بهم يديه من راسو وابتسمت له . عاوز يعتزر ، قلت له : اشششش ، اوعا تقول اي شي ولا حتى تزعل علي ، دي ارادة ربنا مافي زول عندو دخل فيها .
: ونعم بالله ، بس انا السبب !!! كان لازم اراعي لوجودك ، سمر انتي القلتيه عني كل صح ، انا نفسي واسرتي ما قادر اساعدا اساعد الناس بشنو؟💔
حضنتو وقلت له : لا اوعك تقول كدا ، انت نسيت العملتو معاي ومع اولادي؟؟ ولا المرا الخلصتا من يدين راجلا الكان عاوز يقتلا؟ بكفي انك طبيب انسان .
: ومع ذلك اتسببت في اذيتك وخسارة ولدي 💔
: انا كويسه ما تخاف علي ، والولد ربنا ح يعوضنا ، نحن لسه في بداية حياتنا ، بكرا نجيبهم عشره ، لمن تزهج منهم .
وبعدين نحن عندنا الاولاد والبنات ، زعلان ليه ، عندنا ليان ولين وهاني وشادن ومهيلم ، ولا ما معتبرهم اولادك؟
: استغفر الله العظيم انا تقولي لي كدا؟ كأنك ما بتعرفيني .
: لالا عارفاك ؛ عشان كدا بقول لك ما تزعل !! نحن ب اولادنا واسرتنا كبيره ما شاء الله .
: كان نفسي في ولد منك انتي بالذات 💔 .
: مافي حاجه راحت ، بكرا اجيب لك واحد واتنين وتلاته ، ح املى لك البيت اولاد ، لمن تقول لي كفاك خلاص تاني ما تلدي .
: عمري م اقول العباره دي ، بكفيني بس يكونو منك وانتي تكوني في كامل صحتك .
: ما تزعل نفسك حبييى ، وخلينا نمشي البيت فتنا الاولاد براهم .
: لالا لازم تفضلي شويه ، والاولاد معاهم مرت الحيوان داك بتهتم بهم ، وانا هنا بهتم بك حبييتي .
: صحي عملتو فيه شنو .
: فتحنا فيه بلاغين ، والله العظيم يا سمر لو ما اتسجن واتأدب انا قلبي ما يرتاح ، دا واحد باطل شغال يضرب مرتو ليل ونهار وكمان ضربك وخسرنا ولدنا .
: طيب يا نزار بما انك جيت امشي شوف شغلك ، انا عاوزه انوم .
: بقعد جنبك .
: لالا خليني براي لو سمحت ، هو طبعا فهم انو انا عاوزه ابكي 💔 مشى مكسور مني ، وانا من اديت وشي للحيطه بكيت لمن الله غفر لي ، بالجد كان نفسي في ولد منو . انوجعت من خسارتي للفي بطني قبل حتى م اعرف به ، وافرح بحملي الكنت بحلم به من نزار😣 اااخ من الوجع الحسيتو لحظتا .
نمت بعد بكيه طويله ، جاء صحاني وقال لي : بقيتي احسن؟
هزيت راسي ، قال لي : نمشي البيت؟
: ايوا .
: قالو مهيلم مقوم الدنيا ، وعاوز يرضع ، فكرت اجيبو لك بس تاني اتراجعت ، لانو صغير وجو المستشفى دا م كويس عشانو .
: انا اصلا ما عندي شي ، الحمل صغير ، زي ما بتقول امي نقطة دم صغيره !!! حسيت بغصه في حلقي ، وهو لمن بلع ريقو من الحسرة !! قال لي : الموضوع دا م ح يعدي كدا صدقيني ، لو ما خليتو يندم على العملو فيك ابقى م اسمي نزار ، اسي هو عاوز يعمل تسويه بس ما يحلم اخليه يطلع من السجن .
: ما تتشدد كدا .
: لا ح اتشدد واكتر ومرتو برضو م حتخليه .
جاء ساعدني دخلت الحمام ولبست ، بعداك مشينا البيت مع كيس علاجات ، اول ما وقفت قدام الباب حسيت براحه كبيره وشعور بالمحبه والدفئ 💚 ذي السمكه الاجبروها تعيش برا المويه لدقائق اختنقت !! ورجعوها تاني ، وفرحتي كملت بشوفة الاولاد جارين علي ، واي واحد اخد مكان في حضني !!!
من ليان لحدي مهيلم الكان بلحقهم بخطواتو الصغيره ديك .
نزار مشى له لمن شافو وراهم ، وشالو ختاه في حضني معاهم انا لحظتا حسيت اني ملكت العالم وما عندي اي امنية تانيه غير انو اللحظة دي تدوم وما تنتهي ابدا ، بعداك جات المرا..
اسما عرفه ، سلمت علي وتعتزر سااااي ، هي زاتا حالتا بالبلاء دخلنا جوا ، جابت لي مويه ومجهزه الاكل ، ما شاءالله نضفت البيت وطبخت بتعبا دا ، وفرشت لي السرير بمخداتو قالت لي ارقدي ارتاحي .
: كتر خيرك ما قصرتي مع اولادي .
: دا ولا شي قصاد العملتوه معاي انتي وزوجك ، والله يداب عرفت انو الدنيا لسه بخيرا ، وفيها اولاد حلال زيكم ، والله ما حصل واحد من الجيران رفع راسو عاين لي ساي ، وانا بستنجد ولو م انتي استفزيتيهم بكلامك امس م كان جو ، والله دا زمان انعدمت فيه الإنسانيّة ، قلت لها : وانتي ليه ساكته للراجل دا يضرب فيك صباح ومساء؟ ما كان تكلمي أهلك .
: انا اهلي بعاد ، امي وابوي في مصر سافرو بسبب الحرب وفضلت هنا براي .
قلت لها : واخوانك وباقي اهلك .
قالت لي : والله الزمن دا مافي زول بقى فاضي لزول ، اخوي زاتو مشغول ب اسرتو ، لمن كلمتو غلطني انا !! وقال لي : تحترميه وتتحملي ، دا كلو عشان ما الزمو بشي !!! ولا يركب مواصلات عشان يجيني ، ولا اضطر امشي له ازيد مسؤولياتو !!
والله الحرب دي خلتنا نعرف معادن الناس ، حتى اقرب الاقربين طلعو بوشين .
نزار قال لها : ربنا موجود ، خلقنا وهو البدبر امورنا ، ويسخر لنا البساعدونا ويقيفو معانا .
قالت له : صحي الجار قبل الدار !!! وذي ما بقولو جارك القريب القريب ولا لد امك البعيد ، هدا المثل إتطبق فيني حرفيا .
قلت لها : نحن معاك ، بس الراجل دا لازم يتأدب .
قالت لي : اصبري عليه بس ، انا اتصلت ب ابوي وقال جايه ومن السجن دا والله ما يطلع ، بس اتحملوني كم يوم لمن يجي ، قلت لها : استغفر آلَلَهّ آلَعٌظُيَمً ، والله نشيلك في راسنا .
انا استأذنتهم ومشيت غرفتي ارتاح حبه ، جابو لي شوربه . نزار جاء حضني وقال لي : ح اكلك بيدي .
قلت له : بتعمل في شنو انت؟ زح ما يجي زول يشوفنا ، وكمان معانا ضيفه ، قعد يضحك وقال لي : يا سلام ، نسيتي لمن كنتي بتحضنيني قدام الاولاد وتتصلي بي في الشغل تقولي لي تعال احضني؟؟؟؟!!
خجلت ونزلت راسي قلت له : داك وحم ساي🙈
: ياخ لو الوحم كدا ياريت تكوني وحمانه العمر كلو .
خجلت زياده لمن غطيت وشي 🙈 ، ضحك فيني وقال لي : كمان رجعتي للخجل؟ كنتي بتعايني جوا عيوني وتقولي لي بحبك ، ان شاءالله تحملي في اقرب فرصه ونرجع لايام الغنج والدلال 😍 .
: ان شاء الله يا نزار ، بس اعمل حسابك وحمي ما كلو سمح كدا !! بتزكر بشادن كنت بكره زوجي شديد ، ولا بطيق اشم ريحتو مرات الا يبيت برا .
: يا لطيف !! البنات اصلهم قاسيات خلاص😅 جيبي لينا ولد ظريف كدا ذي هاني ومهيلم .
: انا زاتي متمنيه اجيب لك ولد يشيل اسمك حبيبي .
قلتها وانا منزله راسي تاني🙈 قال لي : الله يرحم ايام الوحم .
تاني يوم ب المساء سمعت الباب بدق ، وانا راقده في الحوش . عرفه جوا مع الاولاد ، شغاله تطبخ وتنضف الله يديها العافيه . قمت انا عشان افتح ، قلت اكيد ديل اهلا لانهم قالو جايين وهي مترقباهم .
فتحت الباب وكانت المفاجأة !!! 😱😱😱😱انا حسيت بهبوط عديل كدا لمن شفتا ، وعاوزه اجري بس ، من الموقف دا .
عاجلتني وجرتني من يدي ، ضمتني على صدرا وهي بتبكي وتقول بنتي !! وانا بردد في نفسي
: امي !!!
« خذني في رحلة قصيره الى داخل قلبك ❤ دعني اغوص في اعماقه ؛ لأرى كيف تعشق بهذا الجنون !!!!
لطالما تمنيت ان ارى صورتي تتربع على عرشه !!! واسمع نبضاته بأسمي على وتيرة واحده .
كيف لذلك القلب ان يسع الجميع !!! وتعيش المشاعر داخله بأمان ، يربت على الخوف بكف الطمأنينه ، ويغادره اليأس من ذات الباب !!! كيف يبكي بلا انين !! وينزف عشقا للجميع »
يتبع